خاطرتي||Hiyam 🤍🪐

06 May 2024 21:34

سبحان اللّه ..
أحياناً بجملة عابرة بتدخل مسامعك من عابر سبيل بتغيّر نظرتك بموضوع فبتحلّ مشكلة صرلك شهور واقع فيها ..
أحياناً مشهد عابر لمحته بجدد طاقتك و بيعطيك همّة أكتر من بودكاست صرلك أسابيع عم تحضره..

بالمظهر العام هالأشياء كلها صدفة بصدفة
قرأت بالصدفة شفت بالصدفة سمعت بالصدفة لتقيت بحدا بالصدفة..

بس خليني آخدك ع المنطق الأعظم
الي رح يخلينا متفقين أنو ما في صدفة بهالحياة!

كل أشي عند ربنا مخلوق بمقادير وموازين دقيقة جداً و بتواقيت محددة لتحصل ..

لهيك مافي صدفة بالحياة
في قدر مكتوب لكلشي بحياتك .. مرسوم بأدق التفاصيل..
ف انتبهوا لإشارات ربنا بالأشياء الي بتجي فجأة ..
شوفوا شو عم يبعتلكم و كيف عم يعلّمكم..
أحياناً كلمة وحدة بموقف مناسب بتغير دوافعكم و أفكاركم تغيير ما قدرت عليه عشرات الكتب والمحاضرات..

خليّكم واعيين و كونوا بخير🤍🦋

هِيام الضاهر

خاطرتي||Hiyam 🤍🪐

04 May 2024 11:38

-و في هذه المرة أنا لا أطلبُ شيئاً ، أنا أشكرك على كل ما لديّ🤍🦋.

خاطرتي||Hiyam 🤍🪐

02 May 2024 17:59

-بدي أحكي وجهة نظري بشغلة:

دائماً بشوف من الأدب والرحمة و البر لمّا حدا يجي يحكيلك عن أي موقف أو شغلة مزعلته أو مضايقته ما بينفع بوقتها أبداً تحكيله:
( دخيلك كلنا تعبانين اكتر منك)

حتى لو هموم الدنيا كلها فوق راسك
ما بينفع تحسس أي بني آدم أنو موقفه عادي و حزنه تافه..

لمّا هالشخص اختارك لحتى يشاركك حزنه و الأشياء الي بباله
معناها ربنا أصطفاك ليجعلك شِفاء لأحد هالناس من كيد الشيطان و وساوسه..

فواسيه ، طبطب عليه ، هوّن عنه اذا بتقدر..

لما تحس أنو تحسّن و شد.. تمام بوقتها إذا حابب ابدأ أشرح مشاكلك و همومك أنت كمان..

بس جملة:
( ياخي كلنا تعبانين و مكتئبين و عنا هموم أكتر منك)
جملة كفيلة لتزيد هم ع الشخص الي قبالك..

حاولوا تتعاملوا بلين مهما قدرتوا لتكونوا الطرف الحلو من هالحياة 🤍🦋.

هِيام الضاهر

خاطرتي||Hiyam 🤍🪐

30 Apr 2024 15:06

-إنّك تكون شخص إيجابي مو معناها إنك تكون مغّيب عن حقيقة الوضع و تقلبات الحياة..

الإيجابية عندك بتبان لما تتعرض بحياتك لمصيبة أو ضيقة..

بوقتها لازم تكون متيّقن و فهمان أنك مو بأفضل موقف و لا بأفضل تجربة..
بس بنفس الوقت لازم تكون عارف أنك لازم تشتغل عَ نفسك و حياتك أكتر و انّك ممكن تطلب مساعدة و نصيحة ..

أهم اشي تكون مقتنع أنك رح تعدي هالمحنة و توصّل ذاتك لمكان احسن مع الوقت..

الإيجابية لازم يكون معها مجهود كبير و صبر و تعب مو بس وجه مبتسم و كلام مزخرف لحتى ما نبيّن للناس أنو فشلنا او تعبنا أو عاكستنا الظروف..

لهيك خليّك إيجابي بس بطريقة صح🤍🦋.

