Behzod Fazliddin

25 Jun 2025 07:27

***
Ўзингни яхши кўр, одамларни сев,
Беҳуда ўйлардан қизғон умрингни.
Малакка айлансин ичингдаги дев,
Қутқар кўксинг ичра гирён қумрингни.

Табассум тафтида чеҳрангни очгин,
Тайинли сабаб йўқ аччиқлангани.
Махзани меҳрингдан марварид сочгин,
Ўзингга зиёндир қаттиқлашганинг.

Қаёққа йўл олар қалам – қаландар,
Сен юрак йўлидан юришни ўргат.
Жондан ўтиб кетса эски аламлар,
Мардларча лаб тишлаб туришни ўргат.

Ишқ эрур тоабад кўнгил сайқали,
Муҳаббат – ишончдир, муҳаббат – иймон.
Самандар руҳингни асра аввали,
Кўксингда порлаган Қуёшга ишон.

© Беҳзод Фазлиддин @Behzod_Fazliddin

#Кутмаган_кунларим_кутган_кунларим китобидан.

Behzod Fazliddin

23 Jun 2025 07:21

CЎЗ

Мен Ундан уялдим, мен Ундан қўрқдим,
Кўнглимни таржима қилолмади У.
Оёғидан қирқдим, бошидан қирқдим,
Барибир, меники бўлолмади У.

Ундан кетолмайман, Ундан қолмайман,
Тақдирим У билан шерик-ку, Она.
Унга етолмайман, лекин толмайман,
Бу дунё Сўз билан тирик-ку, Она!

2004 йил

ШОИР

Ҳамма сўзлар Сеники эди,
Сочдинг, териб олавердим жим.
Бу олтинлар меники энди,
Мен энг бахтли ўғриман, Тангрим!

2006 йил

© Беҳзод Фазлиддин @Behzod_Fazliddin

#Сен_қачон_гуллайсан

Behzod Fazliddin

22 Jun 2025 08:18

...Дарё узра сувга зор бўлиб ўтса,
Кенг дунё кўзига тор бўлиб ўтса,
Ҳақиқат ҳажрида хор бўлиб ўтса,
Бу халққа қайишмас беҳ зодлари ҳайф!

© Беҳзод Фазлиддин @Behzod_Fazliddin

https://www.facebook.com/behzodfazliddin.uz/posts/1043885251052242

#Кайфият  #Эски_дардлар

Behzod Fazliddin

21 Jun 2025 07:21

Биз ҳурмат қилмайдиганлар аслида бизни ҳам бир чақага олмаса керак. Ҳаёт ўзи шунақа, шекилли.

#Йўл_йўлакай #Таҳрирсиз_хаёллар

@Behzod_Fazliddin

Behzod Fazliddin

20 Jun 2025 08:29

“Хилват дар анжуман” – бугун ҳам энг яхши чоралардан.

***
Ўз хато-камчиликларимчалик хафа қилолмайди ҳеч ким мени...

#Йўл_йўлакай #Таҳрирсиз_хаёллар

@Behzod_Fazliddin

Behzod Fazliddin

19 Jun 2025 08:01

#Кайфият #Лаҳзалар

CЎНГГИ ВАЪДА

Ёруғ шеърлар ёзаман энди,
Сен ҳам фақат яхши тушлар кўр.
Мен иккинчи ўзимни енгдим,
Ҳеч нарса йўқ юрагимдан зўр.

Ўз измига тушар ҳаммаси,
Қор остида қолиб кетмас из.
Жинкўчада зулмат шарпаси,
Омон сақлар бизни Ишқимиз.

Ота, сизга ўхшолмайман деб,
Беркитмайман нурга хонамни.
Бу аҳволда яшолмайман деб,
Қўрқитмайман мушфиқ онамни.

Нима йўлдан урар бандани?
Айтганингдан четга жилмайман.
Тангрим, кечир мен арзандани,
Ортиқ Сенга исён қилмайман.

Ўз юртига ҳайдайман ғамни,
Йўқотишдан, тамом, қўрқмайман.
Тополмаса агар кулбамни,
Ёруғликни ўзим йўқлайман.

