ادبیات ائوی

10 February 2025 14:15

#شئعیر

سون هاراییم

شئعیر و سس: #حمید_عیوضی

#ادبیات_ائوی

@AdabiyatEvi

ادبیات ائوی

31 January 2025 13:34

#دوغوم_گونو #آذربایجان

بو گون، تاریخه دامغا ووران، بؤیوک اؤندر، #محمدامین_رسولزاده‌ نین دوغوم گونودور.

۱۸۸۴-جو ایل یانوار آیی‌نین ۳۱-ده باکی‌نین نووخانی کندینده آنادان اولموشدور. محمدامين رسولزاده قافقازدا آذربايجان جمهوريتی‌نين تشکّلونده و ملّی قورتولوش حرکاتيندا تاريخی رولو اولان ملّی آذربايجان  «مساوات» خالق پارتی‌یاسی‌نين ليدئرلییینه ۱۹۱۷ و ۱۹۱۹-جو ايل‌لرده باکی‌دا توپلانان پارتی‌يا قورولتای‌لاريندا اتّحادلا سئچيلميشدير.

۱۹۱۸-جی ايل مايين ۲۶-دا ماورايی-قافقازين پارچالانماسی اوزوندن آذربايجان ملّی شوراسی ۱۹۱۸-جی ايل مايين ۲۸-ده آذربايجان جمهوريتی‌نين استقلالينی اعلان ائتميشدیر...

او بؤیوک اینسانین ادبی فعالیت‌لری حاققیندا مطلب‌لری اینستاگرام آدرسیمیزدن اوخویا بیلرسینیز:

➡️ https://www.instagram.com/p/DFfXL7DM_yO/?igsh=NnNtYnljbGo2ZWJ1

#ادبیات_ائوی

‌@AdabiyatEvi

ادبیات ائوی

29 January 2025 08:34

#رضا_حسینی_مرند جنابلارینین #قیرمیزی_پیکان_گلیر آدلی حئکایه توپلوسو، ایشیق اوزو گؤردو.
یازیچی‌نی قوتلاییریق، اوخوجوسو بول اولسون.

کتابی تبریزده #کیرپی نشریندن و مرند شهرینده #کافه_هیچ دن الده ائده بیلرسینیز.

#ادبیات_ائوی

@AdabiyatEvi

ادبیات ائوی

22 January 2025 12:28

#حیکایه

قاتاردا ساعات ۵:۲۵ده
یازیچی: #مارک_کوهئن
چئویرن: #ووقار_نعمت

کیشی قادینین اوز به‌ اوزونده اوتوردو.
«بوگون ایشدن قووولدوم. دئییرلر دنگه‌سیزم».
قادین، یئرینده ساکیت اوتورموشدو.
کیشی اوزونو چئویریب یاغیشین شیریلتی‌سینا قولاق آسدی. دوداقلاری تیتره‌ییردی.
اؤز-اؤزونه دئییندی: «ائله‌بیل هئچ کسه اؤنملی دئییل!».
...
شام اوسته قادینین دوستو اوندان سوروشدو:
- خوشا گلمز بیر اولای‌می اوز وئریب؟!
قادین، هاوادا اوینایان بارماق‌لارینی اشاره ائدر کیمی:
«او کیشی قاتاردا ناراحات گؤزه دَییردی».

#ادبیات_ائوى

@AdabiyatEvi

ادبیات ائوی

21 January 2025 20:51

#شئعیرلی_گونلر

گل قییما یانار اودلارا هر گون قالانیم
اوغروندا غمین کؤلگه‌سینه دالدالانیم
گلسن، اوره‌یین چوخ دیله‌ییندن کئچه‌رم؛
گل قییما وطن تورپاغی تک پارچالانیم...

