7103
إحنه غير حسين ما عدنه وسيله والذنوب اهـــواي چـفّـتـها ثجيله
منهاج ذكرى ولادة سيدي ومولاي قمر العشيرة أبي الفضل العباس عليه السلام للعام الهجري ١٤٤٥ الموافق ٢٠٢٤ ميلادي
الأبوذيات
گمر وسط السمه عالي منصّه
اعله حــبــك للوفه آية منصّه
بوسط گلبي العشگ خلّه منصّه
وقره الحبك قصائد وأبوذيه
.............................................................
كل جيش الگحمته طاح وانهار
شجاع وما يوگفك ليل وانهار
مو بس الفرات إبحور وانهار
حدر رجليك فدوه تروح هيّه
.............................................................
عهد عن خدمتك لحظه منلهه
نعمه وعالبشر ربك منلهه
وهيه البشر چا غيرك منو الهه ؟؟
تدگ بابه ويحل أكبر رزيه
............................................................
بقلم / خادم الإمام الحسين عليه السلام
عمار هليل الواسطي
شعبان / ١٤٤٥ هجري
شباط / ٢٠٢٤ ميلادي
منهاج ذكرى ولادة سيدي ومولاي الإمام الحسين عليه السلام للعام الهجري ١٤٤٥ الموافق ٢٠٢٤ ميلادي
قصيدة { ميلاد الحبيب حسين }
أجمل تهانينه ... حُسين
بميلاد غالينه ... حُسين
بسم الله هاي الليله نبديهه
فرحتنا لهل البـيــت نهديهه
حُسين ... حُسين
................................................................................
سطع شعبان نوره بمولد الغالي
هلا بشهر الفرح والفرح للتالي
سَر گلب النبي والزهره والوالي
كل عاشگ ينادي الفرحه تحلالي
بهالعيد نادينه ... حُسين
أغلى أمانينه ... حُسين
كل روح تهوى حسين غاليهه
فرحتنا لهل البـيــت نهديهه
حُسين ... حُسين
................................................................................
بميلاد الحبيب نجدد الذكرى
وأملاك السمه تتناقل البشرى
عيد وصار عيد العالم بأسره
تحيه للولي وللطاهره الزهره
عيد وعناوينه ... حُسين
من نور بارينه ... حُسين
بأجمل قصائد عشگ نحييهه
فرحتنا لهل البـيــت نهديهه
حُسين ... حُسين
................................................................................
هالليله الحناجر كلهه صدّاحه
والعاشگ بدت من هسه أفراحه
فطرس يا كرامه الرجعت إجناحه
إجه يبارك الغالي وللمهد لاحه
رجّعله جنحينه ... حُسين
دمعت فرح عينه ... حُسين
كل المَلَك كتبت أساميهه
فرحتنا لهل البـيــت نهديهه
حُسين ... حُسين
................................................................................
صلاة الله وسلامه من گلب خاشع
على الأربع حروف بأسمك اللامع
حاء وســـيــن ياء ونون يا سامع
مولد رحمة الله وبالحشر شافع
بهجت ليالينه ... حُسين
شافعنه والينه ... حُسين
فدوه إله الأرواح ننطيهه
فرحتنا لهل البـيــت نهديهه
حُسين ... حُسين
................................................................................
قليله أرواحنه السبط النبي نهدي
بأهلنه ومالنه شنجازي من نفدي ؟؟
مثل ما بالدعاء بكل سنه نبدي
نختم بالدعاء الطلعة المهدي
يحضر أماسينه ... حُسين
وينادي مهدينه ... حُسين
والتهنئة بلسانه يحچيهه
فرحتنا لهل البـيــت نهديهه
حُسين ... حُسين
................................................................................
بقلم / خادم الإمام الحسين عليه السلام
عمار هليل الواسطي
شعبان / ١٤٤٥ هجري
شباط / ٢٠٢٤ ميلادي
قصائد في ذكرى شهادة سيدي ومولاي الإمام موسى الكاظم عليه السلام
قصيدة { يا صاحب الزمان }
أنتَ المُعزّى سيدي يا خاتم العتره
..........................................................................................................................................
سابع جرح يبن الحسن وبگلبك آثاره
للكاظم وجمر الحزن لا ما طفت ناره
هالليله يبن العسكري تواسيك زواره
حاضر أكيد بفجعته يالحاضر إبداره
أتمنى منك سيدي هذا المسه نظره
أنتَ المُعزّى سيدي يا خاتم العتره
..........................................................................................................................................
نظره لجميع العاهدك ويتاني بالدمعه
موعد ظهورك وبصبر فاق وجزه السبعه
يحسبلك يظل سيدي امن الجمعه للجمعه
ضاگت تراهه بغيبتك بعيوني كل وسعه
ما تخمد بروحي أبد للحزن چم جمره
أنتَ المُعزّى سيدي يا خاتم العتره
..........................................................................................................................................
أقسم عليك بغربتك وبغربــــة الكاظم
لهاي الملايين الإجت تحضرهه يالقائم
كل دمعه سالت من جفن هذا الجفن حالم
حالم يشوفك والحزن وسط الگلب دائم
إنطيني من صبرك صبر گلبي خلص صبره
أنتَ المُعزّى سيدي يا خاتم العتره
..........................................................................................................................................
تتلگّه يبن العسكري هالليله كل زاير
تدعيله حتماً سيدي من گلبك الصابر
تقضي الحوائج بالدعاء الربّك القادر
وأدعيلك بيوم الفرج ريت الفرج باجر
دين الله بسمك ينتصر سيفك يخط نصره
أنتَ المُعزّى سيدي يا خاتم العتره
..........................................................................................................................................
بالكاظم الليله المحب واساك يالغايب
يالحاضر إنته بكل گلب يالطاعتك واجب
بدم الحسين بكربله غيرك منو يطالب
ثارات عندك تنتظر هذا الزمن كاتب
طوّل ظلام الفاجعه ليلك متى فجره
أنتَ المُعزّى سيدي يا خاتم العتره
..........................................................................................................................................
يخلص دمع عمر الشمع حزني طبع بيّه
أترقّبك يا سيدي ودنيانه مگظيّه
من بعد كل هذا الصبر لازم الك جيّه
هالدنيه تعدلهه بعد ما تبقى مچْفيّه
عهدك كتبته بالدمه وابْصَمت بالعَشره
أنتَ المُعزّى سيدي يا خاتم العتره
..........................................................................................................................................
خادم الإمام الحسين عليه السلام
عمار هليل الواسطي
قصائد في ذكرى شهادة سيدي ومولاي الإمام موسى الكاظم عليه السلام
قصيدة { كلمة شرف }
الك كلمة شـــرف گلنه وحچيناهه
حتى اعيوننا اعله الخد بچيناهه
………………………………………………………………………………………………………
بچيناهه عليك الليله بالحضـره
وجدّدنه العــهد يا راهـب العـتره
الك طول الدهر وسط الگلب حسره
مناحه بكل درب لجلك نصبناهه
………………………………………………………………………………………………………
نصبناهه ونخاف بيوم قصّرنه
ذكرناك ونعرفــك زيــن تذكرنه
شفيع وبالحـشــر لابد تباصرنه
هاي ارواحنه الحزنك هديناهه
………………………………………………………………………………………………………
وحق غربةْ حـيـاتــك والألـم والهَمْ
وحق جروح قيدك حيث تنزف دم
يا منــهـــج صبر والـنــاس تـتـعـلّم
عظيمه احروف صبرك بيهه نتباهه
………………………………………………………………………………………………………
قريناهه ولگينه اسنينك الصعبه
ابطاموره وحياتـك تـنـتـهي غربه
كل عاشگ بنــالك موطــن ابگلبه
قصايدنه بدمع يجري قريناهه
………………………………………………………………………………………………………
غريب وحتى نعشك وضّح امصابك
ترك حسرة وشجن بگلوب أحبابك
يــعـطّاي المــراد ومــا تـســد بــابــك
كرامات شكثر عندك لگيناهه
………………………………………………………………………………………………………
خاشع بالعباده وعالظــلـم صابر
شگد نفسك أبيّـه وگدرت اتكابر
حاضر بالگلب وبكل زمن حاضر
إلك كلمةْ شرف بالدم كتبناهه
………………………………………………………………………………………………………
إلك من كل كتر تـتـعنه زوارك
بوجودك للأبد مامونه بغدادك
ما خاب التمسّك بيك واختارك
وهواي المعاجز إحنه شفناهه
………………………………………………………………………………………………………
خادم الحسين عليه السلام
عمار هليل الواسطي
أعظم الله تعالى أجورنا وأجوركم بذكرى شهادة سيدتي ومولاتي زينب عليها السلام
قصيدة { قصة أحزاني }
نهاية قصة أحزان الوفيّه
تريد إخوانها بـيوم المنيّه
.................................................................................................................................
