قصيدة رقم ٢٥
دارمي بحق مسلم بن عقيل ع
عندك كِثر ثارات يمته تطالب
مسلم سفير حسين شاف المصايب
*١*
يالمهدي يا مولاي يا صاحب الثار
ريتك تجينه كون تنصرها الاحرار
مسلم تأذه اهواي من كل الاشرار
قصته حزن و هموم بيها العجايب
*٢*
تدري يمهدي اشلون مسلم صفاته
لجل السبط مولاه قدم حياته
ينصر قضيته يريد بيها نجاته
دينه يظل للدوم بأعلى المراتب
*٣*
يا سيدي من راح حامل قضيّه
بالكوفه راد اصلاح لأهل البريّه
يتبع إمامه حسين إبن الزچيّه
والمجتمع حيكون وابلا شوائب
*٤*
راد الظلم و الجور ينهي امتداده
يبقه العدل ميروح وبكل قياده
والحگ يظل موجود عالي السياده
هذا ابفضل الانصار بأقوء الكتايب
*٥*
لاچن تغدره حيف اهل النذاله
حين اليريد يروح لجل العداله
ما حقق المطلوب من الرساله
صارت تضده حيل وكت الحرايب
*٦*
بالكوفه يا مولاي كلها تغدره
من كل جهه مغدور محد ينصره
ربنه الجليل و صار هو يصبره
سَوّه غدر لأشرار كل گلبه ذايب
*٧*
مسلم الف وسفاه مات ابخيانه
كل التنصره عود وابلا أمانه
خانو إلـٰه الكون ضد الديانه
من القصر شمروه تدري يغايب
*٨*
عجل ظهورك ريت تفرح محبّيك
كلنا تره للموت احنه نواليك
نبقه و نظل وياك من اليعاديك
ثار السفير يعود رغم النوايب
*٩*
عندك يمهدي ثار من الاعادي
كلنا نكون اوياك وانته القيادي
دمه السفير و بيه احنه ننادي
رغم العده الانذال رغم المصاعب
*١٠*
حقه علينه نروح يالمهدي كلنه
بيك احنه منصورين إنته أملنه
ما ننسه كل معروف هذا اصلنه
مسلم فداها الروح لجل الاطايب
مهيمن يوسف الموسوي
قصيدة رقم ٢٣
تجليبة لمولاتي ام البنين ع
اجيت وحاجتي حاشه ترديهه
اريد بداعت العباس تگضيهه
""""""
تگضيهه اذا حلفتچ بعباس
متفضلة عليه وفضلچ اعله الراس
ممنونچ اظل الاخر الانفاس
وصغيرة كلمة الشكراً احس بيهه
"""""""
اطلب حاجتي وحق اليقين اعلم
اليحلفچ بالگمر لا والله ما يندم
الف عين الاجل عين الگمر تكرم
ثلث تنعام هو الحاجة راعيهه
"""""""
اسألچ بالگمر واعمامته الخضره
دخيلچ واگع ورايدلي بس نظره
لا وحدة ولا خمسة ولا عشره
وگفاتچ اهوايه شلون اجازيهه
"""""""
من اطلب الحاجة زين احسبهه
إلا من اهلهه وناسهه اطلبهه
بيا ام البنين الشدة اندبهه
كفو منچ اصيلة الدمعة تشريهه
""""""""
واگول انه لوگفتچ بالشدد ليه
لو ما فاطمة ما چان مگضيه
اصليلچ صلاة الشكر يوميه
فدوه بوجهي بابچ لا تسديهه
""""""""
عاده الشيعي صارت تمشي وي دمه
يدگ بابچ يگلچ حاجته وهمه
ويقره الفاتحة ويلزم إلچ ختمه
تنطيه اعله نيته النية تدريهه
"""""""
لو انخاچ بچفوفه ونظر عينه
صك الحاجة باللحظة توقعينه
يشفه الاعمه والاخرس تحچينه
يمكن آية العباس تقريهه
"""""""
ناس الما تعرفچ والله محتاره
مثل الطافچ ادّورهن ادواره
واحنه بايدنه تنطينه لبشاره
خطية الما يعرفچ حسرة يلگيهه
انيس الخفاجي الكربلائي
قصيدة رقم ٢١
شوط كربلائي بحق ام البنين عليها السلام
يا ام البنين هواي وفّيتي نِصرتي حسين
بنينچ لاربعه انطيتي فده لجل النصر للدين
*١*
والله والنعم منچ يا بنت الاصل و الزود
كرم عندچ يبت لاشراف كل هذا الامر مشهود
ماكو امن النسه نفسج كرم عندچ بلايه حدود
ولدچ بالحرب كلهم
لحسين انفده دمهم
ينصرونه بفخر همهم
رضيتي الخالق المعبود من راحو چتل ميتين
*٢*
لجلي بالحرب بالطف بنينط بالعمر يفدون
الف شكراً وفيتي هواي والنصري تره ايضحون
ضحو وبفخر ولدچ كل غالي الي ينطون
اجرهم عالصمد ربي
نصروني على دربي
عليهم راضي و بگلبي
كسبو كل رضا المعبود بنينچ الأربعه الطيبين
*٣*
عبد الله فداني اوياه جعفر ضد عده و فرسان
واخويه بالحرب معروف اجاني معتني عثمان
والكافل ابو الغيره اجه بهمّه گمر عدنان
قدمو بالحرب وياي
فلا يكدر عدوهم جاي
واشدهم كافل الوفاي
كلها ترتعب منّه اذا الهم هجم كل حين
*٤*
وفّه بكل عهد ابنچ ابو الغيره الوفي عباس
فلا خلاّني بالحومه تجي ليّه العده الارجاس
مناصر بالحرب وياي لحد ما خلصت الأنفاس
رغم كل العطش و البيه
يحارب هالعده ايعاديه
كلمن يعتنيله ليه
فرّقها الجيوش هواي صفت بارض الحرب صوبين
*٥*
عيالي و النسه و اطفال فلا خلهم عطاشه الماي
رايح عالعده بعزمه على الخيل او ركب عناي
تعنّه للنهر گاصد يجيبه بهالأمر وفاي
وصل يم الشريعه ايشوف
لاكن ما شرب و يعوف
ذكرني بهالأمر معروف
فلا عني شرب كل ماي والوياي عطشانين
*٦*
مِلِه كل گربته بالماي يا ام الوفي الكافل
يريد او يعتني النه كل مايه يجي واصل
لاكن هالعده تغدر اجه بسيفه وضرب حاصل
يمينه يضرب بغدره
صفت يا حيف منبتره
دمها عالأرض يسره
لا ما يمنعونه رغم غداره معروفين
*٧*
بقه يحارب ابو الغيره رغم چفّه انگطع مغدور
بشماله عالعِده ايقاتل يضدهم بالحرب مگدور
شجاع أعلى الكتايب هاي وبهذا الامر مفخور
رغم كل العطش و الصار
يحارب مستمر لاشرار
منه هالعده فرّار
فلا ينازل ابن حيدر من عباس مقتولين
*٨*
يا ام البنين و صار يغدر هالعده الانذال
يضرب منه چفّه و حيف دمّه عالترايب سال
فلا يگدر يحاربهم واجه ليه البشر چتال
يحطونه و يغدرونه
بخيانه من يقتلونه
على عينه يضربونه
سهام بكثره من اعداه مضروبه حسافه العين
*٩*
فلا عندچ قصور اوياي يا ام البنين امّاه
ابو فاضل رفع راسچ نطه كل يسرته و يمناه
وثلاثه من الولد يفدون عمرهم بالحرب وياه
لجل كل ثورتي وٱصلاح
جهاد و ضحّوا ابارواح
كل واحد على الحگ صاح
رخصوا للديانه بزود فدو دمهم يضحون اسنين
*١٠*
وفائج بالحرب بالطف نطيتي كل شخص غالي
على هالتضحيه وهواي تضحيهم فلا تبالي
مقامچ والفضل يُمه عند ربنه كثر عالي
وفيتي النصرتي هواي
عندچ بس كرم والجاي
روحج والگلب وفاي
ما قصّر گمر هاشم الي ضحه تره الچفّين
مهيمن يوسف الموسوي
قصيدة رقم ١٩
شوط كربلائي لام البنين عليها السلام
وفيتي و النعم منچ يا ام البنين الزود
عطائج للولي يبقى الفعل بين الخلق مشهود
...........
فضلج و المقام هواي يا ام اربعه الاقمار
مثال التضحيه صرتي عطائج مستمر تذكار
لابن المصطفى طه ضحيتي إله أنصار
لجل دين النبي و نصره
الحسين و خالد بفكره
تنصر عالعده الثوره
مقامج وشكثر عندج فلا قله ولا محدود
...........