#یاور_چوپانی

#ادبیات_ائوی

@AdabiyatEvi

ادبیات ائوی

19 January 2025 17:14

بیز، #ادبیات_ائوی اولاراق، هر مدیا کیمی دویغولاری پایلاشیب به‌به-چه‌چه دئمک اوچون بیر آرایا گلمه‌میشیک.
8 ایلدن چوخدور ادبیات ساحه‌سینده چالیشیریق و چالیشماغا دا داوام ائده‌جه‌ییک...
بیز بیر آرایا گلدیک، چونکی، بیزدن سونرا ادبیات دونیاسینا گلن‌لر، ادبیات دونیاسی‌نین ساده‌جه بند-بند شئعیرلر اولمادیغینی بیلسین.
بیزی بو ایل‌لرده دستک‌له‌ین و دستکله‌مه‌ین هرکسین الینی محبت‌له سیخیب، چوخ ساغ اولون دئییریک.

#ادبیات_ائوی

@AdabiyatEvi

ادبیات ائوی

18 January 2025 16:25

صراف دئدیم حکمت ایلن یوخ، وار اولماز،
گولدو، دئدی باخ، گور یوخو، وار ائیله دیم اولدو

#صراف

برگزاری اولین جلسه از سلسله جلسات کارگاهی _ آموزشی و نقد وبررسی؛ شعر خوانی انجمن فرهنگی؛ ادبی «صراف سخن» با محوریت شرح غزل و صنایع ادبی بکار رفته در اشعار غزلسرای نامی ایران و آذربایجان، بویژه شاعر پر آوازه آذربایجان حاج رضا صراف تبریزی.
شعر خوانی؛ نقد و بررسی ادبیات؛ س..

زمان: روز دوشنبه 1403/11/01
ساعت: 18:30 - 16

شرکت برای عموم آزاد و رایگان است.


مکان : تبریز؛  پارک مقبره الشعرا؛
مرکز فرهنگی و گردشگری شهرداری منطقه۱۰.


توجه: مهمانان محترمی که با اتومبیل شخصی تشریف می آورند؛ می توانند روبروی درب مرکز گردشگری پارک نمایند.

#ادبیات_ائوی

@AdabiyatEvi

ادبیات ائوی

18 January 2025 12:26

#فولکلور

کؤهنه ناخچیوان
یازیچی: #جلیل_عبدالله
کؤچورن: #نرگس_ابراهیمی
قایناق: آذربایجان شفاهی خالق ادبیاتی کلیاتی

#ادبیات_ائوی

@AdabiyatEvi

ادبیات ائوی

15 January 2025 14:42

#دوغوم_گونو #ناظیم_حیکمت

مَحمَت حیکمت ران (ناظیم حیکمت) یا دا تورکیه‌دن آیریلدیقدان سونراکی سوی آدی ایله «ناظیم حیکمت بورزِجکی».
دوغوم تاریخی: 15 یانوار 1905 سئلانیک، عثمانلی امپراطورلوغو
اؤلوم تاریخی: 3 اییون 1963 مسکووا.
ناظیم حیکمت تورک ادبیات دونیاسی‌نین اونودولماز دئولریندن بیری‌دیر. شئعیرلری آزی 50 دیله چئویریلمیش و بیر چوخ اؤدول قازانمیش‌دیر.
ناظیم حیکمت تورک چاغداش ادبیاتی‌نین ان اؤنملی و دونیا ادبیاتیندا یئر آلمیش گؤزده یازیچی‌لاردان بیری‌دیر.

بو گون تورک ادبیاتی‌نین ماوی گؤزلو دئوی #ناظیم_حیکمت ین دوغوم گونودور.
سایغی و سئوگی ایله آنیریق 💙🖤

#ادبیات_ائوی

‌@AdabiyatEvi

ادبیات ائوی

13 January 2025 14:45

#دوغوم_گونو #غلامحسین_ساعدی

چیلله (دی) آیی‌نین 24-جو گونو 1314-جو ایل تبریز شهرینده، کارمند بیر عائیله‌ده دونیایا گؤز آچدی.
غلامحسین ساعدی، عؤمرونو وطن حسرتی ایله باشا یئتیردی.