على افــراش المنــيّـه بآخــر أنفاس
عليهه هواي يصعب جرح الإحساس
غريـــبـــه بلا أهــل لا وطــن يا ناس
وين حسـيـــن صاحت وين عــبــاس
بدمع تختم عمرهه بهالمسيّه
تريــد إخــوانهــا بـيوم المنيّه
.................................................................................................................................
زيــنـــب يا گــلــب يحـمـل ألـمـهــه
بده اوياهه الحزن من راحت أُمـهــه
يــســامــع بالله تــتـخيّــل هضمـهــه
إذا أُم المـصــايــب صــــار إســمـهــه
رزيّــه تنــتــهي وتبدي رزيّــه
تريــد إخــوانهــا بـيوم المنيّه
.................................................................................................................................
صبر بس يا صبــر واحــدوده لـي وين
بعــد طـــف كربـــلــه وذبــــح الميامين
سنه ونـــص ما بـقــت من بعد الحسين
مصايـــب عاشـــت وشــافــتــهه بالعين
كفاهه الصار يـــوم الغاضريّه
تريــد إخــوانهــا بـيوم المنيّه
.................................................................................................................................
تجـيــهــه اطـيــوف إذا تـغـفـــه النواظر
صـــور مـــن كربــــلاء بــيــوم عـــاشــــر
خــيـــم محــتــرگــه واخــيــول وعساكر
وصريــعـــه اعلــه الــتــرب أشرف مناحر
تفز من تستمــع صرخة رقيّه
تريــد إخــوانهــا بـيوم المنيّه
.................................................................................................................................
خــتـام اسنــيــنـهــه والحـســره عــنــوان
گلب مــجــروح يــنــزف قــصــة أحــــزان
غــريــــبـــه بـلا أهـــل مــن الأجــل حـــان
عدهـــه إخـــــوان چانــوا .. وين الإخــوان
أميرة بت علي وراحت سبيّه
تريــد إخــوانهــا بـيوم المنيّه
.................................................................................................................................
أويلاه الـســـبـــي وجـــروحـــه الــثْــگــال
ترك لچــمــــات مـــا تــخــطــر علـــى البال
الـمــثــل زيـــنــب كــفــر تــنــگــاد بـحـبـال
زيــنـــب بالـصــبـــر مـضـــرب للأمـــثـــــال
وريثت فجعة الزهره الزچيه
تريــد إخــوانهــا بـيوم المنيّه
.................................................................................................................................
نــهــايــة هالـمــآســـي هـــواي صــعــبــــه
غــريـــبـــه أم الــخــــدر وبــگــاع غـــربــــه
ألف حـــســـره ابــگــلــبــهــــــه وألف حسبه
بدمـــعــهــه الما نـــشــف كــتــبــت طلــبــهه
الگمر وحسيــن رادتهم سويّه
تريــد إخــوانهــا بـيوم المنيّه
.................................................................................................................................
خادم السيدة زينب عليها السلام
عمار هليل الواسطي
أعظم الله تعالى أجورنا وأجوركم بذكرى شهادة سيدتي ومولاتي زينب عليها السلام
قصيدة { الليلة تحلفك بچفوفك }
الليله اتحلفك بچفوفك
زينب محتاجه تشوفك
.............................................................................................................................
ليلت موت أصعب ليله ... مدمعهه اعليك اتسيله
حزن افراگك شَدْ حيله ... وما مرت بيهه اطيوفك
.............................................................................................................................
نادت ها يا ضي عيني ... ليش بغربه اتخليني
أختمهه الليله اسنيني ... روحي تموت ومتعوفك
.............................................................................................................................
يا عباس شگد صعبه ... بنوح ورادت هالطِلبه
صاحت من گاع الغربه... يا من سابق معروفك
.............................................................................................................................
چم حسره بگلب الكُبرى ... زينب ظلّت منتظره
من همهه ونار الحسره ... تلهج زينب بحروفك
.............................................................................................................................
مو وحدك رادت تحضر ... نادت ها يابو الأكبر
تظل زينبكم تــتحسّــر ... تعمه عيوني بلا شوفك
.............................................................................................................................
وحشه وغربه ونوح وهَمْ ... حومه وعاشر وامخيّمْ
طــيــوف وزيــنــب تتألمْ ... منها وتعرف بظروفك
.............................................................................................................................
زينب تدري إمـن العاشر ... ماتت بس هيّه اتكابر
لاچن من كــســر الخاطر ... تريدك والروح اتطوفك
.............................................................................................................................
خادم السيدة زينب عليها السلام
عمار هليل الواسطي
منهاج ولادة سيدي ومولاي أمير المؤمنين علي بن أبي طالب عليه السلام
القصيدة ( مولود الكعبة )
ميلاده ... أجمل خبر عاجل وصل
ميلاده ... من جابت الكعبه فحل
ميلاده ... مـيّـــة هلا بخير العمل
.........................................................................
ليلة مسرّات وفرح محلاهه
بس الشريف اليفرح ويتباهه
البهجه صاغت هالمسه معناهه
أجمل ولاده والعلي علّاهه
هالليله ... حيدرنه بالكعبه انولد
هالليله ... من فاطمه بنت أسد
هالليله ... والكون بالفرحه إنشغل
.........................................................................
بيت الله شع منه الضوه للعالي
مولود عــنــد الله عــزيز وغالي
أول علي من مهده حيوا الوالي
أول علي والباقي كلهم تالي
بحروفه ... العين عنوان العهد
بحروفه ... واللام لبّينا الوعد
بحروفه ... والياء ينبوع الأمل
........................................................................
ليلة ولادة طاهره وقدسيّه
بسابع سمه المولود يسطع ضيّه
ما دام بالكعبة الولاده هيّه
معناهه ربنا كعبته علويه
بس حيدر ... ما غيره بالكعبه انولد
بس حيدر ... والقل هو الله احد
بس حيدر ... واقع نعرفه امن الأزل
........................................................................
خلونا نتغزل سوه بوالينه
هنيال كل محظوظ شافه بعينه
روح الجمال انصاغت بغالينه
شمس الله ضيهه يغار من اجبينه
شفنه علي ... بس بضمائر حرّه
شفنه علي ... وظل العشگ عالفطره
شفنه علي... حرفين منطي للعسل
........................................................................
يم مهده أملاك السمه فرحانه
وطير السعد تصفگ فرح جنحانه
قرآن ناطق من أصل قرآنه
مفتوحه حيدر للفرج بيبانه
بيمينه ... أشر بصبعه ابما يلي
بيمينه ... بس الله رب نعم العلي
بيمينه ... كل مايل بچفه إنعدل
........................................................................
أجمل تحيه وتهنئه من تبدي
نهديهه حتماً للإمام المهدي
مهما يرد بينه الزمن ويودّي
أنصاره نبقه والصعاب اتعدّي
عد عينه ... نقسم بجدّه حيدره
عد عينه ... أنصاره دنيا وآخره
عد عينه ... وننادي يا ربنا العَجَل
........................................................................
