خاطرتي||Hiyam 🤍🪐

06 Oct 2023 22:01

-خلينا متفقين أنو الحياة مافيها راحة
الراحة بالجنة
لازم نتأقلم مع الحقيقة السابقة و نفهم أنو الحياة فيها خسارة وفقدان و ألم

أيمت بتعرف إنّك تأقلمت مع مفهوم الحياة ؟

لما تبقى راضي بقضاء اللّه دائماً
و أنو مهما حصل تكون متيّقن بأنه حصل لخير و تردد الحمدللّه
مُدرك تماماً أنو لازم تكمل بحياتك و تسعى
و ما توقف لمُجَّرد حصل أشي حتى لو كان قاهر للنفس
تذكروا:
"إن اللّه أقرب لِمن ابتلاه ممن عافاه "

طول ما أنت عندك إيمان و ثقة باللّه رح تلاقي في أشياء حلوة بتحصل لو بقيت مليون سنة بتسعى ماكنت رح توصل ل ربعها بس لأنك أنت بتسعى للّه رح تلاقي توفيق ربنا معك..🤍🦋

هِيام_ضاهر

خاطرتي||Hiyam 🤍🪐

02 Oct 2023 07:41

-خُد الأمور ببسـاطة كرمال تعرف تعيـش ، عـدّيها و ما توّقف عَ كل خطأ ، مو لازم ڪل خطأ يكون أله عِـقـاب ، إرتاح واتنهـدّ وڪمّل الطريق ، إبتسم بوجه الڪلّ بالذات الصبـح بكير ، عَـلِّم الناس كيف ياخدوا الأمور ببساطة بدل حرقة الدم ڪل شويّ ، عـيشوا برضا و بيقين بأنو ربنا لطيف فينا..
الحياة قصيرة🤍🦋.

شويّة #خواطر قبل الدوام.

هِيام

خاطرتي||Hiyam 🤍🪐

12 Sep 2023 06:40

-صباااح الخير

جاية أحكي أنو الراحة فعلاً بتتمثل
بإنك تعيش ب حالك ، مرّڪز مع نفسك و مع الدائرة الصغيرة إلي فيها الناس إلي بتحبها ، مو فارق معك العالم كله بِخلافاته، ولا فارق معك فُلان شو عمل و شو ما عمل ، ڪل واحد حياته مليانة مشاڪل وهُموم وڪمان ذنوب، مَا حدا فينا ضامن آخرته بشكل كامل..

نحن مِحتاجين نخاف فعلاً على آخرتنا، أننا نموت بدون أنجازات تُذكَر ، أنو نموت على غير حقّ..
هاد المفروض نشغل دماغنا فيه
أمّا ما تبقى فهو ضياع طاقة و جهد ع الفاضي🤍🦋.

هِيام

خاطرتي||Hiyam 🤍🪐

08 Sep 2023 22:14

"إنّ أفضَل لون في العَالم ؛ هو اللوُن الذي يَبدو رائعاً عليك"

المقولة إلي بطبقها عكلشي بحياتي تقريباً
سواء بالقرارات أو الأشخاص أو الأشياء أو ردَّات الفعل..
طالما هالإختيار حاططني ضمن دائرة راحة البال و مخليني مبسوطة و عم يعطيني طاقة حلوة
معناها هاد أحسن أشي بالعالم بنظري..

أوقات سعيدة🤍🦋
هِيام

خاطرتي||Hiyam 🤍🪐

05 Aug 2023 22:43

-نحن محتاجين بحياتنا "طرف مضمون"

سواء كان: أخ ، صديق، قريب ، شريك...الخ

المُهم الأيام ما تغيره ، شخص يكون فاهم دوره و عارف واجباته و مكتفي بحقوقه..

حدا هيك لما نطّلع بعيونه نشوف نفسنا فيه..

شخص يكون "حنون، مُريح، سند"
يهوّن علينا أيامنا و يكون المتنفس  إلنا ضمن متاهات الحياة..

