أروع القصائد الحسينية من الشاعر الشيخ كاظم المنظور الكربلائي "رحمه الله تعالى"
/channel/AlMandour1442
#زنجيل
قصيدة رقم ٦٦
لطم «حسيناوي + عجز دارمي»| مهر الحسين "عليه السلام"
الشاعر الشيخ كاظم المنظور الكربلائي
"رحمه الله تعالى"
گلـي يالميمون وين والينه
راح أبـــو السجاد لو يرد لينه
* * *
آنه يالميمون بيدي جدمتك وإنخمش گلبي
ومن رحت بحسين بألله ودعتك والباري حسبي
وبگت روحي إتلوج وأنتظر جيتك وإعيوني تربي
جيتني خالي حسين چا وينه راح إمن إدينه
* * *
بالله يالميمون رد عليه إجواب وإخفي ونيني
سرجك المگلوب صاب گلبي إصواب وأثگل حنيني
هذا دم حسين لو حَمار إخضاب ما تدليني
همهم الميمون وأهملت عينه راح إمن إدينه
* * *
دم يهالميمون وجهك إخضـابه والگلب عطّب
من وريد حسين لو من إصوابه وجهك إتخضب
گلها سهم البين بالگلب صابه إشمالچ يزينب
دم أخـوچ حسين ما تعرفينه راح إمن إدينه
* * *
ليش يالميمون مندهش حالك مجبل عليه
تجر بلجامك وتصهل إشمالك ونتك خفيه
جيتني خالي وين خيّالك عفته رميه
وين أخويه حسين عن صواوينه راح إمن إدينه
* * *
بالله يالميمون لهفتي ردها وهوّد عويلي
إگلوب هالأيتام لا تمردها هدمت حيلي
هاي سكنه إتريد مني والدها وفجعت دليلي
چن أخويه حسين يتـّم إسكينه راح إمن إدينه
* * *
ليش يالميمون إسبيتلي حالي وهدمّت داري
وإگطعت بيّه إبطيحت الوالي آ ينكساري
وإگطعت گلبي إبسرجك الخالي وهيّجت ناري
حــرم ظلينه ومن يحامينه راح إمن إدينه
* * *
الشاعر الشيخ كاظم المنظور الكربلائي
"رحمه الله تعالى"
#زنجيل
قصيدة رقم ٦٤
موشح في حق علي الأكبر (ع)
اشبه الناس برسول الله خُلُق
طاح عالتربان واينگط عُشق
علي الأكبر عارف بحق الإمام
وصل اعله مرتبه واعله مقام
اعليه افضل الصلاةِ والسلام
ذايب بحب الامامه ومُحترق
حسين من يتشوّق الجدّه الرسول
بوجه الأكبر نظرة عيونه تطول
سر جماله وسر صفاته والاصول
بعلي الأكبر كلها صارت تنطبق
الدائره الاولى النبوّه الطاهره
وعلي الأكبر صار ثاني دائره
نال عِصمه مستحبّه وفاخره
بين جدّه النبي وبينه هالفرق
بي صفات النبي لكن مو نبي
يخاطب حسين بخطابه الطالبي
اوَ لَسْنا على الحقِّ يا أبي
لا يُبالي المرءُ إن ماتَ مُحق
چان أول هاشمي بدرب الفده
الگاع مالت حين ودّع والده
طلع من باب المخيّم للعده
ناوي بالميدان يسحقهم سحق
الحرب عنده معرفه وسير وسلوك
شمس بالتوحيد ما مرها الدلوك
غده بسيفه ايكسّر اصنام الملوك
وعن بُعد ينظر قضيته وعن عُمُق
بكر ابن غانم يعدّونه شُجاع
بالحرب وتخاف من عنده السِباع
علي الأكبر جاب راسه واستطاع
وعالترايب خله جسمه منصعُق
شاب لاچن شيّب الجيش الخؤون
بالحرب من حيدره وارث فنون
كاتب اعله السيف اهلاً باليجون
وبمضيف الموت يلحقهم لحق
بطشة الكرار بالعسكر بطش
مثل خرزات السِبَح طشّاها طش
لاچن اشتد بيه ياناس العطش
رجع لحسين وعليه گلبه يرق
ايگلّه يوليدي ضِمايه وماكو راي
ارجع ارجع جدّك اليسجيك ماي
راح مستبشر علي الأكبر بهاي
وظل يردد إنَّ وعدَ اللهِ حقْ
زلزل العسكر وجيشه برجعته
ولن برز مُنقذ العبدي بغدرته
بالرمح ويلي طعن ظهر الفته
وهامته بالسيف فالقهه فلِق
عله عينه الدم نزل ماظل يشوف
والفرس بي رجعت ابين الصفوف
ولْيه صارت عله الأكبر بالسيوف
وظل ينوح الطيحته غرب وشرق
حضر يمّه حسين عينه ذارفه
يصيح يوليدي عله الدنيا العفه
بغيبتك مصباح دنيانه طفه
ياعلي وضاگت بعيناي الطرق
جابو الأكبر اموذّر يجري دم
ابو فاضل شايله الصوب الخيم
زينب اتلگته من بين الحرم
صاحت وبعيونها اظلمّ الافق
فراس المحمداوي
٧ محرم ١٤٤٣
#زنجيل
قصيدة رقم ٦٢
موشح للأكبر عليه السلام
شمعت الهادي علي الأكبر طفه
وبني شبه الهادي كله المصطفى
ديني رايد مني يايمه العمر
گالها بصوته بدليله المنفجر
يمه ليله شدي ظهرج بالصبر
وبالفخر تبقين مو متحسفه
ومن نزل ابني علي صوب الحرب
چنه من صدري طلع هذا الگلب
وعيني مابطلت دمع ظلت تصب
للولد هل عين ظلت ذارفه
ليل صار بعيني ماچنه ظهر
من وصل ابني لعد صوب الكفر
بصدري صاير مو گلب چنه جمر
والضلوع منل لطم متخسفه
لوجه الحسين انظرت وعيونه
من خلاله اعرف ابني شلونه
فجئه لن ختلف شكله ولونه
يعني خطره حالت ابني عارفه
جابه الحسين وحظنت اوليدي
وتحت راسه وسدتها الايدي
زيدي ياونتي ودوعي زيدي
صوتي مبحوح بلطمتي هادفه
امسح بدمه واجر حسراتي
وغسلت دمه بدمع عبراتي
فطرت حته الصخر اهاتي
والدموع بعيني ما متوقفه
اه ياشبه النبي خير البشر
مابقه من الشبه لون واثر
جسمك وراسك فصل عنهن نحر
بالشبه بس العطر لا مختفه
الحمدلله
كرار الزهيري
#زنجيل
قصيدة رقم ٦٠
للقاسم عليه السلام
بحر طويل / شوط كربلائي
........
