خاطرتي||Hiyam 🤍🪐

09 Feb 2024 18:00

-قاسية فكرة إنك مُجبر دائماً تكمل حتى مع إنعدام شغفك ورغبتك ..
محتاج مجهود كبير مشان تظهر إنك طبيعي رغم كل انهياراتك الداخلية..
الواحد منا بمرق بوقت ما عاد بدو يتحرّك ، بس يقعد يتأمل بالسقف لساعات و ما يكون عنده أي رغبة أو هدف أو خطط لمواجهة اليوم ..

هالحالة مُتعبة جداً

خاطرتي||Hiyam 🤍🪐

06 Feb 2024 02:20

-على أملِ أن نحيا بقيَّة العُمرِ وما سعينا له بين أيدينا 🤍🦋.

خاطرتي||Hiyam 🤍🪐

30 Jan 2024 10:02

-رَحِم اللّه كُل هينٍ ليّنٍ في حياتي..
لا يُكلفني مشَّقة السؤال و لا كثرة اللّوم والعِتاب ، ولا يدفعني للتبرير الدائم..

يغض الطرف عن ذلاتي يقينًا منه
أنِّي لا أعني أبداً ما يؤذيه بقولي أو بفعلي ..

طيَّب اللّه كلّ نفسٍ لا تحمل لي إلّا المحبّة والود ،فلا تُراقبني لُأِخطئ ، ولا تنتظرني لأسقُط ، ولا تُصعب عليَّ أيامي ..

رضيَّ اللّه عن كلّ شخص لم نرى منهُ إلَّا خيراً ،ولا يرجو لنا إلَّا خيراً..🤍🦋

خاطرتي||Hiyam 🤍🪐

26 Jan 2024 22:55

-إنّ المرءَ إذا حزن استدعى كلَّ أحزانه السابقة كأنّ حُزنًا واحدًا لا يكفيه!

-الرافعي.

خاطرتي||Hiyam 🤍🪐

26 Jan 2024 11:08

-ولا ألذُّ ولا أطيبُ من العافيةِ في الدِّينِ والدنيا🤍🦋.

#الأذان_بصوت_أخي🤍

خاطرتي||Hiyam 🤍🪐

24 Jan 2024 17:36

‏-إن كان في صُدَفِ الأزمانِ رائعةٌ
فإنّهم خيرُ ما جادت به الصُّدَفُ🤍🦋.

خاطرتي||Hiyam 🤍🪐

15 Jan 2024 08:14

-عندي بعض القناعات الي طول حياتي بناقشها بدماغي و مقتنعة فيها و مع مرور الزمن الناس عم تأكدلي ياها

مو دائماً الغني كريم
و مو دائماً إلي بينقال عليه ابن ناس ذو أخلاق و معشر
مو دائماً إلي بصلي بكون خايف ربنا بكل جوانب حياته
و مو دائماً الي بيمدحك بوجودك  معناها رح يبقى هيك بغيابك..

ببساطة ممكن يكون كلشي مظاهر مو أكتر ..
لجذب الانتباه أو المجتمع أو المحيط

فالحَكم الوحيد بهي النقاط و بنقاط تانية  و لحتى فعلاً تحصل ع جواب السؤال:
"هل الصورة النموذجية الي راسمها هالشخص أمامنا هي نفسها الصورة الداخلية و الحقيقية أله؟!"

هو:
إنّك تتعامل مع الشخص عن قُرب و تنحط معه بمواقف صعبة..بعدها أنت رح تعرف حقيقته الكاملة🤍🦋.

هيام الضاهر

خاطرتي||Hiyam 🤍🪐

13 Jan 2024 12:13

-لا تَعارُض بين أن تكونَ الفتاة:

مُثقّفة مُفكِّرة و طبّاخة ماهرة و أنيقة مُرتّبة و داعية إلى اللّه..

و بينَ أن تكون زوجةً صالحة مُصلحة..

وبين أن تكون مُربّية أجيال..