2008 йил 2 август

© Беҳзод Фазлиддин @Behzod_Fazliddin

#Кутмаган_кунларим_кутган_кунларим китобидан.

2007 йил сурати.

P.S. Янги шеърларни кўп сўраяпсизлар. Насиб қилса, кейинроқ ҳали эълон қилинмаган шеърлардан ҳам яна жойланади. Айни кунларда шу шеърларга уйқаш кайфиятда юрибмиз...

Батафсил: https://www.facebook.com/behzodfazliddin.uz/posts/1049653047142129

Behzod Fazliddin

18 Jun 2025 07:34

Мунофиқлик жамиятимизнинг хос белгиси бўлиб қолдими, деб ўйлаб қоласан. Эҳтимол, аввалдан шундайдир...
Мунофиқ жамият. Мунофиқлар жамияти...

#Йўл_йўлакай #Таҳрирсиз_хаёллар

@Behzod_Fazliddin

Behzod Fazliddin

17 Jun 2025 08:12

* Бизнинг авлодда замонадан қочганлар қутулди.

* Ўзингникигина эмас, ўзгаларнинг нодонлиги ҳам ёзишга халақит беради.

* Китоб – бойлик. Лекин сотиб олингани эмас, ўқилгани.

* Ёзувчи саёз жойда чўкади.

* Бахт – бойликда, десангиз, ҳамма бахтсиз. Чунки ақллига кўп нарса керак эмас, аҳмоқ эса барибир тўймайди.

* Агар айб фақат бир томондагина бўлса, урушлар узоқ давом этмас эди.

Асқад Мухтор

#Иқтибос #Ижод_ва_эътиқод

@Behzod_Fazliddin

Behzod Fazliddin

15 Jun 2025 11:42

#Кайфият #Лаҳзалар

***
Умримнинг ярмини йўлларга бердим,
Умримнинг ярмини гулларга бердим,
Ўзимга бермадим умримни...

Тилимни қонатиб Худога бордим,
Дилимни қонатиб Худога бордим,
Ўзига ўзимни олиб бормадим...

2006 йил

© Беҳзод Фазлиддин @Behzod_Fazliddin

#Сен_қачон_гуллайсан

Эски суратлардан.

Behzod Fazliddin

13 Jun 2025 16:11

Мени миллатимга қўшиб юксалтир,
Қошингга бормайлик – икки қўли бўш...

© Беҳзод Фазлиддин @Behzod_Fazliddin

Behzod Fazliddin

11 Jun 2025 08:27

ОРЗУНИ АСРАНГ!

***
“Битта сўкиб қўй, яхшилаб сўкиб қўйгин”.
“Кўзингни ўяман, де. Кўзингни ўйволаман, дегин”.
“Ўласан, де. Ўлдираман, деб айт”.
Энди тили чиқаётган болага шундай ўргатамиз. Мана биз бераётган “тарбия”!
Бундай “тарбия” топаётганлар эртага кўпчилик олдида сўккандан баттар ҳолга солса, ишончимиз кўзларини ўйиб олса, тириклай ўлдириб турса, ҳаммасини бировга тўнкаб тураверамиз. Камига ошкора нолиймиз: “Ё Худойим, Сенга нима ёмонлик қилувдим!”

***
Кузатишимча, кўпчилик оилаларда ойлаб ўзаро салом-алик бўлмас экан. Яъники, янги кун бақир-чақир билан бошланиб, апил-тапил нонуштадан кейин ҳамма ўз ишига киришиб кетар, фақат узоқроқ жойга бориб-келингандагина саломлашиш “эсга тушиб” қоларкан.
Фарзандларингизга саломлашиш, муомала одоби, хусусан, эрта тонгдан оила аъзоларига салом бериб юзланишни ўргатинг ва бунда ўзингиз намуна бўлинг.

