/channel/mys_313
قناة الشاعر مهيمن الموسوي
اشتركوا لتحصلون على اجمل القصائد لمواكب الزنجيل و المنبر
❉❉❉❉❉❉❉﷽❉❉❉❉❉❉❉
لسـتة #دعم_مؤسسة_منبريون_الحسينية🌻.
#التثبــيت_سـاعـه
#الحــــــــــذف
بـعـــد نشر اللسـتـةّ بـ4 سـا؏ـات
� غَـير مبري الـذمـةّ ٲمـام الله ڪـل من يـحذف البــوت دون ؏ـلمنا
استقبل 1000 عضو فما فوق
━━━━━━━━━━━━━━━
للإشـــتِـراك 👇🏻.
التواصل مع @ahmed_alziwar0
قناة خاصة بتلحين القصائد
/channel/+PZwpTt2HLXcvUQZh
------------------------------------------------------
قصيدة رقم ٥١
شوط كربلائي بحق علي الاكبر "عليه السلام" مهيمن يوسف الموسوي
اشهد يا إلـٰـه الكون شبيه المصطفى لأكبر
يحارب آل اميه اليوم يعادي كل اذيّه و شر
*١*
برز ضد الجيوش هواي ابني بالحرب عازم
واعلى الحگ يقاتلهم بقتاتله وبكثر حازم
كتايب كلها وشبيها وبسيفه ثبت لازم
لجل كل ثورتي حارب
يضد ابني الظلم طالب
بس عالحگ تره راغب
لجل هالثوره يا ربي دينك غايته ينصر
*٢*
برز ابني علي الاكبر ياليشبه نبينه هواي
خَلَق جدّه النبي المرسول وخُلقه يالصمد مولاي
فكره و منطقه نفسه ومعروفه صفاته هاي
انصره يا الهي اليوم
فلا من العده مهزوم
يربّي الخالق القيّوم
يرد من صولته منصور علي ابني ميتحيّر
*٣*
يا ربّ الخَلق كلها بقدرتك كونك اتدبره
خالق سيدي الأكوان بإراده تُخلق اوقدره
چنّه لو نريد نشوف نبينه المصطفى انظره
علي الاكبر نشوفه احنه
من ننظر يفرحنه
بالهادي يذكّرنه
طبعه يشبه بكثره يسرنه هواي من ننظر
*٤*
يا معبود يا اللّه يالخالق إنس و الجان
دعائي يالصمد دعوه على هاي البشر عدوان
كل خير الأرض تمنع يجيهم بس قهر واحزان
تفرّق هالعده كلهم
ادعو ما تجمّعهم
يا ربنه تفرقهم
شفنه بس غدر واحقاد معروفه العده تغدر
*٥*
يا ربي دعائي يكون فلا عنهم رضت حكّام
على كل الذي يسوّه تظل لمن تعيش آلام
دعوني و بايعوني هواي ينصروني على الظلام
لاكن واصبحو ضدي
وحگ طه النبي جدي
فديت الغالي و شعندي
واغلاهم علي ابني رفض كل باطل او منكر
*٦*
رغم كل التعب و الحر برز هاجم على الضدّه
اول هاشمي ايقاتل يفدي كلشي و شعنده
يقدّم عمره متفاخر ينصرني وأنه بشدّه
گلبي و حالتي باحزان
يريته ما يجي خذلان
نصره عالبشر عدوان
فلا منهم يموت اليوم على هذا النصر يگدر
*٧*
اشهد يالصمد ربي برز ابني على نصري
بثورتي طالب الاصلاح يحقّق غايته أمري
لجل دين النبي الهادي ولجل ينصر تره فكري
ضد كل الظلم و الجور
قصده عالعده منصور
وبنصره يظل مفخور
على كل الاذه منهم ابني وعْرفه يصبر
*٨*
طلع ويحارب بهمّه رغم ابني بكثر عطشان
على فعل العده اشهد منهم بس يجي الخذلان
ضد كل الحقيقه تكون ضد كل الفكر واديان
عليهم بازر ايقاتل
على كل حگ تره فاعل
والدينه بكثر ناضل
فلا رده الجيوش هواي ولا كل العطش والحر
*٩*
يا ربي يمن عندك قدرتك عالخلايق هاي
يردلي سالم الأكبر وبنصره يرد عناي
على كل آميه اليوم بكلامه و غايته وفاي
لاكن ما اضد امرك
ابد ما اعترض قدرك
علي افدي لجل ذكرك
بقدرتك سيدي المعبود من كل الخطر يعبر
*١٠*
ابني بالحرب ونطيت لجل دين النبي المختار
يهمني كل نصرته تكون ضد هاي العده لأشرار
رضاك انحصلنه اعلينه الهي الخالق الجبار
لجل ديني أنه افدي
اضحّي بالحرب ولدي
ولو آنه اظل وحدي
باقي بهالأمر دائم قراري لا ميتغيّر
مهيمن يوسف الموسوي
قصيدة رقم ٤٩
نزلة عگيلي للقاسم ابن الحسن عليه السلام
هذا إلـْوالِد يـَبـْنــــــــي أمـــــْرَه
إنـْصـُر عـَمـّك وإرْضي إلـْزَهْرَه
*١*
إنـْصـُر عـَمـّك يـَبـْني جاسِم
واجـِه كـُل مَلـْعون إو ظالِم
غيث إلـْدين إو ﻟـِﻟـْﺣـَﮓ سالِــــم
وإحْسين إشـْفي إبْزودَك صَدْرَه
*٢*
وإحْسين إوْحيـــــــــد إبْلا ناصِر
إطـْلـُب مِنـّه إلـْرُخـْصَه إلـْصابـِر
وإتـْوَجّه لـِلـحومـــــــَه إو كابـِر
نـَصـْرَك مَضـْمون إو أنـْتـَظـْرَه
*٣*
نـَصـْرَك مَضـْمون إو أمْجادَك
وإلـْحومَـــــه إتـْسَجـّل ميلادَك
ياجـَسّام إو نــــــال إمْرادَك
وإلـْيوم أتـْنـَطـّرْها إلـْبـُشـْرَه
*٤*
وإلـْيوم أتـْنـَطـّر هَدّاتـَك
وإتـْسِر دَلاّلي إبْصولاتـَك
هَمـّالـَه إدْموع إلـْعَمّاتـَك
أتـْفاخـِر بيك إو مِنـْتـَصْرَه
*٥*
أتـْفاخـِر بيك إو أتـْباهى
هَيْهـــــات أيّامَك أنـْساها
يانور إلـْكـَرّار إو طاهـــــــا
بـِالـْحومَه أنـْوارَك مِنتْتـَشـْرَه
*٦*
بـِالـْحومَه أنـْظـُر زود أفـْعالـَك
يـَبْني إبْيومَك ياهِنـْيالـَك
نـَصْرَك يـِتـْعالـَه إو يـِسْعالـَك
يايـُمـّه إو ﺗـِﺧـْﻧِﮔـْني إلـْعَبْرَه
*٧*
يايـُمّه إو أنـْظـُر لِلـْحومَه
وإلـْروح إبْهَمْها إو مَهْضومـَه
وأتـْشارَك وَيـّه إلـْمَظـْلومـَه
إم إحْسين إو ﮔلبي إبْجـَمْرَه
*٨*
إم إحْسين إتـْشوفـَك يَبـْني
أدْري إبْزودَك تِرْضـَه عـَنـّي
وإتـْشارِكـْني إبْنوحي إو وَنـّي
دَمـّك لو فاض آخِذ أجـْرَه
*٩*
دَمـّك لو فاض إنـْواسيها
إم إلـْحـَسـْنيين إلـْهَم بيها
جارَت هاي إلـْدِنـْيَه إعـْليها
راح إحْسين إيـْقـَدّم نـَحْرَه
*١٠*
راح إحْسين إيـْوَدّع زينب
وإيْسافِر لـِلـْخير إلأرْحـَب
مِنْ بـَعْدَك يَوْليدي إلـْكـَوْكـَب
مَحّد بـِالـْشِدّات إيـْنـُصـْرَه
الشاعر المرحوم جابر الخزرجي النجفي