يوليدي الگلب مجمور وانت موذر أگـــــبالي
گوم أكعد يـماي العين لا تتركنـي يـالـغــــالي
****
ناديتك يـــجاســــم گـوم امــك ضــلــــت بحـــيره
من تموت امــوت وياك بعـــدك مــحـنتي جبـيره
سبيه شلون اروح أبين وادم باعـــــت الغـــــيره
امــك والــگلب نـاداك
يا جاسم أخذني وياك
يجرح يالــولد فـركاك
بيتي انهدم من ونيت وتهدّمــت آمــــــالـي
*
يروحي ومنيتي ودنياي ظلمه الـــــدنــيا بغـيابك
احشمك والكلب ملجوم وآنه اتنــطر اجــــوابـك
ييمه بداعـــــت العباس لا تفجعـــني بمـــصابك
ربيتك ســـــهـــرت أيام
بيك اتبـــاهـا يا جســـام
موش أعله التراب تنام
صعـبه أمك تظل تنوح كلفه التفــگد الـــــوالي
حلـم الوآلـده معروف تشــعل شمـــعة الزفه
وتفرح بالـولـد وتريد حنّه تشـــاهـــــد بجفه
ليش تعوفني وتروح وبحضن الــترب تغفه
يماي تبده مـــــني الماي
بس الدمــــــــع ظل وياي
يريت الوذروها أعضاي
واموتن گبل لا انعاك واشوفك ميت أكبالي
يحلمي وضاعت الاحلام مــن عفتك عـــله الغبره
أكضي الليل بالحـسرات وتلهـب بالـگلب جــمره
أنه تمنيته ذاك الـســيف يگطع نحـري مــو نحره
بعد عينك شفت أهوال
اديــه اتـگـيدت بحــبال
ييــــمه بولـيت الانذال
عله متوني السياط تحوم واحس جروحي تنعـــالي
اعتب والـــــجروح تزيد من باب الابــــن وامــــه
صح وليدي ضــي العين ومثل الهــــوه الاشتمه
بــــس اثنينه وللـــــــــه فدوه لأسم ابو الـــــيمه
ابد ما جازي ابو الاكبر
فـــدوه لعـــمره أتــوذر
ارفع راسـي بالمحــشر
وافوز برضه الزهره هناك بهــــاي الخدمة هــنيالي
مهند المياحي
#زنجيل
قصيدة رقم ٥٨
موشح
القاسم بن الحسن عليه السلام
زلـــزل ابسوح الحرب بيهــم فتك
هذا شبل الحسن بالحومه اشترك
طب عليهــم چــن علي المرتضــى
تجدح اعيونه غضـب تسعـر لظـى
صال عالفرسان چـــن حــل القضا
كلمـن اليوصـل لعــد جاســم هلك
اتوغــل ابزوده وصل يــم العــدى
چم وچم فــارس حسامــه مـدده
طشـر احشــود العساكـر ساعــده
منين هــذا امنين لويانـه اشتبـك
گلهم آنــه الفارس آنه ابن الحسن
للنبــي المختــار سبطــه المؤتمـن
حسين عمـــي كالاسيــر المرتهــن
حاطته خيــول العدى بالمعتـــرك
اليوم اراويكم أنه انجوم الظهـــر
اگلب الحومه گلـــب بهـــل الكفـر
ما يهمني ايزيد لا شمـــر وزجـــر
ضجــت الأكـــوان وإنـــدار الفلك
صار قــدوه جاسم الكــل الشبـاب
ثَبَّـــت ابصمصامــه آيات الكتــاب
محـــد اينوله لچن غــدر الذئـاب
غدرتـــه من انحنى لشسعه بــرك
من وگع بي عمـه الحسين انفجـع
رمله صاحت طاح گلبي من وگــع
شاله بيده لخيمة امـه مــن رجــع
يبنــــي كلمن صابك أبنــاره هلك
كلمات عمار الراشدي
#زنجيل
قصيدة رقم ٥٦
موشح بحق القاسم بن الحسن المجتبى "عليه السلام"
مهيمن يوسف الموسوي محرم ١٤٤٢هـ ٢٠٢١م
سيدي ارخصني احاربها العداء
انصرك آنه ابدمائي ابكربلاء
*١*
يا إمامي و سيدي عمي الحُسين
من أجل كل ثورتك عالظالمين
ريت كون اوياك من الناصرين
أجلي عنّك يا أبو اليمّه العناء
*٢*
واجب إعليّه أضحيلك دِمه
يا حُسين ابن الزچيّه فاطمه
هذا تكليفي وحگ ربّ السِمه
والعمر لا ما يوفي و الدماء
*٣*
عن سبب ثاني إجيتك يا إمام
بالحرب كثره العِده أهل اللئام
ماتوا انصارك يبن خير الأنام
قدّموا لجلك مُهجهم وبإباء
*٤*
يا حُسين إبن النبي جيت ابهدف
لو أقاتل بالحرب هذا شرف
نصرتك فعلاً فلا ما تنوصف
كل فضلها ايعرفه بس رب السماء
*٥*
من إجيتك وأعتني يبن الرسول
عن وصية والدي بيها اشيگول
يا بُني حين العِده العمّك ينول
لازم اتنصره و تقدمله الولاء
*٦*
من حُسين و صاير بإرض الطفوف
ما إله أحّد ينصره إنته تشوف
ضِدّه صارت مِن عدوّه بس سيوف
إبني يالقاسم يجب إنته الفداء
*٧*
رد حُسين ابعَبرته و دمعه اليسيل
ما أريدك يا بُني تصبح قتيل
شاب بعدك مو وكت هسّه الرحيل
ريت تبقه يا سليل الأتقياء
*٨*
ما قِبل إبن الحسن هوَّ يظل
وافق حسين و رخصله ورتحل
عالعِده القاسم هجم وإلهم وصل
عرّف ابنفسه و ينادي ابهالنداء
*٩*
لو تنكروني أنه إبن الحسن
والدي سبط الرسول المؤتمن
يشهد اعليه يظل كل الزمن
من أقاتلكم تره إلكم جزاء
*١٠*
بالحرب حين اليقاتلها العِده
يرهب العدوان كلها الحاقده
كل قتاله و النفس هِيّ فدِه
للحُسين الوالي وارث لأنبياء
*١١*
موّت اتلاثين وأكثر بالحرب
مِن قتاله كل شخص صار ابرعب
كل عدوّه من يبارز ينضرب
يشبه الكرار سيد الأوصياء
*١٢*
يا حسافه مِن عدوّه ينغدر
ضربوا القاسم يويلي و نطبر
عالترب طاح و تخضّب ما گدر
للحُسين إينصره وبأعلىٰ العطاء
تمت و الحمد لله تعالى
مهيمن يوسف الموسوي
٢٠ شهر ذو الحجة ١٤٤٢هـ
٢٠٢١/٧/٣١م السبت ١٠:٤٢م بغداد
#زنجيل
قصيدة رقم ٥٤
شوط كربلائي لسيدي ومولاي ابو الفضل العباس عليه السلام واسالكم الفاتحه للوالد رحمه الله
@@@
ناطر طلـــعت العباس يحصد روس عدوانه
ناده حسين للمهيوب عضيده وهيبة اخوانه
****
گوم بساع ياعـــــباس جيب الماي للاطفال
تبقى تناطر لجـــــيتك هيه والــــحرم وعيال
هاك الــــجود ياخويه لجله صــارع الابطال
