Telegram-канал wlkayi - Asfaw abreha: Unsorted - каталог телеграмм

Asfaw abreha

17 November 2024 19:16

በዛሬው የቃብቲያ ሆስፒታል የምረቃ ስነስርዓት ላይ በአብክመ የወልቃይት ጠገዴ ሰ/ሁመራ ዞን ዋና አስተዳዳሪ የአቶ አሸተ ደምለው ንግግር ሙሉ ቃል
-------

የተከበሩ ዶክተር መንገሻ ፈንታው የአብክመ መንግስት ኮሙኒኬሽን ቢሮ ሀላፊና የክብር እንግዳ
የተከበሩ አቶ አብዱከሪም መንግስቱ---የአብክመ ጤና ቢሮ ሃላፊ
የተከበሩ አቶ ገብረእግዚብሔር ደሴ----የዞኑ ብልጽግና ፓርቲ ሃላፊ
የተከበሩ ኮሎኔል ደመቀ ዘውዱ---የወልቃይት ጠገዴ አማራ የማንነትና ወሰን ኮሚቴ ሰብሳቢ እና የዞኑ ምክትል አስተዳዳሪና ፀጥታ መምሪያ ሀላፊ
የተከበሩ ሜ/ጀነራል ሰለሞን ቦጋለ----ከፍተኛ መኮነን
የተከበሩ ብ/ጀነራል ወርቅነህ ጉዴታ---503ኛ ኮር አዛዥ
የተከበራችሁ የዞን አመራሮች በሙሉ
የተከበራችሁ የወረዳናከተማ አመራሮች ሙሉ
የተከበራችሁ የሃይማኖት አባቶች፣ሃገር ሽማግሌዎች፣ወጣቶችና ሴቶች
የተከበራችሁ የወልቃይት ጠገዴ ሰቲት ሁመራ ዞን አልሚ ባለሃብቶች
የተከበራችሁ ዲያስፖራዎች
የተከበራችሁ የቃብትያ ከተማ ነዋሪዎችና ቀበሌ አመራሮች፣ የልማት ኮሚቴዎች
ጥሪ የተደረገላችሁ እንግዶቻችን በሙሉ

ክቡራንና ክቡራት!

ከምንም በላይ የለውጡ ጊዜ ከተበሰረበት ጀምሮ ትርጉም ያለው የሕይወት መስዋዕትነት በመክፈል የኢትዮጵያን ሀገረ-መንግሥት ከመፍረስ ለታደጉና ይህንን የነጻነት አየር እንድንተነፍስ ላበቁን የህልውና ትግሉ ሰማዕታት “ስለኢትዮጵያ የከፈላችሁትን አንረሳውም” በሚል መሪ ሀሳብ፣ የአንድ ደቂቃ የህሊና ጸሎት እንድናደርግ በአክብሮት እጠይቃለሁ!

-----------------------------------//----------------------------
አመሰግናለሁ!

ከሁሉም አስቀድሜ በወልቃይት ጠገዴ ሰቲት ሁመራ ከደረሰው ዘርን መሰረት ያደረገ እልቂት በተጨማሪ በወሳኝ የማኀበራዊ መሰረተ ልማቶች ርቀውና ባይተዋር ተደርገው የነበሩት ወረዳዎች በባለቤታቸው እጅ ከገቡበት ጊዜ ጀምሮ፣ በየደረጃው ባለው አመራር አስተባባሪነት፣ በህዝቡና ዲያስፖራው ቀናኢ ተሳትፎና ደጋፊነት በርካታ መሰረተ ልማቶች ተገንብተው ለሕዝብ ምርቃት መብቃት ችለዋል፡፡
እነዚህ መሰረተ ልማቶች የይቻላል መንፈስ ያሰፈኑ፣ የአይቻልም አስተሳሰብ የሰበሩ ራስ በቅነት የታየባቸው በመሆኑ እንኳን ደስ አላችሁ! እንኳን ደስ አለን!!
በእነዚህ መሰረተ ልማቶች የሕዝባችንን የልማት ተሳትፎ ፍላጎት አይተንበታል፡፡ የአመራሩን አስቦ መምራት መዝነንበታል፤ የዲያስፖራችንን ቁጭት በተግባር አስተውለናል፡፡
ከእልህ፣ ቁጭትና ወኔ የተነሱ፡- ቅን ልቦች፣ በጎ አድራጊዎች፣ ለሥራ የሚተጉ ክንዶች፣ ዛሬ ለቆምንበት የምረቃ ዕለት አብቅተውናል፡፡
ይህ ወዳኋላ የማንመለስበት ወደፊት የምንስፈነጠርበት አርቆ የማየት፣ አልቆ የመስራት ጊዜ ነው፡፡ ጊዜው የትግልም፣ የሥራም ነው፡፡ ትግላችንም ሥራችንም የዛሬ ሳይሆን የነገውን ትውልድ መሠረት ያደረገ ነው፡
በዛሬው ቀን በአማራ ብሔራዊ ክልላዊ መንግስት የወልቃይት ጠገዴ ሰቲት ሁመራ ዞን አስተዳደርና ሕዝብ “በአንድ እጅ ነጻነት፣ በሌላው እጅ ልማትን ማረጋገጥ እንደሚቻል ትርክት ሥራን፣ ሥራ ትርክትን እንደ ሚቀይር ይህ ምድር አብነት ሆኗል” በድጋሚ እንኳን ደስ አላችሁ ደስ አለን!!

