ادبیات ائوی

19 Jan 2025 17:14

بیز، #ادبیات_ائوی اولاراق، هر مدیا کیمی دویغولاری پایلاشیب به‌به-چه‌چه دئمک اوچون بیر آرایا گلمه‌میشیک.
8 ایلدن چوخدور ادبیات ساحه‌سینده چالیشیریق و چالیشماغا دا داوام ائده‌جه‌ییک...
بیز بیر آرایا گلدیک، چونکی، بیزدن سونرا ادبیات دونیاسینا گلن‌لر، ادبیات دونیاسی‌نین ساده‌جه بند-بند شئعیرلر اولمادیغینی بیلسین.
بیزی بو ایل‌لرده دستک‌له‌ین و دستکله‌مه‌ین هرکسین الینی محبت‌له سیخیب، چوخ ساغ اولون دئییریک.

#ادبیات_ائوی

@AdabiyatEvi

ادبیات ائوی

18 Jan 2025 16:25

صراف دئدیم حکمت ایلن یوخ، وار اولماز،
گولدو، دئدی باخ، گور یوخو، وار ائیله دیم اولدو

#صراف

برگزاری اولین جلسه از سلسله جلسات کارگاهی _ آموزشی و نقد وبررسی؛ شعر خوانی انجمن فرهنگی؛ ادبی «صراف سخن» با محوریت شرح غزل و صنایع ادبی بکار رفته در اشعار غزلسرای نامی ایران و آذربایجان، بویژه شاعر پر آوازه آذربایجان حاج رضا صراف تبریزی.
شعر خوانی؛ نقد و بررسی ادبیات؛ س..

زمان: روز دوشنبه 1403/11/01
ساعت: 18:30 - 16

شرکت برای عموم آزاد و رایگان است.


مکان : تبریز؛  پارک مقبره الشعرا؛
مرکز فرهنگی و گردشگری شهرداری منطقه۱۰.


توجه: مهمانان محترمی که با اتومبیل شخصی تشریف می آورند؛ می توانند روبروی درب مرکز گردشگری پارک نمایند.

#ادبیات_ائوی

@AdabiyatEvi

ادبیات ائوی

18 Jan 2025 12:26

#فولکلور

کؤهنه ناخچیوان
یازیچی: #جلیل_عبدالله
کؤچورن: #نرگس_ابراهیمی
قایناق: آذربایجان شفاهی خالق ادبیاتی کلیاتی

#ادبیات_ائوی

@AdabiyatEvi

ادبیات ائوی

15 Jan 2025 14:42

#دوغوم_گونو #ناظیم_حیکمت

مَحمَت حیکمت ران (ناظیم حیکمت) یا دا تورکیه‌دن آیریلدیقدان سونراکی سوی آدی ایله «ناظیم حیکمت بورزِجکی».
دوغوم تاریخی: 15 یانوار 1905 سئلانیک، عثمانلی امپراطورلوغو
اؤلوم تاریخی: 3 اییون 1963 مسکووا.
ناظیم حیکمت تورک ادبیات دونیاسی‌نین اونودولماز دئولریندن بیری‌دیر. شئعیرلری آزی 50 دیله چئویریلمیش و بیر چوخ اؤدول قازانمیش‌دیر.
ناظیم حیکمت تورک چاغداش ادبیاتی‌نین ان اؤنملی و دونیا ادبیاتیندا یئر آلمیش گؤزده یازیچی‌لاردان بیری‌دیر.

بو گون تورک ادبیاتی‌نین ماوی گؤزلو دئوی #ناظیم_حیکمت ین دوغوم گونودور.
سایغی و سئوگی ایله آنیریق 💙🖤

#ادبیات_ائوی

‌@AdabiyatEvi

ادبیات ائوی

13 Jan 2025 14:45

#دوغوم_گونو #غلامحسین_ساعدی

چیلله (دی) آیی‌نین 24-جو گونو 1314-جو ایل تبریز شهرینده، کارمند بیر عائیله‌ده دونیایا گؤز آچدی.
غلامحسین ساعدی، عؤمرونو وطن حسرتی ایله باشا یئتیردی.


