42599
نشر ✍🏻القصائد داخل القناة مجاناً بأشراف ملا ابو امير الفاطمي مؤسسة فاطميون الحسينية للتواصل مع الادارة
ماكو مثلهم بالخلك هنيالي.... عندي انصار وياهو يدنالي
############
انصار امي الزهره كلـــــــهم غيره
ما خلو المعصوم وجهه يديره
احزاب اميه من اجت بجيوشها
وكفت زلم خلو الموت بحيره
والزلمه يزئر من يجيس ظلالي
#############
بيهم اتنومس يا فخر نوماسها
للموت بالميدان دك اجــراسها
ياهو التجرأ يمي يوصل حاشا
ثبتوا وزلمتهـــــم ندب عباسها
قسمو قسم محد يلوح رمالي
#############
عندي حبيب وزلمه وسط النيبه
بظهره برير اعله الوفه تدريبه
عابس عبس بيها وينادي اخوانه
اليوم حكنه من العلوج نجيبه
والعنده جون من العده ميبالي
#############
والحر صدك حر بولاءه ودينه
للدين واهــــله انطه گرة عينه
طلگ الدنيه واعتنالي بروحـه
واليعتنيلي انه اطهـــــر طينه
واليعتنيلي يمي نوره يلالــي
##############
العنده وهب للدين واهب روحه
من حيدر الكرار بيه ملوحــــــه
ظهر بظهر وي عــــابس بميدانه
والعنده هيج سباع ياهو يلوحه
والعنده منهم ما يهم للتالــــــي
##############
ونسألكم الدعاء لتعجيل الفرج
لخادم محمد وآل محمد(ع)
الشاعر حيدر كاظم الساري
قناة الرجوع الى الله @h_ameer1
قصائد منبريه مكتوبه @h_ameer2
ملا ابو أمير الفاطمي @h_ameer3
روح وريحان @h_ameer4
الله يساعد گلبك بويه
ياصاحب الزمان
والله المصيبة احنه
ماجاي نحملها شلون بيك أنت
وانت أبو الغيرة كلها والحمية
والمذبوح جدك والمسبية عمتك أخ
عَالِتْرَابْ...يَالَاصْحَابْ...يَا وِسَفْ عِفْتُونِي
وَلَا چَانْ.....عَلَى الْبَالْ......وَحَّدِي تْخَلُّونِي
-----------------------
مِنْ شِفِتْكُمْ عَالْوِطِيَّه وِالْمَنَاحِرْ دَمْهَه يِجْرِي
غَزَّرِ الشِّيبِ بْلِحِيْتِي وِاخْتِنَگْ بِالْعَبْرَه صَدْرِي
گُومُو يَا أَهْلِ الْمَلَاحِمْ حَشَّمِتْ وِايدِي عْلَه ظَهْرِي
مُو وَكِتْ هَجْرِ الْغَوَالِي تْحَيَّرِتْ تَالِيهَه بَامْرِي
أَنَا حْسِينْ...وِاجَه الْبِينْ...حَوَّمِ عْلَه عْيُونِي
وَلَا چَانْ.......عَلَى الْبَالْ.......وَحَّدِي تْخَلُّونِي
-----------------------
شُو عَجَبْ هَانَتْ عَلِيكُمْ فَرْگِتِي يَهْلِ الْحَمِيَّه
وِانْتِهَتْ ذِيچِ اللِّيَالِي مَحْلَه صُحْبَتْنَه سِوِيَّه
خِلْصَتِ السَّفْرَه الْگِصِيرَه وِابْتِدَه يُومِ الْمِنِيَّه
مِنْ بَعَدْ سَاعَه يِجِينِي الشِّمِرْ يِتْرَبَّعْ عَلَيَّه
أَلِفْ وِيلْ...مِنِ الْخِيلْ...عَالثَّرَى يْسِحْگُونِي
وَلَا چَانْ.......عَلَى الْبَالْ......وَحَّدِي تْخَلُّونِي
-----------------------
مَاكُو بِالدِّنْيَه مِثِلْكُمْ يَا صَنَادِيدِ وْضَيَاغِمْ
كَلْفَه گِدَّامِي أَشُوفَنْ چَمْ گُمَرْ عَالْغَبْرَه نَايِمْ
هَاذِي نُومَتْكُمْ عَجِيبَه وِالْعَدُو عْلَه الْخِيمَه حَايِمْ
خَايِفَه گْلُوبِ الْحَرَايِرْ لَا يِذِبْحُونِ الْهِوَاشِمْ
يَفِرْسَانْ...تَرَه هْوَايْ...عَنْكُمِ يْنِشْدُونِي
وَلَا چَانْ...عَلَى الْبَالْ...وَحَّدِي تْخَلُّونِي
-----------------------
يَا حَبِيبِ بْنَ مُظَاهِرْ يَا وَفِي مَا صَحْ مَثِيلَه
تِدْرِي يَا عَمْنَه بْرَحِيلَكْ ذَابَتِ عْيُونِ الْعَقِيلَه
لِأَنْ شَافَتْنِي أَخَيْتِي وْعِدِّتِي صَارَتْ قَلِيلَه
عَايِنَتْ زِينَبْ جِثَثْكُمْ عَالتُّرُبْ وَسْفَه جِدِيلَه
يِجَازِيكْ....نَبِينَه....يَالْطِحِتْ مِنْ دُونِي
وَلَا چَانْ...عَلَى الْبَالْ...وَحَّدِي تْخَلُّونِي
-----------------------
يَالْگِلِتْ آهِ عْلَه زِينَبْ تِدْرِي بِالْيِجْرِي عَلِيهَه
مَا يِظَلْ عِدْهَه مُحَامِي مِنْ بَعَدْ طِيحَةْ وِلِيهَه
عَالْهِزِيلَه يْرَكِّبُوهَه وِالشِّمِرْ كِلْسَا يِجِيهَه
تِنْضُرُبْ بِنْتِ الزِّچِيَّه وِالْحَبِلْ يِجْرَحْ إِدِيهَه
عَلَى النُّوگْ...غَرِيبَاتْ...وِشْيِصَبْرِ ظْعُونِي
وَلَا چَانْ.....عَلَى الْبَالْ......وَحَّدِي تْخَلُّونِي
-----------------------
تِنْسِبِي كِلِّ الْفِوَاطِمْ وَالله يَا عَمِّي هَضِيمَه
بِالدَّرُبْ بَاچِرْ يِطِيحَنْ چَمْ يِتِيمِ وْچَمْ يِتِيمَه
تِمْشِي مَا بِينِ الْأَجَانِبْ عِيلَةِ الْهَادِي وْحَرِيمَه
مْسَتَّرَه نِسْوَانُ امَيَّه وْزِينَبِ اخْتِي بْلَايَه خِيمَه
تِمَنِّيتْ.......تِظَلُّونْ........لَاچِنِ تْرَكْتُونِي
وَلَا چَانْ...عَلَى الْبَالْ...وَحَّدِي تْخَلُّونِي
-----------------------
#الأصحاب
حسن خنافر العاملي
قناة الرجوع الى الله @h_ameer1
قصائد منبريه مكتوبه @h_ameer2
ملا ابو أمير الفاطمي @h_ameer3
روح وريحان @h_ameer4
وبس لحسين الدم يتحرك
*
بيد ابن ضاهر يرف شفنه اللوه
ونركض اتعنينه كل عشره سوه
احنه زلم حسين ما بينه الرخيص
ياهو يوصل واحنه نشتم الهوه
من نصول اعله الحرب نكلب الدنيه كلب
وما عفناه بوكت الشده
*
ضلوا باب الخيم يستعرضون
وعالقتال اتشوفهم يتنافسون
بالصورام صعدوا عله المصهلات
والحرب دخنت من طب ليها جون
الحومه صاحتله هله وشك قميصه بكربله
وصاحبنه الما بي لوله
***
ما نخلي الخيل بالطف تستراح
الخط الاول بس وصلنه احدوده طاح
الخيل والخياله ماخذها الرجيف
والشمر لحد يضل بالحومه صاح
للحرب ربعه اعتنو بغيرة الله اتحزمو
وربعه اوياه الطف هوسله
**
شيخ الانصار اعله ضهر الغايرات
وصاح بيهم لازم انطم الفرات
صرخ حيهم والزلم ركضت وراه
وطبو اعله الحومه من اربع جهات
وكربله اتراب انعمت والصوارم سولفت
ويه الموت اليوم امكالب
****
ما نهاب الموت لو صار النزال
من زغرنه امدربين اعله القتال
وين راح تصير خليها تصير
وهيه دوم المعركه اتحب الثكال
ما نبيع المعتقد الجيش من عدنه شرد
ومثل الغيم انصارك طلعو
***
استاذن امن حسين وتقدم زهير
طوله سد الشمس من كد ما جبير
الرايد ايصاحب ايصاحب كون هيج
حسين ربعه عابس وجون وبرير
ما يخونون الملح ذوله صحبتهم ربح
واحنه وياه حسين ويانه
*
تمت
تحسين الخفاجي
قناة الرجوع الى الله @h_ameer1
قصائد منبريه مكتوبه @h_ameer2
ملا ابو أمير الفاطمي @h_ameer3
روح وريحان @h_ameer4
#نعي
گومولي شوفو شحال اخيكم
مهـــضوم لـــمن فــــــزعتــكم
ياهو اليــرد اجــواب منـــــكم
فـــزعت الـــــوادم حشمــتكم
وين اليخــــــــلسون المــعاره
غــــاره تـــرد وتــــروح غــاره
يسعـــر دلــــيلي وكبـــره ناره
لحسين گومو وسوو چـــــاره
ضل الغريــب يــدير بالعـــــين
صوبين خيل وناس صــــوبين