قصيدة رقم ٤٧
دارمي للقاسم بن الحسن عليه السلام
لحن دهري ذبني ، حمزة الزغير
إبـْن إلـْحـَسـَن جـَسـّام أعـْلـَن جـِهادَه
شيمـَه إو عـَزِم وإقـْدام راعي إرادَه
جاسِم غانِم مافارَﮒ إﻟـْﺣـَﮓ وإنـْتِصـَر جاسـِم
*١*
شيمـَه إو عـَزِم وإقـْدام وإتـْحـَدّه إلـْبين
غانـِم أغاث إلـْدين وإلـْظامي إحـْسين
وإلـْكـُل هـُمومـَه زاح وإنـْسـَرّت إلـْعين
إوفـَه أبوه إبـْزود حـَد إلـْشـَهادَه
جاسِم غانِم مافارَﮒ إﻟـْﺣـَﮓ وإنـْتِصـَر جاسـِم
*٢*
إوفـَه أبوه إبـْزود وإرْتاحـَت إمـّه
وإبـْنـُصـْرُتـَه إلـْمـَظـْلوم فارَﮒ لـَهـَمـّه
وإتـْحـَنـّت إلـْتـِرْبان مِنْ جاري دَمـّه
هذا إلـْنـَصـُر بـِالـْحوم هـُوّ إلـْوِلادَه
جاسِم غانِم مافارَﮒ إﻟـْﺣـَﮓ وإنـْتِصـَر جاسـِم
*٣*
هذا إلـْنـَصـُر بـِالـْحوم يـِرْضي إلـْزِﭼـِيـّه
وإمـّه علاها إلـْفوز هاي إلـْوِفِيـّه
وَيـّه إلـْشـَبيه إلـْيوم صارَوْا سـِوِيـّه
جاسـِم تـَحَدّه إلـْموت نال إلـْسـَعادَه
جاسِم غانِم مافارَﮒ إﻟـْﺣـَﮓ وإنـْتِصـَر جاسـِم
*٤*
جاسـِم تـَحَدّه إلـْموت يـِرْسِم مـَعالي
بـَسْ لِلـْوِلي إلـْعـَطـْشان طاع إو يـِوالي
قـِدْوَه إبـْجـِهادَه صار إلـْكـُل مـُوالي
ضـَحـّه إبـْشـَبابـَه إو فاض غيرَه إبـْمَعادَه
جاسِم غانِم مافارَﮒ إﻟـْﺣـَﮓ وإنـْتِصـَر جاسـِم
*٥*
ضـَحـّه إبـْشـَبابـَه إو فاض غيرَه إو حـَمِيـّه
راد إلـْنـَصـُر وإلـْفوز بـِالـْغاضِرِيـّه
مافارَﮒ إلأنـْوار روحـَه بـَهِيـّه
عارِف إصول إلـْدِين يـِهـْوَه إلـْعِبادَه
جاسِم غانِم مافارَﮒ إﻟـْﺣـَﮓ وإنـْتِصـَر جاسـِم
*٦*
عارِف إصول إلـْدِين واجـِب يـِجاهِد
وإيـْحارِب إلـْظـُلاّم ﻟـِﻟـْﺣـَﮓ يـِسانـِد
وإيـْطيع أبو إلأحـْرار يـُنـْصـُر يـِعاهِد
جاسـِم مِشـَه إلأهـْوال طاع إلـْقـِيادَه
جاسِم غانِم مافارَﮒ إﻟـْﺣـَﮓ وإنـْتِصـَر جاسـِم
*٧*
جاسـِم مِشـَه إلأهـْوال وإتـْعـَنـّه لـِلـْموت
وإتـْفاخـَر إلـْمَهـْيوب وإبْعالي إلـْصوت
ما هـَمـّتـَه إلـْجيمان وإبـْنـُصـْهـُم إيـْفوت
شـِبـْل إلـْحـَسـَن مِنْ صال حـَقـّق مـُرادَه
جاسِم غانِم مافارَﮒ إﻟـْﺣـَﮓ وإنـْتِصـَر جاسـِم
*٨*
شـِبـْل إلـْحـَسـَن مِنْ صال يـُنـْظـُرْلـَه إحـْسين
وإيـْذَكـْرَه بـِالـْمَسْموم ﭼـَنـّه إجـَه إيْعين
وإلـْطـَف يـِشارِك بيه وإيْناصِر إلـْدين
يـُعـْرُف أبو إلـْسـَجـّاد زودَه إو سـَدادَه
جاسِم غانِم مافارَﮒ إﻟـْﺣـَﮓ وإنـْتِصـَر جاسـِم
*٩*
يـُعـْرُف أبو إلـْسـَجـّاد جاسـِم يـِوَفـّي
وإبْصولـِتـَه إلـْمَوْسوم لـِجـْروحـَه يـِشـْفي
لكن عليه إلـْشاب ياويلي لـَهـْفي
بـِالـْدَم تـَحـَنـّه إو فاز نـَصـْرَه تـَهادَه
جاسِم غانِم مافارَﮒ إﻟـْﺣـَﮓ وإنـْتِصـَر جاسـِم
الشاعر المرحوم جابر الخزرجي النجفي
قصيدة رقم ٤٥
عگيلي للقاسم بن الحسن عليه السلام
يوليدي ارجعلي متانيتك
يوليدي ارجعلي متانيتك
*١*
يالماخذ عكل امك ارجع
من تتأخر روحي التطلع
يالغالي اعتاب امك تسمع
خالي خلافك صدك بيتك
*٢*
بظهرك رشيت انه دموعي
وطفيت بفركاك شموعي
خليت اسمك جوه ضلوعي
عفت الهاب شكد شميتك
*٣*
عريس وبعدك يالقاسم
طحت كبال حسينك خادم
لو ميت لو فايز لازم
ارفع راسي شكد ناديتك
*٤*
عريس وعد امك غالي
يل ساكن كل عمري ابالي
اتخيلك تمشي وي خيالي
ما ترجع لمك تاليتك
*٥*
يبست بجفوف امك حنه
تنزف كدامي انه اتمنه
لكن اختاريت الجنه
ما ترجع لا ما ظنيتك
الشاعر ملا حازم البزوني
قصيدة رقم ٤٣
شوط كربلائي للقاسم بن الحسن عليه السلام
يوليدي الگلب مجمور وانت موذر أگـــــبالي
گوم أكعد يـماي العين لا تتركنـي يـالـغــــالي
*١*
ناديتك يـجاسـم گـوم امـك ضـلــت بحـــيره
من تموت امــوت وياك بعـدك مــحـنتي جبـيره
سبيه شلون اروح أبين وادم باعــت الغـيره
امــك والــگلب نـاداك
يا جاسم أخذني وياك
يجرح يالــولد فـركاك
بيتي انهدم من ونيت وتهدّمــت آمــــــالـي
*٢*
يروحي ومنيتي ودنياي ظلمه الـدنـيا بغـيابك
احشمك والكلب ملجوم وآنه اتنــطر اجـوابـك
ييمه بداعـــــت العباس لا تفجعـــني بمـصابك
ربيتك ســـــهـــرت أيام
بيك اتبـــاهـا يا جســـام
موش أعله التراب تنام
صعـبه أمك تظل تنوح كلفه التفگد الـوالي
*٣*
حلـم الوآلـده معروف تشــعل شمـــعة الزفه
وتفرح بالـولـد وتريد حنّه تشـــاهـــــد بجفه
ليش تعوفني وتروح وبحضن الــترب تغفه
يماي تبده مـــــني الماي
بس الدمــــــــع ظل وياي
يريت الوذروها أعضاي
واموتن گبل لا انعاك واشوفك ميت أكبالي
*٤*
يحلمي وضاعت الاحلام مـن عفتك عـــله الغبره
أكضي الليل بالحـسرات وتلهـب بالـگلب جــمره
أنه تمنيته ذاك الـسـيف يگطع نحـري مــو نحره
بعد عينك شفت أهوال
اديــه اتـگـيدت بحــبال
ييــــمه بولـيت الانذال
عله متوني السياط تحوم واحس جروحي تنعـالي
*٥*
اعتب والـــــجروح تزيد من باب الابـن وامــــه
صح وليدي ضــي العين ومثل الهــــوه الاشتمه
بــــس اثنينه وللـــــــــه فدوه لأسم ابو الـــــيمه
ابد ما جازي ابو الاكبر
فـــدوه لعـــمره أتــوذر
ارفع راسـي بالمحــشر
وافوز برضه الزهره هناك بهاي الخدمة هنيالي
الشاعر مهند المياحي
قصيدة رقم ٤١
[[موشح للقاسم بن الحسن ..ع..]]
☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆
حگها رمله اتيه منها افكارها
ساعه ويفارگها شمعة داراها
☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆
ساعه و تشوف الدلال الينمرد
تشوف جاسم رايح الها و مايرد
ومنجل الموت اليحز خد الورد
الفاح عطر المجتبى بأكتارها
☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆
ساعه عدها وينتهي حلم العرس
يروح منها الچان كلشي بالأمس
البالترافه يغار من عنده الهمس
توذّر بميدانها وبتارها
☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆
شمته وتدريه عازم عالحرب
شهگت بحسرة اوگف منها الگلب
ياهوه بريتي يجسام اليطب
شلون أمك من ترد بأكوارها
☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆
رمله شافت عمّه يمه يودعه
تذكر أيام الحسن هل مدمعه
المنظر يبچّي السماء السابعه
ياكواكب غابت و یسحارها
☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆
يگله يبني شلون شايف موتتك
گله مثل الشهد عمي بنصرتك
يگله بعداً يبني لأمه قتلتك
والخصم يوم الحشر مختارها
☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆
يدري من ذاك الاسد هذا الشبل
ويدري متهمه سيوف ولا نبل
خايف اعليه بالغدر لا ينكتل
تغدره الذيبان يم اوكارها
☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆
حسین گلبه من الموادع منصدع
چان کل لحظه اعله واحد ینفجع
یخاف غصن المجتبی لا ینگطع
وتنطفی ذکری العزیز آنوارها
☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆
يگله يوليدي ودمع عينه تهل
مالي مهجة بأيدي ازفك للنبل
بيك اشوف الحسن يالقاسم عدل
واذكر أمي والنبي وكرارها
☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆
💫إهداء💫
يهدى ثواب هذه القصيدة
الى روح المرحوم الشاب
(أبراهيم جبار العبادي)
والى ارواح المؤمنين كافة
مع الفاتحه والصلوات🤲
الشاعر جهاد البصيراوي
قصيدة رقم ٣٩
نزلة ثلاث دكات كربلائية (دارمي)
بحق القاسم بن الحسن "عليه السلام"
بالطف حضرها و شاف شنهو أمرها
اليوم الحسن موجود بروحه حضرها
*١*
عاشر محرم صار بعد المصايب
بعد الذي اللي صار بأرض الحرايب
جاي بحزن مقهور ابن الاطايب
روح الحسن هاليوم عالي صبرها
*٢*
شاف الإمام و حيل وبگلبه حسره
ابنه على التربان بلوعه ينظره
قاسم يشوفه شلون حاله يغيره
جثته خضيبه هواي لمّن نظرها
*٣*
شافه عليه اعداه من ضاربينه
جسمه نمله طعنات و محاريبنه
كله الجسد بسهام ومصوبينه
من العده الانذال من كل غدرها
*٤*
حال الحسن و يگول بابنه تفاخر
شاف الابن مطروح لمّن يناظر
يبني بكثر وفّيت باقي انته صابر
رغم الاعادي بجور كثره مكرها
*٥*
عمّك تشوفه و راد كلمن ينصره
لجل النبي و الدين وبهذا امره
بدمك نصرته اليوم لا ما تحيره
بفعلك أنه مفخور روحي تسرها
*٦*
لجل الحُسين افديت كلها حياتك
تنصر ثورته تريد وبتضحياتك
يبني أنه ادريك هايه صفاتك
ضد الظلم بالناس تكره فكرها
*٧*
باول سنينك حيل وانته تكفّر
لجل الحسين اتكون للوالي تنصر
واجب تحس اعليك ضد العده الشر
لازم تسلّ السيف تنهي خطرها
*٨*
ميّت أنه و من جيت يبني يجاسم
رايد اشوف الصار باقسى الملاحم
بروحي أنه تعنّيت وبدمعي ساجم
حزنت عليك الروح عالي قهرها
*٩*
دمّك تخلّد دوم اليوم القيامه
ياللي فديت اسنين لجل الامامه
للثوره و الاصلاح للأستقامه
بالأمه لا متريد كل اليضرها
*١٠*
عمرك لجل لحسين يبني فديته
لجله رخصته اليوم حين النطيته
بهمه و شجاعه تريد لمّن اجيته
ضد كل شرار الگوم واللي نصرها
مهيمن يوسف الموسوي
قصيدة رقم ٣٧
نزلة عگيلي للعباس عليه السلام
عباس وطب لارض الحومه
عباس وطب لارض الحومه
*١*
عباس وطب يرعد ليها
يگلب اسفلها وعاليها
والحومه اعصار اشتد بيها
مطّرّها ادموم امن اغيومه
*٢*
طشّر آلاف من العسكر
والبارز منهم يتوذر
هذا ابن الفقار وحيدر
علوم الكرار ويه اعلومه
*٣*
ياويله اليوگف گدامه
حتماً يوگع وابلا هامه
وين الجيش ووين ازلامه
إجيوش ورجعت مهزومه
*٤*
يفتح هذا الجيش بكيفه
ضل ينگط روس ودم سيفه
من عدهم خل ياخذ حيفه
خلي يوصللهم معلومه
*٥*
وبگاع الطف صارت رجفه
زلزلها العباس ابچفه
والواجه چن واجهه حتفه
أصناف الجيش ومهدومه
*٦*
زامط يم الماي وجابه
وياهم سواها اطلابه
زلمتهم واكبرهم هابه
بيهم فرّغ كل اهمومه
الشاعر حيدر سعدون الخفاجي
قصيدة رقم ٣٥
موشح للعباس عليه السلام
كربــله العبـاس من طبـاها
ترادمت خيل وزلـم خلاها
*١*
حمل والخيل اردمت فرس بفرس
والـــزلم محتــاره لاحس لانــفس
والنـــعم عبـــاس لقنهـــــــم درس
الكاع بـس روس وجثث ســـواها
*٢*
ياهــلا بـــعباس ياضـــــــرغامه
الخيل شــردت والـزلم جدامهه
ياهلا بـشيمة علـي وصمصامهه
المــوت الاحمــر والنعـــم رواها
*٣*
اغتاض وسوّدت سماهه وغيمت
والـــزلم ذبت عــدده وســـــلمت
وال هاشــم كل زلمهــه تحــزمت
والجمــــوع بصــــارمه چـــــواها
*٤*
نـــزل مغضب هـــوس بميـــدانه
عت مهرتــــه وأشـــركت بعنــــانه
والحــــرب دك ورجــــع ميــــزانه
الحــومه ضلمـــه والگمــر ضواها
*٥*
ياهلا بعباس يحـــــزام الظهــــر
صعد غضبان وكسر ضهر المهــر
غاص بالسبعين ووچب عالنهــر
ونار فــــوك المشـــرعه دواهـــا
*٦*
ضهضب العباس وعليها نــــوه
وعلي كله الحومه ندخله سـوه
وغرّه صارت ونكطع حتى الهوه
ورايـــة الحـــق عالنهــــر علاها
الشاعر ساري العبادي
قصيدة رقم ٣٣
شوط كربلائي للعباس عليه السلام
الشاعر الشيخ كاظم المنظور الكربلائي
يبن أمي إنگطع گلبي وعيني ظلت إربيّه
وين العلم وين الجود وين إچفوف راعيه
* * *
زينب عله التـل إتصيح لحد يا حماة الجار
علينه حرگو إخيمنه إو بينه ما دريتو إشصار
وين إللي تطفي النار بالنار وتشب النار
وين إلمـا تلمها إدروع
وين إلما تهاب إجموع
وين إلما تعرف الروع
وين إمدربة حيدر وين التحيي ماضيّه
* * *
يهل الخيل إجتنه الخيل وين إللي ترد الخيل
وين إللي تشد الحيل بالحيل وتهدم الحيل
هيجو إمن الثره هيجو حرايركم ولاها الليل
لتخلوهن إبهالحال
يالمتوسدين إرمال
نزل عدكم إو بيه إعيال
إو نزل إلما إله حمّاي تتهدم مبانيه
* * *
شاطت للمعاره إتريد تـدوّر جسم أخوها حسين
نوبه إتعثر نوبه إتگوم ما تندل دربها إمنين
متگلي إشتشوف العين لو فگدت إصبيها العين
إو ظلت بالمعـاره إتحوم
إو عالغبره تشوف إجسوم
رميّه إمغسله بدموم
والريـح إبعجاج الخيل چفّنهم إبذاريه
* * *
إو من شافت وريد حسين مگطوع إو يسح دمه
إنغشه إعليها إو هوت فوگه إومن مجره إلدمه إتشمه
تگله سهم البگلبك شعل گلب إختك إبسمه
يهل نايم عله الغبره
إو دم طبره إبأثر طبره
جسمك من سحگ صدره
إو ظهرك يا بعد عيني ليش إضلوعه محنيه
