#قصائد_محرم_١٤٤٥هـ_٢٠٢٣م
قصيدة رقم ٨٧
شوط كربلائي للعباس عليه السلام
الشاعر السيد عبد الحسين الشرع "رحمه الله
لـلـعـبـاس اجت زينب طفل حسين وياها
تـشچي مـن العطش حاله تجري دموع عيناها
*
طـبـت لـعـد صـيـوانه منها العين همّاله
تـقـله شوف عبد الله اشسوة العطش بأحواله
يـاخـويـة يـبّـس لـسانه ذبّل هرش دلاله
سـوي لـهـل طفل چاره
يبن المايذل جاره
دمــعــتــي عـلـيـه تـتـجـاره
و أخـاف ارويـحته عليها ياخوية يلحق ظماها
*
شـوفـه يـديـر بـعيونه يتلفت لعد جودك
تـرضـى يـموت عبد الله يابحر الجود بوجودك
يـاخـويـة لمثل هذا اليوم النا ذاخرك عودك
تـراه الـعـطـش ماذينه
غيرك من يروّينه
لَــوَن اتــعــايــن ســكـيـنـه
مـن الـعـطش يا عباس نار و تشب بحشاها
*
ياخوية اطفال أخوك حسين كلها تصيح عطشانه
حـر الـعـطـش مـاذيـها تتلوع ابصيوانه
يـا عـباس أخوك حسين شنهي ذنوب رضعانه
عـلـيـها الماي يتحرم
و تتصارخ بالمخيم
مــاتــنــهــض يــالـمـشـيّـم
تـسـل السيف بيمينك و تحورب على عداها
*
لـمـن شـاف عبد الله شاف الدمع من زينب
تـغـير و انخطف لونه لاح الزعل بيه و اغضب
شـال اعـلـه المتن جوده و سل بچفه المذهّب
لاح بـظـهـر مـيمونه
دار لزينب عيونه
الــمــاي الــعـدى يـمـنـعـونـه
لـجـري لچ رحـاها اليوم يا زينب من دماها
*
ياختي خيمتج ردي بشري اطفال اخوية حسين
خـلـيـهـم يـتانوني و آنة الماي أجيبه الحين
قـامـت زيـنب تهلهل شبحت عالطريج العين
لـمـن شافته الفرسان
مجبل للحرب زعلان
صــايــح صــاح بـالـجـيـمـان
ويـن الـيـوم مـنـواكم لفّت كل رواياها
*
قـام يـجـول بالميدان غوجه و عالجثث يلعب
سـاعـه يـلـعب الرايه و ساعه يهز لمذهب
جسب صيت الحرب عباس و اتذكر وعد زينب
تعنه المشرعه الجيدوم
يباري للوحش و الحوم
لــكَــاهـا خـالـيـه امـن الـقـوم
نـزل ركـوتـه بـيـده مـن الـماي رواها
*
أخـد لـه ويا العدى ساعة لن واحد قطع يمناه
أخـذ سـيفه بيساره و قام عن جوده يرد عداه
صـابـوا بـالسهم عينه ياويلي و ثنّوا ابيسراه
وقف و مقطعة زنوده
و صابوا بالسهم جوده
لــن واحــد بـعـامــوده
ضـرب راسه ووقع مرمي وهاشم فقدت لواها
*
الشاعر السيد عبد الحسين الشرع "رحمه الله"
#قصائد_محرم_١٤٤٥هـ_٢٠٢٣م
قصيدة رقم ٨٥
تجليبة للعباس عليه السلام
دخيلك يابو فاضل يابو المروّه
أعرفنّك غيور وخــــوّتك خوّه
*١*
حين اللي عــزم للسّفر ضعن حسين
لرض الغاضــــريّه بصحبته السّبعين
وشـــــبول الهواشــــم فتيته الطّيبين
شــــــبّان المـــــــنايه البيها يتگـــوّه
*٢*
تعـــــــنّه الدّار زينب وي گمر هاشم
يازينب يگلـــــــها أعله السّفر عازم
ويّه أم علي الأكــــــبر ويّه أم جاسم
گومي الضعن يختي اعله السّفر نوّه
*٣*
بوجه حســــين صدّت والدّمـــع هامل
امن أطلــــع ياهــو منكم للضّعن كافل
دگ صدره بزعل ويگلـــها أبو فاضل
أنه الكــــــافل يَحُرّه وغيري من هوّه
*٤*
أنه الوصّــــــاني أبوي بآخر الأنفاس
وگال ابني وأعرفك زين رفعــة راس
أمانه بشــــاربك خـدر الحــرم عباس
صوته بســمعي أحسه بكل وكت دوّه
*٥*
گامت زينب وســــــار الضّعن للطّف
وأشباح المــــــــنايه اعليها تتخطّف
ظُهر عاشـــر محــرّم صعب يتوصّف
لعب عباس بيها وســـــوّه ماســـــوّه
*٦*
من طب للمعـــــــــــاره ورفّت الرّايه
چن حــــــــــيدر أبوه البيه الكــــفايه
حوه بزوده الفرات وماشــــرب مايه
حــــرّم گبل أخـــــيّه المـــــاي يتروّه
الشّاعر أبو سجّاد الجعفري
#قصائد_محرم_١٤٤٥هـ_٢٠٢٣م
قصيدة رقم ٨٣
دارمي ثلاث دكات كربلائية للعباس عليه السلام
عالمشرعه العباس گطعوا يمينه
يازينب الوفاي راح امن ادينه
*١*
يازينب بيا حال لمّن وصلته
متگطع العباس ياخويه شفته
حاولت اجيبه وگال خليني عفته
شلون ارجع بلا ماي لختي الحنينه
*٢*
صدره انترس بسهام والنبله بالعين
الله يعينه شلون من طاح اخو حسين
يتلگّه بيش الگاع ما عنده چفين
راح وبعد هيهات يرجع علينه
*٣*
ظل مستحي العباس ما يرجع وياي
چيه ردتّي منه الماي وتعذّر الماي
گلي اعتذرلي ومات من زينب هواي
آخر كلامه وياج وتفارگينه
*٤*
گالتله خويه حسين وديني يمّه
مشتاگه للعباس خليني اشمّه
نتعاتب آنه وياه اگعد وكلّمه
من گطعو الچفين يعني انسبينه
*٥*
گاللهه لو شفتيه اقسم تموتين
من خيمتج حاچيه ليث الميادين
بس عله كيف وياه لمن تعتبين
عتبج تره يأذّيه يختي الحزينه
*٦*
صاحت يبوالنوماس جاوب عليه
ترضاها يا عباس اطلع سبيه
بت فاطمة الزهراء بين آل اميه
بديوان امية شلون ادخل رهينه
سيد زيد الفحام
#قصائد_محرم_١٤٤٥هـ_٢٠٢٣م
قصيدة رقم ٨١
موشح للعباس عليه السلام
يا علي إبنك وِفه ابكل العهد
للحُسين ابكربله صَرْت السند
*١*
حال عباس الگُمر يوم الطفوف
يا علي حامي الحمه ريتك تشوف
ناصرت إبن النبي باصعب ظروف
عاهدت ربي أنصره بالشدد
*٢*
من بقه هو وحيد ابكربله
لا مُناصر عنده بس العايله
لا بني هاشم ولا الوياه صِله
قدموا كل المُهج و بمعتقد
*٣*
يا وصي المصطفه شفته وحيد
ثورته ضد الظلم هو يريد
سيدي گتله أنه لجلك شهيد
فدوه دمّي يا إمامي و الجسد
*٤*
وأطلبت رخصه أحارب بالحرب
أنصره ضد العده وميظل صعب
وافق حسين الولي ابهذا الطلب
بالحرايب كون اوفي بالوعد
*٥*
يا أبو اتراب اهجمت ضد العِداء
وبشجاعه وبإراده وبولاء
شاهد اعليه يظل رب السماء
ما اعوف حسين آنه للأبد
*٦*
حاربت كل الكتايب و الفرق
من أطبها يا إمامي تنفرق
والسبب قوّة حسامي كالبرق
قوّتي هاي ابفضل ربنه الأحد
*٧*
من بعد هذا اوصلت قرب النهر
ما شربته الماي قبل إبن الطهر
عايف حسين و دِليله كالجمر
لو عياله الواعدتها ابماي أرد
*٨*
يا علي اسگي العطاشه غايتي
وإنملت مِن النهر كل جربتي
أنصر حسين و ثورته حاجتي
من أجل ارضي الجلاله و الصمد
*٩*
لاچن العدوان حوّطني تره
يمنتي انضربت غدر والدم سره
وحملت سيفي ابيساري ابمفخره
عن كلامي و غايتي ربي شِهد
*١٠*
چان همّي جربتي إتكون ابسلام
كون توصل للعيال و للإمام
وللنسه وأطفال واللي بالخيام