***
Фарзандларга уйда, жамоат жойларида ўзини қандай тутиш, муомала, таомланиш ва кийиниш одобини ўргатинг:
таомга катталардан олдин қўл узатмаслик;
овқатланишни “Бисмиллаҳ” билан бошлаб, ўнг қўл билан тановул қилиш;
пуфлаб ичмаслик;
чапиллатиб емаслик;
сувни ўтирган ҳолда ичиш;
ҳожатдан сўнг қўлни яхшилаб ювиш;
таомланишдан олдин ва кейин қўл ювиш, оғизни чайиш;
эснаганда оғизни (чап қўл орқаси билан) тўсиш;
дуч келган жойга туфламаслик, бурун қоқмаслик;
телефонда бақириб гаплашмаслик;
ҳамманинг олдида кекирмаслик, бурун ковлайвермаслик, қашинавермаслик;
баданга ёпиштириб, очиқ-сочиқ кийинмаслик... Яна давом этиш мумкин.
Бу билан уларни чиройли тарбия этган ва суннатга мувофиқ иш тутган бўласиз, иншааллоҳ.
Юқоридагиларнинг тескариси бўлган ҳолларга кўп дуч келяпмиз. Бунинг учун жуда маданиятли бўлиш шарт эмас. Билганларимизни бир-биримизга ўргатиб, эслатиб турайлик.

***
“Болам машҳур артист бўлса. Концертларида биринчи қаторга ўтиргизиб, менга атаб қўшиқлар айтса, ҳамманинг ҳаваси келса...”
Илоё, умрингиз зиёда бўлиб, фарзандларингиз камолини кўриш насиб этсин. Фақат илтимос, бундан-да яхшироқ, чиройлироқ орзу қилинг, азиз онажонлар!

***
Кўрадигани фақат мусофирлик, қўнимсизлик, сурункали ёлғизлик – руҳий азоблар бўлса, меҳрингиз тафти масофаларни ёриб ўтишга ожиз эса, илтимос, фарзандингизни иш ё ўқиш учун узоққа юборманг. Бола бечорани синдириб қўясиз.
Агар олисда ҳам унга оила бағридагидек гўзал муҳит яратиб бера олган бўлсангиз, бу энди бошқа гап.

@Behzod_Fazliddin

#Йўл_йўлакай #Таҳрирсиз_хаёллар #Бу_ҳам_муҳим #Эски_дардлар

https://www.facebook.com/100003319579634/posts/1610646122389358/

Behzod Fazliddin

10 Jun 2025 06:53

Шуларми эртанинг хўжайинлари?

Иш юзасидан кўпинча одамлар назаридаги нуфузли бир олий ўқув юрти биноси ёнидан ўтаман. Аксарият ҳолда, танаффусга тўғри келадими, йўлакни талабалар тўлдириб туришади. Атай кузатмасам-да, хатти-ҳаракатлари дарров кўзга ташланади: кимлар ҳазил-ҳузул қилган, қийқириб кулишган, бирови бошқасини сўккан…
Эътибор бермасликка уринаман. Ёшлик шўхликлари-да.

Йўл бўйи уларнинг гаплари қулоққа чалинади:
“Қаерда овқатланамиз?”
“Машинангни олиб келдингми?”
“Кечқурун қаёққа борасан?”
“Кейинги дарсга кирмайман, уйга бориб ухлайман”…

Деярли ҳар сафар шунақа гаплар. Неча йилки, бу шўринг қурмағурлар “У ёққа борамиз, бу ёққа борамиз”ни қўймайди. Неча йилки, шунақа такасалтанглар ҳаётини эслатадиган манзарага дуч келаман. Бу туришда улар қачон ўқишга вақт топаркин?

Дарвоқе, ўқиш ҳақида ҳам эслаб қолишади. Сессия арафасида мана бундай сўзлар эшитилади: “Гаплашса бўлармикан?”, “Баҳони кўтариб бермайдими?”, “Бирон нарса сўрадими?”…

Худо кўрсатмасин, эртага бундайлар бирор идорага ишга жойлашса, мансаб курсисини эгалласа борми! Кунимизни кўрсатади-я…

Ҳа, айтганча, улар аллақачон қайсидир курсиларни эгаллаб, халқни қақшатишни бошлаб юборган-ку!..

23.01.2014

P. S. Буларни бир неча йил аввал йўл-йўлакай ижтимоий тармоққа ёзиб қўйган эканман. Фейсбук шуни эслатди яна. Аммо ҳали ҳам ўша аҳвол!