فكلّ تلكَ رسائلها🤍🦋.

هِيام

خاطرتي||Hiyam 🤍🪐

12 Jan 2024 14:41

جمعة مُباركة

-كل حدا فينا عنده عقَبة بحياته واقفة هيك متل الصخرة قدامه ، ف الواحد منّا ما عاد بيعرف هل يكَمّل الطريق ولا ينتظر ويشوف شو رح يصير! 

فَ لو أنت شايف الشخص إلي قدامك هيك، مو قادر ياخد قرارات و لا عرفان يتخطى عقبته..
ما تروح أنت لصف المُجتمع و تصير ضده ..
خليّك معااه حتى لو غلِط!

ليش ؟!
لأنو هو بينتظر بهاد الوقت يسمَع كلمة حلوة و عقلانية تشجعه لحتى ياخد أي قرار جيّد يقدر يبدأ فيه حياتُه من جديد..

"خليّك لطيف كلنا بنعاني"🤍🦋.

هيام الضاهر

خاطرتي||Hiyam 🤍🪐

05 Jan 2024 11:35

-صحيت الصبح و الجو بااارد و مريضة و مزكمة و حالتي حالة..
ما تركت كلمة ع دوام الجامعة بس كانت نزلتي ضرورية، رغماً عن أنفي كما يُقال لأنو عندي امتحان ..
لأول مرة ما بقدر عدل مزاجي قبل ما اطلع و لا حكيت مع حدا من أهلي و لا ناقشت و طول طريقي معصبة..

لحد ما صدفت العم و الخالة هدول
الخالة كانت ع وشك تطلع ع الدرجات بس ما كانت قدرانة تتوازن
اجاها العم و مسكها و حكالها :

"مين قلك تطلعي قبلي؟ نحن متفقين  نطلع سوا دائماً من 30 سنة"

ما حكت شي و كانت ساكتة
و بان كأنها مدايقة منه بجانب ما..

طلعوا الدرج و أنا وراهم
الخالة حاولت تمشي شوي أسرع
فالعم رجع مسكها و حكالها:

"هي مسكتك كمان مرّة كرمال ما ضيعي"

دغري اطّلعت عليه و ابتسمت و كأنو تذكروا شي ذكرى بينهم و صاروا يضحكوا ..

من بعدا أنا كملت طريقي و تلقائياً لاحظت البسمة ارتسمت ع وجهي و أجتني فرحة داخلية مع أنو أنا ماادخلني..
حسيت الي قدامي كانوا طفلين بأجساد كهلة و البركة و الحنية مبينة عليهم و دعيتلهم بقلبي بمديد العمر و بكتيير من السعادة..🤍🦋🦋

هيام الضاهر

خاطرتي||Hiyam 🤍🪐

02 Jan 2024 10:09

-أتربيت ع يَد والد علّمني صون العِشرة دائماً فكبرت و أنا بقدّر الناس الي وقفت جنبي دائماً و بحط مواقفهم الطيبة بقلبي، ما بتذكر مرة اتأخرت عن حدا أو بخلت عَ حدا بمعلومة ، اتربيت على العطاء و عُمري ما تركت حدا ضمن ضيقة من غير ما أمدله إيدي ، بفرح لفرح أي حدا وبزعل لزعله..

ف كرمال هيك بعزّ عليّ أنو حدا يزعلني أو يأذيني بأي شكل، و بكون ثقيل على روحي يصير هيك معي أنا بالذات لأنو ما قصرّت مع حدا🤍🦋.

هيام الضاهر✍

خاطرتي||Hiyam 🤍🪐

19 Nov 2023 21:44

-خاطرة تذكرتا بهالوقت

سيدنا محمد عليه الصلاة و السلام
لما انقطع عنّه الوحي لفترة كان بضيق و خايف يكون ربنا استغنى عنّه لدرجة أنو في شخص من المستهزئين و المشركين حكاله :
"قلاك ربك"
يعني ربك تركك أو تخلى عنّك ..

