ادبیات ائوی

02 July 2026 13:48

سهند عزیزلمه‌سینده دَیَرلی محقق و یازیچی‌میز «احمد یوسفی» جناب‌لاری‌نین چیخیشی...

#احمد_یوسفی
#بولود_قاراچورلو
#ادبیات_ائوی

@AdabiyatEvi

ادبیات ائوی

02 July 2026 13:42

سهند عزیزلمه‌سینده دَیَرلی محقق و شاعیریمیز «محمد قضایی» جناب‌لاری‌نین چیخیشی...
#بیرینجی_بؤلوم

#محمد_قضایی
#بولود_قاراچورلو
#ادبیات_ائوی

@AdabiyatEvi

ادبیات ائوی

02 July 2026 13:14

سهند عزیزلمه‌سینده دَیَرلی محقق و شاعیریمیز «آرش ساعی» جناب‌لاری‌نین چیخیشی...

#آرش_ساعی
#بولود_قاراچورلو
#ادبیات_ائوی

@AdabiyatEvi

ادبیات ائوی

01 July 2026 10:12

سهند عزیزلمه‌سینده اوستاد اوموداوغلونون چیخیشی (بوز چیچه‌یی شعری‌نین قیسادیلمیش حالی)
تبریز- ۱۴۰۵/۰۴/۰۹- ثقه‌الاسلام ائوی

#حسن_اوموداوغلو
#بولود_قاراچورلو
#ادبیات_ائوى

@AdabiyatEvi

ادبیات ائوی

29 June 2026 14:39

داهی شاعیریمیز «بولود قاراچورلو» (سهند) عزیزلمه‌سی

دانیشان‌لار: «رضا همراز»، «احمد یوسفی»، «حسن اوموداوغلو»، «محمد قضایی» و «آرش ساعی».
آپاریجی: رقیه همایون
گون: ۱۴۰۵/۰۴/۰۹ (سه‌شنبه گونو)
ساعات: ۱۸ الی ۲۰
قاری کؤرپوسو، ثقه‌الاسلام ائوی (حکیم نظامی آدینا ادب-کولتور قورولتایی).

#ادبیات_ائوی

@AdabiyatEvi

ادبیات ائوی

26 June 2026 10:26

#فیلم_تانیتیمی
«یاز، یای، پاییز، قیش و یئنه یاز» فیلمی
یازیچی: #احمد_یوسفی
#ادبیات_ائوى

@AdabiyatEvi

ادبیات ائوی

24 June 2026 14:42

بو گون «ابوالفضل ائلچی‌بی»ین دوغوم گونودور. او، ۱۹۳۸-جی ایل ناخچیچواندا دوغولوب و ۲۰۰۰-جی ایل‌ آنکارا شهرینده وفات ائتمیشدیر. مصاحبه‌سیندن بیر بؤلوم، سیز عزیزلره تقدیم ائدیریک. واردیغی یئر اوچماق اولسون...

#ادبیات_ائوی

@AdabiyatEvi

ادبیات ائوی

23 June 2026 08:56

#دوغوم_گونو #صمد_بهرنگی

#صمد_عمی_گلمه_دی

باهارین او اوزون گونو نه اولدو؟!
یئنه باغچاداکی گول‌لر ده سولدو
اولدوزون گؤزلری یاش ایله دولدو
داها آراز اوستدن گمی گلمه‌دی!
آی اوشاق‌لار صمد عمی گلمه‌دی!

نامردین قاراسی نه ایتمز اولدو،
اوره‌ییم یاراسی نه بیتمز اولدو.
گئتدی آرخاداشیم قاییتماز اولدو
داها آراز اوستدن گمی گلمه‌دی!
آی اوشاق‌لار صمد عمی گلمه‌دی!

گلین گئدک دریالاری آختاراق
او قارا بالیغین نیشانین تاپاق
بلکه ائلیمیزین قصاصین آلاق
داها آراز اوستدن گمی گلمه‌دی!
آی اوشاق لار صمد عمی گلمه‌دی!

بو گون صمد بهرنگی‌نین دوغوم گونودور. خاطیرینی سایغی ایله یاد ائدیریک ❤️

شئعیر: #بهرام_ائلچین
ایفا: رحمتلیک #توحید_نوروزی

#ادبیات_ائوی

@AdabiyatEvi

ادبیات ائوی

22 June 2026 15:17

#شعر_گونوموز

بیزیمکی توتماز، قارداشیم،
سن جییَرچی پیشییی،
من کوچه پیشییی.
سنین یئمه‌یین قالایلی قابدا،
منیم یئمه‌ییم آسلان آغزیندا.
سن یوخوندا عشق گؤرورسن،
من سوموک.
آما سنین ایشین ده
آسان دئییل،
آسان دئییل یعنی
آللاهین وئردییی
هر گون قویروق بوُلاماق.