@Behzod_Fazliddin

#Йўл_йўлакай #Кайфият #Таҳрирсиз_хаёллар #Сизга_гапим_бор #Бу_ҳам_муҳим

https://www.facebook.com/100003319579634/posts/495423560578292/

Behzod Fazliddin

08 Jun 2025 14:31

Шоир ўз шеъри, шахсияти, ҳаёт ва ижод тутуми билан, аввало, шеъриятга, ундан ҳам ўтиб адабиётга, кейин жамият ва миллатга, динга, агар жуда юксак – олиймақом бўлса, бутун башариятга хизмат қилиши керак.

Қофиячалиш назмбозларни қўя туринг-у, бугун анча-мунча оғзи катта шоирнинг ҳам адабиёт ва жамият тугул, ҳатто шеъриятга фойдаси йўқ!..

#Йўл_йўлакай #Таҳрирсиз_хаёллар #Ижод_ва_эътиқод

@Behzod_Fazliddin

Behzod Fazliddin

06 Jun 2025 16:41

***
Намоз ўқиётган бола, отанг ким,
Сенга ким кўрсатди энг тўғри йўлни?
Менинг кўнглим ҳайрон, менинг кўнглим жим,
Айт, қайдан топайин сендаги дилни?

Оғриққа беланган устихонларда
Интизор турибман муждаларингга.
Пешонанг ер ўпган мунир онларда
Жоним садқа бўлсин саждаларингга!

Кўзларим гуноҳкор, кўзларим ўғри,
Кўзларингда қутлуғ нур кўраяпман.
Ўзимча ҳалолман, ўзимча тўғри,
Унда нега бунча қалтираяпман?..

Хотиралар мени эзиб ташлайди,
Ўзимдан бошқани билмас эканман.
Кечаги ҳаётим йўққа ўхшайди,
Тузукроқ дуо ҳам қилмас эканман...

Намоз ўқиётган бола, отанг ким,
Сенга ким кўрсатди энг тўғри йўлни?
Ўхшар бўлса, сенга ўхшасин ўғлим,
Улғайсин пок нурга тўлдириб дилни...

2003 йил

© Беҳзод Фазлиддин @Behzod_Fazliddin

#Кайфият #Эски_дафтардан

Behzod Fazliddin

05 Jun 2025 05:28

ҲАЁТ

1
Кунларимдан зерикиб кетдим,
Дил юртида Турғунлик – пойтахт.
Билмам, қачон манзилга етдим,
Имиллайди, вақт ўтмайди, вақт.

2
Йилларимни бой бериб қўйдим,
Лаҳзаларда қолиб кетди Бахт.
Мен ўзимни ўлдириб қўйдим,
Тирилишга Вақт етмайди, Вақт!

2004 йил

© Беҳзод Фазлиддин @Behzod_Fazliddin

#Сен_қачон_гуллайсан #Эски_дафтардан

Behzod Fazliddin

24 Jun 2025 08:44

#Кайфият #Лаҳзалар

БАХТ БИЛАН ТАНИШУВ

Қаерларда адашдинг, Дийдор?
Бир чеҳрани ёмон соғиндим.
Кел, ёнимда гуллагин, дилдор,
Сенсиз баҳорлардан оғриндим.

Томчилари тоғлардан оғир,
Юрагимни айламиш нишон,
Кўзюртингда тинмайди ёмғир,
Қуёш менинг қўлимда, ишон.

Исмимни айт, тонглар уйғонсин,
Мени эсла – кулсин ҳаётинг.
Хотиралар кўнглингни олсин,
Асраб келар умримни ёдинг.

Тўйгунича ёғиб олсин, деб
Тан бериш йўқ қору дўлларга.
Тунлари ҳам ёруғ бўлсин, деб
Юлдуз ёқиб қўйдим йўлларга…

Улуғ ишга боғлаганман бел,
Йўлга чиқдим азиз аҳд билан.
Кўзим нури, сен ҳам тезроқ кел,
Таништириб қўяй Бахт билан…

2007 йил

© Беҳзод Фазлиддин @Behzod_Fazliddin

2008 йил сурати.

#Эски_дафтардан
#Тушларингдан_чиқиб_келдим

Behzod Fazliddin

22 Jun 2025 17:25

Дўстинг кўпми, демак, дўстинг йўқ.