فربنا من بعدها نزَّل سورة الضحى و هي من أحبّ السور القصيرة لقلبي..
حكاله ببدايتها:
بسم اللّه الرّحمن الرحيم
{وَٱلضُّحَىٰ (١) وَٱللّيۡلِ إِذَا سَجَىٰ (٢) مَا وَدَّعَكَ رَبُّكَ وَمَا قَلَىٰ (٣)}

يعني ربك ما ودّعك و لا تركك فاطمئّن..

بعدين ربنا كمّل :
{وَلَلۡآخِرَةُ خَيۡرٌ لَّكَ مِنَ ٱلۡأُولَىٰ (٤)}
يعني لو إنت بضيقة حالياً بدنياك ف هاد الحال مو دايم و الشقاء رح يتبدل لنعيم و لخير بالآخرة..

بالمختصر:
ربنا رح يجبر بخاطرك و ما رح يتركك ، ربنا ما بيترك حدا مهما مَرقت بصعوبات ، ربنا كبير و لطيف و دااااائماً في عوض سواء حالياً أو مُؤجّل🤍🦋.

هِيام

خاطرتي||Hiyam 🤍🪐

05 Nov 2023 16:15

-بَعد نهاية أي فترة صعبة بتكتشف أنو فعلاً ما حدا كان عارف الخير وين و مع مين و أيمت و ليش و كيف🤍🦋.

خاطرتي||Hiyam 🤍🪐

29 Oct 2023 11:10

-يومًا ما سيحل الصباح بي
وأنا على الحال الذي طالما تمنيته
في فترةٍ ما ..
لن تشرق الشمس إلّا ويسبقها شروق قلبي🤍🦋.

خاطرتي||Hiyam 🤍🪐

11 Oct 2023 21:45

-اللّهم إنّا نستودعك أحبابنا وأنفسنا وأموالنا ، اللّهم احفظ غزة بعينك التي لا تنام ،اللّهم برداً وسلاماً على غزة💔💔🇵🇸.

خاطرتي||Hiyam 🤍🪐

06 Feb 2024 19:02

-لم أمتلك من بنات جيلي شيئاً:

لم استطع أن أقول مرّة  "بيبي"  أو "أم فلان" كإشارةٍ لأطفالي مستقبلاً..

ليس لي مُغنٍ أو ممثل مفضّل..

جملة "مين كرّاشك" تصيبني بالغثيان..

أكاد اتقيّأ من الرجال الذين يظهرون بمظهر أنثوي أو المتاحين لـ أكثر من فتاة والعكس صحيح ..

لم أستطع أن الوي لساني و أكتب "ئلتلك" بدلاً من "قلتلك" عند محادثتي مع أحد..

لم آتي يوماً متباهيةً بعدد الكتب و الروايات التي قرأتها و لم أحسب عدد الأشياء التي كتبتها..

لا تهمني موجات "الترندات" و لا أبالي بما هو رائجٌ الآن مالم يكن فعلاً يستحّق..

كنتُ و لازلت ريفيّة بسيطة متمسّكةً بفطرتي وما خُلقت عليه..
يسرقني المطر و يهزمني الشتاء و تسعدني رائحة الخبز صباحاً..
أُحبُّ عائلتي ولهجتي..

أنا ابنةُ البيوتِ القديمة و الأراضي الزراعية و الجبال الشاهقات..

تسرّني (يرضا عنك)
و أكاد أطير فرحاً ب( ربنا يبارك بوالديكِ)

هكذا أنا .. لم و لن اتغيّر 🤍🦋.

هيام الضاهر

خاطرتي||Hiyam 🤍🪐

31 Jan 2024 21:17

-بغض النظر عن كمية الضغط الي بتتولد بفترة الامتحانات..

فكرة أنو نتيجتك محكومة باليوم الي رح تقدم فيه المادة و تطلع درجات  تحدد معدلك و تقييم للي عملته طول الفصل شي ظالم ..

