Behzod Fazliddin

12 Aug 2024 14:44

АГАР...

“Агар...” – шайтоннинг сўзи. Яъники, “Агар ундай бўлмаганида, бундай бўларди”, “Унақа қилмаганимда, бунақа қилардим” қабилидаги гаплар, ҳадисда таъкидланганидек, шайтон амалини очиб беради – васвасага солади, тақдирдан норози бўлишга ундайди. Аслида, фақат Аллоҳ хоҳлагани бўлади!

Шу ҳақиқатга тўлиқ таслим бўлсак-да, бандаликка бориб баъзан билиб-билмай “агар…”ларга берилиб қоласан киши:: “Агар ҳозир англаётганларимни аввалроқ тушуниб етганимда, ўтган йилларим бошқачароқ, яхшироқ кечармиди”, “Агар кимдир йўлга солганида, ҳаётим бундан-да чиройлироқ, ёруғроқ бўлармиди...”

Йўқ, йўлга бошлагувчи ҳам, энг яхшисини қалбимизга илҳом қилиб солгувчи ҳам Аллоҳ таоло!

Шукрки, олдинда бошқачароқ, яхшироқ, чиройлироқ яшаш имкони бор. Шундай экан, шайтоний “агар”ларга не ҳожат!

22.01.2015

#Кундаликдан_қайдлар
#Йўл_йўлакай  #Таҳрирсиз_хаёллар

@Behzod_Fazliddin

Behzod Fazliddin

11 Aug 2024 15:55

Фақат ош-овқатга навбатда турадиган, зиёфату маз-за-маз-зага ишқибоз тўдага айланиб қолмадикми?!

#Йўл_йўлакай #Таҳрирсиз_хаёллар

@Behzod_Fazliddin

Behzod Fazliddin

10 Aug 2024 16:05

Бу рўйи заминда не мавжудот бор
Инсондай азиз-у, инсондай хор-зор?!

#Йўл_йўлакай #Таҳрирсиз_хаёллар

@Behzod_Fazliddin

Behzod Fazliddin

09 Aug 2024 15:11

Шоирни урма, сўкма, шеърини буз. Ана ундан кейин кўрасан томошани...

#Йўл_йўлакай #Таҳрирсиз_хаёллар

@Behzod_Fazliddin

Behzod Fazliddin

08 Aug 2024 08:04

***
Ризқим тош бўлса ҳам, ҳалол эт – қанд қил,
Мени мендан қутқар, Ўзингга банд қил.
Тубанда юзимни йўқотаёздим,
Мени юрагимдан бошлаб баланд қил.

2007

© Беҳзод Фазлиддин @Behzod_Fazliddin

#Сен_қачон_гуллайсан

Behzod Fazliddin

06 Aug 2024 15:14

ҚЎШИҚ

Мен ҳаётни сийлов дебман,
Синов экан, синов экан.
Тангрим менга ишқ деб берган
Олов экан, олов экан.

Умримдан ҳам узун-узун
Армонларим, армонларим.
Ўзимдан ҳам маҳзун-маҳзун
Осмонларим, осмонларим.

Энди қачон ёндиради
Кўзларимнинг ёниқлари?
Юрагимни синдиради
Пешонамнинг синиқлари.

Дардларимни кўзимга қул
Ёшлар айтсин, ёшлар айтсин.
Бошим тегиб ёрилган ул
Тошлар айтсин, тошлар айтсин.

Мен бир қўшиқ куйлар бўлсам,
Кўнгил – ҳофиз, вужуд – машшоқ.
Ишқ ҳақида сўйлар бўлсам,
Ўзим ожиз, сўзим қашшоқ.

Дил, ўзингни ўтларга от,
Уйғон энди, уйғон энди.
Меним учун Ишқсиз ҳаёт
Ёлғон энди, ёлғон энди.

Майли, жоним азоб сўрсин,
Қилгин адо, қилгин адо.
Ўлар бўлсам, ишқ ўлдирсин,
Ишқ бер, Худо! Ишқ бер, Худо!