حیاتیندان آرتیق بیلگی‌ آلماق اوچون اینستاگرام پایلاشیمینا باخا بیلرسینیز:

➡️ https://www.instagram.com/p/DExIxFjMeWS/?igsh=ZzJiYW85Nno1bWNo


#ادبیات_ائوی

‌@AdabiyatEvi

ادبیات ائوی

06 January 2025 12:32

#گونلریمیز #باش_ساغلیغی

دوشون کائناتین مین سرّینی سن
بیر بایقوش اوچ‌یوز ایل قالیر دونیادا
اؤلمه‌لی اولانین یئرینه بعضاً
اؤلمه‌لی اولمایان اؤلور دونیادا

#ممد_آراز

آلدیغیمیز آجی خبره گؤره آذربایجانین دَیَرلی شاعیری، «بهمن زمانی» جناب‌لاری‌ بو گون تبریز شهرین‌ده وفات ائدیب.
ادبیات ائوی طرفیندن اونون محترم عائله‌سینه تسلیت دئییریک.
یئری اوچماق، یولو داواملی اولسون.

#ادبیات_ائوى

@AdabiyatEvi

ادبیات ائوی

31 December 2024 20:35

#شئعیرلی_گونلر

ایتیرمک قورخوسو وار بو شَهَرده
پاییزی؛ حسرته یئر بوشالدیرمیش
یئددی اویان یادلار قاپیمدان گیرَر
اؤلوم؛ آدام‌لاری یوموشالدیرمیش!

#سجاد_گل_نژاد

#ادبیات_ائوی

@AdabiyatEvi

ادبیات ائوی

29 December 2024 15:48

#دوغوم_گونو #نصرت_کسمنلی

نصرت ایّوب‌اوف (کسمنلی) ۲۹ دکابر ۱۹۴۵-جی ایلده آغ‌استافا رایونوندا آنادان اولموشدور. یازدیغی سئوگی شئعیرلرله آرامیزدا هله ده یاشایان نصرت کسمنلی، بوتون عؤمرو بویو سئوگی آختارمیش و سئوگی ایله قول-قاناد آچمیش شاعیر اولاراق تانینیر...

نصرت کسمنلی‌ شئعیرلری‌نین ان ماراقلی و اؤزونه‌مخصوص جهتی بوندادیر کی، بو شئعیرلرده گئری‌یه- «اوشاق یادداشینی قانادان»، اوشاقلیقدا چکدییی بوتون آجی‌لاری، ناغیلا قاییتماق، ناغیلی یئنی‌دن یاشاماق آرزوسو یوخدور. نصرت داها چوخ ایچینده اولدوغو زامانین، دایانمادان آخیب کئچن عؤمرون ناغیلینی یاراتماغا و جانلی ناغیلدا یاشاماغا اوستونلوک وئریردی.
حیاتیندان آرتیق بیلگی‌ آلماق اوچون اینستاگرام پایلاشیمینا باخا بیلرسینیز:

➡️ https://www.instagram.com/p/DEKoT3islyk/?igsh=MXd3bXlqOGpyYjlhcQ==


#ادبیات_ائوی

@AdabiyatEvi

ادبیات ائوی

29 December 2024 11:48

#مقاله

«کارامازوف‌ قارداشلاری» رومانی و «داستایوفسکی» دونیاسی

یازیچی: #محمد_عاریف 
اختصارلا کؤچورن: #همت_شهبازی‌

#ادبیات_ائوی

@AdabiyatEvi

ادبیات ائوی

28 December 2024 16:12

#فولکلور

قایناق: آذربایجان شفاهی خالق ادبیاتی کلیاتی
یازیچی: #جلیل_عبدالله
کؤچورن: #نرگس_ابراهیمی

#ادبیات_ائوى

@AdabiyatEvi

ادبیات ائوی

04 February 2025 15:27

#باش_ساغلیغی

گئدن‌لری آندا وئریب یولوندان
ساخلاییرام، یاتمیرام کی گئجه‌لر

#شجاعت_احمداوف

آلدیغیمیز آجی خبره گؤره دَیَرلی شاعیریمیز، #نسیم_خانیم_کهنسال ین آتاسی دونیاسین دَییشیب. ادبیات ائوی طرفیندن اونون محترم عائله‌سینه تسلیت دئییریک.

