داود عبدی (Taymaz)

21 December 2025 15:42

چیلله آدی‌نین آنلامی [۲]

ائله قازاق تۆرک‌لری ده ایل سؤزۆنه «چیل» دئییرلر و یئنی ایلین باشلانیشینا چیلله دئییرلر [ گۆنش‌ین یئنی‌دن دوْغولماسینا چیلله دئییلر ].
سومئرلر و اسکی تۆرک‌لر راز و نیاز اۆچۆن شیلله سؤزۆنۆ ایشله‌درمیشلر
«شیلله؛ چیلله»
بو گئجه تۆرک‌لرین چیل تانریچاسی اۆچۆن توْنقال‌لار قالانیب،نذیرلر وئریلیب، پای‌لار داغیدیلار و صاباحیسی گۆن، گۆنش‌ین غلبه‌سی اۆچۆن سیرفالار سالینیب، دوعالار اوْخونار، گۆنش غالیب گلیب[دده‌قوْرقوددا اسارتدن قورتولار]، ناردوْغولار(نار؛ اوْد) ناردوْغان بایرامی قوتلانار.
پس چیلله سؤزۆ، چیل تانریچاسی اۆچۆن ائدیلن راز و نیاز و گۆنش‌ین قازانماسی اۆچۆن اوْخونان گئجه‌یه دئییلیر.
تاتارلار ایچره، چئل‌آنا یئل تانریسی‌نین آدی‌دیر
خاکاس‌لار خبیث روحلارا چیل دئییرلر، یئل‌ین اسمه‌سی‌ایله بیرگه اینسانلارا توْخانیب، اوْنلاری آلازدیرار.
چیلله‌ده یئل یئنی‌دن اسیب و یئنی‌دن دوْغولما و ساغلاملاشماق اوْرتایا چیخیر.
بۆتۆنلۆکجه تۆرک اساطیرینده پیس روحلار اوْلدوقلاری یئرده یئنی‌دن دوْغولما و یئنی یاشام بحثلری اوْرتایا چیخیر و قیرمیز بوْیاسی قازانج، اوغور و یئنی‌دن دوْغولما رنگی‌دیر، اوْ اۆزدن قیرمیز رنگلری اوْلان مئیوه‌لر
«نار، قیرمیزی آلما، اییده، قیزاردیریلمیش بوغدالار و قوْوورغالار، قارپیز و...» بو گئجه نذیر اۆچۆن آچیلان سیرفالارین بزه‌مه‌سینده اؤنم داشیییرلار.

1.ناردوْغان بایرامی آدلی یازی‌‌سینا باخین
2. قیش فصلی‌نین آدلاری یازیسینا باخین

بو یازی‌ اۆچۆن واژگان اساطیری تورکی آخاغینین یازی‌لاریندان چوْخ فایدالانمیشام.

داودعبدی
@davud_ebdi

۱۴۰۴-جی ایلین ناردوْغان بایرامی

داود عبدی (Taymaz)

18 December 2025 17:35

سؤز قوْنوسو وطن‌دیرسه قالانینی تاپشیر یئله

بوگۆن آتام‌لا بیرلیکده آذربایجان تیراختورویلا تئهران‌دان گلن تیمین اوْیونونا باخیردیق، اوْیونون سوْنوندا گؤزلری دوْلموش حالدا، داوود بوگۆن عؤمرۆمه یازیلسین دئییب گؤز یاشلارینی دوردورا بیلمه‌دی.
دئدیم آتا فوتبال‌دیر دا قادان آلیم اؤزۆنۆ چوْخ سینسیتمه، تیترک سس‌له دئدی هه فوتبال‌ایدی، تکجه توْپ اوْینانماییردی، بیر بئله ده حاققیمیزی یئمک اوْلار آخی...
بلکه ۱۳۲۵-جی ایل همن بوگۆنلر تئهران‌دان گلن قوْشون آذربایجانین میللی حوکومتی هابئله بو خالقین فدایی‌لرین آیاق‌لاری آلتیندا ازه‌رک سئوینیردیلر
آنجاق آذربایجان میللتی، بوگۆن تکجه آدی فوتبال اوْلان ساواشی قازاناراق، تئهراندان گلن‌لری الی بوْش یوْلا سالدی....
و بو ظفر ائوده اوْتورانلاردان چوْخ تبریزین سۆمۆک‌لری سیزلادان سوْیوغو ایچره داغ‌لار آراسیندا آذربایجان وار اوْلسون، تۆرک دیلینده مدرسه و... باغیران گنج و قئیرتلی قیزلاریمیزلا، ایگید اوْغلان‌لاریمیزین عؤمۆرلرینه یازیلدی.
بونو دا اونوتمایاق بو میللت بالالارینی ساری‌قامیش‌لا آللاه‌و اکبر داغ‌لاریندا وارلیق‌لاری و تۆرک‌لۆکلرینی قوْروماق اۆچۆن قوربان وئریب، تبریزین سوْیوغو نه‌دیر کی...
مین بئله ظفرلریمیز اوْلسون

داودعبدی
@davud_ebdi

داود عبدی (Taymaz)

12 December 2025 10:34

یاسی بایرامدان چوْخ سئون میللت

یاشادیغیمیز اؤلکه ایچره، سوْن ایللرین تبلیغاتی یۆکۆ هابئله میللتین سییاسی، ایقتیصادی و توْپلومسال چتین‌لیک‌لرینه گؤره، آغلاماق، باشا دؤیمک و یاس توتماغا ساری آخیش، سئوینج‌له شادلیقدان هابئله توْی - بایرامدان داها چوْخالیب و چوْخالماقدا.
ائله بو باخیش و آخیشی تیراختور اوْیونلاریندا دا گؤرمک اوْلور، ایستادییومو شاخسئی مئیدانی‌لا ده‌ییشیک سالیب، میللی شوعارلار گۆنۆ گۆنۆندن اؤز یئرلرینی الدن وئرمکده‌دیرلر.
اسکی‌دن ده بئله‌ایدی و تبریزده عاشورا گۆنۆ، عاشورا گۆنۆنۆن اوْلای‌لارینا شاخسئی گئدیب باشلارینا دؤین میللت‌ین گؤزلری اؤنۆنده، قان سوْران روسلار؛ سککیز نفر مشروطه موجاهیدینی [ ثقه‌الاسلام، علی میسیونون قدیر و حسن آدلی اوْغلان‌لاری، صادق‌الملک،محمدعلی قافقازچی، شئیخ سلیم، محمد قولوخان، ضیاء العلماء ] دار آغاجیندان آساراق، هئچ کیمدن سس چیخمادی.
بو سایاق اوْلایلار و میللت ایچره یاس‌لار و آغلاماق تؤرن‌لرینه آرتان ماراق، باعیث اوْلور شن‌لیک تؤرن‌لریمیزله بایرام‌لاریمیز اؤز یئرلرینی الدن وئریب ماتم مجلیس‌لرینه چئوریلسین‌لر.
ائله همن ماراق اساسدا، میللی بایرامیمیز اوْلان ۲۱ آذر بایرامینی دا قانلی بایرام و یا میللی حوکومتین ییخیلدیغی گۆن کیمی یاد ائدن‌لرین ساییسی بو گۆنۆ عزیزله‌ین‌لردن چوْخدور.
حالبوکی تاریخی سندلره باخدیغیمیزدا تبریز، آذر آیی‌نین ۲۲ - جی گۆنۆ ایشقال اوْلونوب و میللی حوکومتین ییخیلدیغی گۆن آذرین ۲۱- ی دییل.
بو قوْنونون اؤنم داشیدیغی اۆچۆن قاباق ایل‌لر یازدیغیم بایرامیمیزی یاسا چئویرمک ایسته‌ین‌لر یازی‌سینی بیر داها آرتیریب، پایلاشیرام.

۲۱ ـ آذر بایرامی، خالقیمیزین اؤزگۆرلوک و قورتولوش گۆنودور، آنجاق بو خوش گۆنون شیرین دادینی آجی زهره چئویرمک ایسته‌ینلر ده وار،
بلکه آد دا آذربایجانی قورتارماق اۆچون گلن کین اوْردوسو، او گۆنلر اللریندن گلن هئچ بیر جینایتی اسیرگه‌مه‌دیلر، آنجاق میللی حوکومتین هانسی گۆن ییخیلماغی داها آرتیق اؤنم داشیییر.
او قانلی گۆنلرین تاریخینی قلمه آلانلارین بیر سیراسی چالیشیبلار میللی حوکومتین قورولوش و ییخیلماق گۆنلری‌نین هر ایکیسی‌سینی ده  آذر آیی‌نین ۲۱‌ـ‌جی گۆنو، قلمه آلسینلار آنجاق تاریخی سندلره باخدیغیمیزدا بو برابرسیز ساواشدا، آذر آیی‌نین ۱۶ ـ جی گۆنوندن ایران ارتشی زنگاندان مییانا شهرینه ساری، یوْلا چیخیر، بو گۆنلر پیشه‌وری تبریزده اوْدلو و ایتی سؤزلرله میللتی بؤیوک ساواش و اؤزگورلۆک بایراقلارینی قوْروماغا چالیشارکن، ژنرال پناهیان عسگری گۆجون چوخونو، تیکان‌تپه، هوْلاسو، قوشاچای، ماراغا جبهه‌سینه توپلایاراق، بؤیوک بیر یانلیش ایش گؤرور، ژنرال آذر‌ـ‌ین دئدیگی کیمی هوجوم مییانا جبهه‌سیندن باشلانیر و قافلانتی داغلاری، فدایی‌لرین سوْن سنگری اوْلاراق هر داشی میللت فدایی‌لرین قیزیل قانی‌لا سوواریلیر.
غولام یحیی، عسگرلری یاخشی دؤیوشدوره بیلمه‌یه‌رک ۱۸‌ـ‌جی گۆندن باشلایان چاتیشمالار سوْنوجوندا، ۲۰‌ـ‌جی گۆن قافلانتی اوجالیق‌لارینی قوْرویا بیلمه‌ییرلر و قافلانتی داغلاری، اوچاقلارین آغیر بومباردیمان سوْنوجوندا پهلوی ‌اوردوسونون الینه دۆشور.
جانلاریندان کئچن فدایی‌لرین سوْن چاره‌نی کؤرپولری پارتلاتماق[قیز کؤرپوسو و.. ‌] و یوْللاری باغلاماقدا گؤرورلر، بو ایشلری‌ایله تبریز و شهرلرده اولان خالقیمیزا کؤچمک اۆچون آرتیق واخت قازاندیریرلار، آنجاق ایکی‌جه‌لیک آذربایجان میللی حوکومتینه ان آغیر ضربه‌نی ووردو، آذرین ۲۰‌ـ‌جی گۆنونون گئجه‌سیندن گیزلی تئلقیرافلار تئهرانا یوللانیلماغا باشلانارکن، ۲۱‌ـ‌جی گۆن ایران اوردوسو مییانا شهرینه یاخینلاشیر.
قوام ۲۱‌ـ‌جی گۆن شبیستری و جاوید‌ـ‌ین تئلقیرافلارینا جاواب وئره‌رک: سیلاح‌لارین یئره بوراخیلماسیندان سئوینه‌رک، ۱۵۰۰۰ خبرسیز فدایی‌‌ایله ماراغا، قوشاچای، تیکان‌تپه جبهه‌سینده دیره‌نیب شوروی‌یه قاچمایان افسرلرین باشلارینا اود یاغدیریلمانین امرینی وئریر،
آنجاق ۲۱‌ـ‌جی گۆن ارتجاع اوْردوسو بوستان‌آوادا دایاناراق، هله میللی حوکومتین ییخیلمامادیغی بللی اولور،
رعیته ظۆلم ائتمکدن اللری قیسادیلمیش خان‌لارین الی چوْماقلی‌لاری،گنج فدایی‌لری وحشی‌جه‌سینه اؤلدوره‌رک تاریخین ان قانلی صفحه‌لرینه اؤز چیرکین آدلارینی یازدیریرلار.
آنجاق سندلره باخدیغیمیزدا
تبریز ۲۲ ـ آذرده شاه‌اوْردوسونون الینه کئچیر[از زندان رضاشاه تا صدر فرقه‌ دموکرات آذربایجان، علی مرادی‌مراغه‌ای، نشر اوحدی،ص: ۴۵۸] هابئله آذربایجانین شهرلری‌نین بیر چوخوندا اؤزل‌لیکله: ساراب، قوشاچای، اردبیل، آستارا و... کیمی شهرلرده آذر آیی‌نین ۲۶ سی و حتی ۲۷ـ‌جی گۆنونه کیمی دایانات و موقاویمت گؤزه گؤرونوردو و ۲۱ آذر بایرامی فیرقه‌نین و میللی حوکومتین قورولوش گۆنو کیمی عزیزلنمه‌‌لی‌ و ۲۲‌ـ آذر(تبریزین ایشقال گۆنو) میللی حوکومتین ییخیلما گۆنو کیمی قلمه آلینمالی‌دیر.

داودعبدی
@davud_ebdi

۱۴۰۴/۹/۲۱

داود عبدی (Taymaz)

01 December 2025 22:48

بو آت، بو دا میدان

نئچه ایل بوندان قاباق شهرداشلی‌لاریمیزین بیری منی گؤرۆب دئدی اوْلورسا بیر نئچه دقیقه‌لیک نقدلریمی ائشیت
سئوه - سئوه قوْلاق‌لاریمی سؤزلرینه تاپشیردیم
آنجاق سؤزلرینده، نقددن چوْخ ایراد توتماق وارایدی.
نم فیلان یازی‌دا فیلان کلمه‌نین س حرفی دۆشۆب و...
یا فیلان یازینی بیه‌نمه‌دیم
یا یازدیق‌لارینی کاش فارسجا یازاسان
و فیلان یازینی منیم نظریمه بئله یازمالی‌ایدین و....
سؤزلرینی ائشیدیب ساغ‌اوْل دئییب، آیریلدیم.
اوْ دانیشیغین آردیندان منه بیر پارا اؤزل سوْرونلار یاراندی، و بیر نئچه آی فیکریم داغیناق اوْلدوغو اۆچۆن هئچ نه یازا بیلمه‌دیم.
نئچه واقت سوْنرا یئنی‌دن منی گؤرۆب دئدی آی قارداش گؤرۆرم نقدلریم سنی کۆسدۆرۆب یازماییرسان داها.
گۆلر اۆزله دئدیم بی، من تکجه سیز بیر نفر اۆچۆن یازماییردیم کی، سیزین بیه‌نیب بیه‌نمه‌دییینیز اۆچۆن یازماغی قیراغا قوْیام، موخاطب‌لریمین ایچینده بیر سیرالاری یازدیقلاریمی چوْخ سئویرلر، چوْخ‌لاری دا هئچ اوْخوماییرلار....
آنجاق بیز یوْلوموزا داوام وئریریک.
- نئچه دؤنه ده ایسته‌دیم دئیه‌م کاش بوگۆنه کیمی سیز ده تکجه بیر خط آنادیلیمیزده، آنادیلیمیز و میللی مساله‌لریمیز اۆچۆن یازی یازمیش اوْلاردینیز و من ده دۆزگۆن و اۆرک‌لره یاتان یازی‌لار یازماغی سیزدن اؤیره‌نردیم آنجاق بحثی اوزالتمادیم.
ایندی ده تبریزده سایین صدیق جمالی‌ و تیمی‌نین گئجه - گۆندۆز چالیشمالاری اساسدا، ایشیق اۆزۆ گؤرن کوْراوْغلو تاماشاسینی نقده توتان‌لارین ایچینده، اؤزگه‌دن چوْخ اؤزۆمۆزۆنکۆلر گؤرۆنمکده‌دیرلر.
کیمیسی یاساق دیل‌لی بو میللتین یؤنتمن‌لریندن دۆنیانین تانینمیش تئاترلاری سوییه‌سینده تاماشالار گؤزله‌ییرلر
کیمیسی تبریزین سالوْن‌لاریندا
آرتور میلئرین؛ بیر ساتیجی‌نین اؤلۆمۆ‌ یا آنتوان چئخوْف‌ون گیلانار باغی
یا هئنریک ایبسئن‌ین قوْلچاق‌لارین ائوی
یا لوْرئن هانسبئری‌نین گۆن ائوینده‌کی کیشمیش تاماشاسینی
یا دا هملئت و رومئو - ژولیئت کیمی اثرلری صحنه‌ده گؤرمک ایسته‌ییرلر.
بلی اوْنلار دا حاقلی‌دیرلار
بو میللت دۆنیانین ان بؤیۆک و گؤزل تاماشالارینی حاق ائدیر، آنجاق بو گۆن هرنه‌یی نقده چکن‌لره تکجه بیر سؤزۆم وار؛
ات گتیریبسینیز کۆفته ایسته‌ییرسینیز؟
توتاق سایین صدیق‌جمالی‌نین اثرلری اصلا سیز باخدیغینیز فوق هۆنری جنبه‌لرده یئر آلماسین، آنجاق ائله همن شخصین بۆتۆن هده - قوْرخولارا رغما، بۆتۆن یوْلونا آتیلان داش‌لارا رغما،  جسارتی، شهامتی و قورد‌اۆرکلی‌لیگی همن سیزلر بینمه‌دییینیز و هۆنری باخیمدان ده‌یر وئرمه‌دییینیز اثرلری صحنه‌یه چیخارتماغی‌لا بو میللتین وارلیغینی قوْروماقدا بؤیۆک آددیم‌لار آتیلیر.
سیز عاغیل‌لی‌لار اوْتوروب هله ایکی - ایکی دؤرد ائتمکده‌ایکن، صدیق‌جمالی کوْراوْغلو‌سونون دلی‌لری‌ایله بیرلیکده بو میللتین اۆرک‌لرینی قازاناراق، هر آخشام نئچه یۆز نفرین گؤزلریندن سئوینج یاش‌لارینی آخدیرماغی و بو دیلین - بو یوردون گرچک سئون‌لری‌نین آلقیشینی قازانماقدا‌دیر.
توتاق کی اثری‌نین آدی تئاتر اوْلماسین، نه بیلیم سیز دئین کیمی؛ شور اوْلسون، هیجان اوْلسون.
کاش سیز تئاتردان باشلاری چیخان‌لار و هرنه‌یه هۆنری باخیمدان باخان‌لار دا بیر هۆنری اثر یازیب - یارالداردینیز اوْندان سوْنرا نقد آدلی قیلینج‌لارینیزی قینیندان ائشیگه چیخاردیب، یئر - گۆیۆ، کوْراوْغلویلا، هر کسی نقده چکردیز.
بونو دا دئییم سایین یعقوب صدیق‌جمالی‌نی یاخیندان تانیماییرام و تکجه ستتارخان تماشاسیندا ( یا سیزلر دئمیشکن شوْ دا ) اوزاقدان گؤرمۆشم و بو یازینی یازماقدان هئچ بیر چیخار دا اومماییرام، تکجه بونو ایسته‌دیم یئتیرم، گؤزل و هۆنری اثرلر گؤرمک ایسته‌ییرسینیز نقد و داش دیغیرلاتماق یئرینه، الدن توتوب، باجاریغینیز و ساوادینیزا دایاناراق، یۆکسک سوییه‌ده اثرلر حاضیرلاییب، بو میللته سونون، بو آت، بو دا مئیدان.
و نییاران دا قالمایین؛
ائل اؤز یاخشینی پیسدن سئچه‌جک.
آنجاق هله بوگۆن صحنه‌ده اوْلان و جنگی‌لری سسلندیرن هر بیر تاماشامیزا، نه بیلیم تئاتریمیزا، شو موزا، آرخا دوروب، وارلیغیمیزی قوْرویان هرکسی آلقیشلامالی‌ییق.