بأنصاره متــروسه الميــــادين
ومتخوصر وبالضيم الحسـين
لحــسين يـهل حــسيــن فزعه
راحــــت تدوس الخيل ضلعـه
وينادي ما واحـــــــد يســمعـه
وزينب تضل يم راســـه تــنعه
✍حيدر ابو كيان الفاطمي
#اللهم_عجل_لوليك_الفرج
#تراث # بحر
ندبة الحسين عليه السلام
لأصحابه صلوات الله عليهم
لمن ظل وحید احسين وعليه دایر العسكر
راح ايودع اعياله گبل أفراگ المگدر
ــــــــــــــــــــــــــــــــــــــ
رد امن الحرب مهظوم الاچن گصد لأنصاره
لگاها اعلى الارض نومه او دم الطعن يتجاره
وگف يمهم يعاتبهم اوگلبه تلتهب ناره
يليوث الحرب نومه
اومنكم خاليه الملحومه
ثنيتكم المعلومه
ياهو اليوگف ابجدها اودون الخيم يتعفر
ــــــــــــــــــــــــــــــــــــــ
عفتوا ادیاركم لجلي اوطلگتوا الأهل يكرام
ليش اليوم عفتوني وحید ابين هالظلام
عدكم (حرم) مذعوره والكم بالطفوف اخيام
ياهو اللي يحاميها
العسكر لودوه اعليها
هاي اخيل اجت ليها
گوموا اوسدروا الغاره (اوخلوها) شتت بالبر
ــــــــــــــــــــــــــــــــــــــ
اعاتبكم يهل بيتي ولا چنكم تسمعوني
ليش أوحيد بين الگوم يهل الوفه اتخلوني
دارت علي عدواني اولیکم شابحه اعيوني
چیف الكم يطيب النوم
و آنه أوحيد بين الگوم
جزاكم يهل بيتي اللوم
أعاتبكم اومن عدكم السان الحال يتعذر
ــــــــــــــــــــــــــــــــــــــ
يهل الشيم فرگتكم اشلون الحرم تحملها
بيهن صارت اللوجه اوروحي لاجت الذلها
گامت تضطرب عالگاع ذیچ ابدانها كلها
لمن سمعت المظلوم
رادت تنتهض واتگوم
لاچن حايل المحتوم
مابین اخوته اوبینه اوکلما (تهم) ما تگدر
ــــــــــــــــــــــــــــــــــــــ
(سدر) مايوس من عدهم وتعنه الصواوينه
وگف مابين المخيم وتهل الدمع عينه
صاح ابصوت (یم چلثوم) (یازینب) (اویسکینه)
ليچن چیت متعني
اودعچن اوودعني
بعد ماظن تشوفني
هذا (اليوم) تالي اوداع والميعاد بالمحشر
ــــــــــــــــــــــــــــــــــــــ
لمن سمعت النسوان للتوديع ناداها
طلعت من مبانيها او تتصارخ يتاماها
غدن يبچن على أفراگه أو يتهلف الفرگاها
وحده لزمت ارچابه
اووحدها تحن على امصابه
او وحده اتصيح يايابه
او وحده اتون على افراگه اووحده اعليه تتحسر
ــــــــــــــــــــــــــــــــــــــ
چنك سلمت للموت زینب نادته يحسين
يگلها اشلون ماسلم يختي اولا بگالي امعين
عامي واخوتي نومه اوبيه دایره الصوبين
(چتلي) عداي مگصدها
اوغير الحرب ما عدها
سبعين الف شيردها
وانه امن العطش چبدي يزينب ذاب وتفطر
ــــــــــــــــــــــــــــــــــــــ
طفله امن الخيم طلعت صاحت يا ضوه عيناي
يعمي والدي اوعمي هليوم اعتنوا للماي
ولاردوا بعد لیه او حر العطش فت احشای
اخذني اوياك يعيوني
اوخليهم يشوفوني
ومن المای يسجوني
تراني امن العطش ما شوف دربي اوچبدي اتفسر
ــــــــــــــــــــــــــــــــــــــ
يگلها امن آخذج وياي ليهم بعد شيردج
لاچن رايح آنه الحين واخبر عودج اوعمچ
ردي ياضوه اعيوني اوتاني الماي بخيمچ
تگله اشلون ارد وآنه
مني الروح تلفانه
يعمي احسين عطشانه
واخافن تبطي اوچبدي نار العطش بي تسعر
ــــــــــــــــــــــــــــــــــــــ
سالت دمعته اوناده يزينب عاد سكتيها
تراهی گطعت گلبي هالطفله ابواجها
يختي الحرم لميها والخيمتج رديها
إسمعي اعداي نادوني
أرد للگون يردوني
بعد ساعه او یکتلوني
اوما اقبل يشوفني اوجسمي اعلى الثره امطبر
ــــــــــــــــــــــــــــــــــــــ
لوه اعنان المهر بیده اوراد اعلى الحرب يحمل
لن وحده تصيح بصوت يحسين اودمعها ايهل
صد اوشافها (زینب) گالتله يخويه انزل
راحت حبته ابصدره
اوردت شمته ابنحره
او صاحت يمي (يالزهره)
هاي اودیعتچ ردت وینچ ساعه واتگنطر
المرحوم السيد
عبدالحسين الشرع
قناة الرجوع الى الله @h_ameer1
قصائد منبريه مكتوبه @h_ameer2
ملا ابو أمير الفاطمي @h_ameer3
روح وريحان @h_ameer4
كلمن كتب موقفه
بالدم وگف سولفه
قائدهم اسمه الوفه __ انصار سبعين
/////////////////////////////
عشرة مناحر تنذكر - الله يهاي العشره
لو هيچي اليصاحب زلم - لو ما يصاحب عمره
واحدهم بوجه الرمح - ما مره داير ظهره
اگبال العساكر هوسو - يستاهل ابن الزهره
بالرايه هجموا سوه
مالت ارض نينوه
امن الخيمه صاح الضوه __ صحبان طيبين
/////////////////////////////
بعمامته تحزم ركض - حيهم يصيح الشايب
عصابه شد ابگصته - يحسين احبك كاتب
مدلهم زعل شافو طلع - حاجب تلاگه بحاجب
گلهم يربعي اتحظرو - اليوم يوم الصاحب
گلهم اشاره انتظر
وافدي لحبيبي العمر
الصحبه الصدگ تنذكر __ عدلين ميتين
/////////////////////////////
اول وهب كلشي وهب - وهوه بربيع اسنينه
من شاف دين اهل الخيم - غير نظرته ودينه
قربان قدم منحره - كام بثواب احسينه
بعيونه كلشي ما حله - شاف الحسين بعينه
فارس شجاع انكتب
اسمه المجاهد وهب
بدين الخيام انعجب __ مبروك هالدين
/////////////////////////////
عابس طلع ذب الدرع - جون اتبع خطواته
اول سمار يشع ظوه - بطف كربله شمحلاته
يتهدد بنصهم وگف - تشهد اله صولاته
گللهم الصاحب وطن - يبين تره بوگفاته
جون بحبيبه قسم
يتلگه صدره السهم
عابس فدائي الخيم __ مجنون بحسين
/////////////////////////////
البلسانه تنشاف الهله - الناره التدلي الظايع
من فرغت ايده بكربله - بالنحر عزب نافع
ناده اظوگكم ردت - طعم الوفه بالواقع
مثل الحسين وغربته - لا شايف ولا سامع
مغزر بصحبتي الملح
ناتج وفائي الربح
ما ارضه بس بالذبح __ ياريت مرتين
/////////////////////////////
عدهم ميانه اويه الوفه - يستاهلون انصاره
كل واحد انطه منحره - هذا الحسين اختاره
گعدهم بخيمه الفجر - وزف الهم احله بشاره
ظل اليگوم امن الفرح - يكسر غمد بتاره
هستوه طر الفجر
بالحومه سجدو شكر
رسمو طريق النصر __ ينشاف بالعين
/////////////////////////////
تمت ____ علاء الزيدي
قناة الرجوع الى الله @h_ameer1
قصائد منبريه مكتوبه @h_ameer2
ملا ابو أمير الفاطمي @h_ameer3
روح وريحان @h_ameer4
قصيدة ( نموت وياك ) لسان حال الانصار يقولون لأمامهم الحسين عليه السلام
نموت وياك حتى نعيش يحسين
بس ويــاك احنه نعيش مــرتين
كل شي وياك بي روح حتى المـات مذبــوح
مــــــــا مــــــــــــــات
****
اصعـب موتـه بــس ويـاك وبنفــس الوكت سهـله
الصعوبه البيها انته حسين انته الدين وانته اهله
نتخيّر بيــن جنــه ونــار ويـــاك الممـــات احــلــه
نــرخص دونـــك الارواح يمن روحك علينا اغله
