Behzod Fazliddin

26 Jul 2024 08:02

ҲИКМАТ

Кўзингни оч, мудраб ўтма,
Тонг отди-ку, тунни кутма,
Ўтмишингни ортиқ титма,
Бугун учун бугун яша.

Кеча ёмон йиқилгансан,
Эзилгансан, бўғилгансан, 
Йўғ-э, бугун туғилгансан,
Бугун учун бугун яша.

Қувонч – ғамга таъзиядир,
Тун – кундузга марсиядир,
Эртанг ҳали насиядир,
Бугун учун бугун яша.

Кипригингга қўнмасин гард,
Кўксингдаги ойнани арт,
Бугун бахтли бўлишинг шарт,
Бугун учун бугун яша.

2008 йил

© Беҳзод Фазлиддин @Behzod_Fazliddin

#Тушларингдан_чиқиб_келдим

Behzod Fazliddin

25 Jul 2024 07:25

Бир устозимиз айтгич эди: “Булар Худони ҳам алдайман деб ўйлайди...”

#Йўл_йўлакай #Таҳрирсиз_хаёллар

@Behzod_Fazliddin

Behzod Fazliddin

24 Jul 2024 08:17

“Оммабоп китобларда бадбўйлик бор...”

Одамлар ҳар хил бўлганидек, китоблар ҳам турлича: бири моҳиятан яроқсиз, иккинчиси ёлғон ва алдов тарғиботчиси, бошқа бирлари истеъдодсизлик ва ўртамиёналик намунаси…

Шунинг учун ҳамма китоб онг ва идрокка яхши таъсир ўтказиб, фикрни бойитади, деган гапни эсдан чиқариш керак. Негаки, зеҳнни ўтмаслаштириб, дид ва савияни бузадиган китоблар ҳам дунёда кам эмас.

Масалан, ёзувчи, шоир ва олимлардан кўпчилигининг шу кунларда нашр этилаётган китобларини ўқимаган киши ҳеч нима ютқазмайди. Тўғри, китобдан йироқлашув оғриқли бир масалага айланиб қолди. Аммо буни фожиага қараб бурмаслик керак. Тасаввур этайликки, ҳамма бирданига китобхонликка шўнғиб кетди – нима ўзгаради? Илм-фан, бадиий адабиёт тармоқларига қараб одамлар онгида аввалгига нисбатан факт ва маълумот кўпроқ йиғилади, фикр-тушунчаларда баъзи ўзгаришлар юзага чиқади. Бироқ одамнинг Ўзлиги, яъни башарий “мен”ида ҳеч қандай силжиш, янгиланиш рўй бермайди. Бунга сабаб нима? Сабаб – дин, фалсафа, адабиёт, санъат ва сиёсатга бағишланган кўпдан-кўп асарларнинг инсон Руҳига теран таъсир ўтказолмаслиги ҳамда унинг инонч “қалъа”сини ишғол эта олмаслигидадир...

Айрим китоблар ўқувчининг ҳаётга аралашиш эҳтиросини пасайтириб, унда китобийлик кўникмасини орттиради. Оқибат нима бўлади? Ҳаётий ҳис-туйғулардан китобий майллар ғолиб чиқиб, инсон воқеликка ҳуркиб, чўчиб-қўрқиб қарайдиган ва қуруқ мушоҳададан нари ўтолмайдиган бир жонзотга ўхшаб қолади. Одатда мана шундай кимсаларнинг китобхўрлик “талант”и ёшлар онгига ёмон таъсир ўтказади.

Хуллас, ҳадеб китоб ўқимасликнинг зиёнидан гапиравермасдан, китоб ўқишдан туғилажак зарарлардан ҳам сўзлаш керак. Ана шунда муаммонинг “кўз”и очилиб, танлаб ўқиш малакаси устида жиддий бош қотирилиши мумкин.

“Оммабоп китобларда бадбўйлик бор. Чунки уларга майда одамларнинг ҳиди сингмиш”, дейди Ф.Нитше. Бу – тўғри фикр. Тўғрилиги учун ҳам бора-бора бунақа китобларни қўлга олиб варақлаш истагидан тамоман фориғ бўламиз...