داودعبدی
@davud_ebdi

داود عبدی (Taymaz)

08 November 2025 09:59

هر آن تام‌آرزی‌لادیغیم گؤزیاشلاری

۱۳۹۹ - جو ایل، یکشنبه، قیروْو آیی‌نین (آبانین) ۱۸ - جی گۆنۆ، ایبراهیما زنگ آچیرام، تیترک و نییاران سس‌له قاغا نه خبر دئییب سوسور، چوْخ چتین‌لیک‌له قاغا قورتولدو، شوْشا بیزیمدیر دئییب داها سوسورام
۱۲ - ۱۳ دقیقه‌لیک اوْ تئلفون دانیشیغیندا، تکجه آغلاماق سسی گلیر منیم قولاغیما و مندن ایبراهیمین قولاغینا....
وطن سن نه شیرین شئی‌ایمیش‌سن کی، آزادلیق خبرین‌له تؤکۆلن گؤزیاشلارلا وورولان هؤنکۆرتۆلذ هرگۆن، هرثانییه یئنی‌دن آرزی ائدیلیر.

داودعبدی
@davud_ebdi

داود عبدی (Taymaz)

02 October 2025 09:28

قاراباغ جان قاراباغ

بو یازینی ۱۳۹۷- جی ایل، اوروپانین شامپییونلار لیگینده قاراباغ‌لا آرسئنال تیم‌لری‌نین اوْیونلاری اوْلدوغو گئجه، ایران تئلویزیونون احمدی آدلی آپاریجی‌سی‌نین قاراباغ‌یمیزین قوتسال آدینی لوْغازلا یویولمامیش آغزینا آلدیغی گۆن یازیلمیشدی، آنجاق بوگۆن تام فرقیلی بیر اوْرتامدا؛ تیراختورموز ایران لیگینده بیرینجی‌لیگی قازاندیغیندان سوْنرا، قاراباغیمیز اؤزگۆرلۆیۆنۆ الده ائتدیگیندن سوْنرا داها باکی ایستادییومو یئرینه آغدام ایستادییوموندا اوروپانین دئو تیم‌لرینه ائو یییه‌لیگی ائدن قوربان قوربانوفون سئویملی قاراباغ تیمی‌نین شامپییونلار لیگینده زیروه‌ده دایاندیغی گۆن، همن یازینی پایلاشیب، فاشیست‌لرین باخیشینی بیزلره و بیزلره آیید اوْلان وارلیق‌لارا گؤره، بیر داها تصویره چکیب، بو باشی اوجا میللتین، هابئله آذربایجانیمیزین وار اوْلماسینی هابئله دۆشمانلاری‌نین خوار اوْلماسینی آرزی ائدیریک.

هارا؟؟ قاراباغ..... هئ‌هئ‌هئ....
آرسئنال ـ قاراباغ... هئ‌هئ‌هئ....

ـ ایللر اؤنجه هیتلرین یاراتدیغی سوْیچولوق دۆشونجه‌نین یانداشلاری‌لا قوللوقچوسو اولان فاشیست نازی‌لر، اینگیلیزلی عسگرلری اسیر ائتدیکدن سوْنرا اوْنلاری آغیر شیکنجه ائدیب، چارمیخا چکرمیشلر، آنجاق اینگیلیزلی‌لر اوْنلارین تام ترسینه، آلمانلی‌لاری اسیر ائتدیکدن سونرا، ساعاتلارجا اونلارین قارشیسیندا اوتوروب ساققیز چئینه‌مکله، اؤزلرینی دیلخوش و آلمانلی عسگرلری ایشکنجه ائدرمیشلر.
«آلمانلی‌لار او چاغ ساققیز چئینه‌مه‌یی دۆنیانین ان پیس ایشلریندن و اوْنارسیزلیق سیمگه‌سی بیلردیلر».
ائله بوگۆن ده، گؤز ببه‌ییمیز اولان "قاراباغ" تیمی‌میزین آدی، فاشیست جبهه‌سی‌نین اسیری اولان تئلویزیونون سویچو آپاریجی‌لاریلا، موخابیرلری‌نین گؤزونه سانجیلان اوخ اولوب. هله قالسین‌کی، دۆنیا و اوروپانین آدلیم تیم‌لری سئوگیلی باکی‌یا قوناق اولوب، قاراباغ لا فوتبال اوینادیغیندا سانجی دولور قارین‌لارینا و بو گؤینرتینی فرقلی یوللارلا بیان ائدیرلر،
کئچن ایل اوروپانین قهرمانلار لیگینده، آ، ائس، روم ـ اتلئتیکومادرید و چئلسی کیمی بؤیوک تیم‌لرین قارشیسیندا موجادیله ائدیب، آتلئتیکو و
آ. ائس. روم کیمی تیملری دیزه چؤکدورن تیمین قازانج‌لارینی گؤرن فاشیستلر، تۆرکلر و اؤزه‌للیکله ‌ده، آذربایجانا اولان دوشمانچیلیق‌لارین سرگی‌له‌مه‌یه باشلادیلار.
فوتبال ۱۲۰ آدلی وئریلیشده، فئردوسی‌پور آغدام قاراباغی‌نین آدینی قره باغ اقدم آدلاندیراراق، اؤز ساوادسیزلیغین یا دا فاشیست‌ دۆشونجه داشیدیغینی گؤزه چکدی و بو ایل، تئلویزیونون احمدی دئییلن دلغکی، قاراباغ‌ین آدینی یویولمامیش آغزینا آلاراق لوغازا قویوب، دیشلرینی آغارتدی.
پیسیکولوژی بیلگین‌لری بوجور عکس‌العمل‌لری اینسانین ایچینده اولان حقارتلرله ایلگی‌ده اولماغینی بیلدیریب و بیر اولای‌دا نئجه آغلاماقلاـ‌گۆلمک، بیر شخصین دیش عکس‌العملی اولاراق،اونون ایچیندن خبر وئردیگینه اینانیرلار.
ائله اوگۆن ده، جانلی یاییندا احمدی‌نین هیریلداماغی بؤیوک بیر گؤینرتی‌دن خبر وئریردی،
باش کندلری‌نین تیم‌لری بوقدر ادعایلا هله امارات ـ قطر تیم‌لری‌له اویناماغا یالوارارکن، عربیستان تیم‌لری اؤلکه‌لرینی قبول ائتمه‌ییب توپ اوینامامادیغی حالدا، دۆنیا شؤهرتلی تیم‌لری سئویملی آذربایجان‌دا گؤرمک همن ساققیز قضییه‌سی‌دیر و فاشیستلرین تحقیرلرینی، اؤز دیلخوشلوقلاری‌لا یانیتلاماق دئمک‌دیر
و اونوتمایاق آتا‌ـ‌بابامیز دئمیشکن:
پیشیگین الی اته چاتماز دئیر اییسی گلیر......
ایندی ده هارا قاراباغ هن قاراباغ، سئویملی قاراباغ دئییب فخر ائدیریک.....
هارا..... قاراباغ...

سؤزۆن سوْنوندا بیزلر بو اؤلکه‌ده آسفالتی دۆز و صاف اوْلان بیر خییاوان حسرتینی چکدیییمیزده، باکی شهری؛ فوْرمول بیر، اوْتو یاریش‌لاری‌نین نؤوبتی ائو یییه‌سی اوْلور.
هارا هه آذربایجان....

داودعبدی
@davud_ebdi

داود عبدی (Taymaz)

22 September 2025 16:06

آذربایجان سوْنالاری‌نین سوْن‌آیی


تۆرک‌لرین اسکی اینانج‌لارینا گؤره، آی و گونش،سئوگیلی سانیلیردیلار
آذربایجان اینسانی بئله اینانیردی، آی لا گونش بیر ایل بوْیونجا بیر - بیرینی آختاریب، سوْنای گۆنونده بیر - بیرینه یئتیشیب قاووشوردولار.
بو قاووشماق گۆنو، سوْنای آدلانیردی، ( اوستاد منظوری اؤز کیتاب‌لاریندا بو بایرام و گؤزل دبی، چوْخ دۆزگۆن و بیلیم‌سل باخیمیندان آچیقلاییب‌لار)
آنجاق بو یازی‌دا بو گؤزل دبین نئجه توتولماسی قلمه آلیناجاق.
زومار آیینی‌نین ( شهریورین ) سوْن گۆنلری، سوبای اوْغلانلار، سئودیکلری قیزین ائوینه، قیش زوماریندان بیر سله مئیوه گؤندررمیشلر(سله توتماق دبی-اۆزۆم پایی و....اوْ چاغدان گلیب بو گۆنوموزه چاتیبدیر).
بو آرادا گؤندریلن مئیوه پای‌لاری آراسیندا آلما، نار اؤزل‌لیک‌له ده قیرمیزی آلما اساس رول اوینایارمیش،
قیزیل آلما آذربایجان و تۆرک میفولوژیسینده اساس روْل اویناییر، اصلی-کرم بیر آلمانین ایکی اۆزوندن یارانیبلار
باسات (دده قورقوددا ایلک آدام/آتام/آدم) آلمادان یارانیر
قیزیل آلما توخومو....
قیزیل آلما‌ ایلگیلی ناغیل‌لار، ارگنه قون بایرامی‌لا بیرگه گلمک،بو قیزیل آلمالار، سیبهای زرین هیسپیرید اوْلاراق اوروپا میف‌لرینه کؤچموشدور و....
آنجاق سوْنای گۆن‌لرینده آلما، قوز، هئیوا، اۆزۆم‌ایله دوْلو اوْلان سله‌لرین(سبدلرین) پای گؤندریلمه‌سی بیر اوْغلانین بیر قیزا سئوگیسین بللی ائدن نیشانه‌لردن ساییلیردی(سئوگی اعلانی)، قیز اؤزۆ هابئله ائولرینده ده بو ایلیشکی‌یه کؤنۆللۆ اوْلسایدیلار اوْ پایی آلیب و یئرینه بیر دستمال(مندیل) قویماقلا، اؤز ریضایتلرین بللی ائدردیلر.
بئله دئمک اوْلار سوْنای، آذربایجانلی‌لارین ‌سئوگی‌لرین بللی ائتمک گۆنلری‌ایدی،
بۆتۆن باغ-تارلا ییغیشدیرلاندان سوْنرا، سئوگی‌لر ده بللی اوْلاندان سوْنرا، توْی‌لار باشلانیردی.( ائله بو گۆنلر ده، کند توْی‌لاری‌نین چوْخو پاییزدا توتولار).
سوْنای؛ آذربایجانین اینسان‌لارینین ایلکین حاقلاری‌نین باشلانیشیندان و اؤز سئوگیلی‌لرینی هئچ بیر باسقی آلتیندا اوْلمادان سئچمک سمبولودور،
سوْنای واسیطه‌سی‌ایله اوْغلانلار و قیزلار (باشقا یئرلرده قیزلاری دیری - دیری تورپاق‌لارا تاپشیرارکن) بیر - بیرلرینه سئوگیلرین بللی ائتمک‌دن قیراق، بو یوردون گۆجلۆ و زنگین وارلیق‌لاری‌نین گۆزگۆسۆ و اینسان‌لاری‌نین آچیق بئیین‌لری و آیدین دۆشۆنجه‌لری‌نین گؤسترگه‌سی‌‌دیر.

داود عبدی

@davud_ebdi

داود عبدی (Taymaz)

14 September 2025 10:40

چملی‌گؤلدن - چنلی بئله اوجالان ساو

من هر زامان "جنتی گؤرمک ایسته‌ین آذربایجانا گلسین" سؤزۆنۆ ائشیدنده تۆک‌لریم بیز - بیز دورار
آنجاق آذربایجانین جننتی‌نین، جننتی ده تیکان‌تپه‌ بیلرم (منیم باخیشیمدان ها البتته)،
اوشاقلیق چاغ‌لاریمیزدا کسین‌لیکله ایلده بیر - ایکی یوْل تیکان‌تپه‌یه گئدردیک، هر دؤنه‌سینده ده مایین بولاق گدیگینی آشدیغیمیزدا آتام بو یوْلون قیشیندا نئجه قاردا قالماق خاطیره‌لرینی دئییب، اوْ چتین گۆنلری یادا سالاردی.
عمیم تیکان‌تپه‌یه گئتمیش اوْلان ایلک اؤیرتمن‌لردن ساییلار، عمی‌مین حایات یوْلداشی دا اوْغول‌بئیگ‌لی اوْلدوغونا گؤره، اوشاقلیغیمیزین خوْش آنی‌لاری‌نین بیر بؤلۆمۆ ده اوْ یاشیل یاماج‌لارلا، تخت‌-‌ی سۆلئیمان‌ی گزمکده یاشانمیشدی، آنجاق سوْنرالار بؤیۆیۆب - اوْخودوغوموزدا اوْ تاریخی بؤلگه‌نین آدی‌نین سوغورلوق اوْلدوغونو بیلدیییمیز کیمی، بایرام گۆنلری یاییملانان نون - خ ، تی‌وی سئریالیندا دا کۆرد یوردو کیمی تانینان چملی گؤل، کۆردلرین یوخ، تۆرک‌لرین ابدی و ازلی توْرپاقلاری و دئییشلره گؤره، کوْراوْغلونون و دلی‌ قانلی یوْلداشلاری‌نین یوردو اوْلدوغونو بیلدیک.
اینسان تیکان‌تپه‌یه آیاق باسدیغیندا سانکی اونودولموش جننتین بیر پارچاسینا آیاق باسیر، توْرپاغی‌نین هر بوجاغیندا، اوسطوره‌وی اینانج‌لارا باغلانان گیزملی(سئحیرلی) قالالارلا تاریخ داشییان اسکی بینالار و یئرلی آدلار، مین بیر گئجه ناغیل‌لارینی بیر داها گؤزلر اؤنونده جانلاندیریر.
جوْشوب - داشماقدا اوْلان قاینار سولارلا، قیزیل یاتاق‌لارلا، تای‌سیز داش‌ شاختالاری سینه‌سینده گیزله‌ین گیزملی بو یورد؛ افشار تۆرک‌لری‌نین یوردودور.
ائله همن گیزملی‌لیگی افشار فرشی‌نین هر بیر دۆیۆنۆیله باجاریقلا توْخونان ایلمک‌لرینده سیزیب - دویماق اوْلور.
تیکان‌تپه‌دن یازماق دوْغرودان چوْخ چتین ایشدیر، گرک اوْرا گئدیب سرین هاواسیندا دوْغانین قلم چالدیغی یئرلری گؤزۆنله گؤرۆب- گزه‌سن.
توْرپاغی اکیب - بئجرمه‌سن قوْروماغا ده‌یمز، قوْرویا بیلمه‌سن ده اکیب - بئجرمگه گلمز، سؤزۆنه اینانان تۆرک‌لر، زومار آیی‌نین ۲۰ - جی گۆنۆنده، یوردوموزون هر بؤلگه‌‌سیندن (آذربایجانین همدانیندان، قزوینیندن زنگانیندان، تبریزی‌ایله،اورموسوندان، اردبیلیندن، قاشقای‌ ائلیندن، قیزیلباش‌لار یوردویلا، تۆرکمن‌لر دییاریندان و...) بو یوردا آخیش ائدیب، اوْ یورددا اوْلان باجی - قارداش‌لاریمیزی اونوتماماق دۆشۆنجه‌سی‌ایله،
کوْراوغلولار یوردوندا، کوْراوْغلو جنگی‌لرینی آشیق‌لارین ایستی نفسلری‌ایله بیرگه سسلندیره‌رک، اوجا داغ‌لارا فرمان‌لار یازیب، بو یوردون وارلیغینا گؤز تیکن‌لره بو تورپاق‌لارین اصیل و داییمی یییه‌لری‌نین کیم اوْلدوغونو بیر داها تانیتدیلار.