هِيام الضاهر

خاطرتي||Hiyam 🤍🪐

14 Apr 2024 08:38

-إنَّ الكِرامَ وإنْ ضاقتْ معيشتُهم
دامتْ فضيلتُهم والأصلُ غلّابُ🤍🦋.

#صباح_الدوم

خاطرتي||Hiyam 🤍🪐

13 Apr 2024 00:21

- وجود ربنا ضمن نيتك بسهّلك 90% من قراراتك وبتعملها و أنت مرتاح ومطمئن🤍🦋.

خاطرتي||Hiyam 🤍🪐

11 Apr 2024 20:16

-حابة أحكيلكم :
كل عيد و بيوتكم عمرانة بحبايبها ولمتكم دائماً زايدة مو ناقصة حدا..

فطر سعيد🤍🦋.

خاطرتي||Hiyam 🤍🪐

03 Apr 2024 21:01

-بحترم جدًا أي إنسان بحاول ..
بحاول يغيّر خصلة سيئة فيه
أو بحاول يحسّن من نفسه أو بيتحدى ظروفه بدون ما يستسلم كرمال يحقق هدف معيّن..
حتى الي بحاول يتعلّم لُغة أو صنعة أو حرفة او أي شي مُمكن يفيده ..

كُل التقدير للناس إلي بتحاول تحسّن من واقعها ووضعها مهما كان الإمكانيات ضعيفة و النتائج عكسية🤍🦋.

هيام الضاهر

خاطرتي||Hiyam 🤍🪐

26 Mar 2024 06:39

-دائماً بسأل حالي ليش سيدنا محمد عليه الصلاة و السلام خصّ الدعاء :
"اللّهم إنّك عفوٌ تحبُ العفوَ ،فاعفُ عني" بليلة القدر!!

لوقت ما قرأت إجابة شافية جدًا لإبن القيّم بقول :
"إن عَفا عنك، أَتتك حوائجُك من دونِ مسألة"

فاعفُ عنا يارب..🤍🦋

#إلى_الدوام

خاطرتي||Hiyam 🤍🪐

24 Mar 2024 07:40

-أعنِّي..
لأقضِي ما أمرتنِي به، على الوجهِ الذي ترتضِيه🤍🦋

خاطرتي||Hiyam 🤍🪐

22 Mar 2024 09:13

-جمعة مُباركة
مُباركة طاعتكم 🤍🦋.

خاطرتي||Hiyam 🤍🪐

04 Mar 2024 14:24

- و أيّامًا مليئةً بِاللُّطف.

آمين ألف مرّة🤍🦋

خاطرتي||Hiyam 🤍🪐

24 Feb 2024 06:35

-من القرارات الجميلة إلي بتختارها وبتريحك جداً ..
انك تقرر التعايُش مع أي وضع ومع كل أمور حياتك حتى لو كانت الأمور عم تمشي عكس رغبتك، إنّك ترضا من كل قلبك و برحابة صدر بكلشي بحياتك..

لإن أمرّ اللّٰه نافذ سواء صبرت أو اعترضت
سيدنا عمر قال: نفرُّ من قدر اللّٰه إلى قدر اللّٰه ..


فاللَّهمَّ لكَ الحمد قولًا وفعلًا وشكرًا ورضا🤍🦋.

خاطرتي||Hiyam 🤍🪐

18 Feb 2024 04:48

-للَّهِ درُّ ما وَقر بالقلبِ و لَم يعلم
بهِ إلّا اللَّه.

خاطرتي||Hiyam 🤍🪐

14 Feb 2024 00:28

(أن يُغالبني النور، وألّا تهزمني الظُّلمة)

-آمين ألف مرة ياربّ🤍🦋.

خاطرتي||Hiyam 🤍🪐

05 May 2024 19:58

-مسالخير
عَ مهلك عَ حالك، لا تضلّ تركض وتركض ..
رح توصَل، تمشاية .. وبالرّواق
لمّا اللّه يكتبلَك توصَل، بتوصل، أنت لا عاد تعرقلها و بس🤍🦋.