لحسين الولي بالطف كواكب اربعه اتضحين
لجل ابن النبي الهادي ردتي ينتصر هالدين
فده اولادج و لجله دماهم من اجل لحسين
امام و لازم تنصريه
وحيد شلون و تخليه
بالغالي بفخر تفديه
الجهاد و بالحرب لازم وكل هذا الامر مريود
...........
رفع رب الصمد ربنه مقامج وشكثر سواه
اقل من فاطمه الزهره صرتي بهالوضع خلاه
نصرج للحسين تكون مقامج حيل من علاه
وفائج والنعم منه
فلا نلكه وادورنّه
الاذيه تبتعد عنه
وبذهنج لأمر باقي وبطول الزمن معگود
...........
منو مثلج ولد اربع نطيتي بالحرب دمهم
ضحو للولي و نصره ثورته تنتصر همهم
سنين من العمر للدين ولو كل العده ذمهم
ثلاثه امن الزلم ابطال
وگمر هاشم ابو الافعال
شجاعه اعله العده لو نال
كتايب يرعب و كل جيش من رب الصمد مسنود
...........
فاطم والنعم منج وفيتي و هالوفه عالي
نطيتي بكل فخر اولاد لجل ابن النبي الغالي
گالوا بالحرب نفدي بعمرنه يكون كل حالي
افضل هالوصف موصوف
من احسن بشر معروف
لا عدهم رعب لا خوف
اراده و العزم بيهم شجاعه و الفخر موجود
...........
يا أم البنين هواي ذكرج باقي و بكل يوم
مضرب بالمثل صرتي بعطائج هالفخر معلوم
منو مثلج يضحي بزود ولا گلبه بقهر مهموم
اهم شي والنصر لحسين
ثورته باقيه لسنين
تعله رايته و الدين
ضد كل الظلم و الجور قضيّه و الامر مقصود
...........
شهدلج بالحرب عباس فلا مثله اخو لحسين
فده روحه بفخر گاصد عده الغدار معروفين
مثل حيدر يحاربهم كلهم منّه مرعوبين
ومِله الگربه يريد الماي
ابو فاضل بطل وفاي
گصده للخيم عناي
لاكن و العده يضرب گربته الماي بي مفگود
...........
يبت اشرف نسب معروف ابنج بالحرب عباس
چفه اتكطعت و سيوف تضربه هالعده الارجاس
يغدرونه و يكيدونه اميّه بيها هذا الساس
ضحّه وحس فلا قدّم
الكمر بحسين بس مهتم
نصره رايده و يعم
يا ام البنين و تدريه الگمر مثل الجبل كالطود
...........
نذكرج كل سنه و كل عام يا ام اربعه ابطال
عجب كلمن عرف قصتج يصير و مختلف احوال
ترخصينه الضنه كلهم لو جاهم عده جتال
المهم ابن النبي و نصره
يظل سالم مدى عمره
نصر ضد العده الثوره
كلامه اعله الملا كلها لازم ينتشر و يسود
...........
شرف من خالقج ونطاج مقام و هالفضل و الجاه
الريحانة نبي الأمه ضحيتي الرضا اللّٰه
ابو فاضل وخوته تكون لحسين الولي يمناه
يا اعظم مقام البيه
لحسين السبط تنطيه
تريدينه بكثر توفيه
والشاهد ابو فاضل راسه منضرب عامود
مهيمن يوسف الموسوي
قصيدة رقم ١٧
شوط كربلائي للعليلة فاطمة بنت الحسين عليها السلام
يا طير البراري اوياك ترسل حالتي اشبيها
لابويه بكربله اتودي حياتي لمّن ارويها
*١*
تدري من رحل عني ابويه الكربله اتعنّه
احس گلبي على اهلي بده قهره وكثر حزنه
سلامي للحسين و كون للوالي توصلنّه
على حالي بعد فگده
صرت بس بالقهر بعده
روحي و الگلب عنده
وعليله امن المرض جسمي وروحي بس حزن بيها
*٢*
أنه بنت الحسين و صار حالي كل نهاري و ليل
نياحي اعلى الأهل غياب دمعي عالوجن ويسيل
ابويه بغيبته عني فلا عندي بقه كل حيل
حياتي بس قهر واحزان
گلبي للأهل ولهان
عني ماشيه الوليان
من رايح ضعنهم شال كل روحي يأذّيها
*٣*
صرت يا طير من راحو ضعن كل الاهل وحباب
روحي اتلوعت حزنت مقهوره على الغياب
يريت و حالتي اتوصل دمعتي عالوجن سچّاب
غياب اهلي يلوعني
عليهم حسرتي و ونّي
حزن بس يرافگني
واحس كل داري من راحو ظلام الي صفه اعليها
*٤*
داري من بعد اهلي احسها موحشه و ظلمه
تذكرني عليهم حيل مكان البيها و النسمه
انفاس الاهل بيها عليّه صايره نقمه
يطير و كونك اتودي
همومي و حالتي العندي
صفيت بلا اهل وحدي
حياتي من بعد لاحباب اجه العندي مآسيها
*٥*
توصّل كل كلامي تريد وبحسره و قهر گلبي
رضيت بخالقي و قدره فلا ارفض قدر ربي
لاكن هالگلب و العين على اهلي صفه يِربي
اتانيهم ترد يا ريت
يطير هواي وتمنّيت
عليهم و بكثر حنّيت
على اغياب الاهل روحي بس دمعي يواسيها
*٦*
سلامي للأبو اتودي يا طير البراري اوياك
تگلّه بنتك و صارت حزنها وبسبب فرگاك
عليله و هم قهر بيّه يطير و كل سلامي هاك
طفله و هم عليله هواي
حزينه كل حياتي هاي
يرافگني القهر وياي
واكضي كل حياتي بنوح نهاري وي لياليها
*٧*
من توصل اراضي الطف يا طير و تصل إلها
دمعتي و حسرتي و ونّي لابويه من توصّلها
تگلّه بنتك بيا حال عجيبه شلون وتخلها
عليله و مر عليها احزان
حزينه و كل قهرها بان
بُعُد اغلى ابو و إنسان
شبه ميّت بدون الروح يبو الاكبر تخلّيها
*٨*
كل ارض المدينه هاي عندي مظلمه بلياك
وصّل هالخبر لحسين يبويه حيل اتمنّاك
اشوفنك و اريدنك عليله هواي تترجاك
يا طير وتگلّه شلون
غيابك يا ولي ميهون
تمنّيته ابويه يكون
يمي بالمدينه اوياي وبجيته يضوّيها
*٩*
ابويه حسين من بعّد غيابه هواي اذّاني
وحيده بلا حنانه شلون بحسرتي راح خلّاني
وتاني جيّته يمته تمنّيته بعجل جاني
وبعبره يطير تگول
انه مني تره مرسول
تترك فاطمه معقول
يا طير الصحراي كون رساله ابونّه تنطيها
*١٠*
شوگي و كل سلامي اوياك توصله للولي بهمّه
وبحالي و حياتي شلون تحاجيلي ابو اليمه
محتاجه الابو و يا ريت اظل آنه بكثر يَمّه
غيابه و بعده مو سهله
رغم بيه صعب علّه
يريت الكربله اوصلّه
ولا هذا القهر و النوح يجي الروحي الحزن ليها
مهيمن يوسف الموسوي
قصائد محرم و صفر للعام ١٤٤٤هـ ٢٠٢٢م
الشاعر مهيمن الموسوي
قصيدة رقم ١٤
للخدمة الحسينية ( لحن: دهري ذبني)
يا شيعتي موجود وبكل عزيه
مهديكم و ما عاف ابن الزجيه
احضر و انظر بهاي المجالس والخِدم بيها
*١*
لمّن بده عاشور شهر المصايب
بيه الجروح اتزيد لجل الاطايب
حسره بدليلي هواي لهاي النوايب
وياكم آني دوم صُبح و مسيه
احضر و انظر بهاي المجالس والخِدم بيها
*٢*
يلّي لجل لحسين كلكم تذكروه
مجلس اله بحسرات صرتو تنصبوه
اعرفكم انتو دوم لا ما تعوفوه
عايش مصابه و ظال حد المنيه
احضر و انظر بهاي المجالس والخِدم بيها
*٣*
أعرف انه الخدّام لمّن يخدمون
بالخدمة رادو كون لجلي يعزّون
وبكل عمرهم صار كلهم يضحون
لا ما يردّه اعداه لا كل اذيه
احضر و انظر بهاي المجالس والخِدم بيها
*٤*
حاضر اذا تبچون همّاله كل عين
