7103
إحنه غير حسين ما عدنه وسيله والذنوب اهـــواي چـفّـتـها ثجيله
منهاج ذكرى ولادة سيدي ومولاي الإمام محمد الجواد عليه السلام
قصيدة { محلى فرحتنا }
للجواد ... محلاهه فرحتنا
للجواد ... نضويهه شمعتنا
تاسع ضوه شع بالفرح هالليله
تاسع ضوه شع بالفرح هالليله
.....................................................................
ليلة أفراح ومسرّه شگد جميله
ندعي الله تكـــون ليلتنا طويله
كل گلب لٱبن الرضا ينبض دليله
تاسع الأنوار بالعتره الجليله
للمُراد ... مفتوحه بيبانه
للمُراد ... يسمعهه دعوانه
باقة ورد بٱجمل عطر نهديله
تاسع ضوه شع بالفرح هالليله
.....................................................................
الليلة جنّة تصير أرض الكاظمية
الليله ميــلاد الفخـــر يالجعفرية
گلب واحد ننجمع هـــاي المسية
والمشاعر بالعــشــگ أغلى هدية
حبنا زاد ... والفرحة عشناهه
حبنا زاد ... والليله محلاهه
واليوفي ويانه فرض نوفيله
تاسع ضوه شع بالفرح هالليله
.....................................................................
أجمل آيات التهاني بفرحــة أعياد
نهنّي بيهه المنتظر موعود الأمجاد
ندعي ربنا بالفـــرج يـم باب المراد
من أرض موسى ومُحمّد أرض بغداد
للمعاد ... هاذي عقيدتنه
للمعاد ... نوفيهه عترتنه
للمهدي كلنا بالفرج ندعيله
تاسع ضوه شع بالفرح هالليله
.....................................................................
يــلا يا أحــبــاب يــلا يا نشامه
للجواد الليله فرحـتـــنـه علامه
بالحشر من چفه نتقلد وسامه
بالشفاعه نفرح بيوم القيامه
نوره عاد ... وتشعشع اعلينه
نوره عاد... يضـــوي أماسينه
كلمن يحبه يهتف بكل حيله
تاسع ضوه شع بالفرح هالليله
.....................................................................
تاســـع العتره الأطايب لم شملنه
واجب الليله وفرض نفرحله كلنه
نشكر البــــاري لأن شيـعـه جعلنه
بعترته البــر الأمـــان إحنه وصلنه
ربنا راد ... يكرمنه بفضاله
ربنا راد ... بالمصطفى وآله
جلّت قُدرته والفرض تبجيله
تاسع ضوه شع بالفرح هالليله
.....................................................................
خادم الإمام الحسين عليه السلام
عمار هليل الواسطي
إنتظرونا في ١٠ رجب ١٤٤٦ هجري
ذكرى ولادة سيدي ومولاي الإمام محمد الجواد عليه السلام
قصيدة { نبع الشهامة }
ذكرى وفاة سيدتي ومولاتي أم البنين عليها السلام
نبع الشهامه ... ربّت نشامى
.................................................................................................................................
أم البنــيــن الطاهــره ولكل وفــه برهان
يكفيهه من باب الفخر جابت گمر عدنان
هالليله ليلتهه بحزن تتوشح الأكوان
بسم الوفه يخط الدمع فوگ السمه عنوان
منهل كرامه ... ربّت نشامى
.................................................................................................................................
هاي الوفيّه الصابره وتشهد دموع العين
ظلّت على جمر الحزن تنطر قدوم حسين
مشبوحه العيون وفلا تدري الطريق منين
بالفجعه محنية الظهر وسفه گصاهه البين
لجل الإمامه ... ربّت نشامى
.................................................................................................................................
وصّت ولدهه الأربعه ومنهه الدمع مدرار
كلكم فداء بكربله السبــــط النبي المختار
گدّامـــه طيحتكم شـرف يالأربعه الأقمار
ســـور وعــلـى إبن الولي ماريد أبد يحتار
تنطر علامه ... ربّت نشامى
.................................................................................................................................
لجل العقيله والضعن يهل الشرف حرّاس
عهدي كتبتــه الفاطــمــة ولآخـــر الأنفاس
أتباهى يكفل زينــبــي بطف كربله العباس
هالغالي تربات الفحـــل والغيره غيرةْ راس
باشط حُسامه ... ربّت نشامى
.................................................................................................................................
من صاح إبن حذلم بشر والنبره كلهه اهموم
گالتله جايب يا خـبــر چنّ هالخبر مشؤوم
گلهه النشامى الأربعه راحت سوه بفد يوم
گالتله عــوف الأربعه حاچــيــني بالمظلوم
فِهمت كلامه ... ربّت نشامى
.................................................................................................................................
من سمعت حسين إنذبح أحنت ظهرهه بنوح
لطمــت على الراس بحــزن واويلي عالمذبوح
فگد الغـــيــارى بـكــربـله ضاعف عليها اجروح
رادت عــلـــى جــنــح الهــوه للغاضـــريه تروح
حد القيامه ... ربّت نشامى
.................................................................................................................................
إكراماً لهذا الوفـــه وي عـتــرة الأطياب
رب العرش شاء وبقت للحاجه هيّه الباب
إنخاهه يالطحت بعسر تاخذ أكيد إجواب
إقسم عليهه بكــربــلــه وبفجــعـت الغيّاب
تعود بسلامه ... ربّت نشامى
.................................................................................................................................
خادم الإمام الحسين عليه السلام
عمار هليل الواسطي
قصيدة { الفاتحة }
ذكرى وفاة سيدتي ومولاتي أم البنين عليها السلام
إقــره الفاتِـحــه واطلــــب مـنــهــه بأمــر باريهه
عليهه اقسم بنحر حسين وأصعب شِدّه تگظيهه
...................................................................................................................
كفاهه امن الفخر جابت سلطان الوفه العباس
هاي أم البنين وبــيـك تدري وتعرف الاحساس
إذا ضـــاگ الدهـــر مرّه بــيــك وكـــدّر الأنفاس
إدعي الباري وانخاهه ... باب الحاجة تلگاهه
بيهه الفخر يتباهه
من حضرة أبو فاضل هاي الليله حاچيهه
...................................................................................................................
حاچيهه بگلب محروگ إنعاهه بدموع العين
هاي البقت منتظره يــرد ليهه الشهيد حسين
لاچن ما رجع والنوح فرض أمره وگصاهه البين
أم الأربعه الأقمار ... ظلت تسچب الأعبار
على آل النبي الأطهار
وفيّه وصابره للموت ما گطعت بواچيهه
...................................................................................................................
كفو منهه يزايــرهــه تحضــر بالشـدد يمّك
أكرمهه الآله بــهــاي بـيــهـه ينـجـلــي همّك
تواسيهه بحزنهه اليوم وتكتب بالسجل إسمك
يلّي تنوح هذا أجرك ... أم الأربعة تحضرك
بيهه ينكشف ضرّك
ما دام بدموع العين والحسرات توفيهه
...................................................................................................................