الأيام الي بتصحى فيها لوحدك بالليل أو  الفجر كرمال تدرس بعز البرد أو الشوب..
السهر و التعب و انك تخلص كتابة أبحاث و تلّحق تسلمها..
عدا الحزن و الوحدة و القلق و عدم انتظامك بالأكل و تكون بعيد عن أهلك
كل هاد كرمال تتعلم و تطلع إنسان ناجح..

ف بالأخير تنحصر كل هالمحاولات و يتوقف تقييمك برقم خلال يوم!
ممكن يكون منيح و يمكن لا!

مهما صار و مهما كتبت و مهما كانت النتيجة..
افتخر بنفسك و بمجهودك طالما أنت متيّقن أنك عملت الي عليك ، لأنك بتعرف شو بذلت و شو قدمت ..

خلينا متذكرين أنو
"السعي بصدق علينا و النتائج أبداً مو علينا"🤍🦋.

هيام الضاهر

خاطرتي||Hiyam 🤍🪐

27 Jan 2024 22:49

-من أعلى درجات الجهاد : جهاد الحزن..

جهادك في التَّقبُل ، جهادك في الحمد وأنت ضمن شِدة و أنت ما حدا حاسس بكسرة قلبك ولا كيف الأيام بتمرّ عليك..

إنك تسلّم أمرك للّه حتى لو مانك فهمان الحكمة ولا مستوعب الأحداث، إنك تلجأ وأنت متيقن أن لا ملجأ من اللّه إلّا إليه، إنك تستسلم وترضا حتى و إن خالفت النتيجة آمالك..

الابتلاءات بالحياة مو اختبار لقدرتك الذاتية بس، بنفس الوقت هي اختبار لقوة استعانتك باللّه..

فاللّهم قوّة🤍🦋.

هيام

خاطرتي||Hiyam 🤍🪐

26 Jan 2024 11:54

-أحسن فعل ممكن تعمله لنفسك:

إنك تكون خفيف بالنسبة للناس إلي بتعرفها..
خفيف الروح بمجلسك، خفيف الأسئلة بلقاءك، خفيف اللسان لما تناقشهم، حضورك خفيف، حُكمك خفيف، تدخلاتك خفيفة..

وقتها الأمر الوحيد إلي ما رح يبقى خفيف هو رحيلك عنهم و غلاوتك بقلوبهم..

خليك خفيف بترتاح و بتريّح🤍🦋.

هيام الضاهر

خاطرتي||Hiyam 🤍🪐

24 Jan 2024 20:16

-‏صِدقاً و لا مرّة ملينا من الصبر...

صح أحياناً منزعل عَ ظروفنا أو على أمور تمنيناها و ما وصلنالها أو على أشياء بنفسنا بس ربنا ما راد ناخدها..

أي، منزعل أحياناً عَ حياة ماكانت اختيارنا و أوضاع انفرضت علينا..

بس بالنهاية واللّه ما يأسنا ولا شعور الهزيمة اتمكن مننا و مؤمنين وكلنا يقين أنو ربنا رح يعوضنا و مخبيلنا من الخير كتير🤍🦋.

هيام الضاهر

خاطرتي||Hiyam 🤍🪐

20 Jan 2024 00:25

ادعولنا ياجماعة .. بلش مونديال الامتحانات🦋

خاطرتي||Hiyam 🤍🪐

13 Jan 2024 22:22

-ما بتعرف ولاد الأصول إلّا بأوقات الزعل..

المفاهيم متل :
حفظ الود، كتم السر، معرفة الحدود بين العتاب والإهانة والتجريح ..
كلها أشياء ما بتبان غير بوقت الغضب و الزعل..

بنت/أبن الأصول حتى بزعله دائمًا في حدود، لا بيكسر ولا بذّل ولا بعاير، ما بيعطي لنفسه الحق لو مقدار ذرّة يوجعك..

ليش؟!
لأنو بيعرف من أكثر الأشياء الي بتوجع الإنسان السوي هي الجحود وقت الزعل..