#اورهان_ولی
#ادبیات_ائوى

@AdabiyatEvi

ادبیات ائوی

19 June 2026 07:40

«توتساق آداسی» فیلمی انگلیس دیلینده (Shutter İsland) و فارسجا دا «جزیره شاتر» ترجمه اولونموشدور. بو اثر ۲۰۱۰-جی ایلینده «دِنیس لیهئی‌»ین عینی آدلی رومانی اساسیندا «مارتین اسکورسیزی»نین رئژیسورلوغو ایله کینو عالمینده، پرده‌لرین اوستونه کئچمیشدیر. بو فیلم «پارامونت پیکچرز» آدلی فیلم استحصالی کمپانیاسی ایله الده ائدیلیب‌دیر. گؤروندویو تک بو اثر پیسخولوژی، تریللئر-هیجانلی ژانریندا و مختلف ساحه‌لرده سؤزو اولان شاه اثر کیمی یازی‌یا آلینمیشدیر. فیلمین داخلی موسیقی‌ پارچالاریندان داها آرتیق دانیشماق اولار. بو اثرده استفاده اولونان موسیقی‌‌لر، بیرباشا دونیانین کلاسیک اثرلری‌ ایله بزه‌نمیشدیر، اونسوز دا موسیقی بوتؤولوکده دقّتی چکن بیر اوپرادیر. بو اثر IMDb سایتیندا ایزله‌‌ییجی‌لرین طرفیندن ۲۵۰ فیلمین سیاهه‌سینه داخیل اولموشدور. آیریجا عبنی حالدا ۸/۲ نمره‌نی ده بو تیپ فیلم‌لرین سیراسیندا دولایی‌سیلا قازانمیشدیر.
فیلمین پرئمیئراسیندا(بیرینجی نمایشینده) ۲۰۱۰-جی ایلین فورال آیی‌نین ۱۳-گونو تاریخینده، ۶۰-جی برلین بین‌الخالق فیلم فستیوالیندا بؤیوک تونلوک‌له ایشیق اوزو گؤرموشدو. بو اثرده «لئوناردو دیکاپریو» و «مارتین اسکورسیزی» بو فیلم‌له برابر اوچ فیلمی؛ نیویورک باندلاری(۲٠٠۲)، آویاتور(۲٠٠۴) و دؤنوک‌لر(۲٠٠۶) و سونونجو یعنی ۴-جو دفعه اولاراق بیرلیکده امکداشلیق ائتمیش‌لر. بو اثرین اوّلجه‌دن ۲۰۰۹ ایلی‌ین اوکتیابر آیی‌نین ایکینجی‌ گونو سینمالاردا اکرانا چیخماسی قطعی اولموشدور. لاکین «پارامونت پیکچرز»ین پلانلارینا گؤره «جدّی آدام» فیلمین اکرانا چیخیلماسی‌لا دییشدیریلیب نتیجه‌ده بو فیلم ۲۰۱۰ فورال آیی‌نین ۱۹ دا اکرانا چیخمیشدیر. بو فیلم‌ین نمایشی نوبتی دییشک‌لییی اوچون فیلم ۲۰۰۹-جو ایلین اوسکار مکافات‌لاندیرما مراسیم‌ینده‌کی شانسینی ایتیردی! فیلم هالوسیناسیالار-توهم، پسیخوز-روحی خسته‌لیک و پسیخوتئراپیا(پسیخولوگیادا معالجه اصولو) پروسئس‌لری کیمی اولدوغو سکانس‌لاری، بو عالمی آرتیقراق تانیتدیرماغینا جهد ائتمه‌یینه باخمایاراق فیلم انسانین بئینی‌نین نه قدر آغیر رئالیق‌لارا مبارزه آپارماق اوچون آلترناتیو رئالیق‌لار یارادا بیله‌جه‌ییینی گؤستریر.
فیلمین فاینال صحنه‌سینده، قهرمانین بیر آغیر سؤزو وار: «هانسی داها پیس اولاردی؛ جاناوار کیمی یاشاماق یوخسا یاخشی بیر انسان کیمی اؤلمک؟». بو سکانسا گؤره، مختلف ایدئیالار و آکسپت‌لر وار. اصلینده بو حصّه روماندا یوخودور. پروفسور «جیمز قیللیقان مارتین»، نیویورک اونیورسیتئتیندن بیر پیسیخیاتریک اولاراق بو سکانسین بئله اولماغینی داها اویغون بیلمیشدیر. او بو سؤزون معناسینی: «یاشاماغا دوام ائتمک اوچون اؤزومو چوخ گناه‌کار حسّ ائدیرم. اصلینده، انتحار ائتمه‌یه‌جه‌یم، اما منی لوبوتومیا ائدیلمه‌سی اوچون آپاران بو انسان‌لارا تسلیم ائده‌رک، دولایی یول‌لا انتحار ائده‌جه‌یم» کیمی ایضاح ائتمیشدیر. بو فیلمین اؤزونه‌مخصوص جهت‌لریندن بیری ده پسخولوژی‌ علمی‌نین مختلف پرسپکتیولرینی تصویره چکمه‌سی‌دیر. فیلم‌ده اولان فلش‌بک‌لر و آللوزیالار-خیال‌لار و خاطیره‌لر کینوآپاراتی چکیب، قهرمانین باخیشیندان گؤسترمک، دولایی‌سیلا اونون درین پسخولوژیا قاپیسیندان قهرمانین پراکتیک‌لرینی، ایزله‌ییجی‌نی ابدی شکیلده حیران قویور. بو شکیلده حیرانلیق کینوماتوگرافیک عالمینده داها تاثیرلی تجربه‌نین یاراتماغینا کؤمک ائدیر. رئژیسور اؤزونه‌مخصوص اوسلوبو ایله قاریشیق پسیخولوژی دئتایل‌لارا علاقه‌لی باخیش‌لاری ایله بیرلیکده دقّته‌لاییق بیر اثر یاراتمیشدیر. بو اثری همن ژانریدا دوزه‌لن فیلم‌لرله مقایسه ائدنده، بو اثر داها مرکّب و مختلف باخیش‌لارلا علمی جهتدن بو موضوعا توخونموشدور. بو آرادا اثرده معاصر پسیخولوژی سیموول‌لار خصوصی‌له مئتافورال‌-مجازی معنالاردان استفاده اولونماسینی قید ائتمک لازیم‌دیر.
بو اثر، مختلف پسخولوژی نظریّه‌لرینه اساس‌لاناراق اؤز استقامتینده بؤیوک عالیم‌لرین ایزلرینی-لپیرینی گؤرمک مومکوندور. مثلا، «فروید»ون بئیین مدافعه‌سی پروسئس‌لری و یا «یونگ»ون کوللئکتیو-جمعی شعور‌آلتی- ناخودآگاه نظریّه‌سی حاققیندا فیلمین تماتیک-موضوعی فورماسیندا بیرباشا یاناشماق اولار. باشلیجا اثرده جورج اورول‌ین ۱۹۸۴ و «چ.ج.ولز»ین «دکتر مورونون آداسی» کیمی بدیعی ادبی اثرلردن ده تاثیرلنمه‌‌سینی دئمک اولا بیلر.