چانت أمنيتهه يصير گبرهه بكربله المظلوم
بين حسين والعباس لاچن كل قدر مرسوم
ثلث تنعام من عدهه هذا اليوم وبكل يوم
توافي الزهره بالأبطال ... نشامى وكل فحل خيّال
وبيوم الملاگه ارجال
تشهد كربلاء حسين من لمعت مواضيهه
...................................................................................................................
يالزاير تعال وشـــوف من حضرة أبو فاضل
حاچيهه بگلب مشتاگ ولأعلى الحزن واصل
إذا حل البلاء اعــلـيـــك والأصعــب بعد نازل
بس گلهه يماي العين ... عليچ أقسم بنحر حسين
ودم الأربعة الطيبين
من بعد العسر صدّگ يكون اليسر تاليهه
...................................................................................................................
لا تتردد وترجــع إطلب منـهــه كلشــي تريد
إقره الفاتحه بدمعك ثـــق هاي الدموع اتفيد
يا أم البنــيـــن أنــخــاچ صيــح وكرّر الترديد
ما تبقى أبد صعبه ... وحق مدمعهه بالغربه
هاذي لا تظن عجبه
كرامه وربنا أكرمهه وأكرم من يواسيهه
...................................................................................................................
دمعك واللطم مذخور وبيوم القيامه اهناك
أم الأربعة الأطـهـــار توگف بالشديدة اوياك
بآه يحسيـن ومــصـــابه يوم الحشر تتلگاك
سلام الله على الحرّه ... بالآهات والحسره
مصاب وواجب انذكره
عزاهه وواجب انقيمه وبالحسرات نرثيهه
...................................................................................................................
خادم الإمام الحسين عليه السلام
عمار هليل الواسطي
قصائد الليالي الفاطمية الرواية الثانية
قصيدة { حب فاطمة }
كلمن حضر بالمجلس اويانه
حب فاطمة الزهراء عنوانه
..........................................................
نفتخر وبطول الزمن
فاطمه للعاشگ وطن
عالمه يا أم الحسن ... تعرف خَدَمهه
شافعه وبيوم الحشر
كل محب بيهه يفتخر
يدخل الجنّه والأمر ... كلشي بأسمهه
تظل آيه تظل غايه أمر رب السمه
تبشّرنه تباصرنه شفيعه فاطمه
خدم كلنه ذخر إلنه عظيم المكرمه
لياليهه مآسيهه مشت ويا الدمه
كلمن ذكرهه دموعه قربانه
حب فاطمة الزهراء عنوانه
..........................................................
نفتدي حبهه بالعمر
نذكر العصره ننكسر
والدمع يجري من جمر نواسي الزچيه
نلطم ونبچي عالضلع
فاطمه بيهه ننفجع
مو عجب أحمر الدمع ..حبنا هويه
دمع دمنه على أُمنه عزيزة فاطمه
عشگ يسوه نعم فدوه إذا نبچي دمه
العمر كله وحق الله هديه انقدّمه
نواسي احنه علي صحنه علي حامي الحمه
هنياله كلمن ثبت إيمانه
حب فاطمة الزهراء عنوانه
..........................................................
كل زمن باقي هالعهد
فاطمه تصبح المدد
حاضره تبقه بالشدد ... تگظيهه كلهه
فاطمه ثورة النصر
فاطمة صرخة الكسر
فاطمة آية الصبر ... ربنا جعلهه
على الفطره تظل جمره إلى يوم الظفر
يرد ثاره مع أنصاره أملنا المنتظر
عن الأُمّه فلا غمه إذا حان القدر
يصفّيهه يساويهه إذا المهدي حضر
ثار الزچيه جرح وجدانه
حب فاطمة الزهراء عنوانه
..........................................................
يا وصف يوصف الحزن
للقبر كل گلب يحن
مؤلمة يا كلمة ( وإنْ ) طاغي حچاهه
ينبني المرقد ونرد
الفاطمه لا ما نبتعد
مجلس نقيمه والحشد ..بيهه ايتباهه
قبر فاطم أمر لازم نزوره عن قرب
منايرهه شرط تعله ولا يبقه صعب
أبو صالح يبشرنه حبيب الكل گلب
مشي نطلع فرض سادس ولا يصعب درب
مشايه للزهراء ولهانه
حب فاطمة الزهراء عنوانه
..........................................................
فاطمه تقبل العمل
فاطمه تمنح الأمل
فاطمه تحضر بالأجل .لكل من خدمهه
فاطمه تحضر بدمع
فاطمه چفهه عالضلع
فاطمه والله تستمع .. فدوه الإسمهه
نوافيهه توافينه تجازينه غداً
تسجلنه توصّلنه الى جنة عدن
نباريهه نوافيهه عهد وبكل زمن
شعائرنه نعم كلهه نعم أم الحسن
كل خادم ودمعاته برهانه
حب فاطمة الزهراء عنوانه
..........................................................
خادم الإمام الحسين عليه السلام
عمار هليل الواسطي
قصائد الليالي الفاطمية الرواية الثانية
قصيدة { موعد الثار }
ثار الزچيّه ينــتــظر ميعادك
يالمنتظر تكتب نصر أمجادك
من چف علي الچفك نقل أسراره
يالمهدي من تظهر تسل فقّاره
يا غيرة الله يا فخر أجدادك
.........................................................
مكتوبه الك يوم الظفر هالغايه
كلمة شرف بسمك تره مسمايه
راية نصر بيدك ترف الرايه
تجبر كسر أم الحسن يا آيه
يا صاحب الثار العَجَل مولانه
يلي الفرج بسمك كتب عنوانه
يالصولتك صولة علي وبتّاره
يالمهدي من تظهر تسل فقّاره
يا غيرة الله يا فخر أجدادك
.........................................................
عاشت حزن ماتت قهر مظلومه
عبر الزمن تدعيلك المهضومه
تدعي الفرج والباري يعلم يومه
ثارات الك وبذمتك ملزومه
تسطع شمس والما قبل يا ويله
تبني القبر والعاهدك يمشيله
والحيدره عزمك تصل أخباره
يالمهدي من تظهر تسل فقّاره
يا غيرة الله يا فخر أجدادك
.........................................................
عشت بغرب طول الزمن يالغالي
من غيبتك ترجـــع نصــر بالتالي
رغم الظلم نجمك سطع ضي عالي
يبن الحسن غيره وعزم يالوالي
حتماً تجي وكل شيعتك عد عينك
راية علي وسيف الولي بيمينك
بي تنتصر رغم الظلم واشراره
يالمهدي من تظهر تسل فقّاره
يا غيرة الله يا فخر أجدادك
.........................................................
تدري السبب لا مو عجب يالقائم
كسرو ضلع سگطو طفل من فاطم
أعداء الك والحاربك ما دايم
هم ينتهي وتبقه الملك والحاكم
دولة عدل عهد الظهور ويومه
ترفع شعارك فاطمة مظلومه
وبيا علي وجهك تشع أنواره
يالمهدي من تظهر تسل فقّاره
يا غيرة الله يا فخر أجدادك
.........................................................
ناس الفلا عدهم ذمم عدوانك
گالو خرافه وما حچو برهانك
باجر تخط فوگ السمه عنوانك
فارس فحل من يوصل الميدانك
كل النواصب سيفك اليمحيهه
والرايه فوگ المرقد اتخليهه
گلب الوصي بنصرك تبرّد ناره
يالمهدي من تظهر تسل فقّاره
يا غيرة الله يا فخر أجدادك
.........................................................