حیاتیندان آرتیق بیلگی‌ آلماق اوچون اینستاگرام پایلاشیمینا باخا بیلرسینیز:

➡️ https://www.instagram.com/p/DExIxFjMeWS/?igsh=ZzJiYW85Nno1bWNo


#ادبیات_ائوی

‌@AdabiyatEvi

ادبیات ائوی

06 Jan 2025 12:32

#گونلریمیز #باش_ساغلیغی

دوشون کائناتین مین سرّینی سن
بیر بایقوش اوچ‌یوز ایل قالیر دونیادا
اؤلمه‌لی اولانین یئرینه بعضاً
اؤلمه‌لی اولمایان اؤلور دونیادا

#ممد_آراز

آلدیغیمیز آجی خبره گؤره آذربایجانین دَیَرلی شاعیری، «بهمن زمانی» جناب‌لاری‌ بو گون تبریز شهرین‌ده وفات ائدیب.
ادبیات ائوی طرفیندن اونون محترم عائله‌سینه تسلیت دئییریک.
یئری اوچماق، یولو داواملی اولسون.

#ادبیات_ائوى

@AdabiyatEvi

ادبیات ائوی

31 Dec 2024 20:35

#شئعیرلی_گونلر

ایتیرمک قورخوسو وار بو شَهَرده
پاییزی؛ حسرته یئر بوشالدیرمیش
یئددی اویان یادلار قاپیمدان گیرَر
اؤلوم؛ آدام‌لاری یوموشالدیرمیش!

#سجاد_گل_نژاد

#ادبیات_ائوی

@AdabiyatEvi

ادبیات ائوی

29 Dec 2024 15:48

#دوغوم_گونو #نصرت_کسمنلی

نصرت ایّوب‌اوف (کسمنلی) ۲۹ دکابر ۱۹۴۵-جی ایلده آغ‌استافا رایونوندا آنادان اولموشدور. یازدیغی سئوگی شئعیرلرله آرامیزدا هله ده یاشایان نصرت کسمنلی، بوتون عؤمرو بویو سئوگی آختارمیش و سئوگی ایله قول-قاناد آچمیش شاعیر اولاراق تانینیر...

نصرت کسمنلی‌ شئعیرلری‌نین ان ماراقلی و اؤزونه‌مخصوص جهتی بوندادیر کی، بو شئعیرلرده گئری‌یه- «اوشاق یادداشینی قانادان»، اوشاقلیقدا چکدییی بوتون آجی‌لاری، ناغیلا قاییتماق، ناغیلی یئنی‌دن یاشاماق آرزوسو یوخدور. نصرت داها چوخ ایچینده اولدوغو زامانین، دایانمادان آخیب کئچن عؤمرون ناغیلینی یاراتماغا و جانلی ناغیلدا یاشاماغا اوستونلوک وئریردی.
حیاتیندان آرتیق بیلگی‌ آلماق اوچون اینستاگرام پایلاشیمینا باخا بیلرسینیز:

➡️ https://www.instagram.com/p/DEKoT3islyk/?igsh=MXd3bXlqOGpyYjlhcQ==


#ادبیات_ائوی

@AdabiyatEvi

ادبیات ائوی

29 Dec 2024 11:48

#مقاله

«کارامازوف‌ قارداشلاری» رومانی و «داستایوفسکی» دونیاسی

یازیچی: #محمد_عاریف 
اختصارلا کؤچورن: #همت_شهبازی‌

#ادبیات_ائوی

@AdabiyatEvi

ادبیات ائوی

28 Dec 2024 16:12

#فولکلور

قایناق: آذربایجان شفاهی خالق ادبیاتی کلیاتی
یازیچی: #جلیل_عبدالله
کؤچورن: #نرگس_ابراهیمی

#ادبیات_ائوى

@AdabiyatEvi

ادبیات ائوی

20 Dec 2024 15:09

#شئعیر #چیلله

گئیینیب‌دیر آغ آپ آغ
گزیر حَیَط باجانی
خبر وئریر بولودلار
گلیر قار-قیش دؤورانی

قارغالار دا دانیشیر
قار، قار، قار، قار، قار گلیر
بو یام-یاشیل یئر اوزو
قار آلتیندا دینجه‌لیر

اؤزوم کیمی کؤرپه‌دیر
دوزلتدیییم قار آدام
من قار کیمی یونگولم
یئر-گؤی کیمی آزادام

هر گئجه‌نین آخیری
سحر اولار، گون اولار
بو قارلارین آلتیندان
گله‌جک‌دیر خوش باهار

یئر بورونور قار ایله
کامانچایلا، تار ایله
چیلله گلیر یوردوما
قارپیز ایله، نار ایله