Иброҳим Ҳаққул билан суҳбатдан.

@Behzod_Fazliddin

Тўлиқ ўқиш учун: https://www.facebook.com/100003319579634/posts/364124610374855/

Behzod Fazliddin

23 Jul 2024 07:10

Адабиётга тўда-тўда бўлиб кирилмайди.

Ҳар истеъдод ўз кучи, Яратган инъом этган салоҳият қуввати, меҳнати, улуғ устозлар назари, синчков сўз мухлисларининг холис эътирофи билан бу муқаддас даргоҳга кириб келади.

Гуруҳбозлик, маълум тоифалар монополияси Адабиётга дахлдор бўлолмайди.

Шунчаки фаоллик, ижодий давраларда, матбуот ва телеэкранда доимий кўриниб туриш, тинимсиз тадбирлар уюштириш, ижтимоий тармоқларда шов-шув қилиш – булар ҳали чинакам ижод, Адабиёт дегани эмас!

Ҳозир бундай “пафосли” гапларнинг деярли таъсири йўқ-ку, лекин шу ҳақда доимий эслатиб туриш керакмикан...

#Йўл_йўлакай #Таҳрирсиз_хаёллар #Бу_ҳам_муҳим

@Behzod_Fazliddin

Behzod Fazliddin

22 Jul 2024 07:55

Асл санъат ва, албатта, адабиёт бундан буёғига янада хослашиб, “ингичкалашиб” – жуда-жуда озчилик дидига мослашиб бораверади, шекилли.

#Йўл_йўлакай #Таҳрирсиз_хаёллар

@Behzod_Fazliddin

Behzod Fazliddin

20 Jul 2024 12:55

“Севаман!” десалар, қўрқарсан нега?..

© Беҳзод Фазлиддин @Behzod_Fazliddin

Behzod Fazliddin

18 Jul 2024 15:32

Шу чўтир дунёга шеър айтиб юрган шоир юрагингга қойил (эмасман)!

#Йўл_йўлакай #Таҳрирсиз_хаёллар

@Behzod_Fazliddin

Behzod Fazliddin

17 Jul 2024 13:14

БОРСАН

Иллат ботқоғига ботиб чарчадим,
Пушмон шаробини тотиб чарчадим.
Тўйдим Сенсизликка чорлар йўллардан,
Ўзимни дунёга сотиб чарчадим.

Сени Сенсизлардан излаганим рост,
Мункир туйғулар-ла бўзлаганим рост.
Нима қилсам қилдим, не бўлсам бўлдим,
Вале Сендан умид узмаганим рост.

Ботил ақидани бузмоқ истадим,
Сенга элтар сўзлар ёзмоқ истадим.
Иблис нағма қилиб йўлимни тўсди,
Гоҳ ночор ақлдан озмоқ истадим...

Телба ҳолим кўриб малаклар қочди,
Йўқлик саҳросида хаёлим учди.
Шайтонга ҳай бердим, Дўстга қўл бердим,
Яна Иймон дилга дарича очди.

Ҳар неъматда борсан, ҳар жонда борсан,
Заминда, ҳавода, осмонда борсан.
Нуринг-ла тўлмишдир жами оламлар,
Орзуларда борсан, армонда борсан.

Менда ҳам бормисан?!
                                Менда ҳам борсан!

© Беҳзод Фазлиддин @Behzod_Fazliddin

Behzod Fazliddin

16 Jul 2024 08:09

Шундайлар бор, фақат ишлаётган идораси сабаб ҳурмат-эътиборда, давралар тўрида.

Яна шундай камёблар бор, улар сабаб ишлайдиган жойи ҳам кўпчилик ардоғида.

Аввалги ҳолда дуч келган одам бўлиши мумкин, аммо кейингиси унча-мунчасига насиб этмайдиган неъмат, Худо юқтирган файздир.

#Йўл_йўлакай #Таҳрирсиз_хаёллар

@Behzod_Fazliddin

Behzod Fazliddin

15 Jul 2024 09:10

Ёшлик – орзу, муҳаббат, толеъ,
Болаларча тоза саволлар...
Бўйнимизда “галастук”, вале
Кўнглимизда озод хаёллар...