تبني القبر رغم الكفر وتعمره
ندخل سوه بمجلس لطم للحضره
بصرخة حزن نهتف يا أمنا الزهره
يمك بعد هذا العهد كل أمره
يم فاطمه مجلس عزا بوجودك
توفي النذر كلّك وفه لعهودك
وارث شجاعة حيدر وآثاره
يالمهدي من تظهر تسل فقّاره
يا غيرة الله يا فخر أجدادك
.........................................................
خادم الإمام الحسين عليه السلام
عمار هليل الواسطي
منهاج ذكرى ولادة سيدي ومولاي الإمام المهدي المنتظر عجّل الله تعالى فرجه الشريف للعام الهجري ١٤٤٥ هجري الموافق ٢٠٢٤ ميلادي
قصيدة { أمل حبي }
عاشگ ما نسيتك ... وبروحي لگيتك
مولاي وإمامي ... يا أمل حبي
يا مهدي ... يا مهدي ... يا مهدي
يا مهدي ... يا مهدي ... يا مهدي
.......................................................................................
هلا يا غيرة الله وهيبة القرآن
عاشگ يا إمامي والگلب ولهان
أحبك يلسكنت الروح والوجدان
أحسب ساعه ساعه المنتصف شعبان
أفرح بالولاده ... أنشرهه السعاده
أبعثلك سلامي ... يا أمل حبي
يا مهدي ... يا مهدي ... يا مهدي
يا مهدي ... يا مهدي ... يا مهدي
.......................................................................................
الك كاتب رسائل شوگ يالغالي
محبوبي وتظل محبوبي للتالي
أكيد إحساس گلبك يعرف بحالي
عاشگ والهجر يالمهدي چتالي
يا يوم الأشوفك ... محله أربع حروفك
يوصلّك كلامي .. يا أمل حبي
يا مهدي ... يا مهدي ... يا مهدي
يا مهدي ... يا مهدي ... يا مهدي
.......................................................................................
يومية بدعاء العهد هالرغبه
أشوفك واليحبك تعلم بگلبه
يوم الجمعه أتاني وجمعتي صعبه
بدونك وابقى أدعي الباري بالنُدبه
بالندبه أتاني ... يا أحلى الأماني
يا شوگي وهيامي .. يا أمل حبي
يا مهدي ... يا مهدي ... يا مهدي
يا مهدي ... يا مهدي ... يا مهدي
.......................................................................................
هالليله عظيمه هواي أدريهه
لازم بالدعاء بروحي أحييهه
روحي بكربله تبعث أمانيهه
تكتبهه الك وينك يمهديهه
بحضرة جدك حسين ...وعباس يا ضوه العين
حبي وإحترامي .. يا أمل حبي
يا مهدي ... يا مهدي ... يا مهدي
يا مهدي ... يا مهدي ... يا مهدي
.......................................................................................
ملايين التزور بكربله الليله
تشيل اچفوفهه للباري تدعيله
يا ربنا الفرج ونريد تعجيله
طال الإنتظار شگد نتانيله
واني بكل ولائي ... للباري دعائي
تظهر گلبي ظامي .. يا أمل حبي
يا مهدي ... يا مهدي ... يا مهدي
يا مهدي ... يا مهدي ... يا مهدي
.......................................................................................
بقلم / خادم الإمام الحسين عليه السلام
عمار هليل الواسطي
شعبان /١٤٤٥ هجري
شباط / ٢٠٢٤ ميلادي
منهاج ذكرى ولادة سيدي ومولاي علي الأكبر عليه السلام للعام الهجري ١٤٤٥ الموافق ٢٠٢٤ ميلادي .
الأهازيج ( الهوسات )
بميلادك فرحنه وكلنه نادينه
هلا بأشبه الناس بنور هادينه
نعمة ورحمة جيتك فضل بارينه
والعيد بأسمك محلاته
محلاته اعله اسمك من يهل العيد
علي الأكبر ونعم الأصل بالتأكيد
لأملاك السمه التهليل والتمجيد
والباري اليسمع دعواهه
كفو منك يضيغم ما تهاب اعداك
نفس جدك علي وعالي يظل معناك
سيف بيمنتك يا فارس اتلگاك
ما يلحگ يبلع زردومه
بقلم / خادم الإمام الحسين عليه السلام
عمار هليل الواسطي
شعبان / ١٤٤٥ هجري
شباط / ٢٠٢٤
منهاج ذكرى ولادة سيدي ومولاي علي الأكبر عليه السلام للعام الهجري ١٤٤٥ الموافق ٢٠٢٤ ميلادي
الأبوذيات
بميلاده الفرح بيّن علينه
وفوگ النجم بالبشرى علينه
شبيه المصطفى الأكبر علينه
شع بهالمسه عالكون ضيّه
تهانينا لأبو السجاد حييت
بفرح طافت أمير العشگ حييت
إزغار إكبار بالميلاد حييت
لعلي الأكبر فرحهه بهالمسيه
اليسأل مالهه الوادم شبيهه
نجاوبهه وجواب إبلا شبيهه
انولد للمصطفى الليله شبيهه
علي الأكبر إبن روح الزچيه
بقلم / خادم الإمام الحسين عليه السلام
عمار هليل الواسطي
شعبان / ١٤٤٥ هجري
شباط / ٢٠٢٤ ميلادي
منهاج ذكرى ولادة سيدي ومولاي الإمام علي بن الحسين السجاد زين العابدين عليه السلام للعام الهجري ١٤٤٥ الموافق ٢٠٢٤ ميلادي
قصيدة { يا هلا بميلاد زين العابدين}
ليلة فرح يا مؤمنين ... يا هلا بميلاده
ميلاد زين العابــدين ... يا هلا بميلاده
................................................................
الگلب الحسين الليله أحلى ابشاره
مولد علي السجاد تضوي أنواره
بيت الحسين أجمل فرح خطاره
والشاعر يخط بالسعاده أشعاره
ويهنّي كل العاشقين ... يا هلا بميلاده
ميلاد زين العابــدين ... يا هلا بميلاده
................................................................
زين العباد ونور وجهه الساطع
سبحان ربنا الخلق گلبه الخاشع
من المهد للباري ساجد راكع
تاريخه زاهر لليحب ايراجع
سيد السادة الخاشعين ... يا هلا بميلاده
ميلاد زين العابــدين ... يا هلا بميلاده
................................................................
بأحضانه من شاله الحسين بلهفه
قبّل جبينه ورجع قبّل چفه
حيره الحرف گبل الوصف شيوصفه ؟
تتشرف الأمجاد تكتب حرفه
من إسم أمير المؤمنين ... يا هلا بميلاده
ميلاد زين العابــدين ... يا هلا بميلاده
................................................................
إسمه علي وجدّه علي مولانه
وبمولده جن وإنس فرحانه
من صغره روحه بخالقه ولهانه
وچفوفه أبد ما فارگت قرآنه
جده علي الحصن الحصين ... يا هلا بميلاده
ميلاد زين العابــدين ... يا هلا بميلاده
................................................................
