Telegram-канал zenatoday - ዜና Today News: Unsorted

ዜና Today News

07 July 2025 12:50

ገለልተኛ እንዲኾኑ የሚጠበቁ ተቋማትን ለአፈና መጠቀም የአምባገነናዊነት ማሳያ ነው!
(በወቅታዊ ጉዳይ ላይ ከመኢአድ፣ ኢሕአፓ፣ እናት ፓርቲና ዐማራ ግዮናዊ ንቅናቄ የተሰጠ መግለጫ)

አገራችን ኢትዮጵያ መሠረታዊ ሰብዓዊ መብቶች የማይከበሩባት፣ ፍትሕ ርትዕ እና መልካም አስተዳደር የተጓደሉባት መኾኗ የአደባባይ ሀቅ ነው። ብዙ ጫናዎችን ተጋፍጠው ለሕዝብ ድምፅ በመኾን የሚታገሉ የፖለቲካ ፓርቲዎች አባላትና አመራሮችን ማስፈራራት፣ ማፈን፣ መሰወር፣ ማሰርና አለፍ ሲልም መግደል የተለመዱ ሥርዓታዊ ባህል ከኾኑ ውለው አድረዋል። በዘመነ ብልጽግናም ይኼው ክፉ አባዜ ተጠናክሮ ቀጥሏል።

በቅርቡ ሾልኮ እንደወጣ በተገለጸ መረጃ መሠረት ምርጫ እየተቃረበ መምጣቱን ተከትሎ ብልጽግና መራሹ መንግሥት ከተለያዩ ገለልተኛ ኾነው ከሕዝብ ጋር ብቻ መወገን ከሚገባቸው ተቋማት የተውጣጣ ቡድን መቋቋሙንና የዚኽ ቡድን ዋና ዓላማም ብልጽግናን ይገዳደራሉ ተብለው የሚታሰቡ የፖለቲካ ፓርቲዎችን ማፍረስ፣ አባላትና አመራሮችን ማፈን ብሎም እስከ መግደል የሚደርስ እርምጃ መውሰድ እንደሆነ ለመረዳት ተችሏል።

ነገሩ ከመረጃ የዘለለ አይኾንም ተብሎ በታሰበ ማግስት የሕዝብ ተወካዮች ምክር ቤት ሰኔ 10 ቀን 2017 ዓ.ም ባካሄደው 37ኛ መደበኛ ስብሰባው ከነጉድለቶቹ ከሚንገዳገደው የኢፌዴሪ ሕገ መንግሥት አንቀጽ 9 (የሕገ መንግሥት የበላይነት)፣ 14 (የሕይወት፣ የአካል ደህንነትና የነጻነት መብት)፣ 18 (ኢሰብዓዊ አያያዝ ስለመከልከሉ)፣ 25 (የእኩልነት መብት) ጋር ፍጹም የሚቃረን ከዚያም አለፍ ሲል አፈናንና ማሰቃየትን “ሕጋዊ” ሽፋን ለመስጠት ያለመ በወንጀል የተገኘ ንብረትን ሕጋዊ ማስመሰል እና ሽብርተኝነትን በገንዘብ መርዳት ወንጀልን ለመከላከልና ለመቆጣጠር የወጣ አዋጅ አጽድቋል፡፡ አዋጁ ምርመራ ወይም በቁጥጥር ሥር የሚደረግ ማስተላለፍን እንዲያስፈጽም የተመደበ ሰው ከነፍስ ግድያ ወንጀል በስተቀር በምርመራ ሂደት ውስጥ ለሚፈጽመው ማንኛውም የወንጀል ድርጊት ተጠያቂ እንደማይኾን በግልጽ ይደነግጋል።

በሌላ በኩል ግንቦት 2017 ዓ.ም ከብልጽግና ዋና ጽ/ቤት ሾልኮ እንደወጣ የተነገረለትና “የጠላት አዲሱ የትግል ስልትና የመመከቻ አቅጣጫዎች” በሚል መነሻ “በየደረጃው የሚገኙ አመራሮችና አባላት ከወቅታዊ ጉዳይ አንፃር ለሚሰሩት ሥራ እንዲያግዝ የተዘጋጀ” የሚል ሰነድ እንዲኹ በመረጃ መልክ ደርሶን ተመልከተነዋል፡፡ በሰነዱ ገጽ 7 ላይ በዋናነት አራቱን በትብብር የምንሠራ ፓርቲዎች በስም ጠቅሶ “አፍራሽ” በሚል ይከስና “በጠላትነት” ፈርጆ ይታያል።

አባቱ ዳኛ ልጁ ቀማኛ የኾኑት ከሥርዓቱ እግር ስር ቀለብ የሚሰፈርላቸው አክቲቪስቶችና እነ ሆዳቸው አምላካቸውም በድንግዝግዙ መሐል የሕዘብን ድምጽ የሚያሰሙ ፓርቲዎችንና አመራሮችን በስም ጭምር እየጠቀሱ “እንዴት ዝም ይባላሉ” ይሉ ነጠላ ዜማን ማንጎራጎር ጀመረዋል፡፡ በቀደሙት ሃያ ሰባት ዓመታት ለአፈና ያሰቡትን ግለሰብ በመንግሥት በሚታተሙ ጋዜጣዎችና በቴሌቪዢን ዘጋቢ ፊልም (ዶኩመንተሪ) ቀድመው ይሠሩበት የነበረው ስልት ግልባጭ ማለት ነው፡፡

በአጠቃላይ እንደሥርዓት ፖለቲከኞችን፣ ጋዜጠኞችን፣ ማኅበራዊ አንቂዎችንና ሌሎችንም ዜጎች እያፈሱ በማሠር፣ በማሰቃየት ብሎም የተለየዩ ዘዴዎችን በማበጀት የፖለቲካ ስልጣን ማጽናት ለጊዜው ሊመስል ይችል ካልኾነ በቀር ለውድቀት የመንደርደሪያው ጅማሮ እንደኾነ ከትናንታችን መማር ተገቢ እንደሆነ አጽንኦት ሰጥተን ልንገልጽ እንወዳለን፡፡ ስለኾነም፦

1. መንግሥት ገለልተኛ እንዲሆኑ የሚጠበቁ ተቋማትን ለስልጣን ማጽኛና ለአፈና መጠቀሙን በአስቸኳይ እንዲያቆም፤

2. በሕጋዊነት ስም ዜጎችን ለማሰቃየት የወጣው አዋጅ አፈጻጸሙ እንዲታገድ ብሎም እንዲሻር፤

3. የፖለቲካ ፓርቲ አመራሮች፣ ታዋቂ ግለሰቦችና ባለሀብቶች ላይ ያነጣጠሩ ፍረጃዎችና ጥቃቶች ሌላ የማንወጣው የመተላለቅ መዘዝ ከማምጣታቸው በፊት በአስቸኳይ እንዲቆሙና ከለላም እንዲሰጣቸው፤

4. የኢትዮጵያ ሕዝብ ከሰላማዊ ታጋዮች ጎን በመቆም ጭቆናና ኢፍትሓዊነትን አምርሮ እንዲታገል፤

5. ዓለም አቀፉ ማኅበረሰብ በመንግሥት የበዛ ጭቆና ምክንያት በአገራችን ሰላማዊ ትግል ለአንዴና ለመጨረሻ ከማክተሙና ወታደራዊ አገዛዝ ከመስፈኑ በፊት ጥረቱን እንዲያጠናክር እናሳስባለን።

እግዚአብሔር አገራችን ኢትዮጵያንና ሕዝቧን ይጠብቅ