فدوه نروح الك يا والد العتره
يا ديــن الالــه ومنهجه وسره
ودونك دمنه مسفــوح حتى المــات مذبــــوح
مــــــــا مــــــــــــــات
****
لــوّن نمــوت الك يحسين مـــو مــره الف مــره
ونــرد نعــيش هــم وياك ودونـــك والله نتــذرى
منعوفك ابد يحسين وحگ ضلع امـــك الــزهره
الخلود المات بس وياك الممات العَز الك عمره
الخلود وياك يا سـر الله والدين
المات وياك عايش هذا يحسين
يا قبله من الجــروح حتى المـــات مذبوح
مــــــــا مــــــــــــــات
****
المــات بكربلائــك هــاي دونــك يا ابــو اليــمه
وفوگ الغبره ظل مطروح تغسل من نزف دمه
هــذا الفــوز يـــا مــولاي وهــايه نعمّة النعمّـه
الموت شگد صعــب لكن دونك مكرمّهَ ورحمه
نضحي ارواح الك يا وارث الهادي
لحد اخــر نفس بس بأسمـك انادي
انته الروح للروح حتى المات مذبوح
مــــــــا مــــــــــــــات
*
اتخــذوه جَمــل هاليــل مــن گلهم ابــو الاكبــر
گالــو يــا ابــو عبدالله العّـنــك يبتعــد يخــســر
محمد انتــه بالميــدان نشوفــك يــا شبل حيدر
گبل نحرك يبو الاحرار نرَخّص سيدي المنحر
مناحــرنا الك يبــن النبــي فـــدوه
هوه العمر دونك كل شي ما يسوه
الا ودمــه مسفـوح حتى المـــات مذبوح
مــــــــا مــــــــــــــات
*
وعــدّ جــدك مناره تصير الك يا سيدي وحضره
وتزورك سيــدي البلــدان يبن الطــاهره الزهره
شعظها احنه بضريحك ذاك يـمْ بابك نشم عطره
يتَخَلد مـنْ يصير ويــاك تــرفعه وترفــع بقـدره
يحسين الخلــود انطيتــه الــرفعه
يبن سر الوجود الطاهره البضعه
بنيت ابدمك اصروح حتى المــات مذبوح
مــــــــا مــــــــــــــات
*
يحسين شكبــر حضنّــه احنـه نصيـر بكتـارك
ونــور البينه يــا مــولاي ماخـذ هيبة انوارك
يمر بينا غــدا مولاي كـل عاشگ گصد زارك
دنيــا واخــره يحسين نفخــر احنــه انصـارك
باچــر بالامــامه تنـــدعي الامه
دنيا واخره احنه ويه ابو اليمه
يمن اسمك على اللوح حتى المات مذبوح
مــــــــا مــــــــــــــات
*
الشاعر موسى البديري
قناة الرجوع الى الله @h_ameer1
قصائد منبريه مكتوبه @h_ameer2
ملا ابو أمير الفاطمي @h_ameer3
روح وريحان @h_ameer4
((بالميدان))
بــــالميدان اتصير الحيره
والحب يتساوه ويه الغيره .. خوش انصار
"""""""""""""""""""""""""""""""""""''''''''''
يقــــــرون بــ آيات الكوثر
أنـــــا اعطيــــناك المنحر
يمخليـــــــــنه بحبك نسهر .. يالمحبوب
يمخلي الحب اجمــل صاير
من حاير ظل يحچي الحاير
مانهـــتم للجيــــش الـــداير .. يالمحبوب
كل الــحيره بيك الماي ممنوع
وأحنه الخاطرك سَبَلنه الدموع
وبضلمةّ عشگنه صرنه الشـموع
يالحبـــــك ضواها الديره
والحب يتساوه ويه الغيره .. خوش انصار
"""""""""""""""""""""""""""""""""""''''''''''
ياعــــالي وبالحب انكابر
گمنه نشوف بحبك باچر
ومتاتين ايصير العـــــاشر .. يالمحبوب
يمته نزف المنحر لجلك
يمته نصير الســاتر لهلك
يالمحبوب بدمعه نسئلك .. يالمحبوب
ويمته من الزنود چفوف ننطيك
ويمته من المناحر يبدي طاريك
كل ســــوالف الحب نلتقي بيك
والحب اصعب من تعبيره
والحب يتساوه ويه الغيره .. خوش انصار
"""""""""""""""""""""""""""""""""""''''''''''
نتسابگ والمنحــر شاهد
ياهـــــوّ اليبرز اول واحد
فرحان البرماحه الصاعد .. يالمحبوب
مو بس عابس شگ هدومه
كامت تصرخ حتى الحـومه
گــــــــوه الفرسان وملزومه .. يالمحبوب
ليش انته غريب وانته ابو الناس
ولو تارس حياتك ملگه عــــباس
هوه الجيش كله وهوه الاحساس
عباس اليصــعب تصويره
والحب يتساوه ويه الغيره .. خوش انصار
"""""""""""""""""""""""""""""""""""''''''''''
ميدان الحب هوه الغايه
وتخفگ بالميـدان الرايه
وبسمك دگيـــناها الثايه .. يالمحبوب
لو ينجاب اسمك بالـطـاري
يبدي المدمع بالحب جـاري
چا ليش اسمك يصبح عاري .. يالمحبوب
حتى الثوب منـك صار مسلوب
بغضاً بالولايه حسين مطــــلوب
من يوم السقيفه اكتاب مكتوب
والــــــدين بدمك تحريره
والحب يتساوه ويه الغيره .. خوش انصار
عبد زينب
محمد الابراهيمي
قناة الرجوع الى الله @h_ameer1
قصائد منبريه مكتوبه @h_ameer2
ملا ابو أمير الفاطمي @h_ameer3
روح وريحان @h_ameer4
انصارك يبواليمه
كل واحد بالف زلمه
صارو عالخيم لمه..
والعباس حياهم
ــــــــــــــــــــــــــــــــــــــ
شجعان فرسان.. كلهم حميه
سبعين يحسين.. صاحو سويه
وياك ..للموت. يبن الزجيه
يم المخيم هوسو
والغيره شبت بيهم
خارج حدود الطف وصل
يمكن دبچ رجليهم
جاسم يكلهم ياهله
والأكبر ايهنيهم
كالولك يبوالسجاد
نكلبهه الطفوف ارماد
وكفولك بالاستعداد..
والعباس حياهم
ــــــــــــــــــــــــــــــــــــــ
انصار..وارجال.. عدهم بصيره
واوجوه..بالخير..تزهي ومنيره
صاحو..وياك..احنه العشيره
ترباتك احنه ومن تهد
مولاي زامط بينه
لونزلت يمنه الشته
يبقه العشك يجوينه
واحدنه ينعد بالف
شارب الك كضينه
بالضاهر هذن كلمات
لكن بالحقيقه آيات
صالو أعظم الصولات..
والعباس حياهم
ــــــــــــــــــــــــــــــــــــــ
جيناك وانكون..زلم العقيده
نرضي الزهراء..هذا النريده
اليدناك..مولاي..نكطعلك ايده
هاذي عبارات الزلم
فوك الصخر منقوشه
الباوعلك احسين بكره
نكلبهه بيض ارموشه
والحومه صارت بالركب
طول بعرض مفروشه
مثل البسط بالديوان
فرشوهن ركب وابدان
والهم صفك الميدان
..والعباس حياهم
ــــــــــــــــــــــــــــــــــــــ
لخيام..ام عون ..زحفو ضمائر
لن شيخ..الانصار..ابن مضاهر
ناده..تفداج..كل المناحر
اليوم إطمأني وأمني
وارتاحي يالعلويه
حراس احنه اعله الخدر
واحنه زلم حربيه
مادام نشتم الهوه
ماتنوخذ مسبيه
زينب سمعت الانصار
صاحت ياضوه الانضار
بيكم غيرة الفقار..
والعباس حياهم
ــــــــــــــــــــــــــــــــــــــ
بالليل..عالكاع..فرشو عبيهم
تهليل..ترتيل..نسمع دويهم
آيات..نفحات..يطلع حجيهم
هذا اليحد إبصارمه
وذاكه اليجهز اثيابه
وواحد يخظب شيبته
حته الالوف اتهابه
خوان الإحسين ونعم
وانعجنو أمن اترابه
ومن صار الصبح ياناس
واحدهم عله الذل داس
ماتو رافعين الراس..
والعباس حياهم
ــــــــــــــــــــــــــــــــــــــ
كل عام خدام..احنه بعزاهم
فرسان..عاشور..الله اصطفاهم
من فوك..للكاع..نازل ضواهم
ذكراهم ايسر الكلب
نصرو حبيب الزهره
ولوعاشو الهذا الوكت
هم جان نفس الفكره
جا لبسو اجفانه واجو
والمهدي لزمو ضهره
ذوله أمن اطيب الارواح
للمهدي درع واسلاح
صارو للشجاعه اجناح..