كلمن حضر هذا الحفل للغالي
يتفاخر بمولد حفيد الوالي
رابع إمام وبيرغه بالعالي
بحبه الشفاعه والفخر للتالي
نادينه بالحق واليقين ... يا هلا بميلاده
ميلاد زين العابــدين ... يا هلا بميلاده
................................................................
بقلم / خادم الإمام الحسين عليه السلام
عمار هليل الواسطي
شعبان / ١٤٤٥ هجري
شباط / ٢٠٢٤ ميلادي
منهاج ذكرى ولادة سيدي ومولاي قمر العشيرة أبي الفضل العباس عليه السلام للعام الهجري ١٤٤٥ الموافق ٢٠٢٤ ميلادي
الأهازيج ( الهوسات )
ما غاليت أبد بشعاري عالكافل
لأن ملح القصائد إسم أبو فاضل
گظّاي الحوائج والأجر واصل
من عنده شأطلب ينطيني
...............................................................
مو بس الشجاعة وفزعة الميدان
ولا خوف المنايا ورجفت العدوان
تره العباس عالم فحل بالقرآن
حافظ ويفسر آياته
...............................................................
شبيه المرتضى من يطب للحومه
گول الموت إجه واتوضحت اعلومه
اليشوفه يريد يشرد منه بهدومه
يتراجف من خزرت عينه
...............................................................
بقلم / خادم الإمام الحسين عليه السلام
عمار هليل الواسطي
شعبان / ١٤٤٥ هجري
شباط / ٢٠٢٤ ميلادي
منهاج ذكرى ولادة سيدي ومولاي قمر العشيرة أبي الفضل العباس عليه السلام للعام الهجري ١٤٤٥ الموافق ٢٠٢٤ ميلادي
الأبوذيات
گمر وسط السمه عالي منصّه
اعله حــبــك للوفه آية منصّه
بوسط گلبي العشگ خلّه منصّه
وقره الحبك قصائد وأبوذيه
.............................................................
كل جيش الگحمته طاح وانهار
شجاع وما يوگفك ليل وانهار
مو بس الفرات إبحور وانهار
حدر رجليك فدوه تروح هيّه
.............................................................
عهد عن خدمتك لحظه منلهه
نعمه وعالبشر ربك منلهه
وهيه البشر چا غيرك منو الهه ؟؟
تدگ بابه ويحل أكبر رزيه
............................................................
بقلم / خادم الإمام الحسين عليه السلام
عمار هليل الواسطي
شعبان / ١٤٤٥ هجري
شباط / ٢٠٢٤ ميلادي
منهاج ذكرى ولادة سيدي ومولاي الإمام الحسين عليه السلام للعام الهجري ١٤٤٥ الموافق ٢٠٢٤ ميلادي
قصيدة { ميلاد الحبيب حسين }
أجمل تهانينه ... حُسين
بميلاد غالينه ... حُسين
بسم الله هاي الليله نبديهه
فرحتنا لهل البـيــت نهديهه
حُسين ... حُسين
................................................................................
سطع شعبان نوره بمولد الغالي
هلا بشهر الفرح والفرح للتالي
سَر گلب النبي والزهره والوالي
كل عاشگ ينادي الفرحه تحلالي
بهالعيد نادينه ... حُسين
أغلى أمانينه ... حُسين
كل روح تهوى حسين غاليهه
فرحتنا لهل البـيــت نهديهه
حُسين ... حُسين
................................................................................
بميلاد الحبيب نجدد الذكرى
وأملاك السمه تتناقل البشرى
عيد وصار عيد العالم بأسره
تحيه للولي وللطاهره الزهره
عيد وعناوينه ... حُسين
من نور بارينه ... حُسين
بأجمل قصائد عشگ نحييهه
فرحتنا لهل البـيــت نهديهه
حُسين ... حُسين
................................................................................
هالليله الحناجر كلهه صدّاحه
والعاشگ بدت من هسه أفراحه
فطرس يا كرامه الرجعت إجناحه
إجه يبارك الغالي وللمهد لاحه
رجّعله جنحينه ... حُسين
دمعت فرح عينه ... حُسين
كل المَلَك كتبت أساميهه
فرحتنا لهل البـيــت نهديهه
حُسين ... حُسين
................................................................................
صلاة الله وسلامه من گلب خاشع
على الأربع حروف بأسمك اللامع
حاء وســـيــن ياء ونون يا سامع
مولد رحمة الله وبالحشر شافع
بهجت ليالينه ... حُسين
شافعنه والينه ... حُسين
فدوه إله الأرواح ننطيهه
فرحتنا لهل البـيــت نهديهه
حُسين ... حُسين
................................................................................
قليله أرواحنه السبط النبي نهدي
بأهلنه ومالنه شنجازي من نفدي ؟؟
مثل ما بالدعاء بكل سنه نبدي
نختم بالدعاء الطلعة المهدي
يحضر أماسينه ... حُسين
وينادي مهدينه ... حُسين
والتهنئة بلسانه يحچيهه
فرحتنا لهل البـيــت نهديهه
حُسين ... حُسين
................................................................................
بقلم / خادم الإمام الحسين عليه السلام
عمار هليل الواسطي
شعبان / ١٤٤٥ هجري
شباط / ٢٠٢٤ ميلادي
قصائد في ذكرى شهادة سيدي ومولاي الإمام موسى الكاظم عليه السلام
قصيدة { يا صاحب الزمان }
أنتَ المُعزّى سيدي يا خاتم العتره
..........................................................................................................................................
سابع جرح يبن الحسن وبگلبك آثاره
للكاظم وجمر الحزن لا ما طفت ناره
هالليله يبن العسكري تواسيك زواره
حاضر أكيد بفجعته يالحاضر إبداره
أتمنى منك سيدي هذا المسه نظره
أنتَ المُعزّى سيدي يا خاتم العتره
..........................................................................................................................................
نظره لجميع العاهدك ويتاني بالدمعه
موعد ظهورك وبصبر فاق وجزه السبعه
يحسبلك يظل سيدي امن الجمعه للجمعه
ضاگت تراهه بغيبتك بعيوني كل وسعه
ما تخمد بروحي أبد للحزن چم جمره
أنتَ المُعزّى سيدي يا خاتم العتره
..........................................................................................................................................
أقسم عليك بغربتك وبغربــــة الكاظم
لهاي الملايين الإجت تحضرهه يالقائم
كل دمعه سالت من جفن هذا الجفن حالم
حالم يشوفك والحزن وسط الگلب دائم
إنطيني من صبرك صبر گلبي خلص صبره
أنتَ المُعزّى سيدي يا خاتم العتره
..........................................................................................................................................
تتلگّه يبن العسكري هالليله كل زاير
تدعيله حتماً سيدي من گلبك الصابر
تقضي الحوائج بالدعاء الربّك القادر
وأدعيلك بيوم الفرج ريت الفرج باجر
دين الله بسمك ينتصر سيفك يخط نصره
أنتَ المُعزّى سيدي يا خاتم العتره
..........................................................................................................................................
