7103
إحنه غير حسين ما عدنه وسيله والذنوب اهـــواي چـفّـتـها ثجيله
قصيدة { أحتار }
في ذكرى شهادة سيدي ومولاي الإمام جعفر الصادق عليه السلام
أحتار ... نار بداري تلهب شافت العين
أحتار ... من أذكر مخيم جدّي الحسين
………………………………………………………………………………………………………………………………………………
كل فاگد يلچمه الحـزن ... للذكـــرى تدمع عينه
بالأخص لو فارگ محب ... يسوه العمر واسنينه
بلسانه بس كــلـمه تظل ... أحـاه يَـكِـلـمــةْ ويـنه
والذكرى آني ودمْـعِـتي ... الطَــفْ كربله اتودِينَه
أعبار.. ترجع بالسنين الگَـطْـعَت البين
أحتار ... من أذكر مخيم جدّي الحسين
………………………………………………………………………………………………………………………………………………
يدروني جدّي المنذبح ... عـطـشـان ويعــادوني
والحرگ الخيام بحقد ... بـهـذا الفـعــل رجعوني
من إسمعت صوت الحرم ... تـصـــرخ تغيّر لوني
چن شفت زينب عمّـتـي ... وداعت علي بعيوني
والنار ... ما خلت أثر من الصواوين
أحتار ... من أذكر مخيم جدّي الحسين
………………………………………………………………………………………………………………………………………………
عالدار من جمعوا حطب ... نار الحقد مضرومه
إسْتذكرت واشچم جرح ... بي مُـهْـجـتي مهمومه
إسمين صحت بحسرتي ... وبـنـبـــرتي الملچومه
يـحـسـيـــن مره وثانـيه ... يا فاطمــــه المظلومه
أقدار... دارت بالعكـس حسره بحسرتين
أحتار ... من أذكر مخيم جدّي الحسين
………………………………………………………………………………………………………………………………………………
اللّه اليساعد مُـهجتك ... يا جــدّي يــوم الـعاشـر
بس اعله نيران الخيم ... مـعـذور يِـعــمَه الناظـــر
لا طفلي ذبحوه بين إدي ... لا صدري داسه الحافر
شيسوي گلبي اشما صـبـر ... مو مـثــل گلبك صابر
آثار ... مكتوب بدمع ما بين گلبين
أحتار ... من أذكر مخيم جدّي الحسين
………………………………………………………………………………………………………………………………………………
أيامي ما شافــن فرح ... كلهن حــــزن مِتواصل
حتى الليالي بلا ضوه ... من حد خسوف الكافل
عمري طـفـوف وكربلـه ... بُـعد الزمـــن مـو فاصل
عايش محرّم والدمع ... ترْجم عــذابـــي الحاصل
تذكار ... شايف هالمسه ما بين نارين
أحتار ... من أذكر مخيم جدّي الحسين
………………………………………………………………………………………………………………………………………………
أيامي مـعـدوده صـفـت ... حزني وصَـف أيـامـي
لا دمعه گطعت حسرتي ... لا دوه يـفـيــــد الآمي
نار الّي بالدار إسعرت ... رســمــت خـيـــم گدامي
آني أدري بالسم أنكتل ... بس ردت أموتن ظامي
إيثار ... روحي ومهجتي وعيوني الاثنين
أحتار ... من أذكر مخيم جدّي الحسين
………………………………………………………………………………………………………………………………………………
أنفاسي خطــوات الأجل ... ما نشف جفني الدامع
كل دمعه صوره من هلي ... هيچ الوحـيـــد يباوع
يقترب مـوتــي وأنـتـظر ... لأحبــابــي راجع راجع
بلكت تــهـوّد حـسْـرتــي ... ويرحل ونيــني الفازع
للثار ... جرحي وكربله بالروح جرحين
أحتار ... من أذكر مخيم جدّي الحسين
………………………………………………………………………………………………………………………………………………
خادم الحسين عليه السلام
عمار هليل الواسطي
قصيدة { دنيا العجائب}
في ذكرى شهادة سيدي ومولاي الإمام جعفر الصادق عليه السلام
ما نصفتك يا حيف دنيا العجايب
يالأســســـت للدين فخر المذاهب
.................................................................................................................................
يا ســادس الأطهار ليلة مصابــك
مشتاگه هاي الناس تشتــم تُرابك
مامن ضريح شلـــون توگف إبّابك
يالصادق وعانيت من هالمصايب
.................................................................................................................................
حي ميت وعانيــت منهـم يمـولاي
معلومه والأسباب يا سيـدي اهواي
واليــبـغــض الكـــرار مينصفك بهاي
والغدر والأحقاد طبع النواصب
.................................................................................................................................
يالشرّعت دستـــور واضــح للأجيال
جعفري المذهب صار مضرب للأمثال
وبعصرك اشجازوك والحاقــــد إشنال
حرگوا عليك الدار يبن الغوالب
.................................................................................................................................
حرگوهه ألف يا حيف وبـغــدر سَمّوك
والظلموا السبــقــوك حـتــمــاً يظلموك
ظنــهـــم ابهالأفــعــال گـــدروا يهزموك
بس الحقيقه تفوز رغم النوايب
.................................................................................................................................
بسْمَرَت مــنـهـا حلوگ خِرست لِسنهه
مجدك بقه وميــمــوت بالغصب عنهه
بس شــيـعــتــك لليــــوم دايم حزنهه
حيف القبر هدموه فوگ الترايب
.................................................................................................................................
مو عجب طـبــع إعــداك ظلّت تـنافـق
شلون الثره يـنـقـــاس وي جبل شاهق
غـصــبــــن عليهم عاش جعفر الصادق
واليفتهم معناك يحچي التجارب
.................................................................................................................................
بالحشر غاد يصير لخصومك احساب
كلش صعب وهناك تكشفهه الأسباب
والقاضي ربنا يصير يحكم عالأذناب
كل ناصبي بالنار الله اليحاسب
.................................................................................................................................