والعباس حياهم
محمد الجماسي
قناة الرجوع الى الله @h_ameer1
قصائد منبريه مكتوبه @h_ameer2
ملا ابو أمير الفاطمي @h_ameer3
روح وريحان @h_ameer4
فخر عدنه جبير اصحابك هواي
الى من ناصـــرآ لتـــكول مولاي
نموت وياك نتمنه
نصرتك باب للجنه
شربنه عيــونك ونســيتنه الماي
الى مـــن ناصـــرآ لتكول مولاي
*
يحســين اليموت ويااك ماينعــاف بلتــالي
يضل مثل الكمر بليل بعيون الــسـمه يلالي
ياهو العده مثل حسين يتسمه صدك غالي
شايب شاب كلها تصيح انه الموت يحلالي
مـــحد ملتهــي بهمـه
الموت شوكت نشتمه
شربنه عيونك ونسيتنه الماي
الى من ناصـــرآ لتكول مولاي
***
كلها تصيح وين حسين محد ملتهي برووحه
لو ردت النجم يحسين هاي اصحـابك تلوحه
خل نمــوت يامــولاي عبــدلله كــثــر نوحـــه
اليتبـــاهه صـــدك ويااك يامـــولاي بجـروحه
عذر ماعدنه كــدامـــك
بعطشنه ينشد احزامك
شربنه عيونك ونسيتنه الماي
الى من ناصرآ لتكـــول مولاي
**
جا هيه الكلوب سيوف من عينك لحد عينك
مو زاد وملح دمعات بين اصــحابك وبيـــنك
من ينجاب طاري الموت كلها تصيح جا وينك
المطلوب بزمانه جروح سد بكـــربلا ديـــنــَك
اليحب حسين مايندم
عدل وبــموته يتحــزم
شربنه عيونك ونسيتنه الماي
الى من ناصرآ لتكـــول مولاي
**
نعمـــه عــيونـهم بــس ليك مو للشـــوف خلوهه
ماتنــحــب حـــرب هيـــــهات بس وياك حــبوهه
حرب بيهه الحسين هناك رحمه من الله شافوهه
ســـبحه وكلــها خيط اتــصير كل الحرب لمــوهه
الصرخه الموت جا وينه
حـــب حســـين عامـينه
شربنه عيونك ونسيتنه الماي
الى من ناصرآ لتكـــول مولاي
**
جرح بصحابك مخزن صعب يتضمد وينشف
جرح الكلـــب يامــولاي بـــس بـفعال يتلفلف
زينب بلخيم شتريد كــون الرايه مـــاتــنــلـف
وكت الحرب كلها سيوف مابينه البقه مجتف
الكلب ينشـاف بصوابه
حسين يشوف بصحابه
شربنه عيونك ونسيتنه الماي
الى من ناصرآ لتكـــول مولاي
**
علي ابو الياس
قناة الرجوع الى الله @h_ameer1
قصائد منبريه مكتوبه @h_ameer2
ملا ابو أمير الفاطمي @h_ameer3
روح وريحان @h_ameer4
يا كسرتي اعله الصحبان عافوني الهواي احنان
كل يوم اسولف جنت وياهم تعبني زينب حيل فركاهم
***
امس العصر جنه سوه وبخيمتي التمينه
نسولف كعدنه والوكت ما يخلص اتمنينه
ابطيحت حبيب اتألمت ومن كلبي اصيحن وينه
ليش اليفارك صاحبه توكف الدنيه بعينه
للخيمه منهم رديت وبلايه صاحب ضليت
راحو بعد جا وين الكاهم تعبني زينب حيل فركاهم
*
طبع اليصاحب من صدك ما ينسه ذيج العشره
والبيده شيع صاحبه من يمشي يلزم ضهره
يا حيف يفجعني الزمن بذيج الخشوم السمره
الجون وبرير اشكد نحت وكلبي يخويه شكبره
ما حسبتهم يمشون وحدر التراب اينامون
واهل المحنه اشلون انساهم تعبني زينب حيل فركاهم
***
ما بيه حيل اوكف بعد زينب صحت سنديني
صحباني طاحو بالسره وطاح الدمع من عيني
صح البكه براسي لجن فركاهم امأذيني
بصحباني جا ليش الوكت يكسرني ويبجيني
للموت ضلو يمشون واكبالي اشوف ايطيحون
صحباني كلبي اهواي يهواهم تعبني زينب حيل فركاهم
**
وين المهيل والكلف اتفاخر بصحباني
احنه العمر جبناه سوه واحد يحن عالثاني
عابس هدمني من مشه وتراكمت احزاني
بالكوه اجر كمت النفس هيج الوكت خلاني
وياي اسمعج تحجين كلبك خلص خويه حسين
اتراب المنيه انصاري غطاهم تعبني زينب حيل فركاهم
****
كون اليصاحب للابد ما ينطي ابد بالصاحب
والينكر بساع الملح تترك صحبته واجب
اليحجي اعله اخيه بالضهر ما بيها طولت شارب
ربعي انه كلها امعدله وكفت وياي اتحارب
بفزعت برير اتباهيت هيج اليصاحب ياريت
ذوله اخوتي وبالضيج انخاهم تعبني زينب حيل فركاهم
**
ضليت انه الوحدي وصحباني كلهم موته
انضر زهير اعله الترب صار الرمل تابوته
ولا واحد المنهم حجه حته اكعد اسمع صوته
ما يرحم اوداع المشو بعيني الصور منحوته
لحضه بجفاهم ما عيش وصوابهم مو بالريش
والموت ماي اكبالي بداهم تعبني زينب حيل فركاهم
*
تمت
تحسين الخفاجي
قناة الرجوع الى الله @h_ameer1
قصائد منبريه مكتوبه @h_ameer2
ملا ابو أمير الفاطمي @h_ameer3
روح وريحان @h_ameer4
#محرم_ليلة_مسلم
أول محطات الألم ... أول يتيمات الخيم
اتفطر گلبها ونصدم حميده
،،،،،،،،،،،،،،،،،،،،،،،،،،،،،،،،،،،،
للمخيم من وصل مرسال المصاب
البو الأكبر هايه جانت اول صواب
حيره شيگول الحميده والگلب شاب
طفله ويخاف اعله اديها تموت اللعاب
ماحجاها . راح مسلم ياحميده . ماحجاها
نوماها . طفله وزغيره اعله أيده . نوماها
اول مواجع كربله ... ومطشره أول عائله
اتيتم عمر المدلله حميده
،،،،،،،،،،،،،،،،،،،،،،،،،،،،،،،،،
گعدت اگبال الحُسين وبيين الخوف
تباوع الطفله اعله عمها الوجها مخطوف
اشمايريد ايگلها دمعه ايغرگ الشوف
المنكسر گلبه اعله غالي حاله معروف
وشيگلها . حيره محتار ابحميده . وشيگلها
مو بحلها . اليتم وفراگ التريده . مو بحلها
يمسح عليها بدمعته ... محد يفسر كسرته
ويالطفله عاشت غربته حميده
،،،،،،،،،،،،،،،،،،،،،،،،،،،،،،،،،
تنشد الطفله اعله ابوها وصار الصياح
حسين جاوب ياحميده امن القصر طاح
راح مسلم والحنان وكل حلم راح
واليفارگ غالي بس ابموته يرتاح
ياغريبه . وگلب ماتطفه ناره . ياغريبه
والمصيبه . طاح من قصر الأماره . والمصيبه
ضلت غريبه محيره ... والدنيه صارت مگبره
وتنادي يرجع ياتره حميده
،،،،،،،،،،،،،،،،،،،،،،،،،،،،،،،،،،،،،
ابنيه التفارگ ابوها اتعاشر النوح
حته من تضحك گلبها تحسه مجروح
اتريد من كثر البواجي تطلع الروح
والحميده شجم حلم بالغربه مذبوح
موبعيده . تموت من لوعت حزنها . موبعيده
والوحيده . بالدمع غارگ حضنها . والوحيده
ضلت غريبه والدمع ... كل ساعه لازم تنوجع
بالحيره والهم تنفجع حميده
،،،،،،،،،،،،،،،،،،،،،،،،،،،،،،،،،،،
ليش من دون البنات ابهاي الخيام
انذبحت اليابويه بيها وكل الحلام
فوگ كل هاي المصايب لوعت الشام
ازغيره وبذيج الخرايب باجر اتنام
لو سبوها . طفله وتصير السبيه . لوسبوها
ماكو ابوها . تبجي وتگابل رقيه . ماكو ابوها
عفاها مسلم للهضم ... ماتحمل هموم اليتم
لا والي عدها ولاخيم حميده
العبد ابوفايز الرافضي
الفاتحه على روح والدي
قناة الرجوع الى الله @h_ameer1
قصائد منبريه مكتوبه @h_ameer2
ملا ابو أمير الفاطمي @h_ameer3
روح وريحان @h_ameer4
بلغت بالحق رساله يا سفير حسينها
بيها للدنيه السلامه وبيها رفع لدينها
***.
انت يا اول حسيني يعني مرسول الالــــــه
بلغت امر الالــــــــــــه الواحد الماكو سواه
عن طريق حسين بامره والوحي ربك وحاه
كال اكمل امر جدك واتّبع نهجه وهـــــــداه
اجه بقران الرسالـــه ونهجه صار ومحتواه
وبأمر رب الجلاله وبنهج ياسينها
****.
نهجه الــــواضح نعرفه اجه يخلينه كرام
كلت مــــــا تركع ي مسلم فقط لله السلام
عيشة الحريه عندك تسوه جنات اللئــــام
موت حر ولا مذلـــه تعيشها تحت الحسام
هيج كــال حسين وصه وانه مرسول الامام
يوم حر ويا جماله ولا ذليل سنينها
*.
جيت وبمعول يمينك هدمت كـــــــــــل تاج راس
كلت بس ال الرساله للعدل همــــــــــــه الاساس
حسين واليمشي بطريقه الباقي من حدر المداس
و لا خطوط الحمره تبقه ولا حزب يحكملـــه ناس
فقط دين الله مقدس خطه الاحمـــــــــــر لا مساس
يا خليل الله بفعاله وهدم البانينها
***.
انت بالمعروف تأمر ناهي عن منكــــر يزيد
عن ظلمهم جيت ناهي كل حكمــــهم ما تريد
الذلو الناس بفعلهم واصبحـــــو عدهم عبيد
تسلطو وانت تعرفهم واللـــــي حاكمهم عتيد
كلت بالمعروف آمـــــــــــر ثابت لحز الوريد
الموت للعاشك حلاله لو نصر مسكينها
*.