#ادبیات_ائوى

@AdabiyatEvi

ادبیات ائوی

30 January 2025 12:42

#دوغوم_گونو #مهسا_عبدالعلیزاده

مهسا عبدالعلیزاده، 1369 ایلینده، خییوو شهرینده (مشکین شهر) دونیایا گؤز آچمیشدیر. 1390 ایلیندن ادبیاتا ماراق گؤستریب و «پایسیز یالقیز» تخلّصو ایله شئعیر و حئکایه ساحه‌سینده، قلم وورماغا باشلامیشدیر.
حئکایه ساحه‌سینده سایین ایلقار موذن‌زاده‌نین چوخلو یاردیمی اولموشدور. شاعیرین تام یازدیقلاری 20یاشدان 24یاشینا قدر اولموشدور.
.
1395 ایلینده، شاهین مرادی ایله ائوله‌نیب و 1397 ایلینین پاییز فصلی، فَله‌یین گوجلو اَلی عؤمرونو خزانا چکیب و مغزی انفارکتوس نه‌دنی ایله، آلتی آی خسته اولدوقدان سونرا نهایت، 1398 ایلینده، فروردین آیی‌نین یئددینجی گونونده دونیایا گؤز یومموشدور. بیر داها بو شاعیردن شئعیر اومماق عبث‌دیر.

مزاری نورلا دولسون... یئری اوچماق اولسون.

#ادبیات_ائوی

‌@AdabiyatEvi

ادبیات ائوی

26 January 2025 11:31

#مقاله (فایل)

رمان «ایکینجی ال آدام» (مهدی عظیمی) حاققیندا نوت‌لار
یازیچی: #احمد_یوسفی

#ادبیات_ائوی

@AdabiyatEvi

ادبیات ائوی

21 January 2025 22:26

#باش_ساغلیغی

ددم‌قورقود آیتدی:
العاقبت اوزون یاشین سونو اؤلوم-آیریلیق‌.
اَجَل آلدی یئر گیزلتدی، فانی دونیا کیمه قالدی؟!

تأسف‌له آلدیغیمیز آجی خبره گؤره، حؤرمت‌لی و دَیَرلی شاعیر #ووقار_نعمت جناب‌لاری‌نین آتاسی دونیاسینی دَییشیب.

عزیز شاعیریمیزه و عائله‌سینه باش ساغلیغی دئییب، قالانلارا اوزون عؤمور دیله‌ییریک.

#ادبیات_ائوى

@AdabiyatEvi

ادبیات ائوی

20 January 2025 09:17

#گونلریمیز #20یانوار

35 ایل کئچدی...

تورپاق سو ایله قاریشاندا پالچیق اولور، قان ایله قاریشاندا وطن!

19 گئجه‌سین، 20 گئجه‌سینه باغلایان، ساوئت اوردوسو ائرمنی‌لری قوروماق ادّعاسی ایله آذربایجانین باکی شهرینه گیرمیش. 143 آذربایجانلی‌نی شهید ائتمیش و 800 نفری ده یارالاندیرمیش. روس حاکمیتی و ایش بیرلیکچی سویسوز ائرمنی‌لر فاجعه و جنایت‌لرینه؛
تاریخیمیزه بو صحیفه‌نی اؤز قان‌لاری‌‌یلا یازان شهیدلریمیزی سایغی، هم ده غرورلا آنیریق. اونلارین قانی یئرده قالمادی. آرتیق روح‌لاری شاددیر.

قیش اویودا بیلمیر بو سویوق غمی
دونوب باش‌داشی تک بیر دردلی آنا
دیدیلمیش گلین‌لیک پالتاری کیمی
قار یاغیر شهیدلر خیاوانینا

یورغون عسگرلرین یوخوسو دَرین
سون سؤزو: «بیر ایچیم سرین سو وئرین»
اؤرتور یاراسینی قار شهیدلرین
قار یاغیر شهیدلر خیاوانینا

بوردا آغلایان کیم  بوردا سوسان کیم؟
بیزلردن محبت اوموب، کوسن کیم؟
دن دوشور تورپاغین ساچینا سانکی
قار یاغیر شهیدلر خیاوانینا

شئعیر: #نصرت_کسمنلی

#ادبیات_ائوی

@AdaviyatEvi

ادبیات ائوی

19 January 2025 16:29

#مقاله (کپشن)