2002 йил

© Беҳзод Фазлиддин @Behzod_Fazliddin

#Тушларингдан_чиқиб_келдим

Behzod Fazliddin

05 Aug 2024 15:25

ОЙГА ТЕГМАНГ

Нима қилсам, Ойни бошқа йиғлатмайсиз.
Нима қилсам, тинч қўясиз осмонларни?
Нима қилсам, юлдузларга тош отмайсиз,
Нима қилсам, ўлдирмайсиз жайронларни?

Бирга Ҳақнинг айвонига боради, деб,
Қалдирғочлар қўлларимдан тутиб олган.
Ҳеч бўлмаса, паноҳ сўраб беради, деб,
Оҳулари оёғимга ётиб олган...

Ёмонларга ён бергим йўқ асли, лекин
Гиёҳларнинг номларидан қўл сўрайман.
Ҳали кечмас, ҳали яна севиш мумкин,
Мен гулларнинг кўнгли учун йўл сўрайман.

Нурга қайтинг – рўёларни кетказасиз,
Еру кўкнинг тинчи учун бошланди жанг.
Бу кетишда умрингизни ютқазасиз,
Ўзингизга шафқат қилинг – Ойга тегманг.

2005 йил

© Беҳзод Фазлиддин @Behzod_Fazliddin

#Сен_қачон_гуллайсан

Behzod Fazliddin

04 Aug 2024 08:05

ҲУКМ

Ишрат бозорида шаталоқ отган,
Ҳаргиз бу халқ ила Ҳаққа ёрмасман.
Саодатга элтар йўлни йўқотган...
Ҳаққа бормас бўлса, халққа бормасман!

© Беҳзод Фазлиддин @Behzod_Fazliddin

Behzod Fazliddin

03 Aug 2024 06:54

... Ҳали сендан кўнглим ўлмаган,
Бер ўзимга ўзимдан нажот.
Борадиган жойим қолмаган,
Мени бошқа ҳайдама, Ҳаёт!..

© Беҳзод Фазлиддин @Behzod_Fazliddin

#Сен_қачон_гуллайсан #Эски_дафтардан

Behzod Fazliddin

02 Aug 2024 05:48

ҚАҲРАМОН

Тонгдан эшигимни чертади ташвиш,
Ичкарига олиб кирмасам, кўнмас.
Ишда қандай ғалва қайраб турар тиш,
Оёқ тортмайди-ю, бормасам бўлмас.

Йўлга отланаман, нонушта чала,
Муҳими – гупиллаб турибди юрак.
Кутишга заррача йўқдир ҳафсала,
(Барибир, автобус кутишинг керак.)

Ишхонада ўша эски томоша,
Ҳар кимнинг айтгани юзаки ўлан.
Бахтиёр кўрсатгум ўзни ҳамиша
Мийиқдаги сохта табассум билан.

Ахир ёлғон бўлса, бўлар-да шунча,
Не-не алдовларга, балки, соқийман.
То устимдан кулиб қуёш ботгунча,
Нуқул эртак ўқиб, эртак тўқийман...

Нега ҳамма нарса инсонга соя?
Ҳар қулайлик дилни ғамга ўрайди.
Борсам, ўтганмисан рўйхатдан, дея
Бахт ҳам юзи совуқ, ҳужжат сўрайди.

Саволлар тушда ҳам тинч қўймас нечун?
Алаҳсираб тунни тонгга улайман.
Эртага эркинроқ яшашим учун
Тағин қанча жойга ўлпон тўлайман?

Яхши беркилганми жўмракнинг оғзи,
Қўшнининг уйига ўтмабдими сув?..
Кейин шундай ғалат хаёллар баҳси,
Ҳозир ҳаётимнинг бор маъноси – шу...

2010 йил

© Беҳзод Фазлиддин @Behzod_Fazliddin

#Кутмаган_кунларим_кутган_кунларим

Behzod Fazliddin

31 Jul 2024 15:50

СЎРОҚ

Дилни дилга йўлламай,
Йўлни йўлга уламай,
Ҳеч йўқса, бир гулламай,
Сўлиб кетаверайми?

