Telegram-канал xazon_rezgi - XazonRezgi (Official Channel): Unsorted

XazonRezgi (Official Channel)

25 Nov 2024 16:51

#СЕНСАН_СЕВАРИМ

Муаллиф: Гулбаҳор Рахматуллаева (Хазонрезги)

5-қисм

    Ғулом бу икки аёлга эътибор бермаган бўларди. Сабаби бу каби аёллар уларникига тез- тез келиб турар , шаҳар биқинидаги туман марказида мартабали лавозимда ишлайдиган Азим аканинг уйидан дўст- улфатларнинг оёғи узилмасди , турган гапки қўшимча аёл ҳизматига бу хонадонда ҳамиша эҳтиёж топилар эди.
    Ғуломнинг эътиборини тортган жиҳат келган аёлларнинг бири қирқ ёшлардаги она , бири унинг ўн етти ёшлардаги қизи эканлигида ҳам эмасди. Қорамағиздан келган аёлнинг оппоқ, рангпар чеҳрали хушсурат қизи Муҳсина туғма кар-соқов экан.
     Ғулом қизни бундай жисмоний камчилиги борлигини дастлаб сезмаганди. Она- бола ишлагани келган куни тушга яқин ошхонага кирган Ғулом қиздан "Муздек шарбат олиб олай" деганда қиз йигитнинг сўзларига парво қилмай ўгирилганча музлаткични эшигини тозалайверди.

   - Нима бало кармисан ?

    Ғулом қизни атай қиляпти деб уни жаҳл билан четга сурди. Шунда қиз чўчиб кетганидан кўзлари катта-катта очилди.

    - Узр , болам. Қизим ҳақиқатдан ҳам туғма кар- соқов.

    Ғулом Муниба опанинг сўзларидан ўзига келгандек бўлди.

   - Мен... Мен билмаган эканман.

     Ғулом ўшанда нима учундир қиздан чўчиб ортига тисарилди.

     Муниба опа музлаткичдан шарбатли идишни олиб Ғуломга узатар экан оғир хўрсинди:

    - Қизимга ҳомиладор вақтимда Хўжайиним билан автоҳалокатга учрагандик. Ўшанда Муҳсинанинг отаси ҳалок бўлганди , орадан кўп ўтмай қизим бу аҳволда дунёга келди.

    Ғулом бу сафар Муҳсинага бошқача - ачиниш назари билан қаради. Муҳсина гап ўзи ҳақида кетаётганини пайқаган ва хомуш тортиб қолганди.

     Айни шу дақиқаларда Ғуломнинг юраги "жиз" этиб кетганди.

     Она-бола шу келганча уларникида уч кун қолиб кетишди. Орадан бир ой ўтиб улар Азим аканикига яна ташриф буюриб қолишди. Бу сафар Ғуломнинг онаси кутилмаганда жароҳат олиб ётиб қолганди, шу сабаб Муниба опа ва Муҳсина улар хонадонида уч ойга яқин қолиб кетишди.

      Ана шу уч ой ўз бағрида жуда кўп сирларни яширишга мажбур бўлди.

        Кунларидан бирида ўқишдан қайтган Ғулом хонадонларида Муниба опа ва Муҳсинани учратмади. "Улар қани?" деган саволига онасидан "Соғлиғим яхшиланиб қолгани учун она- боланинг жавобини бериб юбордим" деган бепарво жавобни эшитди.
      Ғулом Муҳсинага анча "ўрганиб" қолган экан. Қиздан ажралгандан сўнг севимли қўғирчоғидан ажралган гўдакдек гангиб қолган йигит дастлабки ойлар уни ўз ҳолича қидирган бўлди. Бироқ қанча уринмай қизнинг ўзи тугул , изини ҳам топа олмаган йигит кўп ўтмай ўзига яна ва яна (бу сафар аламдан) янги "саргузаштлар" излаб топди.
     Ғулом ҳаётида Шаҳнозанинг онаси- Раъногача ўнлаб аёллар билан учрашиб , баъзи ҳолларда бирга яшаб ҳам кўрди.
     Айнан кўнглидаги аёл Раъно билан бахтли яшаб юрган кезлари эса "Муҳсинанинг дараги чиқди"

   - Ғуломжон , мен Муниба опангизман. Сиз билан гаплашиб олишим керак . Илтимос йўқ деманг.

     Ғулом азбаройи Муниба опанинг "гаплашиб олишим керак" деган сўзларига қизиққанидан унинг қўнғироғига йўқ дея олмади. Айнан ана шу учрашув Ғуломнинг ҳаётини ўз измидан чиқариб юборди.

      Ғулом Муниба опанинг ҳузурига "Муҳсина йиллар давомида қанчалар ўзгарган экан?" , "Шунча йиллар давомида она- боланинг ҳаётида қандай ўзгаришлар бўлди экан?" каби турфа саволлар билан равона бўлди.

    У Муниба опани ўзи тасаввур қилгандек барваста аёл эмас, балки бир аҳволда учратди. Аёл бедаво дардга мубтало бўлган, сўнгги кунларини яшаётган экан .

     - Ғуломжон ,- деди аёл қуруқшаган лабларини базўр намлаб ,- сиз билан бу аҳволда учрашаман деб асло ўйламаган эдим. Ростини айтсам сизни ҳаётда қайта учратишни сира истамаган эдим. Бунинг биринчи сабаби раҳматли қизим Муҳсина... Ҳаа хато эшитмадингиз . Муҳсина қизим оламдан ўтган. У бу ёруғ дунёни тарк этганига бу йил ўн етти йил бўлди.

@Xazon_Rezgi           /11