@Behzod_Fazliddin

2007 йил cурати.

#Кайфият #Лаҳзалар

Behzod Fazliddin

13 Jul 2024 15:49

ОТАМЛАШУВ

Бу дунё – ғалвали уй, дейсиз,
Ҳар жонда минг ташвиш, ўй, дейсиз,
Ўзимга сиғмайман, сиз ҳар гал
Кўп гапирмай, чойдан қуй, дейсиз.

Мен озиб-ёзиб бир боргандим,
Озурда кўнглимни ёргандим,
Йиғламай йиғлашни ўргандим,
Тишингни тишингга қўй, дейсиз.

Кўзимда дунёча ёш бўлса,
Кўксимда бир уюм тош бўлса,
Наҳотки белбоғим бўш бўлса?
Ҳар нени ҳикматга йўй, дейсиз.

Кечалар бахтимни туш кўриб,
Биргина бошимни қўш кўриб,
Катта бўлганимни хуш кўриб,
Қачон яна элга тўй дейсиз?

2007 йил

© Беҳзод Фазлиддин @Behzod_Fazliddin

#Сен_қачон_гуллайсан

Behzod Fazliddin

12 Jul 2024 12:35

HASRAT

Yaram o‘tib ketdi jon-jonlargacha,
Hali ko‘p ingrayman azonlargacha.
O‘ylab charchamayman qachonlargacha
Armon gullariga ildizligimni?

Ko‘zimga tumanlar kutadi kimlar,
Izimga tikanlar otadi kimlar,
So‘zimga kishanlar tutadi kimlar,
Bilib osmoni yo‘q yulduzligimni.

Mudom ko‘z ostidan chiqqan arilar,
Umrimdan gunohlar yiqqan arilar,
Birovning nishida chaqqan arilar
Bilmasmi bulbul yo qo‘ng‘izligimni?

Yuragim – oyoqlar tiqilgan chashma,
Hali bir tomchimga qilaman tashna,
Yuzimga solishing shart emas, oshna,
O‘zim ham bilaman yolg‘izligimni…

2002-yil

© Behzod Fazliddin @Behzod_Fazliddin

#Eski_daftardan

Behzod Fazliddin

10 Jul 2024 14:29

ЁМОНИ ЙЎҚ ЖОЙГА КЕТАМИЗ

Бу дунё – руҳимнинг азоби,
Эзгулик – умримнинг савоби.
Қўй, энди йиғлама, кўнгилжон,
Бор ахир барчасин ҳисоби,
Қўлни бер, пок жойга кетамиз,
Ёмони йўқ жойга кетамиз.

Кўзларим қадалган самога,
Ташнаман бир ҳовуч зиёга.
Чарчадим заҳарли сўзлардан,
Юр, энди ғийбату иғвога
Макони йўқ жойга кетамиз,
Ёмони йўқ жойга кетамиз.

Чопамиз Қуёшнинг изидан,
Ўпамиз гулларнинг юзидан.
Қизариб бир ширин туйғулар
Топамиз лоланинг кўзидан.
Армони йўқ жойга кетамиз,
Ёмони йўқ жойга кетамиз.

Кўзимни севинч ҳам ёшласин,
Қўлимни омад ҳам ушласин.
Тишларнинг изи бор кўксимда,
Энди Бахт лабимни тишласин.
Зиёни йўқ жойга кетамиз,
Ёмони йўқ жойга кетамиз.

Йилт этган зиёга зор кўнглим,
Биз истар дунёлар бор, кўнглим.
Муниса Онамнинг кўнгли бўш,
У бизни кутяпти, юр, кўнглим,
Ёмони кўп жойда нетамиз –
Онамнинг кўнглига кетамиз,
Онамнинг кўнглига кетамиз!