خادم الإمام الحسين عليه السلام
عمار هليل الواسطي
قصيدة ( رحيلك ) طور كربلائي
برحيلك ضجّت الأكوان يحيدر والأجل زارك
نــعــم يالتـِكـــرم الخطار ملك الموت خطارك
………………………………………………………………………………………………………………………………………………
وجود الكون والمضمون أصبح يا علي بچفّك
والموجود كلّه يعود وصفـــه إمطابق الوصفك
كيان الدين يا بو حسين واگف هالمسه ابصفّك
لحظات وهمست بصوت
يحيدر من دعيت الموت
إجاك برهبه راد ايفوت
ترخّص منك ومرخوص گتله وأمّن بدارك
………………………………………………………………………………………………………………………………………………
يسيف إتهاب منه إرگاب كلهه إتصيحله ادخيلك
حيلك ينـهـــدم والنــاس شــدّت حــيـلهه بحيلك
راح الراح من مـصــبــاح باچـــر وإنـخـتـــم ليلك
نظام الدنيه يتغيّر
سماهه تصب دمع أحمر
كلهه تصيح يا حيدر
دخيلك لا تفارگنه عليك بجوهر أسرارك
………………………………………………………………………………………………………………………………………………
وحشه البيت واشخليت رحيلك يا علي الأصعب
الحسن وحسين مجره العين دم وخدهم تخضّب
زينب يتّماهه البين أحاه يا هضم زينب
بثوب أسود تلاگي العيد
بس يا عيد وإنته ابعيد
هضيمه وحيف يا صنديد
جمر حزنك فلا يخمد وأبد ما تنطفي نارك
………………………………………………………………………………………………………………………………………………
خضيب الهام والأيتام يم بابك تجر حسره
تودعك يا علي الليله نار گلوبهــــه أموجره
عليهم آخر اللحظات چانت يا علي النظره
توصّي أُولادك إعليهم
يتامه وإنته واليهم
صعب لمن تخليهم
بهضم يا والد الأيتام على الخد تجري أعبارك
………………………………………………………………………………………………………………………………………………
يحامي الجار وشتختار أمرك نافذ وصاير
ملك الموت إجه اعله الصوت واگف يمك وحاير
گلتله اتوكل اعله اللّه وإخذ روحي بگلب صابر
أمر اللّه وعَلَيْ واجب
أنفذ والگلب حاسب
لهذا اليوم وامراقب
أفوض أمري للباري روحي بأمره تتبارك
………………………………………………………………………………………………………………………………………………
يعالي الهام والإسلام نعاك بعالي حسراته
والقرآن يالقرآن يمك يبچي آياته
الليله أنبياء اللّه كلمن عاش مأساته
حضرت كلهه أحبابك
وگفت يا علي إبْابك
مدمع دم على اخضابك
بچت وإختنگت بعبره وأمست مظلمه إديارك
………………………………………………………………………………………………………………………………………………
للمحشر تظل هالنار بگلوب الخلگ يا نار
ما تطفه بدمع جاري وحق طيحتك يا كرار
طبرتك جدّدت بيهه نار الضلع والبسمار
إمودّع يا علي الوالي
يضي نجومهه العالي
الغالي ويفگد الغالي
مو عجبه لون للموت بي يلهب وگد نارك
………………………………………………………………………………………………………………………………………………
خادم الحسين عليه السلام
عمار هليل الواسطي
قصيدة ( آخر أذان )
بصوتك يحيـــدر يرتفـع آخر أَذان
معناها يوم اموداعك يالغالي حان
………………………………………………………………………………………………………………………………………………
صوتك أَمان لكل محب عاش بأمانك
نبراتـك البــيــهــن طعم يشبه حنانك
والناس تدري تـعـوّدَتْ تـــســمــع أَذانك
حتى الفرض يحزن إذا يفــرغ مكانك
حتماً يحيدر نستمـــع نوح المكان
معناها يوم اموداعك يالغالي حان
………………………………………………………………………………………………………………………………………………
بعيونهم مــات الضــوه وبالروح حُرگه
أحـبـــابـــك اشتصبر بعد والفرگه فرگه
بــاب الفــقــيـر اتـعـوّد بـچـفّـك تـــدگّه
ملگاك هالــلـيـلـه جـــرح واشـلون ملگه
حتى الهوه الليله اختنگ يابو الحنان
معناها يــــوم اموداعــك يالغالي حان
………………………………………………………………………………………………………………………………………………
قصة الجرح تدري الجرح يكتب قضيّه
قصةْ عَـــدِل حاكـــــم فلا خان الرعيّه
لهذا السبب گاع وسمه مفجــوعه هيّه
تعرف بجرحك يــنــفــتـــح باب المنيّه
إنته الأمان ولو رحت راح الأمان
معناها يوم اموداعك يالغالي حان
………………………………………………………………………………………………………………………………………………
مو بس تصب دم الدمع تعمه النواظـر
يالما كسرت بدولــتـــك للنــاس خاطر
أيتامك تريدك تجي شـيـصـيــــر باچر
لو تدري عنــهــــه للأجــل نيتك تسافر
أمر الله يالغالي إنكتب آن الأوان
معناها يوم اموداعك يالغالي حان
………………………………………………………………………………………………………………………………………………
يم بابك الليله قصص تكــتــب يتاماك
عن ذكرياتك يا علي العاشــتـهــه ويّاك
حتى الاملاك إتواجدت بالمدمـــع هناك
ما شافتك طايح أبد مـعــذوره الأملاك
وتنادي كل هذا الألم وين النه چان
معناها يوم اموداعك يالغالي حان
………………………………………………………………………………………………………………………………………………
كلمن حضر گلبه إنفطر والحسره بالروح
وين الأبو اسمعنه الأبو هالليله مجروح
تصرخ دخيلك يا علــــي لا تمشي وتروح
أنفاسهه حــســره وألــم يم بابــــك تنوح
أكوانها انفجعت الك إنس اويا جان
معناها يوم اموداعك يالغالي حان
………………………………………………………………………………………………………………………………………………
آخر أَذان ومِــن بــعــد تسـبــيح الالام
نيران تــتــوجـــر حزن بگلوب الأيتام
بعد النبي بيا فاجعه ينـصـــاب الإسلام
كلشي نعاك بطيحتك ناســـــك و الأيام
وكلنه نجدد هالحــزن وبكل زمان
معناها يوم اموداعك يالغالي حان
………………………………………………………………………………………………………………………………………………
خادم أمير المؤمنين علي (ع)
عمار هليل الواسطي
قصيدة ( ما يرجع بسلامة )
رايح ما يردّلـهــه بسلامه
الله يساعد گلوب اليتامه
جمر أحزانهه اليوم القيامه
..........................................................................................................................
أبوهه وعادت الأولاد لو غاب الأبو تفگده
تحسّب من يغيب بيوم خافن طايح ابشدّه
تدعي الله بدمع همال بلكت سالم ايردّه
أبوهه وغاب لمن غاب زمانه شجاب واشودّه
تدعي الباري بالدعوه الوحيده
أبونه ما إجـــــــه ومنك نريده
ما ندري الوكت شنهو مَرامه
..........................................................................................................................
تشيل چفوفهه وتدعي يربنا أيتام تعرفنه
يالمفرّح گلب يعقوب نريد نشوف يوسفنه
خيمتنه وربينه سنين حدر فَيْهَه وتشرفنه
زمن غدار بينه اندار ما فد يوم ينصفنه
من چم يوم أبونه ما إجه وغاب
منهه وما عليــنــــه اندگت الباب
يشبه نوحنه نوح الحمامه
..........................................................................................................................
ضجّت كوفة الأحزان سمعت هاليتامه أخبار
بالمحراب داحي الباب رأسه انصاب شنهو الصار
عُرفَتْ والگلوب اگلوب تعلم بالحزن لو دار
إذن هذا العليهه يجود نفسه يصير حامي الجار
لــمّــن قارِنَت مــا بــــيــن الإثنيــن
أبو الثام انجرح والطاح أبو حسين
هضيمه تفتقد نبرت كلامه
..........................................................................................................................
گصْدَت بيت والدهه بزمان الأبد مو منصِف
صحيح ازغار بالأعمار بس إكبار بالموقف
كل ظنهه الجروح تطيب بحال الجرح ما تِعرِف
جابتله اللبن وجروح بيهه امن القهر تنزف
تبچي إباب أبو الفقره بدمعهه
بس حيدر علي يفهـم وضعهه
ما يرجع بعد ركن الإمامه
..........................................................................................................................
بده ذاك اللقاء الچان محد حاسب احسابه
حيدر ماله حيل شلون يريد يشوف أحبابه
وأحبابه اليتامه تريد تبوسه وتعرف اصوابه
تسأله ها يبونه شبيك رادت تسمع اجوابه
تخيّل ذاك المْسكّت ميادين
ما يگدر يجاوب هالمساكين
ألف حيف وأسف مطبور هامه
..........................................................................................................................
عرف بيهم أبو اليمه ولهف گلبه اعله ملگاهم
لزم إيد الحسن وحسين بالأيتام وصّاهم
هذوله اولادي يولادي رضات الباري برضاهم
مثل ما چنت أمر بيهم تمرون اعله سكناهم
چانت من علي هاي الوصيه
لن عند اليتامه أكبــر قضيه
يفگدهه بيقظته وبمنامه
..........................................................................................................................
خادم أمير المؤمنين عليه السلام
عمار هليل الواسطي
منهاج قصائد جرح وشهادة سيدي ومولاي أمير المؤمنين علي بن أبي طالب عليهما السلام
Читать полностью…
قصيدة في ذكرى وفاة سيدتي ومولاتي خديجة الكبرى عليها السلام
قصيدة { عام الحزن }
يبتدي عام الحزن من هالمصيـبه
من حبيـب الله يودعـهـه الحبيبه
....................................................................................................................................