تدري العطش اذاهــه
وانت البطل رجواهه
تبَرد جمرة احشـــاهه
ومثلك بالكرم معروف وبيك الفــضل عنوانه
****
گال ابشر يبو السجاد وآنه السيــــف بيمنك
اجيب المـــــاي تدلل وگبل ماترمش بعينك
شنهي الماي لاتحتار وعمري فدوه لسنينك
وطب المعركه وزأر
وآنه الشبل من حيدر
وخلي الـــكون يتغير
كلهه تصيح ياســــتار هذا الـــمرتضى جانه
****
شال الجـــــود والرايه صـــوب الماي متعني
شبل المرتضى الكرار صــــاح المعركه فني
ياشيــــــعه بني سفيان فنــــــه اليگترب مني
افــــــرقكم آنه بزودي
لازم اترس لجــــودي
ارجع اوفي لعـــهودي
لخيـــــــامي ارد غانم واروي ݘبود عطشانه
****
فرقهه الجموع شــتات شردت كلهه من عباس
جحيم المعركه صارت من صولة شديد الباس
بركان وزلم يحــــــصد سيفه صاحب النوماس
وصل للمشرعه المهيوب
ݘبده من العطش ملهوب
صاح لنفسه خلهه اتوب
شلون اشرب لذيذ الماي گبل حســــين عود آنه
****
ترس جـــــوده ابن حيدر شاله ورجـــــــع لعياله
گطعوا وســـــــف ليمينه وگطعوا بعد لشـــــماله
وصابوا بالســـــــهم عينه وناده تصـــــعب الحاله
ماهمني ســــــــهم عيناي
والاصـــعب تراهه بهاي
من جودي يطيح المــــاي
وتهدني صيحــت الاطفال اشــــــو عباس ماجانه
****
وصابوا بالعـــــمد راسه ناده حسين يامـــــظلوم
علمـــــــاي اعتذر خويه وآنه لهل السبب مالوم
واعوف ݘبود عطــشانه عفتهة وغادرت هليوم
ناده حســــــــين ياعباس
بيك افخر وشــيل الراس
صوتك يجرح الاحساس
كسر ظهري يخويه الصار وزاد بگــــلبي لحزانه
****
خادم الامام الحسين(عليه السلام)
علي الحصناوي
#زنجيل
قصيدة رقم ٥٢
موشح بحق ابي الفضل العباس "عليه السلام"
مهيمن يوسف الموسوي ١٤٤٣هـ ٢٠٢١م
يا علي إبنك وِفه ابكل العهد
للحُسين ابكربله صَرْت السند
*١*
حال عباس الگُمر يوم الطفوف
يا علي حامي الحمه ريتك تشوف
ناصرت إبن النبي باصعب ظروف
عاهدت ربي أنصره بالشدد
*٢*
من بقه هو وحيد ابكربله
لا مُناصر عنده بس العايله
لا بني هاشم ولا الوياه صِله
قدموا كل المُهج و بمعتقد
*٣*
يا وصيَّ المصطفه شفته وحيد
ثورته ضد الظلم هو يريد
سيدي گتله أنه لجلك شهيد
فدوه دمّي يا إمامي و الجسد
*٤*
وأطلبت رخصه أحارب بالحرب
أنصره ضد العده وميظل صعب
وافق حسين الولي ابهذا الطلب
بالحرايب كون اوفي بالوعد
*٥*
يا أبو اتراب اهجمت ضد العِداء
وبشجاعه وبإراده وبولاء
شاهد اعليه يظل رب السماء
ما اعوف حسين آنه للأبد
*٦*
حاربت كل الكتايب و الفرق
من أطبها يا إمامي تنفرق
والسبب قوّة حسامي كالبرق
قوّتي هاي ابفضل ربنه الأحد
*٧*
من بعد هذا اوصلت قرب النهر
ما شربته الماي قبل إبن الطهر
عايف حسين و دِليله كالجمر
لو عياله الواعدتها ابماي أرد
*٨*
يا علي اسگي العطاشه غايتي
وإنملت مِن النهر كل جربتي
أنصر حسين و ثورته حاجتي
من أجل ارضي الجلاله و الصمد
*٩*
لاچن العدوان حوّطني تره
يمنتي انضربت غدر والدم سره
وحملت سيفي ابيساري ابمفخره
عن كلامي و غايتي ربي شِهد
*١٠*
چان همّي جربتي إتكون ابسلام
كون توصل للعيال و للإمام
وللنسه وأطفال واللي بالخيام
والعِده وسفه ضرب أيدي ابحقد
*١١*
يا علي وإيدي اليسار اتگطعت
لا يمين ولا يسار اللي بقت
جربتي فوگ الأرض هي هوت
والسهام اعليه كثره بالعدد
*١٢*
يا علي وصابوا جربتي بالسهم
سال منها الماي بويه بالشهم
عالصدر والعين صابوني الزلم
بالسهام وكل جهه ضدي أجد
*١٣*
يا علي راسي تصوّب بالعمود
و العده ضدي تره من كل حدود
بالحياة الدنيا ما ظلّي وجود
للمنيّه يا إمامي مستعد
*١٤*
كون تقبل يا علي ابهالتضحيات
أرضي ربّي وبالحشر كون النجاة
من فديت وللولي كل الحياة
والشهادة عندي احله امن الشَهد
تمت و الحمد لله تعالى
مهيمن يوسف الموسوي
٥ محرم الحرام ١٤٤٣هـ
٢٠٢١/٨/١٤م السبت ١٠:١٨م بغداد
#زنجيل
قصيدة رقم ٥١
(زكاة العشره) ميمر للأنصار عليهم السلام
خلينا وياك نموت لازم نوافي العشرة
أسهل درب للجنة ربك خلاك
ويختلف طعم الموت يحسين وياك
انصارك ونسحگ على خشوم اعداك
ما بينا اليهم بالموت خل تطمئن الحرة
لا تهتم وبجفوفنه أعلامك
ماكو مهم والمهم بس خيامك
ويانه يبن خير العمل مادامك
نمطر عليهم سجيل وجف اليلاوي نكسره
_
كسروا اغماد سيوفهم انصارك
بيهن يبو الأكبر نبرّد نارك
سيوف وتريد تحامي عن بتارك
حتى السيوف بهاليوم توافيك يبن الزهرة
_
أنصار عندك لو دنت ساعتها
يختَلْ العسكر من يصد فزعتها
بطف كربله اعصار ونزل صولتها
دونك يبن داحي الباب ما بينا اليعز نحره
_
اخترنه طريقك مو طريق الذله
بهذا الطريق الروح ابد ما تغله
عشاگ والعاشگ يضحي لخله
هنياله كلمن يحسين وياك يختم عمره
_
مو "قرضاً" اليفدي دماك بدمه
هذي زكاة العِشرة يابو اليمه
منعوفك ومنطين لأمك كلمه
يا گلب يگدر يحسين من النبض يتبره
_
فلسفة حبك اكبر من الإدراك
سهْل وصعب واضح ومبهم معناك
خطيت ذكرك يبو الأكبر بدماك
انت الوجود ومعناه وبيدك تسيّر أمره
___
الشاعر عبد العظيم احمد الابراهيمي
#زنجيل
قصيدة رقم ٤٩
فرسان الشهادة ( تجليبة للانصار)
~.~.~.~.~.~.