ف يارب ترزقنا بالناس السند حتى بأوقات خصامنا، حتى لو شايلين شويّة زعل اتجاهنا ، نتعاتب و نتصافى و نحن مع بعض، بضهر بعض، حافظين للمحبة مكان🤍🦋.

هيام الضاهر

خاطرتي||Hiyam 🤍🪐

13 Jan 2024 00:34

-و قُرَّ عَيني واهدِنِي واجبُرنِي فِي مَطلبِي 🤍🦋.

خاطرتي||Hiyam 🤍🪐

05 Jan 2024 11:45

-بنفس اليوم
طلعت ماني كاتبة منيح بإمتحان العملي مع أنو كنت محضرة تمام
لأول مرة بحس بضيقة كبيرة و حسيت في شي غلط عم بصير معي ..

طلعت بالمكرو و كان صاحب المكرو مشغل أغاني و معلي الصوت للأخير ..
راسي كان متصدع خلقة و قررت أنزل قبل ما يمشي
بوقتا هاد العم طلع و يا دوب كان قادر يقعد
فما عاد قدرت انزل ..
أخدت حسبي ربي و بقيت مكاني
مشي السرفيس ..
بعد شوي بسمع صوت العم رغم كل الهبد المسموع عم يدعي ب:
"يارب تهدي و تصلح شبابنا و شباب المسلمين"

و اتبعها بدعوة مخاطبة للكل :
"اللّه يزيّن الإيمان بقلوبكم يا عمو و يقضي حوائجكم و يبارك بعمركم و يصلح دواخلكم و يجازيكم خير عن كل جهد و تعب"

و قعد يكرر عبارة ع مسمع الكل :
"ربنا ما بضيع عنده شي،أي واللّه ما بضيّع"

تلقائياً صاحب المكرو خجل من حاله و أغلق الصوت كامل.. وجوه الأشخاص الي كانت موجودة ارتسمت عليها الطمأنينة من الدعوات إلي انسمعت بدون أي طلب و منن أنا، راحت الضيقة و هديت..
ذكرني بفكرة:
"كلشي بصير لسبب و طالما صاحب الأسباب موجود فدائماً في عوض و خير"🤍🦋.

هيام الضاهر

خاطرتي||Hiyam 🤍🪐

02 Jan 2024 23:47

- عارفة إنها مو سهلة..
و يمكن الأشياء الي بدي ياها لسا ما صار وقتها و غالباً أتفاجئ بكتير أشياء من الواقع الي انا مو عاملة حسابه..

بعرف أنو ممكن أحزن و أتعب، بس عارفة كمان ربنا كريم ، عارفة رح يجبر خاطري بكل شي دايقني بيوم من الأيام و بلحظة من اللحظات، عارفة أنه عالم ب الي جواتي، عارفة أنه لطيف و عادل و حقي ما رح يروح أبداً..

عارفة لازم ركز بالعلامات الي بيرسلي اياها بطريقي، و أنو الأشياء الي بتصير و انا مو حابة أنها تصير بكون في حكمة من وراها و اكيد خير حتى لو لسا الخير ما ظهر..

كلشي من اللّه خير بدون ما فكر بالموضوع ، كلشي..

المُريح بالدنيا أنك بتعرف نيتي بكل أمور حياتي و ناظر لداخلي و ما يحواه
و عالم بكلشي أقوال و أفعال بعملها..

فإن أخطأت لا تتركني و إن أحسنت ف ثبتني و إن كُسِرت ف اجبرني و أخيراً أجمع قلبي بسؤله بلطفٍ منك🤍🦋.

هِيام الضاهر✍

خاطرتي||Hiyam 🤍🪐

26 Nov 2023 17:57

-خلي عندك قواعد ثابتة ب الحياة:

كل وعود ربنا حقّ مهما الحياة كانت ضدك و مهما الظروف عاكستك و مهما الأبواب تسكرت بوجهك..
دائماً التأخير خير طالما بتسعى وبتحاول و مانك واقف..