الما رفض للجور جلمه هـــــــذا مو من الحسين
الما رفع للدين رايه خـــــــــــــل يعيش بلايه دين
بصوتك وذيج الكرامـــــــــــه ولا ظلام الجائرين
عليّ صوتك يالموالـــــــي وانصر اصحاب اليقين
ولا تهاب اهــــــــــل المناصب ربع مروان اللعين
يا شعار بزود شاله وزلزل صواوينها
**.
جيت وبجفك رساله تكول حي اعله الجهــــــــاد
انصروا حسين وطريقه يا اهــــــــل هاي البلاد
ولو ادري انتم وادي وانــــــه امشي بغير واد
لجن جيت انشر رساله واسمعوا ي اهل السواد
هالامــــــــــــر واجب عليكم وبوجه اهل الفساد
صاح والسيف انتخاله وهمته بيمينها
*""""""*
اليوم اتممت الرسالــــــــــــه عليهم الحجه لقيت
الدين بأحكامه واصولــــــــه فوك منبرهم حجيت
كل تعاليم الرسالـــــــــــــه ولا حرف منها نسيت
مــــــا عفت للكوفــــــــــــه منبر الا بيه وبلغيت
بلغت بس يا ندامــــــه شلون مــن وحدك بقيت
وحده لاناصر بكاله وسدت دواوينها
****.
سيدي بقصر الاماره ولا تهاب مــــن الحتوف
بلغت بالحك رساله بكل شجاعه بلايه خـــــوف
حسين دين الله علنها وخل يشوف المـا يشوف
مـــــا اهاب الكون كلـــــه وما تخوفني السيوف
حسين ثوره بوجه ظلمك واقترب وكت الطفوف
ابتده الثوره بمقاله وهز اميه بعينها
****.
ونسألكم الدعاء والتوفيق
لخادم ال محمد((عليهم السلام))
الشاعر ........حيدر كاظم الساري
قناة الرجوع الى الله @h_ameer1
قصائد منبريه مكتوبه @h_ameer2
ملا ابو أمير الفاطمي @h_ameer3
روح وريحان @h_ameer4
#هز_اعروش_فرعونه
سفير الحسين ع
عم الكوفه طاري اسمه مسلم صعـد ميمونه
دگاها الجيوش اهناك هز اعـروش فـرعـونه
=========================
حي الله سفير حسين گاصد بيده مــرسـاله
گاطعها صحاري وبيد سچ ادروبها الـحــــاله
غالي بعينه هلمرسال واغله من اهله وعياله
طبها وكال يالكوفان زيـــن اسـمـي تعرفونه
=========================
طب ميدان يتبختر شايل غيره مــن عمّـه
هاشم حمزه والكرار من راسه لحد جدمـه
شجعان وكبار الگوم شردت من يمر اسمه
ماسل سيفه بعده اهنا تكتل خزرة اعيونه
=========================
سل السيف مسلم صاح وين ازلامها النيبه
مايخطيها بالنيشان ظـــربـه القايـد يجيبه
جلبها الوجه اهناك بس اثـگــال تجلــيـبـه
دور راد بالمـيـدان خـافـــوا مـا يگصدونه
=========================
اجيوش وكتايب ذيچ مثل الغنم من كـرها
ماتعرفها شي بالـگـــاع شي ليفوگ شـمرها
طگ عرج الغظب بركان بالكوفان فــجـرها
يوم اسود عليهم صار جيل الجيل يذكرونه
=========================
فرّت شارده الفرسان بــس اسـيــوفهم بالــگــاع
درب الشرده من الخوف حتى بهاي صار اضياع
لاذت بالاموات احياء صيت الموت عم وشــاع
مو مسلم يصيح الجيش ملك الموت ايسمـونه
=========================
دگت سـاعــــة الانذار واطـبـول الحرب دگـت
السنها الطوال اهناك بالمـيـدان شـــو سكـتـت
هاي اصفوف هذا الجيش كـٓــل ترتيبها اشتت
حي الله ابوطاهر ليث مسـلــــم مايـجـبلــونه
=========================
كل ادروبها اختنگت كل ازقاقها(افروعها) الكوفه
الما مصيوب من السيف بي تلگه اثر خــــوفــه
وين حسين عنه ايشوف وين حسين خيشوفه
سوه الماجره ولاصار هــــزهـم مـايـهــزونــــه
✍️عباس مالك العفريت
قناة الرجوع الى الله @h_ameer1
قصائد منبريه مكتوبه @h_ameer2
ملا ابو أمير الفاطمي @h_ameer3
روح وريحان @h_ameer4
#الصحابي_سويد_بن_ابي_مطاع
انا سويد وابي مطاع
وفي يميني صارم قطّاع
**.
انا الذي بايعته بدمي
ونصره والله ذاك همي
هو الحسين صارمي وعزمي
له حياتي بأبي وأمي
والعمر في سبيله يباع
***.
هو الخلود قبلتي وديني
أني مع ابن حيدر يقيني
هو الضياء للدجى بعيني
حسين نهجي وانا حسيني
للحق اضحى النور والشعاع
****.
وخثعمي لا ارى المنيه
الا مع ابن فاطم الزكيه
اروي جيوش الشرك والدعيه
كاس بها هلاك ال اميه
لدينهم سأهدم القلاع
*""""****
يا سائلي والموت في حسامي
يروي المنى عن صحبة الكرام
حربي لــــــــــه وسلمه سلامي افـــــــدي بنفسي كعبة الانام
للسيف يسري الموت بأنصياع
**.
جيش بعيني ماله وجود
لا ارهب الفرسان والجنود
اعدو بضرب مــاله حدود
يغدي به اهل الخنا رقــــــــود
لا ارهب العسكر في الصراع
**.
عهدي كنجم ماله افـــــــــول
موتي كشهد دونه اقول
كالموت امضي عندما اصول
محاميا عن مهجة الرسول
عهدي لربي الخالق المطاع
****.
ونسالكم الدعاء والتوفيق
لخادم ال محمد(ع)........الشاعر حيدر كاظم الساري
قناة الرجوع الى الله @h_ameer1
قصائد منبريه مكتوبه @h_ameer2
ملا ابو أمير الفاطمي @h_ameer3
روح وريحان @h_ameer4
حسين طبو للحرب صحبانه
الهلا والحياهـــم اعله السانه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
هـــلا يامـــن بالحرب مالك نضيـر
ياحبيب گلوبنه وشيــــــخ الچبير
هلا بهاي الشيبـــه الطفي السعيــر
يبن ضاهـــــــر تسلم ويسلم زهير
بيكــــــــــــم گلوب الحرم فرحانه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
هلا صاح بعابس وحي الله جــون
وضلو السبعيـــــن الف يتراعشون
اليوم طبهم عابس وطــب بجنون
الموت لجـل حسيــن گاللهم يهون
حسيــن راواني العشگ بالوانـــــه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
هلا بهاني ومسلم وعمرو وشبيب
الخلو جروح الگلـــب منهم تطيب
هلا بالحــر القريـــب المو غريــــب
هلا بيحيئ المازني وجبله الحبيب
الگلــــــــب بيكـــم مبتشر يخوانه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
هلا بسيـــــف البالحرب مايستراح
هلا بكردوس اليحـب طـگ الرماح
هلا بأسلم والسبط كل حيله صاح
هـــلا بكلمن بالحرب لعيوني طاح
هــــــــــلا ببطال الوغئ وشجعانه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
هلا يالبيكم اشــــــد عزمي وگفاي
هـــــــلا يالشوفتـــكم تعادل الماي
هـلا بسلمان اليسـد عوزي وضماي
وبرير المشتري المــــــوت الرضاي
الصحبه هاي الصحبــه ماخسرانه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
هلا بيكـــــــم والهلا اعليكـم قليل
هلا بالأدهم ابـــــو السيف الثجيل
هــــلا بربعي الدوم ماألهــم مثيـل
اليوم ضلـــــت كربله تموج وتميل
الزلــــــم منكم هاكثــــــر فحطانه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
هلا يالتمشــــون وي دم الوريــــد
بيكم الوي اليوم ابو ذراع الحديد
هلا برايــــة حنضله اوراية سويد
هلا بالنصراني والطائي وسعيــــد
بيكــــــــــــم الطف اسعرت نيرانه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
هــــــلا بالضحولي بالغالي ونفيس
وهـــــــــب ماقصـر ولاقصر انيس
هلا بعبد الله وهلا وحي الله قيس
هــــــــلا بكلمن عايش بوجـــــدانه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
مصطفئ الصالحي
،
قناة الرجوع الى الله @h_ameer1
قصائد منبريه مكتوبه @h_ameer2
ملا ابو أمير الفاطمي @h_ameer3
روح وريحان @h_ameer4
لقلب صاحب العصر والزمان
الصلاة على محمد وآل محمد
گواك الله بويه 💔
احنه انصار الحسين ذلينه الميادين
لاخر نفس وياك
....
عدنه الموت بالميدان چنه ملگه خطار
احنه اوياك لآخر يوم غالي وعيب نندار
هيه الزلم وكت الضيج توفي الحار بالحار
ماعفناك بالميدان صرنه للعدو انذار
روس بروس طگينه لحب حسين ضحينه
هاك جفوف وعيون انصارك يوفون
لاخر نفس وياك
......
نخلي الروس ويه الخيل تل ونصعد اعليه
والميدان يسعر نار ماواحد گرب ليه
غالي حسين عدنه هواي بالارواح نفديه
حچايه انگولها نوفيه هاي الكلمه ننطيه
دمع العين يحجيلك هاي نحور نفديلك
نعوف حسين هيهات. بحبه عايش المات
لآخر نفس وياك
....
العين شلون تعله بيوم عالحاجب يمولاي
للعطشان وكت اضماه نفزع للخيم ماي
صح سبعين من ننشاف بس بالمعركه هواي
للكلفات والصعبات واحدنه احنه شراي
بينه النار ماتطفه بهذا الليل مانغفه
وقعناله بنحور دم العاشك يفور
لآخر نفس وياك
.....