2001 йил

© Беҳзод Фазлиддин @Behzod_Fazliddin

#Эски_дафтардан #Кайфият #Тушларингдан_чиқиб_келдим

Behzod Fazliddin

09 Jul 2024 16:02

***
Мен – ўзини сотиб қўйган қул,
Хаёлимга занжир солиб бер.
Ўзингдан ўзгадан озод қил,
Юрагимни ундан олиб бер.

Осмон эдим, қандай эгилдим,
Қаро ерга дондай тўкилдим,
Наҳот шунча осон енгилдим,
Юрагимни ундан олиб бер.

Қандай ишқ бу – йўлдан чалғитса,
Ўтдан олиб ўтга ирғитса,
Паришонман, яна тўзғитса...
Юрагимни ундан олиб бер.

Бир нигоҳга мендай зормас у,
Тоза дардга интизормас у,
Мени Сенга олиб бормас у,
Юрагимни Гулдан олиб бер.

2008 йил

© Беҳзод Фазлиддин @Behzod_Fazliddin

#Тушларингдан_чиқиб_келдим

Behzod Fazliddin

08 Jul 2024 15:48

***
Меҳрининг чашмига хўб чанқоқ севдим,
Ёлғиз У ягона, манам тоқ севдим,
Найлай, тоқатимдан ортиқроқ севдим,
Ҳолимни сўрмаса, ҳолим ёмондур.

Муроду мақсудим ҳосил қилгувчи,
Истаса, ажрига ноил қилгувчи,
Нури иймонимни комил қилгувчи
Ҳолимни сўрмаса, ҳолим ёмондур.

Шам янглиғ умримни ёрқинроқ қилиб,
Жавзосин жонларга салқинроқ қилиб,
Шоҳ томиримдан ҳам яқинроқ келиб
Ҳолимни сўрмаса, ҳолим ёмондур.

Ҳозирдир хуш-нохуш гумонимда У,
Барқарордир руҳи равонимда У,
Ишқ онлари менинг томонимда У,
Ҳолимни сўрмаса, ҳолим ёмондур.

© Беҳзод Фазлиддин @Behzod_Fazliddin

Behzod Fazliddin

25 Jul 2024 15:45

***
Онангнинг эгнига камзул бўлмаса –
Ҳар дайди шамолдан асраб тургани,
Отангнинг қўлига омбур бўлмаса –
Ёғочлардан нобоп мих суғургани;

Синглингга сарупо, сеп йиғилганда
Фойдаси тегмаса чит кўйлакчалик,
Ташвишлар укангга зўрлик қилганда,
Ҳимоя этмаса бир билакчалик;

Лаббай, деб келмаса ғовларни ёриб,
Мунаввар тонгларга йўргак бўлмаса,
Ғанимнинг кўзини ўймаса бориб,
Эгилган элингга тиргак бўлмаса...

Шу шеърни тўқимай турганинг яхши,
Ҳар сатри қонингдан ўтмагунича,
Шу шеърни ўқимай турганинг яхши,
Тоғ бўлиб жонингда ўсмагунича...

© Беҳзод Фазлиддин @Behzod_Fazliddin

#Кутмаган_кунларим_кутган_кунларим

Behzod Fazliddin

24 Jul 2024 15:42

***
Мен сизга бегона бўлмоқчи эдим,
Жой бергим йўқ эди ҳатто тушимдан.
Шундоқ ҳам ҳар нарса тиғиз дунёда
Ўй-ташвиш айирай дейди ҳушимдан.

Муттасил кимнидир ахтариб келдим,
Мўлтираб ҳар ёнга боқдим интизор.
Шу қадар девона яшарми эдим,
Башарти ўзимда бўлса ихтиёр.

Сиз-ку аллақачон кечар эдингиз
Ўртаниб, ўртаган ғариб Мажнундан.
Таассуф, ҳаммаси ҳал бўлиб бўлган
Кўзингиз кўзимда жилмайган кундан.

Шеър қилиб сочаман бутун дардимни,
Соғинсам, беркиниб оламан тунга.
Сиз хира хотирот аро гирёнсиз,
Ҳали ҳам бегона бўлолмай менга.

2009 йил

© Беҳзод Фазлиддин @Behzod_Fazliddin

#Тушларингдан_чиқиб_келдим

Behzod Fazliddin

23 Jul 2024 16:15

Умидсизлик аро умидвордирман,
Ўзингдан ўзгага айтар дардим йўқ!