خادم الإمام الحسين عليه السلام
عمار هليل الواسطي
رجب الأصب/ ١٤٤٥ هجري
ذكرى إستشهاد الإمام علي الهادي عليه السلام
قصيدة { ساعات المصاب }
بساعات المصاب / ليل الحزن يترك علامه
شفنه الگمر غاب / وسامره وحده امن اليتامه
عن كل الأحباب / يالهادي رايح بالسلامه
***
ساعات الألم ...بفراگك طويله
اليبچي بس دمع ...ما يبرد غليله
يلي شوفتك ...صارت مستحيله
جرح اموادعك ...يا گلب اليشيله
يالهادي ينعاك /حتى الهوا إتكدّر نسيمه
حزنانه الأفلاك / يالكوكب العاشر هضيمه
وتصيح الأملاك / السمّك يظل ربك خصيمه
****
ما يطلع فجر ...سامره حزينه
ليلة دفنتك ...بيهه الكل دفينه
وابنك الحسن ...من يشتد حنينه
جرحه ينلچم ...من نوحه وأنينه
من گد الالام / هيهات ما يطلع صبحنه
كل احنه أيتام / كل احنه ومصابك جرحنه
مو طبعك تنام / وتسمعنه بسمك كلنه صحنه
****
بالسم والذبح ...معروفه المصارع
يطفه چم ضوه ..وتذكره المدامع
يالرحت بسفر ..ماكو بدربه راجع
تاريخ الحزن ...مكتوب بمواجع
من عصرت الباب / تاريخكم خط مستهله
وطبرة أبو تراب / بيهه الحزن والهم تجلّه
ومن بعده الأطياب /كل فتره علّه بأثر علّه
***
تحضر هالمسه ..يالهادي مؤكد
تحضر للعزا ...كل عترة محمد
الليله مجلسك ..بالدمعه تجسد
يلي فجعتك ..جمرتهه متبرد
تتلگه هاليوم /كل المعزين بمصابك
وتشارك هموم / كلمن بچه وناح بغيابك
چم جرح ملچوم / واگف يغالينه اعله بابك
***
ما يغمض جفن ..والونّه اعله ونه
يالهادي بقت ...لوعتنه بزمنه
لتظن كل محب ...من بعدك تهنّه
شيعه وننتظر ..غايبنه وأملنه
گلوب التريدك / مفجوعه حسرتهه ثگيله
لشوفت حفيدك / ملهوفه والحسبه طويله
طلبتنه بيدك / عنّه تنوب وتشتكيله
***
الشاعر عمار هليل الواسطي
أهازيج ولائية فاطمية
تاج راس العفه إنتي وللشــرف ستر وعَبات
من أصل ديدن محمد بيج صارت هالصفات
والرُفـــــــض وصفج سفينه لا يفكر بالنجات
بالكَيش وينحل اشراعه
**********
بالرغم فضه التخدمج صارت بزودج ذهب
عاشِرت مُجمل صفاتج اتطبّـعـت والهالسبب
فضه من سألوا عليهه افتخرت بهذا النسب
خَدّامت أهل الله وبيته
**********
أدخل لعالم صفاتج أعجز ووصفـــي القليل
حروف تستوعب حياتج هاي صعبه ومستحيل
كثر ما صعبت عليّه صحت يا حامي الدخيـــل
تعجز عن حبكم كلماتي
**********
إي وحق مشكات نورج والبدور الساطعه
عندي حاجه وهاي يمج يالبتول الشافعه
كون تكَظيهه أخطلج بالعيون الدامعـــــه
خَدّامج ريت اتقِبليني
**********
خادم الإمام الحسين عليه السلام
عمار هليل الواسطي
قصيدة { فرحتنا الچبيرة}
لمناسبة ذكرى ولادة سيدتي ومولاتي فاطمة الزهراء عليها السلام.
فرحتنا الچبيره هذا موعدهه
سلام اللّه عليهه بيوم مولدهه
……………………………………………………………………………………………………
ليله وبالفــرح والبشرى نبديهه
وبحب الزچيه الزهره نحييهه
هاي الشافعه وواجبنه نوفيهه
فدوه أرواحنه للطيبه نهديهه
حبيب الله النبي المختار والدهه
سلام اللّه عليهه بيوم مولدهه
……………………………………………………………………………………………………
عالفطره العشگ من أول البذره
من أصلابنه نحب فاطمه الزهره
واليذكرهه باچر فاطمـه اتذكره
مــنهــــا بالقيامــه ناخذ البُشره
فرحه وكل سنه واجب نجددهه
سلام اللّه عليهه بيوم مولدهه
……………………………………………………………………………………………………
يجمعنه الفرح ونكحّل الناظر
بمولد فاطمه ينجبر كل خاطر
هنيال الوفه وبهالحفل حاضر
يشاركنه وينال الجائزه باچر
أجمل مكرمه نحصلهه من عدهه
سلام اللّه عليهه بيوم مولدهه
……………………………………………………………………………………………………
أجمل تهنــئــه بهذا الفـــرح لازم
إلى حضرة أملنــه الغايب القائم
حاضر بالگــلـــوب وللأمل راسم
بالطلعه البهيه بمــوعـــــده قادم
حضرة فاطمه بيده يشيّدهه
سلام اللّه عليهه بيوم مولدهه
……………………………………………………………………………………………………
ندعي اللّه يعجّل فرج مهدينه
بجاه أم الحسن هالليله نادينه
مشتاگين والله هواي حَنينه
كلنه انصار إله وخدّام يلگينه
فرحه وماكو بالدنيه تره بگدهه
سلام اللّه عليهه بيوم مولدهه
……………………………………………………………………………………………………
سلام الله عليــها كل محب ناده
بمولدهه المجــد هالليله ميلاده
عيد لكل محب من أجمل أعياده
نهني المصطفى وحيدر وأولاده
ألحان الفخر والعفه ننشدهه
سلام اللّه عليهه بيوم مولدهه
……………………………………………………………………………………………………
خادم السيدة الزهراء عليها السلام
عمار هليل الواسطي
جمادي الآخر / ١٤٤٥ هجري
٢٠٢٤ ميلادي
قصيدة ( روحي يا حسين )
روحــي والمـــنــيّه ... برض الغاضريّه
راحت ويّا الحسين ... ما رِجـعَـت إليّه
.................................................................................................................................
آني أم البنــيــــن وهـذا مـو أول مماتي
آني اويا الحُسين بكربــله راحت حياتي
من شفت الدمع يطفي شمع كل أمنياتي
حسّيت العمر كلّه انتهى وحانـــت وفاتي
كل سنين عمري ... كل لحظات صبري
راحت ويّا الحسين ... ما رِجـعَـت إليّه
.................................................................................................................................
ما تسوه السنين وعمري ما يسوه ابرحيله
لذلك بالحزن روحي إبتدت رحله طويله
مثل نسمت هوه بطول المسافه تعتنيله
من هضم الدهر من الهجر خل تشتكيله
حزينه وهذا نوحي ... بحيث إحساس روحي
راحت ويّا الحسين ... ما رِجـعَـت إليّه
.................................................................................................................................
عشت لـكـــن جسـد شابــع طـعــن من الليالي
ابظهر محني وأثـــر مــــن الحزن حتى بخيالي
سوى حسين السبط لا ما يمر كلشي اعله بالي
إذا غالي العــمــر يرخــص إلــه وحسيـن غالي
أعيش بذكرياتي ... لأن كل أُمنياتي
راحت ويّا الحسين ... ما رِجـعَـت إليّه
.................................................................................................................................
وحق ذاك الكفيل الــدگ صــدر للحــرّه زيــنــب
حلف گبل السبط رغــم العطش ما گطره يشرب
نهاري أظلم صفه وهذا العمـــر من موتي أصعب
شما يبعد أبو الأكبر شفـــت چن مــوتي يگرب
شعوري ما يردلي ... چن روحي تگلّي
راحت ويّا الحسين ... ما رِجـعَـت إليّه
.................................................................................................................................