#احمد_یوسفی
#ادبیات_ائوى

@AdabiyatEvi

ادبیات ائوی

18 June 2026 16:12

#موسیقی_گونوموز
بیات شیراز تصنیفی
اوستاد سلیم موذن‌زاده
قایناق: تبریز ماهنی‌لاری کانالیندان پایلاشیلمیشدیر.
#ادبیات_ائوى

@AdabiyatEvi

ادبیات ائوی

13 June 2026 10:01

فولکلوروموزدا قوناق‌لا باغلی سیناق‌لار

باشدان بیر توک آیریلیب آلینا دوشسه دئیرلر قوناق گلر.
قند پارچاسی بؤیرو اوسته دوشسه آرزو اولونان قوناق گلر.
قوناغین آیاق‌قابی‌لارینی باییرا ساری چئویرسن، قوناق تئزلیک‌له چیخیب گئدر‌.
قوناغین آیاق‌قابی‌سینا دوز تؤکسن، تئز گئدر.
یئمک زامانی الدن پیچاق دوشسه کیشی، قاشیق-چنگال دوشسه قادین قوناق گلر.
یوغرولارکن خمیر آتلانارسا، قوناق گلر.
پیشیک اوزو قاپی‌یا ساری دوروب اوز-گؤزونو تومارلاسا قوناق گلر.
سفره اوسته تیکه الیندن دوشسه ائوه قوناق گلر.
استکانا سوزولموش چایین ایچینده چای پوچالی‌نین لچه‌یی اولسا قادین، اؤزه‌یی اولسا کیشی قوناغی گلر.
خورو ائوین کانداریندا بانلاسا قوناق گلر.


بئله سیناق‌لار چوخدور‌. بیز نئچه حصّه‌سین پایلاشدیق.