بحسره و حزن و آهات لجل الولي حسين
واللي جره وياه من خاين الدين
وحرگ الخيم و الصار بالغاضريه
احضر و انظر بهاي المجالس والخِدم بيها
*٥*
مصاب الشهيد حسين كل ناره تلهب
بنص الگلب متروح كلّش تصوّب
واعرف أنه الخدّام دمعاته تنصب
عندي علم شيصير يهل الحميّه
احضر و انظر بهاي المجالس والخِدم بيها
*٦*
يامن لجل لحسين گلبك تحسّر
حسره على اللي صار من العده الشر
باقي ولائك دوم لا ما تغيّر
تذكرني انته هواي اجرك عليّه
احضر و انظر بهاي المجالس والخِدم بيها
مهيمن يوسف الموسوي
قصيدة رقم ١٢
عگيلي للهلال
ياعـاشور تنوح الـزهره
هـلالـك ياعاشور الـدمعــه
بيك الـزهـره تنوح وتنعــه
چم نور اليطفه وچم شمعه
من تحچي اتناديك بعـبره
ياعاشور تنوح الزهره
ياعــاشور بصوت الحادي
نسمع ام حسين تــنــــادي
راح يــذبحــوكـم يـــولادي
تبچي تون بدمعـه وحسره
ياعاشور تنوح الزهره
ياشهر اهـلالك يفجعــنـــا
نصرخ والعالم يسمعــنـــا
كل خادم يخـدم يتبعــنـــــا
بالموكب ويانــه ويقــــره
ياعاشور تنوح الزهره
عـاشور ويـومك بچـانــــه
وانـوح وننحب خـلانــــــه
وكل الناس تنـوح ويـانــه
عـالمذبـوح وحزو نحــره
ياعاشور تنوح الزهره
هـلالك عــاشور يـوحـدنـــه
والــعــالم كله يشاهـــدنــــه
غير المظلوم احنه شعـدنــه
ونخدم بالروح احنه العـتره
ياعاشور تنوح الزهره
أيــامــك بـالــدم نبچــيــهــا
وسـود الــرايـات انعـليــهـا
وانعـزي الزهره انعــزيهــا
بالطايح دامي وعـالغـبـــره
ياعاشور تنوح الزهره
وانعــزي الغايب مهـدينــــه
للحگ قائـــدنه وحاديــنــــه
باچــر من يظهــر والينـــــه
بيده اتــرف الرايه الخضره
ياعاشور تنوح الزهره
الشاعر رياض الرسل الجابري
قصيدة رقم ١٠
تجليبة للخدمة الحسينية
ويــه احســين بالــك واحذر اتــدور
الخــدمه اوداعتــك عــلويه وتـشور
---------
علويه واهلــها الخــدمه اشرف ناس
ومـن تتــدنه الها ايسطــرك العــباس
وي راس ابــو فاضـل لاتحـط الراس
تــره العـباس احــذرك سطرته اتعور
----------
لاصــارف فلـــس لاذابـــلـك ديــــنار
تحچي اشبيك انته وبالحچي منهار
ابـو الموكب ابكيـفه لـو صرف مليار
رجـــاءاً لاتـــدوخ روســـــنـه وخـــر
----------
مرجع من يجـي عاشور انته اتصير
بـَطــل كــافي لاتحچـــلي بالتــنظير
الطــبخ لحسين ياهو الـگالـك تبذير
واليــطبــخ لبــو الســـجـاد مـيــــبذر
----------
الفقــره اتصـيح صارو بالــبلد كثره
وخطـيه انته عليهم همــك اشكبره
بيــتك يالله بــيعه اوَزعــه عالفقره
عـميــت اعيـــونه دخـــانك امـــگبر
----------
العنده زود خـَلي يحـچي عن زوده
ولو هسه الحچي صاير على الموده
خل انشوف ياهو الصــفحته سوده
وخل انشــوف ياهـو بـيــنه اليقـصر
---------
شنو رايك اســئلك بالحچي الگلته
يــم احســين ياهــو التــعله منزلته
انــته لــو الــوزع قــوت عـــايـــلته
التجــاره وي ابــو السـجاد متخَسر
---------
ابراسك لو ايعيش احسين ابو الاكبر
الملــح الــي اكلــته ابـــزاده چــا غزر
اعلــه ابو السجاد بالـك انــته تتبـطر
بخـت احسين ثــق وصـــدگ ايـعـَثر
----------
الطبخ انــته تگــلي واللطــم بدعه
وصلاة الصبح ماتــعرفها چم ركعه
هــذا الـدين ماتعـــرف ربــع ربــعه
موســهله القــضيه خــاف مـتصور
--------------------
حيدر تركي الكربلائي
قصيدة رقم ٨
موشح للهلال
يـا شـهر عاشور ما مثلك شهر
بـيـك ابـو السجاد دلاله إنفطر
ــــــــــــــــــــــــــــــــــــــ
يـا شـهر عاشور هيجت الحزن
بـيـك جسم حسين ظل بلا دفن
حسين خلّه الدمع يجري على الوجن
وانـفـجع چبد النبي سيد البشر
ــــــــــــــــــــــــــــــــــــــ
يـا شهر عاشور بيك شچم شباب
بـيـك ظل بلا دفن فوگ التراب
يـا شهر عاشور حرگوا للاطناب
بـيـك دين المصطفى دامي النحر
ــــــــــــــــــــــــــــــــــــــ
يـا شـهـر عباس خسفوا هامته
وبـيـك ابو فاضل إنگطعت يمنته
وبـسـهم صابوه وشگوا جربته
عـالشريعه من وگع جسمه و ذر
ــــــــــــــــــــــــــــــــــــــ
يـا شـهـر عاشور بيك تچتلت
آل عـدنـان وعلى الغبره هوت
والـحـرم يـا شهر بيك تسلبت
وبـيـك تتراجف بگت من الخطر
ــــــــــــــــــــــــــــــــــــــ
يـاشـهر عاشور وانصار الشهيد
بـيك كلها تچتلت فوگ الصعيد
والـيـتـامى تچتفت من إيد ليد
عگب ابـوالسجاد والسبعه وعَشر
ــــــــــــــــــــــــــــــــــــــ
يـاشـهـر عاشور هليت الدمع
وبيك گلب أم الحسن ظل منفجع
يـا شـهر عاشور رجيت الرضع
بـالـحـزن وانـتشر بالبر وبحر
ــــــــــــــــــــــــــــــــــــــ
يـاشـهـر عاشور ذوبت الگلب
بـيك الأكبر ظل على وجه الترب
وزيـنـب الحره مشت ديرت الغرب
تـصـيح وينك يامن الهاشم گمر
ــــــــــــــــــــــــــــــــــــــ
يـا شـهر عاشور بيك إبن الحسن
لـعـد عرسه العالم إرتج وانرجن
وصـار عرسه الكدر وثيابه الچفن
مـا تـهـنى بالعرس راعي الفخر
ــــــــــــــــــــــــــــــــــــــ
يـا شـهـر عاشور شيال العلم
بـيـك لـمن طاح هجموا عالخيم
شـبـوا الـنـيران سلبوا للحرم
وضـعـن زينب باليسر لمن سدر
ــــــــــــــــــــــــــــــــــــــ
يـاشهر عاشور كل صبح ومسه
حـزن يـومـك بالدهر ما ينسه
وأم حـسـن وحسين سيدة النسه
بـيك تنحب والگلب منها إستعر
الشاعر المرحوم ياسين الكوفي
قصيدة رقم ٦
ميمر للهلال
حِين اليجي شهر النوح قهر او ألم بس جابه
*١*
لـمّـن مـحـرم قـادم اعـليـنـه ايـصــيـر
يبدي الحزن بينه او صعب كل تفسيـر
تـفسـيـره بينه مو سـهـل هـــوَّ اچـبير
هذا الشهر حِزنه اهواي نـار الحـــزن لـهّـابـه
*٢*
حـال المــوالـي و الحــزن عــنـده نــار
يـذكـر مـصـايـب هالشهر شنهو الصار
بـآل النبي مـن كــل عــداهــم لأشـــرار
يـذكـر مصيـبـتـهـم دوم عـيـن المحـب سچابه
*٣*
شهـر الحـزن شهر المصايب و النوح
شـيـعـة عـلي كـلهــم گـلبهـم مجــروح
كـــل الحِــــدث وبـكـربـلـه أذّه الــروح
تـبـقـه طــوال الازمــان تنصب عـزه لمصابه
*٤*
هــذا الشـهـر كــل الخـلــق بالاكــــوان