* * *
يبن أُمي إخلصت روحي شلي إبروحي عگب روحك
دم تتفايض إجروحي إو مجراهن من إجروحك
نشف ريع الگلب موحه يخويه من نشف موحك
خليني أرد أموت إوياك
ما أگدر عله فرگاك
يبن أُمي وعگب عيناك
يرميني إبسهم چتال لو شامت يصد ليه
* * *
إو صـدت للشريعه إتصيح عسن لا چان ردت الماي
حياتي إنعدمت وشنهي حياتي من عگب ولياي
ردت بالماي أبرد إحشاي جمر خله إبضمير إحشاي
العذر لله يراعي الباس
شگولن شعتذر للناس
عله الماي إفگدت عباس
ريت العلگمي لا چان نهره ولا جره ميه
* * *
يخويه إو ضربة العـامود حالت بينك وبيني
وسهم إللي فگس عينك مثل عينك فگس عيني
إلگطع يسراك ويمينك گطع يسراي ويميني
وما عالينچتل معتوب
إو گطعنه للسعاده إدروب
رضينه بالذي مكتوب
إنته إعله النهر مطروح وأنه للشام مسبيه
* * *
الشاعر الشيخ كاظم المنظور الكربلائي
قصيدة رقم ٣١
شوط كربلائي للانصار
شوط كربلائي للأنصار "عليهم السلام" محرم ١٤٤٥هـ ٢٠٢٣م مهيمن يوسف الموسوي
ألا من ناصر اينادي الحُسين بكربله من صاح
يريد الثورته أنصار يطالب راد بالاصلاح
*١*
إمامي بكربله گاصد أنصاره بكل زمن لازم
تطبّق فكرته و دينه رغم كل العِده اللائم
و ترفض لازم و تبقى فلا تطاوع ابد ظالم
يحقّق هالأمر رايد
فلا يردّه أذه الحاقد
ولا كلمن إله ناقد
لجله و نصرته يضحي إله يفدي تره الأرواح
*٢*
قصده من يصيح و گال إمامي و رايد الأنصار
مو بس بالحرب تنصر رايد تنصره بافكار
أفكاره بثورته تكون يضد ليش العِده الاشرار
خرج لجل الصلح بالدين
هدف هــٰذا الإمام حسين
يريده ينطبق كل حين
لو مات نقتل مذبوح من جور العِده السفاح
*٣*
نگدر ننصره احنه وأنصاره نصير اليوم
على كل ظالم انشوفه من هاي البشر و الگوم
نحچي الحگ نظل كلنه ما يبقى أبد مظلوم
لو سِرنه بطريقه نكون
نضد كل العِده المعلون
ومحبينه العمر يفدون
نتسمه صدگ أنصار و يظل فكره ابد ما راح
*٤*
إمامي ثورته عدنه موجوده تره عدنه
شوف اللي ظلم لازم نضده نتّحد كلنه
وما نسكت على الباطل كل واحد تره منّه
باقي مستمر موجود
إمرنه ما يظل محدود
لازم هالامر و يسود
بزمنّه و كل قضيّه كون و گلبنه بهالأمر مرتاح
*٥*
تنصره سيّدك لحسين تطبّق هالقضيّه هاي
بحياته بالحرب ضحّه المُحب لازم يظل وفّـاي
اليعادي كلمن القرآن هـتـك منه حسافه جــاي
فلا يسكت على هالصار
لازم و بعزم لو ثار
ميخلّي عدوّه جار
ينصر دينه او فكره ثابت عدنه ما ينزاح
*٦*
بثورته حسين شنهو الراد لازم ثابته بذهنك
تبقى بيك لا ما تروح عهد لجل الولي منك
فلا هالدنيا واتغـرّك على فكرك تبعدنّك
تثبت عالصعوبه هواي
من اجل الولي مولاي
رغم كل الجره بدنياي
وبهذا الأمر تصبح تردّد كل وكت صدّاح
*٧*
يامن تلتزم و تكون و بهـٰـذا الأمر ميروح
تطبقه بكل وكت تبقى يظل ثابت تره بالروح
و بهذا صدگ صاير إنته ناصر المذبوح
رضه ربـّك على لأفعال
باحسن حالتك هالحال
مهما كل شخص لو نال
على مَر الزمان و شوف كل ظالم اخيراً طاح
*٨*
كل نصرة إمامي حسين يريدك ثابت اعلى الراي
مهما كل اذيـّـه اتصير عالحگ سيرتك عـنـّـاي
والدينك تظل لجله انته الناصره و حــمّــاي
هايه ثورته المظلوم
يالبيها تظل للدوم
منها تنجلي لهموم
يرضه اعليك من تفعل فلا شر للديانه نلاح
*٩*
شنهو الخـلّـد الثوره رغم كل الأذه و الشر
خلدها إلــٰه الكون باقي تنذكر قـرّر
بيها كل رضا المعبود نفسها لا متتكرّر
وكلمن ملتزم بيها
يظل ساري تره اعليها
باقي و ما يخلّيها
بالثوره الحُسينيّه بمجدها للأبد مدّاح
*١٠*
لو تنصر لإمام و كون فلا عـنّه تِزل للدوم
رغم كلمن اعلى نصرك باقي بالنقد و يلوم
يرضه بكل فعل منك تحصل كل رضا القيوم
مقامك عالبشر و الجاه
يعله وبفضل اللّه
لأن ويّه الولي ويّاه
فعلاّ ناصر احسينك بالجـنّه إلك لأرباح
مهيمن يوسف الموسوي
قصيدة رقم ٢٩
موشح (للانصار )
…………………………………………………………………
اليــوم يــوم أنــصــارك الــوفــايه
والحــرب لاجــلك معتنيها عنــايه
…………………………………………………………………
أنصارك أحنه وللحرب هل گاصدين
بغيــــره واخلاص وحمـيـه معتنيـن
أنصارك أحنــه وعالشهاده مـوقعـين
للمــــــوت والله مانعــوفك ياحسين
انصارك وبالــحــرب شــالوا رايـــــــه
…………………………………………………………………
مايهابون المنايا ومـايخافون الزلم
بزودهـم هالطبوا الحــــــومه بعزم
الگابلاهم بالحـــــــرب ماضـن سلم
الجيش مــن شافاهم بسرعه انهزم
أنصارك وبالـحــومه دگـــــــوا ثايــه
…………………………………………………………………
بـــــــزودنه نطب الحــرب وبــزودك
ونمنـــــــع الرايـد يعـــدي احــدودك
مانعـــــــوفك والله نقســم بمعبودك
زنـــــــــــودنه نگطعها گبل زنــــودك
منطينك أحنـــــــه ياحسين حجــايه
…………………………………………………………………
أنـــــــصارك أحنــــه وعالعده هـدينـه
لاجلك احـنـــــــــه أعـمــارنه نــذرينه
هيهــات مـــــــن الـــــــذله هل نادينه
لخـاطــرك كلشي يـغــــــــالي أنطيـنه
والمــــــــوت لاجلك نشــتـريه شـرايه
…………………………………………………………………
الشاعر عماد محمد الدراجي
قصيدة رقم ٢٧
شوط كربلائي بحق مسلم بن عقيل عليه السلام
مسلم خلّده التأريخ بافعاله و بطولاته
رساله للبشر كلها على حاله و معاناته
*١*
سفير الثوره و الاصلاح مسلم راح للكوفه
گاصدها لهدف عنده لازم دوم منعوفه
من قصّة حياته نشوف حكم وهواي معروفه
ليش و معتنيها راد
ظلم و الجور كثره ساد
فلا كلّ النصحهم فاد
لحسين اعتنه لجله العدوه بكل نزالاته
*٢*
مبعوث السفير و راد يجهز جيش و ينصره
ضد كل الظلم و الجور مسلم معتني بأمره
رايد للحسين يكون ينصر غاية الثوره
على الباطل اجه گاصد
كل ظالم إله ناقد
رغم جور العده الحاقد
بقه مسلم مدى الازمان ذكره من كراماته
*٣*
مسلم معتني بهمّه يضد كل العده الظلام
طغاة اعلى البشر كلها منها شاهدت آلام
وعكس دين النبي الهادي كلما صادره احكام
مبادئ و النهج معروف
بالحگ من إجه موصوف
بقه بدرب الولي ميعوف
شبه من الحسين بهاي فلا كثره فروقاته
*٤*
لازم نقتدي بمسلم المن معتني يحارب
على شنهو إجه و گاصد وبيا كل أمر طالب
ينصر كل شخص مظلوم يريد الحگ تره راغب
وبهاي القضيه هواي
نطبقها نظل و بهاي
خطر لو يعتنينه جاي
تظل طول الزمن و سنين تبقى كل عباراته
*٥*
ما همه العده بجيشه عددهم شاهده كثره
وبهذا الامر نبقه على عزمه شكثر صبره
نسلك هالدرب للدوم شنهو عنده من فكره
قصده لا تهاب اعداك
رغم كل الاذه لو جاك
ولو قله عدد وياك
ابقه واستمر عالحگ تظل للدوم حالاته
*٦*
رغم كلها تضدّه هواي مسلم مستمر عالصار
عنده بغايته فكره متردّه ابد لأشرار
رايد كل ظلم ينهي فلا يبقه اله تذكار
وبهذا خل نظل احنه
على نهجه تره كلنه
بحياته و حكمته النه
يامن للعده يضده بقه للدين صولاته
*٧*