#ادبیات_ائوى

@AdabiyatEvi

ادبیات ائوی

12 June 2026 10:24

#فیلم_تانیتیمی
#یئددینجی_موهور

سوئد دیلینده «یئددینجی مؤهور» (Det sjunde inseglet) دئییلیر. فارسجادا ائله «مهر هفتم» ترجمه اولونموشدور. بو فیلم ۱۹۵۶-جی ایلده سوئد سینماسیندا اینگمار برگمن اَلی ایله دونیایا خصوصی‌له ده آوروپادا سینمانین زنگین پرده‌لرینه یاییلمیش‌دیر. بو اثر، رئژیسورو بین‌الخالق دونیا سینماسیندا، آرتیقراق یوکسلیشینه امکان یارادیب‌دیر، آیریجا IMDB سایتیندان ۸/۱ نمره‌نی‌ ده قازانمیشدیر. ارنست اینگمار برگمان، سوئد اؤلکه‌سی‌نین کینو و تئاتر رئژیسورو، یازیچی‌سی و سناریستی‌دیر. اونسوز دا بو اثرلری یاراتماق سببی‌له دونیا کینو عالمی‌نین یوکسک سویّه‌سینده دورموشدور. باشلیجا، او، انسانین تک‌لییینی، مختلف سبب‌لرله چکدییی روحی آغریلاری، جنسی مسئله‌لریندن قایناق‌لانان فیلم‌لری ایله دونیادا تانینمیشدیر.
برگمان‌ین تانری ووجودو ایله باغلانمیش سورغو-سوالی، فلسفه دونیاسیندا انسان حیاتیندا اگزیستانسیال موضوعوسونا علاقه‌لی اولان اثرلریندن ساییلیر. یئدینجی مؤهور رئژیسورون اوشاقلیق ایل‌لری‌نین تاثیری آلتیندا قالدیغی یاخود ایده‌آل‌لاری‌‌نین تضییعیقینی حسّ ائتدییی بیر واختدا چکیلمیشدیر.
بیزیم تدقیقاتمیزا گؤره، اونون دوشونجه و اخلاق ایدئیالاری‌نین یئتیشدیریلمه‌سینده، اونون اطرافیندا دیندار انسان‌لار اولدوغو اوچون بؤیوک تأثیری اولموشدور. آیریجا همین کلیسه‌لرده اولان دینی رسیم‌لرین اونون دویغو-دوشونجه‌لری‌نین بیرباشا آچیلماسی‌‌نین استقامتینده اهمیّتینی ده ایضاح ائتمک اولار.
او، فیلم‌لرینده ساده میزانسن‌لردن، تعلیقاتدان و دیالوگ‌لاردان استفاده ائتمه‌یینه باخمایاراق اثرین کونتئکسینده-متنینده، انسان‌لارین بیر-بیری‌لرینی دوشونمه‌دیک‌لرینی، ضدّیّت‌لرینی حتّی داخلی قارانلیق دونیاسینا بئله کئچیب اونو تحلیل ائتمه‌یه چالیشماسینی دا گؤرمک مومکون‌دور.
برگمانین فیلم‌لری‌نین بیر چوخ خصوصیّاتی، فیلم ده اوبرازلارین اکثریّتی‌نین دَییشمزلییی‌دیر. بونلار؛ هئرریئت آندرسون، اینقرید تولین، لیو اولمان، بیبی آندرسون، ماکس وون سیدووو کیمی سوئدین کینو عالمی‌نین مهم رول اوینایان‌لاری‌دیرلار.
آما اونون اینجه‌صنعتی‌نین و اورتایا قویدوغو مسئله‌لری اَن یاخشی عکس ائتدیرن فیلم‌لری؛ یئددینجی مؤهور ۱۹۵۶، چؤل چیچک‌لری ۱۹۵۷، سس‌سیزلیک ۱۹۶۳، تماس ۱۹۷۹، قیشقیریق‌لار و پیچیلتی‌لار ۱۹۷۲ کیمی فیلم‌لر اولموشدور.
دئییلن‌لره گؤره برگمان بو فیلم‌ده شیتات اولاراق ویلیام شکسپیرین پیئسینی تماشایا قویموشدور. برگمانین بوتون فیلم‌لری، آوروپانین کینو زال‌لاریندا پوپولیارلیق-ازدحام حالیندا اَلده ائتمه‌سی سینما سئورلرینه چوخ ماراق‌لی‌دیر. باشیلیجا  ۱۹۵۷-جی ایلده کن کینوفئستیوالیندا بو اثر صحنه‌یه چیخیلماسی نتیجه‌سینده تونلوکون آرتماسی دونیادا گئنیش عکس-صدا ائتمیشدیر. ۱۹۷۹-جی ایل‌لر، برگمانین آوروپادا بیر افسانه حالینا گلدییی ایل‌لردیر.
بو قیمت‌لندیرمه‌لر داها چوخ فیلمین فلسفی آکتوال موضوع‌لاری‌نین و آللئگوریالاری‌نین- تمثیلی‌نین دّیرلندیرمه‌لرینه اساس‌لانیر. یئددینجی مؤهور بؤیوک فلسفی سوالی گؤز قاباغینا چکیر. او، بو فیلیم‌ده تانری‌نین وارلیغی مسئله‌سینه آچیق و بیرباشا یاناشمیشدیر (فیلم‌ده مختلف یول‌لاردا جواب‌لاندیریلان سوال) او، اورتا عصرلرده مسیحیّتین مفکوره‌سی‌نین سیناغا چکیلمه‌سی و اونون ساواشلار فوندوندا-اساسیندا آللوزیا-خیال و سئحرله دولایی‌سی یانیلماسی، آیریجا جانلی موجودیّت‌لرین محو اولونماسی نتیجه‌سینده اونتولوژی-هستی‌شناس‌لیق مسئله‌لرینی اورتایا قویوب اونلاری بیرر-بیرر قیناییر. اثره ویزووال-بصری عالمینده باخاراق، یئددینجی مؤهور ایزلَییجی‌نین بئینینده دؤنه-دؤنه یئر اشغال ائیله‌ین فیلیم‌لردن‌دیر. باشلیجا وبا خسته‌لییین آوروپا حصّه‌سین‌ده دومینانت‌لیغی‌-تسلطو، چیلپاق کؤچن انسانلارین یاراتدیغی منظره‌لر، آلپ‌لارین اؤلوم‌له شاهمات اویناماغی، یاخود  پرسوناژلارین-شخصیّت‌لری‌نین ریتوال-آیینی رقصی‌نین تصویرینی چکمک، اثرین دراماتیک-نمایشی تأثیرلری‌نین یالنیز بیر نئچه نمونه‌سی‌دیر. ایلک پلان‌لاریندان اعتباراً کامئرانین اوبیئکتین-تماملیغین سمایا دوغرو چئوریلدییی، «یئددی مؤهور» گؤیون یئدی قات اولدوغو ایزی اولاراق، بیرلیکده برگمانین دوزدویو فیلمی‌نین کرپیج‌لری شاقولو استقامتینده فیلم‌ین ده خطّی‌ باشلاییر. بو اثرده، ایکینجی دونیا محاربه‌سی دؤروندن سونرا سوئده یوکسَلن بیر اجتماعی انفارکتوسون پارادوکسیکال‌لاری، آیریجا دینی عنعنه‌لره باغلی‌لیغین سارسیلانماسی، فیلم‌ده سؤز موضوعسونا چئوریلیر. بو دؤرده برگمان بو فیلمی اوزه چکیب. عمومیّت‌له، انسان‌لار اومودسوز حیاتلاری‌نین ایچینده کونکرت-معیّن بیر جهدله چالیشماقدا اولورلار. اورتا عصرلرده محاربه‌دن یورولموش شوالیه بایراق‌داری ایله بیرگه صلیب یوروش‌لریندن ائوه قاییدیر.

ادبیات ائوی

10 June 2026 08:43

#حکایه_گونوموز
#ایلک_محبت
یازیچی: #ساموئل_بکت
ترجمه: #ایوب_قیاس
کؤچورن: #آرزو_ربیعی
#ادبیات_ائوى


/channel/adabiyatevi

ادبیات ائوی

08 June 2026 13:03

#شعر_گونوموز

گؤرونتوسو گوزگولرده یانسینمایان بیر اینسان کیمی اؤنونده دایانمیشام                                                             گؤرورسنمی؟ 

وارلیق‌لا یوخلوغون قووْشاغیندا بوشلوق آچیسیندان سنی چاغیریرام
ائشیدیرسنمی؟

بیرآن قانادلارینی قاتلا
سمور دریلی چانتانا قوی
بو آشاغی‌لاردا بیریسی
سنین دویومونلا وارلیغینی اؤلچور
دویورسانمی؟


آیاغینی چیلپاقجا تورپاغا قوی
بیتگی‌لرین توخومو ساریلیق آزاریندان چورویه‌جک
سن یاغماسان!