الگوم ادكوم تردم گوم لو طبينه برماح
منخليه خصم حسين بالميدان يرتاح
مثل النخل من نموت مابينه الهوه وطاح
حب حسين مثل الغيم واحنه گلوب فلاح
يابو الخير انحبك نضل للموت ابدربك
وجهك يشبه الماي كلك خير مولاي
لآخر نفس وياك
......
أمن افضل طين خدامه أو وفايه للحسين
نموت نعيش ماننساه احنه اوياه باقين
بالحب هذا يامولاي فوگ الغيم عالين
روح بروح احنه اوياه خلانه سلاطين
مانحتار نتقدم . حبك صار ويه الدم
من العدم جيناك احنه بخيمة احماك
لاخر نفس وياك
......
علي محسن الفرطوسي
قناة الرجوع الى الله @h_ameer1
قصائد منبريه مكتوبه @h_ameer2
ملا ابو أمير الفاطمي @h_ameer3
روح وريحان @h_ameer4
( السلام على اصحاب الحسين )
رفـت شـواربهم غـضـب انـصـاره
صـارو درع لحسین وگـت الـغـاره
وبـچـف حبيب الرايه مـن يـدنـاهـا
ـــــــــــــــــــــــــــــــــــــــــــ
زلـم الكـلافه اتحزمو للغالي كـالـو چـلـمـه
وياك نبقه اخر نـفـس يـحـسين يابو اليمه
نفرح اذا حلت حرب والمـا فـرح موزلـمـه
هوه اليحبك من صدگ يرخص لجلك دمـه
الـدم شني لـو مـارخـص لعيـونـك
ما تـنــعــقـل عـدلين ويـــمسـونـك
وبچـف حبيب الرايه من يدناها
ـــــــــــــــــــــــــــــــــــــــــــ
يحسين لتـلـوحـك شمس اگعد اوأشـر بيـدك
شنهي التريده ايصير الك بس ابقه ناغي
اوليدك
عبدالله ليمسه الظمه اهـلال هـذا لـعـيـدك
لا تتعب علينه التعب سـالـم يغالي انـريـدك
الطف نريده ايصير من حصـتنه
يحـسـيـن امـر ونظر لـفـزعـتـنه
وبچـف حبيب الرايه من يدناهـا
ـــــــــــــــــــــــــــــــــــــــــــ
يثبت العاشگ موقفه لجل العشگ لوضحه
والمايجـيـبـه كل عشگ توگف بعينه الملحه
وليل الشدايد من يمـر بالتالي يـطـلع صبحه
وكل اليكول الدم رخص كون اليسولف جرحه
يالـوالـي فـدوه نــذبح لترابك
خلصت الدنيه اوماكو مثل اصحابك
وبچـف حبيب الرايه من يدناها
ـــــــــــــــــــــــــــــــــــــــــــ
احنه انخلقنه لنصرتك يالـنصرتك غايتـنه
ابشاره توصل للحرم ما نخلف احـجـايـتـنه
خل تطمئـن اخـت الگمر لا تفكر بصحبتنه
مـادامــه انـشـم الهوه مـا تنكسر رايـتـنه
بشروها زينب لا تضل مهمومه
نكلبها باجر من نطبها الحـومه
وبچـف حبيب الرايه من يدناها
ـــــــــــــــــــــــــــــــــــــــــــ
مـولانه ياأجمل الوطن والطف فرحنه اودارك
فرحـتـنه ابد ماتنوصف يحسين احنه أنصارك
بأجـر نـمـوت وهـم تـجـي يـم الـگــبر زوارك
نوكـف نـحي بكل فخر يابـو الشيم خـطـارك
ماينسه الـطف كلهم ايزورونه
شامخ يضل مثل الهوه ایشمونه
وبچـف حـبـيـب الرايه من يدناها
ـــــــــــــــــــــــــــــــــــــــــــ
الشاعر خالد جودي العارضي
موشح الليلة السادسه
اعليهم ادموعي يضل جاريها
انصار ابو اليمه يويلي اعليها
_________
ألهم الون والمدامع والنحيب
الضحو الدم النحر دون الغريب
عابس او جون او ابو الرايه حبيب
كون دمعاتي دمه ابچيها
_______
مثل اصحاب الكهف واكثر نقآء
فتيةُُ آوو الى طف كربلاء
ربّنا هبنا لبن فاطم وفاء
هاي دعوتها الذي تدعيها
_______
والفرق آوو لچن موش الكهف
للمعاره وادخلوها ابكل شغف
نادو اويه احسين موتتنه شرف
او دونه ذله هل حياه نگضيها
_______
دون الحسين ابذلو كل النفيس
دون ابو السجاد كل غالي رخيص
بيش اوصفهم يعالم بيش اقيس
او همه اعله المرتبه حاويها
_______
زلم كلفين او فلا همهم عدد
اگبالهم سبعين الف طلبو مدد
او همه بس سبعين واحد عالعهد
اجيوش اميه ترجف امخليها
_______
كل فرد منهم وگف بالحومه طود
تربية حيدر زلم مليانه زود
گضو حگ الغانمه او وفو عهود
شمس صارو للدرب تضويها
_______
اشموس صارو ما لها ابدن افول
اتزول كل الدنيه اسمهم مايزول
حازو اعله مرتبه ابحب البتول
اويهنياله الفاطمه يرضيها
_______
ابو فاطمة الطائي
قناة الرجوع الى الله @h_ameer1
قصائد منبريه مكتوبه @h_ameer2
ملا ابو أمير الفاطمي @h_ameer3
روح وريحان @h_ameer4
هاي انصاره حماي الحد
-----------------------------------------
يا محله الممات بصوت گالوهه
زلم حسين بالطف والله سووهه
ما تعرف يمين ويسرى خلوهه
طبو للحرب والروس شالوهه
صارو خدام وحمايه
والرايه اعله الغيم الرايه
لو ضاگت يحچون حچايه
هاي اطلابه بالموت اتفض
----------------------------------------
وين اليقترب من الخيم وينه
زلم درع الهواشم هيچ يلگينه
صلاة الموت بالطف كلنه صلينه
على ظهور المنايا ارواح شدينه
ما بينه الما ضحه بروحه
يرتاح شما نبله اتلوحه
زلم حسين وكلهه ملوحه
لو ينخانه حفاي انهد
-----------------------------------------
احنه الباري لجل عيونه سوانه
صرناله صحابه وجيش صرناله
ابد لحسين ما واحد تدناله
والله المات وي حسين هنياله
واحنه گباله بهاي الحومه
كلمن يعرف بالطف يومه
عابس عدنه وذب هدومه
شاف حسينه معذور انجن
-------------------------------------
حلاة الموت موقف هيچ ننهيهه
المنيه بكربلاء انحور تحچيهه
نكتب لافته بدم النزف بيهه
(موت وي الحسين وعيش تاليهه)
ما نتراجع هاي انصاره
وحسين المعروفه اخباره
وياه إچفوف الصطاره
هاي ارجاله يلشامت رد
------------------------------------------
سلام اعله الهواشم والنصر آتي
كلام الطف دماء بقلم ثوراتي
شما سولف بعد ما تكفي كلماتي
ترف باسم الانصار اليوم راياتي
يا جيش الثوره المنصوره
كلمن واضح بالطف دوره
من موقفهم هاي الصوره
دنگ راسه خجلان الطف
رعد الفريجي - محرم 1447
ثوابها الى روح والدتي
قناة الرجوع الى الله @h_ameer1
قصائد منبريه مكتوبه @h_ameer2
ملا ابو أمير الفاطمي @h_ameer3
روح وريحان @h_ameer4
لو رفرف العلم - طبوها اهل شيم
نسوي الجفافي غيم - ونطفي بالخيم
------*-------------*--------
نخلي حد للماله حد بكاعنه
جفوفنه بيوم الطفوف اسلاحنه
مفرفح وي الهوه دوم اشراعنه
يموت واكف من صدمته الشافنه
كاع الطف انسامت واشترينه
بس حشمنه ابو عبدالله اجينه
نطب للموت غيره ونخوه بينه
اكبار وبالعرك متعلمه ادينه
سحگنه ع الرگب - نطب عركت عرب
السيف العد حبيب - بركبهم شطب
---------*-------------*--------
ثار ناخذ وينه الي يلاوينه
نصير اصبع كلنه نشلع عينه
اليوم كاع الطف شلون تشيلنه
ثكال مــن ازغيرنه لجبيرنه
تشرد كربله من نشد عمايم
مابينه اليرد لحسين سالم
نرد ومثلمه عدنه الصوارم
واحدنه عله موته يفوت عازم
انصار الموزمه - ونهوه الملحمه
نستنگي الثكال - نترسهه دمه
-------------*-----------*------
عابس اسمر لون بس يا لونه
جان شذره يدلي اليتيهونه
الظلمه تاخذ من ظلام عيونه
والمعارك تشهد اعله فنونه
ضلام يطشهه يعميهه بضلامه
صايود وتجي الحضنه الحمامه
عابس شامه ماترهمله شامه
هلا بالمات وبوجهه ابتسامه
يشكك بالثياب - طلع احلا الشباب
عكس الموته صار - يسد حلك التراب
-----------*-----------*----------
شد برير اعله المعاره بزوده
ياحلات السيف بين زنوده
نحسبه مات اليوصل اعله حدوده
سيفه حار وطگته مشدوده
يهد غاضب عليها شلون هده
عماهه عيونهم من لحم زنده
اليكابل سيفه من الكفه يحده
الطف كله بمرامه بجفه رده
يشبه ذو الفقار - بطكاته شرار
حطب دله يصير - يزود العركه نار
---------------*-----------*----
#عباس_سلمان_القلعاوي
قناة الرجوع الى الله @h_ameer1
قصائد منبريه مكتوبه @h_ameer2
ملا ابو أمير الفاطمي @h_ameer3
روح وريحان @h_ameer4
لا تحتار ... كلنا أنصار ... يابو الأكبر
...............................................................................................................................