بالكوفه علي كثره يضدونه بكثر آلاف
رغم كلها يغدرونه بحربه مستمر ما خاف
باصرار و عزم باقي حُسين اعلى الحقيقه شاف
والباقي جند شيطان
ضدّ الخالق الرحمــٰن
على دين النبي عدوان
ابن خير النسب معروف مسلم كل دفاعاته
*٨*
وبآخر حياته شاف وحده بهالأمر موجود
كلها خانته و غدرت نصره بالحرب مسدود
لاكن بالعمر منصور يظل خالد بلايه حدود
وبكل الزمن نلگاه
جم مسلم تره شفناه
الف وسفه البشر خذلاه
لان يسلك طريق الحگ يظل لسنين جولاته
*٩*
چم طاغي هلك ما ظل رغم قوته و حكم عنده
ذكر لا ما بقه الحكمه منسي و بالگبر وحده
ما فاده غروره الي على الحگ كثر ضدّه
بس عالحگ بقه ذكراه
مسلم دوم ما ننساه
رساله النه الذي سوّاه
المن فادي كل عمره بقت متروح اصواته
*١٠*
صوته مسلم ويدوي تنقله باقيه الاجيال
نتعلم بطولاته منه نقتدي بآمال
فلا نسكت على الباطل بس عالحق تظل لاقوال
اروع حكمه قدمها
النه اليوم نجعلها
وبدمه تره خلّها
مهما كل ظلم يصبح ولو كثرانه قواته
مهيمن يوسف الموسوي
قصيدة رقم ٥٣
شوط كربلائي للسبي
مهيمن يوسف الموسوي
يعباس الكمر تدري زينب من رحت عنها
شحالي بالسبي بعدك مصايب حيل اذنها
شحچيلك يخويه شلون على حالي بعد فكدك
زينب تنسبي عالنوك واعوفك عالترب وحدك
غيابك يصعب اعليه يأذيني بكثر بُعدك
غدر بيه الدهر و الناس
يخويه يالگمر عباس
سبيّه اوي العده الارجاس
ورزاية كربله بكثره يخويه بس يألمنها
جنت مهيوبه وياكم يبو الغيره يكافلني
لجن لمن متت بالطف كلشي مختلف مني
تقبلها بسبي زينب لعادي حيف ينظرني
لاجن باليسر هيهات
يذلّوني يبو الوكفات
رغم بيه كثر حسرات
وبطول الدرب زينب على كل الجره ونها
اشاهد روس ويايه موجوده على لرماح
ودمهن عالارض ينزف يعباس بكثر من ساح
شحالي من اشاهدهن شايلهن عده سفاح
اباوع راسك اكبالي
صعب يا خويه يا غالي
وبهذا الوضع حالي
راسك بالدمه تخضّب مصايب زينب اذّنها
ياخويه الكمر تدري لمن بعّدت و الصار
آنه ام الخدر اصبح يسبيني العده الاشرار
ولا جنهم يعرفوني ابويه حيدره الكرار
وخويه المنذبح لحسين
يكافل كلنه معروفين
نسه يا حيف مسبيين
ويشاهدنه العده الخاين رزايه والاذه جنها
شحامي يا گمر هاشم يخويه كل نسه واطفال
يأذوني و يقهروني كل هاي العده الانذال
وعلى حالك يبو فاضل دمعي اعلى الوجن همّال
بديه جم حبل صاير
يأذّيني العده الجاير
وعلى العيله العقل حاير
مسبيه العقليه شلون اذه هالجيش لوعنها
تمنيتك يخويه اليوم عدل يا كافي يمّي
فلا احد يصل ليّه ولا يبقه بگلب همّي
لاكن خويه و شبيدي جتيل أعلى الارض مدمي
بعدك موتك يبو الغيره
العقيله صارت بحيره
سبيه اوي العده اجبيره
وأنه جدي النبي الهادي سلاله طاهره منها
سبونه بكربله و شفنه رحنه كلنه للكوفه
وعدوّك يا گمر هاشم يريت انته تره تشوفه
يأذّونه و يعادونه بسّ احقاد معروفه
كلبي بهالوضع تدري
شحمل يا قهر بأمري
يعباس و نفذ صبري
العيله والنسه بشوگ للوليان كل حنها
شحجيلك يكافلني گلبي شاهد المأسات
يسرونه الف وسفه لاكن ما اذل هيهات
وروحي محزنه ليكم بيها يالگمر حسرات
تقبلها بلا كافل
صعب يا سيدي حاصل
يحدي هالضعن قاتل
كلها عيلتك بعدك مصايب حيل شافنها
يا كافل چنت تدري كفيلي يالگمر بحماك
وبخدري اظل يمكم يا خويه تره وياك
لاكن من متت بالطف يحديها الضعينه اعداك
بعد كل الخدر وشلون
امشي اوي العده الملعون
على زينب ابد ميهون بلايا وبس تعنّها
يا شبل الوصي حيدر وضعي باليسر صعبه
من أرض الطفوف هواي سبينه يا عسر دربه
كلها آل اميه أحقاد ضد المصطفى و ربّه
شنهو هالنسه و اطفال
سبي راحت مع الانذال
وصفينه باصعب الاحوال
كثر من الاذيه هواي الف يا حيف جربنها
مهيمن يوسف الموسوي
قصيدة رقم ٥٢
موشح للاكبر
علي الاكبر من طلع هز رايته
والجيوش اتبسمرت من شافته
١
جنه حيدر من طلع وسط الجمع
والسبع من عادته ايخلف سبع
كل مزايه المصطفى بي تنجمع
صوته واطباعه وكلامه ومشيته
٢
اتوكل اعله الباري وبعزمه نزل
والجيوش اتشوف بعيونه الزعل
على الحق ناده عليهم من وصل
ناده ضل اينادي كلها وسمعته
٣
احنه اهل الحق ينادي بكل يقين
نمشي احنه بنهج سيد المرسلين
حسين ابويه وجدي امير المؤمنين
صاح كل هذا الكلام بطلعته
٤
الحومه بيده وراد يكلبها كلب
وخله كل فرسانها اتيه الدرب
الكاع حدر الزلم كامت تلتهب
ادخيل ياستار كلها نادته
٥
صارت الحومه ظلام ابلا ضوه
وشبع سيفه من الدمه حد مرتوه
علي الاكبر من نزل سد الهوه
وتيهت المشراد كلها بصولته
٦
ضحه بالروح وفدائي الدينه جان
علي الاكبر يعرف الصار امتحان
بكل مكان احنه نكول وكل زمان
الله يلعن ال اميه الذبحته
لاتنسون والدي ووالدتي وابني عباس من الرحمه والمغفره
خادمكم رياض الرسل الجابري
قصيدة رقم ٥٠
نزلة دارمي دارمي للقاسم بن الحسن ع
لحن دهري ذبني ، حمزة الزغير
بالطف حضرها و شاف شنهو أمرها
اليوم الحسن موجود بروحه حضرها
وضعه دمعه للقاسم بحسره الدمع هلها
...............
عاشر محرم صار بعد المصايب
بعد الذي الي صار بأرض الحرايب
جاي بحزن مقهور ابن الاطايب
روح الحسن هاليوم عالي صبرها
وضعه دمعه للقاسم بحسره الدمع هلها
...............
شاف الإمام و حيل وبگلبه حسره
ابنه على التربان مطعون كثره
قاسم يشوفه شلون حاله يغيره
جثته خضيبه هواي لمّن نظرها
وضعه دمعه للقاسم بحسره الدمع هلها
...............
شافه عليه اعداه من ضاربينه
جسمه نمله طعنات و محاربينه
كله الجسد بسهام ومصوبينه
من العده الانذال من كل غدرها
وضعه دمعه للقاسم بحسره الدمع هلها
...............
حال الحسن و يگول بابنه تفاخر
شاف الابن مطروح لمّن يناظر
يبني بكثر وفّيت باقي انته صابر
رغم الاعادي بجور ضدك مكرها
وضعه دمعه للقاسم بحسره الدمع هلها
...............
عمّك تشوفه و راد كلمن ينصره
لجل النبي و الدين وبهذا امره
بدمك نصرته اليوم لا ما تحيره
بفعلك أنه مفخور روحي تسرها
وضعه دمعه للقاسم بحسره الدمع هلها
...............
لجل الحسين افديت وبتضحياتك
تنصر ثورته تريد تفدي حياتك
يبني أنه ادريك هايه صفاتك
ضد الظلم بالناس تكره فكرها
وضعه دمعه للقاسم بحسره الدمع هلها
...............
باول سنينك حيل وانته تكفّر
ما تقبل و متكون للوالي تنصر
واجب تحس اعليك ضد العده الشر
لازم تسلّ السيف تنهي خطرها
وضعه دمعه للقاسم بحسره الدمع هلها
...............
ميّت أنه و من جيت يبني يجاسم
رايد اشوف الصار باقسى الملاحم
بروحي أنه تعنّيت وبدمعي ساجم
حزنت عليك الروح عالي قهرها
وضعه دمعه للقاسم بحسره الدمع هلها
...............
دمّك تخلّد دوم اليوم القيامه
ياللي فديت اسنين لجل الامامه
للثوره و الاصلاح للأستقامه
بالأمه لا متريد كل اليضرها
وضعه دمعه للقاسم بحسره الدمع هلها
...............