داودعبدی
@davud_ebdi

داود عبدی (Taymaz)

02 September 2025 18:49

شهریورین ۱۲ـ‌سی، اؤزگورلویوموزون موشتولوق گۆنو

چاغداش یۆز ایللیگیمیزین، ۲۰ـجی اون ایللیگی، بو اؤلکه‌نین تاریخی‌نین ان قیزغین گۆنلریندن ساییلیر، روس و اینگیلیز پهلوی‌لرین گۆجو و ایقتیداری اساسدا اؤلکه‌نی ایکی یئره بؤلوب و کئفلری چکدیگی ایشلری قاباغا آپاریرلار،
قیزیل اوردونون عسگرلری میللتی تالان ائتمکله، اینگیلیز گونئی‌ین نفتینی ساتماقلا و.....
آنجاق آذربایجان یوردونون آیدین باخیشلاری، اؤز اللری ایله تۆرک سولاله‌سی قاجاری ییخیب، گۆجسوزلندیرندن سونرا اؤزلرینه گلیب و تحقیرلرله، آلچالدیلمالار، تبعیض‌لر فاشیست سیمگه‌سی اولان پهلوی‌نین چیرکین اۆزونو تانیتدیریب و داها بو یوردون آیدین دوشونجه‌لی‌لری، تئهرانا مشروطه و ایرانا آزادلیق دئیه یوخ، اؤز میللت‌لری‌نین زار حاللارینی دۆشونوب، ائله ایلک فورصتی تاپیب، آذربایجان اؤز آلین یازیسینی اؤز الی‌له تعیین ائده‌جک دئییب، اوچاق‌لار تبریز و‌ بیر نئچه شهری، ۱۲ ـ شهریور بیلدیریشی‌له بزه‌دیلر
چوخلاری اوگۆن بیلمه‌‌ییردیلر او کاغیذلار اۆزره نه یازیلیب،آنجاق میللی حوکومتیمیز قورولوب، نئچه ایللر تحقیر و کیچیلتمه‌دن قورتولدوقلاری گۆنون صاباحیسی گۆن، تۆرک دیل‌لی تابلولاری دووارلارا آسیلی گؤره‌رکن ۱۲ـ شهریورین بیلدیریشی‌نین نه اولدوغونو یاخشیجا بیلدیلر،
او گۆن میللتیمیز میللت‌لشمه‌یه اؤز میللی حوکومتی‌نین قورولماغی‌نین تمل داشلارینی تؤکموشدو.....
آزادلیق دادلی بیر تمل داشی،
آنا دیللی کیتابلارین یاییملانماسی قدر دادلی و شیرین اؤزگورلوک

۱۲ شهریور ۱۳۹۷
@davud_ebdi

داود عبدی (Taymaz)

09 August 2025 12:46

سوْلماغا ساری گئدن  قیرمیز چیزگی‌لر

دۆنیانین لاپ قانماز دیکتاتورو، قوزئی کوْره رهبری کیم جونگ اون جنابلاری سوْن دانیشیغیندا آذربایجان و ائرمنیستان رهبرلرینی قوْرخاق و خایین آدلاندیراراق، بؤلگه‌ده باریش ساغلایان، زنگه‌زوْر دالانی اۆزره باغلانان یئنی باریش آنلاشماسینی قیناییب.
هله بللی دییل کیم جونگ اون جنابلاری خییانت‌له خیدمتین فرقلرینی بوگۆنه دک نه‌دن اؤیرنمه‌ییب؟
بو آرادا ایل‌لر بوْیو بیر خییانت ده اۆز وئریبدیرسه قوزئی کوْره‌نین قیبله‌گاهی اوْلان روسییه اؤلکه‌سی هابئله بئش قیرانا دیمز اوْ مینسک قوروهو ( فرانسه و دوستان ) طرفیندن اوْلوب.
بوگۆن ایکی دؤولت بو قرارا گلیبلر روس‌لارین طاماحکار اللرینی بؤلگه‌دن گۆدلدیب و ایللر بؤیۆ آچیلمایان کوْر دۆیۆنلری آچسینلار.
ایندی سیزین باخیشینیزدان ایکی اؤلکه‌نین باشچی‌لاری و حاکمیتلری طرفیندن اؤز میللتلرینه ائتدیکلری خیدمت خییانت‌دیرسه، اوْجور سانین.
زنگه‌زوْر دالانی بؤلگه‌نین بۆتۆن هارتا - پورتچولاری‌نین آسارام - کسرم تهدیدلری آراسیندا، یئرینه اوْتورماقدادیر و بیر سیرالاری‌نین بۆتوْن قیرمیز چیزگی‌لری سوْلان گۆل‌لرین حالینا بنزه‌ییر.
بو آرادا کیم جنابلاری، روس ارباب‌لارینا قویروق بولاماق یئرینه، اؤز میللتینه ایلین باشا - باشی یئرآلما و.... یئرینه، ایلده بیر دفعه ات و باشقا یئمک‌لر دادیزماق فیکرینده اوْلسا، سانیرام داها یاخشی‌دیر.

داودعبدی
@davud_ebdi

داود عبدی (Taymaz)

03 May 2025 10:29

تانری‌نین الیندن تانری‌نین ایشینه

بلکه سۆمۆرگه‌چی(استعمارچی) بریتانیا اوْردوسو فالکلند آدالاریندا سیلاح گۆجۆیله، زوْربالیق گؤستریب اوْرانی آرژانتین‌لی‌لر الیندن چیخاردیقلاری چاغ، فیکیرلرندن ده کئچمزایدی، فالکلند آدالاری‌نین ۱۹۸۲ - جی ایلی‌نین ساواشیندان ۴ ایل سوْنرا، مئکزیکوْسیتی‌نین آزتئکا ایستادییوموندا آرماندو مارادوْنا اینگیلیس‌لی‌لردن برابرسیز ساواشین یئنلیگی‌سی‌نین اؤجۆنۆ تانری‌لا ایش‌بیرلیک ائده‌رک آلاجاق‌ایمیش.
بلی، ۱۹۸۶ - جی‌ ایل "تانری‌ الی" آدلانان قوْل‌لا(گل) آرژانتین اینگیلیس تیمی قارشیسیندا قازاناراق، تاریخ یئنی‌دن یازیلدی.
ائله بو گۆن ده بو اؤلکه‌ده مین‌لر جۆر تحقیر، توْهین، دانیلما و عدالتسیزلیگه معروض قالان تۆرک‌لرین فوتبال تیمی ( سئوگیلی تیراختور ) اؤلکه لیگی‌نین بیرینجی تیمی اوْلماقلا، فوتبال فئدراسییونو ، سییاسی‌لر، غئیری سییاسی‌لر، داورلر کوْمیته‌‌سی، بو میللت و تیملرینه قارشی پوْزولان  v.a.r سیستئمی و...و..‌.و... بۆتۆنلۆکجه بو یوردون دۆشمانلاری گؤزلری‌نین اؤنۆنده، تکجه ۹۴ - جی ایلینین قارا جوماسی‌نین یوْخ یۆز ایلدن آرتیق عدالتسیزلیکجه داورانیشلارین اؤجۆنۆ آلدی.
بلکه اوْ گۆن مارادوْنا "تانری الی‌"ایله بیر قوْل ووردو، آنجاق فولاد آرئنادا، اوْ بویدا حاقسیزلیقدان سوْنرا ساوالان اوْغلو امیرحسین حسین‌زاده‌نین اینصافسیزجا داورانان حاکیمه، بارماغی‌لا گؤیۆ گؤستریب " تانری وار اوْ اۆستده"  دئدییینده، فاشیسمین اوْردوگاهی باشلارینا ییخیلدی.
ائله همن اوْیونون سوْنوندا اسکوْچیچ‌ین بو قازانج " تانری ایشی" ایدی سؤزۆ ده یادلاریمیزدا قالاجاق، یادلاریمیزدا قالدیغی چوْخ شیرین و آجی اوْلای‌لار کیمی...
و بو گۆن آذربایجان‌یمیزین هر بؤلگه‌سینده ظفر مارشلاری چالینماقلا بیرگه، عدالتسیزلگه غلبه چالان میللتیمیزه اؤیۆنۆب، سئوینجیمیزین قالارغی اوْلماسینی آرزی ائده‌رک، قزوین‌یمیزده الده ائتدیییمیز بیرلیک و بیرینجی‌لییین دادینی چیخاردیریق.

داودعبدی
@davud_ebdi

۱۴۰۴،۲،۱۳

داود عبدی (Taymaz)

20 February 2025 10:54

دؤزۆمۆن شیرین مئیوه‌سی

نئچه ایل بوندان قاباق، یانیلماسام ۸۶- جی ایل‌ اوْلاردی، تیراختورلا شیرین فراز اوْیونو اۆچۆن داغ‌لاری آشیب، دره‌لر کئچیب ایستادییوْما گئدیردیک
خییاولی یوْلداشلاردان بیریسی دئدی نه‌دن بیز گرک هرنه‌یی چتین‌لیک‌له اله گتیرک، بیر فوتبال اوْیونونو گؤرمک اۆچۆن دره - تپه - دۆز گئدک.
اوْ گۆن اوْیونو تبریزده اودوزساق دا، یوْلو قاییدارکن هئچ‌کس ناراحات دییلدی، آخی ایلک دفعه‌ایدی ۶۵ - ۷۰ مین نفر بیرلیکده یاشاسین آذربایجان شوعارینی سسلندیریردیلر.
کئچمیش اوْیونلاردا نهایتی قوْجا باغ‌شومال ایستادییوموندا ۳ - ۴ مین نفر توْپلاناردی، آنجاق بو دؤنه دوروم فرقلنمیش‌ایدی.
هر یاشاسین آذربایجان‌لا ایستادییومون هنده‌ورینده‌کی داغ‌لار یئرینه ایل‌لر بوْیونجا بو میللتین قانی،مالی،جانی، وارلیغی، کیملیگی و آنادیلی اۆزرینده قورولان شوْونیزمین دیرک‌لری تیتره‌ییردی، هر بیر کیچیک اوشاغین گؤیه قالخان الی‌ایله شوونیزمین قالین دورالاری ییخیلیردی و بیزلر اوْ زحمتلی گۆنلردن گلیب بو گۆنۆمۆزه چاتدیق....
آنجاق، درین دۆشۆندۆیۆمده همن دوْستومون سؤزۆ گؤزۆمۆن اؤنۆنده جانلانیر، بیزلر نه‌یه گؤره هرنه‌یی گرک اؤزۆمۆز اله گتیرک هم ده لاپ چتین یوْل‌لارلا.
دۆنیانین نئچه میلیاردلیق جمعیتی ایچره، ائله بیزلر گرک دیلی یاساق میللت‌لر سیراسیندا یئر آلاردیق؟ نه اوْلاردی ان آزی تکجه آنادیلیمیزی دانیشماق یوْلوندا چتین‌لیک چکمه‌یردیک، هر سحر هئچ بیر ناز بالامیز اوْخولا گئدرکن، آنادیلینی ائوده بوراخمایاردی.
بیز ده دۆنیانین باشقا میللت‌لری کیمی آنادیلی گۆنۆنۆ تهدیدسیز، توْهین‌سیز و هئچ بیر باسقی‌ آلتیندا قالمادان، گؤزل تؤرن‌لرله عزیزله‌یردیک و بونا تای مین‌لرجه نیسگیلی اۆره‌ییمیزده یاشاتمایاردیق.
آما بیر یاندان دا بئله اینانیرام دیلی اسیر و وارلیغی توتساق بیر میللت اۆچۆن هرگۆن آنادیلی گۆنۆ اوْلمالی‌دیر، هر کیچیک فورصتدن یارارلانیب، بو دیلین رسمی‌لشمه‌یی اوغروندا جانیمیزدان، مالی‌میزدان و... کئچمه‌لی‌ییک،
گئجه - گۆندۆز دئمه‌دن، اۆز ایچیمیزده اوْلان آیریمچی داورانیشلاری قیراغا بوراخیب ائله قورتولوش رمزی اوْلان آنادیلیمیز کؤلگه‌سینده بیر یئره توْپلانماقلا، کۆسکۆن‌لۆک‌لری قیرغین‌لیق‌لاری بوراخیب ائله بو عزیز دیلیمیزی یاشادیب، یاشاماغی اۆچۆن قوْللاریمیزی چیرمالاییب یوْلا دۆشمک.
بونو دا اونوتمایاق آزادلیق وئریلمز ، آلینار و بیزلر ده شانسیمیزدان بو اؤلکه‌ده یاشاییریق‌سا آنادیلیمیزی، وارلیغیمیزی، کیملیگیمیزی قوْروماق مجبورییتینده‌ییک و اینانیرام ۸۶-جی ایل تیراختورون اوْیونونا گئدرکن اوْ چتین‌لیک‌لری گؤرۆب دؤزن‌لر، آنادیلیمیزین بو چتین گۆنلرینه ده دؤزۆب، آنالاریمیزین و بالالاریمیزین دیل‌لری‌نین چیچکلنیب بار گتیرمه‌سینی ده گؤره‌جک‌لر...
تکجه، اۆستده دئدیییم کیمی، هر گۆنۆمۆز آنادیلی گۆنۆ اوْلمالی و بو دیلی سئویب - سئودیریب، اؤیره‌نیب - اؤیرتمه‌لی‌ییک.
دده قوْرقودون سوْن اؤیۆدلریندن اوْلان سؤزلری‌ایله یازی‌یا سوْن قوْیورام
اوْغول؛ چالیش توْرپاغینی یاخشی قوْرو، قوْرونولمایان توْرپاق اکیب - بئجریلمگه ده‌یمز
اکیب - بئجریلمه‌ین توْرپاق قوْرونماغا ده‌یمز.
ائله آنادیلیمیز ده اوْجور؛
اؤیره‌نیلمه‌ییب منیم‌سه‌نیلمه‌ین بیر دیل قوْروماغا ده‌یمز
قوْرونولمایان بیر دیل ده اؤیره‌نیلمه‌یه ده‌یمز.
بونو دا یاددان چیخارمایاق، چتین‌لیک‌له اله گلن - قازینیلان هر نه، داها چوْخ منیم‌سه‌لنیب، آرتیق دیققتله قوْرونوب، قدری بیلینر.

داودعبدی
@davud_ebdi

داود عبدی (Taymaz)

16 February 2025 15:26

یازی - پوْزو یانلیش‌لاری (۸)

آنا دیلیمیزده عرب الیفباسی دئییلن الیفبایلا یازی‌لار یازارکن بیر سیرا یانلیش‌لیق‌لارلا قارشی‌لاشیریق
اوْنلاردان بیری؛ سؤزلریمیزی جمع باغلاماق اۆچۆن اوْنلارا (لر، لار) اکلرینی آرتیردیغیمیزدا یازیلیشی همن سؤزلره بنزه‌ین آنجاق آنلامی فرقلی اوْلان سؤزلرله دییشیک دۆشمکلری‌دیر.
بیلدییینیز کیمی دیلیمیزده؛  بلیرسیز(مجهول) ائیلم‌لر(فئعل‌لر)، سؤزلره چئشیدلی اک‌لرین آرتیرماسی‌لا یارانارلار.
بیر سیرا فئعل‌لره ایل/il,ıl اکی آرتیرماقلا، بلیرسیز فئعل‌لر یاراتماق اوْلار
ایندی بو فئعل‌لر غئیری قطعی گله‌جک چاغدا، بئله یازیلارلار
اؤرنک اۆچۆن؛
یاز + یل ؛ یازیل
یازیلارام، یازیلارسان، یازیلار
یازیلاریق، یازیلارسیز، یازیلارلار

ایندی همن یازیلار (نوشته خواهد شد) فئعلی‌ایله یازی‌لار (نوشته‌ها) سؤزۆنۆ، یازارکن نئجه یازمالی‌ییق؟
گؤرۆندۆیۆ کیمی هر ایکی سؤزۆن یازیلیشی بیر- بیرینه بنزه‌ییر
اوْ اۆزدن بئله سؤزلرده فئعل‌لره آرتیریلان لر،لار اک‌لرینی یاپیشیق و آدلاردا آرالی یازاریق.