والعِده وسفه ضرب أيدي ابحقد
*١١*
يا علي وإيدي اليسار اتگطعت
لا يمين ولا يسار اللي بقت
جربتي فوگ الأرض هي هوت
والسهام اعليه كثره بالعدد
*١٢*
يا علي وصابوا جربتي بالسهم
سال منها الماي بويه يا شهم
عالصدر والعين صابوني الزلم
بالسهام وكل جهه ضدي أجد
*١٣*
يا علي راسي تصوّب بالعمود
و العده ضدي تره من كل حدود
بالحياة الدنيا ما ظلّي وجود
للمنيّه يا إمامي مستعد
*١٤*
كون تقبل يا علي ابهالتضحيات
أرضي ربّي وبالحشر كون النجاة
من فديت وللولي كل الحياة
والشهادة عندي احله امن الشَهد
مهيمن يوسف الموسوي
#قصائد_محرم_١٤٤٥هـ_٢٠٢٣م
قصيدة رقم ٧٩
موشح للعباس عليه السلام
إعتــذر عبّـــاس من طه الرسول
ﮔـال ما أشرب ﮔبل إبن البتول
*١*
ﮔــــــال ما أشـرب أبو فاضــــل أبد
حتـّى يشرب مهجتي إو هذا عهد
وين أبو السجّـــــــاد ماجانـــــه بعد
خل يجي إو يشرب أبو الغيره ﻳﮔول
*٢*
خل يجي إو يشرب أبو اليمّه الشهيد
لـــو شرب مولاي آني أصبح سعيد
ربـّي إلعن ظالم إحسيـــــن العميد
هذا إخوي إو منـّه ياريت القبول
*٣*
هذا إخوي إو روحي فدوه المهجته
والعطـــش أدري مردهــا إﻠﭽبدته
والجــــــروح إكثــــار تنزف آذته
لو شرب يرتاح وإهمومي تزول
*٤*
لو شرب إبن النبي أشرب وأفوز
وإلرضا الزهره إو علي أحظه إوأحوز
ما أظل حيران للصعبه أجوز
حب أبو الأكبر أصل من الأصول
*٥*
حـُب أبو الأكبر وفاء الفاطمه
والأمـُر هذا نزل من السمه
كربله العطشت رواها بالدمه
والظـِمـَه صوّب دليله إو بي يجول
*٦*
والظمه صوّب دليل العالمه
ﻓﮔدت الوليان ظلـّت هايمه
والرزايه عاشرتها إو دايمه
صابره الحوراء والظالم يصول
*٧*
صابره الحوراء من بعد الحسين
فضحت الأشرار والطاغي اللعين
لاﭽـن الدلال مجروح إو طعين
ما تذل هيهات هاي إم الشبول
الشاعر المرحوم جابر الخزرجي النجفي
#قصائد_محرم_١٤٤٥هـ_٢٠٢٣م
قصيدة رقم ٧٧
تجليبة للعباس عليه السلام
مآسي يا نهر منّك كثر بيها
بحسره و لوعتي حين آنه احجيها
*١*
يا نهر الفرات و ليش وي عباس
ما منّك شرب مايك ابد ما جاس
بعطش باقي فلا تروى ابو النوماس
كلها روحته منك تأذّيها
*٢*
طلع من الخيم لجلك اجه الوفاي
ابو فاضل تعنّه بگربته للماي
يسگيها العطاشه بهالأمر وفاي
تقبل يالفرات و ما يروّيها
*٣*
هذولي آل الرسول المصطفه المختار
عطاشه بكربله اتضدهم عده لشرار
ومايك ما يشروبنه رغم هالصار
كل قطرة فلا منّك وصل ليها
*٤*
ابو فاضل وصل يمك فلا يشرب
رغم عطشه و چبدته بالحرب تلهب
اخوه احسين يذكر و الخدر زينب
ماي و بالچفوف اصبح يبدّيها
*٥*
يحارب يمّك و جاه العده بغدره
يمينه نگطعت و اصبح صعب أمره
نوبه وبحقد ونضربت اليسره
چفوفه تگطّعت كثره مآسيها
*٦*
والگربه إجت ليها سهام هواي
وابو فاضل عليها منقهر ولهاي
فلا يگدر يصل لجل الخيم عنّاي
طايح عالأرض صعبه ايتعنّيها
*٧*
حگي بهالعتب يمّك أبو فاضل
يموت وما شرب مايك ولا حاصل
اجه ليه العده بسيفه و غدر قاتل
ناره بالعطش لا ما تطفّيها
*٨*
ليش و منحرم منك ابو الغيره
يلوج و حالته گربك صفه بحيره
وضعه يا نهر كل لوعته اچبيره
روحه صايره بحسره معانيها
*٩*
تحسّر ما گدر مايك يصل لخيام
بسبب جيش العده و غدره صفه بآلام
يحطونه و يغدرونه تره الظلام
جثته امن العده كلشي جره اعليها
*١٠*
يا نهر الفرات و منك الحسرات
يمّك ضامي عبّاس نقتل من مات
عانه امن الاعادي بس الاذه و لوعات
تأذّه بكربله كلها و بواديها
مهيمن يوسف الموسوي
#قصائد_محرم_١٤٤٥هـ_٢٠٢٣م
قصيدة رقم ٧٥
للأنصار عليهم السلام
لحن : الك يحسين تهل العين ، باسم الكربلائي
الك انصار يبن لطهار نضحّي بالعمر لجلك
*١*
اجينه امن المدينه نريد ننصرك عالعِده بدمنه
ننصر ثورتك كلها هـٰـذا اللي تره ايهمنه
كل واحد يضحّيلك يحارب وبعزم منّه
نفديلك عمر كله لأذه لا ما يرجّعنه
على الأشرار يبن لطهار نضحّي بالعمر لجلك
*٢"
قناعه عدنه وتْبعنه مسيرك احنه يا مولاي
علينه واجب انّصرك فلا ريبه و شكوك بهاي
إمامي و طاعتك لازم فرض وبكل حدث لو جاي
بثورتك سيدي يحسين كل شيعي الك وفاي
على اللي صار يبن لطهار نضحّي بالعمر لجلك
*٣*
كلنه يا ابن طــٰه عهد لجلك نظل نفداك
من اجلك نضحي الدم ولا نقبل تسيل ادماك
بارض الطفوف انصار إمامي و سيدي ويّاك
فلا نخلي العِده الانذال بأذه وبكربله لو جاك
نقدم اعمار يبن لطهار نضحّي بالعمر لجلك
*٤*
أمّن يالولي بينه كلها تساندك هاليوم
ياللي تطلب الاصلاح تضد كلها العِده امن الگوم
ننصرك بالحرب كلنه فلا نخلي الگلب مهموم
نفديه العمر لجلك على المبدأ نظل للدوم
لجل هالثار يبن لطهار نضحّي بالعمر لجلك
*٥*
يحسين الولي و مولاي نضحّي بكربله نقدّم
دمنه يرخص و لجلك نفخر من فدينه الدم
على هاي العِده نحارب رغم كل الأذه و الذم
عطاشه و ما يرجعنه بثورتك سيدي نهتم
نظل احرار يبن لطهار نضحّي بالعمر لجلك
*٦*
يحسين اشنقدّم ليك نحس لا ما وفينه احنه
نفخر من نقدّم أرواح فلا انعز سيدي دمنه
واجب نصرتك مولاي إمامي و سيد الجنّه
نرضه الخالق المعبود هدفنه بالحرب كلنه
الرضا الجبار يبن لطهار نضحّي بالعمر لجلك
*٧*
متغرنه ابد يحسين لا دنيا ولا كل مال
رغم كل الصعوبه نشوف من هاي البشر لانذال
بقينه و ثابتين الراي على هذا المبدأ و أحوال
كل واحد رضاك يريد تمنّه ايصير و بهالحال
ثبت بافكار يبن لطهار نضحّي بالعمر لجلك
مهيمن يوسف الموسوي
#قصائد_محرم_١٤٤٥هـ_٢٠٢٣م
قصيدة رقم ٣٧
دارمي ثلاث دگات كربلائية للعليلة ع
لحن ( يبن امي عالتربان عفتك رمية/حمزة الزغير)
الشاعر عقيل الكاظمي
هاجت هموم حسين رفرف دليله
چن يشعر بآهات بنته العليله
------------
ساير بدرب الموت ماشي بضعينه
لاچنّه روحه هناك بارض المدينه
ابگلب العليله ونين خاطب ونينه
ودمعتهه يشبه سيل دمعه اليسيله
------------
بمخاطب الوجدان صارت تكلمه
مشتاگه من اشفاك لعيوني بَسمه
وجهك حقيقه وصار باحلامي رَسمه
أحيه وعگب عيناك روحي قتيله
------------
أحيه وأشمّ انفاس ما بيهه عطرك
مَيته وحياتي بيوم أغفه على صدرك