عمرك لجل لحسين يبني فديته
لا ما تعزّه اليوم حين النطيته
بهمه و شجاعه تريد لمّن اجيته
ضد كل شرار الگوم واللي نصرها
وضعه دمعه للقاسم بحسره الدمع هلها
مهيمن يوسف الموسوي
قصيدة رقم ٤٨
دارمي للقاسم بن الحسن عليه السلام
ثلاث دكات كربلائية
إبـْن إلـْحـَسـَن جـَسـّام أعـْلـَن جـِهادَه
شيمـَه إو عـَزِم وإقـْدام راعي إرادَه
*١*
شيمـَه إو عـَزِم وإقـْدام وإتـْحـَدّه إلـْبين
غانـِم أغاث إلـْدين وإلـْظامي إحـْسين
وإلـْكـُل هـُمومـَه زاح وإنـْسـَرّت إلـْعين
إوفـَه أبوه إبـْزود حـَد إلـْشـَهادَه
*٢*
إوفـَه أبوه إبـْزود وإرْتاحـَت إمـّه
وإبـْنـُصـْرُتـَه إلـْمـَظـْلوم فارَﮒ لـَهـَمـّه
وإتـْحـَنـّت إلـْتـِرْبان مِنْ جاري دَمـّه
هذا إلـْنـَصـُر بـِالـْحوم هـُوّ إلـْوِلادَه
*٣*
هذا إلـْنـَصـُر بـِالـْحوم يـِرْضي إلـْزِﭼـِيـّه
وإمـّه علاها إلـْفوز هاي إلـْوِفِيـّه
وَيـّه إلـْشـَبيه إلـْيوم صارَوْا سـِوِيـّه
جاسـِم تـَحَدّه إلـْموت نال إلـْسـَعادَه
*٤*
جاسـِم تـَحَدّه إلـْموت يـِرْسِم مـَعالي
بـَسْ لِلـْوِلي إلـْعـَطـْشان طاع إو يـِوالي
قـِدْوَه إبـْجـِهادَه صار إلـْكـُل مـُوالي
ضـَحـّه إبـْشـَبابـَه إو فاض غيرَه إبـْمَعادَه
*٥*
ضـَحـّه إبـْشـَبابـَه إو فاض غيرَه إو حـَمِيـّه
راد إلـْنـَصـُر وإلـْفوز بـِالـْغاضِرِيـّه
مافارَﮒ إلأنـْوار روحـَه بـَهِيـّه
عارِف إصول إلـْدِين يـِهـْوَه إلـْعِبادَه
*٦*
عارِف إصول إلـْدِين واجـِب يـِجاهِد
وإيـْحارِب إلـْظـُلاّم ﻟـِﻟـْﺣـَﮓ يـِسانـِد
وإيـْطيع أبو إلأحـْرار يـُنـْصـُر يـِعاهِد
جاسـِم مِشـَه إلأهـْوال طاع إلـْقـِيادَه
*٧*
جاسـِم مِشـَه إلأهـْوال وإتـْعـَنـّه لـِلـْموت
وإتـْفاخـَر إلـْمَهـْيوب وإبْعالي إلـْصوت
ما هـَمـّتـَه إلـْجيمان وإبـْنـُصـْهـُم إيـْفوت
شـِبـْل إلـْحـَسـَن مِنْ صال حـَقـّق مـُرادَه
*٨*
شـِبـْل إلـْحـَسـَن مِنْ صال يـُنـْظـُرْلـَه إحـْسين
وإيـْذَكـْرَه بـِالـْمَسْموم ﭼـَنـّه إجـَه إيْعين
وإلـْطـَف يـِشارِك بيه وإيْناصِر إلـْدين
يـُعـْرُف أبو إلـْسـَجـّاد زودَه إو سـَدادَه
*٩*
يـُعـْرُف أبو إلـْسـَجـّاد جاسـِم يـِوَفـّي
وإبْصولـِتـَه إلـْمَوْسوم لـِجـْروحـَه يـِشـْفي
لكن عليه إلـْشاب ياويلي لـَهـْفي
بـِالـْدَم تـَحـَنـّه إو فاز نـَصـْرَه تـَهادَه
الشاعر المرحوم جابر الخزرجي النجفي
قصيدة رقم ٤٦
موشح للقاسم بن الحسن عليه السلام
جاسـِم إلـْشاب إلـْحـِظـَه بـِوْسامـْها
إمـّه رَمـْلـَه إلـْراضـِيـَه بالامـْها
*١*
إمـّه رَمـْلـَه راضـِيـَه إبـْزودَه إلـْمـُهاب
قِدْوَه صار إبْصولِتـَه إلـْكـُل إلـْشـَباب
صابـِرَه وإتـْحـَمـّلـَت ضيم إلـْمـُصاب
ثابـِت إبـْصولـَة إبـِنـْها إسـْلامـْها
*٢*
ثابـِتـَه إبْصولـَة إبـِنـْها إلـْمِعـْتِلي
وإبـْتِدَه هـَمـْها إبـْحَميتـَه يـِنـْجـِلي
خايـِفـَه إعـْليه إلـْوِفاها يـِنـْوِلي
لـِبـْسـَت إوْياه إبـْجـِهادَه إحـْزامـْها
*٣*
لـِبـْسـَت إوْياه إلـْغـَريبـَه إلـْهايـِمـَه
ثوب أحـْزان إو تِطـَرّز بـِالـْدِمـَه
رادَت إتـْواسي إلـْشـَفيعـَه فاطِمـَه
تـُرْفـَع إبـْشيمـَة إبـِنـْها هامـْها
*٤*
تـُرْفـَع إبـْشيمـَة إبـِنـْها راسـْها
ما خـَيـّب إلـْطـَيـْبـَه إلـْبـَهِيـّه إحـْساسـْها
وإلـْوِفـَه هذا إلـْتـَعالـَه إبـْساسـْها
وإلأبـِن حـَقـّق جميع أحـْلامـْها
*٥*
وإلأبـِن حـَقـّق حِلـِمـْها إلـْفاﮔـِدَه
شـُكـْرَت الله إو كـُل عـُمـُرْها ساجـِدَه
هذا ما ﭼـانـَت تـُطـُلـْبـَه إو رايـِدَه
ضـَحـّه إبـِنـْها وإلـْمـَعالي رامـْها
*٦*
ضـَحـّه إبـِنـْها بـِالـْنـَفِس دون إلـْحـُسين
مِنْ بـَعـَد عينـَه تِوَلاّها إلـْحـَنين
ما نِسـَت يومـَه إو تِذِكـْرَه بـِالـْوِنين
وإلـْدَهـَر جار إبْهـُمومـَه إو ضامـْها
*٧*
وإلـْدَهـَر كِثـْرَت هـُمومـَه ما يـِحـِن
غاب إبـِنـْها إو ظـَلـّت إبْضيم إو حِزِن
وإﻟـْﮔـَلـُب مـَجْروح آذاها إو يـِوِن
مـُظـْلِمـَه إلـْدِنـْيـَه إو طـَغـَه ظـُلاّمـْها
*٨*
مـُظـْلِمـَه إلـْدِنـْيـَه بـَعَد إبـْن إلـْحـَسـَن
تِحـْلـَم إبـْعِرْسـَه إبـِنـْها إلـْماوَهـَن
طالـَت إلأيـّام واذاها إلـْزَمـَن
كِرْهـَت إلـْدِنـْيـَه إﻟﭼـِثيرَه إوْهامـْها
الشاعر المرحوم جابر الخزرجي النجفي
قصيدة رقم ٤٤
تجليبة للقاسم بن الحسن عليه السلام
ياشاب اتّعظ مني واخذ عِبِره
آنه القاسم الضحّه بزغر عمره
*١*
الشاب اللي يحبه حسين مثلي يصير
كون بواجباته ما يظل تقصير
بدرب الله وصراطه المستقيم يسير
لازم ينتبه للزلّه والعثره
*٢*
اول شي صلاتك تلتزم بيها
تنفعك كون وتذوب بمعانيها
بخشوع ومعرفه لمّن تأدّيها
تمنعك كون عن المعصية الكبره
*٣*
آنه القاسم المتمسّك بديني
الك قدوه يشاب بنهجي وسنيني
اريدك تقره عنّي وعن عناويني
تطبّق كون فعلاً مو فقط تقره
*٤*
مو بس بالمجالس للطلم تحضر
لازم تلتزم منهاج ابوالأكبر
صلاه صوم وزكاه حَج وبعد اكثر
نريدك بالتواضع تخدم الفقره
*٥*
الأمام بوكتي چان بكل فخر عمي
حسين وطعته حدما گطّعوا جسمي
شاب ومابخلت عله السبط دمي
بدم نحري فديته من گبل نحره
*٦*
لا تترك امامك ولتزم نهجه
حجّه عليك بالك تجرح الحجّه
اندبه بشدتّك يفزعلك وتنجه
هذا المهدي هذا وارث العتره
*٧*
حسين يريد شاب محزّم حزامين
حزام الخدمه وحزام التزام الدين
اترك كلشي زائل ولتزم بحسين
يشاب تفوز دنيا وآخره بذكِره
سيد زيد الفحام
قصيدة رقم ٤٢
موشح للقاسم بن الحسن عليه السلام
سيدي ارخصني احاربها العداء
انصرك آنه ابدمائي ابكربلاء
*١*
يا إمامي و سيدي عمي الحُسين
من أجل كل ثورتك عالظالمين
ريت كون اوياك من الناصرين
أجلي عنّك يا أبو اليمّه العناء
*٢*
واجب إعليّه أضحيلك دِمه
يا حُسين ابن الزچيّه فاطمه
هذا تكليفي وحگ ربّ السِمه
والعمر لا ما يوفي و الدماء
*٣*
عن سبب ثاني إجيتك يا إمام
بالحرب كثره العِده أهل اللئام
ماتوا انصارك يبن خير الأنام
قدّموا لجلك مُهجهم وبإباء
*٤*
يا حُسين إبن النبي جيت ابهدف
لو أقاتل بالحرب هذا شرف
نصرتك فعلاً فلا ما تنوصف
كل فضلها ايعرفه بس رب السماء
*٥*
من إجيتك وأعتني يبن الرسول
عن وصية والدي بيها اشيگول
يا بُني حين العِده العمّك ينول
لازم اتنصره و تقدمله الولاء
*٦*
من حُسين و صاير بإرض الطفوف
ما إله أحّد ينصره إنته تشوف
ضِدّه صارت مِن عدوّه بس سيوف
إبني يالقاسم يجب إنته الفداء
*٧*
رد حُسين ابعَبرته و دمعه اليسيل
ما أريدك يا بُني تصبح قتيل
شاب بعدك مو وكت هسّه الرحيل