یازیلار (نوشته خواهد شد)
یازی‌لار (نوشته‌ها)

قاپیلار ( توسط سگها گاز گرفته میشود، در هوا قاپیده میشود )
قاپی‌لار (درها)

آییلار (بیدار میشود)
آیی‌لار (خرسها)

یاریلار (نصف میشود)
یاری‌لار (نصفه‌ها)

دریلر (چیده میشود)
دری‌لر (پوستها)

سۆرۆلر (شخم زده میشود، رانده میشود/خواهد شد)
سۆرۆ لر ( دسته‌ها و گله‌ها)

بونلاردان قیراق بیر سیرا یئرلرده سؤزلری قیسالداندا، یانیلمالار اۆز وئره بیلر
اؤرنک اۆچۆن ایله/ایلا اک‌لرینی له/لا یازماق،
بیلدییینیز کیمی ایله/ایلا اک‌لرینی له/لا کیمی ده یازماق اوْلار، آنجاق یازیلیشی بیر اوْلوب آنلام باخیمیندان فرقلی اوْلان سؤزلرده ایله/ایلا اک‌لری‌ایله یازماق داها دوْغرو اوْلا بیلر
گؤزله؛ منتظر باش/مواظب باش
گؤزله(باچشم) سؤزۆنده له اکی یئرینه، ایله اکی‌ایله یازیلسا داها دوْغرو اوْلار؛ گؤزله ------» گؤزایله
{گؤزلرین گؤزلریمه گؤزله‌ییرم گؤزله دئدی
سئوگی‌سین محبتین سؤز له دییل گؤز له دئدی}

یا بویوروق(امری) فئعل‌لرده لا/له اک‌لری یاپیشیق و ایله/ایلا اک‌لری آیری یازیلمالی‌دیر.

آیاقلا (لگد مال کن)
آیاق‌لا /آیاق‌ایلا(با پا) [بوجور یئرلرده آیری یازا بیلسک ائله لا/له ایله یازماق اوْلار].

یئلله (باد بزن)
یئل‌له /یئل‌ایله( همراه با باد )
{بیر اوچایدیم بو چیرپینان یئل‌ایله
باغلاشایدیم داغدان آشان سئل‌ایله
(اوستاد شهرییار)}

داشلا (سنگ‌باران کن)
داش‌لا (با سنگ)

اوْخلا (تیرباران کن)
اوْخ‌لا (با تیر)

لا/له اک‌لری‌ایله یارانمیش اوْلان دۆزلتمه ائتکیلی(اؤتۆملۆ، متعددی) ائیلم‌لر، غئیری قطعی گله‌جک چاغیندا یازیلارکن، همن یازیلیش‌لاری اوْلان جمع باغلانمیش اوْلان آدلارلا دییشیک یازیلمالی.
داغلار (داغ می‌زند)
{اوْخودوغون ماهنی اۆره‌ییمین باشین داغلار
سایاچی هر ایل سۆرۆنۆن یئنی قوزولارینی دامغالارلا داغلار}
داغ‌لار (کوهها)
{ آ داغ‌لار آ داغ‌لار سنده نه‌لر وار}

باغلار (می‌بندد، وابسته میکند)
{ ووردوغون دیل یارالاری اۆرگیمده یارا باغلار
وطن سئوگیسی اینسانی یاشادیغی توْرپاغا باغلار}
باغ‌لار (باغها)

یوْللار (می‌فرستد)
یوْل‌لار (راهها)

گؤزلر (منتظر میماند)
گؤز لر (چشمها)

یئل‌لر (باد میزند)
یئل‌لر (بادها)

غئیر قطعی گله‌جک چاغدا اۆچۆنجو جمع  کیمسه‌نی یازارکن دیققت ائتمه‌لی‌ییک
یازارام، یازارسان،یازار
یازاریق، یازارسینیز، یازارلار

یازارلار (خواهند نوشت)
یازار لار(نویسندگان)

چاپارلار (خواهند چاپید)
چاپار لار (پیکها، نامه‌رسانها)

و....

بو اۆزدن عرب الیفباسی‌لا یازیلان یازی‌لاردا اک‌لری داها دیققتله یازمالی‌ییق

داودعبدی
@davud_ebdi

داود عبدی (Taymaz)

20 January 2025 17:52

یاشانا بیلن یئنی قارا یانوارلار

اسکی‌دن بیر سؤز وار؛ کئچمیشینی‌ ـ‌ تاریخینی اونودان میللت اونو تیکرارلاماق مجبورییتینده‌دیر.
هر ایل ژانوییه آیی‌نین ۲۰‌ـ‌جی گۆنو باکی‌دا شهیدلر خییاوانی قیرمیزی گۆل‌لرله بزه‌نیب، او آجی گۆنلرین ۱۳۷ شهیدی‌‌‌ ایله ۷۰۰ دن چوخ یارالی و ۱۰۰۰ دن آرتیق توتوقلانانلاری‌نین آدلاری و یادلاری آنیمسانیلاراق، آذربایجان‌ین تی.وی کاناللاری فرقلی وئریلیش‌لرله بوگۆنو عزیزله‌مه‌گه چالیشیرلار آنجاق بیرگۆن سونرا، آش همن آش، کاسا دا همن کاسا.

بلکه چوخلاری، قارا یانوارین یارانما نه‌دن‌لرینی؛ ائرمنی چته‌لری‌نین تحریکی و سویوق ساواش‌ـ‌ی (جنگ سردی) اودوزماق سونوجوندا داغیلماغا ساری گئدن c. c. r [شوروی] حوکومتی‌نین آذربایجانلی‌لارین میللی کیملیک‌لرینه قاییتماقلارینی داغیلتماق آماجینی نظره آلسینلار
آنجاق روس خالقی او اسکی سؤزو بیز تۆرکلردن داها یاخشی آنلاییب و قولاقلارینا سیرغا ائدیبدلر.
تخمینا ۵۰۰ ایل اؤنجه‌یه کیمی تۆرکلر یئر اۆزونون حوکمدارلاری ساییلیردیلار
عوثمانلی‌لار آنادولو تورپاقلاریندان اوروپانین گۆبه‌یینه دک.
صفوی‌لر اونلارین دوغو(شرق) سینیرلاریندا بو گۆنکو ایران ـ افغانیستان، تۆرکمنیستان، آذربایجان تورپاقلاریندا.
بو گۆنکو روسییه‌نین باشاـ باشی، چین سینیرلارینا کیمی اۆزبک‌لر الینده‌ایدی.
هیندده ده ایسه قورخانلی‌لار(گورکانی) سولاله‌سیندن اولان بابیر ایمپراطورلوغو حؤکم سۆروردولر.
آنجاق ائله تۆرکلرین مذهب آیرینتی‌لیغیندان آسیلی اولان ساواشلار سونوجوندا، روس خالقی قودرتی الینه آلدیغی گۆندن بری تۆرکلرله دۆشمانچیلیغا باشلادی.
اونلار آتا ـ بابالاری‌نین یۆز ایللرجه تۆرکلرین حاکمییتی آلتیندا اولدوقلارینی و تۆرکلره قوللوق ائتدیکلرینی اونوتمایاراق، یارانان هر کیچیک فورصتدن کئچمیشین اؤجونو(اینتیقامینی) آلماغا یارارلاندیلار.
و بو چیرکین دۆشونجه‌نی سون چاغ‌لارا کیمی ده داشیدیلار.
موعاصیر ایل‌لرده روسلارین خییانتلری و جنایتلریندن بیر نئچه اؤرنک گتیریریک:
۱. قاجار ـ روس ساواشلاریندا
۲. مشروطه اولای‌لاریندا گۆنئی‌ده تؤره‌تدیکلری جنایتلر،
۳. آخیسقا و تاتار تۆرکلرینی سیبری چؤللوکلرینه تبعید ائتدیکلرینده،
۴. تۆرکمن ایگیدلرینی دفعه‌لرجه قانا بله‌ییب، آخال موقاویله‌سیندن سونرا گؤک‌تپه‌ قالاسینی یئرله بیرائتمکلری[۱۹۸۲ ـ م]،
۵. ۱۹۱۶‌ـ‌جی ایل تۆرکمن قهرمانی شئیخ ‌جنید حرکاتینی آرادان قالدیرماقلا
۶. ۱۹۲۰ـ‌ده محمدامین رسولزاده قوردوغو آذربایجان جمهورییتینی ییخماقلا،
۷. دۆنیا ساواشلاریندا عوثمانلی و تۆرکییه تورپاقلارینی داغیتماقلا،
۸. بالکان‌لاردا تۆرکلری سوی‌قیریم ائتدیکده،
۹. میللی حوکومتین ییخیلماسیندا قورام‌لا باغلادیقلاری موقاویله اساسدا دموکراتلارا خییانت و پیشه‌وری اؤلدورمکله
۱۰. قاراباغ ساواشیندا موستقیم‌جه‌سینه ائرمنی‌لرله بیرلشیب او تورپاقلارین ایشقالیندا ایشتراک ائتمکله
۱۱. نهایت ائرمنی چته‌لری و داشناکلارین بیرلیگی‌ایله،۱۹۹۰ـ‌جی ایلده ۲۰ یانوار [قارا یانوار] جنایتلرینی تؤره‌تمکله.
و......
آنجاق روسلارین تۆرکلرله بو دۆشمانچیلیغی بیتمه‌ین بیر دۆشمانچیلیق‌دیر، و بیز تاریخدن درس آلمامادیغیمیز گۆن و روسلاری اؤزوموزه دوست ساندیغیمیزجا، هرگئجه بیر یئنی قارا یانوار یاشانا بیلر.

داودعبدی
20 yanvar 2020

@davud_ebdi

داود عبدی (Taymaz)

31 December 2024 10:24

آرازین یارالاری ساغالان گۆن

نئچه ایل بوندان قاباق، دۆنیا آذربایجانلی‌لارین اۆرک‌بیرلیک گۆنۆنده هامی‌دان چوْخ سئوینن آراز آدلی بیر یازی‌دا، آرازین بوْینوندان بؤیۆک بیر یۆکۆن گؤتۆرۆلمه‌سیندن دئییب اوْ گؤزل آنلاری تصویر چکمیشدیم.
آنجاق من نه‌دنسه آراز قیراغینا گئدیب آرازی گؤردۆیۆمده غمه بۆرۆنۆرم.
بو دا منیم کیمی چای‌لاری آخارسولاری سئون بیریسینه چوْخ غریبه بیر دویغودور.
جیغاتی‌نی گؤردۆیۆمده نه‌قدر سئوینیرم‌سه آرازی گؤردۆیۆمده ده اوْنون دالغالاری اۆزره اۆزن غمی، آجینی، کدری سیزیرام.
آراز منه، ۱۳۲۵ - جی ایلین قیشیندا آزادلیق قالاسی اوْلان میللی حوکومتین ییخیلماسیندان دۆنیالاری باشلارینا اوچموش گنج‌لرین آغیر نفسلرینی خاطیرلادیر....
گنج بیر قیزین عسگرلیکده اوْلان فدایی سئوگیلی‌سینه بایرام پایی اۆچۆن توْخودوغو ایپ جورابلا گۆللۆ مندیله تؤکدۆیۆ گؤز یاشلاری‌نین آغیرلیغی قدر بیر آغینی جانلاندیریر.
بلکه ده سوْلغون آخیشی‌نین نه‌دنی، تیکانلی سیم‌لری ساخلاماق اۆچۆن اۆرگینه ساپلانمیش اوْلان دمیر دیرک‌لرین سیزیلتی‌سیدیر.
بلکه ده ائلین گۆل اوْغلو صمدین اؤلۆمۆیله ائشیتدیگی قارغی‌لاردیر.
بلکه ده بیر ائلی ایکی بؤلمک سوچو،
یا دا ...
هر نه اوْلورسا اوْلسون، آذربایجانلی‌لار اؤزلۆکلرینه دؤندۆکلری زامان، دمیر تئل‌لری قیریب آرازین اۆرگینه ساپلانمیش اوْخ‌لاری دئشیب چیخاردیقلاری آن، اۆزۆ گۆلۆب، غمی - کدری سیلیب، آتاجاقدیر
۱۹۸۹ - جی ایلین دئسامبرین ۳۱-جی گۆنۆنده یارالاری‌نین ساغالماسیندان سئویندیگی کیمی.

داودعبدی

دۆنیا آذربایجانلی‌لارین اۆرک‌بیرلیک، فیکیربیرلیک، سؤزبیرلیک گۆنۆ

@davud_ebdi

داود عبدی (Taymaz)

21 December 2025 15:32

چیلله سؤزۆنۆن آنلامی

بوگۆنلر چیلله گئجه‌سی آدی‌لا تانینان گئجه، ناردوْغان¹ بایرامی‌نین گئجه‌سی‌دیر.
تۆرک‌لر اسکی‌دن سوْیوق بؤلگه‌لرده یاشادیقلاری اۆچۆن گۆندۆزۆ گئجه‌دن، هابئله ایشیق‌لیغی قارانلیق‌دان داها چوْخ سئورمیشلر و اسکی اوسطوره‌وی اینانج‌لارینا گؤره، گۆنش بوگۆن اؤلۆب - یوْخ اوْلماغا دوْغرو گئدیر، آنجاق سحر ائرته‌دن گئجه‌یه کیمی توْنقال‌لار قالاییب، اوْدلار یاندیرماقلا، ساری شیله‌لر(شیله/چیله، ساری؛ گۆنش بوْیاسی) پیشیریب پایلاماقلارلا اوْنو قوْرویوب، یازین گلیشی و یئنگی گۆنۆن [بایرامین] دوْغوشونا قدر آیاق اۆسته ساخلاییرلار.
بو بایرام آذربایجان تۆرک‌لری ایچره ناردوْغان بایرامی آدی‌ایلا تانینسایدی دا بوگۆنلر قوْنشو خالقلاردان گلن قوْندارما و کؤکسۆز اوْلان اهورایی و میترایی آیین‌لره قوربان گئده‌رک اونودولماقدادیر، آنجاق هله قوزئی آذربایجان‌دا ناردوْغان بایرامی اؤز وارلیغینی قوْرویوب و داوام ائتمکده‌دیر.
بو بایرام باشقا تۆرک خالقلاری ایچره فرقلی آدلارلا تانینیر، اوْ آدلارا باخدیغیمیزدا "پاینا" آدینا توش گلیریک.
پاینا همن با‌یانای/بای‌آنای دیر
تۆرک اساطیرینده دوْغا(طبیعت)، باروئرمک، بوْیلولوق تانریچاسی‌ اوْلان بو تانریچا آوچی‌لار(اوْوچولار)، بالیقچی‌لار هابئله اوْرمانین قوْروقچوسودور.
اسکی اینانج‌لارا گؤره، اوجا داغ‌لار باشیندا، بایانای/پایانا آدلی بیر گؤزل و گؤیچک قادین یاشایار، اوْ همن داغ‌لاردان اکینه‌جک‌لرین و اکینچی‌لرین آلین یازی‌لارین کسیب، آغاجدان یوْنولموش آراباسی‌ایلا آشاغی دره‌لره کؤچر، بو یوْلچولوقدا اوْخودوغو تیرینگه‌لری(آوازلاری) تکجه اؤزل آداملار ائشیده بیلرلر.
یاقوت‌لار ایل‌سایاریندا آی‌لارین بیری‌نین آدی پاینا آیی‌دیر.
آلتای داغ‌لاری و سیبری‌ده یاشایان تۆرکلرین قیش بایرامی (چیلله/ ناردوْغان بایرامی) بو تانریچا آدی‌ایلا بزه‌نیر.
گۆنئی آذربایجان‌دا ایسه بو بایرام یئل تانریسی‌نین آدی[یئل آنا یا همن چیل آنا] آدی‌ایلا عزیز توتولور.
قیش‌ین ایلک چیلله‌سی (بؤیۆک چیلله) چیل آنا/یئل آنایلا باشلاناراق، چیلله بئچه²ایله، یئل‌آتناسی‌(یئل چرشممه‌سینده) قورتولور.
شامانیزم اینانج‌لاریندا دا بئله‌دیر
یئل بیرینجی دؤنه آلازلیق‌لار(نوْخوشلوقلار) گتیریر-یاییر، ایکینجئ دؤنه یئنی‌دن دوْغوش و یاشام باغیشلاییر{یازین گلمه‌سینین موشتولوقچوسودور}.
بو بایرام شامان‌لار ایچره چوْخ عزیز توتولور؛
گۆنشین یئنی‌دن گۆجلنمه‌سی
هابئله ایشیق‌لیغین قارانلیق‌لارا غلبه‌سی اۆچۆن هم ده اوْجاق‌لارین ایستی توتولماسی و سؤنمه‌مه‌سی اۆچۆن
بؤیۆک توْنقال‌لار قالاییب-اوْد آچیب، شام(شمع) یاندیرارلار.
اوْلو تین‌لرین(روحلارین) چاغیریشی و اوْنلاردان آزسل(معنوی) یاردیم آلماق اۆچۆن، نار مئیوه‌لری کسیلیب، قاب‌لارا دۆزۆلۆب،داش‌لار اۆسته قوْیولار
خالق بیر یئره(اوْجاق و اوْدون باشینا) توْپلاناراق، دوعالار اوْخویوب، بیرلیک‌لرینی گۆجلندیررلر بو بیرلشمک اوْنلارا قیشی راحات کئچیرتمک اۆچ گۆج وئریب اۆرک‌لرینده اومودلاری ایشیق‌لاندیرار - بو ایش هر ایل تکرارلانار.
اسکی قازاق تۆرک‌لری ناردوْغان بایرامی گۆنۆنده، گنج‌لری ائولندیریب، بایرامین شنلیگینی آرتیرارمیشلار
بو توْی‌لاردا کسین‌لیکله قوربانلیق‌لار کسیب، دوْغا گۆجلرینی عزیز توتارمیشلار.
یاقوت و ساخا(ساکا) تۆرکلری بو بایراما ساخاسارسیق،سارسیک، و پاینا گۆنۆ آدلاندیراراق اوْدلار قالاییب، بیر - بیرلرینه گؤزل بایرام‌پای‌لاری وئریب، شنلیک ائدرلر.
آلتای تۆرک‌لری بو گۆنه؛ قیشتیم یا سرسار و پاینا گۆنۆ دئییب، دادلی یئمک پیشیریب، قوربان‌لار کسیب، دوْمبارالاری سسلندیریب،بایرام توتارلار.
تۆرکمن‌لر بو بایراما «گۆن دوروشو» دئییب، قیشا حاضیرلانیرلار، اوْنلار بو گۆن دادلی یئمک‌لر پیشیریب، پایلایارلار
بیرلیک‌لرینی داها دا گۆجلندیررلر.
تووا تۆرکلری بو گۆنۆ «سرسار،سارسی و پاینا» آدلاندیریب باشقا تۆرک‌لر کیمی بؤیۆک توْنقال‌لار قالاییب بایرام ائدرلر.
بو دب‌لری ناردوْغان بایرامی اۆچۆن سایدیغیمیزدان سوْنرا چیلله آدی چوْخ ایلگینج گلیر، بلکه بوگۆنلر سایین ناصرمنظوری‌نین یازدیقلاری اساسدا هامی چیلله‌ آدینی یای(کمان)ین نهایت چکیلمه‌سیندن توتولما بیلیرلر، آنجاق خاکاس تۆرکلری یازین ایلک بایرامینا «چیل پازی» دئییرلر
همن بایراما آلتای‌ تۆرکلری جیلگایاک
جیل؛ ایل
گایاک/قایاق؛ قاییق
ایل‌ین دییشلدییی گۆن آنلامیندا.
جیل و چیل سؤزلری بوگۆن اوْغوز تۆرکلری ایچره ایل و ییل دئییلیر
ایندی گۆنش‌ین یئنی‌دن دوْغوشونو نظرده توتساق، چیل‌له؛ دوْغوش و یارانیش و زامانین دؤنۆشۆ آنلامیندادیر.