هذا عام الحزن والحسبـه ثگيله
الله اليساعد حبيب الله وخليله
مو قليله هـمـــوم گلبه مو قليله
هالمسيّــــه يودع الحرّه الجليله
هذا حال الموت والراح اشيجيبه
من حبيـب الله يودعـهـه الحبيبه
....................................................................................................................................
يصبر ويا جفن عند الهادي يسهد
يا سلام الله اعله صبرك يا محمد
يودع الليله خديجـــه والله يشهد
نار المــوادع بــعــد هيــهــات تُبرد
هذا جرح اوداع لا ماصح طبيبه
من حبيـب الله يودعـهـه الحبيبه
....................................................................................................................................
ساعة اللاحـــت علامــات المنيه
حارت أم المؤمنـــيـــن بيا قضيه
نادت أسماء وتوصيهـــــه بوصيّه
تگلهه يا أســمـــاء عينچ عالزچيه
فاطمه الليله گلبهه أعلن نحيبه
من حبيـب الله يودعـهـه الحبيبه
....................................................................................................................................
آخ يا عام الحـــزن عـام المواجع
لا جرح يبره ولا تنشــــف مدامع
من نبي الرحمه يشاهد هالفواجع
چم عزيز يروح منه وماهو راجع
شگد يعيش هموم بالدنيا العجيبه
من حبيـب الله يودعـهـه الحبيبه
....................................................................................................................................
راحت ودين الله ما ينسـه المآثر
تبرعت بٱموالها عن طيــب خاطر
حتى يبقه الدين متهزمه المخاطر
بيهه وبسيف الولي حتمـــــاً يفاخر
يا سلام الله على الروح النجيبه
من حبيـب الله يودعـهـه الحبيبه
....................................................................................................................................
يا سلام الله على وگفتهه للدين
هاي أم المؤمنيـــن أم المـــوالين
واجب الليله ذكرهــــه يا محبين
نواسي بيهه المصطفى وآله الميامين
مو غريبه بينه عاشت مو غريبه
من حبيـب الله يودعـهـه الحبيبه
....................................................................................................................................
للرسول الهادي خطّينه بدمعنه
هالمواسات ورحيل أُمنا فجعنه
أصدق دموع بتعازيــنـــه رُفعنه
للإمام الغائب الحاضــــر جَمِـعنه
بينه جمر الشوگ ما يخمد لهيبه
من حبيـب الله يودعـهـه الحبيبه
....................................................................................................................................
خادم الإمام الحسين عليه السلام
عمار هليل الواسطي
غداً إن شاء الله تعالى سأقوم بنشر قصائد وفاة سيدي ومولاي أبي طالب رضي الله عنه وسيدتي ومولاتي خديجة الكبرى رضوان الله عليها .
Читать полностью…
في ذكرى ولادة سيدي ومولاي الإمام علي السجاد عليه السلام
قصيدة ( ميلاد غالينه )
فرحنه بالــولادة وكل محب حاضر
هلا بمولد علي السجـــــاد أبو الباقر
................................................................................................
أجواء السعادة ... أفراح الولادة
هنيال الحياهه... حضر
بعيون الموالي ... ميلاد أغلى غالي
ومنور الليالي ... گمر
زيـــن العابـــدين الكـــوكــب الزاهر
هلا بمولد علي السجـــــاد أبو الباقر
................................................................................................
من الله هدية ... للعترة الزهية
مولود الكرامة ... علي
لحسين بقدومه ... عيد الفرحة يومه
معصوم عنده هيبة ... ولي
ظل بــيــت الحسيـــن بمولده عامر
هلا بمولد علي السجـــــاد أبو الباقر
................................................................................................
چانت بالأماني ... للقائم نتاني
للحضره نزوره ... أمل
مرقد بي مناير ... گبة ونوره زاهر
ويشرّف بقيعه ... أمل
اباب الحضــــرة نقرأ هــــلا بالزاير
هلا بمولد علي السجـــــاد أبو الباقر
................................................................................................
نقدمهه التهاني ... ممزوجه بأماني
لحسين بولادة ... ضوه
يجلي الظلمه نوره ... يشرفنه بحضوره
لجروح الموالي ... دوه
يـشـــفــي كل مريـض بقدرة القادر
هلا بمولد علي السجـــــاد أبو الباقر
................................................................................................
بهالليله انتبارك ... بالفرحة انتشارك
نحضر والدعاء ... الأهم
للمهدي وحضوره ... تعجيل الظهوره
ندعي الباري ربنا ... نعم
بحـــق هالليله واقـــع مو حلم عابر
هلا بمولد علي السجـــــاد أبو الباقر
................................................................................................
خادم الإمام الحسين عليه السلام
عمار هليل الواسطي
١٤٤٦ هجري
٢٠٢٥ ميلادي
الكوت
في ذكرى ولادة سيدي ومولاي أبي الفضل العباس عليه السلام
قصيدة ( فرحت الغيرة )
بميلاد أبو فاضل فرحت الغيرة
بميلاد أبو فاضل فرحت الغيرة
........................................................................................
حي أم البنــيـــن الجابــت العباس
هاي أجمل هـــديـــة للولي يا ناس
من مهده غيور ونشمي رفعة راس
أبو فاضل شهم بالروح والإحساس
والنخــوة لــغــز والگمر تفسيره
بميلاد أبو فاضل فرحت الغيرة
........................................................................................
گمر هاشــم تـشــع عالكــون أنواره
الليله كــل غــيـــور الفـــرح خطاره
عضيد حسين هذا وإسمـــع أخباره
مثل شــمـــرة علي لو لــزم فـقّـــاره
خــيّـــال وعـــدوّه حيرته حيره
بميلاد أبو فاضل فرحت الغيرة
........................................................................................
فرحت زينب الحــوراء بالكافل
صاحت يا هلا بميلاد أبو فاضل
أملاك السمـــه كتبت خبر عاجل
إنــولــد عباس والكرار يستاهل
سبــحـــان الآله وهـــذا تدبــيره
بميلاد أبو فاضل فرحت الغيرة
........................................................................................
باچر يــشـهــد المـــيــدان أفعاله
صگار الزلــــم مرهــــب الخـيّـاله
طافـــت عالمـــهـــد أمـلاك تبراله
يا ألف الصــــلاة اعلـه النبي وآله
الليله رددت بالفـــــرح كل ديره
بميلاد أبو فاضل فرحت الغيرة
........................................................................................
يا عــيـــد المبارك عيد ميلاده
باب الحاجة هذا إقره أمجاده
هلا بعم النشامى وهيبة الساده
كافل زينب وحيدر علي الراده
معلوم الولـــي يـعـــرف بتأثيره
بميلاد أبو فاضل فرحت الغيرة
........................................................................................
خادم الإمام الحسين عليه السلام
عمار هليل الواسطي
١٤٤٦ هجري
٢٠٢٥ ميلادي
الكوت
في ذكرى ولادة سيدي ومولاي الإمام الحسين عليه السلام
قصيدة ( مولد الغالي )
ميلادك عــيــد الأعياد يـبــن الوالي
يحسين وغيرك للروح ميصح غالي
حسين ... حسين ... حسين
................................................................................................
بيوم ٣ مـن شعــبـــان كل النـــاس فرحانه
يبن المرتضــى الكــرار عـــيدك هذا عنوانه
يرسم عالسماء شموع تضوي بأجمل الوانه
حتماً تحضر الأملاك تفـــرح هالمسه اويانه
مسروره بأجمل ميلاد عيد وبشرى
ولهذا اليوم الأجيال تحيي الذكرى
حسين ... حسين ... حسين ... يا حسين
................................................................................................