چیلله بایرامینیز قوتلو اولسون

شئعیر: #آردا_خانی
سس: #ائلیسا_غیاثی

#ادبیات_ائوى

@AdabiyatEvi

ادبیات ائوی

19 Dec 2024 11:34

#فولکلور #چیلله

فولکلوروموزدا چیلله

یازیچی: #حسن_اوموداوغلو

#ادبیات_ائوى

@AdabiyatEvi

ادبیات ائوی

09 Dec 2022 12:38

كيرپیگیمدن یئره داملا دوشنده
دیوارا سؤيكنميش قاشيم داريخير
يئددى جيزگی اوسته بیر خط چکنده
الیمده گؤينه‌ین داشیم داریخیر

یئمک اعتصابیم بیتمه‌ییب اینان
دئسه‌لر یئییرم، یالان‌دیر یالان
هؤرومجك پاییما تور آتان زامان
پاسلی یال‌قابیمدا آشیم داریخیر

تلفن‌چو داریخیر، اؤزوندن گؤز اول
كول‌لرین آلتیندا گیزلی بیر کؤز اول
حاكيمه ده دئنن: حكمو وئر تئز اول
هر بير شئی‌دن بتر باشیم داریخیر

#سئور_شهابى
#ادبیات_ائوی

@AdabiyatEvi

ادبیات ائوی

09 Dec 2022 12:07

ایسته‌مم ساده‌جه باش یاستیغا قویموش و اؤلوم.
سئویرم دوغرانام آنجاق دئییرم دار آغاجی...


#کامیل_قهرمان‌اوغلو
#ادبیات_ائوی
#محسن_شکاری
@AdabiyatEvi

ادبیات ائوی

07 Dec 2022 11:55

#علسگرین بو قوشماسینی بیر چوخوموز ایلک دؤنه #ابراهيم_تاتليسس دن ائشيتميشيك. آنجاق توركيه‌ده بو قوشمانى موسیقی‌یه گؤره اويغونلاتميشلار هابئله بير سيرا سؤزلرى ده‌ییشیب یا دا سیلمیشلر. شعرین اؤزو بئله‌دیر:

چرشنبه گونونده، چشمه باشیندا
گؤزوم بير آلا گؤز خانيما دوشدو
آتدى مژگان اوخون، کئچدی سینمدن
جادو غمزه‌لری قانیما دوشدو

اشارت ائیله‌دیم دردیمی بیلدی
گؤردوم هم گؤزلدى، هم اهل-ديلدى
باشينى بولادى، گؤزوندن گولدو
گولنده قاداسی جانیما دوشدو

#علسگرم هر علمیدن حالی‌یام
گؤزل سن طبيبسن، من یارالییام
دئدی نشانلی‌یام، اؤزگه مالی‌یام
سیندی قول-قانادیم، یانیما دوشدو

#علسگر_گؤيچه‌لی
#آشیق_ادبیاتی
#سئور_شهابى
#ادبیات_ائوی

@AdabiyatEvi

ادبیات ائوی

19 Jan 2025 16:29

#مقاله (کپشن)

#جلیل_ممدقولوزاده‌ -نین یارادیجیلیغینا اؤتری باخیش

یازیچی: #ادبیات_ائوی

@AdabiyatEvi

ادبیات ائوی

18 Jan 2025 12:27

آشیق علسگر ناخچیوان شرورونا قوناق گلیر. ائل آغ‌ساققال‌لاری اؤز آرالاریندا سؤزلشیرلر کی، بو ماحالدا بیر مشهور ائل هاواسی وار، اگر آشیق علسگر او هاوانی چالا بیلدی، اونا بؤیوک دؤران ییغاجاغیق، یوخ، چالا بیلمه‌دی، آنجاق آتینا آرپا-سامان وئره‌جه‌ییک.
مجلیس باشلانیر. ائل آغ‌ساققال‌لاری ناخچیواندا مشهور اولان ائل هاواسیندان سؤز سالیرلار. علسگر مجلیس‌دن اجازه آلیب باییرا چیخیر. گؤرور کی، بیر چوبان هوشکوره‌یینده بیر هاوا چالیر، یقین ائدیر کی، بو همین هاوا اولاجاق.
مجلیسه قاییدیر. سازینی کؤینه‌ییندن چیخاریر و آغ‌ساققال‌لارا اوزونو توتوب دئییر:
- قدیم عادته گؤره آشیق اوّل بیر «دیوانی»، بیر «تجنیس» و بیر ده بیر «ائل هاواسی» اوسته چالیب- اوخویاندان سونرا صحبته باشلار. امّا گؤرورم کی، سیزین آرزونوز اوّل-اوّل ناخچیواندا مشهور اولان ائل هاوانیزی ائشیتمک‌دیر. ائله ایسه قویون سازیمی سیزین هاوانیز اوسته کؤکله‌ییم.
علسگر سازی کؤکله‌ییر. ناخچیوان هاواسینی ائله بَزه‌یه-بَزه‌یه چالیر کی، آغ‌ساققال‌لار بیر آغیزدان «آفرین، آشیق علسگر» دئییرلر.
علسگر دئییر:
- بو سیزین «کؤهنه ناخچیوانی» هاوانیز. امّا بو هاوانین بیر بالاسی، بیر گولو ده وار. سازین کؤک و پرده‌لرینه بلد صنعت‌کار عینی سس قاطاریندا بو هاوادان بیر قول آییریر، بیر گول وورور. «ناخچیوان گولو» هاواسینی یارادیر.