بالكاظم الليله المحب واساك يالغايب
يالحاضر إنته بكل گلب يالطاعتك واجب
بدم الحسين بكربله غيرك منو يطالب
ثارات عندك تنتظر هذا الزمن كاتب
طوّل ظلام الفاجعه ليلك متى فجره
أنتَ المُعزّى سيدي يا خاتم العتره
..........................................................................................................................................
يخلص دمع عمر الشمع حزني طبع بيّه
أترقّبك يا سيدي ودنيانه مگظيّه
من بعد كل هذا الصبر لازم الك جيّه
هالدنيه تعدلهه بعد ما تبقى مچْفيّه
عهدك كتبته بالدمه وابْصَمت بالعَشره
أنتَ المُعزّى سيدي يا خاتم العتره
..........................................................................................................................................
خادم الإمام الحسين عليه السلام
عمار هليل الواسطي
قصائد في ذكرى شهادة سيدي ومولاي الإمام موسى الكاظم عليه السلام
قصيدة { كلمة شرف }
الك كلمة شـــرف گلنه وحچيناهه
حتى اعيوننا اعله الخد بچيناهه
………………………………………………………………………………………………………
بچيناهه عليك الليله بالحضـره
وجدّدنه العــهد يا راهـب العـتره
الك طول الدهر وسط الگلب حسره
مناحه بكل درب لجلك نصبناهه
………………………………………………………………………………………………………
نصبناهه ونخاف بيوم قصّرنه
ذكرناك ونعرفــك زيــن تذكرنه
شفيع وبالحـشــر لابد تباصرنه
هاي ارواحنه الحزنك هديناهه
………………………………………………………………………………………………………
وحق غربةْ حـيـاتــك والألـم والهَمْ
وحق جروح قيدك حيث تنزف دم
يا منــهـــج صبر والـنــاس تـتـعـلّم
عظيمه احروف صبرك بيهه نتباهه
………………………………………………………………………………………………………
قريناهه ولگينه اسنينك الصعبه
ابطاموره وحياتـك تـنـتـهي غربه
كل عاشگ بنــالك موطــن ابگلبه
قصايدنه بدمع يجري قريناهه
………………………………………………………………………………………………………
غريب وحتى نعشك وضّح امصابك
ترك حسرة وشجن بگلوب أحبابك
يــعـطّاي المــراد ومــا تـســد بــابــك
كرامات شكثر عندك لگيناهه
………………………………………………………………………………………………………
خاشع بالعباده وعالظــلـم صابر
شگد نفسك أبيّـه وگدرت اتكابر
حاضر بالگلب وبكل زمن حاضر
إلك كلمةْ شرف بالدم كتبناهه
………………………………………………………………………………………………………
إلك من كل كتر تـتـعنه زوارك
بوجودك للأبد مامونه بغدادك
ما خاب التمسّك بيك واختارك
وهواي المعاجز إحنه شفناهه
………………………………………………………………………………………………………
خادم الحسين عليه السلام
عمار هليل الواسطي
منهاج ذكرى ولادة سيدي ومولاي الإمام محمد الجواد عليه السلام
المقدمة
زادَ شوقي وحنينُ القلبِ زاد
وأنبرى يشــدو بحـــبٍ ووداد
شاكراً ربَّ العُلى ذا فضلَهُ
أكرمَ الناسَ ببابٍ للمُراد
ليلةُ الميلادِ ما أعظمَها
قد أطلَّ اليومَ مولانا الجواد
خلص گلبي ألم رايح والمراد
بزماني الحلف ياذيني والمراد
نخيت إبن الرضا الغالي والمراد
أخذته وزاح كل هم العليّه
إبتشر گلبي ونسى همّه جواداه
وكتب أشعاره وإحساسه جواداه
الليلة الدين يستقبل جواداه
هلا بإبن الرضا بهاي المسيّه
خادم الإمام الحسين عليه السلام
عمار هليل الواسطي
في رحاب سيدة نساء العالمين سيدتي ومولاتي الصديقة الطاهرة الشهيدة فاطمة الزهراء عليها السلام.
قصيدة ( شهادة السيدة الزهراء عليها السلام)
راحت والدمع ما فارگ العين
ويلي عالزچيه أم الحسين
صحت الله أكبر يا هضيمه
زينب ظلت الليلة يتيمه
وين أمي تنادي هالمسه وين
ويلي عالزچيه أم الحسين
..................................................................
فاطمه غمضت جفنهه وأصبح العالم كئيب
بيت الأحزان بأثرهه هالمسه وحشه وغريب
حيدر بدمعات عينه يا جرح عنده يطيب
ودع الليله الزچيه بالمدامع والنحيب
بعد أم الحسن ما طابت جروح
رايح بالمواجع يدفن الروح
يا حسرة مصابه
ما يخلص عذابه
فارگ فاطمه من گطعت البين
ويلي عالزچيه أم الحسين
..................................................................
بدفعة الباب وهضمهه وبالحطب مشتعله نار
تنكسر ضلعين منهه والدهر عالزهره دار
طيحت المحسن مصيبه شيبت حتى الزغار
والظلام بحزنه دائم ما أظن يطلع نهار
بسمار الحقد صوب صدرهه
بعده اثمنطعش وردة عمرهه
هالحاله عجيبه
هاي اكبر مصيبه
ترجع لليتامه فاطمه منين
ويلي عالزچيه أم الحسين
..................................................................
بالحسن وحسين حسره ما تطفيهه الدموع
ظلو الليله يتامه كل شهم روحه تلوع
شمعة البيت الزچيه تنطفي وتطفه الشموع
والكسر ضلعين منهه للسبط يهشم ضلوع
باچر كربله وحسرتهه حسره
حسين الداست الخيل اعله صدره
برض الغاضريه
بالطف هالرزيه
ما بين الخيم والباب نارين
ويلي عالزچيه أم الحسين
..................................................................
آخ يا حزن العقيله يا جفن عدهه ينام
من بعد أمهه تعاني والصبح يمسي ظلام
بكربله وتطلع سبيه والدمع كل دمعه شام
تنضرب بالسوط وسفه وعالترب واليهه نام
باچر والكفيل اخلاف عينه
سيوف التگطع ايساره ويمينه
تحتار العقيله
ما عدهه وسيله
تندب فاطمه وبالروح جرحين
ويلي عالزچيه أم الحسين
..................................................................
فاطمه الزهره الزچيه والمصاب أفجع مصاب
حيدر يشيع نعشهه وتندفن جوه التراب
ينخفي وسفه گبرهه وللفرج نحسب حساب
يظهر المهدي علينا من بعد طول الغياب
يبني المرقد بأيده الشريفه
لا تبقى نواصب لا سقيفه
ونعود الگبرهه
ونشارك قهرهه
ونصيح بعزاهه هناك صوبين
ويلي عالزچيه أم الحسين
..................................................................
خادم الإمام الحسين عليه السلام
عمار هليل الواسطي
قصيدة { إخذ روحي}
ذكرى وفاة سيدتي ومولاتي أم البنين عليها السلام
يا موت إخذ روحي ... حتى الگه مذبوحي
مشتاگه لحسين
.............................................................................................................................