أگـظّـي الليل كلّـه امساهــره وعيــونــي تربـي
لا رجـعــتـلـي روحي ولا بــعــــد راجعلي گلبي
أصير اعيون كلّـي وشابــحـــــه دوم اعله دربي
أصير اچـفـــوف كلّــي وأدعـــي للرحــمــن ربّي
آلهي رجّع حسين ... تراهه اعيوني الاثنين
راحت ويّا الحسين ... ما رِجـعَـت إليّه
.................................................................................................................................
نذرت الأربــعـــه كــلـهــم فــده لأبـــن الزچـيّه
بقت روحـــي تبـــاريـهـــم دعـــاء بـكــل مسيّه
آنـــي الوالـــده الشــافـــت مـنــيّــه بلا منــيّــه
آنـــي الأجــمـــع ابـمــوتي بــقــيـــع وغــاضريه
غريبه الوحدي تالي ... أنا وحيرة سؤالي
راحت ويّا الحسين ... ما رِجـعَـت إليّه
.................................................................................................................................
الى آخر فصل من العــمــر ظليــت أعانـي
لا روحي إجــتــنــي ولا أبــو الأكبـر إجاني
على فراش الأجل ما ظل أمل مدري شتاني
بس إسم الحُسين ابْـمُـهجِــتــي وگلبي ولِساني
أگول بهمس صوتي ... روحي گبل موتي
راحت ويّا الحسين ... ما رِجـعَـت إليّه
.................................................................................................................................
خادم أم البنين عليها السلام
عمار هليل الواسطي
منهاج قصائد وفاة سيدتي ومولاتي أم البنين عليها السلام
Читать полностью…
منهاج الليالي الفاطمية الثالثة
قصيدة { مرقد فاطمة}
المهدي من عالدنيه يسطع نوره
يبني مرقـــــد فاطــمــة ونزوره
...........................................................................................................................
يوم نور المــهدي عالعالم يشع
ياخــذ بأمــر الله ثارات الضلع
بيده من اخدودنه ينشف الدمع
والعدل بوجوده ياخذ دوره
...........................................................................................................................
هـاي دنـيــه أيامـــهـه حتماً تــدور
ما تظل طول الوكت يحكمهه جور
گلوبنه بجــمـــر الحــزن ظلت تفور
نريده يظهر يحكم المعموره
...........................................................................................................................
يظهر ويكــتـب فــصــول الخاتمه
نهــتــف اويـــاه يالثــارچ فاطـمــه
والظــهـــور يصــيــر يـــوم الغانمه
والمجد يكتب حروف سطوره
...........................................................................................................................
يعلن بصوته الشريف أعظم خبر
هذا قبــــر الطاهــرة يا هالبَــشــر
فاطمه والضلع مــن عدهه انكسر
طاحت بفعل الحقود وجوره
...........................................................................................................................
وهذا سيفي البيدي رد وعنده ثار
يشفي گلب الطاهــــره من الأشرار
إي وحق يمـنـــاه الشالت ذو الفقار
مهجة الزهره ترد مسروره
...........................................................................................................................
بيده ابن العسكري يبني الضريح
ما يظل مهـمـــوم بالكون الفسيح
والزياره بلــســم الگلــــبــه جريح
والرواية واضحه ومشهوره
...........................................................................................................................
واقع وما يختلف عنه الاثنين
يظهر الغائب سليل الفرقدين
وبعد ثار الطاهره ثار الحسين
لازم الموعود يوفي انذوره
...........................................................................................................................
خادم الإمام الحسين عليه السلام
عمار هليل الواسطي
منهاج الليالي الفاطمية الثالثة
قصيدة { آخر مسيّه}
يكرار آخر مســيّه ... يكرار ودع الزچيّه
...............................................................................................................
وحي صوت الحزن كـبّـر
بألــم والعـــالـــم اتغــيّــر
بــعــد ما ترجـــع الكــوثر
الـــوداع الليله يا حـيــدر
الدمـــع بعـــيونــك إتحيّر
مصــيــبــه وگلبك اتفطَّــر
يكرار أصعب رزيّه ... يكرار ودع الزچيّه
...............................................................................................................
يبــو حـسيــن بدمع عينـك
تـــودّع زهـــرة ســنـــيــنك
تعـــب يالــوالــي تمـكــيـنك
اعله هــمّــك ربــك يعيـــنك
وصــيّــه مـــن أجـــل دينـك
فـَـقــارك عافــتـــه ايمــيــنك
يكرار أمر الوصيّه ... يكرار ودع الزچيّه
...............................................................................................................
إذا بــيــتـك طُــفــه نــوره
تــعــيــش بدنيا مهـجـــوره
تراهه الـــزهـــره مقــهـــوره
بهــجـــوم إعـــــداك مغدوره
الظهرهه المَـحــنـــي معذوره
بـســـبـــب ضلعين مكســوره
يكرار محسن ضحيّه ... يكرار ودع الزچيّه
...............................................................................................................
جريمه وكلشــي ظــل شاهـد
يـــنــفــذوهـــه بگــلــب بــارد
جماعـــة غـــدر مـــو واحــــد
جاحـــد أقــســـى من جاحـــد
الصُــفَـــع خـــد الــورد حاقـــد
تره اويا إبــلـــيــس مِــتــوارِد
يكرار ليلة منيّه ... يكرار ودع الزچيّه
...............................................................................................................
عِــيــالــك بــالگــلـب هَـمـهـم
آخـــــر لــيـــلــة وي أُمــهــــم
أمس بحــضــانـــهــه اتضمــهُم
أمس چــــــانــــت تكــلّــمــهُــم
اليتم حـــتــمـــاً ينــاطـــرهــــم
مـــنــــو غـــيــــرك يصــبّـــرهُم
يكرار هاي الرضيّه ... يكرار ودع الزچيّه
...............................................................................................................
عــجــيـــبــه الدنيـه والأعجب
تصير أصـــعـــب علــــى زينب
المــصــايـــب مــنـهــه تــتـقرّب
بــــدت والمُـــشــتــكــى لـلــرب
مــثـــل أُمــهـــه وبــعــد أصعب
بـــديـــار الشـــام تـــــتــغــــرّب
يكرار حُرمه وسبيّه ... يكرار ودع الزچيّه
...............................................................................................................
خادم الإمام الحسين عليه السلام
عمار هليل الواسطي
منهاج ذكرى ولادة سيدي ومولاي الإمام الحسين عليه السلام للعام الهجري ١٤٤٥ الموافق ٢٠٢٤ ميلادي
الأهازيج ( الهوسات )
كتب جبريل إسمك عالسمه عنوان
ينبراس الهداية وللمجد برهان
حسين ومحلى اسمك من ينطقه لسان
يتشرف من يقره احروفه
بخدمتك طول عمري خادم وممنون
يحسين العمر بمحبتك مرهون
الوادم مو مهم يرضون ما يرضون
من خيرك متروسة اعيوني
وغلاتك سيدي ومولاي حد الموت
تظل تصدح بأسمك حنجرة هالصوت
التوفقه بخدمتك ما يخسر ومبخوت
وبچفك للجنّه اتگوده
بقلم / خادم الإمام الحسين عليه السلام
عمار هليل الواسطي
شعبان / ١٤٤٥ هجري
شباط / ٢٠٢٤ ميلادي
منهاج ذكرى ولادة سيدي ومولاي الإمام الحسين عليه السلام للعام الهجري ١٤٤٥ الموافق ٢٠٢٤ ميلادي
الأبوذيات
شما أبعد أجي الدربك وردلاك
إمامي بفرح أقـــرالك وردلاك
ألِمهه سنيني وأهديهه وردلاك
ومُناهه الروح تقبل هالهديّه
.............................................................