هِيام

خاطرتي||Hiyam 🤍🪐

03 May 2024 12:32

-نعوذ بك أن تفتر عزائمنا في أوجِ السّعي ، أن تتلاشى أقدامنا عند عتبة الوصول ، أن يداهمنا اليأس في ذروة الأمل ، أن نضيّع الوجهة وقت اشتداد اليقين ،وأن نخلط الكسل بالعجز ، والتّوكل بالتّواكل🤍🦋.

خاطرتي||Hiyam 🤍🪐

01 May 2024 08:19

-معلش صباح الخير مرتين مني ومن حلب؟🤍🦋

خاطرتي||Hiyam 🤍🪐

20 Apr 2024 18:18

-في ناس بتبدأ متأخرة و بتسبق كل الي بدأ بكير..
توفيق ربنا بغيّر كل القواعد حتى لو كانت مستحيلة
فكن مع اللّه ثم اجتهد..

ربنا يرزقنا التوفيق لما يحبه ويرضاه🤍🦋.

هِيام

خاطرتي||Hiyam 🤍🪐

13 Apr 2024 01:00

-"هالبنت ولدت مع عين سخيّة"

هالجملة نحكتلي ع مدار سنين حياتي بشكل متكرر ..

بعيداً عن شخصيتي بالحياة العملية و العلمية بس أبسط موقف بحرّك مشاعري تلقائياً دموعي بتنساب بغزارة كرماله..

مثلاً اذا شفت طفل شقيان أو قطة متأذية بالشارع أو حدا عاجز أو أي موقف مؤلم أو مُفرح بالنسبة إلي..

هالقصة بشخصيتي و بكيميا تكويني كانت عاملتلي مُعضلة و مهما حاولت اتحكم فيها ما كنت انجح..
كنت حسها نقص أو ضعف أو نقطة سلبية فيني..

للوقت إلي قرأت فيه حديث سيدنا محمدﷺ لمّا سُئل عن فيضان الدموع قال:
"هذه رحمةٌ جعلها اللّه في قلوب عباده وإنّما يرحمُ اللّه من عباده الرُحماء"

من بعدها تيقنّت ردّة هالفعل عندي من أطيب النِعم إلي ربنا وهبني ياها

فالحمدللّه حبّاً و شكراً عَ كلشي🤍🦋

هِيام الضاهر.

خاطرتي||Hiyam 🤍🪐

11 Apr 2024 21:10

العيد كان عبارة عن:

_وأنت بألف خير ياعمو لا لسا ما تخرجت مبارح دخلت ع الجامعة
_لا واللّه ما بحب شغلة المندوب العلمي مع أنها كتير بتطالع مصاري
-و لا اركبلكم مستحضرات طبية حالياً مالي قدرة
_لا والله مافيني أضرب أبرة لأنو النقابة مانعتنا
_أي لكن بعرف قيس الضغط و اسحب دم
_لا لسا ما عملت الفحص الوطني لبعد الخامسة
_أي صح، معك حق،متل ما بدك، بياع أدوية بياع ادوية
-له يا عمو تكرم -طبعاً رح اصرفلك الأدوية كلا ببلاش بس تخرجت
_لا يا خالتو حالياً ما فيني أوصف دوا ما بصير لسا ما عندي المؤهلات الكاملة
_لا، الصيدلة مانا سهلة و الصيدلاني دكتور مانو بياع أدوية🤍🦋.

هِيام الضاهر

خاطرتي||Hiyam 🤍🪐

06 Apr 2024 05:12

{وَآتَاكُم مِّن كُلِّ مَا سَأَلْتُمُوهُ}

دعيت لكل حدا قريب من قلبي
لكل حدا طلب مني ادعيله
دعيت لأهل غزة
و لطلاب البكلوريا
و آخر شي لنفسي🤍🦋.

كانت من أحلا الليالي و أطيبها🤍🤍 .

خاطرتي||Hiyam 🤍🪐

03 Apr 2024 20:52

يارب اشملني و أيّاهم برحمَتك وعَفوِك وعِتقك وغُفرانك 🤍🦋.

