Telegram-канал wastyammar - عمار هليل الواسطي: Unsorted

عمار هليل الواسطي

26 May 2026 22:11

قصيدة ( صولة علي الأكبر )
ليلة مولاي علي الأكبر عليه السلام

طَبْ علي الأكبر وصاحت كربله

هله بالخــــيّـــال يا مــيـــــّةْ هله

………………………………………………………………………………………

سِكتتْ الأنفاس مذعوره صُفت

صفوف أميه باوعَت واتراجِفت

شَد عليهم علي والحومه إنْچفت

حلّت إعله اعداه أكبر معضله

هله بالخــــيّـــال يا مــيـــــّة هله
………………………………………………………………………………………

صاحْلَه العباس منّك والنعم

عاشت إيدك وانته صگّار الزلم

جاوبه الأكبر وثغره يبتسم

والنعم منك يبن عقد الوله

هله بالخــــيّـــال يا مــيـــــّة هله
………………………………………………………………………………………

سيفه چن عصّات موسى عالرگاب

كربله صاحت هله بزين الشباب

ضجّت الحومه و صعد ذاري التراب

علي مِنّ الجثث ميدانه إمتله

هله بالخــــيّـــال يا مــيـــــّة هله
………………………………………………………………………………………

وين تشرد من علي أشباه الرجال

فارس وفاهمهن افنون القتال

واليگصده هذا ميت لا محال

واليشوف الموت ما يتعنّه إله

هله بالخــــيّـــال يا مــيـــــّة هله

………………………………………………………………………………………

كبّر ومن صاح يا جدّي مدد

مثل إعصار وعلى اخصومه گصد

الطاح منهم طاح والمنهم شرد

شارد بروحه ويخاف الزلزله

هله بالخــــيّـــال يا مــيـــــّة هله

………………………………………………………………………………………

حسين ابوه إنْبهر من صولة علي

رجّع بكربله صولات الولي

عفيه يالأكبر بزودك تعتلي

نشمي أمْر الموت سيفك رتّله

هله بالخــــيّـــال يا مــيـــــّة هله

………………………………………………………………………………………

هذا الأكبر طشر بزوده الصفوف

شهدت الحومه إله بيوم الطفوف

ما يهمّه إعداه تنعد بالألوف

خل جثثهم قافله تجر قافله

هله بالخــــيّـــال يا مــيـــــّة هله

………………………………………………………………………………………

خادم الإمام الحسين عليه السلام
عمار هليل الواسطي
١٤٤٨ هجري/ ٢٠٢٦ ميلادي