إسمك أنزله الرحمن من سابع سمه المهدك
يا قِبلة محــبـــة وشــوگ لا قبلك ولا بعدك
ملايين التحبـــك ناس بيهه اتفرّدت وحدك
بمجدك يفخـــر التاريخ يا سبط النبي جدك
ريحانة طه وجيـــناك هاي الليله
نحتار المثلك بالعيد شنو نهديله
حسين ... حسين ... حسين ... يا حسين
................................................................................................
بگلب المرتضى الكرار محلى الفرحه والبُشرى
بميلادك يــــروح الروح فرحـت فاطمة الزهره
خِدّامك يبـــو الأحـــرار محفل عيدك انحضره
نترجّه بعطف گـلــبــك مــنــك ســيـدي النظره
يبن الوالي وعد عيناك كل خِدّامك
وامبارك مو بس هاليوم كل أيامك
حسين ... حسين ... حسين ... يا حسين
................................................................................................
فطرس سامحه الرحمن چي طخ مهدك اجناحه
يالحبـــك عقيــدة ونــور شعـشــع بيك مصباحه
إنته الـــروح والريــحـــان ومن بعد التعب راحه
ما خــاب التمسّــك بيك گلــبــــه وعاش سِبّاحه
يحسين اشتسوه ابليـــاك كل دنيانه
دين الله الثابت بدماك صرت أركانه
حسين ... حسين ... حسين ... يا حسين
................................................................................................
مجـنــونيــن من نـهــواك معذوريــن يالغالي
حبــيــنــاك عــاهـــدنــاك ما نـنــســـاك للتالي
حضرنه بليلة الميلاد نهنّــي الزهــره والوالي
وبجالك يبو الســجـــاد بيرغنـــــه يظل عالي
شعبان الحب والأفراح جاب أعيادك
حق من عنده تغار شهور بي ميلادك
حسين ... حسين ... حسين ... يا حسين
................................................................................................
خادم الإمام الحسين عليه السلام
عمار هليل الواسطي
١٤٤٦ هجري
٢٠٢٥ ميلادي
الكوت
أسمى آيات التهاني والتبريكات أرفعها إلى مقام سيدي ومولاي صاحب الزمان الإمام المهدي المنتظر ( عج ) ومراجعنا العظام والشرفاء من المسلمين و المسلمات والإنسانية جمعاء بمناسبة المبعث النبوي الشريف.
قصيدة { رحمة للعالمين }
كتبتها في ١٨ كانون الثاني من عام ٢٠١٨
يا لهفة الشوق ومسك الختام ... يا سيدي عليك مني السلام
************
في ليلة عــــــدت عروس الليال
تبــــــــــــارك الله بها ذو الجلال
حيث هوت فيـــها عروش الضلال
وجاء بالإسلام طه الهمام
*
أهلاً وسهلا ً يا حبيـــــــــب الآله
من كل قلب فيك يلقـــــــى هواه
لولاك ما العيـــــــــش وما محتواه
يا رحمة الله لكل الأنام
*
يا رحمة الله العزيـــــــــز المعين
قد اصطفاك لدينــــــــه خير دين
فعبدته حتــــــى أتاك اليقيـــــن
مقامك المحمود أعلى مقام
*
بك بلّغ الله عظيــــــــــم الشرف
لمحل من أكرمهــــــــــم إذ رأف
مذ فرحة الميلاد خيـــــــــــراً تزف
قد لاح فجر الفوز رغم الظلام
*
وجئت نوراً ليــــــــــس فيه امتراء
بك قد أنــــــــــار الله وجه السماء
كذلـــك الأرض وكـــــــــــان النداء
بشراكم اليوم بخير الأنام
*
والله أندى حين يحنــــــــــو على
عبيده يا خيـــــــــــــــر كل الملا
وهكذا العطــــــــــــــــف وإلا فلا
من مسبغ النعمة حد التمام
*
هذا سلامي من صمـــــــــيم الفؤاد
والعهد مني دائم للمعــــــــــــــاد
بك قد أنار الله درب الرشــــــــــــاد
يا سيد الخلق نشرت الوئام
*
وهكذا الإســـــــــــلام دين الولاء
دين المحبة ليـــــــس دين العداء
جئت به مبشـــــــــــــــراً والرجاء
تشفع يا طه لكل الكرام
*
تشفع عنـــــــــــــــد الله للمؤمنين
أقصد مـــــن والاك والطــــــــاهرين
أهل العبا وســـــــــــــادة العالمين
ومن بهم دين الآله استقام
*
فبنتك الزهراء خيـــــــــر النساء
وصهرك الكــــــــــــرار روح الوفاء
أنعم بسبطيـــــــــــك كنور يضاء
يا صفوة الله العلي السلام
*
خادم الإمام الحسين عليه السلام
عمار هليل الواسطي
١٨ كانون الثاني ٢٠١٨
قصائد ذكرى شهادة سيدي ومولاي الإمام موسى بن جعفر عليهما السلام
قصيدة { سابع الجروح }
سابع جروح أهل البيت نحيي مُصابه الليله
.......................................................................................................................................................................
يا سابع أنوار الله من أهل البيت
عدوانك تلاشــــو وانتــه الظلٌيت
بطامورة ظلمه للطـغــاة اتحدّيت
ضاعوا مثل ريشه ويل اليضدّك ويله
..................................................................................................................................
شاء الآله ابحكــمـته وكل أمره
قيودك تذل هارون تهدم قصره
بينك وبين الصبر صارت عِشره
حتى الصبر يا مولاي من صبرك يشد حيله
..................................................................................................................................
يلي الفخر بيك إفتخر يا مولاي
يالكاظم وأفضالك هواي هواي
ما خاب كل زاير يگصدك عنّاي
هذا الكرم هذا الجود ميراث حامي ادخيله
..................................................................................................................................
إسمك وتاريخــك فخر يتصدّر
والشاهد بــمـــرقــدك يا بن جعفر
بماي الذهب هــــذا المجد يتسطّر
ترحّب بكل الزوّار وكلمن حضر توميله
..................................................................................................................................
أربعطش عـــام ويــظــن السجان
تنســـاك ناس الحبّــتــك يالسلطان
ما يدري حبك فطره وسط الوجدان
يا رحمة الله المعبود فطره العشگ تحليله
..................................................................................................................................
غصبن على الظلمـوك والماعـرفوك
قصة نصـــر وبكل زمنــهـــم يقروك
نور الله ما ممكن بظلمه يضيـعـــوك
شما يمكرون يخسرون أهل المكر والحِيله
..................................................................................................................................
واسيت من سجنك مصايب عاشور
چبدك مثل چبد الحسـيـــن المفطور
قيودك مثل حبل السبي الگاد النور
من سجنك امصاب حسين دم الدمع تبچيله
..................................................................................................................................
خادم الإمام الحسين عليه السلام
عمار هليل الواسطي
منهاج ذكرى ولادة سيدي ومولاي أمير المؤمنين علي بن أبي طالب عليهما السلام
أهازيج الولادة الميمونة
فرحت بت أســــد من جابت الكرار
والسابع ســمـــه واصل مدى الأنوار
علي من العلي والعلي الإسمه اختار
والكعبة امست مسقط راسه
........................................................................................
لحد الآن واضـــح بالجــدار الشگ
يظل شاهد عيان وما يضيع الحگ
شگد رادو يضيعــونه بصبغ وابدگ
شمس الله شلون يطفوهه ؟
..........................................................................................
نسولف عالشجاعه وعلي حاسمهه
گبـــل المــعـركه الصــولات راسمهه
روس اعداه عــــدل نصين يگسمهه
ميزان بضربة فقّاره
..........................................................................................
باچـر بالحــشـــر نــفـرح ونتهنّه
ونسمع صوت البشاره يصيح النه
كل شيـعـــــة علي يدخلون للجنّه
وللنار تطب كل عدوانه
.................................................................................................