یازیچی: #جلیل_عبدالله
کؤچورن: #نرگس_ابراهیمی
قایناق: آذربایجان شفاهی خالق ادبیاتی کلیاتی

#ادبیات_ائوی

@AdabiyatEvi

ادبیات ائوی

15 Jan 2025 20:16

#شئعیرلی_گونلر

سنی دوشونمک گؤزل بیر شئی،
اومید وئریجی بیر شئی...
دونیانین اَن گؤزل سسیندن،
ان گؤزل ماهنی‌نی دینله‌مک کیمی بیر شئی؛
آنجاق آرتیق اومید یئتمیر منه
من داها ماهنی دینله‌مک دئییل،
ماهنی سئویله‌مک ایسته‌ییرم...

#ناظیم_حیکمت

#ادبیات_ائوی

@AdabiyatEvi

ادبیات ائوی

14 Jan 2025 11:22

#شئعیر #آتا

وارلیغیم، یوخلوغوم، سن هر شئییم‌سن
توکنمز اومیدسن، آرزوسان آتا
حیات باشقا دونیا، سن باشقا دونیا
دونیامین ایچینده دونیاسان آتا

سنین اوزه‌رینده قورولوب جاهان
وارلیغین-روحوندور منی یاشادان
دئسه‌لر: سنین‌چون نه دئمک آتان؟
ان چتین سوال‌سان، جاوابسان آتا

اولاندا اوزاقدا، دونیا گلیر دار
چیلپاق بدنیمه سانکی یاغیر قار
ستایش ائتدیییم ایکی وارلیق وار
منیم‌چون ایکینجی آللاه‌سان آتا

شئعیر: #نصرت_کسمنلی
سس: #شیوا_جعفریان

#ادبیات_ائوی

@MaviDuygular
@AdabiyatEvi

ادبیات ائوی

06 Jan 2025 15:32

#آنیم_گونو #میکاییل_مشفق

میکاییل اسماعیل‌زاده (مشفق) ۱۹۰۸-جی ایل باکی شهرین‌ده دوغولموشدور. آذربایجان شئعیر گؤیونون پارلاق اولدوزو مشفق، سئوگی، اجتماعی و میللی ایرق شئعیرلری ایله آدینی ادبیاتیمیزا مؤهورلَمیش و میللتین اوره‌یینده باشقا بیر یئری وار.

بو گون استالین و ساوئت حاکمیتی‌نین چیرکین سیاست‌لرینه «ملیّتچی» دامغاسی ایله قوربان گئدن، دَیَرلی شاعیر «میکاییل مشفق»ین آنیم گونودور. سایغی و سئوگی ایله آنیریق...

حیاتیندان آرتیق بیلگی‌ آلماق اوچون اینستاگرام پایلاشیمینا باخا بیلرسینیز:

➡️ https://www.instagram.com/p/DEfM7ITstyJ/?igsh=MWlsbmd2dTl1eG9lMA==


#ادبیات_ائوی

@AdabiyatEvi

ادبیات ائوی

31 Dec 2024 21:01

#شئعیرلی_گونلر

اینسانلار دنیزدیر، اینسانلار بولود
یاغان یاغیش دئییل، تؤکولن قان‌دیر
اؤلن‌لر بیر اوووج تورپاغا دؤنور
بو تورپاغین آدی «آذربایجان‌»دیر 🇦🇿