***
Ён-атрофингда фикрлашадиган бирор одам йўқлиги ҳам бахтсизликдир.

***
Ёлғиз яшашдан ҳам ёлғиз курашиш оғир.

#Йўл_йўлакай #Таҳрирсиз_хаёллар

Беҳзод Фазлиддин @Behzod_Fazliddin

Behzod Fazliddin

21 Jun 2025 17:47

Отангиз ҳаётми? Онангиз соғ-омонми?
Тасдиқ жавобингиз бўлса, бахтли экансиз.

Она кўнгли тилсимлар тилсими экан-да. Бунинг сирини оналарнинг ўзлари ҳам билмаса керак. Барча оналар қатори Аямнинг суврату сийратида ана ўша сирли моҳият яширин.

“Ўртоқларимнинг оналари ҳам келди. Улар орасида энг чиройлиси Сиз экансиз”. Бир пайтлар укамнинг болалик хаёллари билан айтган ушбу сўзларига Аям шунчаки кулиб қўя қолган, “Ҳамманинг онаси ўзига яхши-да” дегандай бўлганди. Мен эса аллақачон Аямни бошқалар билан солиштирмай қўйганман...

Болаликка туташ ўсмирликнинг беғубор пайтлари, бирор хислатим ёқиб тушса, баъзи дуогўй кексалар суйиб “Онанг сени қайси юлдуз остида туққан?!” дея эркаларди. У пайтлари бу сўзларнинг тагмаъносини тушуниш қаёқда, мени мақтаяпти, деб юраверганмиз. Бир куни Аямга шу гапни айтганимда қувончдан чақнаган кўзларида юлдуз-юлдуз ёш милтиллаганини ҳали-ҳали эслайман. Аслида, бу менга эмас, онамга айтилган таҳсин эди.

Нокамтарликка йўйманг, ундан кейин ҳам ўзимча Аямга қанча-қанча оналарнинг олқишу мақтовларини олиб бордим. Ўшанда бу мен учун оддий, ҳа, жуда оддий ҳол эди. Баъзан “Оналар жуда таъсирчан бўлади-да” қабилидаги ўй-хаёллар ўтарди мурғак дилимдан. Бугун англаяпманки, Она кўнглини ҳали-бери тушунмас эканмиз.

Дилбандининг ҳар бир қадамини юрак ҳовучлаб кузатаётган муштипар Она қиёфасини қайси санъаткор мукаммал ярата олар экан-а! Бир қарашда бу ҳолни ҳар ким ўз волидаси мисолида сувратлантира олиши мумкиндек. Аммо қани ўша олий саодатга эришган фарзанди аржуманд?..

Онамга, оналарга бағишланган шеърларим кўп. Ҳатто бир тўпламим “Онамнинг кўнглига кетамиз” деб номланган. Бироқ улар Аямнинг бир тола сочига тенг келадими-йўқми, билмайман. Шуни назарда тутибми, ёзгандим: “Умрим арзимайди дардларингизга...”

Баъзи шовқинчилар ҳатто она меҳрини бозорга солмоқчи бўлаётганини, “Онажо-о-оним!” дея йиғламсираб хиргойи қилиб, монолог-“ҳасратнома”лар қистираётганини кузатиб, бизнинг она ҳақидаги шеърий битикларимиз ҳам кимларгадир эриш туюлмасмикан, деб ўйлаб қоламан.

“Худо берган ўғлим!” дея алқаб қўярди отам. Дадам ҳақида ўйласам, доим шу ҳолат кўз ўнгимда гавдаланади. Кўпинча бағрига олиб, эркалаб айтиладиган бу сўзлар елкамга катта масъулият, бурч юклаганини, мана, бугун яхшироқ ҳис қиляпман.

Аслида, ҳаётда илк устозим отам экан. Дадамни таниган-билганлар мени кўпроқ у кишига ўхшатади. Баъзилар “Онангизга ўхшар экансиз”, дейди. Қошу кўзда ўхшашлик бўлса бордир, аммо мен ҳали уларга ўхшай олмадим – отамдай босиқ, мулоҳазакор, Аям айтмоқчи, бир сирда турадиган..., онамдай сабр-бардошли, хокисор ва меҳрибон... бўлолмадим. Яшириб нима қиламан, баъзан буни хоҳламадим ҳам.