تانیش اول جانی قارنیندا چوروین تورپاق‌لا،
گؤزلویونون اوستونه قونموش توزلارین آناسی‌دیر تورپاق

و من
پالچیقدان یوغورولموش بیر جان
بویودلاری بولونمامیش بیر دونیادا یاشاییرام.

هئی... ساچلاری رسسام‌لارین سئحیرلی فیرچاسی
ساچلارینین اوجو ایله کؤکسومو اورپَشدیریب  گیزلی ناخیش‌لار سایاق منی قابارد؛
اؤیله کی جانی‌لرین بارماق ایزلری قاباردیلیر نسنه‌لرین اوستونده.

بو جان دامغالانمادان
تاپینمایاجاق هئچ بیر تانری‌یا
دوداقلاری‌نین بویاسینی روحسوز دوداق‌لاریما کؤچور.

آد وئر یاراتدیغینا
آد وئر
بیر باخیشین‌لا
داغینیق حوجئیره‌لری بیر یئره توپلاشان
"وارلیغا".

#زامان_پاشازاده
#ادبیات_ائوی

@AdabiyatEvi

ادبیات ائوی

02 July 2026 13:46

سهند عزیزلمه‌سینده دَیَرلی محقق و شاعیریمیز «محمد قضایی» جناب‌لاری‌نین چیخیشی...
#ایکینجی_بؤلوم

#محمد_قضایی
#بولود_قاراچورلو
#ادبیات_ائوی

@AdabiyatEvi

ادبیات ائوی

02 July 2026 13:27

سهند عزیزلمه‌سینده، دَیَرلی قورقودشناس، سهند عشقینی اورک‌لرده یارالدان، اوتوز ایله یاخین سهندین دده قورقود بوی‌لارینی نظمه چکدییی سطیرلری بیزلره درس وئریب، بیزی سهند دونیاسی ایله تانیش ائدن، داهی اوستادیمیز «حسن اوموداوغلو» جناب‌لاری‌نین چیخیشی... (تکمیل فیلیم).

#حسن_اوموداوغلو
#بولود_قاراچورلو
#ادبیات_ائوى

@AdabiyatEvi

ادبیات ائوی

02 July 2026 13:07

سهند عزیزلمه‌سینده دَیَرلی مورخ و محقق اوستاد «رضا همراز» جناب‌لاری‌نین چیخیشی.

#رضا_همراز
#بولود_قاراچورلو
#ادبیات_ائوى

@AdabiyatEvi

ادبیات ائوی

01 July 2026 09:14

#گونلریمیز
بابکین جاویدان یئرینه حاکمیته باشلاماسی فراقمئنتی‌...

فیلمین باشقا یئرینده آفشین بابکه دئییر کی: بابک، اؤله‌جکسن. بابک دئییر: سن ده اؤله‌جکسن، آنجاق سن عباسی‌لرین قارا بایراغی آلتیندا اؤله‌جک‌سن،
من خرّمی‌لرین قیرمیز بایراغی آلتیندا...

یؤنتمن: #ائلدار_قلی_یئو
بابک نقشی: رحمتلیک #راسیم_بالایئو

بو گون بابک‌ین دوغوم گونودور. یولو دواملی اولسون.