Танда бор чўғим – шу, деб,
Бандалик чоғим – шу, деб,
Менинг бор-йўғим – шу, деб
Нолиб кетаверайми?

Кўкламлар нафасида,
Гуллаш арафасида
Тошларнинг орасида
Қолиб кетаверайми?

Қандай кунга кўндим-ай,
Ич-ичимдан синдим-ай,
Ёнингизда индамай
Ўлиб кетаверайми?

Нега жимсиз?!

2004

© Беҳзод Фазлиддин @Behzod_Fazliddin

#Сен_қачон_гуллайсан

Behzod Fazliddin

30 Jul 2024 07:52

катта-КИЧИК

Ҳаёт гулларига энг мард харидор,
Бўлса ўзларига суюк юклари.
Тошларни уйғотган нурдай хокисор
Кичкина қалбларнинг буюкликлари.

Юзларин Қуёшга тескари бурар,
Булут кўзларидан кетмайди нари.
Мудом ҳаётингни эговлаб турар
Катта одамларнинг майдаликлари.

2007

© Беҳзод Фазлиддин @Behzod_Fazliddin

Behzod Fazliddin

29 Jul 2024 09:34

“Sen qachon gullaysan” kitobiga soʻzboshi (2008)

TOZA BIR SOʻZ

Behzodning ijodini koʻp yillardan buyon kuzatib kelaman. Uning oʻquvchilik yillari bitgan mashqlari kiritilgan dastlabki ikki kitobchasi bilan ham tanishman. Uchinchi kitobi esa menda yosh shoirning kelajagiga umid, ishonch uygʻotgan.

Mazkur “Onamning koʻngliga ketamiz” toʻplamida Behzodning, nazarimda, ijodga masʼuliyat bilan yondashayotgani, sheʼriyatga taqdir deb qarashga moyilligi sezilib turadi. Uning ona, Vatan, tabiat, yoshlik, sevgi-muhabbat kabi turli mavzulardagi sheʼrlari navqiron ijodkorning tinmay izlanayotgani, jiddiy mehnat qilayotganidan darak berardi.

“Sen qachon gullaysan” – shoirning toʻrtinchi kitobidir. Endi Behzod Fazliddin ijodiga adabiyotning rasmona talablari bilan yondashishga haqlimiz.

Kitobga kiritilgan sheʼrlarda hayotga ochiq koʻz bilan tiyrak boqayotgan hissiyotchan, koʻngli bezovta, fikrlaydigan, oʻz-oʻzini, zamondoshlarini, murakkab dunyoni bot-bot savolga tutib turadigan lirik qahramon qiyofasi ancha aniq namoyon boʻladi.

Behzod Fazliddin sheʼr “yasash”dan qochishga, har bir soʻzni oʻz oʻrnida ishlatishga intiladi. U qalbidan kechayotgan turfa tuygʻularini, voqelik taassurotlarini ohorli tashbehlar, maʼnodor ramzlar orqali samimiy ifodalaydi. Umuman, uning eng yaxshi sheʼrlarida hayotning real tasvirlari aks etmoqda.

Behzod tanqidni koʻtaradigan, toʻgʻri gapni tan oladigan yoshlardan. Binobarin, istardikki, u hozir keng “urf”ga kirgan fikr nazmga solingan namunalar yozishdan uzoq yursa...

Sheʼriyatda toza bir Soʻz aytishni niyat qilgan shoirning qoʻlingizdagi kitobi qalbingizni insoniy, rost tuygʻular bilan boyitsa, demak, izlanishlari besamar ketmabdi.

Mahmud SAʼDIY

2008-yil

P.S. Ko‘pchilik “Sen qachon gullaysan”ni so‘raydi haligacha. Ushbu kitob 2008-yil chop etilgan va hozir do‘konlarda yo‘q. Ko‘pdan buyon yangilangan, qayta nashr haqida o‘ylab yuribmiz va shuning harakatidamiz. Ehtimol, lotin yozuvida.

#Sen_qachon_gullaysan @Behzod_Fazliddin

Behzod Fazliddin

28 Jul 2024 07:03

Этагидан тутай деб борсам,
Муршидимнинг ўзи пирга зор...