آني أم البنيــن وهالطلب منّـي
طال الإنتظار وما خلـص ونّـي
أرحّب بيك أنا يا موت صدّگني
ما دامك تجي ولحسين تاخذني
من تاخذ اسنيني ... توصّلني لحسيني
وسنيني لحسين
.............................................................................................................................
صبرت وكابرت والشوگ مو عابر
يگظي اليــوم أگولــن أنتظر باچر
مشه ضعن الأحبّة وگلبي ظل صابر
على جمر الحزن صبـح ومسه يناطر
كل عمري أنتظره ... حسره بعد حسره
حسراتي لحسين
.............................................................................................................................
مو بس أربعة لو عشرة أولادي
أنذرهم سوه الريحانت الهادي
چانت شوفته آمالـــي ومْرادي
الدنيه بوادي كلها ودمعتي بوادي
أزرع ورد دربه ... لن فرگته صعبه
كل نذري لحسين
.............................................................................................................................
نعم يا موت نار بمهجتي الأشواگ
إخذ روحي الگظت من كثر ما تشتاگ
شحسبهه الجروح جروحي كلها اغماگ
مل مني الصبر والكون الأوسع ضاگ
من سافر الغالي... حال الحزن حالي
أحزاني لحسين
.............................................................................................................................
خلهه تموت روحي وما تظل اتنوح
من عاشر محرم ميته بيّه الروح
عشت بس الجسد ومناطره المذبوح
أنفاسي مواجع وانتظاري جروح
من تنتهي ايامي ... تاخذني للظامي
أيامي لحسين
.............................................................................................................................
تقرّبني يموتي لو إلك جيّه
من العاف أكثر من جرح بيّه
حسين وبالدمع أنعاه ليليّه
عزيز الطاهره الراضيّه المرضيّه
يا موتي نمشيله ... والموعد الليله
ملهوفه لحسين
.............................................................................................................................
چانت أُمنيه لو گبري يم گبره
نسيم الهاب منّه يزورني بعطره
حسين العنده ظلّت بالگلب حضره
شگد مشتاگه أشوفه هواي منتظره
ما ترجع ظنوني ... لو شفته بعيوني
وعيوني لحسين
.............................................................................................................................
خادم الإمام الحسين عليه السلام
عمار هليل الواسطي
قصائد الليالي الفاطمية الرواية الثانية
قصيدة { همي همك يا علي}
گلبي يمّك ... يا علي
همّي همّك ... يا علي
..............................................................................................................................
راح أودعك والگلب يمّـك يظل
والدمع من ناظري دم إنهمل
هاي آخــر ليلــه يا خـيــر العمل
الله يعلم بدت ســاعــات الأجل
بروحي رسمك ... يا علي
هـمّـــي هـمّــك ... يا علي
..............................................................................................................................
أعتـذر منّــك وأعرفك تـنـفـجـع
غالي دمعك يا علي مو أي دمع
ما گلتلك بيّه كسروا چــم ضلع
وهذا خدي بچف حقدهم ينصفع
خاف الچمك ... يا علي
همّي همّك ... يا علي
..............................................................................................................................
بين الضلوع الألـــم يالمرتضى
ضاگ بعيوني شفت حتى الفضا
بالقيامه إعداي حصّتهم لظى
كل حقود بهالفعل گلبه ارتضى
اشسوّه خصمك ... يا علي
همّي همّك ... يا علي
..............................................................................................................................
لو خِـتَــم مــوتــي مـحــطات العـمـر
بالظــلام تشــيــل نعــشـي وهذا سر
يا علـــي عن البــشــر تخـفـــي الگبر
بالصبــــر أُوصــيــك بــعـــدي بالصبر
أدري عزمك ... يا علي
همّي همّك ... يا علي
..............................................................................................................................
ومــن تـكـمّــل دفـنــتـي وجرحك أليم
يا عـــلـــي وشكـــواك للبـــاري الرحيم
عــهــد بـيــني وبــيـنك وربــنـــا العليم
اتــزورنـــي وتــرتّل آيات الكريم
فدوه لٱسمك ... يا علي
همّي همّك ... يا علي
..............................................................................................................................
يلّي بــيــك الصعــبــه تگـظــي وتنجلي
بــزيــنــبــك أوصــيــك يالــغــالـــي إلي
يا عـــلـــي ما عـــدهــه غــيــرك يا علي
چــم مـصــيــبه تشــوف بنتي وتـبــتــلي
شگد تهمّك ... يا علي
همّي همّك ... يا علي
..............................................................................................................................
يا عــلــي بدهـــر العـجايـــب والفـتن
هواي راح تــشــوف وشــويّـــه الگظن
عشت مهمــومــه ومتــت هضم ومحن
وآني بــت خــيــر البـــشــر يابه الحسن
شگد يهضمك ... يا علي
همّي همّك ... يا علي
..............................................................................................................................
خادم الإمام الحسين عليه السلام
عمار هليل الواسطي
منهاج ذكرى ولادة سيدي ومولاي الإمام المهدي المنتظر عجّل الله تعالى فرجه الشريف للعام الهجري ١٤٤٥ هجري الموافق ٢٠٢٤ ميلادي
الأهازيج ( الهوسات )
الليله نصيح كلنه وبگلب لهفان
هلا ومية هلا بخمسطعش شعبان
إنولد قائم العتره وغيرة الرحمن
محلاهه الفرحه بمهدينه
باچر مو بعيد ويظهر الموعود
بعقيدتنا بقينه ويعلم المعبود
حي يُرزق المهدي بكل گلب موجود
والينكر خلي يطم روحه
نحسب للظهور وكل گلب مجمور
يا يوم النشــوفك نور يـبــن النور
تنشر رايتك غصبن على كل جور
راية عباس ترد بيهه
بقلم / خادم الإمام الحسين عليه السلام
عمار هليل الواسطي
شعبان / ١٤٤٥ هجري
شباط / ٢٠٢٤ ميلادي
منهاج ذكرى ولادة سيدي ومولاي الإمام المهدي المنتظر عجّل الله تعالى فرجه الشريف للعام الهجري ١٤٤٥ هجري الموافق ٢٠٢٤ ميلادي
الأبوذيات
محبتك طاعة للـبــاري وجنّه
ودمعات الفرح حضنت وجنّه
الليله العالم بأُنسه وجنّه
بميلادك فرح يبن الزچيه
الليله بعيد ميلادك فرحنه
يمن تفديك كل مهجه فرحنه
سمعنه المحفل بإسمك فرحنه
نقدم أعمارنه بعيدك هديه
هلا بجــــيــتك يغالينه وملنه
اعله دربك ما زلفنه ابداً وملنه
يمهدي أعمارنه فدوه ومالنه
الك يا صاحب الطلعة البهية
بقلم / خادم الإمام الحسين عليه السلام
عمار هليل الواسطي
شعبان / ١٤٤٥ هجري
شباط / ٢٠٢٤ ميلادي
منهاج ذكرى ولادة سيدي ومولاي علي الأكبر عليه السلام للعام الهجري ١٤٤٥ الموافق ٢٠٢٤ ميلادي
قصيدة ( أجمل تهاني )
كتبنا أجمل أمانينا ... محبتنا وتهانينا
والفرح يكبر .. يا علي الأكبر
................................................................................