لخادم أهل البيت(ع)
حســام الناصري
هـلـه بــأنـصار ديــن الله وهلا بـيـــهه
الـسـمه وأهـل الـسـمـه كَــامـت تـحـيّـيهه
* * *
بِـدَه وكت الـنـزال وصالـت الـغـيـرة
وبِـدَه الحـسـيـن نـظـرة وياهه تـكبـيره
يشوف أصحابه خـلّـوْ خصمه بالحيرة
زلم وتريد أهل الكفر تـفـنـيـهه
* * *
فرسان وأبد ما تقبل الذلّة
يحسين إحنه إحنه الأوّل اتكَـلّـه
ولا تبدي الهواشم عنهم النزلة
ننزل والقيامة اليوم نبديهه
* * *
زلم وكت الشِـدَد للموت متحسبه
تدوس الخوف ما تعرف أبد صعبه
وكل واحد لبس فوكَـ الدرع كَلبه
وطلع والروح بيده يريد ينطيهه
* * *
فزعوْ عالمنايه بزود وبهمّة
غِطَوْ عين الشمس والدنيه جن ظلمه
اسباع بكربله هاليوم ملتمّه
وسافلهه يكَلبونه اعله عاليهه
* * *
طلع شيخ الصحابه والنعم منّه
حبيب وكل حبيب يسولف بفنّه
يشوف الموت كلمن يمّه يدّنّه
وقتال أبطال لخصومه يراويهه
* * *
وبرز عابس يهدّ ملهوف للملكَه
حُبْ حسين جنّه وذايب بعشكَه
يدافع عن حبيبه اليوم من حكَـّه
حلف من عالوطيّه الكَوم يمحيهه
* * *
برير ومسلم وجون وبعد نافع
وسعد ويّه وهب للقافلة يتابع
وشبيب ويه زهير وكالنجم لامع
وفرسان الشهادة الكَل تسمّيهه
* * *
أبد ما قصّروْ لحسين بالنصره
وخذو منّه دروس التضحية وصبره
ويظل هذا الخلود إلهم مع الذكره
وهناكه الزجيّة الكل تجازيهه
* * ***
ونسألكم الدعاء
لخادم أهل البيت(ع)
حســام الناصري
#زنجيل
قصيدة رقم ٤٧
موشح للانصار عليهم السلام
أشرقت شمس الهدى بأنوارها
وساحة الطف نوّرت باحرارها
---------------
يوم عاشر اشرقت شمس الجهاد
اوشع شُعاع المجد منهه اعلى الاجساد
وللسمه عكست صور هاي الامجاد
اوغدت تعرض للبشر آثارها
----------------
عرضت اجمل صور لاعظم تضحيات
عنهه كتبت اروع وازكى الصفات
غدت تتوارثهه افكار الابات
اوللاجيال تناقلت بافكارها
-----------------
بدت هاي الصور تعرضهه السمه
اوصاغهه التاريخ اروع ملحمه
اتضمنت تضحية وجود وغانمه
وهل صفات اتجسدت بادوارها
---------------
والدهر وضح نهجهه ودرّسه
للاجيال وما تجرأ وادْرَسه
حيث هالادوار صارت مدرسه
أسّسَتهه بكربله انصارها
----------------
بيهه راية فخر صارت شامخه
ظلت بصوت الاماجد صارخة
اوعلت صرختهه وصفت مترسّخه
بالافكار وثبتَتْ أسرارها
----------------
توضِحَت اسرارها برغم الدهر
اوغدت بافكار الامم تنثر دُرَر
من مواقف كربلا وتنقل خبر
عن حربهه ونارهه وأخطارها
---------------
تنقل الاخبار لاچنهه اشتگول
عالذي صار اعلى اهل بيت الرسول
تگول صدر حسين اصبح للخيول
موطئ وبالخيم شبّت نارها
------------------
حرم مرعوبه وخيم متفرهده
اونار وسط الخيم شبّتهه العده
بدور هاشم عالترب متوسّده
والحرم صارت غريبة دارها
--------------
عقيل الكاظمي / بغداد
#زنجيل
قصيدة رقم ٤٦
«ام البنين الفاجده»
«تجليبه»
~
الليلـه ام البنين العلگمــــــي اتعنت
يم عبّـاس مكســـــوره الظهرگعدت
▪︎▪︎▪︎
گعدت يم ابنــــــــــــها تسچب العبره
تعاين گطعت اچفوفـه اوگطــع نحره
اويمها اتشوف گعدت فاطم،ه الزهره
ويـاها الزچيــــــــــــــــه انت اوحنت
وسفه اتگله يبنــــي الجود اشوفنـــه
اوشفت الماي يبني منچفــــــــي منه
هاك اچفوفي يبني اخذه واتعنــــــــه
تضوگ الماي يبنـي سكنــــــــه اتمنت
خالي الجود وسفه انته يراعي الجود
گـــــوم املـــــي من نهرالفرات اوعود
من نارالضمــــــــه ذابت ييمــه اچبود
رباب اعله المهد انـــه اسمعت شهگت
اجيتك يبنـــــي اضمد بيدي اجروحك
لچن ياحيف وسفـــــه فايضــه روحك
عله شاطي الشريعه انهدمت اصروحك
شرايــن الگلب من شفتــــك اتگطعــت
عفـيه اعليك يبنــــــــي عمرك انذرتـــه
اوگبل احسين طعـــــــم الماي ماضگته
آنه البيك اخوك احسين عاهدتـــــــــــه
يبنـــــــــــي التضحيه بعتابك السجدت
يبوفــــــــــــــاضل اظلن افتخـــربسمك
بين الناس اتنومس آنــــــــــــــــــه امك
اوبالمحشرشفيعـــــــــــه من فضل دمك
الــــــــــــــي هاي الكرامه يالولد حصلت
▪︎▪︎▪︎▪︎▪︎▪︎▪︎▪︎▪︎▪︎
تمّت
الشاعرفالح العامري
#زنجيل
قصيدة رقم ٤٤
شوط كربلائي لام البنين عليها السلام
وين ام الكمر عباس وين لتحظر الشده
ننخاها بگلب ملهوف بلدنا سالم ترده
............
نندبج يلوفيه شلون بدموع وگلب مجروح
نحلفج بالوگع بالطف وترس گلبچ عليه اجروح
تحضرينه العراق اليوم يبدويه وگلبنه ينوح
بضـيم وقهر ظلينه
مـاتحظر يامهدينه
عجل صدك نادينه
وبآلندبه الك نقره صبرنه تعده عن حده
............
يبدويه الوضع يدمي المگابر ترست الصحره
بيد الظالم احنه نموت شباب ومنگطع نحره
مثل عباس ابو الغيره وحيهم صاحت الحره
شـبان شكثر راحت
چم ام لابن ناحت
بقلب دامي ووجع صاحت
ياباب الحوايج وين بختج والعده برِده
............
ياباب الكرم والجود نندب احنه غيثينه
الوضع نفسه نشوفه اليوم طفج كربله وينه
حقدهم ماتغيره ازمان وجهلهم باقي وسنينه
نرفض كل ظلم يحسين
عشاگ الشهاده سنين
مـنهد جف الفظل والعين
رفضنه الشرك وي دينه نفسه الظالم وجده
............
نفس جيشه يزيد اليوم ونفس الطاغي يتجدد
وبَين حرمله وحشي وقنفذ بيينه يتوعد
يذبحونه ويذلووونه وكلام ابواحد نردد
آبو الحسنين الي منهج
وعلى لساني عسل يلهج
وآحنه ننتظر مخرج
يبويه الفرج يمته آبونه ونكعد بسده
............
الج نشرح مصيبتنه يم عباس اسمعينه
طحنه بوليت الظلام والمهدي بطه اعلينه
يكولون العجل بدعه ماتظهر يمهدينه
نحلفج بالزجيه اليوم
گل ظالم ابد ميدوم
غركانه السفينه هموم
وآجينه باابچ ندگه جيش المهدي والعده
............