{وَعۡدَ ٱللَّهِ حَقࣰّاۚ وَمَنۡ أَصۡدَقُ مِنَ ٱللَّهِ قِیلࣰا}

ما تخاف كلشي عم يترّتَب للأفضل كرمالك بس الوضع محتاج منك تسعى بما يرضي اللّه🤍🦋.

هِيام

خاطرتي||Hiyam 🤍🪐

12 Nov 2023 15:45

-طول ما أنت مقتنع أنو مارح تنحل فهي مارح تنحل..
" البلاء مُعلّقٌ بالنطق به "
وربنا بقول :{فَمَا ظَنُّكُم بِرَبِّ العَالَمِينَ}
والإمام علي بقول " كُل مُتوَقَّع آتٍ "

خلّي الظنّ بربنا خير مهما كانت الأمور معقّدة و أتأكد تماماً أنو ربنا رح يرضيك بالوقت الصح و بالطريقة الصح🤍🦋.

هِيام

خاطرتي||Hiyam 🤍🪐

29 Oct 2023 11:17

-تولدُ الإنتصارت مِن رَحم الندبات ، وعلى قدر الخراب يأتِ النصر عظيمًا 🤍🦋.

خاطرتي||Hiyam 🤍🪐

27 Oct 2023 23:40

💔12/10/2023💔

-تعلّمت بأنو الانسان قد ما وصل لمراتب و قد ما حقق انجازات ما لازم ينغرّ بفكرة أنو هو دائماً قد كلّ الأحمال..

ببساطة بيجي موقف من ربنا بدون سابق أنذار..
بحطلك نقطة بنهاية هالسطر الي كنت عم تكتبه على الرغم من أنو كان كلك ثقة رح يكون هالسطر رواية مو بس سطر عادي..
بمعنى : وّقف ؛ استريح ؛ خُذ نفس

قبل بكم شهر كنت مبلشة بعدة أشياء و خطط بترفع حصيلتي العلمية و خبرتي مستقبلاً عدا عن المشاريع الي بتفيدني مادياً و معنوياً و لربما بترفعني منزلة عند ربنا

امتلأ وقتي للحد ألي خلاني اشتغل ع نقطة اعتمادي ع نفسي و ع قدراتي 12 ساعة
من ال 6 الصبح لل6 المسا
مقسمين لكتير أعمال
كنت أمشي كتير و أبذل طاقة جسدية و عقلية و نفسية كبيرة
حرفياً كنت أوصل للمسا مُنهكة
بس كنت حاسة بأنجاز عظيم ..
و بفترة قصيرة قدرت استلم شهادات معتمدة دولياً..
بلشت حس أنو عم امشي بالطريق الصح
و أنو الحياة فعلاً لحتى نكون فيها من النُخبة لازم نعطي كلشي حقه و نركز ع عدة أهداف مو بس هدف واحد..

بالمقابل بلشت أعتزل الحياة الاجتماعية تدريجياً.. بلشت كون انطوائية اكتر و اعتزل الناس
اعتزلت صباح الخير و مرحبا و كيفك و المقدمات..
أعتزلت التجمعات الكبيرة و الكلام الكتير

استمريت ع هاد الحال فترة منيحة
رغم احساسي بالتعب مع مرور الوقت إلّا أنو ما وقفت و كابرت ..

مع الوقت بلش الضغط علي
بلشت المسؤوليات تزيد..
دراستي الاساسية تزيد ؛ ساعات دوامي ع الجامعة تزيد و بلشت مسؤوليات دوام المشفى و المهام تزيد ..
عدا عن مسؤوليات البيت و واجباتي تجاه أهلي و تجاه ربنا
عدا عن مشروعي الجانبي الي استلمته ؛ هاد كان حمل لحال..
كنت لمّا اوصل لنهاية اليوم
ثانيتين و كون نايمة من التعب ..