ونْهاري أصبح ليل ومْتاني فجرك
وكل دنيتي بدنياك أحسبهه ليله
------------
تنصهر كل دنياي ليله بحياتك
وأتوذّر ولا شوف ساعة مماتك
ومن يعطش اروي الطيف من ذكرياتك
وعگبك ليالي الآه وَحْشه وطويله
-------------
هم ترد هم الگاك بِدْياري شمعه
هم تغفه عيني بليل ما بيهه دمعه
صار المرض بِحْشاي يا بويه يرعه
وهمومي يا مظلوم عگبك ثجيله
-------------
أسهر واحاچي الليل بلكن يطوّل
خافن ظلامه يروح اولا نورك ايهل
رحتوا ودليلي احتار يا لوعه يحمل
جرحك جرح عباس جرح العقيله
-------------
ولو أغفه اشوف جروح باحلامي تكبر
جسمك على التربان وجْهك تعفّر
وراسك على المياد والخيم تسعر
وضعنك أسير يروح فاگد كفيله
-------------
عقيل الكاظمي / بغداد
#قصائد_محرم_١٤٤٥هـ_٢٠٢٣م
قصيدة رقم ٣٦
تجليبة للعليلة ع
يا دنيا دريتي بحالتي اشبيها
حياتي بالحزن صارت لياليها
*١*
منّچ شاهدت بس القهر تدرين
خذيتي كل هَلَي حتّى ابويه حسين
و يخلّوني وحيده و تجري منّي العين
فرگتهم تأذّيني و ألم بيها
*٢*
أنه بنت الحسين المنذبح مظلوم
عليله وهم يتيمه وكل دليلي هموم
على حسين الامام الغادرينه الگوم
روحي محزنه ولجله مآسيها
*٣*
شفت منج يدنيا وشكثر لوعات
خلّيتي أنه بگلبي تره حسرات
واشدهن من ابويه عالوطيه مات
روحي بفرگتي دمعي يسلّيها
*٤*
چم لوعه شفت منّچ يدنيا هواي
عليمن گلبي من يصبر حرت بهاي
على حسين الابو لو عالگمر وفاي
عدوّه بكل غدر چفه مَگَطعيها
*٥*
عليمن حزني يصبح حايره بأمري
اهلي بكربله ماتو نفذ صبري
ما ظلّت وسيله بس دمع يسري
على طف كربله دمعاتي اجريها
*٦*
گلبي و روحي مهمومه يدنيايه
على وضعي و مصابي الصار ويّايه
صارت روحي يا دنياي شچايه
صعوبه بلا اهل وشلون اكضيها
*٧*
يا دنيا تفرقين الأهل وسفاه
على أهلي اون و ابجي بقهر و الآه
دليلي عالاهل صاير كثر ينعاه
مصيبة كربله روحي تأذّيها
مهيمن يوسف الموسوي
#قصائد_محرم_١٤٤٥هـ_٢٠٢٣م
قصيدة رقم ٣٤
موشح بحق العليلة ع
فاطمه اتسولف وتحچي احزانها
ياعليله اتشابه بنيرانها
*١*
طفله وازغيره تشاهد يا مصاب
بالمرض عافوها وبنار الغياب
گاعده ابيت الحزن تنظر الباب
بلكي واحد يحضر من اخوانها
*٢*
ماخذاها حسين وبنار الدمع
طفله ذابت بالحزن مثل الشمع
ايد تمسح دمعه ايد اعله الضلع
ضلت وتتخاطف بألوانها
*٣*
سولفت وي الهوه بدمعت ونين
انه اشوفك يالهوه مثلي حزين
شنهي ماسامع خبر عن الحسين
وكربله ماتعرف بعنوانها
*٤*
فاطمه واتسولف بدمع الهجر
وعايشه بنار المدامع والصبر
لشوكت يحسين ابقه انتظر
خبر وديلي يعزها وشانها
*٥*
خبر وديلي اذا شح الكلام
وخاف ماتگدر ألي ودي سلام
وي الهوه اليوصلني يابويه وانام
وباقيه ابنيتك بنفس امچانها
*٦*
گلبي لاچمني يبويه اعله البعد
خاف ما ترجع أليه وماترد
ابقه انوح وابچي بويه اعله الورد
وفاطمه الما تنتهي اشجانها
*٧*
خبر موتك وصل يا بويه ألي
بالعمر يحسين من بعدك شلي
انه اموت بموتتك يابو علي
ياصلاة الروح ياقرآنها
لاتنسون والدي وابني عباس من الرحمه والغفران
خادمكم رياض الرسل الجابري
#قصائد_محرم_١٤٤٥هـ_٢٠٢٣م
قصيدة رقم ٣٢
شوط كربلائي بحق فاطمة بنت الحسين "عليها السلام" العليلة .
يطارش لو رحـت للطـف اخذ ويـــاك حسراتي
وأمانة من تشوف حسين بدي بحــظنه دمعاتي
*
سولفــــله شــــسولفلك .. ونقـــله شكو كلمـه
ترى مال الله اذا متگول .. مـابـــريلــك الذمه
العليله گله بيـها الشوگ .. فاض وبعـد شيلمه
گله مدمــــع الـــطفله
من خدها شلع وصله
يجري بگد نهر دجـله
زمزم كصته عرگت مــن شاهد اعويناتي
*
يطارش ويه ابويه حسين .. بالطـف يــوم تتلاگه
اول كلمه گـله تــــــگول .. بتــــــكم حيل مشتاگه
يطارش والسوالف خيل .. داســت صدري بفراگه
لحد ماغــرزت بـيه
على هالحاله يوميه
اويـلـي والمغـــربيه
تعصر روحي من الشوگ حد متفيض مأساتي
*
يطارش گله الزغيره .. مـن گـد ونها يوميه
شيب راسها ابفرگاك .. وهـــيه هسه محنيه
ثق الشافها امن الناس .. الها ايصيح حجيه
گــالو كافــي لاتبچــين
يالعمرچ ثــــلاث سنين
هسه تگـول چن تسعين
الماملچومه من هالنــاس لامتني اعله وناتي
*
يـطارش والدي گــله .. بگلبــــي تشتعل جمــره
وگله البارحه بالطيف .. شـــفــتها كــربلا حمره
شفت واحد يسمونه .. الشمر چن يگطـع بنحره
وچنه مو حـــــلم واقع
ابوي اعله الارض واگع
يلوج بــروحه وينــازع
اصيح اسم الله بس الخيـل حـــالت دون كلماتي
*
يطارش گلهم الليله .. التمرني چنها ست اشهر
وحگ كاروك عبد الله .. احسـها بالــگلب تعصر
اون چن ماتلي معدل .. لخويه الاكبر امن اذكر
الينگط چان حنيه
كلش معـتني بيــه
مــن اذكر محاچيه
اعطش حيل يالطــارش وتيــبــس ليش لهاتي
*
يطارش من تروح هـناك .. اخذ وياك هالمطلب
گـــلهم فاطـــمه بتــــكم .. عليله وضاله تنحـب
اذا تتــأخـــرون اهـــــناك .. عاد الها تجي زينب
عمي يردها بچــفوفه
والبالخـدر موصــوفه
عن لاتمشي مچـتوفه
ويرد وياها ابوفاضــل ورباب وليله وَخواتي
حيدر تركي الكربلائي
#قصائد_محرم_١٤٤٥هـ_٢٠٢٣م
قصيدة رقم ٣٠
تجليبة نزلة شهر محرم
ما نِنـْساه إبـْن الزَهـْرَه ما نِنـْساه ثاني العـِتـْرَه
مـُحَرّم عادَت أيـّامه إو ليالـِيـّه
عظيمه نهضة المظلوم ثـَوْرِيــّه
*١*
عظيمه نهضة المظلوم وأصـْحابـَه
واضح منهج المعصوم وإكـْتابـَه
من واجـَه يزيد إو جاهـَد إرْهابــَه
قـِدْوَتـْنـَه أبو الأحرار يومِيــّه
*٢*
قـِدْوَتـْنـَه أبو الأحرار بالصـَعـْبات
نواجـِه كل يزيد إو نِرْفـَع الرايات
تِحـَمـّلـْنـَه المـُصايـِب دوم والويلات
حـُب إحـْسين يـِرْوينـَه إو عـَذِب مـَيــّه
*٣"
حـُب إحـْسين مكتوب إبـْضمايـِرْنـَه
ما عـِفـْناه دَرْبـَه إو بالخطر سـِرْنــَه
كل يوم اليـُمـُر نِحـْيي شعايـِرْنــَه
مشينه والضـُوَه اليـِهْدينـَه من ضـَيـّه
*٤"
مشينه والضـُوَه من الوجيه إحسين
نِصـَبـْناها المآتم ما نخاف البين
مَوَدّة عترة الهادي أصل بالدين
إمـُر بيها الأله إو واجـِبـَه هـِيـّه
*٥*