خادم الإمام الحسين عليه السلام
عمار هليل الواسطي
منهاج ذكرى ولادة سيدي ومولاي أمير المؤمنين علي بن أبي طالب عليهما السلام
المقدمة
أنعم بخيرِ الخَلقِ بعدَ محمدٍ
فخرُ الأطايب ِ والأكارم ِ كلها
هو سَيـّدُ البُلغـــاءِ عِلماً نافعاً
ومَآثِراً ما جـــيء قطُّ بمِثلِها
أنعِمْ وأكرِمْ بالأميرِ المُرتضى
أعني أبا حسنٍ وفحلُ فحولِها
يا ليلةَ الميــلادِ مَجداً باهلي
كُلَّ الليالي ما تَضُـــمُ برحلِها
هذا فتى الأسلامُ شعَّ بنورهِ
من نورِ عرشِ اللهِ في عليائِها
صلّى الآلهُ علـــى النّـبــي وآلهِ
قد أشرقتْ شمسُ الهدى بضياءِها
بسفيــنــة خدمــة الكرار ملّاح
صرت والفخر عالي وأبد ملّاح
الليله نور أبو الحسنين من لاح
وصل سابع سمه يا ناس ضيّه
.............................................................
عليت وكل محب مثلي علي اوياي
أبــارك والــعــمــر كــلّــه علي اوياي
چــف الدهــــر ما يگــدر علي اوياي
شما حيدر علي واگف إليّه
.............................................................
خادم الإمام الحسين عليه السلام
عمار هليل الواسطي
قصيدة في ذكرى شهادة سيدي ومولاي الإمام جعفر الصادق عليه السلام
يالصادق بدمع العين عمرك طويت اكتابه
……………………………………………………………………...................
تاريخ حزنك بالمواجع حافل
ومرسال كل دمعه البقيعك واصل
گلبي بمصابك بالونين ايراسل
يوصل ونيني لمثواك والجفن فاتح بابه
……………………………………………………………………...................
انته النشر علم أهل بيتك مذخور
من الله يا هيبة البيت المعمور
يا سوء عاقبته الخليفة المدحور
حاز الخزي من عاداك باچر عسير احسابه
……………………………………………………………………..................
عاداك وانته العشت هم الغربه
معناهه عاده النبي وأغضب ربه
عشت بمراحل قاهره شكد صعبه
رغم الظلم علمك حاز وبكل أرض طِلّابه
……………………………………………………………………..................
گد ماچنت مهموم ماغمضت عين
ليليه تجري دموعك الطف حسين
مثله تعرف تنغدر لو يگصي البين
أصل الغدر راسه شلون رد وطلع بذنابه
……………………………………………………………………..................
يالصادق دموع الحزن أجريهه
أستذكر امصابك ودم أغديهه
واويلي عالمسموم من أنعيهه
دم ينسفح دمع العين صبح ومسه سچابه
……………………………………………………………………...................
إسوه إلك والروح كل لحظه تنوح
بكل گلب منكم گظه مليان جروح
مسموم چان إنچان مدمي ومذبوح
شاء الآله وسبحان ربنا وعظيم أسبابه
……………………………………………………………………....................
أنعاك يا مولاي ودموعي دموم
ياصادق العتره الإمام المسموم
ما أنسه عهدك وحق ربنا القيوم
گبرك الظل بس اتراب مشتاگ أشم إترابه
……………………………………………………………………...................
خادم الحسين عليه السلام
عمار هليل الواسطي
قصيدة في رثاء سيدي ومولاي زيد الشهيد عليه السلام
كاتب عهد وفــــاءه من دم الوريد
صوت المجد ينادي يا زيد الشهيد
تاريخ النصر ... بسمه يفتخر
.........
هذا تاريخ البواسل عن بني هاشم كتب
خذوا ميراث الشجاعة من علي ونعم النسب
زيد من هاي الفحول الثائرة ومامن عجب
واضح بثورة صموده نور ما يوم انحجب
ضد آل أميه ينتفض ضد الضلال
مؤمن ثباته من مدد رب الجلال
لا ما ينكسر ... بسمه يفتخر
.........
ابن زين العابدين ووارث الحكمة بفخر
من صفات أهل الإمامة وبفضل ربنا انتصر
عالم وزاهد وعابد ثائر وما ينكسر
رغم يعلم راح يُصلب بس على الموقف أصر
بالحكمة والعقيدة والحق والثبات
خط دمه هالشهادة معناهه الحياة
موقف للحشر ... بسمه يفتخر
.........
اعلن الثوره ونداءه يالثارات الحسين
ثار جده الظامي ذمّه وبرگبته هذا دين
يدري هالثورة العظيمة صرخة ضد الظالمين
قلة أنصاره وتحدّه غيرة متروس الجبين
لوما الخيانة والغدر ما ينهزم
حيف وآسف لن خانته شبه الزلم
ما قدم عذر ... بسمه يفتخر
.........
اتصوّب وما نزل عزمه وهامته منزفهه دم
حيث صابوه الأعادي بهامته طاح السهم
هنانه موقف موته واضح والطبيب الي حسم
گله أخيرك لو تموت لو تظل تحمل ألم
أعلنهه زيد بكل فخر هاي الدماء
للثورة تكتب هالنصر يعني البقاء
ميهمه العمر ... بسمه يفتخر
.........
شوف أحقاد آل آميه عالرسول وعترته
مثلوا حيف بحقدهم بالشهيد وجثته
راسه گطعوه وهضيمه هالفعل يا حسرته
صلبوا الجثّه اعله شجره بس بعدهه ثورته
من رفعوا الرأس برمح مو إنتصار
معنى هزيمتهم وضح والغدر عار
زيد وكل شي حر ... بسمه يفتخر
.........
يامن تزوره الضريحه شوف معنى الكبرياء
قبة صارت چنهه كعبة ومرقد بأسم الفداء
هذا زيد وهذا نصره ضامن أسرار البقاء
وين يالسامع هشام ووين آمية الجبناء
زيد الشهيد وكلنه زواره ونطوف
بكعبة ضريحه توحدت كل الصفوف
مرقد يزدهر ... بسمه يفتخر
.........
خادم الإمام الحسين عليه السلام
عمار هليل الواسطي
قصيدة ( جرحك البداية)
إي والرُفــع ويّـاك چـــف الولايه
من هالجرح مولاي تبدي النهايه
.................................................................................................................
جرحك يبو الحسنين أول علامه
مِنّه وبــعــد للدوم نبـقــــه يتامه
دين الله بيك إنصاب ينعه الإمامه
أصعب درب عالروح درب المنايه
.................................................................................................................
يـمـهــدّم الأصـنــام إنته وعضيدك
وبخيبر أكــبــــر بــاب قالعهه بيدك
يم بابــــك الأيـــتــام كــلـهه تريدك
ظلّت عليك اتنوح نوح السبايه
.................................................................................................................
سيف المُرادي شلون يختم حياتك
وجه الوجـــه ما جاك جاك بصلاتك
والسجده للرحمــــــن سجدة وفاتك
تستشهد بمحراب عند الله غايه
.................................................................................................................
بين الولاده وبين هاي الشهاده
تكمل يبو الحسنين كل العِباده
غصبن على العادوك موتك ولاده
وللشيعه يا كرار ما تِــنْــصه رايه
.................................................................................................................
ترحل جسد والروح عد كل الأيتام
يالغالي ما تنــســاك وبطــول الأيام
رغم بوداعـــك حيــل تاذيـهـه الآلام
ما ينتهي امن اليوم دهر الرزايه
.................................................................................................................
يا والد الأيتام ما تـنـســه واحد
تلبس لثامـــك دوم للفُـقــره فاگد
عن هالعمل خليت بس الله شاهد
كلهه بسبيل الله هاي النوايا
.................................................................................................................
أصعب نهايه تصير من شخصك يروح
جرحك وحق عيــنــــاك مصدر للجروح
كل اليـــتامــــه اليــوم ناظرهه مشبوح
وهذا الجرح للموت هوّه البدايه
.................................................................................................................