یازی‌نین داوامی ایکینجی بؤلۆمده

داود عبدی (Taymaz)

16 December 2025 17:01

دارا چکیلن وارلیغیمیز

دایان سازاق،اسمه کۆلک
یانان کیتاب ائدیر دیلک
بلکه کؤزرتیسی سؤنسون
آنا دیله تۆرکجه دؤنسون

ـ قیش، قددارجاسینا سۆموکلره سیزان سویوغونو، یئتیم قالان اوشاقلارین یالین آیاقلاری‌لا، خییاوانلار اۆسته سریلن کفنسیز جسدلره پای وئریردی،
شهرین اۆستونو دومان‌ـ‌چن بۆروموشدو، قورخو دومانی. گئجه‌لر ـ آنالارین اوغول وای سسلری‌، یئتیم بالالارین قیشقیرتیسی‌، سئوگیلی‌لری آسیلان گنج‌لرین اینله‌مه‌لری، تبریزین دولانبادولانج کۆچه‌لرینده یئلین حزین سسینه قوشولاراق، خان‌لارین سیرفالاری باشیندا کئفله‌نن جاللادلارین گؤیه قالخان قاققیلتی‌لاری آلتدا بوغولوردو،.....
نئچه گۆن اؤنجه‌دن باشلانان جینایتلر، ۲۵ ـ جی گۆنون باتماسی‌لا چیرکین بیر فیکرین یارانماسیندان و صاباح صۆبحون داها بؤیوک بیر جینایتین باش توتدوغوندان خبر وئریردی،
هله ساراب‌لا اردبیل فدایی‌لری‌نین گۆلله‌لری بیتمه‌ییب آزادلیغین سون قالالارینی قورویوردولار،
آنجاق ارک قالاسی‌نین قورخماز قهرمانلاری مرمی‌لری‌ـ‌گۆلله‌لری بیتدیکدن سونرا اؤزلرینی قالانین اۆستوندن یئره آتاراق، نئجه اؤلمکلری‌ایله ایگیدلیک، قهرمانلیق داستانلارینین سون صفحه‌سینی ایمضالامیشلار.
شهر ایت‌لر آغزینا دۆشموشدو و قودوزلار قوروقچوسوز اوشاقلار اۆستونه یۆرومکده‌ایکن، شئیطانی دا شاشدیران میندار ایش "ارتش آزادی‌بخش پهلوی!!!" و بویوندوروقلو نؤکرلری‌له پیلانلانیردی،
ارک قاباغی، مشق مئیدانی[ بوگۆنکو دانیشسرا مئیدانی] بیر داها میللت‌له دولاجاقدی،
آنجاق بیر ایل اؤنجه‌سی‌نین تام ترسینه.
خالقیمیزا گۆل یئرینه، گۆلله پای وئریلمیش حالدا، آنا دیل‌لرینی ده کین و نیفرت اودوندا یاندیرماق ایسته‌ییردیلر.
صۆبح آچیلمیشدی و گئجه‌نی چوخ چتین بیر دورومدا سحره یئتیرن تئللی‌له آناسی، گۆلوستان باغیندا اولان سیغیناجاقلاریندان ائشیگه چیخاراق، بوش خییاوانلاری آددیملاماغا باشلادیلار، کیمی‌لری یالتاقجاسینا شاه‌ین شکلینی ال‌لری اۆسته گؤیه قالخیزاراق پیشه‌وری و فدایی‌لره یامان ـ سؤگوش وئره‌رک، قویروق بولاییردیلار.
تئللی هئچ نه سورمادان نییارانجاسینا آتاسینین گلمه‌یینی گؤزله‌ییردی، بیر ایل اؤنجه آناسی‌لا ائله بو خییاواندا آتاسی‌نین رئژه گئتدیگینی گؤروب سئوینجک حالدا، او منیم آتامدیر دئیه آتاسینی یولداشلارینا گؤرستمیشدی.
او گۆن ده رئژه وارایدی آنجاق رئژه گئدیب آیاقلارینی یئره دؤین‌لر فرقلی، جنایته و قان تؤکمه‌یه آج گؤزلری دویماق بیلمه‌ین عسگرلر.
نازلی آناسی‌نین دالیندا سیغیناراق بیر آددیم دالی گئتدی، بیرازدان سونرا بیر کیشی چارپایا اۆستونه چیخاراق، نه‌لر دانیشدی‌ایسا تئللی هئچ نه آنلامادی...
ـ تئللی‌نین گؤزلری کین اودونا قوربان گئدیب آلیشان " آنا دیلی" و آنا دیللی کیتابلاردایدی.
همن او دارا چکیلن کیتابلاردا
بلکه او گۆن کیتابلاریمیزا اود وورولدو، آنجاق ائله همن اودون آلاولاری تئللی و آذربایجان بالالاریندا اینتیقام دویغوسونو جانلاندیردی ......

یاندیردیلار دیلیمی
یاندیردیلار ائلیمی
اود ووروردو ساتقین
سانیردی سیلینه جک
دیلیم ـ شانلی ائلیم
نه سیندیق
نه سیلیندیک
یانان کیتابلارین کؤزوندن
گؤیه‌ریب جوجه‌ریب دیریلدیک
هله ده قولاغیمیزدا
مدینه‌لر سسی
بی ریانین ایستی نفسی
آنا دیللی:
اوخوللارین دیرچلمه‌سی
یانان کیتابلارین سسی
آنا دیللی اوخوللارین نَفَسی
گتیره‌جک یوردا آزادلیق هَوَسی.

داودعبدی
۱۳۹۷، ۹، ۲۶
@davud_ebdi

داود عبدی (Taymaz)

06 December 2025 18:27

آذر آییندا آچیلان چیچک‌لر

قاباقکی یازی‌لاردا آذر آییندا یوْرودوموزدا باش وئرن سئوینجلی و کدرلی اوْلای‌لار هابئله بو آی ایچره دۆنیایا گؤز آچیب، دۆنیادان اللری اۆزۆلن بؤیۆک‌لریمیزله تانیش اوْلساق دا، یاخین گۆنلرده تبریزیمیز و باشقا شهرلریمیزده باشلایان فرهنگی اوْلای‌لار؛ تاماشالار، تئاترلر، کوْنسئرت‌لر و.... بو آیی داها دا گؤزل‌لشدیریب.
بو ایلین آذر- ی قارسیز - قیروْوسوز کئچسه‌ده یوردوموزون پارلاق اولدوزلاری، آذربایجانین توْزلار و کیرلی دومان‌لار ایچره بوْغولدوغونو سایمادان همئشه‌کی کیمی وارلیغیمیزی قوْروماغا جان آتیرلار.

قوْچاق‌لار یوْردونون؛
بیر طرفیندن نبی‌نین سسی گلمکده، نبی‌میز، قاچاق اوْلسا دا قوْچاقلیغی داها قاباریق گؤرۆنمکده، ائشمه - ائشمه بیییقلاری‌لاری‌لا بیرگه چتین‌لیک‌لر قارشیسیندا نئجه دیک دایانماغی اؤیره‌درک، هجر-ی بوْز آتینا اۆزرلیک سالاراق، تایسیز اوْلان سئوگی‌لرینی دیل‌لره یایماقدا.

بیر آیری طرفدن کوْراوْغلو جنگی‌لری نظمه چکه‌رک، یئددی مین یئددی یۆز یئمیش یئددی دلی‌سینی چنلی بئلدن چنلی تبریزه قوناق گتیریب، قیرآت بئلینده میسری قیلینج‌ینی الده اوْیناداراق، نیگارین گؤزۆندن ایراق، بۆتۆن آذربایجانلی‌لارین سئوگیلی‌سینه چئوریلمه‌گی‌ایله بیرگه، بو ائلین و دیلین دوْستویلا دۆشمانینی بللی ائتمکده.

جان اوْرمودا دوز داغی تاماشاسی گؤزلردن آخدیران یاش‌لاری گؤلۆمۆزه ساری یوْللاماقدا.

بیر طرفیندن داملار - تاوان‌لار تاماشاسیندا سانکی ساعدی یئنی‌دن دیریلیب مشروطه‌ دؤنه‌می‌نین اوْ آغیر و چتین گۆنلرینی اؤزۆ روایت ائتمکده.

و باشقا بیر بوجاغیندان اؤلۆلری قویلایین تئاتری‌نین چالیشانلاری، ساواش‌ین نه اوْلدوغونو آنلاتماغا چالیشماقدا.

هۆنر، بیر میللتین اویغارلیغین ( تمددونون ) زنگین‌لیگی‌نین گؤسترگه‌‌سی‌دیر و دۆنیانین ایلکین و زنگین اویغارلیق‌لاری‌نین بیرینه یییه اوْلان میللتین، هۆنری ده گۆجلۆ اوْلار،
ارک ( شیر - خوْرشید ) سالوْنونو ییخسالار دا بئله، آشیق سازینی اؤزگه بایراغینا بۆکۆب یاندیرسالار دا بئله، آنا دیل‌لی کیتابلارینی کین اوْدوندا یاندیرسالار دا بئله و وارلیغینی دانماغا جان آتسالار دا بئله.

بیری گلدی بینا سالدی
بیری ییخدی اؤدۆل آلدی
اؤتن شؤهرت هاردا قالدی
یانیق قوْپوز فیکره دالدی

آنجاق، بو بؤیۆک میللت، تاریخین ان چتین آشامالاریندا وارلیق‌لارینی قوْرویوب اوْ چتین گۆنلریندن باشی اوجا چیخیب و اینانیریق یوردوموز، یئنی‌دن ایشیق‌لارا آچیلان آیدین سحرلرله اوْیاناجاق بیر گۆن....
بلکه ده ائله آذر آیی‌نین گۆنلری‌نین بیرینده.

داودعبدی
@davud_ebdi

داود عبدی (Taymaz)

22 November 2025 22:46

نه یاخشی کی سن وارسان آی صدفلی ساز [ زلیم‌خان یعقوب ]

  بیلمیرم نه‌دن آشیق آدی گلنده منیم بئینیمه چاتان ایلک یئر، تایسیز آشیق‌لار یوردو و اوْ وارلیغین سؤنمز اوْجاغی ساییلان اورمو شهری اوْلور.
منیم بو قوْنودا چوْخ آراشدیریلان علمی و بلگه‌لی قایناق‌لار و کیتاب‌لارلا ایشیم یوْخ، آنجاق تکجه اوْ بؤلگه‌نین آدلیم آشیق‌لاری‌نین آدلارینی گؤزدن کئچیرسک، اوْ گیزملی اینسانلار آشیق‌لیغین گیزملی هابئله سئحیرلی دۆنیایا نه‌دن آددیم قوْیدوقلارینی آنلاماق اوْلور.
آشیق امراه، آشیق آسلان، آشیق بولود، آشیق درویش، آشیق اوْهانس، آشیق آیواز، آشیق باهار و بوگۆن آرامیزدان کؤچن، اوْ قیزیل سوْیون سوْن بایراقچیسی اوْلان آشیق دهقان.
آشیق دهقانین آرامیزدان کؤچمه‌سی‌نین خبرین ائشیتدیگیم آندان بری، حالیمین پوْزولدوغوندان چوْخ، چاره‌سیزلیک کیمی، نییاران‌چیلیق کیمی نه بیلیم قوْرخو کیمی بیر دویغو منی چولغالاماقدادیر.
سئحیرلی و اوْسطوره‌وی سازیمیزین سوْن قوْروقچوسونون الدن وئردیگی‌نین آردیجا یارانان بیر قوْرخو.
آشیق‌لار تاریخین باشا - باشیندا، تۆرک خالق‌لری‌نین ازلی و ابدی وارلیق‌لاری اوْلسالار دا، من هئچ‌واقت قوْپوزا ساده بیر موسیقی آلتی کیمی، آشیق‌لاری دا معمولی اینسان‌لار کیمی گؤره بیلمه‌ییرم،
منیم گؤزلریم هر دؤنه سازلا سینه‌سینده سیلاحینی گزدیرن بیر آشیغی گؤرۆب ایشیقلاناندا؛ تانری‌داغ‌لاریندان آشیب، آلتای‌لاردان یوْلونو سالیب، سهند اتک‌لرینده منزیل سالان شامان‌لاری گؤرۆرم، سازلاری‌‌لا بو دۆنیا باغلانتی‌لاریندان آیریلیب گله‌جکدن خبر گتیرن اوْسطوره‌وی اینسانلاری گؤرۆرم،
هر یانیق کرم‌ینی ائشیدنده، سئوگی اوْدوندا آلیشیب - کۆل اوْلان کرم‌ی خاطیرلاییرام،
هر جنگی‌نین جهله‌مه‌سینده قیرآت بئلینده، میسری قیلینج الینده کوْراوْغلونو آنیرام،
هر گراییلی‌سی‌ایله بو دۆنیادان قوْپوب، اوشاقلیق چاغ‌لاریما قاییدیرام، هر بیر اوستادنامه‌ده اؤیۆدلر ائشیتدیگیمده آغ ساققال‌لی دده‌قوْرقود گؤزۆمۆن اؤنۆنده جانلانیر، هر دئییشمه‌ایله باغلاشمادا دده علسگری گؤرۆرم و هر دؤنه شیکسته‌ ائشیدنده غرور وئریجی هابئله قان جوْشدوروجو کئچمیشیمیزله - فاخیر تاریخیمیزی یادا سالیب کئفه دالیرام، باش ساری تئل‌ین کئفلندیردیگی کیمی بیر کئفلی‌لیک.
سؤزۆن دۆزۆ، منه بئله گلیر آذربایجان میللتیندن آشیق هاوالارینی آلسالار بو میللتین وارلیغی‌نین تمل دیره‌یی ییخیلار، بلکه ده ائله اوْ اۆزدن کئچمیش ایل‌لرده قوتسال سازیمیزی آمریکا بایراغینا بۆکۆب، جوما نامازلاریندا اوْدا چکدیلر، آشیق‌لاریمیزی دوستاق ائدیب وارلیغیمیزی قوروتماق ایسته‌دیلر.
آنجاق، آشیق دهقان و دهقان‌لار بو یوردون هر بوجاغیندان سازلارینی اله آلیب، دؤحتۆر علی قافقازیالی یازدیغیمی کیمی، هر بؤلگه‌ده یارانمیش اوْلان آشیق‌ موحیطینی قوْرویوب، بو سئحیرلی صنعتی بوگۆنۆمۆزه گتیریب چاتدیردیلار.
بو سؤزلری یازا - یازا هله ده اوْ قوْرخو مندن ال چکمه‌ییب
بلکه آشیق دهقان، ایشوْ نون *( آشیق یوسیف اوْهانسین باباسی ) دۆزلدیب ، آی - اولدوزلا بزه‌دیگی، تاریخی و تایسیز اوْلان اوْ آدلیم دؤرد سازدان بیری‌نین یییه‌سی اوْلماسایدی بوجور نییاران قالمازدیم.
آنجاق پاییزین بو قوْراقلیق گۆنلرینده آشیق دهقان، اورمو گؤلۆمۆزۆن قورودولماسی‌ایلا بیرگه، بو یورددان کؤچن دۆرنالارا قوْشولاراق آرامیزدان سس‌سیزجه‌سینه کؤچۆب، قیزیل سسی‌ایله اوْدلو نفسینی، تاریخ‌لرین یادداشینا پای وئردی.

