Telegram-канал xazon_rezgi - XazonRezgi (Official Channel): Unsorted

XazonRezgi (Official Channel)

27 Sep 2024 17:05

👆👆👆👆 аввалги қисмлар

#МУАЛЛИМНИНГ_БИР_КУНИ

     #САОДАТ

    Саодат бир неча ойлардан буён оёқ оғриғидан азоб чекарди. Кўп бора шифокорларга мурожаат қилди. Муолажалардан андак енгил тортди- ю , ахир-оқибат яна бошидан оғриқли кунларни кечира бошлар эди. Ва ниҳоят охирги қўйилган ташхис энг тўғриси бўлиб чиқди:

    - Суяклари емирилаётганмиш...

     Саодат ўзига ташхис қўйган клиника тавсияси билан кўрсатилган шифохонада ўн кундан ошиқ ётиб чиқди.

   - Опа ... - деди у менга "Энди ўзингизни анча яхши ҳис қиляпсизми ?" деган саволимга,- таблеткаларни ичгандаги ошқозонимнинг оғриғи бир нави , аммо оёғимни ўзига суякка қадаб қилинадиган уколлар жонимни жуда қийнаб юборди- да ,- Саодат дарди ҳақида ортиқча сир бой бермасликка ҳаракат қилди- ю , бироқ кўзларининг туб-тубида нималардир ғилтиллади.

    - Саодат,- дейман унга далда берган киши бўлиб ,- мана кўрасиз уч ўғлингиз уч шунқорингиз бўлади. Ҳадемай улар катта бўлишиб келин олсангиз дастурхоннинг тўрида нозланиииб , эркаланиб "Қайси бирини есам экан ?" деб таомларни танлаб ўтирасиз.

   Саодат синиққина жилмайди :

   - Вой опа ... Кўзимга ўша кунлар кўриниб кетгандек бўлди . Бирам мазза қилдим-ей ...Раҳмат сизга ...

   Дарсга қўнғироқ чалинди. Барчамиз ўрнимиздан қўзғалдик. Саодат оғир қадамлар билан дарсига кириб кетди.

     Саодатни жудаям яхши кўраман. Қандай ёрдам сўрасанг дарров бажо келтиришга ҳаракат қилади. Мен кўпинча унинг инсоннинг яримта гапидан тушуниб, кўнгилдошини тафтини олиш учун ҳаракат қилишига беш кетаман.
    Баҳорги таътил кунларининг бирида мактабга жилмайиб , юзлари яшнаб кириб келди :

   - Ҳаа асал қиз ? - дейман унга тегишиб ,- ҳойнаҳой "миннималар"ни бошлаб келдингиз-ов ?

Саодат қошларини мақтанганнамо қоқиб қўйди :

   - Опа ... Зўр иш қилдим. Бугун тандирда кўк сомса ёпдим. Ўзиям-чи , биринчи марта ёпган бўлсам ҳам мазасиям , кўриниши ҳам "вапше зўр" чиқди.

    - Иии, гап дегани исботи билан бўлмайдими ? Ҳижолат бўлмасдан икки донасини ўраб келмабсиз-да ,- дейман ёнимдаги ҳамкасбларга қараганча кўз қисиб ,- мен есам бўлдийди , булар ҳам егандек бўлишаверарди.

   Саодат эса ҳақиқатдан ҳижолат бўлди :

   - Уйдагилар зўр чиқибди деб... ҳаммасини еб қўйишди ...

   - Ҳазиллашдим,- дейман ва яна қитмирлигим тутади ,- начора ... Улар ейишса биз ҳам егандек бўлаверамиз...

    Аммо уч кун ўтмай Саодат мактаб дарвозасидан ҳурсанд бўлиб кириб келди :

   - Баҳор опааа...

    Саодатнинг қўлида силкитиб қўяётган қора салафан халтани кўриб ёнимдаги шерикларимга гап қотаман:

    - Битта гап айтайми ? Саодат тандирда иссиққина қилиб сомса ёпиб келяпти, мана мени айтди дейсизлар...- мен шундай дедим-у, Саодатга қараб баланд овозда дедим ,- сомса роса мазали чиқдими дейман- а ?

    Саодат ёнимизга ҳайратланганча етиб келди :

    - Қаердан билдингиз , сомса олиб келганимни ?

   - Биламан-да ...

   - Айтинг қаердан ? - Саодат қўлимга олиб келган халтасини тутар экан.

   - Мен сизни биламан... "Кўнгли кетувди- я шуни" деб бугун сомса тайёрлашга тушганингиздан бери мени ўйлаган Саодатсиз-да сиз...
    Сўнгра мактаб ҳовлисига гул кўчат экаётган шерикларимга эълон қиламан:

   - Қани қўлларни чаямиииз ? Аввал таом , бадаз калом ...

     Саодатнинг оёғи анча тузалиб қолганда катта ўғлининг буйраги қаттиқ оғриб қолди. У дарсини ўтади- ю , боласининг бошига югуради. Унинг тўнғичи кўпгина устозларнинг дарс ва ҳисоботлар учун видеороликлар тайёрлаш , ҳужжатларни пдф форматлаш каби ишларда оғиримизни аааанча енгил қилгани сабаб мактабимизнинг суюкли ўқувчиси эди , шу сабаб барчамиз Саодат билан бирга ўғлининг соғлиги учун дуо сўраб , ташвишини чека бошладик.

    Бир ой вақтларда унинг катта ўғли ўзини анча яхши ҳис қила бошлади, аммо иккинчиси жарроҳлик столига ётиб қолди. Ўша кунлари бошига кейинги беш ойлар давомида кетма- кет ташвиш ортидан ташвиш тушган Саодатнинг ғамгин чеҳрасига қараб ўзимга кўп ибрат олар эдим :

   - Бир оғиз чурқ этмайди- я ... Аллоҳ сабрининг ажрини ортиғи билан мукофотласин...

    Бир куни мактабга борсам Саодат хомуш бўлиб ўтирибди.

@Xazon_Rezgi      / 3