بـيـهـا عــلامـــات القـهــر و الاحــزان
أرض او سـمه كلها تره إنس او جـان
تعـلـن عـزائه منـصـوب تـسـتـقـبـل ابأحـبـابـه
*٥*
كــل الخـلــق وابـهـالشــهــر و آلامــه
چـم نـايـبـه عـنـده او قــهـــر بـأيّـامـه
تحــزن عـلـه ســبـط النـبي وايــتـامـه
تذكـر مصابـه واشلـون قتله او جميع اسبابه
*٦*
كِــل الخــلــق تـنـصـب عــزائــه بـالآه
تـذكـر ابــو اليـمّـه التـخـضــب بـدمـاه
عـالغـاضـــريـَّه مـنــذبـــح يـا ويـــــلاه
حِـيـن انـقـتـل عالتربان صارت دماه اخضابه
*٧ *
كـلـمـن يـوالـي المـصـطــفـه والعـتـره
يـنـصــب مـــآتــم وبـحـــزن و بعـبـره
بـيـهـا يــواســـي حــيـدره و الـزهــره
يبچي او يـون لا ميهـيد جرح السبط و صوابه
*٨*
سـوّه قـتـل سـبـط الـرســول المُخــتـار
گـلـب المـــوالـي مـنـجـــرح لـلأخـيــار
جـرحـه حـــزن آل النـبـي و الاطــهـار
مـقـتـل إمــامـــه لـلـدوم حزنه صعوبه احسابه
*٩*
كِـلّـه مُحــرم بالمُـحــب نـــوح او هَــم
نـاصـب مـجـالــس للـسـبـط و المـأتـم
بـيـن البـشــر بــس الحــزن هَــوَّ عَـم
كلها تـواسـي الـزهــراء بأحسن شخص بأنسابه
*١٠*
گـلـب المــوالـي للحُـسـيـن المـظـلــوم
صـايـر حـزيـن ابـكـل حـيـاتـه مهـموم
هَـمّـه عـله مـقـتـل إمـامـــه كـــل يــوم
كـل العـمــر مـا يـنـسـاه حـد الأجـل و كـتـابـه
مهيمن يوسف الموسوي
قصيدة رقم ٤
موشح للهلال ، الزهراء مع الإمام المنتظر عج
هـَل مُحَرّم والزﭽيـّه إبْنارها
ما ظهر يطلب إبْنها إبْثارها
ـــــ
ما ظهر مهديها راعي الغانمـه
تنتظـــــر يومه الشفيعه فاطمه
ياخذ إبثار العقيله العالمه
ياخذ إبثار الغريبه إبْدارها
ــ
ياخذ إبْثار الحُسين إو غـُربته
كربلـــه إتشوف البهيّه طلعته
يوصل إلها إو ﯾﺳﭽب إبْهم دمعته
ينتشــــر نوره علـــــــــى زوّارها
ـــ
ينتشر نوره نريـــده المنتظر
يغسل إهموم الموالي والكَدَر
طالت الغيبه إو تِوَلاّنـَه الخـَطـَر
دنيــــــــة الشر نازله إبْأكدارها
ـــــ
دنية الباطل تحـــــارب كل شريف
والظلم ما ينحمل ﯾﭽوي إو مخيف
عاد إبن مرجانه بالجور العنيف
وينــــه إبن حيدر علي كرّارها
ـــــ
وينه إبن حيدر ﻓﮔدنــــــاه العَدِل
يظهر المهدي يـِلـِمـّنـَه الشـَمِل
ينتهي إيزيد اليعادينــــه النـَذِل
زمرة الأشرار تِخـْسَه إبْعارها
ـــــ
زمرة الأشرار تِخـْسَه من يـِهِل
نـور ألله الينتظر يومه اليـِحِل
وإحنه أنصاره نعاهد ما نِذِل
والشريعـــه تِنـْحيي أنـْوارها
ـــــ
والشريعه تِنـْحيي إبأبن الحسـن
يظهر المهدي ولو طال الزمن
يمسح إدموع الموالي لو جَرَن
تنتهي الدنيه جميع أخـْطارها
ــــ
تنتهي الآهات لو هـَل الأمام
ياخذ الثارات وإيحل السلام
ما يظل جور الأعادي والظلام
والزﭽيّـه تنكشــــف أسْرارها
ـ
الشاعر المرحوم جابر الخزرجي النجفي
قصيدة رقم ٢
شوط كربلائي للهلال
نستقبل شهر عاشور بالخدمه الحُسينيه
مصيبة كربله نذكر وحسين و مآسيّه
........
محرّم هل علينه و زاد حزنّه و القهر لحسين
شهر بيه المصاب هواي كل شيعي يهل العين
حزين و منقهر هاليوم حاله بس ألم هالحين
مصيبة كربله بالروح
حزنها مستمر ميروح
عليها كل گلب مجروح
ونذكر ثورة المذبوح وكل فكره و معانيه
........
بهلاله نذكر الضامي عليمن كربله گاصد
المن معتني الها شنهو سيدي رايد
جايب عيلته وياه ضد كل العده الحاقد
نذكر جم مصاب و صار
شاهدها ابو الاحرار
من اخسه البشر لشرار
كل خادم يگول اليوم مصابه المنذبح بيّه
........
بمحرم من يهل النه كل خادم عزه ينصب
مصاب حسين و يذكره حزين بحسرته ينحب
وسبي كل النسه الخدّر بجه بونّه على زينب
يذكر كل حرگ لخيام
وشنهو الي جره بالشام
نسه آل النبي بآلام
موالين الحسين هواي لجله كل تعازيّه
........
من هل الهلال اليوم حداد أعلى الخلق واحزان
شهر بيه الحسين ايموت مصابه نعلنه اعلان
يهل عالم شهر عاشور حزنه عالخلايق بان
الملائك بالسمه تنشر
قميص المنذبح منحر
بارض طف كربله بالحر
تعلن للخلق كلها مصيبه بس حزن هيّه
........
بمحرم من يجي ننصب مجالس للذبيح المات
ننادي لليعادينه فلا نعوف الولي هيهات
لجله كل محب حزنان يلطم ويذرف الدمعات
شهر بيه الگلب و الروح
لحسين الولي المذبوح
لمصابه و الرزيه انّوح
وعلى ام الخدر زينب من للشام مسبيّه
........
شهر بيه الگمر عباس يفدي من اجل دينه
يضحّي الولي احسين فداله اثنين جفينه
وسهم متصوب امن اعداه ضرب وسفه نظر عينه
سيوف طعنته كثره
ابو فاضل على الغبره
لجل دينه رخص عمره
ينصره بثورته رايد يحقق راد هالنيّه
........
وبهذا الشهر لو هل مصاب الما شبيه امصاب
وبقتله لأنس و الجان دمعهم عالوجن سجّاب
موالينه بحزنهم دوم كل خادم و اله احباب
حُسين بمقتله مظلوم
خيانه امن الاعادي الگوم
ذبيح و نازفه لدموم
سيوف الطاعنه بجسمه جروحه الف او تسع ميّه
........
شهر بيه الارض و الكون على مصاب الحسين تنوح
الملائك بالسمه السبعه على حسين ودمع مسفوح
لجل المنذبح مغدور و جسمه اعلى الثرى مطروح
والدنيا تغيرت حيل
من هجمت عليه الخيل
على ضلع الولي يا ويل
بخيول الاعوجيّه هاي على جسمه مشي و جيّه
........
من ننظر على لهلال نشوفه ونذكر الحرّه
من راح الگمر عنها سبيه هواي متحيره
لا كافل بقه الها بس جيش العده و شرّه
تصعد عالهزل زينب
وگلبها امن الحزن ينحب
عدوها بس قهر سبّب
غدر آل النبي و يقتل خيانه بكل معانيّه
........
محرم كل مصابه هواي وبجيته الحزن يكثر
واشدهن مشت زينب سبيه وسفه تتيسّر
بنات المصطفى الهادي صعوبه تكون هالمنظر
لاكن ما يذلّوهن
رغم جيش اليعادوهن
باذه لو هم يسوّوهن
تبقه بالشموخ او دوم فلا يذلها العده اشويه
مهيمن يوسف الموسوي
#قصائد_محرم_١٤٤٦هـ_٢٠٢٤م
بسم الله الرحمن الرحيم
الحمد لله رب العالمين و صلى الله على نبينا محمد وعلى آله الطيبين الطاهرين.
بعد التوكل على الله سبحانه وتعالى بدأتُ بنشر القصائد الحسينية لشهر محرم الحرام مصيبة الامام الحسين " سلام الله عليه" للعام ١٤٤٦هـ ٢٠٢٤م ، قصائد تقرأ في مواكب الزنجيل ، و اسال الله جل جلاله القبول بحق محمد وال محمد.