الشاعر باقر جبار الشـويلي
#زنجيل
قصيدة رقم ٤٢
موشح لام البنين عليها السلام
علي العلّمهه الوفه وأسراره
وظهرت بطف كربله آثاره
-------------
حيدر العلمهه أسرار الوفه
وصار من أوصافها أوضح صفه
ظهر من عدهه الوفاء بموقفه
بيوم وادي كربله وأخطاره
---------------
حين شافت ضنوة الزهره وحيد
اوصفت گطعة منحره مطلب يزيد
عرفت الأقدار من عدهه اشتريد
امخيّره ويا موقف التختاره ؟
--------------
لو تعوف حسين وحده بمحنته
لو تضحي بالشباب لنصرته
مر عليهه ابن النبي ومن شافته
اتحيّرت وانذهلت بأنواره
-------------
ابتسم لمن شافهه وأبده السلام
وابتدت لحظة وداع بلا كلام
كشف عنهه الحُجُب راواها الإمام
صور عن طف كربله وأخباره
------------
شاهِدَت حال البنين الأربعه
كل فرد شافت جهاده ومصرعه
وموقف العباس فوگ المشرعه
بچت لجله وفرحت بإيثاره
-------------
فرحت بعباسهه وتدمع العين
حين شافت مرمي سيفه اويه اليمين
عرفت المظلوم ظل بلا معين
من بعد چتل اخوته وأنصاره
------------
ما هضمهه الگمر طاح اعلى النهر
المهم عدهه حسين محفوظ النحر
المهم خدر الحره ما مسَّه الخطر
المهم زينب ما تظل محتاره
-------------
لنهه تنظر عل ارض ليلة قَدِر
اموذّره ويدوسهه برجله الشمر
هناك لنهه تشوف منهوب الخدر
او على اعيال احسين شبّت ناره
-------------
صاحت وسيل الدمع دم انحدر
الك فدوه نجوم عمري والگمر
بس ترد سالم تگُر عين الدهر
وجدك الهادي تنور ادياره
------------
يبني هاي نحور ولدي والدمه
راح اقدمهن هديه لفاطمه
وانتظر جيتك وعيني اعلى السمه
وانتظر فجرك يلوح نهاره
----------
عقيل الكاظمي / بغداد
موشح للدفن
الشاعر و الرادود مصطفى الأمين الناصري
جينا للطف بالحزن نـشّــادة
عل جسم الرمل صار وسادة
****************************
جينا للطف والدمع تهمل العين
نعاين جسوم الوفوا للباري دين
التضحيات من الطفل حد الحسين
وفضلاهم ربهم عل اعـبــادة
*****************************
جينا للطف لچن مهمومة النفس
ندفن الأجـسـاد بـغيـاب الحـرس
مـطـرحة ايـام بـحـرور الشـمـس
لا ذحول لهـا وعـشـيرة هـادّة
******************************
جينا للطف واجة ويانـة العـليـل
يدفن بحسرات وبـعبـرة القـتيـل
و الدمة من نحره يفور و يسـيل
و جسمه الشجته سيوف الحادّة
******************************
جينا للطف و العجب مالي العيون
اليموت بدينة يغسلونة و يچفنون
و لعد لحدة أولاده بالهم ينزلون
لچن بالطـف ما جـرت هــالعـادة
******************************
جينا للطف حاسرين احنه الراس
ندفن أجساد الطهر سادة الناس
حسين أبو اليمة دفنة وعباس
و صحبته و اعمومته و اولادّه
*******************************
جينا للطف لچن وگفنا المسير
صاح أبو الباقر عليّ بالحصير
يجمع اوصال أبو اليمة بحسرة يدير
و بالصبر و العزم گلبة شــادّه
*******************************
نـزلا للگـبر و يشـمـة بـحـزن
بچة عندة ب آه و احمـَّر الجـفن
گعد عندة بعد ما خلص دفـن
تطهرت هالأرض بأستشهادة
********************************
راح للعباس و دموعة تجر
صاح عمي و يامن لهاشم گمر
و نـزلا بـدمـوع عيـنـة للـگـبــر
دفن عمـة الحـيل منـه بـادّه
********************************
كتب الموشح يوم 13 / محرم / 1443ھـ
بقلم : الشاعر و الرادود مصطفى الأمين الناصري
#زنجيل
قصيدة رقم ٦٥
«دارمي» لطم ٣ دگات كربلائية
الشاعر الشيخ كاظم المنظور الكربلائي
"رحمه الله تعالى"
يبن أمي عالتربـان عفتك رميه
عين العمه إو لا شوف ذيچ المسيه
* * *
يا خويه خليناك عالغبره عاري
إمغسل إبفيض إدماك والچفن ذاري
روحي بگت وياك والجدم ساري
أمشي وأدير العين للغاضريه
* * *
أدري إبسهم مسموم چبدك تگطع
وإصوابه مگبل صار والمگفه مطلع
إبذاك السهم يحسين گلبي تلوّع
سمه إبضمير إحشاي ناره سريه
* * *
يبن أمي أدري الخيل هشّمت صدرك
إو بيدي عله التربان وسدت نحرك
يا خويه وإبممشاي حيرني أمرك
لاچن إفراگك صار غصبن عليه
* * *
غصبن علي يحسين عالغبره عفتك
والحجر لو ما چان يفضخ جبهتك
ما چانت إمن السوط تتلوع إختك
نوب أنطي متني ونوب أشگف بديه
* * *
إبحالة غصب يحسين عنك مشينه
يبن أمي منهوبين وإمگيدينه
إتجدد عهدها إوياك رادت إسكينه
مانعها ضرب السوط من آل أميه
* * *
يبن أمي من إعداك أرد إشتچيلك
مثل السهم يحسين أمرد دليلك
وإنجرحت إمن الطوگ رگبة عليلك
گلبي إحترگ من نار ونته الخفيه
* * *
لو طفل من الجور تغمض إعيونه
من عله الناگه إيطيح لمّن يجونه
من عوض ميسلوه ويرچبونه
بالخيزرانه إيگوم من عالوطيه
* * *
يبن أمي يا هي إتهون وأصبر عليها
إشحال الحرم لو راح منها وليها
إو طبت الكوفه إشلون يبن أمي بيها
إصواب الشماته إصواب علته خفيه
* * *
وإلما عليها العين تغمض جفنها
والنايبات إبنار روحي سلنها
يبن أمي طبت الشام ما أشد منها
وافتني گبل الشام ريت المنيه
* * *
يبن أمي سوط البيه متني تألم
يبن أمي ذاك إيهون لاچن ألأعظم
سوط إبن هنده إلبيه ثغرك توسم
ثغر اليقبله چان سيد البريه
* * *
وإصواب فوگ إصواب ماضي إبگلبي
إبقسمة الباري إرضيت والباري حسبي
وإگضيت وعد إلبيه واعدني ربي
وإمن اليسر رديت وإصوابي بيّه
* * *
الشاعر الشيخ كاظم المنظور الكربلائي
"رحمه الله تعالى"
#زنجيل
قصيدة رقم ٦٣
نزلة ((عكيلي)) للاكبر ع
((المستهل))
الاكبر شد اعله العسكر ..... فنه اليگرب ... ويله اليگرب
*****
بصورة جده الهادي أحمد
وشمرة حيدر بي تتجسد
ومن أحسين الهيبه أتقلد
وبعمه العباس أتاثر ..... فنه اليگرب ... ويله اليگرب
*****
شد أعله الگوم أبصولاته
وَتـْــره وما ثنه أبضرباته
ينبع زود وعزم أبذاته
وتتراجف خلاهه الاكبر..... فنه اليگرب ... ويله اليگرب
******
وبفنونه وصولاته وحربه
سر أحسين وبرد گلبه
وحط بكلوب العسكر عطبه
وبضرباته الجيش أتقهقر ..... فنه اليگرب ... ويله اليگرب
*****
يتحاشاه الجيش وخافه
وبصفوفه تكاثر مرجافه
تخيل حيدر كلمن شافه
موت الاحمر ضربة حيدر ..... فنه اليگرب ... ويله اليگرب
******
وسط الحومه أبسيفه البارع
تتهاوه الروس أمن الگاطع
ملج الموت أوياه يتابع
وخيول العسكر تتعثر..... فنه اليگرب ... ويله اليگرب
اسئلكم الدعاء
محمد ابورغيف
#زنجيل
قصيدة رقم ٦١
للأكبر عليه السلام
قصيدة شوط كربلائي… ليلئ ام علي الاكبر. ع. تحاور ولدها… القصيده
بعنوان… هون. يا گلب بيه…..