#جلیل_ممدقولوزاده‌ -نین یارادیجیلیغینا اؤتری باخیش

یازیچی: #ادبیات_ائوی

@AdabiyatEvi

ادبیات ائوی

18 January 2025 12:27

آشیق علسگر ناخچیوان شرورونا قوناق گلیر. ائل آغ‌ساققال‌لاری اؤز آرالاریندا سؤزلشیرلر کی، بو ماحالدا بیر مشهور ائل هاواسی وار، اگر آشیق علسگر او هاوانی چالا بیلدی، اونا بؤیوک دؤران ییغاجاغیق، یوخ، چالا بیلمه‌دی، آنجاق آتینا آرپا-سامان وئره‌جه‌ییک.
مجلیس باشلانیر. ائل آغ‌ساققال‌لاری ناخچیواندا مشهور اولان ائل هاواسیندان سؤز سالیرلار. علسگر مجلیس‌دن اجازه آلیب باییرا چیخیر. گؤرور کی، بیر چوبان هوشکوره‌یینده بیر هاوا چالیر، یقین ائدیر کی، بو همین هاوا اولاجاق.
مجلیسه قاییدیر. سازینی کؤینه‌ییندن چیخاریر و آغ‌ساققال‌لارا اوزونو توتوب دئییر:
- قدیم عادته گؤره آشیق اوّل بیر «دیوانی»، بیر «تجنیس» و بیر ده بیر «ائل هاواسی» اوسته چالیب- اوخویاندان سونرا صحبته باشلار. امّا گؤرورم کی، سیزین آرزونوز اوّل-اوّل ناخچیواندا مشهور اولان ائل هاوانیزی ائشیتمک‌دیر. ائله ایسه قویون سازیمی سیزین هاوانیز اوسته کؤکله‌ییم.
علسگر سازی کؤکله‌ییر. ناخچیوان هاواسینی ائله بَزه‌یه-بَزه‌یه چالیر کی، آغ‌ساققال‌لار بیر آغیزدان «آفرین، آشیق علسگر» دئییرلر.
علسگر دئییر:
- بو سیزین «کؤهنه ناخچیوانی» هاوانیز. امّا بو هاوانین بیر بالاسی، بیر گولو ده وار. سازین کؤک و پرده‌لرینه بلد صنعت‌کار عینی سس قاطاریندا بو هاوادان بیر قول آییریر، بیر گول وورور. «ناخچیوان گولو» هاواسینی یارادیر.

یازیچی: #جلیل_عبدالله
کؤچورن: #نرگس_ابراهیمی
قایناق: آذربایجان شفاهی خالق ادبیاتی کلیاتی

#ادبیات_ائوی

@AdabiyatEvi

ادبیات ائوی

15 January 2025 20:16

#شئعیرلی_گونلر

سنی دوشونمک گؤزل بیر شئی،
اومید وئریجی بیر شئی...
دونیانین اَن گؤزل سسیندن،
ان گؤزل ماهنی‌نی دینله‌مک کیمی بیر شئی؛
آنجاق آرتیق اومید یئتمیر منه
من داها ماهنی دینله‌مک دئییل،
ماهنی سئویله‌مک ایسته‌ییرم...

#ناظیم_حیکمت

#ادبیات_ائوی

@AdabiyatEvi

ادبیات ائوی

14 January 2025 11:22

#شئعیر #آتا

وارلیغیم، یوخلوغوم، سن هر شئییم‌سن
توکنمز اومیدسن، آرزوسان آتا
حیات باشقا دونیا، سن باشقا دونیا
دونیامین ایچینده دونیاسان آتا

سنین اوزه‌رینده قورولوب جاهان
وارلیغین-روحوندور منی یاشادان
دئسه‌لر: سنین‌چون نه دئمک آتان؟
ان چتین سوال‌سان، جاوابسان آتا

اولاندا اوزاقدا، دونیا گلیر دار
چیلپاق بدنیمه سانکی یاغیر قار
ستایش ائتدیییم ایکی وارلیق وار
منیم‌چون ایکینجی آللاه‌سان آتا

شئعیر: #نصرت_کسمنلی
سس: #شیوا_جعفریان

#ادبیات_ائوی

@MaviDuygular
@AdabiyatEvi

ادبیات ائوی

06 January 2025 15:32

#آنیم_گونو #میکاییل_مشفق

میکاییل اسماعیل‌زاده (مشفق) ۱۹۰۸-جی ایل باکی شهرین‌ده دوغولموشدور. آذربایجان شئعیر گؤیونون پارلاق اولدوزو مشفق، سئوگی، اجتماعی و میللی ایرق شئعیرلری ایله آدینی ادبیاتیمیزا مؤهورلَمیش و میللتین اوره‌یینده باشقا بیر یئری وار.