بخدمتك يلي نورك نور ما خاف
وثگيل بفضلك الميزان ما خاف
شفيعي وبالقيامه أبد ما خاف
الجنّه بخدمتك تضمنهه اليّه
.............................................................
اعله دربك سيدي بشورك ويهنه
اليخدمك ينشرح صدره ويهنه
وحياتك للحشر أبيض ويهنه
الشفيع إنته يبن حامي الحميّه
بقلم / خادم الإمام الحسين عليه السلام
عمار هليل الواسطي
شعبان / ١٤٤٥ هجري
شباط / ٢٠٢٤ ميلادي
قصائد في ذكرى شهادة سيدي ومولاي الإمام موسى الكاظم عليه السلام
قصيدة { يا موسى بن جعفر }
لا ما تبقه حاير ... بس إندب يزاير
يا موسى إبنَ جعفر .... يا موسى إبنَ جعفر
……………………………………………………………………………………………………
يم باب الحوائج هالحوائج تگظي كلهه
كل شِدّه تهون وما تظل وإهنانـــه حَلهه
كل زاير يگصده يخلي بي روحه وأملهه
ربك باب للحــاجـــات ثـــق بابــه جعلهه
زوره ومن تِطلبه ... گلّه يابو طِلبه
يا موسى إبنَ جعفر .... يا موسى إبنَ جعفر
……………………………………………………………………………………………………
جنّه اعله الأرض صارت فخــر بالكاظميـه
هاي إزيارته بأعظم أجــر محـــســوبه هيّه
يامَن حاضــر بصـحـن الغريـب بصافي نيّه
سولف حاجــتــك تاخذ جــوابــك هالمسيّه
مَيرد خالي چفّك ... والكاظم يعرفك
يا موسى إبنَ جعفر .... يا موسى إبنَ جعفر
……………………………………………………………………………………………………
إندب هالغـريـب وإذكـر بدمـعـك مصـابـه
مَيخلّيك يعرف بـيـك تنـتـظره اعلـــه بابه
كل مهمــوم لا مَيـدوم هَــمّــه ولا عــذابــه
يسأل والســـؤال ابلا جَــدَل ياخـــذ جوابه
يحضر بالشدايد ... لا ما ينسه واحد
يا موسى إبنَ جعفر .... يا موسى إبنَ جعفر
……………………………………………………………………………………………………
حتى عن بُعد هم يسـتـمـع تلگاه حاضـر
مَيعوف الغريب إبغربته وما يبقه حــايـر
وبأسمه إنوصف من خالقه جبر الخواطر
ســابع ســادة الأطهار يدري الگلبه صـابـر
يسمع كل نداءه ... لو صاح ابدُعاءه
يا موسى إبنَ جعفر .... يا موسى إبنَ جعفر
……………………………………………………………………………………………………
چف موصوف للملهوف يمسحهه المدامع
والينخاه روحــه إوياه ما تبــقــه المواجع
يلمح دوم كل مهضوم زاره وگلبه خاشــع
باب إمراد ينطي إمراد يكرم صدره واسع
يفهم كل وضعنه ... لو گلنه بدمعنه
يا موسى إبنَ جعفر .... يا موسى إبنَ جعفر
……………………………………………………………………………………………………
راهب آل طه وبالسجــــن ظل گلبه دامـي
زوره وصيح عالي الصوت وينك يا إمامي
نبع الطِيـــبْ ظل روّاي كـل ولهــان ظامي
صيح اليوم يا مســمـــوم أبعــثــلك سلامي
عامر دوم بيته ... ظل معروف صيته
يا موسى إبنَ جعفر .... يا موسى إبنَ جعفر
……………………………………………………………………………………………………
كل هاي الملايين التگصده ابهالزياره
ملهوفه وحزينه و هوّه مَــأمَــنْ للحياره
غصبن عالظلم موسى إنتصر هذا إنتصاره
قِبله الكل محب وبكل فخر حافـــظ دياره
وبهاي المسيّه .... صرخة رافضيه
يا موسى إبنَ جعفر .... يا موسى إبنَ جعفر
……………………………………………………………………………………………………
خادم الحسين عليه السلام
عمار هليل الواسطي
قصائد في ذكرى شهادة سيدي ومولاي الإمام موسى الكاظم عليه السلام
قصيدة { سابع جرح }
سابع جروح أهل البيت نحيي مُصابه الليله
.......................................................................................................................................................................
يا سابع أنوار الله من أهل البيت
عدوانك تلاشــــو وانتــه الظلٌيت
بطامورة ظلمه للطـغــاة اتحدّيت
ضاعوا مثل ريشه ويل اليضدّك ويله
..................................................................................................................................
شاء الآله ابحكــمـته وكل أمره
قيودك تذل هارون تهدم قصره
بينك وبين الصبر صارت عِشره
حتى الصبر يا مولاي من صبرك يشد حيله
..................................................................................................................................
يلي الفخر بيك إفتخر يا مولاي
يالكاظم وأفضالك هواي هواي
ما خاب كل زاير يگصدك عنّاي
هذا الكرم هذا الجود ميراث حامي ادخيله
..................................................................................................................................
إسمك وتاريخــك فخر يتصدّر
والشاهد بــمـــرقــدك يا بن جعفر
بماي الذهب هــــذا المجد يتسطّر
ترحّب بكل الزوّار وكلمن حضر توميله
..................................................................................................................................
أربعطش عـــام ويــظــن السجان
تنســـاك ناس الحبّــتــك يالسلطان
ما يدري حبك فطره وسط الوجدان
يا رحمة الله المعبود فطره العشگ تحليله
..................................................................................................................................
غصبن على الظلمـوك والماعـرفوك
قصة نصـــر وبكل زمنــهـــم يقروك
نور الله ما ممكن بظلمه يضيـعـــوك
شما يمكرون يخسرون أهل المكر والحِيله
..................................................................................................................................
واسيت من سجنك مصايب عاشور
چبدك مثل چبد الحسـيـــن المفطور
قيودك مثل حبل السبي الگاد النور
من سجنك امصاب حسين دم الدمع تبچيله
..................................................................................................................................
خادم الإمام الحسين عليه السلام
عمار هليل الواسطي
أعظم الله تعالى أجورنا وأجوركم بذكرى شهادة سيدتي ومولاتي زينب عليها السلام
قصيدة ( متت من عاشور )
آني المتت من عاشور طف كربله دفّاني
.............................................................................
هاي السنة ونص أبد ما محسوبه
روحي بأثر طف كربله مسلوبه
يا گلب ينبض لو فگد محبوبه
عيشت جسد حيث الروح راحت وره خوّاني
.............................................................................
آني المتت من ضيعت چم غالي
صوب النهر حيف انصرع كفّالي
كلما أشوفن رايه يتراوالي
حاشه الگمر لو ما الموت بين العده ينساني
.............................................................................
وآني الشفت ودموعي دم العينين
خيل العده من غارت امن الصوبين
بثگل الحوافر گطّعت جسم حسين
وفوگ الرمح راس الحيد بدرب السبي أذّاني
.............................................................................
هـيــهــات ما أنـســاهــه ذيــچ الآلام
شلون أنسه الأكبر وابن أخويه جسام
ونحر الرضــيــع الســهــم بي لمن نام
وأنصار أخوي العطشان طاحت گبل ولياني
.............................................................................
آني المتت من عاشر الهم والنوح
گلبي إنترس من كربله شگد اجروح
مذبوح فوگ الغبره وبصف مذبوح
والخيام شبّت بالنار ووسط الحشه نيراني
.............................................................................
درب السبي تلچمني يا خطواته
كل ذكرياته بروحي كل مأساته
جور الزمان ويا هضم طعناته
زينب يمن تنشد شوف ضيم الدهر راواني
.............................................................................