إمـُرْنـَه المصطفه نِتـْبـَعـْهـُم إولاده
سفينه للنجاة إحسين تِتـْهادَه
يـِشـْفـَع لـِلـْمـُحِب الله العلي رادَه
يفوز المايعوفـَه مِيـّه بالمِيـّه
*٦*
يفوز المايعوف إحسين ما يـِخـْسـَر
تـِشـْفـَعـْلـَه الزﭼيـّه إبـْساحة المحشر
يدخل للجنان إو ما يـُمـُرّه الشـَر
أرواح التِحِب إحسين مـَحـْمِيــّه
*٧*
أرواح التِحِب إحسين ما تـِنـْضام
يـِعـَلـّمـْها الجهاد إبْحومة الأسلام
ما تِنـْذَل تواجه سطوة الظـُلاّم
سيرة والد السجّاد مَرْوِيـــّه
*٨*
سيرة والد السجّاد قـِدْوَتـْنـَه
على درب العَدِل والخير جـِمـْعـَتـْنـَه
مَحْلاها إبعزاء إحسين لـَمـّتـْنـَه
تصير الدنيه من نِنـْخاه مـَضـْوِيــّه
*٩*
تصير الدنيه تزهي إبْنور أبو اليـِمّه
مـُحـَرّم نِسـْتِعِدْلــَه إو نِعْمَل إبـْهِمّه
خـِدّام الحـُسين إبـْخِدْمِتـَه نِسـْمَه
مواكب للولاء إنقيم مَزهـِيــّه
الشاعر المرحوم جابر الخزرجي النجفي
#قصائد_محرم_١٤٤٥هـ_٢٠٢٣م
قصيدة رقم ٢٨
عگيلي للخدمة الحسينية
هـِنـْيالـَه الخادِم بالـْمـَحـْشـَر
تِشـْفـَعـْلـَه الزهراء إو حيدر
*١*
تِشـْفـَعـْلـَه الزهره الواساها
تِرْعـــــاه إبـْنـَظـْرَة عيناها
يـِتـْهَنـّه إبـْيومَه إﺑـْﻣـَﻠـْﮔاها
يـِدْخــِل لِلـْجَنـّه إو ما يـِعـْثـَر
*٢*
يـِدْخــِل لِلـْجَنــــــّه إو يـِتـْنـَعـّم
كـُلْ خادِم لو أخـْلـَص يـِغـْنـَم
والخِدْمـَه إتـْداويــه إو بـَلـْسـَم
وإيـْواجـِه كل ملعون إو شـَر
*٣*
وإيـْواجـِه كل طاغي الخادِم
مـَيـْهِمـّه العِدْوانــــي الظالـِم
وإيـْعيش أيّامـَه إبْعِز غانـِم
يـِرْفـَع راياتـــَه إو يـِتـْصـَبّر
*٤*
يـِرْفـَع رايــــــــة ﺤـَﮓ بالـْخِدْمـَه
والـْخِدْمـَه إتـْصير أعـْظـَم نِعْمـَه
وإيـْفوز إو يـِتـْسـَجـّل إسـْمَه
وَيـّه الخِدّام إبـْكـُل مَحـْضـَر
*٥*
ويـّه الخِدّام أخـْدِم آني
خــادِم لـِحْسيني عِنـْواني
ثابـِت ما يـِنـْهَز إيماني
لـِلـْمَهْدي القايـــِم أتـْنـَطـّر
*٦*
وإلـْمَهْدي القايـِم أنـْتـَظـْرَه
أطـْلـُب ثــــار إولاد الزهره
جـِنـْدي إبْجيشـَه إو أمـْشي إبأمـْرَه
وإبـْخيــــــــــرالمَوعود أتـْعـَطـّر
*٧*
وإبـْخيــــــــــرالمَوعود أتـْباها
نـَبـْعَة حيدر وأحمد طاها
وإيـْزور إمـّه إو ما يـِنـْساها
واني الخادِم ويّاه أحـْضـَر
*٨*
واني الخادِم واضِح دَرْبي
لِلـْمَذبـــوح إعْيوني تِرْبي
وأهـْتِف بالـْمَحـْشـــــــــَر يارَبـّي
ما عِفـْت إحْسين آني الأزهـَر
*٩*
ما عِفـْت إحْسين إبْكـُل عُمْري
مِتـْحَضـّر أفـْديــــه إو يـِدْري
يـِحـْضـَرْني أدْري إبْيومي إو ﮔبري
يـِشـْفـَعـْلي الوالــي إو مايـِتـْعَذّر
الشاعر المرحوم جابر الخزرجي النجفي
#قصائد_محرم_١٤٤٥هـ_٢٠٢٣م
قصيدة رقم ٢٦
تجليبة للخدمة الحسينية
اول ما صرت خادم لبوالأكبر
وامي امن المهد نذرتني للمنبر
.......
اول ما صرت لحسين نذرتني
بحب هاي المجالس امي غذّتني
خادم منبر المحبوب سمّتني
وبهذا الإسم طول العمر افخر
........
افخر خادم لخدام ابوالعتره
كل عام ابمحرم الطم واقره
ميّمهني اليذمني لخاطر الزهره
كلشي يهون وتحمّل بعد اكثر
.......
اكثر من شماته لو يذبحوني
ما عوف المجالس ما يبعدوني
النواصب والشماته خل يسمعوني
اظل اهتف حُسين لگطعت المنحر
.......
المنحر فدوه لحسين ونزف دمه
الهوى لوما هواه ما يسوه اشتمّه
إنه المخلوق لجل حسين والخدمه
باقي عله العهد هيهات اتغيّر
.......
اتغيّر شكل بس حبك بگلبي
ثابت ما تغيّـر وفخـر بحبّي
يحسين وطريقك منهجي لربّي
الوذ بصايتك ما حير بالمحشر
........
بالمحشر افوز بخدمتك يحسين
تندلني وتجيني وماادورك وين
تلزم ايدي بيدك وربح الدارين
ادخل جنّتك مولاي ما اخسر
سيد زيد الفحام
#قصائد_محرم_١٤٤٥هـ_٢٠٢٣م
قصيدة رقم ٢٤
موشح للخدمة الحسينية
خِدْمـَة إحْسين البناها إوْتادْها
شاعر إو رادود صوت إنـْشادْها
*١*
شاعر إو رادود بالخدمه سُوَه
للجروح النازِفـَه مَرْهـَم دُوَه
شـَمـّوا إبْعُطـْر الدِمَه أطـْيَب هُوَه
والمجالس عامره إبْرُوّادْها
*٢*
والمجالس ما نِسَت عبد الرِضا
ما نِسَت ياسين بالخِدْمَه حِظـَه
ما نِسَت حمزه الزغيّر من ﮔـِضـَه
كل حياته يمدح إبـْأسـْيادْها
*٣*
كل حياته يمدح العتره وَطـَن
والشعر من عبد الحسين إبـْزَمَن
ﭼـان بيه الحـُر يعيش إو ما وَهَن
كل موالي دِنـْيـِتـَه ما رادْها
*٤*
كل موالي دِنـْيـِتـَه إبْحُب إلحُسين
هادي القـَصّاب سـَجّلـْها إبْحنين
كاظم المنظور غذاها سِنين
بالشعر غـَطـّاها مهدي إو زادها
*٥*
بالشعر واسـَوا علينه والبتول
أدّوا إﻠﺤﮓ العليهم للرسول
ما نسيناهُم ذكرهُم ما يزول
حلوه ﮔﻌديـّة وَطـَن لو عادْها
*٦*
حلوه ﮔﻌديـّة زمن حمزه الزِغـِير
بالتـُراث إنـْشِم عُطـُر أطـْيَب عبير
ﻧـُﺑـْﮔــَه نذكرها إو نـِرَدّدها ﭼــِثير
حتـّى نِرْضي فاطمه وأحـْفادْها
*٧*
حتـّى نِرْضي المنتظر والصالحين
دوم نِهْتِف يالثارات الحـُسين
ما نهاب الشر نزيح الظالمين
ما نعوف إم الحسن وإولادْها
*٨*
ما نعوف إم الحسن والعالِمـَه
نذكر الحوراء بـِت حامي الحِمـَه
من ﺑـُﮔـَت بالطف وحيده إو هايـِمـَه
رِسـْمَت إبسيل الخـَطـَر أمـْجادْها
الشاعر المرحوم جابر الخزرجي النجفي
#قصائد_محرم_١٤٤٥هـ_٢٠٢٣م
قصيدة رقم ٨٦
فائزي للعباس عليه السلام ، ثلاث دكات نجفية
عطشان عبدالله الطفل وينك يعباس
وتدري العطش ما ينحمل وينك يعباس
*١*
يصرخ طفل و بصرخته تفتت للچبود
وكلسا يغمض ناضره برويحته يجود
وشلون تحمل هالوضع ياصاحب الجود
مابين صرخاته الطفل يكطع للانفاس
*٢*
بالرايه انهض يالكمر بس جرده سيفك
واهجم على جيوش العده طوعهْ بكيفك
منّ الكطع ماي الشريعه دخذه حيفك
خلها تشاهد قوّتك هالكوم لارجاس
*٣*
واغضب عليهم و انتهض صوب النهر صال
شرّد عدوه و ما بقت كل ذيج لرجال
عباس سيفه اعله النهر جندل للابطال
سيطر على الماي الشهم يالكله نوماس
*٤*
عباس شال امن النهر هالماي بيده
عباس منه ما شرب لا ما يريده
يذكر اخوه و عيلته و جبدة عضيده