وحياتك ما يهمنه الموت فدوه ارواحنه الإسمك
كل الدنــيـــا عفناهــــه عَزمنــه من فضل عَزمك
العمر دونك فلا يـــســـوه وحــق الطاهـــره أُمّك
عهد مكتوب الك بالـــدم فداء الگطــره من دمّك
دمك نور ... وإحنه السور ... يابو الأكبر
...............................................................................................................................
حياة الذل فلا نهوى إجينه ونصرك الغايه
كرامتنه بشــــهادتـــنــه نظل للموت وفّايه
باچر كربلــه تــشــهـــد شما بيد الگمر رايه
نصير اليوث بالميدان وحق السورة والآيه
تميل الگاع ... كلنا اسباع ... يابو الأكبر
...............................................................................................................................
حبيب ونافع وعابس زهير وكل شهم حاضر
نراوي إعداك بالحومه أصل المرجله باچـــــر
يبو الأكــبـــر ولا تهــــتــم نتاني بشوگ للعاشر
الك سمعاً وطاعه نگـــول وإنـــته القائد الآمر
إحنه جنود ... بيك نذود ... يابو الأكبر
...............................................................................................................................
رساله للخيم توصل يبو السجاد من عدنه
إذا مولاتنا زيــنـــب تســـــأل هذا كل ردنه
العقيله تطمئن ويّاك الگطع النَفَس واحدنه
حومةْ كربله تشهد تره وعاشــــور موعدنه
عد عيناك ... كلنا اوياك ... يابو الأكبر
...............................................................................................................................
الحياة بغير حبك موت نقسم قسم بعيونك
كل واحد يبو السجاد شافك صار مجنونك
شلون نعيش لا منعيش نموت بكربله دونك
الكرامه اوياك ضگناهه شلون نخون ماعونك
صرنه أحرار ... وإنته الثار... يابو الأكبر
...............................................................................................................................
يبن الوالـــي حبـيـنــاك حُب الزرع للمَطره
مو حُب مصلحه ودنيا يماي العين عالفطره
لآخر نفس منعوفـــك لو بالــــدم بقت گطره
النصر من الله سبحانــــه والتوفيق والقُدره
سهل الموت ... صحنه بصوت ... يابو الأكبر
...............................................................................................................................
وگفنه بكربله إستعداد ونـــدري المدد ربّاني
فدوه أعمارنه يحسين الك واحد وره الثاني
كل واحد يصيح بصوت آني حسين عنواني
كل واحد يصيح الروح لأبو السجاد قرباني
والقربان... بالشجعان ... يابو الأكبر
...............................................................................................................................
خادم الإمام الحسين عليه السلام
عمار هليل الواسطي
قناة الرجوع الى الله @h_ameer1
قصائد منبريه مكتوبه @h_ameer2
ملا ابو أمير الفاطمي @h_ameer3
روح وريحان @h_ameer4
ليلة الانصار
منطينك احجايه
نكتب عله الرايه
وفايه يحسين
...................
يحسين منعوفك ابد. وداعت ايام العشره
وكربله تشهد عالزلم. كلمن يسولف نحره
نزرعلك ارض الطف وفه. ومن دمنه تصبح حمره
حراس نسهر للصبح. وتنام بنت الزهره
يبقه الخدر عالي
يرخصله كل غالي
هذا الوعد دين
وفايه يحسين
......................
من يوصل احدود الخيم. ويوصل اتراب اعتابك
انشمر عمايمنه بزعل. ونهوس احنه ابابك
يشهد علينه سيدي. وكت الصلا محرابك
وصدورنه الصارت درع. ياسهم مر وصابك
يحسين تدرينه
بس انته والينه
والصاحب الزين
وفايه يحسين
.......................
باجر يطر فجر الذبح.. وتشهد علينه الحومه
محلاهه موتتنه سوه.. لا موش كلمن يومه
الشافك ولو مره بعمر.. ينجن إلك من يومه
شحاجيت عابس بالخيم.. وبالعشك شك اهدومه
يانعمة النعمه
حبك يبو اليمه
ماعدنه رايين
وفايه يحسين
...........................
هاي المناحر فدوه الك. من دمنه خل تتحنه
ماردنه جنه ولااجر.. يحسين انته الجنه
بيومك وطفك نفتخر. يابو علي وآمنه
تنطي الخلود الخادمك. مولانه وبلا منه
انته التضل قائد
واعله الزلم شاهد
ياكرت العين
وفايه يحسين
......................
شدة الحيل اعله الحرب.. مثل اليشد احزامه واحدنه من يزعل الك.. ياهوه اليضل كدامه
سبعين الفهم بس عدد.. ومنزلين الهامه
راية ابو فاضل ترف.. وانصارك احنه ازلامه
تبقه انت حادينه
وعايش تضل بينه
بسوح الميادين
وفايه يحسين
محمد هادي العقابي
قناة الرجوع الى الله @h_ameer1
قصائد منبريه مكتوبه @h_ameer2
ملا ابو أمير الفاطمي @h_ameer3
روح وريحان @h_ameer4
يتلوه بالحومه گوموله
گام وطاح ينصاره من طوله
وحده لا تخلو
لحگو لا يذبحو
ينصاره
__
منظر حسين وحدته من الخدر للتل اجيته
يگوم ويطيح اعله وجها هيج ينصاره لگيته
ماعرفته حسين اخيي من الدمه الغطه لحيته
هاي اخر ساعه النه النوب تتفرهد ثنيته
يالجنتو اتحرسونه جا يمته
العايش والميت حشمته
حسين بآخر انفاس
مگطع طاح عباس
ينصاره
__
يحتظر بالحومه اخيي والزلم ملتمه دونه
گومو ينصاره الرگبته خوفي ذباحه يجونه
كلها متحزمه اعله جتله وين ربعه يخلصونه
يكسر الخاطر الوحده وعالخيم فاتح عيونه
ما ندري ياساعه تهد غاره
اعله ابن امي ينصاره محتاره
واعله الگومه مابي
ماشفتو متعبي
ينصاره
__
گبل لا ينسحگ جسمه لحگو گبل المصيبه
ياحبيب حسين وحده شلون عفته ياحبيبه
ان جان ياعم مات بالطف جثته تبقه سليبه
ترضه عگب الخدر ياعم زينب اتصبح غريبه
ما تدري لو تدري ضل حاير
بس يبقه يسحگونه بالحافر
ريتك شايف شلون
بالطف طلعت ام عون
ينصاره
__
حشمت سبعين ميت من المصاب الحل عليه
محد يصدگ احوالي من شفت رد مهره ليه
بين ابقه وبين اركض لني عالتل مو بديه
ادري بس يوگع ابن امي اتسحگه خيل اعوجيه
مو بيدي طگ گلبي لبن امي
ما اكدر ما شوفه مو يمي
لو ما اجهب التل
حيره شلون اندل
ينصاره
__
العسكر اتحظر اشوفه وكت ما ضل يالغياره
هاي اخر جلمه عندي الخيل عصبوها ينصاره
حسين مابي بعد گومه شلون اذا هدت الغاره
لون تسحگ صدره اخي حسين ماله بعد جاره
وين امشي لو يمي يسحگونه
اعليه يصد واتغير كل لونه
ياهو اليفزع وياي
اخر طلبتي هاي
ينصاره
__
گمتو ما گمتو لخيّ بكربله جازي فضلكم
الخاطر حسين وخواته عفتو كلشي حتى اهلكم
حسين صار ابرمح راسه وذبحته صارت مثلكم
وانه راح امشي سبيه بلا دفن تبقون كلكم
بس حسين ضل عاري بالحومه
السلابه ما خلو بهدومه
وهاي اخر اخبار
الخيم حرگوها بالنار
ينصاره
سيد بسام قابل الياسري
قناة الرجوع الى الله @h_ameer1
قصائد منبريه مكتوبه @h_ameer2
ملا ابو أمير الفاطمي @h_ameer3
روح وريحان @h_ameer4
گعدية الليلة السادسة
أنصار الحسين آيات تتلى
واعليهم نفوس الخدم تهوى
طاريهم مثل ماي يروي للعطاشى
______
من وحي الانصار خلنه نقتبس بعض المعاني
عن الاخلاص او دروسه عن وِفاهم والتفاني
علمونه الگلب لازم من يحب ما يحب ثاني
لو ردت تعشگ من صدگ
اتخيّر منو اليسوه العشگ
وايضل دليلك بي يدگ ما يعوفه او لا ثواني
اتخير من تحب لا تحب اعمه
ياهو الي محبته اتكون نعمه
طاهر تقي. وفاي يروي للعطاشى
______
من نهج الانصار نفهم كل محبه ثمن الها
والي مو گد القضيه باله ان يگرب محلها