الك أجمل تحيه الليله نهديهه
ليلة مولدك بالفرحه نحييهه
ليلة اتميزت من فضل باريهه
شع نورك يغالي ونورت بيهه
الك أشواگ مكتوبه ... غزل عاشگ بمحبوبه
بحبك اتصدّر .. يا علي الأكبر
................................................................................
فرح گلب الحسين الليله واستبشر
سماك اعله اسم المرتضى حيدر
علي ونعم الاسم ولكل فخر مصدر
علي الحق والشرف والمجد بي يفخر
تجي الأملاك يم مهدك .. تبوسك سيدي بخدك
بدرك الأزهر .. يا علي الأكبر
................................................................................
أخلاق وخلق تشبه نبي الرحمه
ميلادك سعاده ومحتوى النعمه
ممنوع الحزن هالليله عالأمه
عيد وأحلى عيد الليله للبسمه
فرح وأعياد يالغالي ... حفيد المرتضى الوالي
بالوغى حيدر .. يا علي الأكبر
................................................................................
كل عاشگ محب باقة ورد يهدي
ميهمه الوكت شيجيب شيودي
ختام التهنئة بدعواه للمهدي
دعه الباري الظهوره يعجّل ويبدي
دعاءه للفرج دائم .. الظهور السيد القائم
كلنا نتنطر .. يا علي الأكبر
................................................................................
ختام ويا مسك يوصل بعد عطرك
نعاهد يا علي بكل محفل انذكرك
فدوه أعمارنه نهديهن العمرك
يا بدر الدجى وفجر الكرم فجرك
علي الأكبر يمولانا ... شفيع النه ومتنسانا
بساحة المحشر .. يا علي الأكبر
................................................................................
بقلم/ خادم الإمام الحسين عليه السلام
عمار هليل الواسطي
شعبان/ ١٤٤٥ هجري
شباط / ٢٠٢٤ ميلادي
منهاج ذكرى ولادة سيدي ومولاي الإمام علي بن الحسين السجاد زين العابدين عليه السلام للعام الهجري ١٤٤٥ الموافق ٢٠٢٤ ميلادي
الأهازيج ( الهوسات)
خل نفرح وننشر زينة الأعياد
واليسأل نگلّه بصاحب الميلاد
هلا ومية هلا بمولد علي السجاد
نفرح للغالي ابن الغالي
................................................................
خطار السعاده وخل تگر كل عين
فرحت شاه زنان وفرح گلب حسين
بزين العابدين النوّر الدارين
حي السجاد وميلاده
................................................................
شع نور المدينه وأصل هذا النور
من بيت الحسين الطاهر المعمور
انولد زين العباد وكل گلب مسرور
وكل نور الدنيا امن اجبينه
................................................................
بقلم / خادم الإمام الحسين عليه السلام
عمار هليل الواسطي
شعبان / ١٤٤٥ هجري
شباط / ٢٠٢٤ ميلادي
منهاج ذكرى ولادة سيدي ومولاي الإمام علي بن الحسين السجاد زين العابدين عليه السلام للعام الهجري ١٤٤٥ الموافق ٢٠٢٤ ميلادي
الأبوذيات
سبحانه بقدومك مَن علينه
وصعدنه بفضل حبك من علينه
سمي الكرار واسمك من علينه
ونورك نور حماي الحميّه
.............................................................
حفيد الولي وگلبي يريد وصلاك
وكفو من كل سجايا البيك وصلاك
يجي يوم وأزورك مشي وصلاك
وأشوف المرقد بعلو الثريّه
.............................................................
يمن لجروح ناسك بلسم الهه
ولا أحصي محبتك بلسم الهه
تره الأملاك مولد بالسمه الهه
بميلادك يبن روح الزچيّه
.............................................................
بقلم / خادم الإمام الحسين عليه السلام
عمار هليل الواسطي
شعبان / ١٤٤٥ هجري
شباط / ٢٠٢٤ ميلادي
منهاج ذكرى ولادة سيدي ومولاي قمر العشيرة أبي الفضل العباس عليه السلام للعام الهجري ١٤٤٥ الموافق ٢٠٢٤ ميلادي
قصيدة { هلا بعباسنه الغالي }
عشاگ ويبقى المعشوگ ... عباس عباس
للكافل فرحتــنــه اتلوگ ... عباس عباس
الشمس أخذت ضواهه من جبينه
هلا بعــبــــاس أبـو الروح الحنينه
...........................................................................
بحضن أم البنين وسطع بدره
والحيدر علي زفّت البشرى
صار الليل كل الليل گمره
من مهده ونذر لحسين عمره
فرحانه الليله الأملاك ... عباس عباس
واتبشرت گاع وأفلاك ... عباس عباس
وبهاي العـــبـــاره إحنه بدينه
هلا بعباس أبو الروح الحنينه
...........................................................................
يعجز كل وصف ما تكفي الحروف
مثل عباس أبد ما صار موصوف
يطلع اچفوفه من اگماطه ويشوف
يجي حيدر بنفسه يبوس الچفوف
يعرفهن ذني الچفين ... عباس عباس
ينذرهن بالطف لحسين ... عباس عباس
الرايه اشراع وحسين السفينه
هلا بعــبــــاس أبـو الروح الحنينه
...........................................................................
أبو الغيره ومحبته تدگ بالگلوب
هيچ امن الله عند الناس محبوب
صگار الزلم ساعات الحروب
كل الدنيه صوب وخزرته صوب
يتراجف يبقى الميدان ... عباس عباس
من يدخل هيبة عدنان ... عباس عباس
يگلبه الجيش بيساره ويمينه
هلا بعــبــــاس أبـو الروح الحنينه
...........................................................................
أخو زينب كفو من يدگ صدره
وفي عد كلمته لو ينطي عمره
إصبعه يساوي من الزلم عشره
لأن طبع الشجاعه بروحه فطره
نسخه امن الوالي الكرار ... عباس عباس
واليفرق بس ذو الفقار ... عباس عباس
بضوه وجهه يشع نور المدينه
هلا بعــبــــاس أبـو الروح الحنينه
...........................................................................
تاريخ الولادة أحلى عنوان
هلا بيوم أربعة من شهر شعبان
هلا بمولد الغيره گمر عدنان
الليله كل غيور ونشمي فرحان
عشاگ الكافل للموت ... عباس عباس
خل كلنه نصيح بفد صوت ... عباس عباس
بأمان بفضل أخو زينب بقينه
هلا بعــبــــاس أبـو الروح الحنينه
...........................................................................