ريت تبقه يا سليل الأتقياء
*٨*
ما قِبل إبن الحسن هوَّ يظل
وافق حسين و رخصله ورتحل
عالعِده القاسم هجم وإلهم وصل
عرّف ابنفسه و ينادي ابهالنداء
*٩*
لو تنكروني أنه إبن الحسن
والدي سبط الرسول المؤتمن
يشهد اعليه يظل كل الزمن
من أقاتلكم تره إلكم جزاء
*١٠*
بالحرب حين اليقاتلها العِده
يرهب العدوان كلها الحاقده
كل قتاله و النفس هِيّ فدِه
للحُسين الوالي وارث لأنبياء
*١١*
موّت اتلاثين وأكثر بالحرب
مِن قتاله كل شخص صار ابرعب
كل عدوّه من يبارز ينضرب
يشبه الكرار سيد الأوصياء
*١٢*
يا حسافه مِن عدوّه ينغدر
ضربوا القاسم يويلي و نطبر
عالترب طاح و تخضّب ما گدر
للحُسين إينصره وبأعلىٰ العطاء
مهيمن يوسف الموسوي
قصيدة رقم ٤٠
موشح للقاسم بن الحسن ع
جاسم العريس يمشي بهيبته
وآخر النظرات جانت نظرته
آخر وداع وحزن بالعايله
بين رمله وجاسم بطف كربله
اگباله وگفت بالدمع تنظر اله
وسولفن بالطف دمعها ودمعته
جاسم اتعنه وبرز وسط الجمع
والحوافر تسحگ بذاك الضلع
بالمصيبه الليله وانهل الدمع
بالدمه العريس صارت حنته
صارت الحنه بدمع ماي الجفن
وأمه رمله تنحب اعليه وتون
ماتبطل لبست اثياب الحزن
من هوت اعله الگاع ضلت رايته
گبل لا يوگع على الغبره ذبيح
بالدمع جاسم سمع أمه تصيح
گبل عمك ردت بالحومه تطيح
صاح ابشري يمه صاح وسمعته
بعد ماطاح وتخضب بالدمه
بهل مصيبه ناحت املاك السمه
اهنانه صاحت رمله فدوه الفاطمه
شنهي ابني اتهون كل امصيبته
ابد ماقصر بساحات النزال
والجمال ايغار من عنده الجمال
أمه عرفت مايرد جاسم محال
هذا كل المختصر من قصته
لاتنسون والدي ووالدتي وابني عباس من الرحمه والغفران
خادمكم الشاعر رياض الرسل الجابري
قصيدة رقم ٣٨
شوط كربلائي بحق القاسم بن الحسن "عليهم السلام"
أنه القاسم تعرفوني ابويه المجتبى المعصوم
ابن سبط النبي طــٰه من خير النسل بالگوم
*١*
طلع من الخيم بازر بشجاعه راح للميدان
برز بمهنّده گاصد يحارب راد هالعدوان
يگلهم جيت آنه الكم اريد انصر أنه الوليان
لجل ثورة إمامي حسين
اريد أنصر أنه هالدين
فلا يردني يجيني البين
اضحّي بالعمر گصدي اريدن كل رضا القيوم
*٢*
أنه القاسم اجيتلكم على المبدأ تعرفوني
فلا هاب الخطر منكم صعب انتم تمنعوني
احاربكم على الحگ ولو كلكم تأذّوني
اجيت بهمتي گاصد
بنصر للخالق الواحد
اعادي كل شخص حاقد
اقدّم هالعمر كله واضحّي بالحرب هاليوم
*٣*
يا اهل الحقد و الشر يالبيكم كثر ظلام
غضبتو الخالق المعبود سرتو بكل عكس لحكام
تضدون الحُسين شلون تخلّونه بأذه و آلام
هذا ابن النبي الهادي
اجه للحگ تره ينادي
لجل دينه العمر فادي
يا شيعة بني سفيان تره الباطل ابد ميدوم
*٤*
بالحومه دخل بارز و بهمّه على الاشرار
يگلهم يا وسف بيكم واحدكم تره غدار
بايعتو الحُسين آلاف صبحتو لحضرته أنصار
يخلّصكم اجاكم راد
لاكن هالغدر ينساد
فلا بيعه و كلام الفاد
بيّن كل شخص منكم حقدكم مستمر للدوم
*٥*
يحارب كل كتيبه بزود ولا ردّه العدد كثره
باقي للولي المعصوم يريد الثورته نصره
يخلّدها الـٰـه الكون رغم كل الذي يسره
بدمانه خالده تصبح
بس عالحگ تره يربح
رغم كلشي أنه أنصح
اريده يالجيوش اليوم فلا گلبي يظل مهموم
*٦*
لاكن بالحرب صاير من كثر العطش تعبان
بس باقي يحاربهم رغم هو الذي عطشان
رضا ربه يريد يكون رب كل الانس و الجان
يحس واجب يحاديهم
يقاتلهم يأذّيهم
اجه و گاصد تره ليهم
فلا اتهمه عددهم حيل فلا گلبه بحزن مشؤوم
*٧*
جاسم بالحرب معروف يشبه والده بحربه
ضربته بسيفه لجل اعداه قوه حيل و بهالضربه
رغم هو بزغر عمره صعوبه يواجه و گربه
عدوّه خايف من قوته
يدري لو اجه ايموته
فلا احّد تره ايفوته
يحارب وبشجاعه هواي هذا الهاشمي معلوم
*٨*
كتايب خايفه منه رغم عمره قليل أعوام
بني هاشم تره بيهم بساله وبمدى الايام
والقاسم ورثها هواي شجاع و عالعده اللوّام
لاكن وضعه صار اصعب
عطش هو الذي سبّب
خلّه هالعده يگرب
اجه يضربه العده وسفه على راسه و نزف لدموم
*٩*
تحوط بآل آميه و حيف تضدّه الخانوا الاطهار
يغدرونه و يضربونه بفعلهم غاضب الجبار
شاب و ينقتل وبساع من هذا البشر غدار
الجسد فوگ الثرى مرمي
توذّر و بكثر مدمي
فلا من الاذه محمي
مات بغدرة الانذال من عمره بعجل محروم
*١٠*
وضعه القاسم و بالطف يخلّي كل محب ينحب
صريع أعلى الأرض مطروح اويلي هالأمر يصعب
ليشوفه بالطفوف يصير دمعه عالوجن ينحب
ضحه بالعمر مفخور
ميّت و بحقد مغدور
من اهل الكره و الجور
وبقت جثته على التربان كل هذا الأمر معلوم
مهيمن يوسف الموسوي
قصيدة رقم ٣٦
ميمر للعباس عليه وسلم
عباس راجل للموت. ويرتل بقرآنه
يم الحسين أوجب ودنك راسه
من عطشت اسكينه أنجوه بأحساسه
وأحتار ابو اليمه بطلب عباسه
مابين روح ولتروح روحه غدت حيرانه
حيرانه من حيث اليودعه أمعتب
وينظر أخيه بالغضب يتكلب
من سيفه ساحب شبر دلهم واغضب
دمّع وكله الله وياك عباس لاتنسانه
المهره اجت من شافته الوحدهه
وغارت وهوه بعده ما لاكدهه
وأرخه الرسن ليهه وكرب موعدهه
وعالمشرعه بطرفة عين عباس صار امجانه
بمجانه من دمهم غدت كباره
هذا الحجي بعده أبداية ناره
صارت الروس اعله النهر طشاره
والنهر من كد الخوف للجربه فك ذرعانه
من خثرت الدم سيفه اصبح احمر
وجم فارس المن عالمهر بي شمّر
أنّي أنا العباس صاح وكبّر
والنعم صاحاله حسين للسرفنلهه اردانه
للعلم مارايح يقاتل عباس
رايح يجيب الماي روحة احساس
لو للحرب نيته اشيسوي بهالناس
جا فضت ورد حسين مو عالرمح عنوانه
سبحانه من جلت حكمته بهايه
بالطف تطيح الايه بعد الايه
معناهه اكو واحد يشيل الرايه
مهدينه يارب الكون اجعلنه من اعوانه
حسين صادق العقابي
قصيدة رقم ٣٤
موشح للعباس ع
يا علي إبنك وِفه ابكل العهد
للحُسين ابكربله صَرْت السند
.......
حال عباس الگُمر يوم الطفوف
يا علي حامي الحمه ريتك تشوف
ناصرت إبن النبي باصعب ظروف
عاهدت ربي أنصره بالشدد
.......
من بقه هو وحيد ابكربله
لا مُناصر عنده بس العايله
لا بني هاشم ولا الوياه صِله
قدموا كل المُهج و بمعتقد
.......
يا وصي المصطفه شفته وحيد
ثورته ضد الظلم هو يريد
سيدي گتله أنه لجلك شهيد
فدوه دمّي يا إمامي و الجسد
.......
وأطلبت رخصه أحارب بالحرب
أنصره ضد العده وميظل صعب
وافق حسين الولي ابهذا الطلب
بالحرايب كون اوفي بالوعد
.......
يا أبو اتراب اهجمت ضد العِداء
وبشجاعه وبإراده وبولاء
شاهد اعليه يظل رب السماء
ما اعوف حسين آنه للأبد
.......
حاربت كل الكتايب و الفرق
من أطبها يا إمامي تنفرق
والسبب قوّة حسامي كالبرق
قوّتي هاي ابفضل ربنه الأحد
.......