بو گون استالین و ساوئت حاکمیتی‌نین چیرکین سیاست‌لرینه «ملیّتچی» دامغاسی ایله قوربان گئدن، دَیَرلی شاعیر «میکاییل مشفق»ین آنیم گونودور. سایغی و سئوگی ایله آنیریق...

حیاتیندان آرتیق بیلگی‌ آلماق اوچون اینستاگرام پایلاشیمینا باخا بیلرسینیز:

➡️ https://www.instagram.com/p/DEfM7ITstyJ/?igsh=MWlsbmd2dTl1eG9lMA==


#ادبیات_ائوی

@AdabiyatEvi

ادبیات ائوی

31 December 2024 21:01

#شئعیرلی_گونلر

اینسانلار دنیزدیر، اینسانلار بولود
یاغان یاغیش دئییل، تؤکولن قان‌دیر
اؤلن‌لر بیر اوووج تورپاغا دؤنور
بو تورپاغین آدی «آذربایجان‌»دیر 🇦🇿

#آردا_خانی

#ادبیات_ائوی

@AdabiyatEvi

ادبیات ائوی

31 December 2024 18:16

#گونلریمیز #هم‌رأی‌لیک_گونو

دونیا آذربایجانلی‌لارین هم‌رأی‌لیک گونونون اساسی ۱۹۸۹-جو ایل دکابرین سون گونونده ناخجیواندا SSRİ-İRAN سرحدلری‌نین داغیلماسی زامانی قویولموشدور. قوزئی و گونئی آذربایجان آراسیندا هومانیتار، مدنی، اقتصادی و قوهوملوق علاقه‌لرینی گوج‌لندیرمک اوچون سرحد چپرلری‌نین گؤتورولمه‌سی قبول ائدیلمیشدیر. بو عنوان، ابوالفضل ائلچی‌بَی طرفیندن وئریلمیشدیر.

داغلارینین باشی قارلی
سینه‌سی یاشیل اورمانلی
دره‌لرین شیرین بارلی
آذربایجان! آذربایجان!

صحرالارین سونبوللودور
ایل مدام اوستو گوللودور
باغچالارین بولبوللودور
آذربایجان! آذربایجان!