#ادبیات_ائوی
@adabiyatevi

ادبیات ائوی

26 June 2026 10:26

«یاز، یای، پاییز، قیش و یئنه یاز» فیلمی (Spring, summer, fall, winter and spring) ۲۰۰۳-جو ایل‌ده جنوبی کره'نین بؤیوک رئژیسورو کیم-کی دوک'ون زنگین باجاریقلی ال‌لری‌ ایله سینمانین بؤیوک گوموش الوانلی پرده‌سینه چکیلمیشدیر. او، بو اثرین هم رئژیسورو هم ده سناریستی اولموشدور. او، بو اثرده، کارل یونگ'ون انسانین داخیلی ضدّیّت‌لرله اوزلشمک نظریّه‌لرینی اورتایا قویموشدور. اؤرنک اوچون «انسان و سمبول‌هایش» آدلی مشهور کتابیندا او «آنیما (ارکک‌ین قادین‌ آتریبیوتونو داشییان قیسمی) و آنیموس (قادینین ارکک خصوصیاتینا مالیک اولان حصّه‌سی)» سؤزلردن آد آپاریر. باشلیجا بو اثرده بو نظریّه‌نین مهم تاثیری آلتیندا یازیلدیغی تقدیم اولونا بیلر. اونسوز دا بو اثر، انسان‌ین حقیقتی‌ ایله پارالل اولان بودائیزمین قاپیسیندان اونتولوژی-هستی‌شناسی و آنتروپولوژی-انسان‌شناسی مسئله‌لرینه توخونان اَن تاثیرلی فیلم‌لردن بیری ساییلیر. ایزلییه‌جی فیلمین؛ ساحه‌سینده، وئرسیاسیندا، اوبرازلاریندا و بوتؤولویونده اولان هر هانسی سکانسیندا بودائیزمین آللئقوریاسینی نظرده توتوب، آللوزیاسیندا تصویر چکمه‌سی یاخشی ایش اولا بیلر.
فیلم‌ده رول‌لاری اولان کیم کی-دوک، او یونگ سو، یئو جین ها، پارک جی-آ... دان آد آپارماق اولار.
فیلمین موسیقی ساحه‌سی داها انسانی فیلم پوئستینه یاخینلادیر. فیلمین داخیلی موسیقی‌سی پارک جی-وون'ون الی ایله بسته‌لنمیشدیر. او موسیقی‌ ایله بو اثری آرتیقراق قاباردیب سؤزلرینی حقیقت کیمی یازییا آلماسینی باجارمیشدیر.
اثرده، میزانسن‌لر (فیلمین ویزوال-بصری دیزاینی-طراحی‌سی)، دیگئستالار (فیلمین پووئست-داستان اتمسفری-فضاسی) و میمیکالاری (فیلم‌ده سیموولیک-رمزی و یا ریتوال-آیینی حرکت) خصوصی‌له، رئژیسورون چوخ‌سایلی دینی حکایه یاراتماغی اوچون تقلید ائتمه‌سی موضوع‌سوندا دونیا تنقیدچی‌لر طرفیندن چوخلو آللئقوریالار-تمثیل‌لر یاخود تنقید‌لری ده قازانمیشدیر. اثر، مختلف ویزوال دیزاین المنت‌لریندن نئجه استفاده ائتدیینی ده فرقلی باخیش‌لارلا برپا ائتمیشدیر.
بیز اونون بودائیست سیموولیک تصویرلریندن و معبد سس‌لریندن، او جمله‌دن اورک سوتراسی‌نین-آفوریزم‌لری‌نین اوخونماسیندان مختلف استفاده‌سینی گؤره بیلیریک. علاوه اولاراق سوژئت خطینی، یین/یانگ (۱)فلسفه‌سیندن توتاراق، بئش المنت نظریه‌سیندن، خریستیان‌لیقدان، جاینیزمدن(قدیم هند دینی) و کره فولکلوروندان گؤتورولموش کینماتوگرافیک سیموولیزم ایله مئتافورال علاقه‌لرینی ده گؤره بیلیریک.
پارک چونچین و یی هیئ-یئون فیلمین دؤرد فصلینی بودانین دؤرد نجیب حقیقتی ایله مناسبتلی بیلیرلر. بونا گؤره ده، «یاز» ایسه اوشاق‌لیق و عذاب‌لا بسله‌نیر. «یای» ایسه گنج‌ین و اونون ایستک‌لریله اویغون گلیر. «پائیز» اساس پرسوناژ اولان راهیب‌ین ایستک‌لرینی، عذابا سبب اولدوغونو آنلادیغی، جاهیل‌لیک زامانینی گؤستریر. «قیش» ایسه آزادلیغین یولونو ایزله‌دییی زامانی گؤستریر. پارک بونو تکلیف ائتمه‌سه ده، اونسوز دا جوان راهیب‌ین حرکت‌لرینی سککیز قات یول ایله اویغون‌لاشدیرماق مومکوندور. پارک‌ین سونراکی تحلیلینه اساس‌لاناراق، هر فصیل‌ده بودائیست ایدئیالاری‌نین ایزلرینی گؤرمک اولور.
بو فیلم اتیکا-اخلاقی و میستیک-عرفانی مسئله‌لرینه چوخ‌سایلی موتیولرله یاناشی توخونوبدور.
فیلم بئش حصّه‌دن عبارت‌دیر. هر حیصّه پراکتیک‌سیز بودائیست راهبی‌نین و اونون یاشلی معلّمی‌نین حیاتینداکی بیر مرحله‌نی تصویر ائدیر. بو حصّه‌لر تخمینا ۱۰-۲٠ ایل بیر-بیریندن آیری حادثه‌لری گؤستریر و هر بیر حصّه ده اولان حادثه‌لرین عینی آدی او حصّه‌نین اوستونه قویولموشدور. اثرین داها چوخ تفسیرچی‌لر طرفیندن جهدله تفسیر اولموشدور.
اتک یازی: بو فیلم سینما کاسسا ساتیشلاریندا ۹ میلیون دلارا مالیک اولموشدور. همچنین اثر ۲۰۰۴-جو ایلده ۷۶-جی اسکار مکافات‌لاندیریلما مراسیمینده جنوبی کره اؤلکه‌سی‌نین ائلچی‌سی اولموشدور.
اسلوونیا فیلسوفو و نظریّه‌چی اسلاوی ژیژک بو فیلمی فلسفی تعلیم‌لرینده بیر آللئقوریا اولدوغو عینی حالدا اوندان اؤیرنمک اولان فیلم کیمی تقدیم ائدیر.
اثر، BBC-نین ۲۱-جی عصرین ۱۰۰-جو اَن بؤیوک فیلم سیاهه‌سینه داخیل اولموشدور. بو سس‌وئرمه بی‌بی‌سی استحصالی گروپوندان ۲۰۱۵-جی ایلین آگوست آییندا دونیانین هر یئریندن ۱۷۷-جی فیلم تنقیدچی‌لر طرفیندن چکیلیب.
ایراندا؛ فیلم ۲۰۰۶-جی ایلین آگوست آییندا تلویزیاسیندا «سینما و ماوراء» آدلی مشهور پروگرامیندا یاییلمیشدیر.
(۱)شرق فلسفه‌سینده بیر حیات اسلوبو اولاراق قبول ائدیلمیشدیر. تورکجه‌ده، روحی؛ تن‌لیک، ترازلیق، هارمونی‌لیک، بالانسلیق دئمک اولا بیلر. ساده دیلده دوئیت ده دئمک اولار: خیر-شر، قادین-ارکک،....
#احمد_یوسفی
#ادبیات_ائوى

@AdabiyatEvi

ادبیات ائوی

24 June 2026 19:27

تیر آیی‌نین اوچونجو گونو، «اوستاد حسن دمیرچی»نین آنیم گونودور. رحمتلیک حسن دمیرچی جناب‌لاری هم بسته‌کار و هم شاعیر اولموشدور‌. اونسوز دا، آذربایجان مدنی حرکتی‌نین بوینوندا چوخ حاققی واردیر. خاطیره‌سینی سایغی ایله یاد ائدیریک.