#آردا_خانی

#ادبیات_ائوی

@AdabiyatEvi

ادبیات ائوی

31 Dec 2024 18:16

#گونلریمیز #هم‌رأی‌لیک_گونو

دونیا آذربایجانلی‌لارین هم‌رأی‌لیک گونونون اساسی ۱۹۸۹-جو ایل دکابرین سون گونونده ناخجیواندا SSRİ-İRAN سرحدلری‌نین داغیلماسی زامانی قویولموشدور. قوزئی و گونئی آذربایجان آراسیندا هومانیتار، مدنی، اقتصادی و قوهوملوق علاقه‌لرینی گوج‌لندیرمک اوچون سرحد چپرلری‌نین گؤتورولمه‌سی قبول ائدیلمیشدیر. بو عنوان، ابوالفضل ائلچی‌بَی طرفیندن وئریلمیشدیر.

داغلارینین باشی قارلی
سینه‌سی یاشیل اورمانلی
دره‌لرین شیرین بارلی
آذربایجان! آذربایجان!

صحرالارین سونبوللودور
ایل مدام اوستو گوللودور
باغچالارین بولبوللودور
آذربایجان! آذربایجان!

#احمد_جواد

#ادبیات_ائوی

@AdabiyatEvi

ادبیات ائوی

29 Dec 2024 11:49

داستايوفسكی‌نين سونونجو بؤيوک و اؤنملی اثری «كارامازوف قارداشلاری» (80-1879) رومانی‌دير.  كؤهنه‌ روسيه حاققيندا ماراقلی بير ائپوس (حماسه) اولان بو اثر یازارین ايللر بويو داوام ائدن آختاريش‌لارينا، سياسی، اجتماعی، فلسفی و اخلاقی گؤروش‌لرينه سانكی يئكون ووروردو. كارامازوف‌لار عايله‌سی‌‌نين تاريخچه‌سينده مؤلف بير داها اؤز دؤرونون اَن مركب و قارانليق گوشه‌لرينی، آداملارين اورک‌لرينی و بئيين‌لرينی گمير‌ن ضدیّتلی فيكير و احتراس‌لاری، روس خالقی‌نين مصيبت‌لرينی، دوشکون طالعينب عكس ائتدير‌مه‌يه چاليشميشدی.
فئودور كارامازوف و اونون اوغلانلاری ديميتری، ايوان و آليوشا بيرـ‌بيرينه اوخشامايان، کاراكترجه و مفكوره‌جه تاماميله مختلف آداملارديلار. ايوان كارامازوف عاغيللی بير گنج‌ و استعدادلی يازيچی و فيلوسوفدور. داستايوفسكی‌نی دوشوندورن و اثرلرينده تئز‌-تئز توخونولان مسئله‌لری ايوان داها كسكين و قطعی بير شكيلده ايره‌لی سورور. ايوان اينسان‌پروردير، آمما اونون اينسان‌پرورلييی اينسانلاری باريشديرماق، حياتدا اجتماعي بير آربالیق (=موازينه) عمله گتيرمک ايسته‌ين‌لرين معیارلاریندان اوزاق‌دير. او دينداردير، آمما چوخ گوجلو تنقيدی محاكمه‌يه ماليک‌دير. او دئيير: « من آللاهين ياراتديغی بو دونيانی قبول ائتميرم ... يوكسک موازينه، هارمونييا {= هم‌آهنگ‌ليك} طرفداری دا دئييلم… من ايسته‌ميرم كی، آنا، اوغلونو ايت‌لره پارچالاتديران جلادلا قوجاقلاشسين! من بشريته محبت خاطيرينه هارمونييايا ضيدّم».