*[ ایشو سازلاری آدی‌لا تانینان دؤرد آدلیم و تاریخی سازیمیزین بیرینی آشیق امراه جانوئیسلی آشیق میرزه‌علی نیولوئی‌یه ئرمیشدی، همن سازلارین بیری ده آشیق علی‌نین اوْغلو؛ آشیق ائیواز بابایی‌ده‌دیر، بیری آشیق یوسیف اوْهانس‌ین سازی‌ایدی، سوْنونجو ساز دا آشیق دهقانین سازی‌ایدی].

داودعبدی
@davud_ebdi

داود عبدی (Taymaz)

16 October 2025 18:57

کلمه‌لری کؤچۆره - کؤچۆره آرامیزدان کؤچن ایگید

آذربایجانین پارلاق اولدوزلاریندان ساییلان دؤکتۆر عباس‌پورون دۆنیادان کؤچمک خبری، چوْخ اینانیلمازایدی
یوردوموزا گؤردۆیۆ بؤیۆک و تای‌سیز ایشلری کیمی،
۸۰ - جی ایل‌لر، میللی حرکت‌ده بیزلر ایکی نفری مهندیس آدی‌ایلا سسله‌یردیک
بیرینجیسی رحمتلیک مهندیس امانی، ایکینجیسی ایسه یئنی‌جه رحمتلیک اوْلان مهندیس عباسپور
اوْ چاغ‌لار درگی‌لریمیزین بیلگی‌سایارلا باغلی ایشلرینی سئوه - سئوه، هئچ بیر گؤزلنتیسی اوْلمادان یئرینه یئتیرن مهندیس عباسپور بیر گۆن تئهراندا، ستتارخان مراسیمیندن قاییدارکن منه بئله دئدی، سیز درگی‌چی‌لره بیر خوْش خبریم وار؛ گلن گۆنلر و هفته‌لر ایچره بیلگی‌سایارلا باغلی بیر دئوریم اۆز وئره‌جک،"کؤچۆر" آدلی بیر بیلگی‌سایار برنامه‌سی حاضیرلاییریق،
بو برنامه‌ایله داها گؤزلرینیز درگی‌لرین ائدیتی و یازی‌لاری لاتین‌دن عرب الیفباسینا چئویرمک‌له یوْرولمایاجاق دئییب، قیرمیزی بوْیالی میللی پالتاری گئیینن، ستتارخان مراسیم‌ده شئعر اوْخویان "سانای" آدلی بالاجا قیزی‌نین الینی مؤحکم سیخاراق، سارسیلمایان آددیم‌لارینی داها دا مؤحکم گؤتۆردۆ.
بلکه بو گۆنلر، گنج نسلیمیز بیلگی‌سایارلار عالمی‌نین گلیشمه‌سی‌ هابئله سانال دۆنیاسی‌نین گۆجلنمه‌سی‌ایله کؤچۆر کیمی برنامه‌لرین ده‌یرینی بیلمه‌یه‌لر، آنجاق اوْ چاغ‌لار بیزلر اۆچۆن اوْ ایشلر بیر دئوریم‌ایدی...
گله‌ج‌ییمیزی ایشیق‌لاندیران بیر اومود چیراغی
و بو گۆن بؤیۆک اۆزۆنتۆایله بو اینانیلماز ایتکی‌نین آجیسینی یاشاییریق...

داود عبدی
@davud_ebdi

داود عبدی (Taymaz)

23 September 2025 10:16

دردی، درد اوْلموشدور ائلین ده منه

خزل آیی‌نین (مئهرین ) بیرینجی گۆنۆ، نازبالالاریمیزا؛ سئوینج هابئله موتلولوق‌لارلا دوْلو بیر گۆن اوْلا بیلردی؛ آنادیلیمیز ائولرده اوْنودولماسایدی...
شوْونیزم قوْخولو، اوْخول‌لارین آچیلیشی‌لا بیرلیکده، اؤلکه‌نین یۆزمین‌لرجه تۆرک اوشاغی‌نین آنا دیل‌لری‌نین یاساقلانماسینی باش ساغلیغی وئریب، دؤولت تۆرکان چوْ بلندی گرفت شئعرینی مسعود یاشایا - یاشایا اوْخویاراق، اورمو چؤلۆندن، قاناد چالیب قان چاناغی اوْلان گؤزلریمیزه قوْنان دوزلاری سیلیب گله‌جه‌یی گۆدۆب، آلماس ایلدیریمین آذربایجان درد ایچینده بوْغولموش شئعری خیالیمدان کئچیر.....

[ آشاغیدا گتیردیییم هابئله شاعیری‌نین آدینی اونوتدوغوم بو شئعر، خزل آیی‌نین بیرینجی گۆنۆنده ناز بالالاریمیزا قارشی ائدیلن ظۆلۆم دنیزی‌نین بیر داملاسی‌نین گؤسترگه‌سی‌دیر، البت دۆشۆنۆنلره ].

‌اولدوز و کؤکب

اولدوز يئددی ياشيندا 
قارا چارشاب باشيندا 
قوْشولاراق کوکبه 
يوْلا دۆشدۆ مکتبه 
معللیم ايلک درسينه 
ايقدام ائتدی ترسينه 
آنا ديلين بوشلادی
آيری ديلده باشلادی
دئدی: آچين کيتابی 
بيلن وئرسين جاوابی
چؤره‌یی گؤستره‌رک 
اولدوز سسلندي: "چؤرک"
يوخ! کؤکب جاواب وئر: "نان" 
اولدوز ائشيت ـ سن ده قان! 
سؤيله اولدوز! نه دير بو؟ 
اولدوز جاواب وئردی: "سو"
يوخ! کؤکب سن وئر جاواب!
کؤکب جاواب وئردی: "آب" 
کؤکب سئوينجه دوْلوب 
اولدوزون رنگی سوْلوب 
سوْلوب داياندی اولدوز 
اولدوز تک ياندی اولدوز 
ائوه گلنده آنا 
اوْنو باسدی باغرينا 
"آنا قوربانين اوْلسون! 
نه يازدين ـ نه اوْخودون؟" 
دن سو وئريب قوشونا 
کئچدی سوفرا باشينا 
"سوْال وئردی: آنا جان! 
بو "چؤرک"دير يوخسا "نان"؟ 
بس بو نه دير "آب" می "سو"؟
آنا جاواب وئردی: "سو"
اولدوز سئوينديييندن 
آناسی‌يلا اؤپوشدو 
آنا باخيب اۆزونه 
سؤيله‌دی اؤز ـ اؤزونه: 
يا معللیم آزيبدير! 
يا کيتاب سهو يازیبدیر.

داودعبدی
@davud_ebdi

داود عبدی (Taymaz)

16 September 2025 21:28

بیردنه ده ایکی یۆز مئتیرلیگین بیزیم کۆچه‌نین باشیندا تیک، سرورم

دئییلن‌لره گؤره کئچمیش چاغ‌لار بیر نفر سوچلونو قاضی یانینا آپاریرلار، قاضی جنابلاری سوچلویا مین دنه قامچی وورولماسینی بویوروق ائدیر.
سوچلو، قاضی‌یه اۆز چئویریب؛ دئییر سایین قاضی یا بوگۆنه کیمی قامچی یئمه‌ییبسن، یا دا سای بیلمیرسن، آخی مین دنه ده قامچی اوْلار؟
ایندی بو گۆنلرین گۆلمه‌جه‌سی اوْلان اوستاد گودرزی‌نین ده پایلاشدیغیم ویدیودا بو قیزا وئردیگی سؤز، همن قامچی‌‌لا قاضی قضییه‌سینی یادا سالدی.
سایین اوستاد، ائی کوروش زمان، ائی بشرییتین جانلی منشورو، ائی جانلی پییاده‌ رو ، ائی پئیکرتراش اعظم، ائی ....
گل اه‌یری اوْتوروب دۆز دانیشاق، آخی بو اؤلکه‌ده یۆز مئتیر اوجالیغیندا دا هئیکل (مجسمه) دۆزلتمک اوْلار؟
هیند، چین، میانمار کیمی اؤلکه‌لرده اوْ‌ ایش گؤرۆلۆبدۆرسه، و یۆز مئتیردن یوخاری هوندورلوک‌لری اوْلان هئیکل‌لر تیکیلیب‌دیرسه اوْنلارین اینانج‌لاریندان قایناقلانان ایراده، هابئله وارلی دؤولت‌لری‌نین آرخا دورماقلاری اساسدا بو ایش‌لر باش توتوب.
ایندی بو اؤلکه‌ده دؤولت، ایشچی‌لری‌نین آیلیغی‌نین اؤده‌مه‌سینده قالدیغی گۆنلرده یۆز مئتیر سهلدی، یۆز سانت‌لیق هئیکل سالدیرماغا دا بودجا آییرا بیلمز، مندن دئمک ها، سؤز وئریرسن یئرینه گتیره بیلمه‌سن کوروشون روحو اینجییر ها.
ایندی سیز اؤزگۆرسۆنۆز ال داشقانیزی آرخانیزجا سۆرۆتله‌یه - سۆرۆتله‌یه دۆنیانین دؤرد بوجاغینی گزه‌سیز ( هئچ کسی ایلگی‌لندیرمز )، آنجاق اؤزۆنۆز قوتسال آدلاندیردیغینیز بو گزینتی‌نیزی یالان‌لار یایماق‌لا کیرلندیرمه‌یین، آخی دئییلن‌لره گؤره قیبله‌نیز و آمالینیز ساییلان کوروشونوزون یالاندان آجیغی گلرمیش [ دئییرلر منشوروندا یازیبدیر، قادین‌لارا دوْغوم بوراخیلیشی(مرخصی زایمان)، تعیین ائتدیگی بندین دالیسیجا یازیب باخ  ].
البتته تکجه دئییلن گؤره ها، هله بو گۆنه دک گؤرن اوْلماییب اوْ چئرتان - پئرتان‌لاری.
اۆزۆن گۆلسۆن هئی اوستاد گودرزی، اؤلکه‌نین بو آغیر ایقتیصادی دورومو و ایش‌سیزلیک گۆنلرینده، گئنه سن باخ، هخامنش سربازلاری قیلیغیندا، آلینینا باغلادیغین اوْ تومان باغی‌لا، بئش - اۆچ دیقه اۆزۆمۆزۆ گۆلدۆرۆرسن سرورم !!!

داودعبدی
@davud_ebdi

داود عبدی (Taymaz)

07 September 2025 11:59

نه دئییم آخی

سوْن چاغ‌لار تۆرکجه‌‌میزین اسکی دانیشیق فوْرملاری، چئشیدلی آغیزلاری، دئگی‌لری و... اۆزره بالاجا بیر چالیشیق و آراشدیرما آپارارکن، آذربایجان تۆرکجه‌سی‌نین لاپ بوگۆنکۆ دانیشیق طرزیندن هئچ نه بیلمه‌دیگیمی آنلادیم.
اوْلای بئله باشلاندی؛ تانیش‌لاردان بیری زنگ آچیب باشیم چیخمادیغی بیر قوْنویا گؤره سوْرغولار سوْروشماغا باشلادی.
آنجاق قوْنون سیخیجی یئری؛ سوْرغولاری‌نین ایلگی‌سیزلیگیندن چوْخ، تئز - تئز آره، باشه، ببخشید، کیمی سؤزلرین ایشلنمه‌سی‌ایدی، هم ده یئرسیز و نه‌دن‌سیز.
مثلا بیر سؤز دئییردی، آغزیمی آچیردیم جاوابلایام هئی دئییردی آره دا، ببخشید. هله آرادا بیردن دوردوغو یئرده وای ببخشید دئمکلری لاپ سینسیدیرجی هابئله بئزیکدیریجی‌ایدی.
چوْخ شۆکۆر هله، نه سؤزۆنۆ  اؤیرنمه‌میشدی، یوْخسا ایپیم داها دا ائشیله‌جکدی.
بیردن دئدیم فیلانی ایمکانی اوْلسا فارسجا دانیشاق دا، منظورونو داها راحات آنلاییم دا.
دئدی نه عجب؟ گؤزلریمیز آیدین، دییشیلیبسن؟ فارسی، جانا - بالا
دئدیم من دییشیلمه‌میشم آنجاق، سنین بو طرز دانیشیغیندان هئچ نه باشا دۆشه بیلمیرم آخی.
یا دا مۆمکۆن‌سه لۆطف ائدیب، سوْرغولارینی اس‌ام‌اس یوْلویلا خبر آل دئییب هله‌لیک‌لشدیم.
ته‌ دیگ، ته تاغاری‌، چاق، لاغر سؤزلرینه تزه آلیشارکن بو؛ آره، باشه دا، وای ببخشید، ممنون، نه کیمی سؤزلری دیلیمیزه یئرلشدیرمک، بئینیمه لاپ قوْورا(سوْهان) چکیر.
هئچ بیلمیرم مین ایللردن بری قوْرونوب بیزه چاتان بو گؤزل دیلی ساخلاماغا عۆرضه‌میز اوْلاجاق، یوْخسا آنادیلیمیزی ده گؤلۆمۆز تک یادلارا قوربان وئره‌جه‌ییک.
وای ببخشید، خیلی اوزون اولدو بو نوشته‌م، آره دا ، ببخشید.
سؤزۆن سوْنوندا هئچ دئمیرم اوتانیم یئرینه آی اوتانماز، تکجه دئییرم؛
نه دئییم آخی!!!

داودعبدی
@davud_ebdi

داود عبدی (Taymaz)

10 August 2025 12:19

۱۳۸۲ - جی ایل، سوْیوق‌بولاقدا اوْخودوغوم چاغ، بولود درگیسی‌نین یئنی ساییسی‌نین چاپ پولونا معطل قالدیغیمیز گۆنلردن بیری، سولدوزلو دوْسلاردان بیری‌ گلیب منیم لاپ حالیمین پوْزغون چاغیندا، جناب تاریخچی، داییم گیلی تئهراندان چکیب گتیرمیشم بورا، دور بیزی آپار اوْ دئدییین ماننا - مادلارین گوْرلارینا.
بیرآن مات قالیب، سوْنرا اوْنلارلا اگری‌قاش (اه‌یری قاش) کندینه ساری یوْلا دۆشدۆک، فاخری‌قان ( یئرلی‌لرین تلفوظویلا پاخیرقات/ پاخری‌قات) گوْر داخمالارینا چاتدیغیمیزدا، من بئش - اۆچ دقیقه اوْ کؤهول‌لرین تاریخینه گؤره آچیقلاما وئردیییم آن، بیر اوتوبوس دوْلوسو کۆرد، اوْرا گلدیلر.
اوْنلارین آرالاریندان بیری یوخاری قالخیب کۆرد دیلی‌جه بیزه خوْش گلدین ائتدی، آنجاق تۆرک اوْلدوغوموزو بیلندن سوْنرا، قاشلارینی بیر - بیرینه دۆیۆنله‌یرک یوْلداش‌لارینا نه‌‌سه دئییب، بیزدن آرا آچدی.
یئرلی پالتارلاری‌‌لا فخر ساتان دسته - دسته کۆرد اوْرانی سانکی زیارته دییل فتح ائتمگه گلمیشدیلر، کیمیسی شام یاندیریب، دیلی‌نین آلتیندا نه‌لر دئییردی.
کیمی‌لری ایسه قوْل - قوْلا یاپیشیب اوْ کیچیک یئرده یاللی گئتمگه باشلادیلار.
بیز اوْنلارین قالابالیغیندان آرا آچاراق بیر قایانین کؤلگه‌سینده چای ایچیب دینلنمگه اوْتوردوق، آنجاق کدردن دوْلموش گؤزلریمی، کۆردلرین رحلی - بزکلی پالتارلاریندان چکه بیلمیردیم، باخا - باخا اؤز دۆشلریمین درین‌لییینده اۆزۆردۆم،
بیردن یوْلداشیم‌ین گؤرۆم دا بالامسان بلکه بو کۆرد قیزی‌لارینین بیرینه ده وورولدون ها، دئدییینده اؤزۆمه گلدیم.
سؤزۆن دۆزۆ، اوْ آن اوْ کۆردلره حسرتله باخیب ایچیمدن بونلار کئچیردی: نئجه بیزیم میللت، اؤز میللی گئییمیمیزی گئیمکدن چکینیر، نئجه بونلار گلیب آذربایجانین لاپ اۆره‌یی‌نین باشیندا پۆلک‌لی - مینجیقلی پالتارلارینی گئییب فخر ساتیرلار و....
گؤره‌سن بیز ده بیرگۆن اؤز دیلداش‌لاریمیزی میللی پالتارلاریمیزلا فخر ساتارکن، تاریخی یئرلریمیزده گؤره بیله‌جه‌ییک و....
آنجاق قاراباغیمیزین اؤزگۆرلۆیۆن گؤره بیلن گؤزلریمیز بونو دا گؤردۆ
بیر - ایکی گۆن بوندان قاباق دۆشۆنجه دوْلو، غئیرتلی دوْسلاریمیز، ساوالانین زیروه‌سینده، آت گؤلۆ چئوره‌سینده اوْ سوْیوق هاوادا میللی گئییم‌لریمیزی گئیینیب، تۆرکۆن بایراغینی دالداندیراراق، بو سئوینجی ده بیزلره یاشادیب، اوْ حسرتی ده اۆرییمیزدن قالدیردیلار.
بو نئچه سطیرله اوْنلارا میننتدارلیغیمی بیلدیریب، توتدوقلاری قوتسال یوْلدا باشاری‌لار آرزی ائدیرم.