موقف صبح في كل زمن بيه الوفه انقاس
*٥*
والماي جابه ابجربته و رد للمخيم
ولن جيش اميه حاطته وعليه تلتم
جفين ناده افتدي والجود يسلم
بنبال ترمي و الحجر كل هاي حراس
*٦*
ولن نبله ثقبت جربته واطشر الماي
گطعوا يساره و يمنته وبكل غدر هاي
أدركني يا خويه الولي يحسين مولاي
متكطّعه اجفوفي تره و عامود بالراس
*٧*
وحسين صال وصولته صوب الشريعه
شاهد اخوه وحالته جفوفه كطيعه
قبّل جفوفه وهامته شبل الوديعه
ناده نكسر ظهري يخي وبطيحت الطاس
*٨*
ردّ الحُسين الخيمته مكسور ظهره
لا ما گدر يخفي الحزن حِزنه يظهره
و يجري الدمع واعلى الكمر بي صدره حسره
وناده تشتت عسكري بعدك ينبراس
الشاعر علي أبو شبع
#قصائد_محرم_١٤٤٥هـ_٢٠٢٣م
قصيدة رقم ٨٤
شوط كربلائي للعباس عليه السلام
زينب صاحت العباس ماتلحك تحامينه
حركو خيمة السجاد من انذبح والينه
*١*
علي السجاد بالخيمه عليه الخيمه حركوهه
انخامن وانه الوحدي ويتامه كبالي سلبوهه
اصيحن وين المروه تعالو ابسرعه طفوهه
يخويه شلون اطفيهه واديه ابرهبه جتفوهه
ولااكدر احاميهم..الجمر جلب برجليهم
وينك ياذخر عدنان بس نسوان تدرينه
*٢*
حمامه واحترك عشهه تطفي بياجنح منهن
يتامه حسين بالخيمه واحس النار تاكلهن
لاكدرن يصيحن صوت خاف الناس تسمعهن
صنطه والبجي بسكوت مايطلع صده الونهن
اتاني لو اصبرهن..بنات وماطلع حسهن
تعال سكينه تنشدني واريدنك تمر بينه
*٣*
شطفي النار من هدمي اطفي النار بالخيمه
لو اركض وره الهجو يتامه ونحرو الهيمه
يبو فاضل تعال الحك سبونه وراحت القيمه
تعال وشوف بعيونك يتيمه تحظن ايتيمه
بس خيولهم يمنه..محد يكدر يلمنه
العوايل ترست الصحره بعد فكدك يغالينه
*٤*
كمت اركض عله السجاد بيه خيل العده حافت
ذاك المنظر المشؤم روحي اعله الترب طافت
تركض طفله مذعوره عثرت بالهوه وطاحت
عطشانه وتصيح الماي غير السطره ماشافت
سلبوهن تراجيها..تعال الخاطري احميها
رقيه تصيح ياويلي لحك عمي اعلينه
*٥*
مابين الخيم والنار امشي وعيني تربيلك
محتاجه تجيني ابساع حته اوكف اواحجيلك
وين امشي وادير العين ذكره هناك اخليلك
وينك ياعجيد الكوم سكنه اتريد تشكيلك
بكينه بلاحمه كلنه..جاياهو اليوصلنه
من نمشي ونرد اردود ياهو بجفه يحدينه
علي الحاج الصبيحاوي
#قصائد_محرم_١٤٤٥هـ_٢٠٢٣م
قصيدة رقم ٨٢
ميمر // شجاعة ابا الفضل العباس عليه السلام
زينب اجت للعباس. جابتله جربه ورايه
..........
يابالفضل جيتك يروحي ورجواي
اطلب طلب وعرف بطبعك وفاي
اطفال اخوك حسين محتاجه الماي
شده وصعب حلهه يكون إلا عله ايدك هايه
........
گاللهه امري ادلّلي ودگ صدره
ألماي اجيبه لخيمتج والزهره
ياويله واليمنعني اكسر ظهره
امن العلگمي املي الجود. ورَوي الطفل من مايه
.......
گالتله گدها والنعم يا عباس
انت الكفيل وبالشدد رفعة راس
ساقي العطاشة سقينه يابوالنوماس
راية علي ترفرف دوم بچفوفك امعلّايه
........
سل سيفه عباس وهجم عالعدوان
شردت زلمهه وخيلهه امن الميدان
شي ماتت وشي نامت عله التربان
طب للنهر يملي الجود دگ عالشريعه الثايه
..........
ماي النهر بچفوفه لمن شاله
عطشان وجه حسين يتراواله
ماشرب رد بالجود يروي اطفاله
مو غايته يشرب ماي. يرضي الامام الغايه
.........
رد للخيم عباس والماي وياه
لعبدالله راح الضامي شاله وروّاه
وروّه اليتامه العطشت بچف يمناه
وخته العقيله تحيّيـه ما يخلف الهه حچايه
.........
گال ومثل ما گال سوه الكفّال
بالجربه جاب الماي روّه الاطفال
ذل آل امية عله النهر لمن صال
روس وجثث سوه الجيش عالمشرعه مدمّايه
سيد زيد الفحام
#قصائد_محرم_١٤٤٥هـ_٢٠٢٣م
قصيدة رقم ٨٠
شوط كربلائي للعباس عليه السلام
زيـنـب تـنـتخي بـعباس وتحشـم يواليهـا
مـن غـيـرك يجـيب المـاي للعايله ويرويهـا
گـوم ارويـنه يـاعــبـاس زيـنـب اخته وتحشـمه
اخـويــه والـنـعــم مـنـك اسـمع زينب اتـكـلـمـه
نريد الماي خـويه الماي والاطــــفــال مـلــتـمـه
شاف المـنـظـر العـبـاس المنـظـر قاسي ويألـمه
يـرجـف والعـزم باسه
رافـع لـلـنـجــم راسـه
فايض غيره بحساسه
شال الـرايه شال الجـود لـلـمـشـرعـه وصد ليهـا
صعـــدت غـيـرة العـبـاس وشال السـيــف والرايه
وصاح الـرگـبـه يـازيـنب لـجـلـچ يـخـتـي وفــايـه
شنهي الزلم شنهي الخيل شنهي العـلگمي ومايــه
لـو ردتـي الـنــهـــر والله اجـيــب الـنـهــر ويـايــه
شال السيف بيده وصال
ونــاده والـدمـع هـمــال
واجيب الماي للاطـفــال
واسگي اطفالچ بجـودي وياهـو الغـيـري يسگيها
و تـوكــل وشــال السـيـف راح وغــيـرتـه بـصدره
گـاصـــــد للـنـهـر عـبـاس واخـته بـعـيـنها اتـنظره
بـالطـف صـبـره ضل آيات ومـا واحـد مـثـل صبـره
اصـبـح للـوفـه مـيــــــزان ومـيزان الـوفه اشكبـره
واعـد اخـتـه يـرعاها
ويبقه خــادم ويــاهـا
شرادت زينب انطنها
من يـنـطي وعــــد عـباس وعـود بشرف يـنـطـيها
راح ويـنـظـر الـزيـنـب وزيـنب تنظـر اتـشوفه
وقـصة زينب وعـبـاس بـيـن الـناس معـروفـه
قـصة كـافـل ومكـفــول قـصة عـيـنه وچـفـوفه
بيها اسرار لكن شوف ما محجـوبه مكـشـوفه
اسرار ونعــم اسرار
بيها اخيام بيها ونار
بس هذا الزمن دوار
كـل اسرارهـم بالـطـف غـيـر الـوفـه ما بـيـهـا
وصل يـم الـنهــرعـبــــاس وثـبـت رايـتـه الخـضره
وشال بأيــده چـف المــاي وگلبه من العطش جمره
بدال الماي صوره ايشوف حـايـر و انـذهـل بـأمــره
شلون امنين اجــت بالماي صورة فـاطـمـه الـزهـره
ما اشــرب وابــرد احشاي
ابن حيـدر علي الــوفـــاي
شاف الصوره وسط الماي
ذب الماي حـس خـجـلان وگـام الـروحـه يـنـهـيها
بـروحـه يـنـهـي ويـفـكـر بـالاطــفــال وسكــيــنــه
ويـنـه اللي مثـل عـبـاس بـكـل هـاي الـزلـم ويـنه
وانـدارت الگوم اعـلـيـه وصابـوا بالسهـم عـيـنه
وجاد بـروحه لجل الدين وضحه وانـطـه چـفـيـنه
العسكـر بعــد ميشوفه
ولازم جوده ميعـوفــه
ولمن طاحـت أچـفـوفه
ضلن عالـنـهــر عـنـوان لهـل الـوفـه امـخــلـيـهـا
الشاعر رياض الرسل الجابري
#قصائد_محرم_١٤٤٥هـ_٢٠٢٣م
قصيدة رقم ٧٨