© Беҳзод Фазлиддин @Behzod_Fazliddin

#Кутмаган_кунларим_кутган_кунларим

Behzod Fazliddin

27 Jul 2024 08:46

CHIN SEVISH

Koʻnglimni kimlarga bermadim,
Topganim gard boʻldi, dard boʻldi.
Men suyib roʻshnolik koʻrmadim,
Sevilib yengganlar mard boʻldi.

Baxt vaʼda ayladi xoblarim,
Tush koʻrdim oylarning qizini.
Sogʻinib yashadi lablarim
Turlangan gullarning yuzini...

Gullarga eng goʻzal rang – vafo,
Bas, rangsiz gullarni sevmayman.
Istarim – ilohiy bir ziyo,
Oʻzgaga koʻnglimni bermayman.

Chin sevmoq poklanmoq emasmi?
Men suyib poklanib boraman.
Sevmasa sevmasin bandasi,
Koʻnglimni Allohga beraman,
Koʻnglimni Allohga beraman!

2002-yil, iyul

© Behzod Fazliddin @Behzod_Fazliddin

#Kayfiyat  #Eski_daftardan

Behzod Fazliddin

12 Aug 2024 07:48

Онамнинг бағри қон у ерда,
Мен бунда музқаймоқ ялайман...

© Беҳзод Фазлиддин @Behzod_Fazliddin

#Эски_дафтардан #Сен_қачон_гуллайсан

Behzod Fazliddin

11 Aug 2024 09:05

#Сиз_сўраган_шеър

ЎН САККИЗ ЁШ РОЗЛАРИ

Бугун ўн саккизга тўлади қуёш,
Ўн саккизда учар юлдузнинг ҳуши.
Ойнинг қароғида ўн саккиз қарош,
Ўн саккизга тўлди кўнглимнинг қуши.

Лолажон, унутма менинг номимни,
Мен кўҳна дунёни этяпман сайр.
Кўтариб ўтяпти йиллар жонимни,
Болалик, кўзингдан кетяпман, хайр.

Ана, учиб кетди менинг умримдан
Ўн саккизта турна – ўн саккиз азоб.
Балки, ҳисобимга ёзилди бирдан
Ўн саккизта гуноҳ, ўн саккиз савоб.

Жонимни қоғозга едиравердим,
Айтмоқ истайвердим тирик сўзимни.
Ўн саккиз йил аро қидиравердим,
Зора, ўн саккизда топсам ўзимни...

2001 йил 20 сентябрь

© Беҳзод Фазлиддин @Behzod_Fazliddin

#Онамнинг_кўнглига_кетамиз китобидан (2003)

#Кайфият  #Эски_дафтардан

Behzod Fazliddin

10 Aug 2024 09:32

Ҳозирги диний уламо орасида бадиий адабиётни яхши тушунадиган кимларни биласиз?

Замонавий адабиёт аҳлидан диний илмга эга кимларни айта оласиз?

Умуман, дин ва адабиёт муносабатларига қандай қарайсиз?

Шу бўйича фикр-мулоҳазалар бўлса, йўлланг.

@Behzod_Fazliddin_bot

Behzod Fazliddin

08 Aug 2024 13:12

Тил жозибаси ТВда йўқ. Лекин бошқа ўргатувчи ҳам йўқ: китобларнинг тиражи паст, расмий матбуот нашрлари адади жуда кам, каттароқ тиражда чиқаётган хусусий газеталарнинг ўзига тил маданияти етиб бормаган.

Туман мухбирлар лашкари “Мулла билганини ўқийди”га амал қилиб, оғизларига келганини гапириб, ёзиб ётибдилар. Ҳай, инсоф борми, сизлар ҳам бир нарсани ўқиганмисизлар, деб сўрайдиган одам йўқ. Ясама сўзлар, ғализ иборалар ғиж-биж ачиб ётибди, уларни битталаб санаб чиқишга умр етмайди.

Баъзан энди фойдаси йўқмикан, шундай кетаверадими, деб кўнглинг чўкиб кетади.