بنت الولي الكرار وأمي الزهره
تاليهه بالغربه أندفن يا حسره
ما خمدت بنص الدِليل الجمره
وين الحسين وعباس آخر كلام الساني
.............................................................................
آني الردت هذا المسه يحضروني
يغسلوني ويچفنوني ويشيعوني
ووسط اللحد بيديهم يوسدوني
حكمة الباري المعبود بالغربة أظلّن آني
.............................................................................
خادم الإمام الحسين عليه السلام
عمار هليل الواسطي
رجب الأصب/ ١٤٤٥ هجري
أعظم الله تعالى أجورنا وأجوركم بذكرى شهادة سيدتي ومولاتي زينب عليها السلام
قصيدة { الليالي الزينبية}
كتبناهه بدمعنه هالمسيه
فلا ننسى الليالي الزينبيه
.............................................................................................................................
الچ كلمة شـــرف تكتبـهه الدموع
يزينب والمصايـب حــدر الضلوع
على امصابچ حزينه گلوبنـه اتلوع
مثل نار ودمــع چـن عمر الشموع
نعاهد فاطمه وحامي الحميّه
فــلا ننســى الليالــي الزينبيه
.............................................................................................................................
وحق عــهـــد الكفاله بينچ وبين
گمر هاشم وشاهد چان الحسين
فلا ينشف دمعهه وتغمض العين
ولا ننسى الحصل من فجعة البين
نعيش أحزان شام وغاضريه
فــلا ننســى الليالــي الزينبيه
.............................................................................................................................
يا كعبة صبــر يا طـــود الأحزان
يلعشتي بظرف ما عاشـــه إنسان
فگدتي بكربــــلاء شــلــون خُـوّان
بعدهم عشتي غربه وجفن سهران
إلى أن حانــت الليلــه المنيّه
فــلا ننســى الليالــي الزينبيه
.............................................................................................................................
شنو الأصعب بعد وعيونچ تشوف
أشد من المصيــبـــه بيوم الطفوف
أشد من السبي والضعـــن مچتـوف
بمنامچ شفتي منهه طيوف وطيوف
منامچ يقــظـتـچ نـوح ورزيّه
فــلا ننســى الليالــي الزينبيه
.............................................................................................................................
وفيّه وكلنــه عِــد عــيــنــچ نوافي
ولا عـــدنـــه طبـــع ننسـه ونجافي
نــجـــدّد هــالحـــزن ما گلنـه كافي
يمن إسمچ دوه الكل جــــرح شافي
حبيبة فاطمه الزهره الزچيه
فــلا ننســى الليالــي الزينبيه
.............................................................................................................................
بدمعنه وباللطم كــلــنــه حضرنه
فضل من ربنا الچ خــــدّام صرنه
فــــدوه الأربع احــروفـــچ عُمرنه
يزينب ما نوافـــي اشـــمــا نذرنه
ننادي وبالگـلــب حبچ سجيّه
فــلا ننســى الليالــي الزينبيه
.............................................................................................................................
يامــن خِـدمِـتچ نعـمـه چـبـيــره
عـهــــد نـحــيــي عزائچ يالأميره
وحق كـفّـالچ المــتـروس غِــيــره
انتصرتي وظلت أعدائـچ أسـيــره
شعار أحبــابـچ الحرّه الوفيّه
فــلا ننســى الليالــي الزينبيه
.............................................................................................................................
خادم السيدة زينب عليها السلام
عمار هليل الواسطي
منهاج ولادة سيدي ومولاي أمير المؤمنين علي بن أبي طالب عليهما السلام
أهازيج ولائية حيدرية
طلگت كعبة الله هواي اتخيّل والجدار إنطر
يقيناً ما أغالي بهاي أسولف وإنته تتصور
حيدر ما تحده احدود وهيّه التطلگ بحيدر
والبيت اتباهه بمولوده
.............
بقاموس البطوله نشوف معنى الإسم واحروفه
حرف العين عون الدين علي وموحد اصفوفه
حرف اللام لامت زود تزرع بالخصم خوفه
والياء يا ويله اليدناهه
..............................
بعده بالمهد حيدر وأبو طالب يشوف اضواه
خط اعله السمه جبريل إسمه ووضح المعناه
يبوسه والده بلهفه من يمناه ومن يسراه
ميزان الحق زوج اچفوفه
.................
خادم الإمام الحسين عليه السلام
عمار هليل الواسطي
رجب الأصب/ ١٤٤٥ هجري
متباركين بذكرى ميلاد سيدي ومولاي أمير المؤمنين علي بن ابي طالب عليه السلام
المقدمة
منهاج ولادة سيدي ومولاي أمير المؤمنين علي بن أبي طالب عليه السلام
الأبوذيات
لسان حال مولاتي فاطمة بنت أسد سلام الله عليها
عليت بمولده وشأني علي اوياي
بوجوده والصعب يعجز علي اوياي
أنا أُمّه وصحت بطلوگي علي اوياي
ولدته بيا علي حامي الحميه
١. العلو أي الإرتفاع
٢. من المُلاوات ( على ملاواتي )
٣. علي معي ( من شد الأزر )
..............................................................
علي وكل معضله مَرهه فحلهه
وَحـــده بكفّه والدنــيــا فحلهه
الشجاعه فرحت بمولد فحلهه
بعد طه النبي سيد البريه
١. الحل.
٢. في حالها أي في كفه أخرى.
٣. الفحل الشجاع الشهم .
خادم الإمام الحسين عليه السلام
عمار هليل الواسطي
رجب الأصب / ١٤٤٥ هجري
أعظم الله تعالى أجورنا وأجوركم بذكرى شهادة سيدي ومولاي الإمام علي الهادي عليه السلام
قصائد من الارشيف
قصيدة { حزينة اعليك سامره }
حزينه اعليك سامره .. يعاشر نور بالعتره
بدمعنه نذكر مصابك
وگفنه هالمسه إبابك .. يعاشر نور بالعتره
....................................................................................................
يبن باب المراد اليكرم الزوار
من الكوت إجينه الحضرتك زوار
كلنا گلوب تنحب والمدامع نار
نواسي بمصرعك آل النبي الأطهار
نعيش همومك وحزنك..انجمعنه سيدي بصحنك
نظل زوارك أحبابك ..
وگفنه هالمسه إبابك .. يعاشر نور بالعتره
....................................................................................................
النجيب المرتضى الهادي النقي العالم
بچه لمصيبتك كل عاشگ وخادم
ما طخيت راسك لحظه للظالم
يظل ثارك أمانه بذمة القائم
حفيدك يأخذ بثارك..إحنه أنصاره وٱنصارك
نفدي أرواح بثوابك ..
وگفنه هالمسه إبابك .. يعاشر نور بالعتره
....................................................................................................
عاصرت بحياتك وٱنته رفعة راس
ست وجوه من سلطة بني العباس
الفرق كلش چبير تعرفه كل الناس
الثره ويّا الثريه بيا بخت ينقاس
يبن بيت النبي الطاهر..يكوكب للأبد زاهر
نقبّل سيدي أعتابك
وگفنه هالمسه إبابك .. يعاشر نور بالعتره
....................................................................................................
كتبت إلنه بصفاتك منهج ودستور
ما ترضه الظلم ما تسكت اعله الجور
تعلّمنه العقيده تريد نفدي إنحور
للمذهب نصير بكل زمان السور
عتره بكل زمن وصّت .. بالسم والذبح خلصت
عهد ما نترك اكتابك ..
وگفنه هالمسه إبابك .. يعاشر نور بالعتره
....................................................................................................
زمن نفس الزمن واختلفت الأدوار
نعم يابو الحسن يا وارث الأطهار
على المذهب نشوف شچم ظلم يندار
والثابت يقينه لمنهجك يختار
بقينه اوياك ونعاهد..نضحي والحشد شاهد
وحق كل ذرة بترابك ..
وگفنه هالمسه إبابك .. يعاشر نور بالعتره
....................................................................................................