و يهدى ثواب النشر و القراءة إلى روح
والدي السيد يوسف مجيد الموسوي
" رحمه الله تعالى"
رحم الله من قرأ سورة الفاتحة على روحه الطاهرة و اهداء كل قصيدة تقرأ إلى روحه جزاكم الله خيرا و أجركم على الامام الحسين "عليه السلام" أن شاء الله
قصيدة رقم ٢٤
نزلة لام البنين عليها السلام /عكيلي
شجرة تقوى بدار الزهرة
ـــــــــــــــــــــــــــــــــــــــــــــــــــــــــــــــ
عــن أم العــبـاس أتـكــلـم
من أشـراف الوادم تـعـلم
بت خير انساب التتقدم
يم حيدر كبرت هل شجرة
ـــــــــــــــــــــــــــــــــــــــــــــــــــــــــــــــ
أربع أثمار الحملتهم
ايثار وعز من رضعتهم
هيه ليوم الطف ربتهم
رادتهم لأيام النصرة
ـــــــــــــــــــــــــــــــــــــــــــــــــــــــــــــــ
أخبركم شي يا أولادي
حسين السيد من ينادي
كل شي يكوله هو البادي
ربتهم يمشون بأمره
ـــــــــــــــــــــــــــــــــــــــــــــــــــــــــــــــ
شكد تحمل ايمان وتقوى
للنسوان تمثل قدوة
أربع أولاد انطت فدوة
واتمنت لو تملك عشرة
ـــــــــــــــــــــــــــــــــــــــــــــــــــــــــــــــ
رب الكون شكد منطيهه
راد يجازيهه يعليهه
ياهو اليكدر يوصل ليهه
ما رادت جاه ولا شهرة
ـــــــــــــــــــــــــــــــــــــــــــــــــــــــــــــــ
كل شي تريده عليهه تقبل
بلا تأخير بسرعه اتحصل
اقره الحمد وهيه تسهل
باب مراد لكل الفقرة
ـــــــــــــــــــــــــــــــــــــــــــــــــــــــــــــــ
الشاعر حسين الغالبي
قصيدة رقم ٢٢
ميمر بحق ام البنين "عليها السلام"
مِنها أبد ما موجود ربنه ابحكمته ليها
.............
أم الوفه او ام البنين الاطهار
ماكو مِثلها بالدهر لا تكرّار
ربنه جِعلها عاليه وإشما صار
كل منزلتها عالناس ماكو نِسه إتجاريها
.............
مِن العرب بإشرف قبائل و أنسـاب
تشبه إسـم بنت النبي و الأطياب
هذا الشبه مِنّه فلا أستغراب
ربِّ الخلايق و الكون رايد تره إيعليها
.............
مِـن كل نساء أهل الأرض خصصها
تشبه تره امن الزچيّه أكرمها
هذا الشبه بين البشر شرفها
عدها صفات الإيمان نفس الزچيه بيها
.............
هي تقيّه او مؤمنه بالإسـلام
صعبه نوصفها بالزمن بالأعوام
عدها فضائل والحزن و الآلام
بيها العِبر و الأحداث صعبه أنه أرويها
.............
راعت مشاعر ولد الزچيّه الزهره
ترفض علي إيگلها إبإسمها إبكل مَرّه
تبقه إبحزن وبكل ألم و بعبره
ولد البتول الزهراء عدهم تره إيأذّيها
.............
لجل الصمد خالق جميع الأكـوان
حين الإجه وكت الحرب هو حان
رغم القهر رايح يصير و أحزان
ضحت ولدها الأخيار وبكربله إتضحّيها
.............
سبط النبي حين الدِرت راد أنصار
كلهم ولدها الثورته عالاشرار
راحوا لجل نصره يثبت الأفكار
يحمل قضايا الأصلاح سبط النبي حاميها
.............
نصر الديانه بالحرب كل همهم
لجله تضحّي بالنفس وبدمهم
عالي عزمهم وبشجاعه كلهم
منهم گمر هاشم دوم أحسن صفه حاويها
.............
راد الگمر دينه ينصره إبثوره
عنده شجاعه اعله العِده و القدره
و أربع زلم مِنّ الوفيّه الحُرّه
وإشما تقدّم للدين قِله الدمه تنطيها
.............
كلها ولدها إبكربله مقتلوين
لجل القيم كلها او مبادئ والدين
رادت رضا رب الجلاله و حسين
واجب تجاه المعصوم كل المُهج تفديها
.............
مهيمن يوسف الموسوي
قصيدة رقم ٢٠
موشح بحق ام البنين عليها السلام
لو شفت حاجتك كلفه ومعْسِرَه
روح دگ باب الوفية الصابرة
......
لو شفت حاجتك كلفه وما تصير
وانعگد بالحاجه فكرك والمصير
آنه ادليك ابدربها وما تحير
أكصد الخلفت سبع الگنطره
......
خاف صعبه تزور گبر ام البنين
ارد اسهّلها بعد واخذ اليقين
بگلبك أكصد كربله وزور الحسين
تلگه ام عباس حتما حاضره
.......
اطلب اشما ردت لا تحتار ابد
بحضرة ام عباس محلوله العگد
اقره الها الفاتحه بوكت الشدد
كل شدايد گلبك تحلهن تره
......
أمن ولا تهم بأيام العسر
ولو كضت بالضيم ساعات العمر
شد وثاقك بالوفيه ام الصبر
ابلايه شك تفوز دنيا وآخره
.......
اخذ درس التضحيه وابلا ثمن
من الانطت اربعه لام الحسن
يا موالي شما قسه وياك الزمن
منها ادرس هالصفاة الفاخره
........
هاي ام عباس مدرسة الوفه
اخذ من عدها طريق المعرفه
والكرم من عدها بيش توصّفه
ويمها كل صعب تحسها اميسّره
.......
الشاعر حسام ناجي الحلي
قصيدة رقم ١٨
موشح بحق فاطمة بنت الحُسين العليلة "عليها السلام"
مهيمن يوسف الموسوي
ساعة التوديع مِنها لا مثيل
من ضعن بيت النبي قرَّر يشيل
.........
من أبو اليمّه يودّع عِيلته
فاطمه بنته حزينه شافته
بالدمع والنوح هي حاچته
تعتب اعليه إبقهر ليش الرحيـل
......... ١
بويه يا سبط النبي عندي عتب
شنهو گصدك مِن رحيلك و السبب
بويه مِن هسّه دمع عيني سِچب
من تروح الكربله ابكِثره يسيـل
......... ٢
رد عليها احسين بنتي فاطمه
روحتي بأمر الصمد رب السِمه
انصر الدين او تزول الظالمه
شامخه كون الديانه او ما تِميل
......... ٣
بويه صح هذا الأمر لازم يصير
حكمة الخالق إلهي و القدير
لاچن افراگك صعب وابلا نظير
بالگلب حزن البُعد بويه ثگيل
......... ٤
كل حياتي لو تموت او بس حِزن
ليلي وي إنهاري آنه بس أون
شوفتك گلبي يظل إلها يِحن
شوگي يا بويه الك لا مو قليل
......... ٥
كل بِنت بويه تعيش إبكل أمـان
وي أبوها للأبد طول الزمان
ساند البنته يظل عطف او حنان
هالصفه عِندك يبوبه يا أصيـل
......... ٦
بالضعن بويه إخذني الكربله
وي أخوتي اوياك ويّه العايله
فرگتك صعبه عليّه او معضله
من تروح ابقه ابقهر نوح او عويل
......... ٧
جاوب حسين ابألم حين اليگول
شاهد اعليّه الجلاله و الرســول
حقّچ اعليّه وحگ أُمّي البتول
لاچن ابقه ما اروحن مستحيل
......... ٨
بنتي من ربچ علينه هالقدر
ما نعارض هالحقيقه و الأمـر
فاطمه بنتي عليها ابكل صبر
وكلي أمرچ للصمد ربنه الجليل
......... ٩
فاطمه ردت عله حسين الإمـام
ناصرك ربّك يبويه عاللئام
بينك او بيني تره آخر سلام
بس ألم بعدك وحگ حامي الدخيل