خادم الإمام الحسين عليه السلام
عمار هليل الواسطي
قصيدة ( هنا يا ليلة القدر)
هُنا يا ليلةَ القَدرِ ...وما أدراكِ ما يجري
سَيُحييْ اللهُ للقُرانِ مأتم
وأركان الهدى فجراً سَتُهدمْ
وما أدراكِ ما يجري
...................................................................................
يا ليلة قدر مثل البدر لو وزّع النور
سبحان الآله الفضّلچ عن كل الشهور
بيچ اتنزّل الذكر الحكيم كتاب مسطور
في رَقّ ٍ على صدر النبي البالرحمه منشور
عُقودٌ تَحمِلُ الحسرة ... هي الأربعُ للهجرة
بخطبٍ يفجعُ الإسلامَ تُختَمْ
وأركان الهدى فجراً سَتُهدمْ
وما أدراكِ ما يجري
...................................................................................
إلى عام أربعين الهجري عن كل الذي صار
خل نرحل سوه ونترك زمنّه وكل الاخبار
أفرضهه جدل عندي أسئلة والعقل محتار
أطمع في جوابج يا قدِر عن ذيچ الأقدار
ظلامٌ بالأسى يُطبَقْ .. وما قد يجري لا يُنطقْ
فمن للجُرحِ والمقتولُ بلسمْ
وأركان الهدى فجراً سَتُهدمْ
وما أدراكِ ما يجري
...................................................................................
من قبل الفرض قبل الفجر هم شفتي الأكوان
چنهه اتغيرت صارت مثل مصدر للأحزان
نسمات الهوه ما خبرتچ عن جرح قرآن
بوجوه اليتامه بكوفتج متغيره الالوان
هدوءٌ يسبِقُ أمْرا ... فسبحان الذي أسرى
بذاك َ الأمر ِوالرَحمنُ أحْكَمْ
وأركان الهدى فجراً سَتُهدمْ
وما أدراكِ ما يجري
...................................................................................
يا ليلة قدر ليش السكوت ووين الجواب
ردت أعرف شعورچ ساعة الدين النبي انصاب
شظنج ماني عارف ياهو طاح گبال محراب
غير اني اليتيم النذر عمره العمر أبو اتراب
لكِ في صَمْتُكِ عُذري .. فقطعاً أنتِ لا تدري
فما قد حل بالدنيا لَمُبهَمْ
وأركان الهدى فجراً سَتُهدمْ
وما أدراكِ ما يجري
...................................................................................
مبهم من يصدگ يهوى طايح ليث الإسلام
وتشوف اليتامى بالنهايه وجه أبو لثام
صدمه لكل محب يعرف علي وبالذات الأيتام
صدمه لگلب زينب ياجفن بعد الولي ينام
فكلُّ الكونِ مصدومُ ... ومحزونٌ ومهمومُ
وكلٌ كان بالمولى مُتَيّمْ
وأركان الهدى فجراً سَتُهدمْ
وما أدراكِ ما يجري
...................................................................................
من هذا سكوتچ أفتهم كل المعانات
چانت دمعتج ذاك الوكت يا ليلة آيات
تنعين الولي قبل الجرح مثل الحمامات
وبمطلع فجر طيحة علي صارت المأسات
جواباً صُغتُ مُعناهُ ... مُحيّاكِ مُحيّاهُ
وبالطبعِ فإنّ اللهَ أعلمْ
وأركان الهدى فجراً سَتُهدمْ
وما أدراكِ ما يجري
...................................................................................
خادم أمير المؤمنين علي عليه السلام
عمار هليل الواسطي
قصيدة ( يا إمام الزمان )
يا إمام الزمــان بالدمـــع أذُكْرَكْ
وبمُصاب الأمير عَظّم الله أجْرك
..............................................................................................................................
عمري خلصته بسؤالك سيــدي وين
حاضر بگلبي يغايب عن ضوه العين
شوفتك هاي المسيّه تحصل امنين
عالحزن الله يعينــك راح أبو حسين
من مصاب المصاب عالرزايا صبرك
وبمُصاب الأميـــــر عَظّم الله أجْرك
..............................................................................................................................
بانتظارك كل حياتــي صارت دمـوع
والعمر نار ومدامــع مثل الشـمــــوع
وين أحييت المصيبه محني الضلوع
تنعى سلطان الإمامــه بگلب مفجوع
كل حياتك غريب والمآسي عمرك
وبمُصاب الأميـــر عَظّم الله أجْرك
..............................................................................................................................
يا ملاذ الناس دمــعـــك غالــي مولاي
عندي إحساس بوجودك حاضر اوياي
من أعدهه جــــروح گلبك كلش هواي
هيه مثل سنيـن عمرك ماضي والجاي
عمرك الانتظار والنهايــه نصرك
وبمُصاب الأمير عَظّم الله أجْرك
..............................................................................................................................
ما أظن بدمــوع عيــنـي تنطفي النار
هالمسه ناريــن بــيّــه وبيــهــن أسرار
نار بالروح لمُـــصــيــبــت حامي الجار
ونار الأشواگ القدومـــــك بيهه محتار
غيرة الله ابْدُعاك عايش اعله أمرك
وبمُصاب الأمير عَظّم الله أجْرك
..............................................................................................................................
ليلة أحزان ومواجع وحـشــه عالروح
يلي تحــمل حـــزن أهلك وين متروح
مو فقط لمصاب جـــدك هالمسه تنوح
الكربله بگلبك بعــدهـــــه تنزف جروح
لو صحت يا حسين چم جرح يقهرك
وبمُصاب الأمير عَظّم الله أجْرك
..............................................................................................................................
عايش وثارات تطلب صــعبـــه دنياك
أدعي للــبــاري بظـهــــورك الله يرعاك
بموعد الـطــلــعــه البهيـــه ترفع الواك
وادم الحضرت تواســـي تحضر اوياك
بهالمجالس تشوف چم محب ينطرك
وبمُصاب الأمير عَظّم الله أجْرك
..............................................................................................................................
تذبل إورود اليتانــــي وشوفتك ماي
أدعي الله والسمــعـــنـي يدعي ويّاي
نسمع يصيح المُــنـــادي المنتظر جاي
هالأمل من عنده تعرف شنهو رجواي
ليلك اشما يطول هم يختمه فجرك
وبمُصاب الأمير عَظّم الله أجْرك
..............................................................................................................................
خادم الإمام الحسين عليه السلام
عمار هليل الواسطي
قصيدة في ذكرى وفاة سيدتي ومولاتي أم المؤمنين خديجة الكبرى عليها السلام
لولا سيف المرتضى وأموالها
هالنــبــــوّة ما وصل مرسالها
.......................................................................................................................
والنعم من عدهه أم المؤمنين
كفّت ووفّت لجل حرمة الدين
نذرت شما تملك وعدهه يقين
هالرساله تنحيي آمالها
.......................................................................................................................
شاء رب العرش سبحانه العلي
مدد تصبــح والمكائــــد تنجلي
وبالشدايد لو حضر سيف الولي
والله من إسمه تفر إرجالها
.......................................................................................................................
كملت وهــاي الرســاله إمن القدير
وصلت وديـــــن الله أبد ماله نظير
كل مصير أعداءه حتمــــاً بالسعير
الله سبحانه يقاضي أفعالها
.......................................................................................................................
من بده عام الحزن أول مصاب
رادت الفجعه تدگ عالهــادي باب
يودع أم المؤمنيــــــن وگلبه ذاب
ينحب ويذكر جزيل أفضالها
.......................................................................................................................
حاشه أبد ما قصّرت ويّا الرسـول
نفس وگفت حيدره فحل الفحول
الليله ترحل بس توصــــي بالبتول
والنفوس الخاتمه بآجالها
.......................................................................................................................
ساعد الله الليله گلب المصطفى
لا نشف دمعـــه ولا جفنــــه غُفه
شلون عام وبيـــش بالله انوصّفه
والعزيزه قررت ترحالها
.......................................................................................................................