بقلم / خادم الإمام الحسين عليه السلام
عمار هليل الواسطي
شعبان / ١٤٤٥ هجري
شباط / ٢٠٢٤ ميلادي
منهاج ذكرى ولادة سيدي ومولاي الإمام الحسين عليه السلام للعام الهجري ١٤٤٥ الموافق ٢٠٢٤ ميلادي
الأهازيج ( الهوسات )
كتب جبريل إسمك عالسمه عنوان
ينبراس الهداية وللمجد برهان
حسين ومحلى اسمك من ينطقه لسان
يتشرف من يقره احروفه
بخدمتك طول عمري خادم وممنون
يحسين العمر بمحبتك مرهون
الوادم مو مهم يرضون ما يرضون
من خيرك متروسة اعيوني
وغلاتك سيدي ومولاي حد الموت
تظل تصدح بأسمك حنجرة هالصوت
التوفقه بخدمتك ما يخسر ومبخوت
وبچفك للجنّه اتگوده
بقلم / خادم الإمام الحسين عليه السلام
عمار هليل الواسطي
شعبان / ١٤٤٥ هجري
شباط / ٢٠٢٤ ميلادي
منهاج ذكرى ولادة سيدي ومولاي الإمام الحسين عليه السلام للعام الهجري ١٤٤٥ الموافق ٢٠٢٤ ميلادي
الأبوذيات
شما أبعد أجي الدربك وردلاك
إمامي بفرح أقـــرالك وردلاك
ألِمهه سنيني وأهديهه وردلاك
ومُناهه الروح تقبل هالهديّه
.............................................................
بخدمتك يلي نورك نور ما خاف
وثگيل بفضلك الميزان ما خاف
شفيعي وبالقيامه أبد ما خاف
الجنّه بخدمتك تضمنهه اليّه
.............................................................
اعله دربك سيدي بشورك ويهنه
اليخدمك ينشرح صدره ويهنه
وحياتك للحشر أبيض ويهنه
الشفيع إنته يبن حامي الحميّه
بقلم / خادم الإمام الحسين عليه السلام
عمار هليل الواسطي
شعبان / ١٤٤٥ هجري
شباط / ٢٠٢٤ ميلادي
قصائد في ذكرى شهادة سيدي ومولاي الإمام موسى الكاظم عليه السلام
قصيدة { يا موسى بن جعفر }
لا ما تبقه حاير ... بس إندب يزاير
يا موسى إبنَ جعفر .... يا موسى إبنَ جعفر
……………………………………………………………………………………………………
يم باب الحوائج هالحوائج تگظي كلهه
كل شِدّه تهون وما تظل وإهنانـــه حَلهه
كل زاير يگصده يخلي بي روحه وأملهه
ربك باب للحــاجـــات ثـــق بابــه جعلهه
زوره ومن تِطلبه ... گلّه يابو طِلبه
يا موسى إبنَ جعفر .... يا موسى إبنَ جعفر
……………………………………………………………………………………………………
جنّه اعله الأرض صارت فخــر بالكاظميـه
هاي إزيارته بأعظم أجــر محـــســوبه هيّه
يامَن حاضــر بصـحـن الغريـب بصافي نيّه
سولف حاجــتــك تاخذ جــوابــك هالمسيّه
مَيرد خالي چفّك ... والكاظم يعرفك
يا موسى إبنَ جعفر .... يا موسى إبنَ جعفر
……………………………………………………………………………………………………
إندب هالغـريـب وإذكـر بدمـعـك مصـابـه
مَيخلّيك يعرف بـيـك تنـتـظره اعلـــه بابه
كل مهمــوم لا مَيـدوم هَــمّــه ولا عــذابــه
يسأل والســـؤال ابلا جَــدَل ياخـــذ جوابه
يحضر بالشدايد ... لا ما ينسه واحد
يا موسى إبنَ جعفر .... يا موسى إبنَ جعفر
……………………………………………………………………………………………………
حتى عن بُعد هم يسـتـمـع تلگاه حاضـر
مَيعوف الغريب إبغربته وما يبقه حــايـر
وبأسمه إنوصف من خالقه جبر الخواطر
ســابع ســادة الأطهار يدري الگلبه صـابـر
يسمع كل نداءه ... لو صاح ابدُعاءه
يا موسى إبنَ جعفر .... يا موسى إبنَ جعفر
……………………………………………………………………………………………………
چف موصوف للملهوف يمسحهه المدامع
والينخاه روحــه إوياه ما تبــقــه المواجع
يلمح دوم كل مهضوم زاره وگلبه خاشــع
باب إمراد ينطي إمراد يكرم صدره واسع
يفهم كل وضعنه ... لو گلنه بدمعنه
يا موسى إبنَ جعفر .... يا موسى إبنَ جعفر
……………………………………………………………………………………………………
راهب آل طه وبالسجــــن ظل گلبه دامـي
زوره وصيح عالي الصوت وينك يا إمامي
نبع الطِيـــبْ ظل روّاي كـل ولهــان ظامي
صيح اليوم يا مســمـــوم أبعــثــلك سلامي
عامر دوم بيته ... ظل معروف صيته
يا موسى إبنَ جعفر .... يا موسى إبنَ جعفر
……………………………………………………………………………………………………
كل هاي الملايين التگصده ابهالزياره
ملهوفه وحزينه و هوّه مَــأمَــنْ للحياره
غصبن عالظلم موسى إنتصر هذا إنتصاره
قِبله الكل محب وبكل فخر حافـــظ دياره
وبهاي المسيّه .... صرخة رافضيه
يا موسى إبنَ جعفر .... يا موسى إبنَ جعفر
……………………………………………………………………………………………………
خادم الحسين عليه السلام
عمار هليل الواسطي
قصائد في ذكرى شهادة سيدي ومولاي الإمام موسى الكاظم عليه السلام
قصيدة { سابع جرح }
سابع جروح أهل البيت نحيي مُصابه الليله
.......................................................................................................................................................................
يا سابع أنوار الله من أهل البيت
عدوانك تلاشــــو وانتــه الظلٌيت
بطامورة ظلمه للطـغــاة اتحدّيت
ضاعوا مثل ريشه ويل اليضدّك ويله
..................................................................................................................................
شاء الآله ابحكــمـته وكل أمره
قيودك تذل هارون تهدم قصره
بينك وبين الصبر صارت عِشره
حتى الصبر يا مولاي من صبرك يشد حيله
..................................................................................................................................
يلي الفخر بيك إفتخر يا مولاي
يالكاظم وأفضالك هواي هواي
ما خاب كل زاير يگصدك عنّاي
هذا الكرم هذا الجود ميراث حامي ادخيله
..................................................................................................................................
إسمك وتاريخــك فخر يتصدّر
والشاهد بــمـــرقــدك يا بن جعفر
بماي الذهب هــــذا المجد يتسطّر
ترحّب بكل الزوّار وكلمن حضر توميله
..................................................................................................................................
أربعطش عـــام ويــظــن السجان
تنســـاك ناس الحبّــتــك يالسلطان
ما يدري حبك فطره وسط الوجدان
يا رحمة الله المعبود فطره العشگ تحليله
..................................................................................................................................
غصبن على الظلمـوك والماعـرفوك
قصة نصـــر وبكل زمنــهـــم يقروك
نور الله ما ممكن بظلمه يضيـعـــوك
شما يمكرون يخسرون أهل المكر والحِيله
..................................................................................................................................
واسيت من سجنك مصايب عاشور
چبدك مثل چبد الحسـيـــن المفطور
قيودك مثل حبل السبي الگاد النور
من سجنك امصاب حسين دم الدمع تبچيله
..................................................................................................................................
خادم الإمام الحسين عليه السلام
عمار هليل الواسطي