دارمي ثلاث دكات كربلائية للعباس عليه السلام
يم البنين اوفيت برض الحرايب
وبكربله ضحّيت لأبن الاطايب
*١*
برض الطفوف و حيل كل تضحياتي
لجل الولي لحسين انطي حياتي
افدي العمر و بزود لجله مماتي
ضد الاعادي هاي كل الكتايب
*٢*
بدمي و حياتي اليوم لابن الزجيّه
حتى فلا ايأذيه جيش آل اميه
باقي بقراري دوم حدّ المنيه
رغم الاذه اللي صار وشگد مصايب
*٣*
وصّيتي بيّه كون أنصر إمامي
بطف كربله ويّاه كل اهتمامي
طبقته هذا اليوم يشهد كلامي
ضحّيت إله لسنين وبهالنوايب
*٤*
لجل الولي المعصوم فاديله دمّي
انصر ثورته كون كل هــٰذا همي
هذا لجل لإصلاح وبكثره عزمي
يُمّه بقضيته دوم لمّن أحارب
*٥*
ابنچ تره العباس ما عاف الحسين
بوكت الشدد ويّاه انصر تره الدين
ارخص اله تدرين افديله لسنين
عالحگ أنه هاليوم حين الأطالب
*٦*
عمري فديته اليوم يَمّ الشريعه
طايح أنه مصيوب چفوفي گطيعه
عنّ الخيم هالجيش صارت منيعه
لا ما وصلت و صار هالماي غايب
*٧*
بس عندي آني اقصور بيها افكّر
لا ما جبت هالماي لطفال او خدّر
چفي انگطع وشلون وضعي تحيّر
قوتي عدوّي حيف من يمي سالب
*٨*
بعيني صفت لسهام وشلون اشاهد
صوّبني حيف اعداي و بضربه حاقد
لا چف بقه و مطروح عالتربه راقد
جتني المنيّه هناه و بهالمصاعب
*٩*
ظلي بفخر للدوم عاللي جره وصار
ابنج فده لسنين من أجل الاطهار
حارب لاعادي بزود كل هاي الاشرار
مني الجيوش و شاف بس العجايب
*١٠*
رغم الذي سوّيت لجل الديانه
بسيفي اضده الجيش اهل الخيانه
نصرة إمامي حسين عندي أمانه
ارضه الجلاله كون هو آني راغب
مهيمن يوسف الموسوي
#قصائد_محرم_١٤٤٥هـ_٢٠٢٣م
قصيدة رقم ٧٦
شوط كربلائي للعباس عليه السلام
عبّاس الگمر وينه تناشد زينب الحرّه
ما رد للخيم النه شنهو اللي جره بأمره
*١*
زينب نادت اعلى حسين تگلّه كافلي وينه
يخويه شحاله طمّنّي اشو ما رد رجع لينه
تأخّر يالولي عنّه طالت غيبته اعلينه
يحس گلبي بخطر صاير
الگمر بأرض الحرب حاير
يضدّه هالعده الجاير
گلي بالگمر و شبيه دليلي خويه شيصبره
*٢*
يخويه و القهر عندي كثر تدري يبو الاكبر
على الكافل ابو الغيره گلبي الحالته يگدر
چنّه بالخطر اصبح تضده هالاعادي الشر
جاوبني يخويه الصار
تراودني كثر لفكار
من هذا العده لشرار
معروف بكره و احقاد نذاله عدهم او غدره
*٣*
على زينب يرد لحسين حزين و منكسر من گال
جاوب و بگلب مقهور ودمعه عالوجن همّال
اخويه عالنهر وحده صعب يختي صفه بهالحال
اشاهد هالعده وياه
جيوش بكثره حين الجاه
بقه يمه فلا تركاه
الله ينصره ارجو يجينه عالعده نصره
*٤*
يا زينب وشوف الجيش يحوطه بكل جهه و كل صوب
سهام و صابته بكثره من هاي البشر مصيوب
وشاهد ضدّته و تغدر اخونه وما بقه هالنوب
اشوفن غدرته العدوان
وحده باقي بالميدان
بأذه منهم تعب عطشان
لاكن ما يگدرونه رغم جيش العده كثره
*٥*
بس هوّ العده معروف يغدر بالحرب طبعه
خيانه بدمّه بس تسري باقي مستمر وضعه
كلام الله و نبينه دوم يخالف هو ميسمعه
اشوفن يمنته العباس
ضربها بغدرته الارجاس
تغدر بس صفت هالناس
على الباطل يأيده هواي باقي بالأذه و شرّه
*٦*
يختي شحچي عنّه شلون مو بس رايحه يمناه
عدوّه بغدره متعني و گطع من الگمر يسراه
و سهام تكاثرت ضدّه و سيوف الضربته بأعداه
وگع مثل الجبل عالگاع
فلا مرمي تره و بساع
شجاع و بالحرايب ذاع
وگع من الغدر هالجيش باقي بالگلب صبره
*٧*
العقيله بكل حزن ونّت على الكافل صفت تنحب
على وضع الكفيل هواي حزينه و الدمع يسچب
يا حاله الصفت بيها تأذّت و بكثر زينب
اويلي امن الدهر غدار
و عدوّي بكربله من جار
يضد آل النبي الاطهار
بوضع اصعب ابو فاضل علي دمعي سِره بعَبره
*٨*
على عباس مقهوره العقيله كل گلبها جروح
من عرفت صفه ابّحده لجله بس قهر بالروح
و من فوگ الوطيه طاح جريح و عالأرض مطروح
يخويه نادت و بونّه
يريت او موتي اتمنّه
ولا موتك اشوفنّه
يبو الغيره يبن حيدر عليك و روحي منقهره
*٩*
يريت و ما رحت للماي تبقى يالگمر ويّاي
مصيبة كربله اشبيها يخويه امنين اجتنه هاي
على جرف النهر مقتول يالگاصد تريد الماي
بعدني بعازتك تدري
يخويه و حايره بأمري
على مصابك نفذ صبري
حزينه بيه و قهر بالروح زينب باقيه بحسره
*١٠
لاكن هالقدر لازم تروح و منقتل مرمي
مگطوع الجفوف و صار جسد فوگ الثرى مدمي
وبگلبي مصابك حيل يخويه و زاد كل همّي
أمر ربنه الصمد بيها
فلا نعارض تره اعليها
بحكمه و العدل ليها
فده تضحي لجل دينك ويظل جسمك على الغبره
مهيمن يوسف الموسوي
/channel/mys_313
عندك مجال تحضر قصائد محرم لان هاي
القناة لنشر قصائد محرم كل ليلة مع اللحن مع ملف pdf لطباعة القصيدة مباشرة
و كل القصائد الحان باسم الكربلائي الرائعة
من كلمات الشاعر مهيمن الموسوي
القصائد كاملة مال كل ليلة
مقدمة و أساسية و نزلة
و عدة قصائد
#قصائد_محرم_١٤٤٥هـ_٢٠٢٣م
قصيدة رقم ٣٧
فائزي ثلاث دگات نجفية للعليلة ع
لحن ( يلي رحت للمشرعة عود علينه/وطن الرادود)
الشاعر عقيل الكاظمي
ريّض يحادي بالضعن ريض ابممشاك
يالخذت ويّاك الاهل إخذ الگلب هاك
--------------
يالحادي مكتوبي كتبته بدمعة العين
وانشد ليا ديره گصَد ركب الميامين
خبّرني يا حادي الضعن عن حال الحسين
وحالة اعياله البضعينه سارت اوياك
-------------
آنه العليله ومدمعي عل خدّ مسجوم
وضلعي مثل ضلع ام ابويه ابحزني مهشوم
وحيلي على افراگ الأهل يالحادي مهدوم
خبّرني ماشي بهل ضعن لا وين مسراك
--------------
تدريني طفله وأهلي عا فوني عليله
ظليت اونْ ولفگدهم ونْتي ثجيله
شمس الحياة وگمر عمري والعقيله
ونجوم سعدي الما مثلهم تحوي دنياك
--------------
يالحادي خبّر والدي وإشكيله حالي
اوگله العليله تنتحب والدمع هالي
اتگلك يبويه النوح من بعدك حِلالي
وحسراتي تمشي ويّه ظلك تتبَع اخطاك
----------------
يحسين گلبي ناح واعليكم تحسّر
شأنسه ودليلي بجمرة الفرگه توجّر
وكلسا يلوح اگبال عيني وجه الاكبر
شبه النبي گرّة اعيـوني ونظر عيناك
---------------
وشأنسه وبعيني الدمع ناصب مآتم