Қанча оталарни кўрдим – номи “ота” эди, холос, шундай оналарни учратдим – бола туққани учунгина “она”. Яна шунақа арзандаларга ҳам рўбарў келдимки...

Ҳа, қандай тотли бўлса, шунча масъулиятли экан оталик, қанча гўзал, ёқимли бўлса, шунча “даҳшатли” экан оналик!

Ғўрлик-да, билиб-билмай азизларимга кўп озор бериб қўйдим ва шу туфайли озорлар чекдим...

Ота-онам мен ҳақимда тилидан бол томиб гапиргани рост. Аммо... уларга муносиб фарзанд бўла оляпманми?.. Шундай оғир ўй-саволлар эзади дилни...

Баъзан ўйлаб қоламан: “Яхшиям, ота-онам сўз аҳлидан эмас, хайриятки, улар бир сўз дардида жон олиб-жон бериш азобидан узоқроқда... Бўлмаса, бадбинроқ кайфиятдаги шеърларимни ўқиб, “Нималар деяпсан ўзи?”, “Шунақа шоирлик керакми сенга?” дея мени сўзжодудан қутқармоқчи бўлишарди”.

Аниқ биламан, уларга шеърларимдан ҳам кўра бахтли бўлишим муҳимроқ. Шоир бўлмасам ҳам майли – яхши одам бўлсам, бахтим бутунлиги кифоя. Шу боис шоирликни ҳам саодатга айлантириш, яқинларим юзларини ёруғ қилиш йўлида ҳалакман...

2013 йил

Беҳзод Фазлиддин @Behzod_Fazliddin

Мана бу саҳифада ота-она ҳақида шеърлар берилган: https://www.facebook.com/behzod.fazliddin/posts/975077272612916

Behzod Fazliddin

20 Jun 2025 15:53

***
Энди қўлга олганда созим,
Оғзим куйди, синди овозим.
Аламига куйлашим лозим,
Такрор-такрор имкон сўрайман.

Ўз-ўзимга етарми кучим,
Ҳасрат ғамга бўлолмас ечим,
Гарчи мисли қиёмат ичим,
Хотиржам бир иймон сўрайман.

Кимнинг кайфи учун бу ўйин –
Мағлублари олдиндан тайин,
Ғолибларга ундан-да қийин,
Сотилмаган майдон сўрайман.

2009

© Беҳзод Фазлиддин @Behzod_Fazliddin

#Кутмаган_кунларим_кутган_кунларим

Behzod Fazliddin

19 Jun 2025 14:17

Сувдан қуруқ чиқиш учун бошқаларни сувга пишишдан ҳам тоймаймиз.

#Йўл_йўлакай #Таҳрирсиз_хаёллар

@Behzod_Fazliddin

Behzod Fazliddin

18 Jun 2025 16:42

Кечагина нур деб эланган жонлар
Бугун қоча бошлар Қуёшдан...

© Беҳзод Фазлиддин @Behzod_Fazliddin

Behzod Fazliddin

17 Jun 2025 14:29

***
Кўксим тўла оғриқ, бўғзим тўла оҳ,
Менинг ўзим – армон, ҳар сўзим – армон.
Энди жим яшамоқ умримга гуноҳ,
Ҳозир мен ёрилиб кетаман, Осмон!

Жоним – азобларга чўмилган япроқ,
Умрим – зулматларда адашган зиё.
Сен мендан юз чандон бахтлисан, Тупроқ,
Мен Сендан юз чандон бахтлиман, Дунё.

Юрак эслатади ваъдаларимни,
Ялов бўлмоқчийдим, ўт бўлмоқчийдим.
Тақдирга тўнкамай зардаларимни,
Ўзим бахт қизига юрт бўлмоқчийдим.

Сен берган имконлар беради далда,
Ҳали умидим кўп ғиротларимдан.
Синиб кетмайдими изғиринларда,
Уялиб қолмайин қанотларимдан...

Булбуллар жўр бўлиб мени қутлайди
Санъатингдан олган санъатларимга.
Ҳали овозимдан дунё титрайди,
Худойим, инсоф бер журъатларимга!