خاطرتي||Hiyam 🤍🪐

24 Mar 2024 07:40

-"البنت مو متل الشب و ما ممكن تكون متله تماماً"

هالجملة قرأتها من فترة و حقيقةً متفقة معها جداً ..

فكرة المساواة بين الرجل و المرأة هي
فكرة غبية و ضد الفطرة ..

تمام، اتعلمي و اجتهدي بعلمك لأقصى المراتب و اشتغلي ضمن حدود بتليق فيكِ ك أنثى و كوني أم و أخت و زوجة يُفتخر فيها

ما تجاهدي نفسك بإنك تضيعي الفطرة إلي ربنا خلقك فيها و تتمردي عَ تكوينك الشخصي و العقلي و صفاتك لمجرد تبيني أنو فينك تكوني متل أو أحسن من 100 رجل

الموضوع أبداً مو عناد ، بالعكس ربنا أعز الأنثى لأنو جعل حقوقها مختلفة عن الرجل و مثل مافي حقوق مميزة للرجل كمان الأنثى إلها حقوق مميزة خاصة فيها

اذا توجهنا لنقطة صغيرة جداً
ربنا خلق الأنثى رقيقة قدرة تحملها للتعب ع قدها مهما تظاهرت العكس لأنو بنيتها الجسدية ما بتسمح فكمّل الحياة بالرجل ليقدر ياخد النصيب من التعب و الإرهاق الجسدي

فـ تميّزي بكلشي ربنا وهبك ياه هاد كافي و زيادة🤍🦋

هيام الضاهر

خاطرتي||Hiyam 🤍🪐

22 Mar 2024 09:52

-في شغلة حابة احكي عنها

مافي شي اسمه :
"ادعيلي برمضان يمكن أنت أقرب منزلة ل ربنا مني"

أنا ممكن أدعيلك من باب الحُب فـ اللّه أو مكانتك عندي ..
مو كرمال أنا أقرب ل ربنا منك أو أعلى مكانة و ع هاد المبدأ بتمنى الناس تدعيلي ..

نحن ما منعرف منزلتنا عند ربنا ، و غلط تتكل عَ غيرك بالدعاء ظنًا منك أنو ربنا ما رح يستجيب غير لدعاء الناس إلي باين عليهم صفة الطيبة و الصلاح، هاد سوء ظنّ باللّه.

ما تطلب واسطة بينك وبين ربنا ، ربنا بيحب يسمع العبد و هو بيرجوه يعفو عنه و ييسر أمره و يلحّ عليه بالدعاء كرمال تحقيق أمانيه..

تذكرّ: سِر إلى اللّه بأثقال طينك فهو يحب قدومك عليه 🤍🦋.

هيام الضاهر

خاطرتي||Hiyam 🤍🪐

09 Mar 2024 11:20

الإنسان ممتن لربنا ع كلشي ، ع الأمل الي بيهدينا ياه بوقت اليأس ، ع القوة إلي بتجي بوقت الضعف ، ع المطر الي بنركض لتنفرج عليه بدون ملل فمندعي و نحن متيقنين أنو رح يقبلنا و يعطينا من دعواتنا حتى لو بعد زمن ..

فَـ شكراً يارب
شكراً ع كل فرصة لطيفة بنلمس فيها رحمتك🤍🦋.

هِيام

خاطرتي||Hiyam 🤍🪐

03 Mar 2024 22:57

-الناس إلي بحياتي معفيين تمامًا من أي شي بياخد طابع الإلزامية..

لا بركز و لا بستنى ولا بعاتب ولا بسأل مين عمل بالواجب و مين لا ..

الفكرة كلها مبنيّة ع الموّدة
و كل شخص فيه إلي مكفيه ما حدا خالي..
بالنسبة إلي مو من حقي أفرض نفسي من ضمن أولويات شخص ما مهما كان قريب مني و لا يصح اساساً اتبنى هالمبدأ
فأكيد رح كون متفهمة نقطة متل هي..