የማይዝሉ ክንዶችን የትጋት ውጤት ልንመርቅ ስንገናኝ ስለ እነዚያ ክንዶች ማንነት ውቅያኖስን በጭልፋ ቢሆንም ይህን ማስታወስ ተገቢ ነው!!

እነዚያ ብርቱ ክንዶች ሳይዝሉ ኖረዋል፣ እነዚያ ጀግኖች ከልባቸው ላይ እንደታጠቁ ዘመናትን ተሻግረዋል፣ እነዚያ ልበ ሙሉዎች የመከራውን ዳገት አልፈዋል፣ እነዚያ የበረሃ መብረቆች፣ አይደፈሬ አንበሶች ለእውነት ኖረዋል፣ በእውነት ታግለዋል፣ ስለእውነት ፀንተዋል፡፡ የጨለማውን ዘመን በፅናት እና በጀግንነት አልፈዋል፡፡ የሰቆቃውን ማዕበል በብርታት ተሻግረዋል፣ ጣልናቸው ያላቸውን ጠላት በፍትሐዊ ትግል ጥለውታል። ቀበርናቸው ያሉትን ግፈኞች ለታሪክ በሚበቃ መልኩ አስተምረዋቸዋል፡፡ እነዚያ ብርቱ ክንዶች የሚሰሩም፤ የሚታገሉም ናቸው፡፡ እነዚህ ክንዶች ለፍትሐዊ ትግሉ እንደማይዝሉ ሁሉ፤ ለፍቅርም ይዘረጋሉ፡፡

የራሳቸውን አሳልፈው አይሰጡም፤ የሌላውንም አልፈው አይጠይቁም፤ የሰው አይወስዱም፡፡ ለክብር ይሞታሉ፣ ታሪክ ለመስራት ሁሌም ዝግጁ ናቸው፡፡ ትርጉም ያለው መስዋዕትነት መክፈል የታሪካቸው አምድ ነው፡፡ ለነጻነት ሞትን የናቁ ክንዶች ዛሬም ሥራ ላይ ናቸው፡፡

በአባታቸው ባድማ በኩራትና በክብር ይኖራሉ፣ ሁሉንም የኢትዮጵያ ብሔር ብሔረሰቦች ያከብራሉ፤ በጀግንነት እና በልበ ሙሉነት ይመላለሳሉ፡፡ ከአባት ባድማ የሚገፋቸው፣ ተወልደው ካደጉበት፣ ታሪክና ሃይማኖት፣ የፀና ቃልኪዳን ከተቀበሉበት ሥፍራ የሚነካካቸው በመጣ ጊዜ ይቆጣሉ፡፡ ለፍቅር የተዘረጉ ክንዶች ለፍትሐዊ ትግል ይነሳሉ፡፡

ኢትዮጵያ ዘመናዊ ሰራዊት ባላደራጀችበት ጊዜ ዳር ደንበር ጠባቂ ነበር፤ በፋሽስት ጣሊያን ስትወረር ነፍጥ አንጋች አርበኛነቱን በአምስት አመቱ ወረራ ተጋድሎ አስመስክሯል፡፡