#احمد_جواد

#ادبیات_ائوی

@AdabiyatEvi

ادبیات ائوی

29 December 2024 11:49

داستايوفسكی‌نين سونونجو بؤيوک و اؤنملی اثری «كارامازوف قارداشلاری» (80-1879) رومانی‌دير.  كؤهنه‌ روسيه حاققيندا ماراقلی بير ائپوس (حماسه) اولان بو اثر یازارین ايللر بويو داوام ائدن آختاريش‌لارينا، سياسی، اجتماعی، فلسفی و اخلاقی گؤروش‌لرينه سانكی يئكون ووروردو. كارامازوف‌لار عايله‌سی‌‌نين تاريخچه‌سينده مؤلف بير داها اؤز دؤرونون اَن مركب و قارانليق گوشه‌لرينی، آداملارين اورک‌لرينی و بئيين‌لرينی گمير‌ن ضدیّتلی فيكير و احتراس‌لاری، روس خالقی‌نين مصيبت‌لرينی، دوشکون طالعينب عكس ائتدير‌مه‌يه چاليشميشدی.
فئودور كارامازوف و اونون اوغلانلاری ديميتری، ايوان و آليوشا بيرـ‌بيرينه اوخشامايان، کاراكترجه و مفكوره‌جه تاماميله مختلف آداملارديلار. ايوان كارامازوف عاغيللی بير گنج‌ و استعدادلی يازيچی و فيلوسوفدور. داستايوفسكی‌نی دوشوندورن و اثرلرينده تئز‌-تئز توخونولان مسئله‌لری ايوان داها كسكين و قطعی بير شكيلده ايره‌لی سورور. ايوان اينسان‌پروردير، آمما اونون اينسان‌پرورلييی اينسانلاری باريشديرماق، حياتدا اجتماعي بير آربالیق (=موازينه) عمله گتيرمک ايسته‌ين‌لرين معیارلاریندان اوزاق‌دير. او دينداردير، آمما چوخ گوجلو تنقيدی محاكمه‌يه ماليک‌دير. او دئيير: « من آللاهين ياراتديغی بو دونيانی قبول ائتميرم ... يوكسک موازينه، هارمونييا {= هم‌آهنگ‌ليك} طرفداری دا دئييلم… من ايسته‌ميرم كی، آنا، اوغلونو ايت‌لره پارچالاتديران جلادلا قوجاقلاشسين! من بشريته محبت خاطيرينه هارمونييايا ضيدّم».
ايوان كارامازوفون يازديغی «بؤيوک مستنطق» {= بازپرس بزرگ} افسانه‌سينده خيريستانليغی تنقيد ائدن داستايوفسكی روماندا جاری سياسته، محكمه ايجلاسلارينا، اجتماعی عيدالت‌سيزليیه عاييد گتيرديیی بير چوخ اؤرنک‌لرله چاغداش روسيادا سوچسوز آداملارين، اؤزللیک‌له اوشاقلارين باشينا گتيريلن مصيبت‌لر دقّتی جلب ائدير.
كارامازوفون كيچيک قارداشی آليوشانين طالعی ده غريبه‌دير؛ موناستيرده تربيه آلان بو ديندار گنج ده حقيقت و عدالت آختارماق يولونا دوشور. موناستيردن چيخديقدان سونرا باشينا گلن ماجرالار اونو انقلابچی‌لارا ياخينلاشديرير، ظولمون كؤكونو كسمک اوچون او حتّی چاری {= تزار} اؤلدورمک ايسته‌يير، سوء قصدده اشتراک ائدير. آليوشانين سيماسيندا يازيچی گنج نسلين قارانليق چار روسياسيندا ايشيق آختارماق تشبّث‌لرينی، ايشيقلی دونيا اوغروندا ثمره‌سيز فداكارليغين فاجيعه‌سينی عكس ائتديرميش‌دير.
رومانين باش قهرمانی كئفجيل، چيلغين ضابيط ديميتری اصلينده استعدادلی، باجاريقلی، جسور، حتّی رومانتيک، شاعیرانه بير طبيعته مالک آدام‌دير. لاكين بو گؤزل كيفيّت‌لره مالک آدام دا حياتدا خوشبخت اولا بيلمير. آتا قاتلی كيمی تقصيرلنديريلن ديميتری كاتورقا [؟] جزاسينا محكوم اولونور. بوتون چيلغين محبّت ماجرالارينا باخماياراق ديميترينی يوخسول، تحكيم‌لی كندلی‌لرين دردی ترک ائتميردی. يوخودا گؤردويو كند يانغينی قلبينده يوخسول كندلی‌لره، اوتسوز چؤل‌لره، آغلايان اوشاقلارا قارشی دَرين بير كدر دوغورودو، كندلی‌لرين نه اوچون قوجاقلاشيب اؤپوشمه‌مه‌سينه، نه اوچون شن ماهنی‌لار اوخوماماسينا آجيييردی، يئر اؤزونده بوندان سونرا گؤز ياشی اولماسی اوچون مبارزه‌يه گيريشمه‌يه جان آتيردی...
داستايوفسكی‌نين دئمک اولاركی، بير چوخ اثرلری، اؤزللیک‌له اونلارين سونو فاجعه كيمی سسله‌نير. گوجلو، عاغيللی، تميز، خيرخواه آداملارين قيزغين آختاريشی، فداكارليغی اوغورسیزلیق‌لا قورتارير، قهرمان‌لار یئنیلیرلر. بو قهرمان‌لارين بعضيی‌لری شردن خلاص يولونو خيريستانليقدا {= مسيحی‌ليک} اطاعتده، بعضی‌لری عمومی، صينفی صولح‌ده، بعضی‌لری ايسه سوسياليزم‌ده گؤرورلر. اونلارين هئچ بيری اؤز آختاريشيندا آرديجيل و محكم اولماسا دا، بير مسئله ده بيرلَشيرلر. اونلاری بير گوجلو احتراس، بير مقصد بيرلشديرير. اونلاری هومانيزم {= اينسان پرورليک} قیجیقلاندیریر. موجود دوروملا، استبدادلا، ظولمله راضيلاشماماق، بدبخت انسانين حالينا آجيماق، دردينه شريک اولماق، اونون يولوندا قوربان گئتمك بو آداملارين معنوی گؤزل‌ليیينی تشكيل ائدير.