......... ١٠
مهيمن يوسف الموسوي
قصيدة رقم ١٦
شوط كربلائي للعليلة ع
عليله وجملوني اجروح اهلي السافروا عني
وياهم خذوها الروح وبقيت ابلوعتي اوني
*****
عليه حسين ابوي ايخاف طريج السفر واهواله
ينظر علتي خاف اتزيد وحالي اياثر ابحاله
ودعّته ودموعي اسيل واصد ابحركه لرحاله
ابعينه لاحت الدمعه ابوي عليه شيرجعه
عليه ضاكت الوسعه
اودع روحي جن للموت ابوي بيوم ودعني
*****
يوصي الي بقوا بالدار عليه وخنكته العبره
راعوا فاطمه يكلهم عليكم فاطمة الزهره
ماتكدر سفرنه ابعيد واخاف اطوّل السفره
اخاف وليلي مانامه يطول السفر وايامه
ابوي بروحي انسامه
ياهو المثل ابوي حسين من ابث شكواي يسمعني
***
اباوع للضعن من راح روحي وي الضعن راحت
ياريت المنايا اليوم عليه بالعجل لاحت
بهيمه الروح وعليها كطرة مطر ماطاحت
شلي جابعد بالعين عين الماتشوف حسين
غربه والمرض علتين
بيهن راح اظل بالدار سيوف الذل تكّطعني
******
طالت غيبتك يحسين يبويه وشنهي تاليها
طريجك مايجيبك ليش ياديرة الصرت بيها
ياهو الي يجيب اخبار واخباري يوديها
بمدينه ويابلد منواك جاوين الوكت وداك
يلماخذ الروح وياك
فراك المايسر الروح بعدك تدري صدّعني
***
بويه من السفر ملجوم كلبي وروحي مهظومه
احس درب المشيته اخطار احس اتخوف اعلومه
اخاف الوادم يغدرون اوكتنه مارحم دومه
يبويه شيبتني الدار وبيه من مشيت اصار
ماردّت عليه اخبار
اخاف من القدر والبين اخافن يوم يفجعني
الشاعر حسن لعيبي الحريشاوي
قصيدة رقم ١٥
تجليبة للامام الحسين عليه السلام
سلام الله عليك إبكُل شُرب للماي
ما نِنـْساك ياعطشان يامولاي
*١*
ما نِنـْساك ياعطشان دمّك صار
مناير داينت أنوار للأقمار
يريت إبكُل وكت يمّك أحِل خُطـّار
أشم عطر الشهاده إو ينتشر بعضاي
*٢*
أشم عطر الشهاده إو أﮔصد الحضره
يمُر بيّه حلم ياخذني للزهره
أعزّيها إبمصابك وأﺳﭽب العبره
ونادي يالوديعه دمعتي إبعيناي
*٣*
ونادي يالوديعه دمعتي إبعيني
ألم بالروح ياخذني إو يودّيني
يم إحسين وأنواره تناديني
أروح الكربله أمشي إو حزن بحشاي
*٤*
أروح الكربله أمشي إو أزور إحسين
وأزور الكافل إو يمّه أهل العين
أصيح إبياذنب ﮔطعوا إلَك ﭽفـّين
ياباب الحوايج جيت إلَك ﺷﭽــــّاي
*٥*
ياباب الحوايج جيت إلَك مجروح
وإجروحي على زينب توُن وإتنوح
أريدك ياأبو فاضل تِطـَيب الروح
وَرِد منـّّك طِلِبْتي سيدي إبيمناي
*٦*
وَرِد منـّك أسولف لهلي وأحبابي
أبو فاضل فتحها كُلها أبوابي
طبيبي إو ما تركني ساعة إمصابي
لظل كُل حين أﮔصد للوفـَه مشّاي
*٧*
لظل كُل حين أﮔصد كربله الأحزان
أزور إحسين وأهتف يالصرت عنوان
أحلفك بالرضيع الما شرب عطشان
إشفع ياحبيبي إو يابدر دنياي
*٨*
إشفع ياحبيبي ياأبو الأكبر
بجاه الوالده الزهره إو علي حيدر
إذا تِتـْركني يحسين أنتهي إو أعثر
ما شوفن طريقي بالحشر يضواي
الشاعر المرحوم جابر الخرزجي النجفي
قصيدة رقم ١٣
ميمر للخدمة الحسينية
حـال الزچـيّـه الـزهـراء تنطي الأجر عالخدمه
*١*
كـلمـن خـدم سـبط الرســول المـخـتـار
ضـحـه ابحـيـاتـه الخـدمته و للاطـهـار
ديـنه يــنـصــره عـالعــده و الاشــــرار
يـوم القـيـامــه ربـحـان مِـن كـل جميع الأُمّـه
*٢*
حـيـن العـزه تنصب لجـل ذكـر حسـين
كـل مجـلسـك حـتـماً نصـر كــل الـديـن
اجـرك عـلى ربّ السـمـه و الكــونـيـن
نـيـتـك ســلـيـمـه للـدوم حـتـه تـنـال الـرحـمـه
*٣*
بـنـت النبي ام الحـسـن تـحـضـر دوم
وبـكـل عَـزه حـيـن التـقـيمه هالگــوم
مجـلس ابـو اليـمَّـه ابـنهـا الـمـظـلـوم
تبچي لمـصابـه و تنوح تذكـر ذبحـته ابلچـمه
*٤*
بـيـن المجـالـس فـاطـمـه هـي إتـكـون
تـنـظـر عـلى كـل الخـدم مـن يـبـچـون
تـكـتـب اسـمهـم بالسجـل ليـحـضـرون
وشـگـد عـظـيـمـه واللّٰه فـاطـم تِسجّـل إسـمـه
*٥*
حـيـن المـوالـي للـعـزه مــن يـحــضـر
ام الحـسـن فــاطـم عــلـيـهــم تــنــظـر
منهـو الصـدگ منهـو الإجــه مـتـكـبّـر
تـفـرز تـره كـل الـنـاس وبكل عـدل وبحـكـمه
*٦*
شـرط الخــدامــه يـا مــوالـي الـعـتـره
تـرضـه الـصـمد ربـك شرط و الزهره مخـلص يـجـب لا تـنگـطع كـل فـتـره
عـمـرك يـظـل بيها كـون تبقه شـرط هالكـلـمه
*٧*
خِــدمـة إمــامـك عـالبـشـر بيها الجـاه
بـيـهـا وجــيــه اعـلـه الخـلايـــق واللّه
لـلخـــادم ابـيــوم الحــشــــر وبـدنـيـاه
تصبح وجيه او بحسين بين الخـلـق عالقـمّـه
*٨*
يعـله مــقــامــك و البـخـت و الإيـمـان
هـٰـذا ابـفـضـل ربّ الخـلـق و الاكــوان
فـاطـم سـبـب هـٰـذا الفـضـل عالإنـسـان
بس الخِدم دومه ايكون يرضه الجـلالـه هَـمّه
*٩*
كلها خــدمــتــك و بـسـبـبهـا مـشهـور
تـطـغـي او تِـزل بالك نفس اهل الجور
صـفّـي العـمل خلي الصمد هـوَّ الســور
من كـل وساوس ابليس هادم وسف كل نعـمه
*١٠*
ســبـط النـبـي لـجــــل الـديــانــه قــدّم
كـلـهـا حــيــاتــه لـلـنـصــر ضَـحّـه دم
لـجـلـه او لجــل أُمّــه الزجـيّـه نـهـتـم
هـٰـذا قـلـيـل اشـمـا صـار إحـنه نِجازي او لأُمه
مهيمن يوسف الموسوي
قصيدة رقم ١١
موشح للهلال
ياشهر عاشور ما ننسه النـَحـَر
شافته الحـُرّه إبجراحات النـَظـَر
*١*
ياشهر عاشــــور من نــــار الحــزن
روح أبو الزهره النبي الهادي تون
ننســـــــــه آلام العقيلـــه لا تظــــن
من تركها إحسين وإختار السفر
*٢*
ياشهر عاشور هلـّّيت إو إجيـــــت
وإحنـــــه بالآلام من يوم المشيت
ما نسينه إحسين وإنت المانسيت
ما يزول الحُب أبد طـــول الدهر
*٣*
ياشهر عاشور ما ننسه العلــــم
من ثبـــت باﻠﮔـاع بدموع الألم
ما مشه العباس وإيخط القلم
غيرتـــه الماتنتهي مثل النهر
*٤*
ياشهر عاشور ما ننسه الرضيــــع
من ﺳﮔــاه إبنبلته الباغي الوضيع
منحره الفيّاض بالحب والربيـــــــع
ظـــــل يذيع الفوز وإيناغي الظفر
*٥*
ياشهر عاشور ما ننسه الشبـــاب
كوكب الأكبر مضه إو راد الغياب
خيـّم إعلى إحسين بغيابه الضباب
وأمــّـه بالحسـرات والهم والخطر
*٦*
ياشهر عاشور ما ننسه الغريب
من إجــــاه القاسم إبنار اللهيب