داودعبدی
@davud_ebdi

داود عبدی (Taymaz)

22 July 2025 22:05

آنادیلمیزین یئنی قیرامئری قورالی

ایللر بوْیو آنادیلیمیزی اؤیرنمگه جان آتان بیریسی اوْلاراق، سوْن گۆنلر ایچره بیر یئنی قورال‌لا تانیش اوْلدوم؛ اوْ دا گ سسی‌نین چ سسینه دؤنۆشمه‌سی‌ایدی.
بلکه قیرامئر باخیمیندان بو دؤنۆشۆم اۆز وئره بیله‌سی دییل، آنجاق گۆنلۆک یاشامیمیزدا اورمو گؤلۆنۆ ، اورمو چؤلۆنه چئویرمگی باشارانلار دیلیمیزه ده بو سس دؤنۆشۆمۆنۆ پای وئردیلر،
عزراییلین اوشاق پایلاماسی کیمی....

@davud_ebdi

داود عبدی (Taymaz)

29 March 2025 15:16

سیزین ده قاپینیزدا یاتارمیش بو آغ دوه،
یاتیر اؤزۆ ده لاپ یاخشی یاتیر

- بو یازینی نئچه ایل بوندان قاباق، جاواد طباطبایی‌نین اؤلدۆیۆ گۆن یازمیشدیم آنجاق ایشلک سۆره‌سی(تاریخ انقضاسی) اوْلمایان بیر یازی اوْلدوغو اۆچۆن؛ احمد سمیعی گیلانی‌نین میندار دۆشۆنجه‌لری ایچره بوْغولان گۆنۆنده ده یئنی‌دن پایلاشیرام.
تۆن به تۆن اوْلموش سمیعی نه‌قدر بی‌فرهنگستان فارسی‌ده ویراستارلیق ائتسه‌‌یدی ده اؤز فرهنگسیزلیگینی، فاشیست دۆشۆنجه‌سی و میندار باخیشلارینی ائدیت ائده بیلمه‌دی اوْنو یاخشی تانیماغینیز اۆچۆن تکجه بیر جۆمله‌سینی ائشیتسز یئترلی‌دیر؛
"منیم تکجه قوْرخوم: تۆرک دیلی‌نین آرادان گئدیب، محو اوْلماسینی گؤرمه‌دن اؤلمه‌ییم‌دیر".

۱۳۸۲ ـ جی ایل پرویز ورجاوندله یاریم ساعات ـ قیرخ دقیقه لیک بیر دارتیشمانین سوْنوندا؛ سوْن سؤزو منه بو اوْلدو؛ من و منیم کیمی ایران سئورلر یئر اۆزره نفس آلدیقجا، سیز جوجه پان تۆرکلر ایستکلرینیزه چاتا
بیلمه یه‌جکسینیز و آنادیلینیزده درس اوخوماق آرزی سینی اؤزونوزله گوْرا آپاراجاقسینیز.
من اوْ گۆن مات قالمیشدیم
بیزیم دانیشیق تاریخی اوْلای‌لار اۆزره بیر ساده دارتیشمایدی، آنجاق آرزی لاری کیمی گوْر به گوْر اوْلموش پرویزخان، بحثی ساواشا ساری یؤنلندیریب، بؤیوک قارماشیق یارالتدی.
اوْنون و نوْچالاری نین باخیشیندا تکجه اونلارین دۆشوندوکلری دۆزویدو و باشقالاری گرک اونلارین تئزلرینه بوْیون ایرمیشلر.
زامان کئچدی و من او دانیشیقدان نئچه ایل سونرا [ ۸۶ ـ جی ایل ]  دیل کیلاسلاری نین بیرینده، آنادیلیمیزی اؤیره‌تدیییم گۆنلردن بیری، آنادیلیمیزین تحصیلینی گوْردا دییل،وایت بورد اۆزره گرچکلشدیردیییمیز آن، پرویزخان ورجاوندین گوْر به گوْر اولماسی نین خبرین ائشیدیب، او آن همن او گۆنکو دئدییی سؤزلری گؤزلریم اؤنونده جانلاندی؛
"نه قدر من و منیم کیمی ایران سئورلر دیری ییک سیزلر آنادیلینیزده تحصیل آرزیسینی گوْرا آپاراجاقسینیز؛ آنجاق بیز اوْ گۆن آنادیلیمیزی درس اوخویارکن ورجاوند جنابلاری نین اؤزو و دۆشونجه‌سی گوْرلارا قیسمت اوْلدو.
همن خوش خبرلرین بیریسینی ده ائله بوگۆن آلدیم ـ دوستلاردان بیری موشتلوق ایسته ییب؛ سئیدجواد طباطبایی نین ایران کندیندن[شهریندن] مینلر کیلومئتر اوزاقلاردا میندار دۆشونجه لری ایچره بوغولماسی نین خبرینی وئردی.
بو خبری آلدیغیمدا من گئنه باشقا بیر یولداشیمیزا قارشیلیق لی فئعل لری آچیقلاماقدایدیم،
خبری ائشیتدیییمده [ هئچ کسین اؤلوموندن سئوینمه رم ها ]، آنجاق اینجه بیر گۆلومسه مک دوداقلاریما قوْناق اوْلاراق، بو فیکیر بئینیمدن کئچدی؛
بیزلر آنادیلیمیزی قوْرویوب ـ ساخلایارکن بو دیلین دۆشمانلاری بیر ـ بیر، چیرکین دۆشونجه لرینده بوْغولاراق توْرپاغا گؤمولورلر.
سونرا بئینیمده بئله بیر سورغو یاراندی؛  گؤره سن وحید بهمن، حجت کلاشی و باشقا ایرانشهر دۆشونجه سی نین کوْر مۆرۆدلری یئر اۆزوندن سیلینرکن، بیز آنا دیلیمیزین هانسی بؤلومونو اوخوماقدا اولاجاغیق؟
ائله بو گۆن ده احمد سمیعی تۆرکجه‌نین آرادان گئتمه‌سینی گؤرمه‌دن میندار اوْلدوغو حال بیز یئنه ده آنادیلیمیزی اوْخویوردوق.

داودعبدی
@davud_ebdi

داود عبدی (Taymaz)

18 February 2025 09:42

اَفَلا تَعقِلونَ، أفلا تَتَفَكَّرُونَ، اَفَلا تُبْصِرون

بهمن آیی‌نین ۲۸‌-جی گۆنۆ، تئهراندا آذربایجان‌ین فرهنگی هفته‌سی سوْنا چاتدی، سوْن گۆن اۆچۆن دۆزنله‌نن تؤرنده اؤلکه‌نین جومهور باشقانی، جناب دؤحتۆر پزشکییان دا دانیشیق اۆچۆن تیریبون آرخاسینا کئچیب، میللتین تۆرکجه دانیشماق ایسته‌یی قارشیسیندا اوستاد شهرییاردان بیر شئعر اوْخوماق قناعتینه گلیب، گۆلر اۆزله میللته بونو یئتیردی، ائله بیر دنه شئعر اوْخوماغین سوْرونو یوْخدور، یوْخسا وار؟
آنجاق بللی ائدیلمه‌دی هانسی مۆشکۆل و سوْرون؟ کیملره قارشی سوْرون و هانسی باخیمدان بیر سوْرون؟
دؤحتۆر پزشکییانین بۆتۆنلۆکجه دوْغرو و دۆزگۆن بیر اینسان اوْلدوغوندان هئچ شوبهه‌م یوْخدور [ذاتا بو سؤزۆ ۹ ایل بوندان قاباق دؤحتۆر پزشکییان‌لا ایکی ساعاتلیق بیر دانیشیقدان سوْنرا دا دئمیشدیم، سئچکی‌لر دؤنمینده اؤزۆم قاتیلمادیغیم حالدا دا رأی وئرمک ایسته‌ین‌لره دئدیییم کیمی گئنه ده دئییرم و دئیه‌جه‌یم ده] آنجاق، بو اؤلکه‌ده جومهور باشقانلیغینا یوْخسا هر بیر سوْروملولوق داشیماغا دوْغرولوقدان چوْخ، کسرلی‌ و اوْلماق لازیم‌دیر.
یوْخسا بیر بالاجا تذکر لا دالی اوْتوروب، شئعرینی سوْنا چاتدیرمایان بیر جومهور باشقانی‌لا سانماییرام مسعود یاشاماق اوْلا، آآآآآی مسعود یاشاماقچی‌لار.
بو اوْلایدان سوْنرا، اؤز - اؤزۆمه دئدیم کاش جناب پزشکییان، اؤزۆنۆ مهدی باکری‌نین وارثی بیلدییی حالدا، حاج مهدی‌‌نین جسارتیندن بیر ذره‌جه‌سینی اؤزۆندن گؤسترردی.
شهید باکری‌نین تئل‌سیزلردن (بی‌سیم‌لردن) یاییلان سوْن دانیشیغیندان، مافوْقون سؤزۆنۆ نئجه هئچه سایماغی، اؤز اۆرک سؤزۆنۆ دینله‌مه‌یی و اۆرک‌لرین سولطانلیغینی قازانماق یوْل‌لارینی اؤیرنمک اوْلار، بدلی ده قیزیل قانلا اؤده‌نمک اوْلسا بئله.
آنجاق او تؤرنده جومهور باشقانیندان یوخاری بیر کیمسه و هئچ بیر مافوْق یوْخویدو و ائله همن تذکر کاغاذی بۆکه‌له‌نیب یئره آتیلیب، شئعرین داوامی جسارتله اوْخونوب سوْنا چاتدیریلسایدی، سئچکی‌لر چاغی دؤحتۆر اۆچۆن جاندان، اۆرکدن چالیشانلارین حاق‌لاری اؤده‌نمیش اوْلاردی‌، آنجاق گۆله - گۆله تسلیم اوْلوب شئعرین اوْخونماماسی هرنه‌دن چوْخ دؤحتۆرۆن سئون‌لرینی اومودسوزلوغا قاپساندیردی،
دۆنندن سانال دۆنیاسیندا باخین
گؤرۆرسۆنۆز: جومهور باشقانی‌نین تۆرکجه بیر شئعر اوْخوماغینا ایذین وئرمه‌ین سیستئم بیزی حب کیمی آتار و... کیمی سؤزلرین یاییلماسی‌نین قاباغی آلینماقلا بیرگه، بلکه بوگۆن جومهور باشقان‌لارینی سئون‌لر اوْ ایشی توْجیح ائتمک اۆچۆن پانفارسیسم و فاشیستین گۆجۆنۆ داها قاباریق و بؤیۆک گؤسترمک مجبورییتینده قالمازدیلار.
سؤزۆ چوْخ اوزالتمادان گئنه بیلیرم ائله اؤزۆمۆزۆنکۆلر داها چوْخ سرت تپکی‌لر گؤستره‌جک‌لر آنجاق بو یازی‌یا بیر - ایکی سوْرغویلا سوْن قوْیورام،
گؤره‌سن جناب دؤحتۆر ایلک اؤلکه دیشی گزیسینده نیچروان بارزانی‌ایله کۆردجه دانیشدیغیندا دا، همن تذکر مضمونلو تیکه کاغیذلاردان آلدی، یوْخسا تکجه تۆرکجه دانیشماق یا بو دیلده ایکی بئیت شئعر اوْخوماق یاساقدیر و میللی گۆونلیگی تهلوکه‌یه آتیر؟
بیر ده سیز اوستادلارین نظرینه گؤره، بیر تیکه کاغیذلا تصمیمیندن واز کئچن بیر جومهور باشقانی، کئچمیش گۆنلر اوْرتایا قوْیدوغو، والی‌لیک‌لره(اوستانداری‌لره) بوْل اختییارات‌ین وئریلمه‌سی و دیلده یئرلی فئدرالیسم کیمی بیر بؤیۆک پوْروژه‌نی نئجه باشا چاتدیرا بیله‌جک؟ یوْخسا گۆله - گۆله دئیه‌جک بونون دا اشکالی وار و اوْ جریانین دا دفتری بۆکۆله‌جک؟
بو آرادا، کئچن گۆن سایین دؤحتۆر میرعلی رضایی‌‌نین؛
رحمتلیک حئیدر علیئف جنابلارینا هرنه‌قدر اینتیقادی باخیشیم اوْلسا دا، آنجاق اوْ بویدا شوروی حوکومتی‌نین دیکتاتورلوق سیستئمی‌ ایچره، باشقا میللت‌لره گؤره، آزینلیق ساییلان آذربایجانلی‌لارین کۆلتۆرۆ و دانیشیق دیللری اوْلان آذربایجان تۆرکجه‌سینی نئجه گۆنده‌مه گتیردییینی بو اؤلکه‌نین چوْخونلوقدا اولان آذربایجانلی‌لاری‌نین دیلی‌نین یاساقلانماسی و بو یورددان تئهرانا، مجلیسه، باشقانلیغا و.... یوْل تاپمیش اینسانلارلا دؤحتۆرلرین، دیللرینه، دبلرینه، وارلیق‌لارینا گؤره سوْرومسوزلوقلارینی گؤزلجه‌سینه قییاس ائتدیگی یازیسی چوْخ یئرلی گلدی.

و نه گؤزل دئدی ائله جناب پزشکییان
«حئیدربابا گۆنلریمیز بیر - بیریندن یاماندی.....»

گؤزل یوردوموزون خوْش گۆنلرینی گؤرمک اومودویلا....

داودعبدی
@davud_ebdi

۱۴۰۳/۱۱/۲۹

داود عبدی (Taymaz)

20 January 2025 17:59

۲۰ یانواردان ۱۵ تئمموزا گئدن یول

تۆرک میللتی , تاریخین هر بیر صفحه سینده چوخلو ائنیش لرله یۆکسلیش لری دادیب, آنجاق بیر سیرا صفحه لری واراقلادیغیمیزدا دؤنوش نوقطه لری(نقاط عطف) ده آز دییل.
بلکه ۱۹۲۰ ـ جی ایل, اولو اؤندر محمدامین رسولزاده نین قوردوغو باغیمسیز آذربایجان بایراغی, جمهوریتیمیزین باش کندی اولان گنجه شهرینده قدار بلشوییک لرله باکی قاطاری لا هجوم گتیرین ساتقین کومونیستلرین آیاقلاری آلتیندا ازیلدییینده، کومونیست لر، موسکووا شهری کومونیست دۆشونجه سیندن ال چکسه بئله, باکی کومونیستی بوراخمایاجاق خولییاسیندا کئف ائدرکن، هئچ ده فیکیرلرینه چاتمازدی، ائله همن باکی شهرینده یاشایانلار اؤزلوکلرینه قاییتدیقلاری آن تکجه آذربایجاندا دییل، بۆتون شوروی اؤلکه سینده [ حتی دۆنیا اۆزره ]، کومونیسم ین پرونده سینی بؤکمه یه و بو دؤنه آی ـ اولدوزلو بایراق یئرینه، اوراق ـ چکیشلی قیزیل بایراغی یئره سرمه یه جان آتاجاقلار.
ائله بو اۆزدن ۲۰ ـ یانوار(ژانویه)[قارا یانواری خالقیمیزا یاشاتدیلار]، تانک لار، ائرمنی چته لری ایله بیرلیکده باکی نین قهرمان میللتینی قورشونلارا دۆزرکن، خالقین پولاد ایراده سی و میللی, دیره نیشی قارشی سیندا، قوللوقچوسو اولان کومونیستی دۆشونجه نین قبرینی ده اؤز اللری ایله قازیردیلار.
او گۆن باکی و بیر نئچه باشقا شهریمیزده بلکه گنج لر شهید اولوب، شاعیرلرله ـ آیدین باخیشلار زیندانلارا آتیلدی، آنجاق او قارا گۆن، بیر آیدین گؤرونتو یادداشلارا یازیلاراق، تۆرک خالقی نین تانک لار اؤنونده نئجه دایاندیقلاری تصویره چکیلدی.