نحن مو محتاجين  ملايين و لا بتفرق معنا رفاهيات الحياة كلها..
نحن بس محتاجين نرتاح ونحس بأمان، محتاجين نلاقي إيد بتطبطب علينا لما نزعل..
إيد بتشد علينا لما نوقع..
إيد بتدعمنا لنوصل ..

محتاجين نطمئن..نطمئن وبس🤍🦋.

#مجرد_خاطرة
هِيام

خاطرتي||Hiyam 🤍🪐

29 Jul 2023 11:06

-أن يقولَ لك أحَدهم
"ذكرتُك في دعائي"
كأنّه يقول حَضنتُ قلبك المُضطرب بين ذراعيّ حتّى استكان ولآن ، ثم ألصقتُ به جناحين حتّى حَلّق عالياً نَحو السَّماء بَعيداً عن كُل ما يؤذيه هُنا او يؤرِّقُه..

أنْ يذكر بَعضكم بَعضاً عند اللّه ، أَحبَّ ما في المحبّةِ و ألطفها🤍🦋.

خاطرتي||Hiyam 🤍🪐

22 Jul 2023 13:05

- من شوي قرأت ستوري لحدا بيوصف حالته هو و مبسوط
قال جملة دافية و لطيفة جداً  لدرجة إني حبيت احتفظ فيها و أشاركها..

كان بقول:
"هجمَ السرورُ علي حتى أنّه من فرطِ ما سرّني، أبكاني"🤍🦋.

خاطرتي||Hiyam 🤍🪐

21 Jul 2023 18:10

-جملة صغيرة مني لفِئة من طلاب البكلوريا حتى لو متأخرة فيها سامحوني:

"ما حدا رَسب منكم ؛ أنتوا بس فرحتكم تأجلِّت🤍🦋."

رح ادعيلكم.

خاطرتي||Hiyam 🤍🪐

21 Jul 2023 17:30

-لو طلبت من ربنا طلب
أطلب منه يديم عليك القدرة ع الإحساس بطعم النعم الحقيقية إلي ممكن تنشاف عادية..
الدنيا بطولها و بعرضها ما بتسوى شي قدام الصحة ، و شوية أمان يسكن القلب ، و حبة راحة بال ، و أنو هالكم شخص إلي بحياتك يكونوا بخير🤍🦋.

#حلب

خاطرتي||Hiyam 🤍🪐

04 Jul 2023 19:29

مِن أرقّ ما سَمعت🤍🦋.

خاطرتي||Hiyam 🤍🪐

01 Jul 2023 19:50

-كمان 40 دعوة هالسنة🤍🦋.

خاطرتي||Hiyam 🤍🪐

28 Jun 2023 14:24

-طِبتم وطَابَت أعيادُكم برِفقةِ مَن تُحبّون كل عَام والفَرح يملأ قلوبَكم ..

#أضحى_مبارك🤍🦋

خاطرتي||Hiyam 🤍🪐

17 Jun 2023 07:08

-مو من طبع الحياة أنو تعطي تمام الحظوظ، مافي كمَال وسعادة مطلقة و مافي نقص وتعاسة مطلقة، في كتيييير نِعم انكتبت إلنا وبالمقابل في حرمان انفرض علينا بفترة ما..

وهون بتبلش الحياة أو بتنتهي ، يا منعظم النِعم و بنعيش برضا و راحة بال ، أو منبقى نتحسَّر عَ الأشياء إلي انحرمنا منها
وبهاد الخيَار رح تمر الحياة بس من غير مانعيشها..

انتقوا أفكاركم بالأيام الصعبة أكتر من أيام اليسيرة لأنو حياتكم رح تفرق🤍🦋.

خاطرتي||Hiyam 🤍🪐

09 Jun 2023 10:37

-مو دائماً لازم نهتمّ بحالنا حتى نكون قادرين نهتمّ بغيرنا..

أحياناً لازم نهتمّ بغيرنا حتى نقدر نهتمّ بحالنا، أو على الأقل حتى نتأكّد من قدرتنا على رعاية ذواتنا🤍🦋.

#جمعة_مُباركة

خاطرتي||Hiyam 🤍🪐

02 Jun 2023 01:20

-‏رغم لخبطة الوضع، وعدم إتزان كتير من الأمور ، بس كل واحد منا أمله كبير ب ربنا أنو بكرا رح يكون أفضل..