ماهنی: آسلان‌لار یوردو
بسته‌کار: #حسن_دمیرچی
ایفا: #احد_یاری
#ادبیات_ائوى

@AdabiyatEvi

ادبیات ائوی

23 June 2026 13:12

بوگون خالق شاعیری «نیگار رفیع‌بیلی»نین دوغوم گونودور. نیگار خانیم، مشهور شاعیریمیز «رسول رضا»نین حیات یولداشی و «آنار رضا»نین آناسی‌دیر. نیگار خانیم ۱۹۱۳-جو ایل گنجه شهرینده آنادان اولوب و ۱۹۸۱-جی ایل باکی شهرینده وفات ائتمیشدیر. خاطیره‌سینی حرمت ایله یاد ائدیریک.
«آلاگؤزلوم» شعرینی «خزر سلیمانی‌»نین ایفاسی ایله تقدیم ائدیریک.


#ادبیات_ائوى
#Nigarrəfibəyli
#نیگار_رفیع‌بیلی

@AdabiyatEvi

ادبیات ائوی

22 June 2026 15:32

بو گون آذربایجانین داهی شاعیری ساییلان «خلیل رضا اولوتورک»ون آنیم گونودور. خاطیرینی سایغی ایله یاد ائدیریک.

آغیز آچما نامرده!
اوره‌یینده درد، یاشا
سن انسانسان! اَییلمه!
یوخسول یاشا، مرد یاشا!

#خلیل_رضا_اولوتورک
#ادبیات_ائوی

@AdabiyatEvi

ادبیات ائوی

20 June 2026 15:34

#فولکلور_گونوموز
فولکلوروموزدا قانلی قایا

پولاد کندینده بیر علی بَی یاشاییرمیش. علی بَیین گؤزونون آغی-قاراسی «تئللی» آدلی بیر قیزی وار ایمیش‌. علی بَیین اؤز چوبانی «هیلال» بیر کؤنولدن مین کؤنوله تئللی‌یه وورولور. تئللی اؤزو ده کؤنلونو هیلالا وئریر و اونو اورکدن سئویر.
علی بی بو ایشدن خبر توتور. هیلالی قاپی‌سیندان قووور. هیلال چؤل‌لره دوشور، هوندور بیر قایانین اوستونده یاشاماغا قرار وئریر. علی بی قیزی باشقا بیر اوغلانا وئرمک ایسته‌ییر. قیز بو خبری ائشیدیر. گؤز یاشینی آخیدیر. قیز آتاسیندان خبرسیز هیلال‌لا گؤروشور. اولاجاغی اونا دانیشیر. هر ایکیسی ال-اله وئریب همین اوجا قایانین باشینا قاچیرلار. علی بی ائشیتجک قوشون توپلاییب قایانین کنارینا گلیر. قوشون حمله‌یه کئچمه‌میش، علی بی اؤزو قایانین باشینا بیر خبردارلیق اوخو آتیر. اوخ سوزولوب چوبانین سینه‌سینه باتیر. سینه‌سیندن قان آخیب و قایانین اوستونه تؤکولور. چوبان اؤلور. تئللی بو حاق‌سیزلیغا دؤزمور. قایانین باشیندا یانیقلی بیر بایاتی چکیر:

عزیزیم قانلی قایا،
داش‌لاری قانلی قایا.
الیم خینا توتمادی،
یاسا بات، قانلی قایا.

بو سؤزلری دئییب، قیز اؤزونو قایادان آتیر. ائله همن واختدان خالق اورانی «قانلی قایا» آدلاندیریر.

#جلیل_عبدالله
کؤچورن: #نرگس_ابراهیمی
قایناق: آذربایجان شفاهی خالق ادبیاتی کلیاتی
#ادبیات_ائوى

@AdabiyatEvi

ادبیات ائوی

19 June 2026 07:39

#فیلم_تانیتیمی
فیلم آدی: توتساق آداسی
یازیچی: #احمد_یوسفی
#ادبیات_ائوی

@AdabiyatEvi

ادبیات ائوی

15 June 2026 07:48

.
#شعر_گونوموز
تویونا بورج اولسون!

آه، بو تویون،
بو تویون بَیی تابوتدا ـ
گلینی نییه اویناییر !؟
یوخ، بئله اویناماق اولماز
او نئجه وایا اویناییر !

سنه نه وار،
سن دئیَرسن؛ او دلی‌دیر.
دئمزسن؛ گزَن اؤلودور.
او اؤزو دئییل کۆلودور
سوورولور گؤیه اویناییر

اؤلن ایگید،
داها سنین تویون اولماز
گلن یازدان پایین اولماز
آخی بئله اویون اولماز
اوینایان نه‌یه اویناییر !

گؤیدن یاغان،
یاغیش دا یوماز بو قانی
بو شهری، خیابانی.
کیم او ایگیدلرین جانین،
سؤیله‌دی سویا اویناییر؟!...