وحياتك يا علي الهادي الجرح ملچوم
تحوم النائبات أعله الشعب كل يوم
لكن سيدي هذا الظلم ميدوم
لابد من فجر يمحي ليالي الشوم
بهاي أرواحنه نفدي .. قدوم القائم المهدي
شرف تحسبنه بحسابك..
وگفنه هالمسه إبابك .. يعاشر نور بالعتره
....................................................................................................
خادم اهل البيت عليهم السلام
عمار هليل الواسطي
قصيدة { نور الزهراء عليها السلام}
لمناسبة ذكرى ولادة سيدتي ومولاتي فاطمة الزهراء عليها السلام
نورچ يزهراء ... يضوي ليالينه
حلوة الصلاة اعله النبي وال النبي الليله
.....................................................................................................................
يا نور من رب السمه يالزهــــره يا خير النسه
بالعرش اسمج ينكتب تضوي حروفه بهالمسه
حبچ الأغـــلـــى امن الهوا يا فاطمه نتنفّـسـه
نلكَاه ماي لكل ظمـــه رب الجلالــــة امقدّسه
بعيدچ يزهراء ... تهنئه الوالينه
حلوة الصلاة اعله النبي وال النبي الليله
.....................................................................................................................
درس العفاف بكل زمن من عفّـتج كل مصـــدره
حيّاج يا أم الحسن وأم الرســـــــــــول الطاهره
يا زوجة الوالي الشهم أعني الغضنفـــــر حيدره
ولكل غريب انتي الوطن والنعم يا أشرف مَــرَه
حبچ يزهراء ... عن كل شي يغنينه
حلوة الصلاة اعله النبي وال النبي الليله
.....................................................................................................................
يا زهرة الحب والأمل يا عطــر ما مثلـــه عطر
كل الجنان بمولدچ تبقــــه بأريجه تفتخـــر
عطرج سعاده بضي خجل رحمه وتسابيح ونصر
عطرج وحق خير العمل أصبح حرز لأهـل الخدر
إسمچ يزهراء ... عالراس خلينه
حلوة الصلاة اعله النبي وال النبي الليله
.....................................................................................................................
أملاك ربنه إتزاحمت لبست ضواهه وسيّرت
تتبارك الليله إجت للمصطفـــــــى واتبشّرت
وگفت إكَباله أنشدت كل كلمه حلوه وكرّرت
والشانيء الأبتر سكت والفرحه هسه اتقررت
بيهه يزهراء ... حبنه وعناوينه
حلوة الصلاة اعله النبي وال النبي الليله
.....................................................................................................................
كل فرح هالليله إنولد ويــــــــــاج أعلن مولده
ورفرف جنح طير السعد والكون كله شاهده
نقسم وحق واحد أحد هذا عهدنه إنردده
خدامج إحنه للأبد كل لحظه حبنه نجدده
عيدچ يزهراء ... أغلى أمانينه
حلوة الصلاة اعله النبي وال النبي الليله
.....................................................................................................................
خادم الإمام الحسين عليه السلام
عمار هليل الواسطي
جمادي الآخر/ ١٤٤٥ هجري
٢٠٢٤ ميلادي
بحر طويل ( طور كربلائي)
كرامه وباب للحاجات ربك شاء وانطاهه
والجابت مثل عباس حقهه إنچان تتباهه
.....................................................................................................................................
حيّ الله الوفه والطيب عدهه تشوف تفسيره
أم الأربــعــة الأطــيــاب غِــيـره وخلّفت غِيره
كل همهه يرد حســـيــن ظلــــت تنطر إبْحيره
نواظر شابحه أعله الباب.. تنشد حتى ريح الهاب
تنشد عن بدرهه الغاب
شريكة حزن أهل البيت هيچ الباري خلاهه
.....................................................................................................................................
جـــرّب لو ردت تــعــرف فكرك ما يظل حاير
باب الحاجة أم عـــبـــاس تنطـي إمراد للزاير
إقره الفاتحه وإطلب توافــــي وتجبر الخاطر
حلّفهه بغلات حسين ... بالصابه السهم بالعين
بالگطعوا إله چفين
لو عن بُعد بالعباس يمّك هيّه تلگاهه
.....................................................................................................................................
چانت أُمنيتهه تگول عندي من الولد عشره
كلهم إي وحق عبـــاس فدوه الظنوة الزهره
كتبت بالوفه تاريخ ضـــحّـــت كلشي للعتره
سألت بالدمع أم عون ... حاچيني الردتهم عون
وفّوا بالعهد وشلون
موقفهم بعاشر صار ويّه حسين مولاهه
.....................................................................................................................................
زينب جاوبــت گالــت كفـو منهم ورفعة راس
طاحوا گبل إخويه حسين زلم الغيره والنوماس
يعجز كل وصف بالكون ما يتوصف العباس
إخويه وكافلي وذخري ... فديته الكافل بعمري
راحوا وانكسر ظهري
أولادچ فخر للدوم روّت كربله إدماهه
.....................................................................................................................................
عاشت كل عمرهه تگول ما عاف القهر عمري
بس إلّي جره بعـــاشــــور أذّاني وكسر ظهري
أسوي گبور الطيبين وأنحــــب والدمع يجري
دم يجري مصب العين ... يم تشبيه گبر حسين
راح وبعد يحصل وين
رادت روحي بس يا حيف ما حصّلت منواهه
.....................................................................................................................................
واجب عالخلگ مفروض ويّا الطاهره يوفّون
يذكروهه بشهر عاشور لأم الأربعه يحضرون
وكل مرادهم مـنــهــه بأمــــر الخالق يطلبون
عنهم لا مَـتـتـأخر ... تجازي الخادم اليحضر
على الصعبه وعلي تگدر
ربك قاضيةْ حاجات للطيبين سمّاهه
.....................................................................................................................................
خادم أم البنين عليها السلام
عمار هليل الواسطي
قصيدة { خلص عمري }
خـلــص عـمـري أدوّر ويــن ألگاك
أخيراً راح أشوفك وأحچي ويّاك
..............................................................................................................................
آني أم البنــيــــن وما نفذ صبري
بــس رب العــبـــاد بحالتي يدري
خلص عمري بغيابك يا بعد عمري
بقيت أسأل عليك ودمعتي تجري
يساكن وسط روحي وصعبه أنساك
أخيراً راح أشوفـــك وأحچي ويّاك
..............................................................................................................................
وحق ذاك الـوداع البينــك وبيني
أعز من ولدي كلهم يا ضوه عيني
أتاني طيوفك وبلــكــت تحاچيني
العمر وحشه بدونك يبني يحسيني
يگلبي وتدري گلبي شلون يهواك
أخيراً راح أشوفك وأحچي ويّاك
..............................................................................................................................
بدت ساعة صفرهه وكربله صاحت
طحت يبني گبل ما دمعتي طاحت
أحس روحي الحزينه وشكثر ناحت
رحت عنهه ومشيت وهيّه هم راحت
ما تِحــمـِل يـبـعـد العــمـر فرگاك
أخيراً راح أشوفك وأحچي ويّاك
..............................................................................................................................
على حــر الجـمــر ظليــت منتظره
غدت أنفاسي حسره وتدفع بحسره
فداك أربـــع بنــيــني طالت الفتــره
هدم حــيلـــي البُعد يا ظنوة الزهره
يرد بس الصدى لو صوتي ناداك
أخيراً راح أشوفك وأحچي ويّاك
..............................................................................................................................
محتاره بـغــيابــك والدمــع من دم
وگلب الوالــده ثِـــق والنــبــي يعلم
إجاني بيا مصيـبــــه بشر ابن حذلم
نِعَـه الأولاد وآنـــي اعـــليـــك أتألم
إلى أن بالمدامــــع شفتــه ينعاك
أخيراً راح أشوفك وأحچي ويّاك
..............................................................................................................................