طبعاً مو بالمقاييس المنطقية، ولا بحسابات العقل، لَكن برحمته و بأنّه عالم بالنيّة وشايف المجهود..

حُسن الظن بكرم ربنا بغض النظر عن الظروف المحيطة هو إلي بخلّي القلوب أقوى، متحملة، ومكملة🤍🦋.

#جمعة_مُبارك
و تلاقوا الخير
#هِيام🤍🦋

خاطرتي||Hiyam 🤍🪐

06 Oct 2023 21:43

-بلادٌ مُوحشة، أينما أدرت وجهَك تجد إنساناً حزيناً..

حمص ، 6 أكتوبر / 2023💔💔.

خاطرتي||Hiyam 🤍🪐

20 Sep 2023 14:09

من أسوء العلاقات الي ممكن حد يمر فيها
إنّو تجمعك الأيام بشخصية من نوعية ال بني آدم الي ما إلو عزيز ولا غالي..

الشخص الي سيدنا محمد عليه الصلاة و السلام و صفه:
" إذا خاصم فجر"
الشخص الي بينسى الكلمة الحلوة و الأيام و الضحكة الي عشتوها سوا

الشخص الي بينسى الخبز و الملح
الشخص الي بينسى جميلك حتى لو هالجميل كان شي بسيط كتير..
النوعية الي بخلوك تندم على كل مرة خليتهم يعرفوك أكتر من اللازم..

فاللّهم لا تجعلنا نبذلُ ودًّا عزيزاً إلّا لمن هُمْ أهلُه🤍🦋.

هِيام

خاطرتي||Hiyam 🤍🪐

10 Sep 2023 17:44

-الواحد مابيعرف قيمة تربية عيلته غير لما كـبر وشاف التصرفات الغريبة اللي بتطلع مـن الناس..

ربنا يكرم أهلنا ويجزيهم عنّا كل خـير🤍🦋.

خاطرتي||Hiyam 🤍🪐

25 Aug 2023 21:40

-يعطيكِ العافية ، لو سمحتِ بتعرفي المكان الفلاني كيف بوصل عليه؟!

= إي بعرفه.. امشي على طول بعدين دخلي عَ اليمين رح تلاقيه قدامك إن شاء اللّه.

-مشكورة جداً.

الموقف هاد كتير منمر فيه بحياتنا صح؟
إنّك تنسأل عن مكان محل ، شارع ، بيت ، طريق مُعيّن ..

طيب بتعرفوا أنو هالموقف الصغير جداً جداً بينكتبلك فيه "عتق رقبة"!!

سيدنا مُحمد عليه الصلاة و السلام قال :
"من منحَ منيحةَ لبنٍ أو ورقٍ أو هدى زقاقًا كانَ لَهُ مثلُ عتقِ رقبةٍ"

هدى زقاقاً: يعني أرشد ضالاً إلى طريق🤍🦋.

#خاطرة عامة للكل بس رسالة مُبطنّة #للشوام خاصةً

هِيام

خاطرتي||Hiyam 🤍🪐

03 Aug 2023 23:32

- بـ حياة كل حدا فينا فترات بتجي مليانة خيبات و ألم و تعاسة لسبب غامض..
سلسلة من الأحداث السيئة و سوء الحظ والقلق مع كمية اكتئاب رهيبة..

كنت حابة اكتب:
قاوم..
لا تستسلم..
و كلام من التنمية البشرية و غيرها..

بس الحقيقة غالباً تُختصر بِـ :

{لَيْسَ لَهَا مِنْ دُونِ اللَّهِ كَاشِفَةٌ}

أحياناً الحل الوحيد بكون انتظار الفرج من مالك السماوات و الأرض بدون أي مجهود منك و انتهت🤍🦋.

هِيام

خاطرتي||Hiyam 🤍🪐

28 Jul 2023 16:10

لما بتدعي لحدا ب
"اللَّه يكرمك"
هي دعوة مهمة وغالية

سيّدنا محمد ﷺ  قال:
"من كان له شَعر فليُكرمه"

و إكرام الشعر يعني إنّك تطيبه و تسرحه و تساويه بشكل مناسب و لطيف ..