نادى ياعمي يبو اليمه الحبيـب
رايـد أفديها النفس آني إبفخر
*٧*
ياشهر عاشور ما ننسه حبيــب
من هتف لبـّيك يحسين المهيب
قائد الأنصار للخير الرحيـــــــــب
زوده بالحومه على الدنيه إنتشر
*٨*
ياشهر عاشور ما ننسه السفير
مسلم الواجه أميـّه إو كل حقير
أول الثـــوار قدوتهــــــم يصيـــــر
فاز أبو الهدات باﻠﺤﮓ وإنتصر
*٩*
ياشهر عاشور ما ننسه الخيول
داسـت المذبوح وإحتار الرسول
ﻠﭽمت الكرار والزهره البتول
وإﻨﻠﭽـــم ﮔلب العقيله وإنفطر
*١٠*
ياشهر عاشور ما ننسه العليـــل
بالمآسي إو يشكر الباري الجليل
من مصايب كربله إبهمـّه الثجيــــل
ذايبه الروح إو مشه إعليها الكدر
*١١*
ياشهر عاشور ما ننسه السبي
مـن خـذوا للشام حرمات النبي
والضعن يحديه ظالم ناصبـــي
والولــي السجاد راضي بالقدر
*١٢*
ياشهر عاشور جيت إو بالجروح
مبتلي هذا الوطن ﻳﺑﭽـي إو ينوح
والسبي عادوه وإنعاد النزوح
والخـوارج شرهم إعلينه ظهر
*١٣
ياشهر عاشور جيت إو بالبلاد
عاثــــوا الأشرار وإنهان العباد
والمراجع أفتوا إو نادوا جهاد
وإحنـه لبينــــــه النداء المنتظر
*١٤
ياشهر عاشور ننتظره الأمــــــام
قايم العتره الولي المهدي الهمام
من يجي نرفعها رايات الســـــــــلام
ينتشر خيره إو يفيض إعلى البشر
الشاعر المرحوم جابر الخرزجي النجفي
قصيدة رقم ٩
شوط كربلائي للخدمة الحسينية
اقبل خدمتي يحسين اذا عندي انه خدمه
رضاك انحصل نريده على كل الّذي انقدمه
*١*
يامن للديانه انطيت حياتك فادي كل دمك
تنصر دينك و فكره هالغايه تره اتهمّك
نريد نوفي حقك زين بالغالي تره انقدمك
حياتي و العمر يفداك
إمامي و سيدي نهواك
نظل طول العمر وياك
وبسجل الخدم يا ريت تكتبه سيدي إسمه
*٢*
خلقنه الخالق الله بفاضل طينتك يحسين
بكلام المصطفى يثبت شيعه ثابته بكل حين
خِلقنه للفرح و احزان لاهل بيت النبي الطيبين
يكلّم حيدره الكرار
يگلّه شيعه الك والصار
يا حيدر كثر لانصار
ولهذا السبب يحسين خدمتك كل محب همّه
*٣*
على كل ثورتك باقين مو بس للحزن و النوح
ولا نلطم بلا تفكير اهم عدنه فكر بالروح
الخدمه هم نصر للدين ثابت هالامر ميروح
ياللي اطلعت للقرآن
تنصره من بشر عدوان
تطبقه ما يجي خذلان
رغم جيش الكفر ضده علي تصبح صفت نقمه
*٤*
كل خادم سره بدربك من هتكوا كتاب الله
فلا ساكت على هالصار يعوف البي اذه وخِلّه
طلعت هالخدم كلها تنصره و بكثر حمله
افخر يا امامي حسين
ننصر سيدي للدين
وبكل الزمان و حين
نرضه الخالق و نرضاك موالي بهالأمر عزمه
*٥*
من ارض المدينه تروح طالع من أجل لأصلاح
فلا باطل طلعتك هاي صوتك للديانه صاح
ضد كل باطل او ظلام افدي بالحرب و ارواح
واحنه بهالدرب مثلك
على نهجك تره نسلك
شبيه المصطفى اصلك
افعالك إمامي هواي اجت النه تره رحمه
*٦*
يا ابن النبي الهادي وابن المرتضى حيدر
اعذرنه اذا تقصير من كل الخدم يصدر
كل غالي الك نفدي وبهذا الذي نگدر
رغم مرت علينه أعوام
شفنه بس ظلم و آلام
لاكن نستمر بإقدام
يتبعك ما يخذلك دوم بقه بنهجك ابو اليمّه
*٧*
چم مرّه يمنعونه على مر الزمن دائم
فلا يگدر علينه هواي ميردنه ابد ظالم
يرخصلك عمرنه ليك نفخر لو يجي اللائم
بالدم هالامر موجود
إمامي حبنه ما محدود
على الخدمه كثر لشهود
ما تگدر طغاة تكون يمنعنه بكثر ظلمه
*٨*
كلمن زاير المظلوم رادو مال ونطينه
وگالوا لليزور حسين نگطع مِنّه چفينه
فديناها ولا تهمنه لجلك كلشي سوّينه
واجت باخر زمن حكام
على الشيعه صفت ظلّام
عكس دين النبي الاسلام
لاكن ما گدر إلنه ولو إلنه دفع سِمّه
*٩*
وبهذا الوقت کالوا خدمتك يالولي بدعه
يعارض كل دليل نگول صعب يا سيدي انقنعه
عقله و الفكر محدود فلا يقبل تره نوسعه
توفيق الصمد ربنه
نخدمك سيدي ايحبنه
رضاك نحصل او جنّه
يا محله نكون اوياك يبو اليمه تره نعمه
*١٠*
كل هذا يبو اليمه نريدك بالحشر تشفع
وسيلتنه على الشدات كل شده واذه تمنع
عقيده و ثابته بينه بيها سيدي نقنع
وبكل خدمتك نفخر
ميردنه عده و الشر
على كل الاذه نصبر
عهد من عالم الذر بقت يحسين هالكلمه
مهيمن يوسف الموسوي
قصيدة رقم ٧
ميمر للهلال
اهلال المواجع شفناه ويحسين ألك ونينه
***
شفنه محرم هل علينه وصحنه
آه المصابك ياحســـــين اهتفنه
وفقنه نحيــــي امصيبتك وفقنه
حزمنه نخدم هالســــنه حزمنه
نتوسل أحنه و نرجاك نخدم نظل خلينه
***
يلي تفتت وانمـــــــرد كل جبدك
اتحزمنه وانريد المدد من عندك
ابجاه الزجيه وابو حسين وجدك
احسبنه يابن فاطمــــه من ولدك
أحنه عبيدك مولاي ولمصيبتك حنينه
***
يابو المحنه وياعـــــــزيز الزهره
انعيش المواجــــع وألام والجمره
وفقنه نسجب على امصابك عبره
وماتطفه بينه تســـــتعر هالجمره
من جمرة العاشر كون نار الخيم تجوينه
***
يالسابج اعلينــــــــه بمظاهر لطفك
أرزقنه نسمه من نســــايم عطفك
عيشنه لو لحظة حــــزن من طفك
نومه بالحر عالرمـــــل و ابصفك
خلينه نتكلب كون وحر الشمس ياذينه
***
جم خاطر المنك مصـــابك كاســر
وجم حافر وحافر ابصدر عـــــاثر
حسسنه يوم امصــــيبتك بالعاشـر
وخلي نضوك الألم لو بس حـــافر
ضوكنه نعطش وياك وضيم الكدر يولينه
***
ارزقنه لوعه اعله الخــيم والنسوان
وانته صريع اموســـد اعله التربان
لاتكدر اتكوم ودليــــــــــلك حيران
ماضكت كَطره اميه ميت عطشان
فوك الصدر فوك الراس لمصيبتك دكينه
ابو علي الركابي
قصيدة رقم ٥
موشح للهلال
شنهي حال حسين يهلال الشهر
أرد أنشدك عل ظعن عندك خبر
(١)
أرد أنشدك عل ظعن والعايله
شنهي كلّي شلون أهل المرجله
فارگوني وراحو ألطف كربله
وأمست عيوني يواسيه السهر
(٢)
امست عيوني ترابي اعلى الدرب
ودعوني وراحوا احباب الگلب
خوفي يهلال الشهر من الحرب
والضعينه اتصير بهوال وخطر
(٣)
بهل ظعن يهلال وصيت الكفيل
گتله يمه ارجاك والمدمع يسيل
زينب اختك هاي بت راعي الدخيل
ماتشوف الظيم لا شر وقهر
(٤)
ما تشوف الظيم بت حيدر علي
يمه يا عباس يا خيرة هلي
منتَ زود ارباي وانتَ ابن الولي
هاي توصاتي لعد ابني الگمر
(٥)
هاي توصاتي لحامي الگنطره
وما درينه اشصار يهلال وجره