"""'"""""""""""""""""""""""""""""""""""""""""""
يا گلبي. اشبلاك. اتروح
هون. يا گلب. بيه
ما احمل. سگم واهات
ريض يا علي شويه
""""""""""""""""""""""""""""""""""""""""""""""
يا نبض الكلب. والروح
يمه. الدهر ماذيني
اني امك واخاف اعليك
روحي. انته. وظوه بعيني
ما اگدر حمل فرگاك
هجرك مرض يسبيني
لا ترحل يبعد العين
اقسم بالعزيز. حسين
اريدك. يلعزيز. وياي
نسمه. وتترس. الريه
""""""""""""""""""""""""""""""""""""""""""""""
ساعة روحتك. ظليت
اندب. قسمتي. ودهري
وادري. بروحتك. للموت
حسره وصارت. بصدري
ومن. بعدك. علينه. الليل
جلجل…. وانكسر….. ظهري
وما بين. الدمع. والويل
ما يركد. ييمه. الحيل
ما اكدر. اصدن. ليك
وعيني. اعليكم. اربيه
""""""""""""""""""""""""""""""""""""""""""""""
اشوف. ابوجه. ابوك حسين
عليك. اليجري…. بالحومه
اهات. واشوف. الخوف
وهاي. ابوجهه. معلومه
لو دنگ.يغمض. العين
احس… بروحي ملجومه
ما مثلك. ابد موجود
يا بدر. بظواه. ايجود
ما ريدك. تغيب. ابساع
وتخلي….. الحزن… ليه
"""""""""""""""""""""""""""""""""""""""""""""
الحومه. اشخلت. اعله. الحال
بس ظيم. وسگم… حالي
خلصت. العمر وياك
رسمك… ما ترك… بالي
يا گمره. وتشع. بالكون
وجهك…. بالظوه… ايلالي
اقسم. بالحسين اعليك
وي امك. فرح. خليك
ما اقبل. تروح. بعيد
وروحي. تصير. حربيه
""""""""""""""""""""""""""""""""""""""""""""""
اناديمن. يبعد. الروح
.شگولن. لو. صحت. باسمك
وادريبك. بعيد. هناك
وخافت. للابد… ظيك
خليني. بسهر. وبظيم
واتصور….. رسم….. منك
يلاكبر. فداك. الحيل
مر. بيه. بظلام. الليل
تلكاها. الدموع. اتسيل
اشخلت….. طفكم… اعليه
""""""""""""""""""""""""""""""""""""""""""""""
يا اه. التطيب. الروح
تشافيني….. وتلم… جرحي
ويا هو. اليمسح. الاهات
واتباهئ. بشمس. صبحي
هيهات. وبعد هيهات
ما يرجع. بعد. فرحي
وذاك. انته. الحبيب. اهناك
محزون الگلب. بجفاك
متوهمه. وحسبت احساب
وتاليها….. الحزن…. ليه
""""""""""""""""""""""""""""""""""""""""""""
لظل. طول. العمر. والله
ما بطل. الحزن… هيهات
اشجم. واحد. عزيز. الروح
مثلك. بالگلب… ما مات
رد يبني. واخذني. وياك
ما ريد. العمر حسرات
اثاريها. الحياة. اهموم
واهات. وحرب. ودموم
وطلگت. السعد. بجفاك
ما ريدن…. يمر…. بيه
"""""""""""""""""""""""""""""""""""""""""""""
الخادم الشاعر مهدي العبساوي. الرميثي
************************
#زنجيل
قصيدة رقم ٥٩
«القاسم ورملة»
«تجليبة»
~~~~
آيبني يجاسم ياضوه اعيونــــــي
انته والحسن للهظم عفتونــــــــي
▪︎▪︎▪︎
آنه اترملت من الحسن يبنـــــــــــــي
من بعده زمانـــي اهواي حاربنـــــــي
مايوم الحزن يوليدي فارگنــــــــــــي
النـوب ابفگدك الوادم يعزونـــــــــــي
يگلهااشبيدي يمي اعليچ انه اشبيدي
العمي ابكربلـــــــــــه ناذرآنــه اوريدي
آنـــه ابنچ ييمــــ......ـه والحرب عيدي
الحسن واحسين للنصره ينادونــــــــي
تگلـــــــــه اشموع عرسك وين اوديـها
يبني لورحت بدموعـــــــــــــي اطفيها
بديارالغـــــــــرب امك تخليــــــــــــــها
منهو اللــــــــــي يباري عگبك اضعوني
يگللـــــــــــها اصبري والصبرمـريـــــود
واحزان الحسن يمــــــــــه عليچ اتعود
ييمه ابكربلـــــــــــه من الحسن موعود
آنه من دمه المنحر يحنونــــــــــــــــــي
تگلــــــــه ارحم غربتـــي ورحم ابحالي
ياجاسم ييمــــــــــــه بيك آمالـــــــــــي
اشلون انظرمچانك لوبگــــــــــــه خالي
عنك شرد اجـاوب من ينشدونـــــــــــي
عني اللي نشد يايمــــــــــــــــــــه گليله
ابنــــــــــ.ـــي بالعهد لحسين يوفيلـــــه
طب للمعركــــــ..ــــه والغيره تحديلــــه
آنـــــــــــــه ابن الحسن والكل يعرفوني
تگلـــــــــه بالشهاده انتـــــه فزت وآنــه
اروحن باليســـروالروح ولهــــانــــــــــه
اعوف ابنــــــــــــي رميه الذاري اچفانه
لواندب اباسمــــــــــه العده ايضربونــي
▪︎▪︎▪︎▪︎▪︎▪︎▪︎▪︎▪︎▪︎▪︎▪︎▪︎
تمّت
الشاعرفالح العامري
#زنجيل
قصيدة رقم ٥٧
ميمر للقاسم عليه السلام
بدال العرس قدم درس
ابن الحسن منه اقتبس
هالدنيه لجل المظلوم ما تسوه شسع نعله
****
يالتلطم اعله حسين هاك اتعلم
اخذ العبر من جاسم وما تندم
باع الحياة وللمنيه اتقدم
طول وعرض دون الفرض
شينفع اذا تملك ارض
خمسة فروض بكل يوم وداعت الغالي سهله
*
بعز الشباب وحنته تنتظره
يتهنه لو يفدي العمر صار امره
شاف العطش بحسين يلهب جمره
بفيظ الدمع طفه الشمع
العمي الغريب ارد انصرع
من دمي يصرخ جسام حنيني گومي رمله
هوه الحسين الدين يعني المصحف
لِتحبه معقوله تِشمره اعله الرف
معصوم الك من السماء اتوضف
ماكو ظلم گلك جرم
بر الاهل يسوه اللطم
لو تبچي بالمجلس دوم هذا الدمع ميقبله
غير الحسين بدنيتك شيفيدك
صوب الرذيله بالك اتمد ايدك
لو ما مشيت بمنهجه ميريدك
باچر حشر وسط الگبر
ما يعتني لا تنتظر
بالاخره وبدنياك وحدك تظل ابذله
**
المن تزور وتتعب وتتعنه
الشايل سواد بگلبه لا يتمنه
لا يصرخ ارزقني يحسين الجنه
نال الظفر كلمن صبر
الله يبعده من سقر
اتمسك بدينك زين واجعل امامك قبله
****
الشاعر اياد الديراوي
#زنجيل
قصيدة رقم ٥٥
#قصائد_محرم_١٤٤٢_٢٠٢٠م
تجليبة للعباس عليه السلام
مشاهد مؤلمه واوصال عالغبره
ومناحه وفاجعه وآه وظمه وحسره
...................................