Кенг тарқалган нодонлик жорий донолик бўлиб қоляпти...

Аҳмад Аъзам

#Иқтибос #Тил_тақдири

@Behzod_Fazliddin

Behzod Fazliddin

07 Aug 2024 07:45

#Иқтибос

– Қадимги Рим файласуфи Сенека “Оломонга қизиқ бўлган ҳамма нарсадан қоч!” дейди. Ўзимча мен шу гапга амал қилишга интиламан ва оломоннинг қонини қиздирадиган ҳирс ҳамда майлларни ҳозир осон пайқайман. Энг ёмони, бугун зиёли дейиш ҳам нисбий тушунча бўлиб қолди. Чунки уларнинг аксарияти айнан оломон вакилидир. Адабиёт, санъат, телевидение, радио – ҳамма-ҳаммасида оломон нигоҳи, оломон ҳиссиёти, оломон овози ва маслаги устунликка талпинаётир. Бунга қарши дадил курашилмаса, маънавият, маданият, комиллик тўғрисидаги фикрларнинг бора-бора бир чақалик ҳам аҳамияти қолмайди...

Бир ҳинд донишманди “Инсоният саратон (рак) касаллигига даво топиши мумкин, аммо саёзликка даво топиши душвор”, дейди. Чиндан ҳам, саёзлик давосиз бир хасталикдир. Сиз таърифлаган ёшларнинг кўпчилиги саёзликнинг “жужуқ”ларидир...

Иброҳим Ҳаққул билан суҳбатдан.

Батафсил: https://www.facebook.com/100003319579634/posts/364124610374855/

@Behzod_Fazliddin

Behzod Fazliddin

06 Aug 2024 07:30

Қўрқоқликдан кўра номардлик аянчлироқдир.

***
Бошқаларни алдаётган киши, аввало, ўзини алдаётган бўлади.

#Йўл_йўлакай #Таҳрирсиз_хаёллар

@Behzod_Fazliddin

Behzod Fazliddin

05 Aug 2024 07:05

“Сўз йўлини танлаб тўғри қилдимми?..” дея кўп ўйлайман.
Сўз аҳли бу қадар хору зор бўлишини аввалроқ билганимда бошқа йўлдан кетган бўлармидим...
Аммо озми-кўпми йўл юриб қўйдим. Энди ўзга қандай йўл излай – ортга қайтиш йўқ!

#Йўл_йўлакай #Таҳрирсиз_хаёллар #Эски_дардлар

@Behzod_Fazliddin

Behzod Fazliddin

03 Aug 2024 15:22

Нимадир сабаб билан ўз даврининг модасига кириб қолган одамлар бўлади.
Улар кўп вақт ўтмай эскириб, урфдан қоладилар, ўз-ўзидан йўқ бўлиб кетадилар ва унутиладилар.

#Йўл_йўлакай #Таҳрирсиз_хаёллар

@Behzod_Fazliddin

Behzod Fazliddin

02 Aug 2024 15:38

Мактабда, лицей ва университетда ҳам чет тили сифатида немис (олмон) тилини ўрганганман. Анча йиллар кимлар учун “Гитлер (аслида Ҳитлер) тили”, кимларга донишманд Гёте забони бўлган немисчани иштиёқ билан ўзлаштирдим. Немис адабиётидан бирмунча таржималар қилишга уриндим. Ҳайнрих Ҳайнедан илк таржимам ҳаваскорона машқ эди.

Ҳатто ўзимча немис тилида асарлар ёзмоқчи бўлдим-у (ёшлик орзу-ҳаваслари-да энди), маълум муддат уни “унутиб” туришга тўғри келди. Анча эсимдан чиқиб боряпти-ёв бу тил. Баҳонасифат сабаблар кўп... (Cендан фойдалана олмаётганим учун мени кечир, Deutsch! Ҳали сенга қайтарим, кўп гаплар айтарим бор!)

Магистратурада оз-моз инглизчани “чўқилаган” бўлдим-у, кейин ўрганишга жиддийроқ киришдим. Бироқ орада бу тилни ҳам пича “унутиб” қўйдим. Ҳа-я, бир муддат туркчага ҳам қизиқиб кўрдим...