لليوم إلي حسيت فيه فعلاً أنو صار ثقل علي
و انو فعلاً حَملت كذا بطيخة سوا..
و هاد منافي للمنطق و للقدرة الي عطاني ياها ربنا كأنثى و سابق للمستوى العلمي الي مطالبة فيه حالياً..

بس ماكان فيني اتراجع و ما كنت متقبلة فكرة انو فعلاً لازم أخد نفس و وقف ؛ خاصة في أشياء لسا كنت ببدايتها و حاببتها..

بس كان للقضاء و القدر رأي تاني
أجت رسالة ربنا قويّة هالمرّة
دَخلت المشفى ليومين
هاليومين كانوا كفيلين ليرجعوني لورا..
باليوم الأول كان خبر صادم للمقربين مني
هيام بالمشفى؟؟
مستحيييل مبارح شفناها؟؟ هيام بخطر؟؟
كيف صار! كيف حصل؟ اكيد مو هيام بكون حدا تاني!
بهاد اليوم كان مُمكن فارق الحياة ؛ فبلشت أتلو سُور من القرآن أنا و بالاسعاف لعلها تكون آخر كلماتي..
بالنهاية تجاوزت الخطر و ربنا كان مقدرلي الاستمرارية بالحياة
بس من بعدها صرت مُلزمة قسراً بدخول مرحلة الاستشفاء الي حدودها الأطباء ضمن غرفتي ؛ مسطحة ع السرير فقط؛ ممنوعة من أي عمل بدني مُجهد ..

حرفياً أصعب أشي عشته بحياتي لهي اللحظة بعد الزلزال..

بموقف واحد وقفت جامعتي و وقف دوامي و وقفت حياتي و وقف كلللشي عندي ..

كأنو ربنا حكالي طولي بالك مو هيك الحياة بتنعاش .. خدي نفس ؛ ارتاحي
لسا الطريق طويل

للحظة هي أنا مو مستوعبة الي صار ..
عم أتجاوز..
بس عم انتظر لأرجع لحياتي الطبيعية
كرمال شوف مدى قوتي و شو حكمة ربنا من ورا كلشي صار معي فجأة..
و يا ترى اذا وقعت ممكن ارجع أبني حالي و لا خلص خلصت الحكاية💔

ادعولي كتير ..
ادعولي يخلص هالاختبار بسرعة ..
ادعولي يمكن أكتر اشي منيح ممكن يتقدملي بهالفترة💔

بعرف طوّلت بالكلام و بهالمرة ماطلع مني كلام محفزّ و حكيم بس المرحلة الي أنا فيها صعبة؛ صعبة جداً
بالنهاية فاقد الشيء لا يعطيه💔

#هيام

خاطرتي||Hiyam 🤍🪐

11 Oct 2023 21:07

-تقدير التّفاصيل البسيطة شغلة حلوة وضرورية ، بس مو مطلوب منّا طول الوقت نقدّر التفاصيل البسيطة ونفرح فيها..

في أوقات رح تكون فيها مُرهق، تعبان ، مكتئب ، مضغوط..
رح تحس أنّك بحاجة راحة ما أكتر و ما وقت السعادة و الأمتنان..

في أيام ممكن تجي ع هيئة قلق بس كتلة كبيرة منه..
وفي أيام رح تعيش فيها الماضي وتحسّ بحنين..
وفي أيام رح تهرب منها وتتمنى تخلص بسرعة..
وفي أيام رح تتمسّك فيها وتتمنّى يوقّف الوقت عندها..

لهيك لمّا تحس حالك ما عم تحس بالتّفاصيل لا تدايق وتزيدها عحالك، وتبلّش تجلد نفسك و تلوم حالك بأنّك شخص ما بتعرف تعيش الحاضر..
أو شخص ما بيعرف يعطي التّفاصيل حقّها..

افتكر أنو عادي كلنا أحياناً ما منعرف نعيش الحاضر و لا منعرف نتصرف آنياً ..
دا أنتَ بَشر مو ملاك🤍🦋.

هِيام