بلکه ده ۲۶ ایل سونرا، ۱۵ تئمووز دا [ژوئیه ده]، قارداش اؤلکه تۆرکییه ده، فتح الله گۆلن ین تئرورچولاری لا کودتاچی لاری بیراز تاریخ اوخوسایدیلار, بونو یاخشی آنلایاردیلار؛
تۆرک خالقی نین ایراده سی اولمادیغی سۆره، تانک لارلا قورشونلارین گۆجو اؤزگۆرلوکلری ایله، دئموکراسی لرینی قوروماغا کؤکسلرینی قالخان(سیپر) ائدن گنج لرین گۆجوندن داها اۆستون اولا بیلمز، قارا یانواردا اۆستون اولمادیغی کیمی.

۲۰ یانوار ۲۰۲۲
داودعبدی
@davud_ebdi

داود عبدی (Taymaz)

07 January 2025 14:17

فوتبال، فوتبال گئنه ده فوتبال

بو یازی‌ ۱۳۹۹ دا تیراختورون النمه(حذفی) توْروندا شامپییون اوْلدوغو گۆن یازدیغیم همن یازی‌دیر، آنجاق سوْن گۆنلرده تئلویزیون،سانال دۆنیاسی، فئدراسییون،ابر و باد و مه و خورشید و فلک‌ین تیراختور قارشی‌سیندا دایانیب صف چکدیکلرینه گؤره بیر سیرا آرتیرمالارلا یئنی‌دن پایلاشیلیر .

فوتبال کلوپ‌لاری‌نین یؤنه‌دن‌لری‌ چالیشیرلار، کلوپلارینی سییاسی آخیملاردان اوزاق و تکجه فوتبال کلوپو کیمی تانیتسینلار،
اوْیونچولار دا چالیشیرلار تیم‌لری آیید اوْلدوغو بؤلگه‌نین سییاسی جریانلاریندان قیراقدا دوروب، اوزاق قالسینلار، آنجاق اوْنلارین نئجه دۆشوندوکلری چوْخ دا اؤنملی دییل، بیر کلوپ هوادارلاری‌نین دۆشونجه‌سی‌ایله آنلام تاپیر[فوتبال علیه دشمن،سایمون کوپر، عادل فردوسی‌پور چئویرمن‌لیگی‌ایله،ص: ۱۶۱].
ایسپانییا دا بئله بیر سؤز وار؛
هر بیر فوتبال سئور ایسپانییالی، هم ده سییاست آدامی‌دیر.
ایسپانییادا فوتبال، او اؤلکه‌ده یاشایان میللت‌لرین میللی کیملیکلری‌ایله دۆیونله‌نیبدیر.
بو گۆن ایسپانییا فوتبالی اِل‌ـ‌کلاسیکو [رئال ـ بارسا] چکیشمه‌لری‌ایله تانینسا دا، اوْردا فوتبال ایلک باشلاندیغی گۆندن سییاسی دۆشونجه‌لرین گؤسترگه‌سی و سرگی‌ آلانی(مئیدانی) اوْلوبدور.
باغیمسیزلیق سئون باسک‌لی‌لارین اینگیلیس‌لی‌لری ایسپانییانی حذف ائتدیکلریندن سونرا آلقیشلاماقلاریندان، و اتلئتیکوبیلبائونون تکجه باسک‌دا دوْغولموش اوْیونچولار سئچدیگیندن و باسک ایالتی‌نین اۇسکادی آدلی میللی تیمی‌نین قوْرولماسینا دک.
آنجاق ژنرال فرانکو آدلی دیکتاتورون اوغور قازانماغی هرنه‌یی دییشدی.
بیر داها مادریدین آغ گئییملی تیمینه روْیال(سلطنتی)لقبی وئریلدی و رئال مادرید، حوکومتین سئوگیلی تیمی و گؤز ببگینه چئوریلدی.
بو آرادا کاتالان‌لار، باسک‌لی‌لار قدر شیددتلی اوْلماسا دا، گئنه ده اؤز میللی ایستکلرینی بارسانین اوْیونلارینا و نییوکمپ ایستادییومونا داشیماقلا، اؤلکه‌ده باشلانان عدالت‌سیزلیک‌لرله و آیری‌سئچمه‌لره قارشی اعتیراض سسلرینی دۆنیایا چاتدیرماغا باشلادیلار.
کاتالان‌لار بارسایا
« Məs que un club»
بیر باشگاهدان داها یۆکسک شئی، لقیبنی وئره‌رک، اؤز میللی ایستکلرینی داوام ائتدیرمگه باشلادیلار.
۱۹۷۰ - ۱۹۴۰ ایللری‌نین آراسی،
ژنرال فرانکونون سئودیگی مادریدین رئال تیمی حوکومتین گؤزونون ایشیغینا چئوریلدی.
دیکتاتور فرانکونون رئال‌ تیمینه ائتدیکلری محبّتلر(سیز اوْخویون باشقا تیم‌لرین حاقلارینی اوْغرولاماق)، بارسا تیمی‌نی اونلارین قارشیسیندا ابدی بیر دۆشمانا چئویردی، آنجاق او ایللرین قارا اوْلایلارینی گؤزدن کئچیردیگیمیزده، چوْخوسونو بوگۆنکو فوتبالیمیزدا و تیراختورون باشینا گلن‌لرله بیر گؤرۆرۆک.
اؤرنک اۆچون؛
دی ائستافانونون فرانکونون دخالتی‌ایله [بارسایلا قرارداد باغلادیغی حالدا] رئالا گئتمه‌ییندن، اوْیونلارین سوْنوجلاری مئیدان‌دان ائشیکده بللی اولدوغوندان، انضباطی‌ کوْمیته‌لرین بیر طرفلی قضاوت و حاقسیزلیق‌لاری و.....
تیراختورلا، فئدراسییون و دؤولتین سئوگیلی تیملری[ ایستیقلال، پیروزی ] ساواشینی خاطیرلادیرلار.
دفعه‌لرجه دئمیشیک تیراختور‌ون فوتبالی باخیمدان قازاندیغی جام‌لارلا کاپ‌لار، داشیدیغی ماهییت و خالقیمیزین اوْیانیشی یوْلوندا اوْینادیغی اؤنملی روْلدان چوخ دگرسیزدیر،
آنجاق بو باخیش بو آنلاما گلمیر بیزلر ده الی بوْش اوْتوراق.
بیر ائشیتسیز ساواشا گیرمیشیک.
بیر یاندان‌: ایدمان باخانی، فوتبال فئدراسییونو، داورلر کومیته‌سی، صدا ـ سیما و سئوگیلی تیملرینه جام قازاندیرماق ایسته‌ینلر و قارشی طرفده؛ تکجه خالقی‌نین وارلیغینا آرخالانان تیراختور.
چوْخلاری‌نین کاپلارین تئهران یا دا ایصفاهانا گئتمه‌‌سینی ایسته‌دیکلری حالدا  میلیونلارجا تۆرکون اۆرک بیرلیگی، و هرنه‌دن اؤنملی اوْلان آییق‌لیغی‌ایلا بو ایشین قاباغیندا دورمالی‌ییق، هیجانی اوْلایلارا قوْشولمادان، دؤزۆملۆ اوْلماق‌لا تیمیمیزه، کلوپوموزا دینج‌لیک آشیلاییب(تزریق ائدیب) اوْیونچولاریمیز و سوْروملولاریمیزین آرخاسیندا دورمالی‌ییق.
فالوْوئرین آز - چوْخلوغویلا دا ایشیمیز اوْلمادان اؤنه باخمالی‌ییق.
دئییرلر بیرگۆن بیر چاققال بیر توْیوق اوْغرولاییب کنددن چیخاردیر
تۆلکۆ چاققالی پوْزغون گؤرۆب، نه‌دنینی خبر آلیر
چاققال دئییر من بو ۲ کیلو اوْلمایان خوْروزو اوْ کنددن اوْولامیشام کندده بیر قاری باغیریردی؛آی یئتیشین چاققال اۆچ باتمان‌لیق خوْروزومو آپاردی.
تۆلکۆ دئییر خوْروزو وئر منه آغیرلیغینی یوْخلاییم
خوْروزو آغزینا آلان تۆلکۆ داغا ساری قاچاراق دئییر چاققال قارداش، دئنن خوْروزلارینی بئش باتمان یازسینلار منیم حئسابیما.
ایندی ده تی‌وی آپاریجی‌لاری پیروزی‌نین فالوْوئرلرینی ۹۹ میلیون حئسابلاسینلار
اؤنملیسی بوگۆن؛بۆتون تۆرکلر ایچره یارانان بیرلیک و دۆشمان اوْردوسونا دۆشدۆیۆ قوْرخودور.
فاشیسمین دیرکلرینی تیتره‌دن بیر قوْرخو.

داودعبدی
@davud_ebdi

داود عبدی (Taymaz)

20 December 2024 13:14

ناردوغان بایرامی

بوزلو قایالارلا قارلی بؤلگه‌لر یییه‌سی اوْلان تۆرک‌لر ایچره قیش - قار - کۆلک هابئله بۆتۆنلۆکجه سوْیوقلوق‌لا باغلی قاورام‌لار(مفهوملار)، یاشام‌لارینین آیریلماز بیر پارچاسی اوْلاراق، بو قاورام‌لارلا باغلی دب‌لر، آلیشیق‌لیق‌لار، افسانه‌لر، بایرام‌لار، توْی‌لار، قوتلامالار، قارغی‌لامالار و... اسکی‌ چاغ‌لاردان وارلیقلارینی قوْرویاراق بو گۆنۆمۆزه چاتیبلار.
اؤرنک اۆچۆن کئچمیش یازی‌لاردا دا توْخاندیغیمیز کیمی؛
قیش دؤنمی‌نین هر گۆنۆ یا نئچه گۆنۆن اؤزۆنه آیید اوْلان آدلاری(کۆر دوْغولو، قاری کۆله‌یی، بؤیۆک چیلله، خیردا چیلله، چیلله بئچه، سئرچه کۆله‌یی، چار-چار،
آلا چلپوْو، دارغان و...) .
بو دؤنم‌ده اوْلان سایسیز بایرام‌لار و اؤزل گۆنلر؛ (ایکینجی آیزیت بایرامی [قارا شامان‌لار یئرینه گتیردیکلری تؤرن، قادین‌لارین قاتیلماغی‌لا]، آیاز قوْرقونون یورتو، قوْچاغان، پاکتی‌قان، سایاغان، پایناغان، ناردوْغان و...) .
ایسلامدان اۆنجه تۆرکلر، بو بایراملاری داها گؤزل و آرتیق احتیشام‌لا قوتلایارمیشلار.
سومئرلی‌لر ۵۰۰۰ ایل اؤنجه، بو دبلری بین‌النهرین‌ه داشییاراق، سونرالار بو دبلرله بایرام‌لار میتراییسم آیین‌لری هابئله باشقا خالقلارین عنعنه‌لرینه ده کئچیبدیر.
تۆرکلرین میفیک دۆشونجه‌سینده گئجه ایله گۆندوز [ قارانلیق‌لارلا ایشیق‌لیق‌لار دۆنیاسی] ساواشدادیرلار.
اۆلگن خان‌لا ائرلیک خان ساواشی.
سوْنوندا ناردوْغان گئجه‌سینده، گۆن ـ گئجه‌یه غالیب گلیر [ گۆندۆزلر اوزونلاشماغا باشلایار ].
گۆنش(نار) اسارتدن قورتولاراق، اؤزگۆرلۆیه بوراخیلیر { دده‌قوْرقود بوْیلاریندا دا اوْروز خان گۆنش‌تانریچاسینی، اسارتدن قورتاریب، ایشیق‌لیق‌لار قارانلیق‌لارا قارشی ساواشی قازانیب/قیش چیخیر}.
بیر سیرا تۆرکلر ایسلامدان سوْنرا، قمری تقویم‌دن یارارلاندیقلاری اۆچون، سار‌آی‌ دوْغولان گۆن «بدر، هیلال بۆتون‌لشدییی گۆن»ۆن ائرته‌سینی؛ تولون تام‌آی (دوْلون تام‌آی) آدلاندیراراق بو گۆنۆ یئنی ایل باشلانغیجی کیمی نظرده توتارلار.
بونلاردان قیراق چام، یاشام، شام آغاجی‌لا بیر سیرا یئرلرده اؤلمزلیک‌ و قالارغی‌لیق سیمگه‌سی اوْلان؛ سرو آغاجی [آردوش، آردیش، آردیج] آغاجی آلتیندا شنلیک تؤره‌نی کئچیریلیب، بو گۆن قوتلانار.
گنج‌لر و اۆرک‌لرینده گیزلی ایستک‌لری اوْلانلار، همن آغاجین بوداقلارینا رنگلی پارچالارلا روبان‌لار دۆیونله‌ییب اییی دیلک‌لر توتاردیلار.
بوگۆنلر آذربایجانیمیزدا آردیج آغاجلاری‌لا پیر آغاجلارینا باغلانانان بئزلرله پارچالار کیمی.
اسکی تۆرک میفیک دۆشونجه‌سی‌ایله باغلی، یاشام آغاجی، آغ‌شام آغاجی، آک‌چام آغاجی [ حایات آغاجی ] دۆنیانین لاپ اورتاسیندا(گؤبه‌یینده) یئرلشیر، اوْنون اوزونلوغو گؤیلرده اوْلان اۆلگن‌خان‌ین (یاخشی‌لیق‌لار تانریسی) ساراییندان باشلایاراق یئرین دیبینده یاشایان ائرلیک‌خان‌ین(پیس‌لیک تانریسی) داخماسینا قدر اوزانیر.
یئرایله گؤیۆ بیر - بیرینه باغلاییر،
اوْ اۆزدن بوگۆن بۆتون اینسانلار، گؤزلجه‌سینه بزنمیش اوْلان بو قوتسال آغاج‌ین آلتیندا توْپلانیب، شنلیک تؤرن‌لری قوروب، ساز ـ قوپوزلا چال ـ چاغیر ائدرمیشلر.
[ بیر سیرا نظریه‌لره گؤره، کریسمس و عیسی مسیح‌ین دوْغوشوندا بزه‌نن شام«کاج» آغاجی و نوئل بابا دبی بوندان توتولوبدور، فلسطین و شام توْرپاقلاریندا کاج آغاجی گؤیرمز، و بو دب اوْرتا آسییا یئرلی طرفیندن اوْنلارا پای وئریلیبدیر]
آیازخان (آیاز آتا) سوْیوقلوق تانریچاسی‌دیر، اوْ قیش‌ین چتین گۆنلرینده ، نوه‌سی ساییلان قیش‌قیزی‌لا بیرلیکده، گئییک‌لرینه باغلانان سۆرۆتمه‌لرله داغ‌لاری، اوْبالاری گزیب گؤزل اوشاقلارا پای‌لار باغیشلاییب، داردا قالان اینسانلارا یاردیم ائدر،آذربایجان اساطیرینده شاختا بابا آدی‌لا تانینان بو تانریچا، آک آیاس آدی‌لا دا تانینار.
آیاز آتا قیشین ایلک قاری‌نین یاغماسی عزیز توتولان«سوغومباسی» تؤرنی‌ایله بیرلیکده گؤزلره گؤرۆنر - قیشین ایلک قاری‌نین خبرچیسی کیمی.
بونلاردان قیراق، دلگان/دلقان تۆرک‌لری ایچره ناردوْغان بایرامی کیل‌وئی آدی‌لا تانینار
کیل‌وئی؛ گئییک، گوزن آنلامیندادیر
بیلدییینیز کیمی گوزن اوسطوره‌وی دۆشۆنجه‌ده گۆن‌له ایلگی‌ده‌دیر.
همن گئییک‌لر آیازخانین سۆرۆتمه‌سینی چکرلر.
ناردوْغان سؤزۆ
موغوللاردا: ناردوغان
آذربایجانلی‌لاردا: ناردوغان
تاتارلاردا: کویاش توغا[گۆنش دوغان]
باشقورت‌لار‌و اودمورت‌لار: ماردوغان
میشر تاتارلاری:راش تووا
موکشالار: نارداوان
رئرزیالار: نارداوا
چوواش‌لار: نارتاوان
آدی‌ایلا تانینیر.
ائله بو اۆزدن آذربایجانیمیزدا دا، بو گئجه اوْدلار یاندیریلیب، قازانج و اوغور سیمگه‌سی اوْلان قیرمیز و آل رنگلی مئیوه‌لردن(نار، قیرمیزآلما، اییده) و بایراما آیید اوْلان حالوالار یئییلیب، کۆرسۆ و اوْجاق باشیندا بایاتی اوْخویوب، گۆنشین اسارتدن قورتولماسی و نار‌ین(گۆنش‌ین) یئنی‌دن دوْغولماسینی بایرام ائدرلر.

داودعبدی
۱۴۰۳\۹\۳۰
@davud_ebdi