•  مقاله نین باشلیغی «کؤچورن» طرفیندندیر.
•  قایناق : «صنعتکار قوجالمیر» محمد عاریف، باکی، یازیچی نشریاتی 1980

یازیچی: #محمد_عاریف 
اختصارلا کؤچورن: #همت_شهبازی‌

#ادبیات_ائوی

@AdabiyatEvi

ادبیات ائوی

28 December 2024 16:12

#فولکلور

آران دئیر:
یایلاق، چوخ دا ساخلاما،
گؤندر گلسین، آغیر ائل­‌لر منیم‌دی
یئرین گؤبه‌یی‌یم، دیزین دیره‌یی
مالی-مُلکِ سلیمان‌لار منیم‌دی...

یایلاق دئیر:
چیخما دیندن-ایماندان
سوسن‌دن، سونبول‌دن، هم ده گولشن‌دن
حکیم‌لیک، لُقمان‌لیق قالیبدی مندن
مین-مین دردلره درمان منیم‌دی...

داغ دئیر:
یازین اوّلیندن سولارین قیزار
قیزدیرما اوشاغین اوره‌یین اوزَر
گؤزل­‌لر، محبوب‌لار سینه‌مده گزر
خیردا-خیردا آشان یول­‌لار منده‌دی...

آران دئیر:
سوسن‌لی، سونبول‌لو، گول‌لو داغلاریم
شان ایچینده شعله چکیر یاغلاریم
بوستانداکی آلا-بزک تاغلاریم
قارپیز، خیار، دورلو نوبار منده‌دی...

داغ دئیر:
صفالی یایلاغام باشدان-بینادان
سینه‌مده بیتیبدی چوخ گول‌ِ خندان
مندن درس آلیبدی نئچه مین لُقمان
دورلو-دورلو گؤزل حال‌لار منده‌دی...

آران دئیر:
منه حسرت چکر بوزلو قایالار
سندن داد ائله‌ین مندن های آلار
باش-باشا چاتیلی ساری قایالار
خیرمان‌دا چئوریلن وَل‌لر¹ منده‌دی...

داغ دئیر:
ایسترم کی قیسا ائدیم بحثیمی
سنه باخیب اؤتورمرم کؤکسومو
دوستوم، همدمیم‌دی یازین مؤسومو
شوخ صنم‌لر، اینجه بئل‌لر منده‌دی...

1- وَل: خیرمان دؤیمک اوچون آلت.

قایناق: آذربایجان شفاهی خالق ادبیاتی کلیاتی
یازیچی: #جلیل_عبدالله
کؤچورن: #نرگس_ابراهیمی

#ادبیات_ائوى

@AdabiyatEvi

ادبیات ائوی

26 December 2024 10:47

وطن، باشا چوخ ایش گلر
باش اَیمه، باشین ساغ اولسون
بیز اؤلمه‌یه دوغولوروق
تورپاغین-داشین ساغ اولسون

#ممد_ایلقار

Vətən, Başa Çox İş Gələr
Baş Əymə, Başın Sağ Olsun
Biz Ölməyə Doğuluruq Biz
Torpağın-Daşın Sağ Olsun.

#Məmməd_İlqar

باشیمیز ساغ اولسون آذربایجانیم

#Başımız_Sağ_Olsun_Azərbaycanım

#ادبیات_ائوى

@AdabiyatEvi