دگ صدر لَيَّ وقسملي ابمنحره
يمه أفدي حسين وأختي بهل نحر
(٦)
ءآ يضعن حسين ما خلالي بال
بي حرم واطفال عاشت بالدلال
رف دليلي أعليهم وحن يالهلال
لا يطيحون أبئدين أهل الغدر
(٧)
چم وديعه مودعه بهذا الظعن
زينب وليلى وبعد مرة الحسن
اسأل الله ما يمرون ابمحن
ولا يمرون ابنوايب هل دهر
(٨)
اسأل الله يعود ظعن ابن البتول
ولا يِهَوْدِ هناك بغيابَ ويطول
أرد أزف عريس من نسل الرسول
وافرح بجاسم ابن خير البشر
(٩)
والله أنا اشتاگيت للطفل الرضيع
ءآ يطفل حسين يا زهر الربيع
خوفي يمه هناك لا توگع صريع
لا رحم عند ال اميه ولا فخر
(١٠)
لا فخر عند ال اميه ولا شرف
لا يمهم دين لا يمَّ ابطرف
ذوله ظلم وجور بيهم انعرف
ابلا خلق تاريخهم هذا اشتهر
(١١)
لا خلق لا دين لا حلم وزهد
ذوله يهلال الشهر امهم هِنِد
كتلت الحمزه وكلت منَ الچبد
وچم چبد للطف يسير بهل قدر
طارق ابو محمد السماوي
قصيدة رقم ٣
شوط كربلائي للهلال
هلالك لـــــــــــو شفت رسمه يجـدد همّي وأحزاني
وأتجـــــــرّع غصص الفراگ كـل أحبابي وأخواني
**
يا شهر الحـــــــــزن والنوح تسعـــــــر بالگلب جمره
منسيتــــــــــــــك ولا أنساك تجي لـــو راحت الذكرى
شفت لــــــو ما شفت الهلال وسط روحي الف حسره
عالي وينسمــــــــــــــع وني لحد موتـــــي خلد حزني
على الراح ورحــــــــــــــــل عني
أخوتي وكـــــــــــل ولد عمي وأهــــــل الشيمه ولياني
***
غصص بيك أجرعت والالآم مـــــا ظن غيري يحملها
وعشت لوعــــــــه بأثر لوعه ابوداع أخوانـــــي بأولها
وبعـــــــــــــد العاشر وضيمه الروحي صـــرت أكلّمها
صدگ هـــــذا الجره مصابي صدگ محـروگه أطنابي
صدگ عنّي مشــــــــــــه أحبابي
العشت ويـــــــــــــاهم سنيني بُعـــــــــدهم حيل أذاني
***
شفت بيك أشكثر أهــــــــــوال من عدهـــا گصر عمري
وداري بيــــــــــــك ظل خالي أهجسه چــن صبح گبري
مابي لا ولـــــــــــــــــد لا أخ لا كافـــــل حصن خدري
الچتلني شـــــــــــوك فركاهم ميته ريـــــــــــــت ويّاهم
بسيـــــــــــــــــوف اللي عاداهم
وبعدهم لحظه مــــــــا ضليت ولا يسبــــونـــــي عدواني
****
شفت مهــــــد الطفل خالي ونحـــــره أمصوّب ابنبله
وشفت جسّـــام فوك الكاع مصابه جــــــــــرّح المقله
وشبيـــــه المصطفى شفته اموذر معـــــــــرفت شكله
جسمه أمجــــــــرّح ودامي ومصيـوب ابعطش ضامي
وجابـــــــــــــــــــه حسين كدّامي
أبد مـــــــا بي عضو سالم وأخذتــــــه منّه بأحضاني
****
أخويه وكافـــــــــل ضعوني گصـــــد للمشرعه ومارد
وتعنّاله أبـــــــــــــــــو اليمه ومــــــن ردلي فريد أوحد
رايد مهره مــــــــــن عندي وقدمتــــــــه أبدمع عالخد
للحومه تعنّــــــــــــه وراح وشفتــــه ابعيني لمّن طاح
جسمـــــــــــــــــــــه ممتلي بجراح
دامي شفتـــــــــه عالغبره حالـــــــه أوّضعه بچاني
**
هـــــــــــــذا الشفته والأعظم حـــــــــــــرم وأيتام لمّونه
وشدّوْ أيــــــــــــــــدنه بحبال لبن مرجانـــــــــــه ودونه
وليزيد الكفـــــــــــــــــر بعده أبلوعـــــــــــــه وآه مشونه
يا رب أنـــــــــــــــدب وأنشد مهدينـــــــــــه علينه أيرد
الياخذ ثارنـــــــــــــــه من الند
أميه وكــــــــــــــــل التبعهم المنهم تــــــــــــوج نيراني
الشاعر قاسم حتروش البلداوي
قصيدة رقم ١
شوط كربلائي للهلال
مـُحـَرّم عـَوّد إو جانـــــَه نِشـِم ريحـَتـْها أحْزانـَه
أبو الأحرار ما نِنـْســـــــاه وَفي إو هَيـْهات يـِنـْسانـَه
*١*
مـُحـَرّم يـِحْمِـــــــــل إلآلام واجب نِحـْيي أيّامــَه
نواجـــِه سَطـْوَة الظـُلاّم يـِشِد كل مؤمن إحـْزامـَه
يعيش المـُبـْغِض إبأوْهام يخيب إبْصوتـَه إعـْلامه
إحـْنـَه إحْسين والينــه
تِهِل خيراتـَه إعْلينه
بالمحشر يلاﮔينـــه
دِنـْيـَه إو آخِرَه وَيـّاه والمهيـــــوب ويـّانـَه
*٢*
مـُحـَرّم مَوْسِـم الأحـْزان مَوْسِم مِحْنـَة الزهـْرَه
وإحـْياءَه فـَرُض وإيمـان وإحْنـَه إبشوﮒ نِنـْتـَظـْرَه
نريد إنـْشارِك العطشان إحْسين إلـْرِسـَم ثـَوْرَه
نِعـْلِنـْها مآتِمْنــــــــَه
نِحْييها شعايـِرْنـَه
تِعـَلـّمـْنـَه منابـِرْنـَه
نعين المـُخـْلـُص إو نِرْعاه والمعبـــــــــود يـِرْعانـَه
*٣*
مـُحـَرّم مَنـْبَــر التـَغـْيير رِسَم مَجـْدَه أبو الثوّار
مَنـْهَجـْنـَه إو عليه إنـْسير مَنـْهَج نبعة المـُخـْتار
ننادي للعدل والخيـــــــر قِدْوَتـْنـَه علي الكرّار
نواجه واجـــــب الظالـِم
نكون العون للوادِم
نـَهِجـْنـَه إيْبارِكـَه القايـِم
تـُنـْظـُرْنـَه الأبي عينــــاه عَمـَلـْنـَه إيْشوفـَه مَوْلانـَه
*٤*
مـُحـَرّم عـَبـْرَة الطيبيـــــن يروي كل مَجاهِد دوم
ما أعـْظـَم مُصاب إحسيـن رضيعَه قـَدّمـَه المظلوم
أبو اليـِمّه أقام الديــن عـَزِمـْنـَه من جهادَه اليوم
نواجه كـُل يزيد إيْجور
والفاسِد عليه إنـْثور
عقيدَتـْنـَه سلاح إو نور
والمهدي إبْصَبُر نِنـْخــــاه يـِظـْهَر كِثـْرَوا إعْدانـَه
*٥*
مـُحـَرّم بالعمل نِحْييـه عمل خير إبـْتـَراحـُمـْنـَه
أمـُر الله نسير إعْليه والطيبـات تِجـْمَعـْنـَه
والهادي النبي نِرْضيه مجالـِسـْنـَـه تـَعـَلـْمـْنـَه
نِصـَلـّي إعلى النبي إو آله
نريــده الصوت يـِتـْعالـَه
والملهوف هِنـْيالـَه
على المذبــــــــوح واويلاه ثـَوْري إبـْزود عِنـْوانـَه
*٦*
مـُحـَرّم يـِجــْرَح الأرواح يعيد إمـْصاب أبو اليـِمـّه
يصير إلـْنـَه السواد إوْشاح نـَعـّزّي فاطِمَـه إمـّه
حـِزِنـّه دوم ما يـِنـْزاح إلاّ إيـْهِل أبو الهِمـّه
طالت غيبـِتـــــَه إعـْلينـَه
أبو الثارات مَهْدينـَه
يـَمـْتـَه يـِظـْهـَر إيْجينـَه
عـَجـّل بالفرج رَبــــــــــــّاه مِنـْتـَظـْرين ﻳـِﻠـْﮔـانـَه
ــ
الشاعر المرحوم جابر الخزرجي النجفي
وللابداع قلم يبدع في حب الحسين ع
انه المبدع الشاعر ستار عذاب
لاتفوت فرصة الاشتراك في قناته
/channel/AsTA7891DsattarHAGAMY