من بعدهه اشراح أبو القاسم يشوف
عام كله أحــزان وبأصــعــــب ظروف
هالمنايا بغير مـــوعـــد من تــطــــوف
هيه دنيا وهذا واقع حالها
.......................................................................................................................
خادم الإمام الحسين عليه السلام
عمار هليل الواسطي
قصيدة { عهد الكفالة }
لومــا هالكفـــاله ... ما توصل رساله
ظلموك بحقدهم ... أصحاب الضلاله
..............................................................................................................................
يا كافل نبي الرحمه كفو منك يغالي
يا عالي رغم عنهم مقامك يبقه عالي
دورك واضح الدينك يمن دورك رسالي
ما هِمْ لليتــهــمــونـــك ولا بيهـــم أبالي
والعبدوا صنمهم ... أشرف إنته منهم
ما هزوّا صمودك ... أصحاب الضلاله
..............................................................................................................................
بيك المجد يفخر بقيت إنـتــه ابمجاله
مؤمن نبض گلبـــك عـشــگ جَلّ جَلاله
تاريخك ذهب صافي كِـتـَب عهد الكفاله
كافل للنبي بروحك حميت إنته الرساله
هالموقف مُشرِّف ... لكلمن عقله مُنصِف
ما يتبع ضميره ... أصحاب الضلاله
..............................................................................................................................
أصعب مرحله بعمر النبي بحبك حميته
گلبك سيدي أصــبــح أمانــه وهوّه بيته
عادوك ورغــــم كل الحـقــد سورك بنيته
عمرك للنبي وديـــن النبي إنــتــــه هِديته
مؤمن تعبد الله ... مثلك ياهو صَلّه
يمحطّم نهجهم ... أصحاب الضلاله
..............................................................................................................................
معروف السبب واضح جَلي موقفهه منك
أصحاب الفتن شنت حرب ما تگظي عنك
چي حيدر علي يا ســيـــدي والـيــنه إبنك
ما تلگه المحب تلگه الخصم دوماً يطعنك
ها يابو الصميده ... غايتهم وحيده
تشويه المقامك ... أصحاب الضلاله
..............................................................................................................................
يا طود الشرف ريح الفــتــن لا ما تِـهـمّك
تاريخك ذهب رغم الحقد ظل عالي نجمك
إسمك وي علي إبْـنَ أبي طالب بقــه إسمك
والبايع ضميره بكل وكــت للتالــي خصمك
يا روح العقيده ... أخلاقك حميده
أشرف من شأنهم ... أصحاب الضلاله
..............................................................................................................................
يرسم منـهـجــك طــول الدهــر قيمة وفاءك
كافل للنــبــي وبــعــدك حفــيـدك خط ولاءك
كــفّــــــال الشــــرف راية فــخــر في كربلاءك
عباس الگمر موقـــف شـــهــم حامـــــل لواءك
بچفوفه الأمينه ... ترف راية نبينه
صگار آل أميه ... أصحاب الضلاله
..............................................................................................................................
يا عـــم النـبــي ويا كافـلــه وهيبة أمـاجــد
باچر والظفر بالمـنــتـظــر يـبـنـــي المــراقـد
يشمخ مرقدك هيبة وشـــــرف والباري شاهد
بأتباع الظــلــم يا ســـيــدي ما يــبـقـــه واحد
بالطلعه البهيه ... للموقف بقيه
يمحي كل أثرهم ... أصحاب الضلاله
..............................................................................................................................
خادم الإمام الحسين عليه السلام
عمار هليل الواسطي
أهازيج ( هوسات ) ذكرى ولادة سيدي ومولاي الإمام علي السجاد عليه السلام
تاريخ المفاخـــر ٥ من شعبان
زين العابدين ومولده العنوان
فرحة الكل محب منتشره بالأكوان
وحسين اتباهه بميلاده
........................................................................................
لا بد ما نشوف الحضره معموره
ومشايــــه العلي السجاد ونزوره
من يظهر المهدي ويبتدي دوره
غصبن عالحاقد يبنيهه
........................................................................................
بمولانه علـــي السجـــاد نتـفاخـر
جيل الجيل من الماضي والحاضر
باچر بالحــــشــر يحضرنه ويباصر
يشفع والجنة نطب ليهه
........................................................................................
خادم الإمام الحسين عليه السلام
عمار هليل الواسطي
١٤٤٦ هجري
٢٠٢٥ ميلادي
الكوت
أهازيج ( هوسات ) ذكرى ولادة سيدي ومولاي قمر العشيرة أبي الفضل العباس عليه السلام
مهم يا ناس هالتاريــخ يوم ٤ من شـعبان
إنولد للغيرة صاحبها وفارس طلع للميدان
صار وصاحت الأملاك هلا بمولد گمر عدنان
بالكافل زينب فرحانة
...........................................................................
ذيچ النــهــروان تسـولف الأخبار
ساعة ما برز عباس كلشي إحتار
مثل شمرة علي وبچفه ذو الفقار
تتراجف عدوانه إگباله
............................................................................
إضافة للشجاعة وصولة الميدان
تره العباس عالـــــم فحل بالقرآن
نافــــذ البصــيـــــرة وللعلم عنوان
تعدل كل مايل أفكاره
.................................................................................
خادم الإمام الحسين عليه السلام
عمار هليل الواسطي
١٤٤٦ هجري
٢٠٢٥ ميلادي
الكوت
أهازيج ( هوسات ) ذكرى ولادة سيدي ومولاي الإمام الحسين عليه السلام
بيوم ٣ من شعبان وصلــت هـــاي البشاره
بيت المرتضى الكرار شعّت هالمسه أنواره
أكيد النور من النــور حسين الليله خطاره
فرحانه الدنيه بميلاده
........................................................................................
وقف عمري الك مولاي كل سنـينــي گدامك
خادم والأمل يحسين تحسبني اويا خِدامك
مو بس شهـــر لو شهــريــن كل أيامي أيامك
هالنعمه شلون امجازاهه
........................................................................................
اهلالك يبن داحي الباب هل وحانت الأفراح
ومن سابع سمــه جبريل أنشد للولادة وصاح
جاب إسمك امن المعبود والليل بضواك انزاح
والفرحة بعيدك محلاهه
........................................................................................
خادم الإمام الحسين عليه السلام
عمار هليل الواسطي
١٤٤٦ هجري
٢٠٢٥ ميلادي
الكوت
هذا اليوم
أنتم على موعد مع منهاج ولادات الأقمار المحمدية الحيدرية الهاشمية .