ودوم ايتراوالي خيال الشهم جاسم
اولو جَن عليه الليل أذكُر كَمر هاشم
واتحسّر ويا حسرتي اعلى اضواه وضواك
--------------
بويه وذبَل عودي الذي فاگد ربيعك
بامرك اظل وحدي، يبويه وكون اطيعك
لاچن اشلون اتصبّر امن اذكر رضيعك
شلون انسه عبد الله الطفل وشلون أنساك
----------------
حگي امن انوحن وانتحب ويزيد همّـي
ومنكم ولا واحد بگـه يحسين يمّـي
وآنه الچنت أغفه، بحنان وحِجر امّي
سهّرني دمع افراگهه وآهات فرگاك
----------------
وَنّ اعلى ونّتهه وبچه وصاح الطرمّاح
هيهات يرجع والدچ راح الأبو راح
نوحي اعلى فگده اشما تلاله اعليچ مصباح
اوصيحي لظل طول العمر يحسين أنعاك
--------------
عقيل الكاظمي / بغداد
#قصائد_محرم_١٤٤٥هـ_٢٠٢٣م
قصيدة رقم ٣٥
تجليبة للعليله ع
يالزهره الزجيه هواي أحزاني
غياب اهلي و بُعدهم حيل أذّاني
*١*
يا بنت النبي يا فاطمه الزهره
حالي و حزني بيّه هواي وشكبره
على اهلي و بعدهم بالگلب حسره
وفراگ الأبو حزّنانه سوّاني
*٢*
يالزهره يتيمه و بزغر عمري
لابويه و الأهل عندي شكثر صبري
عليهم ليلي و نهاري الدمع يسري
فرگتهم عليها النوح خلّاني
*٣*
من شال الضعن كل روحي وياهم
عافوني وصعب يالزهره فرگاهم
مهمومه وصرت مقهوره بجفاهم
اذوني بكثر يا حيف عدواني
*٤*
أذاني و خذه اهلي و يفجعوني
صرت آنه بحزن لمّن يعوفوني
طفله و هم يتيمه من يخلّوني
فلا يمي ابويه حتى خوّاني
*٥*
يا ام الحسن صعبه عليّه هواي
اهلي بكربله ماتو تضدها اعداي
وتمنيت الابو من كربله عناي
لاچن ينقتل رايح فلا جاني
*٦*
من غاب الابو يالزهره كل حالي
متلوعه و حزن كثره بدلّالي
ظل دار الأهل يا فاطمه خالي
فرگتهم وبعدهم حيل بچّاني
*٧*
مو وكت اليتم طفله و عمر اعوام
من جور البشر كله و عده الظلام
صارت روحي بالهم باقيه و آلام
على اهلي و ابويه محزنه آني
مهيمن يوسف الموسوي
#قصائد_محرم_١٤٤٥هـ_٢٠٢٣م
قصيدة رقم ٣٣
موشح بحق العليلة ع
وَدّعـَتـْهـُم وإعـْتِلـَتـْها إهـْمومـْها
وإلـْعـَليلـَه بـِالـْحـِزِن مـِن يومـَها
*١"
وإلـْعـَليلـَه بـِالـْحـِزِن يوم إلـْوَداع
فارِﮔـَتـْهـُم وإلـْعـُمـُر أصـْبَح ضـَياع
ما صـُفـَت دِنـْيـَتـْها وَيّاها إبـْخـِداع
كـُثـْرَت إبـْغيبـَة أبوها إغـْيومـْها
*٢"
كـُثـْرَت إبـْسـَفـْرَة أبوها أحـْزانـْها
وإلـْوِنين إلـْوالـِهـَه عـِنـْوانـْها
تـِنـْتـُظـُر واحـِد يـِجي إمـْن أخـْوانـْها
تِعـْتِني لـِلـْغاضِرِيّه إو حومـْها
*٣*
يـِعـْتِني بيها أخوها إلـْكـَرْبـَلـَه
تـُنـْظـُر إحـْسين إو يـِفارِﮔـْها إلـْبـَلـَه
صـَعـْبـَه لكن تـِعـْتِقِدْها إلـْمـَسـْألـَه
مـَحـّد إيـْرِد لـِلـْغـَريبـَه دومـْها
*٤*
مـَحـّد إيـْرِد لـِلـْغـَريبـَه إبـْدارْها
موحِشـَه إلـْدار إبـْرَحيل أطـْهارْها
نازِفـَه بـِنـْت إلـْحـُسين أكـْدارْها
وَيـّه إلأعـْرابي أرْسِلـَتـْها إعـْلومـْها
*٥*
وَيـّه إلأعـْرابي رِسالـَه إرْسِلـَت
وإبْدموع إلـْعين هـِيـّه إتـْبـَلـّلـَت
سـَلـّمـَت بيه إعـْلى أهـَلـْها وإعـْتِلـَت
حـَسـْرَة إلـْطـَيـْبـَه إو جـِفاها نومـْها
*٦*
حـَسـْرَة إلـْطـَيـْبـَه الـْعـَليلـَه ما هِدَت
كـُل مـُصايـِبـْها إوْيـَه سـَفـْرَتـْهـُم بـِدَت
دِنـْيـَة إلـْشـَر حارُبـَتـْها وإعـْتِدَت
وإبـْتِدَه بـِالـْهـَم زمـَنـْها إيـْسومـْها
الشاعر المرحوم جابر الخزرجي النجفي
#قصائد_محرم_١٤٤٥هـ_٢٠٢٣م
قصيدة رقم ٣١
شوط كربلائي للخدمة الحسينية
أعقد مجلس العترة وگلبي ابعبرته اليقره
أَعلم هالنسل يحضر روحي اتصير اله المنبر
*
أعقد مجلس ابروحي وبيه يحضر نبي الرحمة
والزهرة وابو الحسنين اوياهم تعتني اليمة
أذكر بيه نسل مهضوم وهمّه شجرة العصمة
دمعي ينزل اعليه روج ياهو الأذكر آنه اسمه
من اذكر إمام انسم
وآنه جاعد ابمأتم
أشعر دمعي اله بلسَم
أكتم صعبة ما أگدر روحي اتصير اله المنبر
****
دمعي ومدمعك واحد ياللي تبچي عالمظلوم
واجب هالبچي لاجله من عدنه المصابه ايدوم
ذكر اولاده واجبنه گضه هذا النسل بسموم
كلهم طاحوا ابهالخط معصوم ابأثر معصوم
خلّيه هالحزن ألهم
لن ماتوا غدر كلهم
ابمدمعنه نغسّلهم
ياهو اللي زمانه افتر روحي اتصير اله المنبر
**
اشفافي اتّمتم ابچلمات والعبرة تجاوبهه
لو غرگانة بالأفراح جرحهم حزن يگلبهه
واحس كل مفصل ابجسمي هالتعزيّة ينصبهه
أشعر آنه ندّ الهم المجالس لنّي ماطبهه
أشعر آنه واليته
أبو القاسم واهل بيته
المجلس لو تعنّيته
لمّن أذكر الخدّر روحي اتصير اله المنبر
****
يوم الطف يظل ميزان بيه يتوزّن المسلم
لو ويّه رسول الله لو بس بالأسم مسلم
لن الينحب اعله ابنه تعزيّه أله ايقدّم
وآنه ابهالعمر أبدي كل مجلس أله واختم
من اتفوّه ابچلمات
روحي اتجاوب ابشهگات
ويّاهن أون ونّات
وحسرة ابداخلي تكبر روحي تصير اله المنبر
****
شيعي واجبي للموت مابطّل مجالسهم
وعيني مو بواچي وبس بيهه واجب احرسهم
نبعة من نبي الرحمة بين اضلوعي اغرسهم
وناس اللي تضد الآل ابهالأخلاص اخرّسهم
ألنه هالعزا مكسب
يسجلون الذي ينحب
أروح وجمرتي تلهب
وابدلاّلي تتوجر روحي تصير اله المنبر
الشاعر قاسم المندلاوي
#قصائد_محرم_١٤٤٥هـ_٢٠٢٣م
قصيدة رقم ٢٩
تجليبة للخدمة الحسينية
هِنـْيالـَه إلـْتِحِسـْبـَه خادِم إلـْزهـْرَه
يـِنال إلـْخير مـِنـْها إبـْساعـَة إلـْحـَسـْرَه
*١*
يـِنال إلـْخير دِنـْيـَه إو آخِرَه إلـْخادِم
إذا تـِرْضـَه عليه إلـْشافِعـَه فاطـِم
يـِسـَجـّل إسـْمـَه راعي إلـْغانِمـَه إلـْقايـِم
وَجيه إيـْصير بـِحـْسين إو يـِشِع بـَدْرَه
*٢*
وَجيه إيـْصير بـِحْسين إلـْخِدَم بـِحـْساس
وَجـَه الله يـِريد إو ما يـِهِمـّه إلـْناس
ما يـِنـْذَل عزيز إو ما يـِدَﻧـّﮓ راس
ما يـِنـْساه أبو إلـْسـَجـّاد كـُل عـُمـْرَه
*٣"
ما يـِنـْساه أبو إلـْسـَجـّاد مـِن إيـْموت
وإيـْلـَقـْنـَه إلـْشـَهادَه وإبـْجـِلـّي إلـْصوت
وإبـْلـِحْدَه إلـْضـُوَه مـِن إلأمام إيـْفوت
روضـَه إمـْن إلـْجـِنان الواسِعـَه ﮔـَبـْرَه
*٤*
روضـَه إمـْن إلـْجـِنان إلـْخادِم إتـْرابـَه