ايوان كارامازوفون يازديغی «بؤيوک مستنطق» {= بازپرس بزرگ} افسانه‌سينده خيريستانليغی تنقيد ائدن داستايوفسكی روماندا جاری سياسته، محكمه ايجلاسلارينا، اجتماعی عيدالت‌سيزليیه عاييد گتيرديیی بير چوخ اؤرنک‌لرله چاغداش روسيادا سوچسوز آداملارين، اؤزللیک‌له اوشاقلارين باشينا گتيريلن مصيبت‌لر دقّتی جلب ائدير.
كارامازوفون كيچيک قارداشی آليوشانين طالعی ده غريبه‌دير؛ موناستيرده تربيه آلان بو ديندار گنج ده حقيقت و عدالت آختارماق يولونا دوشور. موناستيردن چيخديقدان سونرا باشينا گلن ماجرالار اونو انقلابچی‌لارا ياخينلاشديرير، ظولمون كؤكونو كسمک اوچون او حتّی چاری {= تزار} اؤلدورمک ايسته‌يير، سوء قصدده اشتراک ائدير. آليوشانين سيماسيندا يازيچی گنج نسلين قارانليق چار روسياسيندا ايشيق آختارماق تشبّث‌لرينی، ايشيقلی دونيا اوغروندا ثمره‌سيز فداكارليغين فاجيعه‌سينی عكس ائتديرميش‌دير.
رومانين باش قهرمانی كئفجيل، چيلغين ضابيط ديميتری اصلينده استعدادلی، باجاريقلی، جسور، حتّی رومانتيک، شاعیرانه بير طبيعته مالک آدام‌دير. لاكين بو گؤزل كيفيّت‌لره مالک آدام دا حياتدا خوشبخت اولا بيلمير. آتا قاتلی كيمی تقصيرلنديريلن ديميتری كاتورقا [؟] جزاسينا محكوم اولونور. بوتون چيلغين محبّت ماجرالارينا باخماياراق ديميترينی يوخسول، تحكيم‌لی كندلی‌لرين دردی ترک ائتميردی. يوخودا گؤردويو كند يانغينی قلبينده يوخسول كندلی‌لره، اوتسوز چؤل‌لره، آغلايان اوشاقلارا قارشی دَرين بير كدر دوغورودو، كندلی‌لرين نه اوچون قوجاقلاشيب اؤپوشمه‌مه‌سينه، نه اوچون شن ماهنی‌لار اوخوماماسينا آجيييردی، يئر اؤزونده بوندان سونرا گؤز ياشی اولماسی اوچون مبارزه‌يه گيريشمه‌يه جان آتيردی...
داستايوفسكی‌نين دئمک اولاركی، بير چوخ اثرلری، اؤزللیک‌له اونلارين سونو فاجعه كيمی سسله‌نير. گوجلو، عاغيللی، تميز، خيرخواه آداملارين قيزغين آختاريشی، فداكارليغی اوغورسیزلیق‌لا قورتارير، قهرمان‌لار یئنیلیرلر. بو قهرمان‌لارين بعضيی‌لری شردن خلاص يولونو خيريستانليقدا {= مسيحی‌ليک} اطاعتده، بعضی‌لری عمومی، صينفی صولح‌ده، بعضی‌لری ايسه سوسياليزم‌ده گؤرورلر. اونلارين هئچ بيری اؤز آختاريشيندا آرديجيل و محكم اولماسا دا، بير مسئله ده بيرلَشيرلر. اونلاری بير گوجلو احتراس، بير مقصد بيرلشديرير. اونلاری هومانيزم {= اينسان پرورليک} قیجیقلاندیریر. موجود دوروملا، استبدادلا، ظولمله راضيلاشماماق، بدبخت انسانين حالينا آجيماق، دردينه شريک اولماق، اونون يولوندا قوربان گئتمك بو آداملارين معنوی گؤزل‌ليیينی تشكيل ائدير.