كل عام وانتم بالف الف خير
خادم الإمام الحسين عليه السلام
عمار هليل الواسطي
قصائد ذكرى شهادة سيدي ومولاي الإمام موسى بن جعفر عليهما السلام
الك كلمة شـــرف گلنه وحچيناهه
حتى اعيوننا اعله الخد بچيناهه
………………………………………………………………………………………………………
بچيناهه عليك الليله بالحضـره
وجدّدنه العــهد يا راهـب العـتره
الك طول الدهر وسط الگلب حسره
مناحه بكل درب لجلك نصبناهه
………………………………………………………………………………………………………
نصبناهه ونخاف بيوم قصّرنه
ذكرناك ونعرفــك زيــن تذكرنه
شفيع وبالحـشــر لابد تباصرنه
هاي ارواحنه الحزنك هديناهه
………………………………………………………………………………………………………
وحق غربةْ حـيـاتــك والألـم والهَمْ
وحق جروح قيدك حيث تنزف دم
يا منــهـــج صبر والـنــاس تـتـعـلّم
عظيمه احروف صبرك بيهه نتباهه
………………………………………………………………………………………………………
قريناهه ولگينه اسنينك الصعبه
ابطاموره وحياتـك تـنـتـهي غربه
كل عاشگ بنــالك موطــن ابگلبه
قصايدنه بدمع يجري قريناهه
………………………………………………………………………………………………………
غريب وحتى نعشك وضّح امصابك
ترك حسرة وشجن بگلوب أحبابك
يــعـطّاي المــراد ومــا تـســد بــابــك
كرامات شكثر عندك لگيناهه
………………………………………………………………………………………………………
خاشع بالعباده وعالظــلـم صابر
شگد نفسك أبيّـه وگدرت اتكابر
حاضر بالگلب وبكل زمن حاضر
إلك كلمةْ شرف بالدم كتبناهه
………………………………………………………………………………………………………
إلك من كل كتر تـتـعنه زوارك
بوجودك للأبد مامونه بغدادك
ما خاب التمسّك بيك واختارك
وهواي المعاجز إحنه شفناهه
………………………………………………………………………………………………………
خادم الحسين عليه السلام
عمار هليل الواسطي
قصائد ذكرى شهادة سيدي ومولاي الإمام موسى بن جعفر عليهما السلام
قصيدة { سجدة الشكر }
تسجد شكر والسجن محرابك ... الربّ العِبادْ
باب الحوائج أصبحت بابك ... تنطي المُـرادْ
…………………………………………………………………………………………………………
ما سِجَدت الغير ربّك ... هذا سر المُعـجزات
صبرك يخلّد وجودك ... موتك إنطاك الحياةْ
أكرَمك جَــلّ جــلاله ... يـبن فخــر الكائنات
مو شرط كل عدل عايش ... ولاهو كلمن مات مات
بحبر الخلود إتوثّق اكــتابـك ... هذا المِدادْ
باب الحوائج أصبحت بابك ... تنطي المُـرادْ
…………………………………………………………………………………………………………
اشما يضم الليل شمسك ... تشرق بوجه السماء
يا غشيـم ايلاوي صبـرك ... إنـته نهـجـك كربلاء
باب سِـجنـــك ما يهـمّـك ... يلّـي نبـضـك كبرياء
إنـتــه بــاب اللّه تـفـتحه ... ساجد وتـقره الدُعاء
لا ما يخيب القـبّـل أعتابك ... ومن اللّه راد
باب الحوائج أصبحت بابك ... تنطي المُـرادْ
…………………………………………………………………………………………………………
شـايل جـروحــك بگلبك ... گلـبـك الهمّك وسيع
يا بحر واعــداك گطـره ... بـيـن أمواجـك تضيع
ما بقه السندي ابن شاهك ... لا فضل إبن الربيع
إنته بالسجــده الطويله ... تدري تعبك ما يضيع
والصبر فطره بجوهر أصلابك ... والتقوى زاد
والهالسبــبْ ربّــك جـعـل بابك ... بـاب المُـرادْ
باب الحوائج أصبحت بابك ... تنطي المُـرادْ
…………………………………………………………………………………………………………
سر خلودك صـار واضح ... للـقـريب وللـبـعيد
ابحمدك وشُكرك الربّـك ... تكسر قيود الحديد
والدليل بكل بساطه ... ويــن صـــار اللا رشيد ؟؟
إنته باقي وهُـوّه زائل ... مُخـتـصر هــذا مفيد
حتى ابْسكوتَك واضح إجوابك ... صمتك جهاد
باب الحوائج أصبحت بابك ... تنطي المُـرادْ
…………………………………………………………………………………………………………
بابك الباري جَـعَـلهه ... باب حاجه الكل سؤال
واليزورك يبــن جعفر ... يدري يا راهـــب الآل
ما يرد وچـفّـه خالي ... إمـــرادك يگـلّـه تـعـال
والكرم عندك سجيّه ... ماكو بـــي كلمةْ مُحال
للّي يـزورك حاسب إحـسابك ... بالبُشرى عاد
باب الحوائج أصبحت بابك ... تنطي المُـرادْ
…………………………………………………………………………………………………………
وحـدك بطامــوره ظَــلمـه ... والأمــل بالله ضواك
فرصه بيهه تشكر اللّه ... شـوف سبحانه اشنطاك
إنطاك گبتـيـن ومـنـاير ... وإنـتـه عـطّاي النِــخــاك
گبل ما يبدي ســؤالـــه ... إتـجـاوبـــه وتـگـلّـه هاك
تحضر جميع اليحضر إمصابك ... يوم المَعادْ
باب الحوائج أصبحت بابك ... تنطي المُـرادْ
…………………………………………………………………………………………………………
يا غريــب الكاظـمـيّه ... كل محب تستقبله
يقره عالباب بخشوعه ... هـلــه بالزاير هـلـه
بيك يا موسى بن جعفر ... يلگه حل المشكله
يشكر البــاري ونعـمـتـه ... يعني كل همّه إنجله
شُكرك الربك وضّح اسبابك ... عن دينه ذاد
باب الحوائج أصبحت بابك ... تنطي المُـرادْ
…………………………………………………………………………………………………………
خادم الإمام الحسين عليه السلام
عمار هليل الواسطي
منهاج ذكرى ولادة سيدي ومولاي أمير المؤمنين علي بن أبي طالب عليهما السلام
القصيدة الرئيسية
علي غالينـه ... علي والينه ... علي
علي هيبتنه ... علي رايتنه ... علي
يا شيعه إخذو امراد ... من ليلة الميلاد
..............................................................................
محلاهه ليلة مولده محلاهه
شيعته ومن حقنه إذا نتباهه
والتهنـئـــة الأولى النبينه طه
حي الله هالأخــبــار يا حياهه
مـــن الكعـبة ... حكمة ربه ... علي
شعشع نوره ... عالمعموره ... علي
سبحان ربنا الراد ... من ليلة الميلاد
..............................................................................
شرّف الكعبه بمولـــده لمن صار
سبحان ربنا شلون يعرف يختار
باب المديــنــــة علم طه المختار
ووكت الحرايب حيد فارس كرار
إخذ أخباره ... مـــن فقّاره ... علي
ليث الحومه... هاك اعلومه ... علي
كل مصدر الأمجاد ... من ليلة الميلاد
..............................................................................
تحتار أبيات الشِعر شتوصفه
الدنيا كفّه وعلي وحـده بكفّه
قبل الأرض هالسماوات تعرفه
يغمر الناس بكل محبته وعطفه
علي والدنه... علـي قائدنه ... علي
نعمة ورحمة ... گد الچلمة ... علي
خلي الفرح يزداد ... من ليلة الميلاد
..............................................................................
والنعم من حيدر علي وأفعاله
لولاه ديــن الله تضـــيــع آماله
هذا ابن عم النبي وخير ارجاله
صلّي يــربنــا عالحبـــيــب وآله
ليــلــة فــرحـه ... وأجـمـل فرحه ... علي
نضوي الشمـعه ... ننـــسى الدمعه ... علي
يجمعنه هالميعاد ... من ليلة الميلاد
..............................................................................
يا شيـــعــه هنياله الفُرح للوالي
و الغالي يستاهل حضور الغالي
يامن تحــب حيدر مقامك عالي
تضمــــن الجنّة من علي بالتالي
ربنا الرافع ... جعل الشافع ... علي
نضمن جــنّـه ... يشفع إلنه ... علي
كل بهجة الأعياد ... من ليلة الميلاد
..............................................................................
خادم الإمام الحسين عليه السلام
عمار هليل الواسطي
منهاج ذكرى ولادة سيدي ومولاي الإمام محمد الجواد عليه السلام
أهازيج الولادة المباركة للإمام الجواد عليه السلام
إفرح يالموالي بتاسع الأطياب
هذا ابن الرضا والتقي امن الأصلاب
كل زاير يگصده وبس يدگ الباب
كل صعبه يحلهه ويگظيهه
جواد أهل العلى والشرف والأمجاد
بحضرتـــه ومرقـــده هنيالهه بغداد
مثل جده كريم وبابه ينطي امراد
هالليله الفرحه بميلاده
خادم الإمام الحسين عليه السلام
عمار هليل الواسطي