من بعد هذا اوصلت قرب النهر
ما شربته الماي قبل إبن الطهر
عايف حسين و دِليله كالجمر
لو عياله الواعدتها ابماي أرد
.......
يا علي اسگي العطاشه غايتي
وإنملت مِن النهر كل جربتي
أنصر حسين و ثورته حاجتي
من أجل ارضي الجلاله و الصمد
.......
لاچن العدوان حوّطني تره
يمنتي انضربت غدر والدم سره
وحملت سيفي ابيساري ابمفخره
عن كلامي و غايتي ربي شِهد
.......
چان همّي جربتي إتكون ابسلام
كون توصل للعيال و للإمام
وللنسه وأطفال واللي بالخيام
والعِده وسفه ضرب أيدي ابحقد
.......
يا علي وإيدي اليسار اتگطعت
لا يمين ولا يسار اللي بقت
جربتي فوگ الأرض هي هوت
والسهام اعليه كثره بالعدد
.......
يا علي وصابوا جربتي بالسهم
سال منها الماي بويه يا شهم
عالصدر والعين صابوني الزلم
بالسهام وكل جهه ضدي أجد
.......
يا علي راسي تصوّب بالعمود
و العده ضدي تره من كل حدود
بالحياة الدنيا ما ظلّي وجود
للمنيّه يا إمامي مستعد
.......
كون تقبل يا علي ابهالتضحيات
أرضي ربّي وبالحشر كون النجاة
من فديت وللولي كل الحياة
والشهادة عندي احله امن الشَهد
.....
مهيمن يوسف الموسوي
قصيدة رقم ٣٢
تجليبة بحق العباس عليه السلام
مآسي يا نهر منّك كثر بيها
بحسره و لوعتي حين آنه احجيها
*١*
يا نهر الفرات و ليش وي عباس
ما منّك شرب مايك ابد ما جاس
بعطش باقي فلا تروى ابو النوماس
كلها روحته منك تأذّيها
*٢*
طلع من الخيم لجلك اجه الوفاي
ابو فاضل تعنّه بگربته للماي
يسگيها العطاشه بهالأمر وفاي
تقبل يالفرات و ما يروّيها
*٣*
هذولي آل الرسول المصطفه المختار
عطاشه بكربله اتضدهم عده لشرار
ومايك ما يشروبنه رغم هالصار
كل قطرة فلا منّك وصل ليها
*٤*
ابو فاضل وصل يمك فلا يشرب
رغم عطشه و چبدته بالحرب تلهب
اخوه احسين يذكر و الخدر زينب
ماي و بالچفوف اصبح يبدّيها
*٥*
يحارب يمّك و جاه العده بغدره
يمينه نگطعت و اصبح صعب أمره
نوبه وبحقد ونضربت اليسره
چفوفه تگطّعت كثره مآسيها
*٦*
والگربه إجت ليها سهام هواي
وابو فاضل عليها منقهر ولهاي
فلا يگدر يصل لجل الخيم عنّاي
طايح عالأرض صعبه ايتعنّيها
*٧*
حگي بهالعتب يمّك أبو فاضل
يموت وما شرب مايك ولا حاصل
اجه ليه العده بسيفه و غدر قاتل
ناره بالعطش لا ما تطفّيها
*٨*
ليش و منحرم منك ابو الغيره
يلوج و حالته گربك صفه بحيره
وضعه يا نهر كل لوعته اچبيره
روحه صايره بحسره معانيها
*٩*
تحسّر ما گدر مايك يصل لخيام
بسبب جيش العده و غدره صفه بآلام
يحطونه و يغدرونه تره الظلام
جثته امن العده كلشي جره اعليها
*١٠*
يا نهر الفرات و منك الحسرات
يمّك ضامي عبّاس نقتل من مات
عانه امن الاعادي بس الاذه و لوعات
تأذّه بكربله كلها و بواديها
مهيمن يوسف الموسوي
قصيدة رقم ٣٠
تجليبة للأنصار ع
نقســـــمـ بالألــه وبالنبي والـديـن
حد گطع المناحر ما نعوف حسين
*١*
اسمع بالطفوف شصاحو الأنصار
غير حسين ما نهوه ولا نختار
خل يسمع يزيد وزمرته الاشرار
احنه بحب ابوالسجاد متمسكين
*٢*
ربينه بحب علي ولحسين بايعناه
انصـاره وعهــد منعـوفه لا والله
عفنه ديارنه وللموت اجينه وياه
لبوالسجاد فدوه الواحد وسبعين
*٣*
لِبِن مرجانه وصلو اخبآرنه ولَيزيِد
غير حسين قائد للحكم مَنريد
عهد ارجال هذا وكلنه ايد بأيد
عله رايه ومنهجه للموت متوحدين
*٤*
اسمعوا يا بني سفيان صرختنه
كلّا يا يزيــد الراد ذلّتنـه
بسم حسين راح انعلّي رايتنه
نحيه نموت احنه بحبه منصورين
*٥*
لو مو مرّه نتگطّع الف مرّه
منّ حسين ابد هيهات نتبرّه
تبعناه عن عقيده ونعلم بسرّه
وصرنه بحب ابوالسجاد مجنونين
*٦*
ميّهمنه عددكم يا بني سفيان
احنه ويالحُسين انصار مو عدوان
باجر بالحشر يتبيّن الربحان
منّ ندخل الجنه ونربح الدارين
سيد زيد الفحام
قصيدة رقم ٢٨
موشح بحق مسلم بن عقيل (عليه السلام)
دخنت والكوفه شبت نارهه
بيهه مسلم كَالو بأخبارهه
......................
طبهه مسلم والزلم تردم زلم
ضلت وبالخنكَه ماتكَدر تشم
بيهه مسلم نار شبت والنعِم
من جهبهه الحرب مسلم دارهه
......................
رجفت الحيطان مو بس العده
ارجال فوك ارجال ذبهه امدده
جيش هُمه وهوه جان الوحده
موت بيهم من شهر بتارهه
......................
والعُبَيِدِ الله ردوله خبر
جيب جيشك احنه تيهنه المفر
ارسلتكم كَلهم اني ال بس نفر
ضربته كَالوله جيش ابحارهه
......................
احتارت الفرسان بس من صرخته
صوته يذبح كَبل شدة ضربته
حيدره وعباس جانت صولته
اليمنه تاهت بيهم من اشمالهه
......................
هذا مسلم لو علي كلمن سأل
جاوبه ابسيفه غضب ربك نزل
سيفه حش اركَابهم حش الاجل
بني هاشم كفو من افعالهه
......................
حاصر الكوفه كأن جيش وعدد
ضربته توضيح الله الصمد
لم يكن من ضربته كفواً أحد
للقيامه ايشد جيوش ارحالهه
الشاعر ياسر العارضي
قصيدة رقم ٢٦
فائزي بحق طوعة و مسلم
طوعه يظل طول الدهر خالد ذكرها
عالي فضلها و القدر خالد ذكرها
*١*
مسلم وكت كل العِده هي تغدره
كلمن يأيده اعله النصر وسفه ينكره
طوعه الشريفه الطاهره صارت تنصره
من كل رجال أهل الحقد حتىٰ خطرها
*٢*
عنها إذا ابدي الشرح صعبه وصفها
هاذي كريمه و النعم عالي شرفها
ترضه الصمد رادت تره هذا هدفها
مسلم تقدمله النصر من كل دهرها
*٣*
حين البقه مسلم فلا عنده مناصر
هو فلا يَمّه شخص وبوضعه حاير
صاير وحيد و يا اسف بين العساكر
بالكوفه ظل يمشي و فطن من كل مكرها
*٤*
من التعب صدفه وگف راد استراحه
يم باب طوعه الطاهره و عنده سلاحه
لا ما يذل نفسه ابد باقي ابصراحه
رايد يحقق غايته و رايد نصرها
*٥*
من تنتظر طوعه لإبن يمته يجيها
وگبال منزلها بقت صعبه عليها
مسلم بقه هو ابقهر راد ايحچيها
نفسي أنه بيها العطش يلهب جمرها
*٦*
جابت إله ماي العَذب ظل يشرب الماي
طوعه ترد هي تره لا تبقه ويّاي
واگف قرب داري صعب اتأذّه وبهاي
لازم تروح اعله الاهل إنته ذخرها
*٧*
بالكوفه هم عندك أهل لازم تره إتروح
مسلم سكت لا ما حچه كل گلبه مجروح
حاير يگلها بيا أمر متعذبه الروح
والكوفه صارت بس خطر واضح أمرها
*٨*
طوعه تگله لا تگف إنته على الباب
أرفض أنه ابابي تظل من الناس لأجناب
ميحل إلك هذا أبد ما عندك أسباب
كل وگفتك هي تظر و يبقه أثرها
*٩*
مسلم عليها من يرد ما عندي أنصار
بالكوفه ما عندي أهل هذا تره الصار
عمي علي فارس بدر آنه ابن الأطهار
من آل هاشم هالنسب بأحسن بشرها
*١٠*
مسلم أنه جاي ابنصر ابن الزچيه
طوعه گبل وأستقبلت بأحسن تحيّه
تحمي اله من العده من آل اميه
لاچن ابنها يا وسف هو الغدرها
مهيمن يوسف الموسوي