آخ، بویئرلر،
دونیانین بخت‌سیز اؤلکه‌سی
دردین قوزئیی کؤلگه‌سی
اَریییب گئتمیر لکه‌سی،
اۆزو کوله‌یه اویناییر.

آخی بیزی
کیم سالیب‌دیر بو اویونا؟...
اوینادانلارین تویونا
 بورج اولسون
 دایانما اوینا
هامی بو تویا اویناییر!

(قیش۱۴۰۴)

#علی_جوادپور
#ادبیات_ائوی

@AdabiyatEvi

ادبیات ائوی

12 June 2026 10:24

او، وبانین گتیردییی داغینتی‌لاری گؤردویونده، بو نوع دردلره سببی اولان یاراداندان-آلله‌دان شبهه ائدیر.
او عینی حالدا اؤلومون اجلینی زیارت ائدیر، لاکین طالعینه بویون اَیمه‌یه تمایل گؤسترمه‌ییب، آیریجا اونا میدان اوخویوب، اونو سورغو-سوال میدانینا چکمیشدیر. یئددینجی مؤهور فیلمی دولایی‌سیلا آزاد شکیلده اورتا عصرین ماتریال‌لاری ایله بیرلیکده تقدیم اولونان معاصر بیر پوئمادیر-شعردیر. بو اثرده ساواشچی صلیب یوروشوندن قاییدیر، حالبوکی بوگونکو عسگر ساواش آلانیندان قاییدیر. اورتا عصرلرده انسان‌لار وبادان اؤلورلر حالبوکی، بوگونکو انسان‌لار اتمی بمب‌لاردان اؤلوم حالینا حاضیرلاشیرلار. فیلم ساده شکیلده اؤلوم-وارلیق موضوعوسونا توخونموشدور.
اثر سئیرک‌لی، ایستایلیزه-اوسلوب‌لو پیلان‌لارلا یاخود تئماتیک-موضوعی دیالوگ‌لارلا ایزله‌‌ییجینی دیکسیندیریب، حتّی طنطنه‌لی سس افکت‌لری باشلیجا طنطنه‌لی حزین موسیقی‌سی ایله برابر، بیر مارش کیمی اونو تیتیره‌دیر. یئددینجی مؤهور دینی سیناغین هم یونگول، هم ده قارانلیق طرف‌لری‌نین آوتوریتئت-نفوذ ائتدییی، بلکه ده بیر قدر اوبسئسیف (ذهنی چوخ فیکرلشمه) حالینا گلیر. لاکین یئنه دقّتی چکن بیر فیلم اولاراق هله ده تراکتات‌دا-بحث‌ده قالماق اوزرینده‌دیر. آنجاق برگمان یئدینجی مؤهور فیلمین دیداکتیندا اؤزونه بیر شئدئور اولاراق اؤز مؤهرونو باسمیشدیر.
آتک یازی: بو اثر ۱۹۵۷-جی ایلده کن فستیوالیندا مکافاتا لاییق گؤرونموشدور.
بو فیلمین مرکزی ایدئیاسی اساسیندا بیر نئچه سند اثرلری ده یارادیلمیشدیر. بونلارین آراسیندا «وودی آلن‌»ین «اؤلومون قاپی دؤیمه‌‌سی» آدلی قیسا‌متراژلی-قیسا‌فیلم پیئسینی- نمایشنامه‌سینی قید ائتمک اولار. بو تاماشادا، وودی آلن بیر انسانین اؤلوم‌له مَرج-شرط ائتمه‌سی‌نین کومیک حسابینی تقدیم ائدیر، بورادا اؤلوم بیر انسانین باشینا گلیر و او، بیر کارت اویونونو تکلیف ائدرک اؤلومو توزاغا-تله‌یه سالیر و اونو سونسوز بیر مرج دؤرونه آپاریر. باشقا بیر اؤرنک‌ده، هوشنگ گلشیری ۱۳۷۳-جو ایلده «حریف شب‌های تار» آدلی بیر حکایه یازمیشدیر کی، اورادا بیر آدام اؤلومله نرد اویناییر (آذربایجان دئییم‌لرینده، عزرائیل ایله پاپالان اویناماق دئییمی ده وار).

#احمد_یوسفی
#ادبیات_ائوی

@AdabiyatEvi

ادبیات ائوی

12 June 2026 10:24

#فیلم_تانیتیمی
فیلم آدی: #یئددینجی_مؤهور
یازیچی: #احمد_یوسفی
#ادبیات_ائوى

@AdabiyatEvi

ادبیات ائوی

09 June 2026 07:55

#اوشاق_ادبیاتی
#زوغال_چیچه‌یی

ساپ- ساری اولور
زوغال چیچه‌یی.
قورخوتمور اونو،
یازین کوله‌یی.
چوخ ائرکن آچیر،
باغا نور ساچیر،
قیش اونو گؤروب،
باغلاردان قاچیر.

#عزیز_موسی
#ادبیات_ائوى

@AdabiyatEvi

ادبیات ائوی

07 June 2026 14:17

#بیلدیریش

«لالا» آدلی حئکایه (رومان) کتابی‌نین آچیلیش تؤره‌نی، خرداد آیی‌نین ۲۱-جی گونونده آخشام ۶-دان ثقه‌الاسلام ائوینده (قاری کؤرپوسو- نظامی آدینا ادب، کولتور قورولتایی) کئچیریله‌جک. بو اثرین یازیچیسی «نساء مقصودی‌فر»دیر. کتاب، آخار نشری واسطه‌سی ایله چاپ اوزو گؤرموشدور.

#ادبیات_ائوی
#لالا

@AdabiyatEvi