لأنـّه ما نِسـَه إلـْمَذبوح وإمـْصابـَه
أنـْصار إلـْحـُسين إبـْجـَنـّتـَه أصـْحابـَه
يـِزول إو مايـِظـَل بالآخِرَه عـُسـْرَه
*٥*
تِزول إهـْموم خادِم عـِتـْرَة إلـْمـُخـْتار
يـِوَقـّعـْلـَه إلـْجـَواز إبـْمـَحـْشـَرَه إلـْكـَرّار
يـِدْخِل لـِلـْجـِنان إوْياهـُم إلأطـْهار
وإحـْسين إلـْيـِخِدْمـَه غانِم إيـْبـَشـْرَه
*٦*
وإحـْسين إلـْيـِخِدْمـَه ما يـِعوفـَه إهـْناك
بـِالـْمـَحـْشـَر تِحيطـَه إبـْحيرِتـَه إلأمـْلاك
وإبـْلـَهْفـَه يـِناديك إلـْمـُوالي إوْياك
يـَحـْسين إو حـَنانـَك دوم يـِنـْتـَظـْرَه
*٧*
يـَحـْسين إلـْيـِخِدْمـَك ما يـُمـُرّه ضيم
لأنـّه إﺑـْﻌـِﺷـْﮔـَك إبـْكـُل إلـْزمان إيـْهيم
مـَجالِس لـِلـْعـَزاء إعـْليك دوم إيـْقيم
بـَسْ يـَمـّك يـِطيب إو يـِنـْشِرِح صـَدْرَه
الشاعر المرحوم جابر الخزرجي النجفي
#قصائد_محرم_١٤٤٥هـ_٢٠٢٣م
قصيدة رقم ٢٧
عگيلي للخدمة الحسينية
يوم المحشر لا تنساني
يوم المحشر لا تنساني
*١*
يحسين انتة تحس بلعاشك
والحب اصلة لا ميفارك
علفطرة وشوا صار مسابك
ول دربك فاتح بيباني
يوم المحشر لا تنساني
*٢*
ذاك العاشك حبة اليكبر
كلنة بهل حب خل نتصور
حسين اختارك حتة تغير
وبلسان الحق شد اللساني
يوم المحشر لا تنساني
*٣*
بدايت حبنة من الموكب
منبر بي ومنة اتهذب
وجليت الروح بذاك الحب
وكون هناكة تتلكاني
يوم المحشر لا تنساني
*٤*
كلمن بينة فاتح بيتة
وكل كاصد لسمك حبيتة
اتبارك بي وتلكيتة
ومن يرحل تكثر احزاني
يوم المحشر لا تنساني
*٥*
كلمن يبذل صاح مقصر
مثل لدين وذاك المنحر
ربة اختارة وقدملة اكثر
ترخصلة اعيالي وامؤالي
يوم المحشر لا تنساني
*٦*
نشكر ربنة اعلة النعمة
يمتة لمهدي يجلي لظلمة
منهاج الحق هوة يكملة
وي جند حسين يسجلني
يوم المحشر لا تنساني
الشاعر حسين العبدلي
#قصائد_محرم_١٤٤٥هـ_٢٠٢٣م
قصيدة رقم ٢٥
شوط كربلائي للخدمة الحسينية
لسان حال مولاي سيد الشهداء وهو يندب مصيبته للخدام
بده شهر الذبح يا ناس شهر البي متت عطشان
شهر البي حوافـر خـيل سحگـتـني على التربان
*١*
أنه المضلوم اريد اليوم أسولف غـربـتي بنحري
شسولف والجروح اهواي أبـديـها بـكـسـر ظـهـري
وچبيره اعليه يم شمات بـانـت خلتي وكـسـري
حيرنــي الگــمـر عبــاس
چان ازماطــي والنوماس
خلانــي أدنــگ الـــراس
ورجعت لزينب بـيا حال حسين وشافته حيران
*٢*
حيران وغــريب وگــوم استـوحدوني چي وحدي
و آخ امن اللي راح ايصير وكسرة خاطر التـبـدي
ورحت يم زينب بحسرات وشافت دمعــتي بخدي
وتــقــره بـالــدمع مـذبـــوح
وخيل أعـلي تجي وتـــروح
وتــنـظرلي بعــره مطــروح
بس بجسمي مـا مش راس و موزعـيني بـالـميدان
*٣*
بالميدان اشـوف النار وجــت وشـيـطفيـهـا
ورعب نسوه وركض اطفال تـنخه جـسوم اهاليهـا
وزيــنب بـيـن هذا وذاك كـلهـا اتحيرت بـيهـا
وأســمـع صـوت بـويــه حـسـيـن
حـــرگــوا گــلـبـي عــنــي ويـــن
وسـطروني إعـلـه هــاي الـعـيـن
وخذو مني التراچي ليش يكفي حرﮔـوا الصـيوان
*٤*
بالصيوان صار الصار وبـده طـف الـسبي وضيـمـه
اول تـالي زيـنب ذيــچ ركـض طلعت من الخيمه
وأشوف أتطشرن عالگاع حرمنه طرن الهيمه
الدللهن عـلــــي الـــكـــرار
مــو ســهــلــه يـسـحــگن نــار
يــاويــلـــي وكـــتــهــــا أنـــدار
المهيوبه قبل يا حيف خدرها كان ياما كان
*٥*
ياما كـان خـدر الله نّــزل بــالــشــرف آيــه
تالي تـنچـتـف بـحـبال وأخـوها صاحـب الرايه
أحچايه چانت وتنهاب وطاحت هـاي الحچايه
أشــوف اخـتي تــدور أدخـيـل
والطـف كلشي بــيـــه ايـعـيـل
ﭼــبـيـره مــو حـمـل هـالـحيـل
ترد السوط بـس أشلون تـرد حچايه العدوان
*٦*
عـدوان وعـلّي صوبـين وصعـبه اعـليكم أحچيها
صعد صدري الشمر يا ناس وأوداجي گطع بيها
ومشه صوب العـقيله وگال جروح حسين شوفيها
تــصـيـح ومـا يـفــيــد اصـيــاح
وأخـوهــا اتـشوفه فوگ ارمـاح
ويـــسـبــيــهــــا أجــه الــذبــاح
وصاحو جيبو أخت حسين خنلحگ على الديوان
*٧*
ديــوان وخـرايــب راح تــطبـهـن غـصبـاً وگــوه
ونماشيها لچن بس روس وشايلنه اللـي ما يسوه
ويعــايــن للـخـدر بالعـيـن بلايا رحمه ومــروه
للــشــام ادخــلــت بــالـعــيــد
ودخـلــوهــا لـقـصـر ايـزيـــد
الـگـادوهــا خــدم واعــبـيــد
وصدت للطشـت وتـگول شــوفــوا التالي يالخوان
الشاعر عزت السماوي
#قصائد_محرم_١٤٤٥هـ_٢٠٢٣م
قصيدة رقم ٢٣
موشح لشهر محرم
هـَل مـُحـَرّم ياعلي والهـَم ﺛجيل
والألم ﭼـَتــّال ياحامي الدخيل
*١*
والألم ﭼـَتــّال ﻣﻠﭼـومه الجروح
غايب الأحسان والشـَر ما يروح
والموالي من عـُظـُم هـَمـّه ينوح
يحكم الدنيه غـِدَه إيـْزيد الرذيل
*٢*
يحكم إبْدنيانه إولاد الحرام
وإنتشر بالكون غـَطـّانه الظلام
ضاع ما ﻧﻠﮔـاه فارﮔنه السلام
والفساد إبكـُل كتر مالـَه مثيل
*٣*
والفساد إبكـُل كتر عـَم البلاد
وإبـْتِلـَه إبـْكـُثر الحراميـّه العباد
عافوا إحسين إو مساره والجهاد
آذوا المرسول والرب الجليل
*٤*
آذوا الزهراء إم الصالحين
إدّعـَوْا بالزيف حُبْهُم للحُسين
ويل أعداء الذبيح الظالمين
آل إميـّه إبكـُل زمن حظهم يميل
*٥*
آل إميـّه إبكـُل زمن يـِسـْبونها
زينب الحـُرّه إو تفيض إعـْيونها
صابره إو الله يكون إبـْعونها
تنتظر راعي الحِمَه اليشفي الغليل
*٦*
تنتظـُر زينب ظهور المـُنـْتـَظـَر
يرفع السيف إو يزيله للخـَطـَر
يطلب الثارات والينه الأغـَر
تنتهي الأحزان وإيطيب العليل
*٧*
تنتهي الأحزان وإيموت الطغاة
ينشـُر الخيرات وإيـْقيم الحياة
قايم العتره اليـِهِل بيه النجاة
ريت نِحْظـَه إبـْنـُصْرِتـَه قبل الرحيل
*٨*
ريت نِحـْظـَه إبـْنـُصرة المهدي الولي
ناخذ إبـْثار الحـُسين إو يـِنـْجلي
هَمْنـَه يابو الغوث ياحيدر علي
حُبـْكـُم إرْضـَعـْناه والمصحف دليل
*٩*
حُبـْكـُم إرْضـَعـْناه وإحْنـَه بالمَهَد
ما نعوف إحسين وإنظل للأبـَد
نمشي إبْدربـَه إو نـِوَفـّيه العَهَد
نذكـُر الحوراء والظامي الكفيل
الشاعر المرحوم جابر الخزرجي النجفي