•  مقاله نین باشلیغی «کؤچورن» طرفیندندیر.
•  قایناق : «صنعتکار قوجالمیر» محمد عاریف، باکی، یازیچی نشریاتی 1980

یازیچی: #محمد_عاریف 
اختصارلا کؤچورن: #همت_شهبازی‌

#ادبیات_ائوی

@AdabiyatEvi

ادبیات ائوی

28 Dec 2024 16:12

#فولکلور

آران دئیر:
یایلاق، چوخ دا ساخلاما،
گؤندر گلسین، آغیر ائل­‌لر منیم‌دی
یئرین گؤبه‌یی‌یم، دیزین دیره‌یی
مالی-مُلکِ سلیمان‌لار منیم‌دی...

یایلاق دئیر:
چیخما دیندن-ایماندان
سوسن‌دن، سونبول‌دن، هم ده گولشن‌دن
حکیم‌لیک، لُقمان‌لیق قالیبدی مندن
مین-مین دردلره درمان منیم‌دی...

داغ دئیر:
یازین اوّلیندن سولارین قیزار
قیزدیرما اوشاغین اوره‌یین اوزَر
گؤزل­‌لر، محبوب‌لار سینه‌مده گزر
خیردا-خیردا آشان یول­‌لار منده‌دی...

آران دئیر:
سوسن‌لی، سونبول‌لو، گول‌لو داغلاریم
شان ایچینده شعله چکیر یاغلاریم
بوستانداکی آلا-بزک تاغلاریم
قارپیز، خیار، دورلو نوبار منده‌دی...

داغ دئیر:
صفالی یایلاغام باشدان-بینادان
سینه‌مده بیتیبدی چوخ گول‌ِ خندان
مندن درس آلیبدی نئچه مین لُقمان
دورلو-دورلو گؤزل حال‌لار منده‌دی...

آران دئیر:
منه حسرت چکر بوزلو قایالار
سندن داد ائله‌ین مندن های آلار
باش-باشا چاتیلی ساری قایالار
خیرمان‌دا چئوریلن وَل‌لر¹ منده‌دی...

داغ دئیر:
ایسترم کی قیسا ائدیم بحثیمی
سنه باخیب اؤتورمرم کؤکسومو
دوستوم، همدمیم‌دی یازین مؤسومو
شوخ صنم‌لر، اینجه بئل‌لر منده‌دی...

1- وَل: خیرمان دؤیمک اوچون آلت.

قایناق: آذربایجان شفاهی خالق ادبیاتی کلیاتی
یازیچی: #جلیل_عبدالله
کؤچورن: #نرگس_ابراهیمی

#ادبیات_ائوى

@AdabiyatEvi

ادبیات ائوی

26 Dec 2024 10:47

وطن، باشا چوخ ایش گلر
باش اَیمه، باشین ساغ اولسون
بیز اؤلمه‌یه دوغولوروق
تورپاغین-داشین ساغ اولسون

#ممد_ایلقار

Vətən, Başa Çox İş Gələr
Baş Əymə, Başın Sağ Olsun
Biz Ölməyə Doğuluruq Biz
Torpağın-Daşın Sağ Olsun.