2002 йил

© Беҳзод Фазлиддин @Behzod_Fazliddin

#Сен_қачон_гуллайсан

Behzod Fazliddin

16 Jun 2025 06:23

Ғалати одамлар бор: аслида хизмат вазифаси, бурчини бажараётган бўлади-ю, ўзини бошқаларга ҳиммат-марҳамат кўрсатаётгандек тутади.

#Йўл_йўлакай #Таҳрирсиз_хаёллар

@Behzod_Fazliddin

Behzod Fazliddin

14 Jun 2025 14:25

Қуруқ номию ваҳимасидан бўлак ҳеч вақоси йўқ ташкилотлар пештоқига шиор таклиф этамиз: “Ҳаммамиз – бир гўрмиз!”

#Йўл_йўлакай #Таҳрирсиз_хаёллар

@Behzod_Fazliddin

Behzod Fazliddin

12 Jun 2025 08:01

Баъзилар ижод жараёнини қўзилаш мавсуми деб ўйлайди, чоғи, кунда-кунора хит қилади: “Янгисидан борми? Яна китоб чиқдими?”
Ўз ҳурматини билган ҳар қандай ижодкор бундай саволларни айланиб ўтади. “Адабий қўзилаш”ни қойиллатиб уддалаётган – пайдар-пай “китоб” чиқараётган олғирлар бундан мустасно, албатта.

#Йўл_йўлакай #Таҳрирсиз_хаёллар #Ижод_ва_эътиқод

@Behzod_Fazliddin

https://www.facebook.com/behzod.fazliddin/posts/372348999552416

Behzod Fazliddin

10 Jun 2025 15:32

Сўнгги сўзни бўлмас тузатиб...

***
Мазлум томонда бўл – Ҳақ томонда бўл.

© Беҳзод Фазлиддин @Behzod_Fazliddin

Behzod Fazliddin

09 Jun 2025 15:06

Бу дунёни сенга бераман,
Мен чин дунё сари бораман...

#Йўл_йўлакай #Таҳрирсиз_хаёллар

© Беҳзод Фазлиддин @Behzod_Fazliddin

Behzod Fazliddin

07 Jun 2025 12:54

#Кайфият #Лаҳзалар

***
Ёлғон, ёлғон, ёлғон ҳаммаси,
Фақат иймон, фақат иймон ҳақ.
Ҳар манзилда фано ҳамласи,
Аро йўлда жонинг муаллақ.

Қўллар қисқа, орзулар майиб,
Қонга тўймас армон ханжари.
Нечун олам борар торайиб
Ўсган сари, улғайган сари?

Парво қилма, фарёд айлама.
Кунларингни нурга қондиргин.
Чуқур кетма, ортиқ ўйлама,
Фақат ёнгин, фақат ёндиргин.

© Беҳзод Фазлиддин @Behzod_Fazliddin

#Кутмаган_кунларим_кутган_кунларим

Behzod Fazliddin

06 Jun 2025 07:34

#Кайфият

Ислом қандай гўзал, ҳайитларимиз қандай ажойиб!

Айниқса, бу кунлари инсоний муносабатлар янада чиройли тус олгани кўнгилни кўтаради: ҳамма бир-бирига яхши сўз айтган, улуғ кунларнинг ҳурмати учун ҳам имкон қадар номақбул гап-сўздан тийилган.

Яхши тилаклар қанотидаги беғараз табрикларни айтмайсизми! “Нимага йўқлаб қолди?”, “Йўқ бўлиб кетувди, тинчликмикан?” қабилидаги нохуш хаёллар, бадгумонлик ўрнини хотиржамлик ва бир-биридан розилик туйғуси эгаллаган.

Ахир қандай ҳам яхши-а бу кунлар!..

Ҳайитимиз муборак бўлсин, азизлар!

@Behzod_Fazliddin

Behzod Fazliddin

04 Jun 2025 14:30

– Nimani izlashdan charchamaysiz?

– Haqiqatni…

Behzod Fazliddin bilan “Hayot va xayol yo‘llari”da suhbat (2019-yil)

To‘liq video https://www.youtube.com/watch?v=dX9cZxIPlT8

@Behzod_Fazliddin