Telegram-канал xazon_rezgi - XazonRezgi (Official Channel): Unsorted

XazonRezgi (Official Channel)

22 Aug 2024 06:10

#Шунақаси ҳам бўлади...

ВОҚЕА СУРАСИ ҲАҚИДА...

   Муслима ҳикоя қилади :

   Бундан бир неча йил аввал ҳаётимизда ажойиб воқеа бўлиб ўтган эди.

    Ўша вақтлари акам тўй қилаётган, яъни эгизак қизларини турмушга бераётган кезлар эди. Аксига олиб тўй бўлишига уч кун вақт қолган бўлса- да , хўжайиним шу чоққача акамнинг тўй билан қутлаб , тўёна беролмаган эдилар. Энди рўзғор-ғорда . Шунақа кутилмаган вазиятлар бўлиб турар экан. Қарамоғимизда она- бола сигир бузоқчаси билан   ва яна битта боқувдаги новвосимиз бор эди. Очиғи тўёнага шу новвосни мўъжаллаб юрган эдик. Аммо ҳар доим ҳам банданинг айтгани бўлавермас экан. Уни келаси бозорга олиб чиқиб сотамиз деган кунимиз, новвосимиз даладаги кичкинагина ариқчада уялаб тарракдек ҳаром қотиб қолди. Буям бир сабаб экан- да. Бўлмаса шундай гунгурсдек новвоснинг ўлимига кенглиги ярим қулоч чиқмайдиган ариқ сабаб бўлармиди...

     Хуллас ...

    "Тўёнани ана топамиз , мана топамиз " деб тўйга ҳам уч кун қолди . "Ўзингда йўқ , оламда йўқ" деганлари рост экан. Кимдан қарз сўрасак , "Жоним билан берардим-у..." деб елка қисиб , ер чизади. Ўзимнинг уруғларимдан сўрашга истиҳола қиламан, улар ҳам акамнинг иккита қиз узатаётганлари сабабли биз каби борини уларга тўёна қилиб бериб бўлишган.

    Ахири хўжайинга "портладим" :

   - Мен-ку майли , эртага ўзингиз "Тўйга қуруқдан - қуруқ боролмайман" деб куйган юрагимни баттар куйдирасиз. Тили ўн беш қарич , кеккайишининг дамида ўн қозон ош пишадиган оғайниларингиздан қарз сўраб кўрсангиз хонликдан тушиб қолмасдингиз ? Ундан кўра сизга битта баҳона билан уйда ўтириб олиш осон. Менга эса тўйнинг таътимаслиги билан ишингиз йўқ. Ҳеч кимга қарз бермаган бўлсангиз ҳам майлийди . Ким сўраса - ма ! Ким сўраса - ма ! Сўрамаса ҳам - ма ! Мана шунақа бўлади , пулни бебилиска ишлатиш ...

     Хўжайин индамадилар .

     Билиб турибман улар ўша оғайниларидан аллақачон қарз сўраб бўлганларини . Аммо ... "Сўраганни бир бети қора, бўла туриб бермаганни икки бети қора" деган гап рост бўлса , билмадим уларнинг қанчаси ...

   Туриб - туриб Хўжайинга ачиндим.

"Ҳа майли ... - ўйладим ўксинганча
Беришмаса уриб - сўкиб олиб бўлмаса ..."

   Шом намози вақти кирди. Икковимиз намозни адо этгач , мен кечки овқатимдан хабар олиш учун ошхонага чиқиб кетдим.

    Хўжайин эса анча ҳаялладилар. Хавотир олиб ичкарига мўраласам улар жойнамоз устида "Воқеа" сурасини қироат билан ўқиб ўтирганларига гувоҳ бўлдим . "Воқеа" сураси ризққа йўл бошловчи , ризқ чақирувчи сура эканлигидан хабардор бўлганлигим сабаб боягина Хўжайинга таъна қилганим учун ўзимдан уялиб кетдим. Қилмишимдан қаттиқ мулзам чекдим.
   " Ё , Аллоҳ , ўзинг кечир ... Мен кимдан сўрашни унутиб қўйибман- а..."

    Оҳиста қадамлар билан бориб хўжайинимнинг дуоларига қўл очдим.

   Дуо қилиб бўлгач , иложи борича мулойим оҳангда сўз қотдим :

   - Овқатни сузаверайми ?


     Дастурхонга энди косалардаги шўрваларни қўйишим билан кўча эшик қўнғироғи жиринглади.

    Йўқлагувчидан хабар олишга кетган тўнғич ўғлим тезда ортига қайтди :

    - Ада , сизни бир нотаниш киши сўраяптилар. Уйга киринг десам унамадилар .

   Хўжайин ҳайрон бўлганча эшикка отландилар. Орадан бир чой дамлагулик фурсат ўтмасдан қўлларида полиэтилен халтага ўралган бир неча боғлам пул билан кириб келдилар :

    - Муслима , эсингдами ? - дедилар улар ҳовлиққанча ,-уч йил аввал Самарқандлик бир йигит машинамни уриб , ичидаги янги сотиб олган қимматбаҳо чинниларингни синдириб юборганди. Таваллолар қилиб "Бир хафтада пулини қилиб бераман" дея тилхат ёзиб   , шу бўйи йўқ бўлиб кетганди.
    Ўшанда бошига оғир савдолар тушиб туҳмат билан қамалиб қолган экан. Энди мушкули ариб , уч ой аввал қамоқдан қайтиб келибди. Бу ерда ўша вақтдаги машинани таъмирлаш учун кетган ҳаражат ва чинниларнинг баҳоси. Ҳозирги нархига тўғрилаб олиб келибди. Керакмас десам ҳам қўярда қўймай ташлаб кетди. Хуллас, бу қўлимиздан кетган новвоснинг учтасига тенг келадиган пул ...
Мен индамадим... Индашга мадорим қолмаган эди...
Ҳаа , дўстлар ...
АЛЛОҲ БУЮК !

Хазонрезги

Манзилимиз
👇👇👇👇
/channel/xazon_rezgi