© Беҳзод Фазлиддин @Behzod_Fazliddin

Behzod Fazliddin

22 Jul 2024 15:32

Жондан азиз номин ёдга олган эдим,
Юрагимнинг хотиридан ғамлар ўчди...

© Беҳзод Фазлиддин @Behzod_Fazliddin

Behzod Fazliddin

21 Jul 2024 09:14

Улар қичқираверсин: “Ҳаёт – бу лаҳза. Ўйна!”

Сиз ўзингиз учун жавоб беринг: “Ҳаёт – бу лаҳза. Ўйла!”

#Йўл_йўлакай #Таҳрирсиз_хаёллар

@Behzod_Fazliddin

Behzod Fazliddin

19 Jul 2024 12:54

Бой-камбағал, шаҳар-қишлоқ, оқ-қора ўйинидан чарчамадингизми?!

***
Вақтида етмадик Вақтнинг қадрига...

#Йўл_йўлакай #Таҳрирсиз_хаёллар #Эски_дардлар

@Behzod_Fazliddin

Behzod Fazliddin

18 Jul 2024 11:22

Илмий изланиш иштиёқи билан аспирантурада ўқиб юрган давримизда (2010 йиллар) ёш тадқиқотчиларнинг моддий аҳволи яхши эмасди. Берилган стипендия чойчақадай гап. Аксарият аспирантлар бошқа бирор жойда ишлаб, у ёқдан бу ёққа қатнаш билан кун ўтказарди. Ишбилармонроқ изланувчилар ҳам репетиторликдан орта олмасди.

Бу ҳолда қандай диссертация ёзиш мумкин?

Аксарият илмий тадқиқотларнинг юмалоқ-ёстиқ қилинаётганига асосий сабаблардан бири ҳам шу – изланиш учун етарлича шароит йўқлиги. Бошқа омиллар ҳам бор, албатта.

Ҳужжатбозлик, ортиқча талаблар ва оворагарчиликлар сабаб кўплаб тадқиқотчилар, айниқса, ёш кадрлар илмий ишни ёзиб тугаллагандан сўнг ҳам йиллаб сарсон бўлаётгани эса алоҳида мавзу.

Шунга қарамай, барча қийинчиликларни мардонавор енгиб, кўнгилдагидек тадқиқот олиб борган ва ёруғ юз билан диссертация ёқлаганлар бўлган...

Яширмайман, орада ўзим ҳам ҳаммасига қўл силтаб, “ташлаб” кетмоқчи бўлдим. Қолаверса, ишимиз илм-фандаги фойдасиз ислоҳотлар даврига тўғри келиб, чўзилиб кетди...

Ниҳоят, 2019 йили диссертацияни ёқлаб, филология фанлари бўйича фалсафа доктори (PhD) илмий даражасини олдик...

Илму ижод одамига керакли даражада моддий-маънавий шароит яратиб берилмас, яхши муҳит бўлмас экан, у ҳеч нарса қила олмайди.

Ҳозирги ҳолат нисбатан яхши. Иқтисодий аҳвол маъносида, албатта. Таянч докторантурада изланиш олиб бораётган ёш тадқиқотчиларга унча кам пул тўланмайди. Ҳарҳолда, бу маблағ бошқа ишга чалғимай, яхшироқ ўқиб-изланишга етса керак.

Шундай экан, имконни ғанимат билинг. Вақтни беҳуда сарфламанг. Ижтимоий тармоқларда соатлаб санғишни бас қилинг. Ўқиб-изланинг, янгилик яратинг, ёш тадқиқотчи, изланувчилар!

Кейин бу дамларни тушингизда ҳам топа олмайсиз.

P.S. Кузатишимча, бизда бугунги илмий муҳитга малакали мутахассис, янги фикрга ташна изланувчан олимдан кўра ҳарфчайнар техник ходим, долзарб мавзудаги илмий тадқиқот эмас, шунчаки шаблонга солинган ҳужжатлар йиғмаси зарурроқ экан.
Бу аҳволда илм-фан қандай ривожланади?!