Кейинги пайтлари инглиз тилини маҳкамроқ тутишга ҳаракат қиляпман. Баъзи фикрлар ва шеърий сатрларимни инглизчада ҳам бериб боргим келади-ю, ҳозирча “English”им бадиий ижод учун анча ғариб, чоғи...

Шу ўринда ғайрати қайнаб турган ука-сингилларимизга мурожаат: аввало, она тилимизни, кейин албатта бирор чет тилини қунт ва ҳафсала билан ўрганинг. Айниқса, ижодкорлар учун бу жуда муҳим.

Лекин тил билиш бу ҳали яхши фикрлаш дегани эмаслигини ҳам унутманг. Энг муҳими, чет тилини ўрганиш она тилини “ўгай” қилиш эвазига бўлмаслиги керак.

Бадиий таржима масаласида ҳам кўп гаплар бор-у, бу энди – алоҳида мавзу. Бирор хорижий тилни аъло даражада билса-да, ўз тили – ўзбекчани яхши билмайдиган, сўзни ҳис қилмайдиган таржимонларга қараб қолгандан кўра шоир-ёзувчиларнинг ўзлари тил ўрганиб, таржимага астойдил киришишлари керак. Қолаверса, эзгу ният билан қалам тебратаётган ҳар бир ижодкор халқаро адабий-маданий алоқаларни мустаҳкамлашга имкон қадар ҳисса қўшиш пайида бўлмоғи лозим.

Яна бир гап: ўзбек миллатдошларим она тилимиз билан бирга етарли даражада араб, инглиз, рус тилларини билиши зарур, деб ўйлайман (яна бошқа чет тилларини билса, нур устига нур). Насиб қилса, бу ҳақдаги фикр-мулоҳазаларни алоҳида ёзарман.

@Behzod_Fazliddin

#Йўл_йўлакай
#Сизга_гапим_бор #Бу_ҳам_муҳим

Behzod Fazliddin

01 Aug 2024 08:11

Беҳаловат одам – бетартиб одам.

***
Ақлдан ташқаридаги куч-қудрат ожизликдир.

#Йўл_йўлакай  #Таҳрирсиз_хаёллар

@Behzod_Fazliddin

Behzod Fazliddin

31 Jul 2024 10:49

Токи ўз кучимиз, салоҳият ва имкониятимизни тўғри йўналтирмай, замон ройишини муносиб баҳолай олмас эканмиз, ҳар жойда мардикор бўлиб юраверамиз.

#Йўл_йўлакай #Таҳрирсиз_хаёллар

@Behzod_Fazliddin

Behzod Fazliddin

29 Jul 2024 16:09

Юзни тўсибсан-у, бу наҳс дунёдан
Беркита билмабсан суқ кўзларингни...

#Йўл_йўлакай #Таҳрирсиз_хаёллар

@Behzod_Fazliddin

Behzod Fazliddin

28 Jul 2024 16:26

Шундай дориламон замонда муҳтожликдан нонни тежаб ейдиганларни кўрганмиз. Сиз эса “Учинчи Ренессанс” ҳақида сайраб тинмайсиз...

#Йўл_йўлакай #Таҳрирсиз_хаёллар

@Behzod_Fazliddin

Behzod Fazliddin

27 Jul 2024 13:57

Китоб сўраб мурожаат қилаётганлар диққатига!

Беҳзод Фазлиддин китоблари ҳозир дўконларда йўқ. Янги китоблар чиқса, албатта хабар берамиз.

Қайта чоп этилган аввалги китобларни @Behzod_Fazliddin_bot орқали буюртма бериб, олиш мумкин.

Behzod Fazliddin

26 Jul 2024 16:35

Тавба, дейсан-у, бундай муҳитда фарзанд улғайтиргани ҳам қўрқасан, деган экан аччиқ устида бир ғариби бечора.

#Йўл_йўлакай #Таҳрирсиз_хаёллар

@Behzod_Fazliddin