و هون لازم نوقف و نجي لمعنى
"اللَّه يكرمك"
يعني ربنا يطيّب حالك، و نظام حياتك وأسلوب معيشتك..
و يجعلك مستقر نفسيًا وجسديًا وماديًا..

دعوة مختصر بس بمعنى كبيرة🤍🦋.

خاطرتي||Hiyam 🤍🪐

22 Jul 2023 13:02

-ألَّا يضيع منّي كلُّ شيءٍ أحببته
ولا تُعاقبني بمَن أُحِب..

أن تجعل الخيرَ فيما يرتاح قلبي له و تُقرّ عيني بِه ، وترضى عني و تُرضيني
ياربّ🤍🦋.

خاطرتي||Hiyam 🤍🪐

21 Jul 2023 17:43

-إحدى الآيات التي أهرب إليها من ضيق الدُنيا🤍🦋.

خاطرتي||Hiyam 🤍🪐

08 Jul 2023 14:06

-أتمنى أن تكون كُل الطرقات التي أسلكها آمنة وصالحة ليّ، وأن يرضى اللّه عني دائمًا🤍🦋.

#حلب

خاطرتي||Hiyam 🤍🪐

04 Jul 2023 18:41

-الدنيا مو مستاهلة أي حرب نفسيّة ، سواءً جوّاك أو مع حد تاني ، كلشي بلحظة ممكن ينقلب ، صحتك تروح ، تخسر شغلك ، تفقد حدا غالي ، ما في أي شي مضمون لدقيقة بالمستقبل ، بثواني الأحوال بتتبدل ، لهيك الدنيا مو مستاهلة صراعات ..

اللحظات الي بتمر عليك وأنت سليم ومعافى وحبايبك حواليك هي أكبر نعمة..

ربنا يجعلنا خفاف عَ بعض ، ويريّح بالنا ، لأنو راحة البال ما بتنشرى بفلوس الدنيا🤍🦋

#هيام

خاطرتي||Hiyam 🤍🪐

01 Jul 2023 19:09

-عن حلاوة آخر ٣ آيات من سورة العلق ياجماعة🤍🦋

{فَليَدعُ نَادِيَهُ  سَنَدعُ ٱلزَّبَانِيَةَ  كلَّا لَا تُطِعهُ وَٱسۡجُد وَٱقتَرِب۩}

كتير ما بيعرف معنى هالآيات و شو قصتها..
لهيك بما أنو هلق وقت مستقطع من دراستي ف أقرؤوا و ادعولي🤍

-كان سيدنا محمد عليه الصلاة و السلام حابب يصلي عند الكعبة
فأبو جهل حكاله
يا محمد إذا سجدت عند الكعبة فسوف أدوس على رأسك
فسيدنا محمد ماسمع لكلامه
و راح يصلي

فحكاله كمان مرّة:
يا محمد إذا سجدت عند الكعبة ف سأدعو جميع أهل قريش ليروا كيف سأدوس على رأسك.
ف النبي ماسمع لكلامه و بدأ يصلي
فأبو جهل دعا أهل قريش
فلمّا سجد النبي
أبو جهل قرَّب منه و وقف ساكن بمكانه بعدها بدأ يرجع للوراء
ف أهل قريش حكوله:
ها هو محمد لم تدُس على رأسه و رجِعت
فحكالهم:
لو رأيتم ما رأيت لبكيتم دماً
قالوا:
و مارأيت يا أبوجهل؟
قال:
إنّ بيني وبينه خندقاً من نار و هولاً و أجنحة
{سندعُ الزبانية}
الزبانية:ملائكة العذاب

فالنبي قال:
لو فعل لأخذته الملائكة عيّاناً

ف بعيداً عن الإعجاز بالآيات السابقة؛
الي نحن لازم نتعلمه منها أنو طول ما ربنا معك خليّك قوي و ما تخاف أبداً ؛
من ربنا المدد الأقوى و الأكبر و الأعظم🤍🦋.