Имкониятга қараб ҳали бу ҳақда батафсил ёзармиз...

08.07.2019

#Йўл_йўлакай #Таҳрирсиз_хаёллар #Сизга_гапим_бор #Бу_ҳам_муҳим

@Behzod_Fazliddin

Behzod Fazliddin

16 Jul 2024 15:46

ЭСКИ ҲАҚИҚАТ

Дунё эски, ташвишлар эски,
Навқирондай бу ғамлар кўҳна.
Қарсак чалиб топамиз таскин,
Ҳаёт ўзи эски бир саҳна.

Гар пихини ёрган фуқаро
Ўзлаштирмоқ бўлар бугунни,
Ечолмаслар минг йиллар аро
Севги деган эски тугунни.

Ким бировни йиғлатиб кулар,
Шу ўйинлар менга қизиқми?
Ё ўчириб берарми улар
Пешонамда турган ёзуқни?

Фақат сира тинч қўймас бир ҳол,
Ўйлатади дунё ишлари:
Нигоҳлари маъюс мажнунтол,
Чинорларнинг хўрсинишлари...

2008 йил

© Беҳзод Фазлиддин @Behzod_Fazliddin

#Кутмаган_кунларим_кутган_кунларим

Behzod Fazliddin

15 Jul 2024 15:31

Керак бўлса, ер сотиб китоб чиқарадиган “телба”ларни Ўзинг қўлла, ё Парвардигор!

#Йўл_йўлакай  #Таҳрирсиз_хаёллар

@Behzod_Fazliddin

Behzod Fazliddin

14 Jul 2024 13:54

Bu chirkin dunyoning qoidasi shu:
Qancha ko‘p sotilsang, shunchalar zo‘rsan!

© Behzod Fazliddin @Behzod_Fazliddin

Behzod Fazliddin

13 Jul 2024 08:09

Қўлтелефонсиз ҳам болалигимиз қандай ажойиб эди!..

#Йўл_йўлакай #Таҳрирсиз_хаёллар

@Behzod_Fazliddin

Behzod Fazliddin

11 Jul 2024 15:35

Пул, моддият ҳам қудрат манбаидир.

Ёшларни пулдан ҳазар қилиш, бойликка, бойларга нафрат кўзи билан қарашга ўргатмаслик керак.

Аксинча, пул яхши яшаш, улуғ мақсадларга эришиш йўлида бир восита экани, уни фақат тўғри йўл, ҳалол меҳнат билан топиб, хайрли ишларга сарфлашни англатиш зарур.

#Йўл_йўлакай #Таҳрирсиз_хаёллар #Бу_ҳам_муҳим

@Behzod_Fazliddin

Behzod Fazliddin

10 Jul 2024 07:11

Тўғри, биз буюк юрт фарзандларимиз. Лекин аксариятимиз улуғ аждодларга номуносиб, олтин меросни оёқости қилаётган шовқинхўрлар, эътиқоди носоғлом гапбоз-маҳмадоналармиз.

***
Фарзандлари маддоҳ юрт қудратсиз бўлур.

#Йўл_йўлакай #Таҳрирсиз_хаёллар #Эски_дардлар

@Behzod_Fazliddin

Behzod Fazliddin

09 Jul 2024 07:29

Одамзод қизиқ: ўзи ўқишдан олдин ўқитишни истайди.

***
Ўзингга йўқ тоқат бошқага қаерда!

#Йўл_йўлакай  #Таҳрирсиз_хаёллар

@Behzod_Fazliddin

Behzod Fazliddin

08 Jul 2024 09:33

Ҳукуматга – фақат тузумни мадҳ этадиган, нашриётларга – китоби қандай бўлса ҳам, пул келтирадиган, оммага эса енгилгина ёзадиган шоир-ёзувчилар керак.

Бу аҳволда “китобхонлик ва адабиётни ривожлантириш” ҳақидаги ялтироқ гапларга ким ишонади?!

#Йўл_йўлакай  #Таҳрирсиз_хаёллар 

@Behzod_Fazliddin