بيكفي لمّا قابلهم صدفة يكونوا مسرورين بصدفتي أو مثلاً أخطر ببالهم بيوم بينهم و بين نفسهم بالخير و تصاحبها دعوة لطيفة ما أكتر و خلصِت🤍🦋.

هِيام الضاهر

خاطرتي||Hiyam 🤍🪐

22 Feb 2024 21:04

-فيكَ الرجاء سُبحانك و إنّ ضلَّ السَّعي وانسدّت الطُّرقات وانقطعت حبال الأسباب..
اللهمّ إنّ في تدبيرك ما يُغني عن الحيَل، وفي كرمك ما هو فوق الأمل..

أصلح لنا شأننا كلّه ولا تَكِلنا لأنفسنا طرفة عين🤍🦋.

خاطرتي||Hiyam 🤍🪐

17 Feb 2024 19:53

-في مرحلة تعبتني بحياتي بكتيير جوانب لحتى قدرت افهمها ، هي :

"أخد الحياة عَ محمل الجد"

لما تاخد الحياة بجديّة كبيرة بصير كل موقف غير مريح مؤلم و كل خيبة و تجربة فاشلة مؤلمة و كل حدث بياخد أهمية أكبر من حجمه..

بعد مدة لاحظت المواقف و الأحداث نفسها لمّا مرّ عليها الزمن كيف صغرت لدرجة أحياناً ما بتذكرها
لأنو بكون الموقف رجع لحجمه الطبيعي..

حرفياً الماضي ماله قيمة سواء كنا سعداء فيه أو لأ .. سواء اتعلمنا منه أو لأ
لمّا نرجع عليه بخلينا نخترع استنتاجات وهمية كرمال نسيطر ع أي شي مزعج عشناه ، بس بالنهاية بنكتشف أنو كلشي وَهم لأنو خلص كلها مواقف ماضية الضريبة بكلشي هو استنزاف الحاضر بأشياء وهمية..

المستقبل كمان مو مهم لأنو بالغالب هو مهرب من الحاضر..
مجرد حيلة ذهنية لنخلق مخططات و رؤية و نجمّع طاقة كرمال نشعر بالسيطرة..
و احتمال ننجح بهالمخططات و ممكن مرات كتير نفشل ..

الخلاصة من كلشي حكيته
المستقبل هو أمتداد للحاضر مو أشي منفصل بيجي بمرحلة لحاله
هو نتيجة لفهمك و توازنك أو عدم فهمك و اضطرابك حالياً..

فأيّاً كان إلي حالياً بتعيشه حاول تخلق سلام و توازن بالطريقة الي بتحبها
عيش كرمالك ، كرمال تكون ع الوجه الي بحبه ربنا
لا تعيش بالماضي و
لا تعيش كرمال الهدف
الهدف مرات وهم و مرات تقليد و مرات عوض و مرات هروب ف التوّكل و التسليم للّه بحل كل هالقضايا .. و بس واللّه🤍🦋.

هيام الضاهر

خاطرتي||Hiyam 🤍🪐

12 Feb 2024 20:43

-السَعي حلو لأنّو الفراغ مُهلك ، بس ما خلف الكواليس حقّاً مؤلم..

مؤلم لأنّو بياخد مننا فِكر و وقت و عُمر وتجارب و بالآخر ممكن نوصل و ممكن لا..

بناخد كل خطوة و نحن مو عرفانين إذا كانت صح ولا غلط ، بوقتا منتمنى نسمع أي كلمة أو جملة تخلينا متفائلين..

بنهاية المطاف و الأمنية الأبدية أنو مهما كانت النتيجة يكون كلشي مرقنا فيه مأجورين عليه..
إذا أصبنا رح نُسعد ، و إذا ما أصبنا كلشي قدمناه بينوضع بخزانة التجارب الي لازم نتعلم منها و نعلّم منها غيرنا لعلّ خُطاهم بتكون أكتر استقامة من خطانا ..

أسأل اللّه أن يُسدد خُطانا ولا يُذهب منها شيئاً ، ويرزقنا الصبر والرضا أينما حللنا🤍🦋.

هيام الضاهر