مشهد لابوفاضل شايل الرايه
أجه يودع العقيله وصعبه الحجايه
أنه راحل يزينب والنهر غايه
مشه وكل خطوه تهوه اعله الترب كمره
..............................
احتار اعله النهر وايعاين طفوفه
واجه بحركه السهم واتعثر بشوفه
وطاحن عالوطيه الرايه واجفوفه
الطاح بلا جفوفه شمصعب العثره
..............................
ومشهد للولي محتار بالهيمه
رجع يتعثر بطف كربله وظيمه
أجه وشال العمود وطيح الخيمه
وعله العباس شيب وانكسر ظهره
........................................
مشهد للطفل من يطلب اميه
ورباب اعله المهد بالخوف محنيه
وآخر من رجع والركبه مدميه
ومسموم السهم جان الكطع نحره
..................................
ومشهد عالنهر يحجي ويه ميمونه
تشرب يالله أشرب واهم يرمونه
والميمون دنك سالت عيونه
كدامك حرام استطعم بكطره
..............................
ومشهد من هوه اعله الكاع واعياله
تشوفه شلون من تتكطع اوصاله
بحوافر عالترب داسته الخياله
ويزحف عالترب وادمومه عالغبره
..............................
ومشهد للخيم وايتام مرعوبه
وبنات المصطفى ياحيف مسلوبه
وزينب تركض ونسوان منهوبه
ورقيه بلافكر تسحك عله الجمره
.............................
ومشهد عله التل وزينب بحيره
تنادي يالوفي عباس ابو الغيره
واحس ماي النهر ضاعت تعابيره
ودارت لابواليمه وحارت النظره
................................
ومشهد للحبيب يعالج انفاسه
واجه الحافر بصدره وكسره وداسه
والآخر من رفع بيده الشمر راسه
وعشر خياله طحنو عالترب صدره
................................
وآخرهن لزينب تركب الناكه
وتعاين للحبيب اليصعب فراكه
لدلالك يا أبو الكلفات مشتاكه
وتعاين للرمح مختنكه بالعبره
...................................
علي صابر السراي
نسألكم الدعاء
#زنجيل
قصيدة رقم ٥٣
دارمي ٣ دگات كربلائية | بحق ابي الفضل العباس "عليه السلام"
مهيمن يوسف الموسوي ١٤٤٣هـ ٢٠٢١م
عدنه السمه هاليوم غايب گمرها
شنهو السبب والصار هذا امرها
*١*
أظلم صُبح هالكون يحمل مصايب
گلب المحب مقهور كل گلبه ذايب
عنده حزن و هموم و أفجع نوايب
روح الموالي بيه حير فكرها
*٢*
كل الخلق بالكون لجل المصيبه
جِن و انس حزنان بادي نحيبه
لجل الگمر من طاح چثته غريبه
يم الشريعه صار يشهد نهرها
*٣*
حين اليحارب چان هِمّه و شجاعه
وتگطعت يسراه باقي بقناعه
باقي يقاتل دوم لحسين طاعه
ينصر ثورته ايريد يبقه خبرها
*٤*
لمن عدوه حيف گاطع يمينه
صارت عليه أسهام واعله جبينه
واحد وسف ويلاه ضاربها عينه
من العده الاشرار واضح غدرها
*٥*
آه الكمر يا حيف أعظم فجيعه
جسمه انضرب باسهام يم الشريعه
لا يسره لا يمناه اجفوفه كطيعه
ضده السيوف اهواي من كل كترها
*٦*
حين الوگع عباس فوگ الوطيّه
واگع جبل كالطود بالغاضريّه
ضحه النفس و الروح لأبن الزچيّه
كل تضحياته دوم باقي أثرها
*٧*
وفه العلي الكرار نفذ كلامه
لمن لاخوه إحسين راعي لامامه
قدم حياته ابزود راد الكرامه
كل العده الانذال رافض مكرها
*٨*
قدم حياته اشراد من تضحياته
بيها النصر للدين رايد نجاته
ما همته لاعداء منهم مماته
نفسه يجب فد يوم يصبح قدرها
تمت و الحمد لله تعالى
مهيمن يوسف الموسوي
٨ شهر ذو الحجة ١٤٤٢هـ
٢٠٢١/٧/١٩م الاثنين ١:٢٩ص بغداد
برنامج قصائد محرم ١٤٤٣هـ ٢٠٢١م
الشاعر كاظم المنظور الكربلائي
/channel/AlMandour1442
#زنجيل
قصيدة رقم ٥٠
ميمر للانصار عليهم السلام
يحسين تدري الانصار لاخر نفس وفايه
****
هوس حبيب وصاح وين الانصار
وتراكضت يم خيمته ازغار اكبار
بهل الوفه اشتد العزم والايثار
بالهمه راحو لحسين وبجفوفه شال الرايه
*****
سلو صوارمهم وجو يم حسين
وللموت صاحو سيدي متحضرين
فاض الوفه ونصارك احنه السبعين
قررنه وياك انموت منطينك احنه احجايه
**
بالحومه فرسان الصفه تعرفهم
ثابت يبن عقد الوله موقفهم
كلهم حبيب اكبال عينك صفهم
اهل الضماير والزود للحك صحت شرايه
*****
اتنادي الحناجر والعشك يحديهم
يحسين ذب ذيج الثكال اعليهم
يردون من عندك امر تنطيهم
اتحزم حبيب وعالكاع من يمشي يرسم ايه
*
عابس يصيح انه العشك جنني
وجندب ينادي للحرب نزلني
وجون بلهفته ايصيح بس ارخصني
مسلم وانس والنعمان صبرو يغالي اهوايه
*******
تمت
تحسين الخفاجي
#زنجيل
قصيدة رقم ٤٨
شوط كربلائي للأنصار
ابو السجاد انـصاره .. بالـطف ســــوو المــاصار
تره من حقه يتفاخر .. يعمي العنده هيچ انصار
ترى العنده بخت ياناس .. يحچي احچاية العدله
وبالــسان المــعـتـبر دوم .. هــيه الـسالـفه تحــــله
عن انصار ابــو الســجاد .. لحـــد يحــچي بالسهله
نعم صاروله تچــايه
زلــم للــموت شـرايه
امبينه هيه الحجايه
الله اخــتارهــم لحسين .. وشوف شلون الله اختار
_
يالي اتريدلك صاحب .. كون اتدقق ابوضعه
ومن تختاره هم تلگاه .. عنــك يخــلف طـبعه
حقه احسين ابو اليمه .. مــن يتــفاخر ابربعه
ذول الصارو اخـياله
اوبــدو دمهـم اگباله
الراحوا فدوه لعـياله
مايتعذرون ابيوم .. عنده انصاره ماكو اعذار
____
شدوا للكلافه احزام .. اجو والغيره ترستهم
عـفو عن كــربله همه .. چيه زينب التمستهم
حي الله رجال حسين .. البلكــلفات ونستهم
امــلاگاهم ســوالف عــيد
امصافحهم اسيوف ابأيد
هوه احسين هيــچ ايـريد
والگلبه حطب خليه .. لا يــدنه يـــم الـــنار
____
الرايد ينتــقيلـه ارجـــال .. كون ايدقق ارجاله
مـــن راس البحــر يخــتار .. مايخــتار الوشاله
وابو السجاد عنده احيود .. اخذوا كربله كباله
لمـــــن طــبو الســعين
رادت كـــربلاء امعــين