#هيام

خاطرتي||Hiyam 🤍🪐

24 Jun 2023 12:53

- في وقت ما كنت بقرأ سورة المؤمنون🤍

ف ستوقفتني الآية إلي ربنا قال فيها:
{إِنِّي جَزيتُهُم اليَوُمَ بِما صبَروا أَنَّهُم هُمُ الفَائِزُون}

بلّشِت أسأل نفسي ليش ربنا اختص الصابرين بالفوز ؟؟
ليش ما اختص كتير أعمال بدال الصبر؟؟
ليش ما اختص المُتصَدقيّن المُصليّن الصائميّن بهي الآية؟؟
لحتى استوعبت الحكمة منها..

ربنا عالم أنو الصبر بكل أنواعه عبادة شاقة أبداً مو سهل عَ قلب أي إنسان فينا، مو سهل الصبر بعد الفقد، ولا الصبر بعد الهزيمة، ولا الصبر بعد الخسارة، و أنو بالصبر قلوبنا بتنزف وجع لكن بنخفي و بنتحمل طمعًا بكرمه..

فكرمال كل هاد ما قال إني جَزيتهم بما صلّوا، ولا بما صاموا، ولا بما تصَدَّقوا !
الآية كانت ل يطمن القلوب الصابرة ويبشرنا بعوضه ، العوض مُعجزة🤍🦋.

#هيام

خاطرتي||Hiyam 🤍🪐

16 Jun 2023 07:08

-صباح الخير🦋
ما توقعت كمية اللطف بالرسائل إلي وصلت ع بوت القناة
كنت متوقعة أنو القناة بتأثر إيجاباً بطريقة ما ع الاشخاص إلي متابعين المنشورات ..بسس ما كنت متوقعة هالقد تأثر بنسبة كبيرة..

و بحكم فقط اكتفيت بالقرآة لازم احكيلكم هنا :شكراً للرقي و الأخلاق و ابداء الرأي بطريقة حسنة
كتير كان في رسائل مُشجعة بتخليني أترك القناة مكرمةً لهدول الناس.. حتى لو ما نشرت فيها

لهيك ..
القناة #باقية
بس النشر رح يكون كتير ضئيل حتى لو بقي فيها بس 100 عضو

أدعولي بالتوفيق و بالفتح بأمتحاناتي لعله بالعطلة بكون Creative أكتر🤍🦋.

خاطرتي||Hiyam 🤍🪐

07 Jun 2023 16:22

كتير أحيان بنسأل نفس السؤال!

هِيام "برأيك" شو الأفعال و المشاعر إلي لازم تكون متوفرة بالناس إلي إلهم ودّ و مكانة بقلوبنا؟!

جوابي الثابت:
أنو ما تهونوا + ما تهونوا + كمان مرّة ماتهونوا لا أنتوا و لا خاطركم ..

أنو يكون
في أمان مهما غلطتوا..
أنكم تكونوا مفهومين بدون شرح..
غير قابلين للاستبدال أو الاستغناء ..
أنو يكون الصدق سيّد الموقف دائماً ..

هو في أحلا من هيك؟!

ما أعتقد أنو في أجمل من إنّك تكون واثق بأنو خاطرك رح ينشرى عَ طول..
و أنو دموعك عزيزة و رح تنمسح مهما كان الظرف..
و أنو إيدك ما رح تنترك مهما حصل..
و أنو ثقتك فيهم مُقدسة و مستحيل تنخذل منهم و مكانتك محفوظة ما حدا بمسها و لا بطولها..

مافيي شي بالدنيا أحلى من احساس أنو أنت أنسان "غالي" بمعناها الكامل
عند الناس إلي أنت بتكنّلهم أي مشاعر لطيفة بقلبك🤍🦋.

خاطرتي||Hiyam 🤍🪐

26 May 2023 12:01

-رضيَ اللّه عن والدي ووالدتي بقدرِ رمالِ الأرض، بقدر كلّ ثقلٍ سانداني على حملهِ، رضيَ اللّه عنهما وأرضاهما وجزاهُما كلّ خيرٍ عني و عن أخوتي🤍🦋.