#Məmməd_İlqar

باشیمیز ساغ اولسون آذربایجانیم

#Başımız_Sağ_Olsun_Azərbaycanım

#ادبیات_ائوى

@AdabiyatEvi

ادبیات ائوی

19 Dec 2024 11:36

بؤیوک چیلله ایله کیچیک چیلله‌نین آدینا باغلی خالق آراسیندا گزن نئچه پارا سؤیلمه وار. بیری بئله‌دی کی، بؤیوک چیلله دؤورانین سوروب گئدیرمیش، یولدا کیچیک چیلله‌یه توش گلیر. کیچیک چیلله بؤیوک‌دن سوروشور:
- قیرخ گوندو یاراقلی- یاساقلی حکمران‌لیق ائله‌ییرسن، نئیله‌دین، نئیلمه‌دین؟
بؤیوک چیلله دئییر:
- اون چوُوال‌لارینی¹ یاری‌یا ائندیردیم، اوْت تایالارینی اورتادان کئچیردیم، اوشاقدان- بؤیویه هامینی اوجاغین باشینا ییغدیم.
بئله‌ده کیچیک چیلله آغیز بوزور:
- آی های، گؤر ایندی خیردا لـله‌شین نئیلییه‌جک. اوُنلوغو² اوندان کسه‌جه‌یم آخورو دا سامان‌دان. جاهیل (گنج، جوان) سومویو، آهیل (یاشلی، قوجا) ایلیگی گؤینه‌ده‌جه‌یم. بیر بوْران قالخیزیم، بیر چوْوغون³ قوپاریم کی، گل گؤره‌سن.
بؤیوک چیلله‌ دونیانین کؤر- کؤتویوندن حالی‌ایدی. بیلیردی کی، کیچیک چیلله‌نین عؤمرو آزدی، جمعی- جوملَتانی اییرمی گونلوک های- کویو وار. اودور کی، اوزون کیچیک قارداشینا توتوب دئییر:
- گئدیب اؤزونو ناحاق یئره اوجوز ائله‌مه، قاباغین بوْزآی‌دی⁴. ائله اوتور- دور کی، بوْزآی‌دا هاوالار قاریشاندا دئسین‌لر: «کیچیک چیلله‌نین گونلری ماغیل گونلر ا‌یدی، عیناً یازین اورتا آیی کیمی‌ایدی».
بو کیچیک چیلله ده هئچ اؤزونه گؤره دئییل. بؤيوک چیلله‌نین سؤزونو بیر ایل ائشیدر. بیر ایل ائشیتمز و ائشیدن ایل اؤزونو اوُرواتلی آپارار. ائله کی، قولاق‌آردینا وورور، باخ اوندا اوزونو گؤرمه. تا بوْزآیاجان گؤیون اوزونو بوروم- بوروم بوراسیدی.
کیچیک چیلله‌نین قورتارماغینا بیر- ایکی گون قالمیشدان هر آخشام دوققازلاردا⁵ تونقال قالایاردیلار. واخت- وعده گلیب همین مقاما یئتن‌ده آغ‌ساققال‌لار جاوان- جومورلارا ائشیتدیرردیلر:
- چیلله‌قوْوانین واختیدی ها! تونقال چاتیب اوجاق‌لاری گورلاندیرین کی، بوْز‌آی دامارلانیب چیلله‌یه دوْی گلسین⁶
هه، ایندی کی، بوْزآیین آدینی توتدوق، قوی اوندا اونون خاصیّتین قانادینا دوزموش بیر ائل سؤیلمه‌سیندن ده سوراق وئرک. هه، سؤز او یئردن، او چاغدان تکان آلیب گلیر کی، ایل آیا گونه بؤلونوردو. بوتون آیلار گلیب اؤز گون‌لرینی گؤتورموشدو، تکجه آیین بیرینه هئچ بیر گون دوشمه‌میشدی. ییغیشیب گئنگش ائله‌یندن سونرا بو قرارا گلدیلر کی، آیلارین هره‌سی اؤزونون بیر- ایکی گونون، بو گون‌سوز قالمیش آیا وئرسین. اونون دا گون‌لری دوزلسین. بلی، اون‌بیر آیین کیمیسی بیر گون، کیمیسی ایکی گون کیمیسی ده اوچ گون وئردی. بئله‌لیکله آیلارین سایی دؤنوب اولدو اون‌ایکی. تزه دوزه‌لَن آیین گون‌لری فصیل‌لرده‌کی آیلاردان ییغیلدیغینا گؤره اونون هاواسی‌نین احوالیندان باش آچماق موشگوله دؤندو. بیر ده گؤردون ایستی‌دی؛ اوستوندن بیر آز کئچمیش باخیرسان کی، بولود گلدی، سویوق دوشدو. او بیری گون یئنه آچیلدی. غرض،‌ بئله‌جه قات- قاریشیق، بوْز بیر آی عرصه‌یه گلدی. او سبب‌دن ائل- جماعات اونو «بوزآی» دئییب نشان‌لادی.

۱-تول/توال/ حئیوان دَری‌سیندن سو قابی. چوال/جوال: قاب چرمی برای کشیدن آب از چاه. دول/دولچا.
۲-اون ساخلانیلان یئر.
۳- شدّتلی یئل ایله یاغان قار ایله یاغیش.
۴- قیشین سون اون‌بئش گونو ایله یازین ایلک اون‌بئش گونو.
۵- کند ائولری، باغ‌لاردا بیر- بیرینه کئچیریلن آغاج‌لاردان دوزلدیلمیش قاپی
۶- دوْو گلمک. غالب گلمک.

یازیچی: #حسن_اوموداوغلو

#ادبیات_ائوی

@AdabiyatEvi

ادبیات ائوی

10 Dec 2022 17:05

بیر گون
شاعیر اولماقدان زور ایش
شاعیرلری سئومک‌دیر. دئمیشدین!

#شاهین_هاشمی

@Mavi_Duygular

ادبیات ائوی

09 Dec 2022 12:10

بیزیم اوچون دار آغاجی معراجدیر،
آللاها گئدن نردیواندیر.

#علی_ثقه‌الاسلام_تبریزی
#ادبیات_ائوى

@AdabiyatEvi

ادبیات ائوی

08 Dec 2022 12:04

آغاج‌دا دوران قوش، بوداغین قیریلماسیندان هئچ قورخماز.
اونون گووَندیگی آغاج دئییل؛
اؤز قانادلاری دیر.

#هنریک_ایبسن (۱۸۲۸ شین، ۱۹۰۶ اسلاو)
#ادبیات_ائوی

@AdabiyatEvi

ادبیات ائوی

06 Dec 2022 19:49

چکیلن قانیمدیر تیکیلن دوداق،
سیندیران بالتادیر سینیلان بوداق.
دؤرد دووار ایچینده هاواسیز اوتاق،
توخونان گولله‌دیر سولان چیچکدیر.

#ابوالفضل_ثوابی
#ادبیات_ائوى

@AdabiyatEvi