وحق دمع العـقــيله الفگــدت الكافل
جمر صار الدمع فـــوگ الوجــن نازل
ما قـصّـر تگـلـي اويــــــاي أبو فاضل
گلت أولادي فدوه حسيــــن يستاهل
أتاني الموت بعدك عمـري يفداك
أخيراً راح أشوفك وأحچي ويّاك
..............................................................................................................................
على افــراش المـنــيّـه وروحي تدريهه
بعد طــف كربلــــه كل حــيــل ما بيهه
روحي تصيح بســمـــك وانتـــه غاليهه
حبيبي حـســــيــــن آخـر كلمه أحچيهه
گلت والأمنيه بنص روحي ملگاك
أخيراً راح أشوفك وأحچي ويّاك
..............................................................................................................................
خادم أم البنين عليها السلام
عمار هليل الواسطي
منهاج الليالي الفاطمية الثالثة
قصيدة گعدة طور ( إلمن الصيوان منصوب )
وحشه دونچ مظلم البيت يُـمّــه
مات بعيوني الضوه... يُــمّـه مخنوگ الهوه
وحشه دونچ مظلم البيت يُـمّــه
........................................................................................................................
آني يالزهـــره عزيـــزچ يا نــبــض دلّالــــي وينچ
والله مشتاگ أرد أشوفچ ظامي يالزهره الحنينچ
بهالرحيل إنـصــاب گلبـــي وغمّضت للتالي عينچ
كسر الخواطر مو سهل ... يالغاليه وما ينحمل
دم المدامع تنهمل ... جاوبي لهفت احسينج
أسأل وما منچ إجواب يُـمّــه
آني والميت سوّه ... يُــمّـه مخنوگ الهوه
وحشه دونچ مظلم البيت يُـمّــه
........................................................................................................................
عَصْرَت الباب وهضمهه عافت بنص گلبي حسره
والكسر ضلعين منـــچ كــسر ظهري شلون كسره
غالي دمعچ يالزچــيـــه لچـــن ما يمسح السطره
من يبتدي احساس اليتم ... حيلي برحيلچ ينهدم
مهضوم عــنــد الله العلم ... هالكسر بيمن أجبره
من حنانچ گلبي محروم يُــمّــه
جرحي ظل إبلا دوه ... يُــمّـه مخنوگ الهوه
وحشه دونچ مظلم البيت يُـمّــه
........................................................................................................................
شفت أبويه ومحني ظهره بيا صبر يگدر يكابر
گوه يمشي انضهد گلبه مشية المكســـور خاطر
شما تجي عيونه اعله زينب دم يصب دمع النواظر
يحضنهه والمدمع دمه ... راحت يزينب فاطمه
هيچ الحزن گاع وسمه ... عالعزيزه من تهاجر
شمعه أبچي ومشتعل نار يُــمّــه
گلبي يالزهره إنچوه ... يُــمّـه مخنوگ الهوه
وحشه دونچ مظلم البيت يُـمّــه
........................................................................................................................
والعلم عند الله باچر شلون راح يصير أمري
أذكر ضلوعچ واشوفن خيل تسحگ فوگ صدري
والخيم بالنار تسعر والشمر يگطع النحري
ليل الحزن ما بي صبح ... عبد الله والمحسن جرح
راسي يرفعوه عالرمح ... بهالمصايب ربنا يدري
والحرم يسبوهه للشام يُــمّــه
عگب شيّال اللوه ... يُــمّـه مخنوگ الهوه
وحشه دونچ مظلم البيت يُـمّــه
........................................................................................................................
ودّعت عمري بوداعچ يالزچيه ودمعي جاري
مظلم الليل بحسرتي وباليــتـــم مظلم نهاري
شأنتــظر من جور دهـــري بعد إلمن إنتظاري
وحشه والموادع صعب ... درب المنيّه يا درب
نوح ويتم ضيم وغُرُب ... يا مدامع تطفي ناري
بهذا حالي امساهر الليل يُــمّـه
عمرچ اكتابه إنطوه ... يُــمّـه مخنوگ الهوه
وحشه دونچ مظلم البيت يُـمّــه
........................................................................................................................
خادم الإمام الحسين عليه السلام
عمار هليل الواسطي
منهاج الليالي الفاطمية الثالثة
قصيدة { الراية المهدوية}
يقيناً ينبــني قـبر الزچيه
من تظهر الرايه المهدويّه
.........................................................................................................................
يظل الثار ذمة لصاحب الثار
أبو صالح كفيل بهاي الأسرار
من يظهر ينـشّــف كل الأعبار
حليف الصبر سلطان البريّه
.........................................................................................................................
يجي ومثل الشمس واضح نشوفه
سلام الله على أربع حروفه
من يبني القبر نمشي ونطوفه
ونحييهه الزيارة الفاطميه
.........................................................................................................................
حلم لكن حقيقه يصير للعين
قبّة والمناير شامخة اثنين
ناخذ صوغة من تراب الحسين
إلى قبر الوديعه أجمل هديّه .........................................................................................................................
نعوّض كل صبرنه وكل الدموع
وبصحن الزچيه نشعل شموع
بعد ما يبقه شيعي وگلبه مفجوع
نصر والمهدي يحسمهه القضيه
.........................................................................................................................
من كل صوب تتعنه القوافل
وفيّه وعالعهد ظلت تِواصل
ميراث الوفه من أبو فاضل
كافل والوفه عنده سجيّه
.........................................................................................................................
يسولف كل گلب هَمّه وأنينه
ويجدد عهده للزهره الحزينه
صيحات وهتافات المدينه
هلا يا زاير البضعه التقيّه
.........................................................................................................................
دعاء المحب للباري بجلاله
يعجّل طلعة المهدي بمجاله
گدام الفرج ماكو استحاله
منتظرين للطلعه البهيه
.........................................................................................................................
خادم الإمام الحسين عليه السلام
عمار هليل الواسطي
منهاج الليالي الفاطمية الثالثة
ميمر كربلائي
أين المفر يَالعاديت زهرةْ علي وسنينه
.................................................................................................................................
واعي الحديث القاصي قبل الداني
مضمونه بي ســر واضـــح وربــاني
كــلمــــــن يــأذّي فاطــمـــه أذّانـــي
يوم القيامه بيا حال والقاضي بي بارينه
.................................................................................................................................
بيت النبي يعني العرش والأسرار
جايب حطب إلمن وبي تشعل نار
أقسم إذا مرخـــوص بيهــه الكرار
لي هسه چان يدورون إبن السقيفه وينه
.................................................................................................................................
تدفع عليهه الباب وسفــه وهضمه
مو زلمه حــتـــى نعاتــبـك مو زلمه
شبه الزلم تــتــجـــاوز اعله الحُـرمه
بضعة نبينا المختار والزهرة شمعة دينه
.................................................................................................................................
ضلعين تكسر منهه وتصب دموع
ويوگع جنيــــن بعتبة الباب يلوع
وين الرجوله والفخر بالمــوضــوع
تاريخك أسود معلوم يملي الغدر ثلثينه
.................................................................................................................................
ثلثين يمـلـي وثلث مـنــهــن أقرب
وكت الصدگ من كل حرب تتهرّب
منك فلا نســتــغــرب ونــتـعــجّــب
هذا الفعل وصمة عار وبدفترك قارينه
.................................................................................................................................
باچر وراك حـســـاب لا مو يومك
الله ومُحَمّدنه وعلينــه اخصومك
الكل الخلائق ينكشـــف مضمومك
والحق نهج أهل البيت من النبي المهدينه
.................................................................................................................................
غصبن على كلمــــن يظن ممنوعه
للمهدي صرخة حق تظل مسموعه
قبّة ومنــايـــر للســمــــــه مرفوعه
يبنيها لجل الزهراء وهالموعد امتانينه
.................................................................................................................................
خادم الإمام الحسين عليه السلام
عمار هليل الواسطي