እኛ የወልቃይት ጠገዴ አማራዎች ለፋሽስት ጣሊያን ያልተንበረከኩት የእነ ደጃዝማች አዳነ መኮነን፣ የፊታውራሪ ኃይሉ ፋሪስ፣ የቀኛ ዝማች ዓባይ ወ/ማርያም፣ የቀኛዝማች መስፍን ረዳ፣ የቀኛዝማች ገብሩ ገ/መስቀል ልጆች ነነ፡፡

እነዚህ ለአብነት የተጠቀሱ አርበኞች ፋሽስት ጣሊያንን ከአፈር የቀላቀሉ፣ እትብታቸው እዚሁ መሬት ላይ የተቀበረ የእኛው አባቶች ናቸው፡፡ የአርበኝነት ታሪክ ሥነ-ልቦናዊ ውርስ ነውና የእነሱ ልጆች ለአማራነታችንም ሆነ ለኢትዮጵያዊ ማንነታችን፣ ለነጻነታችን፣ ለክብራችን የማንከፍለው ዋጋ የለም፡፡

በቀደሙት አርበኞቻችን ስም የትግል ቃል ኪዳኑን ያደሰው ጀግናው የወልቃይት ጠገዴ ሕዝብ አርበኝነት ውርሱ፤ በጎ ታሪክ ትርፉ ነውና በተራዘመ መስዋዕትነት ትሕነግ ለሦስት አስርት ዓመታት ከዘረጋው አፓርታይዳዊ አገዛዝ ትርጉም በሚሰጥ መስዋዕትነት ነጻ ወጥቷል፡፡ ሕዝባችን ያለፈበት የሰቆቃ ታሪክ ግን መቼውንም ቢሆን የሚረሳ አይደለም፡፡ ያለፈውን ይቅር ብንል እንኳ የሆነብንን ፈፅሞ አንዘነጋም!!

ጠላቶቻችን በሕዝባችን ላይ መከራ አብዝተው፣ ማንነቱን ወንጀል አድርገው የአባት የእናት፣ የአያት ቅድመ አያት ርሰቱን ነጥቀው፣ ከሞት የከፋ በደል ቢፈጽሙበትም ሽንፈትን የማይቀበለው ሕዝባችን በፅናት ታግሎ ፍትሐዊ ትግሉ እዚህ ታሪካዊ ምዕራፍ አድርሶታል፡፡

ጀግና በመከራ ይጠነክራል እንጂ በመከራ አንደማይዝል የጀግናው የወልቃይት ጠገዴ ሕዝብ ገድለ-ታሪክ ጉልህ ማሳያ ነው፡፡

ክቡራት እና ክቡራን…!
ዛሬ በጀት የማይበግረው፤ ለፍትሐዊ ትግል የታመነ ማኀበረሰብ መገንባት የተቻለው፤ አመራሩ እና ሕዝቡ እንደ አንድ ልብ መካሪ፤ እንደ አንድ ቃል ነጋሪ መሆን በመቻላቸው ነው፡፡ ዛሬ በዓይን ጥቅሻ መግባባት የሚችል ምሽግም ሆነ የእርሻ ካምፕ ላይ ውሎ ሲያድር ዓላማን የሚያስቀድም ለነጻነቱ ሞትን የናቀ ሁለገብ አርበኛና ሕዝባዊ ኃይል በመገንባት ላይ እንገኛለን፡፡

ኢትዮጵያዊ ማንነት ትህትናና ጀግንነት ነው እንዲሉ አባቶቻችን ትግሉ አስተዋይነትን፣ አርቆ አሳቢነትን እና ትዕግሥትን ይጠይቅ ነበር፡፡

የወልቃይት ጠገዴ ሰቲት ሁመራ ሕዝብ የገፋውን ጥሎ፣ የተጫነውን አሽቀንጥሮ ተወልዶ ባደገበት፣ ታሪክና ቃል ኪዳን በተቀበለበት ሥፍራ ልማት ላይ ነው፡፡ ከልማትም አለው ዓይነት፡፡ ለጤናማ ትውልድ ግንባታ ትልቅ መሠረት በሚጥለው የትምህርትና ጤና መስክ ላይ ትኩረት ተደርጎ እየተሰራ ነው፡፡