من النزف صارت طين
لمن غركت امن الدم .. صاح الجيش ياستار
_
الطف امن الجثث غصت .. ولنها اتصيح المروه
المايخــضع الطـــوع امره .. للــمذبح يــجي كوه
كلها ابكربله خرسان .. اليحجي السيف بس هوه
زلـــم شردت زلـــم ركـعت
وبعضهه الروسـها الوكعت
بالانصــار مــــــن ســمعت
ذاك الجيش المرتب .. شو لنه صبح طشار
رفــت رايــه والـــرايه .. حبيب وبيده ساريها
والخيمة اخت عباس .. وصل هالرايه طاريها
العنده صحبه لو هيچي .. لو ليــجيب طاريها
اليــقدملك تـره رگــبه
مو بالهيــن اتشــــطبه
هاي التنحسب صحبه
صاحب موش ياهو الچان .. قلد احسين من تختار
وفو والنعم مــنهم .. وخوش انطونه هالعبره
أي معناها يبن ادم ..كــون اتصـــير كالشجره
اتفيي عالذي مكسور .. ولازم خاطره اتجبره
من انصار ابو الـــيمه
اتعلم انــته هالحكمه
انطي وعيش بالنعمه
اليقدم روحه للطيبين .. للوادم يضل تذكار
____
حيدر تركي الكربلائي
برنامج قصائد محرم ١٤٤٣هـ ٢٠٢١م
الشاعر كاظم المنظور الكربلائي
/channel/AlMandour1442
#زنجيل
قصيدة رقم ٤٥
ام البنين اتودع الحسين عليه السلام
فائزي
~~~
ودعت اظعـون الولد ابدمع العيون
وتنادي ليـــه هم بعد يبنــي تردون
🔳🔳🔳
ابگلب محــــروگ اندبت تانيني يبنـــــــــي
عندي وصيــــــه انه الك سمعها منــــــــــــي
مااضن ترجعلـــــــي بعد گلبــي لچمنــــــــي
وصيتــــي الك ام الخدر احفضها عنــــــــي
هاذي وصيه من علــــــي الكــــــم يطیبين
طلعت اتنــــــــادي يالولد خلينـــــي اودعك
انادي يمـــــه اشگد احب يحسين اسمعــك
صعبـــــــــه عليه فرگتك والگـــــــدر اتبعك
راح اظل عالنار انتظـــر وبلوعـــه اشيعك
يمتـــــــه ترد من هالسفر جاوبنــي يحسين
گلها ييمـــــــــــه هالسفر ايطول ايامــــــــه
مااظن نرجــــــــع للوطن احنــــــه ابسلامه
خليت يايمـــــــــــــه الچ بتـــــــــــي علامه
ماانســـــــه الچ يم الوفه ذيچ الخدامـــــــــه
وفيتي اليــــه ابخدمتچ منــــــــــچ اونعمين
طلعت وره ظعن الولــــي تعثر ابهمــــــــــــه
وخلفه گــــــــــــوه اتعدي نگلت جدمهــــــــه
عالراس تلطم والوجـــــه والحزن لمهـــــــــه
الزينب العبـــــاس اندبت يحرس خيمهـــــــه
يولدي عن بت فاطمــــه لالاتقصـــــــــــرون
نادت يبو اليمــــــه انتظر خلينـــــي اشوفك
يحسين مو انتــــــــه الي كعبـــــه واطوفك
احرم اطوفك كل فجــــر اشلـــــون اعوفك
من صفــــــه طيبه اعتني المروه طفــــوفك
اشلون اسعــــــى والدرب يصبــــــه اوبعدين
لزمت ارجابـــــه وتنتحب والدمـــــع جروان
يولیدي اخذ منـــي الدمع لاتظل عطشـــــان
يحسين فدوه اتــروح الك اربــــــــــع الشبان
اشفعلي باچر بالحشـــــــر ياسيد الجنـــــــان
يارحمة الله الواسعــــــــه التشمل الثقلين
🔳🔳🔳🔳🔳🔳🔳
تمت
*✍️الشاعر فالح العامري*
#زنجيل
قصيدة رقم ٤٣
موشح بحق ام البنين "عليها السلام"
مهيمن يوسف الموسوي محرم ١٤٤٣هـ ٢٠٢١م
منزلة ام البنين الاربعه
مؤمنه هي او تقيه او خاشعه
........
شرّف المعبود ربّ العالمين
فاطمه ام البنين الصالحين
فاضله او زوجة أمير المؤمنين
حامله احسن صفات او قانعه
........
من بعد موت الزچيّه فاطمه
قاتليها اهل النذاله الظالمه
حيدره قرَّر زواجه الفاطمه
فاطمه بنت حزام النافعه
........
فاطمه البدوية صارت زوجته
من أمر رب الجلاله او حكمته
بيها تتحقق تره كل حاجته
تشبه الزهره الزچيّه او وارعه
........
شرّف المعبود فاطم بت حزام
زوجة الكرار صارت للإمـام
هالشرف يبقه او يظل افضل وسام
والصفات الزينه بيها جامعه
........
للحسن و حسين اسباط الرسول
والعقيله العالمه بنت الأصول
ويّه ام كلثوم منها ما ينول
لا خطر مسهم فقط بس منفعه
........
فاطمه ام البنين الطاهره
ربّت أولاد الطهر متفاخره
واجب اعليها تجاه الصابره
قدمت خدمه أصيله او رائعه
........
حيدره حين التزوجها ربُح
كل حياته زاهيه عنده او صبُح
عوضت بنت النبي او گلبه انشرح
كل فضائلها جليّه او واسعه
........
قدمت اربع بنين او چن بدور
من اجل دين الصمد ربنه الصبور
ضحّت ابولادها ابگلب الفخور
عن فداهم بالحرب ما راجعه
........
كربله بيها ولدها الاوفياء
ناصرين حسين ابن الاولياء
كل مهجهم قدّموا او كل الدماء
والاشد حامي الخِدر بالمشرعه
........
فادي نفسه من اجل كل ثورته
ينصر حسين و يحقق غايته
حارب العدوان لاچن أذّته
والگمر مات و چفوفه امگطعه
........
تمت و الحمد لله تعالى
مهيمن يوسف الموسوي
٨ شهر ذو القعدة ١٤٤٢هـ
٢٠٢١/٦/١٩م السبت ١٠:٢٨م بغداد
#زنجيل
قصيدة رقم ٤١
نزله للعليله
…
ماخذ كل بناته حسين.. بس انه يخليني
……
وجعانه وعليله ابدار
ماادري عليه اشصار
مگطوعه علي الاخبار
حيل فراگه ياذيني
ماخذ كل بناته حسين.. بس انه يخليني
……
مخنوگه واصيحن أه
مكتوبه علي فرگاه
اتمنه اروح اوياه
نار غيابه تچويني
ماخذ كل بناته حسين.. بس انه يخليني
… ..
وحدي وماگظت بلواي
وين ابغيبته منواي
معلوله وبديك ادواي
يالبيدك تداويني
ماخذ كل بناته حسين.. بس انه يخليني
… .
مابين الحزن والنوح
گلبي من الحزن مذبوح
ماتصبر صفت هالروح
تگلي اوياه وديني
ماخذ كل بناته حسين.. بس انه يخليني
… ..
بين الحايط وبيبان
صعبه فرگة الوليان
ماعندي بقوا خوان
چا ياهو اليواسيني
ماخذ كل بناته حسين.. بس انه يخليني
… ..
خلاني ونه الظليت
وحشه الوحدي بالبيت
ياگلبي شكثر ونيت
كل حسره التبچيني
ماخذ كل بناته حسين.. بس انه يخليني
… ..
علي الحاج الصبيحاوي