اختارو احسين ابقناعه او هل القضيه هم اهلها
غالي او غيره ما غله
والثمن چان ابكربلا
موت . او لچن يامسهله الموته الحسين ابمحلها
كتبو بالدمه لابن الزچيه
خل سبعين مو وحده المنيه
والله او ماهي اهواي يروي للعطاشى
______
ابكربلا كتبو ملاحم يعجز التبيان عنها
زلم بس سبعين واحد لاچن الاطواد چنها
الگاع گام اتروط منهم او ينسمع بل عليا ونها
يم الامام اتلملمو
وابكل وقار اتكلمو
عن كامن الود اعلنو والسيوف اتعله رنها
طلبو من ابو سكينه البدايه
من دون الحرم نهوى المنابه
خل السيف مولاي يروي للعطاشى
______
معجزات الطف تجلت من گبل عباس بيهم
ايريح الانفاس طگهم أيأمن الخايف حچيهم
ايهوسون اعله السواتر او فگر حضه اليدنه ليهم
بن ظاهر ايشيل العلم
وايسمع الي بل خيم
سيدي احنه هنا خدم والامر منك يجيهم
لا عنوان ألنه او لا مكانه
أحنه ابخدمتك وانت أبانه
وي رايك فلا راي يروي للعطاشى
______
الذات عدهم يسگحونه والأنا ما ألها قيمه
ذابو ابحب الشهاده اهل النفوس السليمه
حتى نمشي آنه وانت على الدرب المستقيمه
او منهم بعد ناخذ درس
يامن خدامه تلتمس
اويه احسين دوس اعله النفس لا تضل نفسك سقيمه
اتفانه ابخدمتك وانسى التمنّي
الشهره والطمع مو زين ذني
للخدمه هذن داي يروي للعطاشى
______
من درس عابس تعلم اتجنن ابحب ابو اليمه
لا يهمك هاذه ناقد لو هذاك ايذبله كلمه
الخدمه نعمه او بعض ناسك ما يقدر ابد نعمه
صفي اويه الحسين الگلب
حط جدمك ابهاذه الدرب
رافج فقط وين اليحب بل مجالس يكتب اسمه
لتسقط خدم لا تحچي عنهم
اندب ياعلي او صير انت منهم
الهم خلك افياي يروي للعطاشى
______
ابو فاطمة الطائي
قناة الرجوع الى الله @h_ameer1
قصائد منبريه مكتوبه @h_ameer2
ملا ابو أمير الفاطمي @h_ameer3
روح وريحان @h_ameer4
((ابو طاهر .. وابو فاضل))
كـــــون مسلم والگمر بالثايه
چا تصير الكوفه بس حچايه
ينزل من الله انتقام
من تطب ولد العمام .. ولد العمام
ابو طاهر .. وابو فاضل
""""""""""""""""""""""""""""""""""""""""""""""""'''""""
لـــــــو تلاگـوا ياعلي بالحومه
اسباع ذولي ارواحهم ملزومه
چــان كل الجيش گـرب يومه
الزلمه بيهم چان ذب أهـدومه
والله لومسلم يصيح
تعثر الكوفه وتطــيح
مسلم يگـــل للكــفيل
انته مولاي استــريح
عاد ابو طاهر اذا شــــد حيله
يعني هذا الجيش الف ياويله
ويـــل بعيون الغرام
من تطب ولد العمام .. ولد العمام
ابو طاهر .. وابو فاضل
""""""""""""""""""""""""""""""""""""""""""""""""'''""""
الگمر لو نص الحرب شال ايده
يعني كــل الجيش والله يبيده
مــدد يــاحيدر صـبح تـــرديده
يـــوم صفيــن بخزرته إيـعيده
چا يصير المــايصير
مايظـــل بــيها چبير
لا أمــير ولا شـجاع
علي بس هوه الأمير
كون مسلم بس يشيل إيمينه
الحومه ملكَك ها يعم سكينه
ملكك وماكـو سـلام
من تطب ولد العمام .. ولد العمام
ابو طاهر .. وابو فاضل
""""""""""""""""""""""""""""""""""""""""""""""""'''""""
كون يتلاگون هيـــج ثنينهم
چا يصير الجيش ذره أبينهم
مسلم وعباس هيبه سنيـنهم
مسلم وعباس نصــرو دينهم
والگــــمر شال الچفوف
حاسب حساب الطفوف
هوه غير الصـــيته فوگ
گمــــــر يتنفس ســيوف
والگمر عباس كف اردانه
مسلم انته بكــربله ويانه
مسلم انكف الكــلام
من تطب ولد العمام .. ولد العمام
ابو طاهر .. وابو فاضل
""""""""""""""""""""""""""""""""""""""""""""""""'''""""
ومبتسم مسلم وشاهر سيفه
للچفيل الحـــومه بس بكيفه
مطرت ورعدت الدنيا بحيفه
نار عباس وحـــــرگهم صيفه
الگمر گلـــه مستعد
هــــا يبو طاهر نهد
هدمو اركان القصر
وجابو الروس الولد
الزلم حتى الخيل ما مرتاحه
طبوا وجـابوا حطب للسـاحه
هيچ معروف الختام
من تطب ولد العـمام .. ولد العمام
ابو طاهر .. وابو فاضل
""""""""""""""""""""""""""""""""""""""""""""""""'''""""
عاشگ ومتمـــني هيچ اباله
چا تصير الكوفه بس وشاله
احتاروا بشــــردتهم الرَجاله
اختنگت الفرسـان والخياله
احتاروا وندري السبب
غير ابو فاضــل غضب
غيره مــــــن عينه تهل
من ذكر باب وحـــطب
صاح ثـــــار الباب ياثار الضلع
صعب ملگه الكافل وماينجرع
ومن يضيگ باللـثام
من تطب ولد العمام .. ولد العمام
ابو طاهر .. وابو فاضل
عبد زينب
محمد الإبراهيمي
قناة الرجوع الى الله @h_ameer1
قصائد منبريه مكتوبه @h_ameer2
ملا ابو أمير الفاطمي @h_ameer3
روح وريحان @h_ameer4
من كالت ابوي الليله اريده
رقيه ركضت وشبكت حميده
وتكلها البقيه في حياتج
كل احنه يبت مسلم خواتج
ــــــــــــــــــــــــــــــــــــــ
تدري البنيه تنكسر من تفتقد والدها
يخنكها كلشي بغيبته وغير الدمع ما عدها
ما ترجع ايام الابو وكعدت كبل شيردها
ويا ناس المضيعه تره تحتاج اليساندها
لو راح الابو ويتم بناته
تبقه بالكلب بس ذكرياته
انه ادري الليالي امشيباتج كل احنه يبت مسلم خواتج
**
اغلب الناس امن الزمن ومن الفراك اتعاني
وهوه التعود عالجرح غير الدمع شيتاني
يالحالج ايفطر الصخر وضعج صدك اذاني
احنه خواتج للابد وحسين ابوج الثاني
انته امدلله وماريد تبجين
هديتي بدمعتج حيل الحسين
بت الغالي يالماكو بغلاتج كل احنه يبت مسلم خواتج
**
صاحت يبويه اشعطلك يالخذت كل احلامي
كل طفله يم والدها اجت وشبكت علي كدامي
من كثر نوحي وحيرتي ما بيه اشيل اجدامي
ما حسبت يمشي الابو وظلمه تصير ايامي
كلهن ركضن التمن عليه
هاي تبوس راسي وذيج اديه
وصاحن بالصبر يقوه ثباتج كل احنه يبت مسلم خواتج
**
كلهن بنات حسين اجن بفكد الابو يصبرنها
بين الخيم يمشن سوه ولو طاحت ايلزمنها
صارت تره الجان الكلب يا ناس خايف منها
العباس اجاها بدمعته وبشوكه ضل يحضنها
لا تبجين كلها وانه يمج
فدوه يروحلج يبنيتي عمج
ورقيه اتنادي لتكرب وفاتج كل احنه يبت مسلم خواتج
***
ما ينحمل ثاري الهجر للماكو منهم رده
مو ماي هذا العل درب كل عمري هذا اتبده
صاحت يبو طول الحلو شيردها ذيج الكعده
تكدر تضمد اكبر جرح جرح الكلب شيضمده
للكوفه تحن وتريد ابوها
من مسلم حميده يتموها
ودعيله تكللها بصلاتج كل احنه يبت مسلم خواتج
**
حطت اديها اعله المتن وتكلها طيبه امتونج
باجر حميده بكربله يضربوني ويضربونج
مني التراجي تنوخذ وانتي بجمر يجوونج
انه بحبل وانتي بحبل وعيوني يم عيونج
رايح تحترك باجر خيمنه
وين نروح لو ذبحو زلمنه
باجر تلهب النار بعباتج كل احنه يبت مسلم خواتج
***
تمت
تحسين الخفاجي
قناة الرجوع الى الله @h_ameer1
قصائد منبريه مكتوبه @h_ameer2
ملا ابو أمير الفاطمي @h_ameer3
روح وريحان @h_ameer4
#قصائد_محرم_
#محرم_الليلة_الخامسة_
مولاتي السيدة حميدة بفراق أبيها مسلم بن عقيل(صلوات الله عليهم)
تانيتك ترد__بوية مسلم غيبتك هدتلي حيلي
تانيتك ترد__ما نمت لحضه بغيابك انة ليلي
اشتاگ واتنطر تجيني
يابوية موتني حنيني…تانيتك ترد
________
أحط چفي على خدودي واگعد بوية أتنطر
يومية اگول تعود وحلمي بچيتك أخضر
حسبت ايامك الراحت وگلبي لفرگتك فطّر
ما متعودة ماشوفك أرجع بوية ما أكدر
راااح__من ريتي الهوة
راااح__فارگتك ضوة
رااااح__ما نرجع سوة..
لحضة مايهدة ونيني
يابوية موتني حنيني…تانيتك ترد
______
كل ساعة اگول اسمك واترس بلدمع چفي
حنانك ساكن بروحي ليش اعللهجر تچفي
ما يكفي الدمع والنوح بس عيونك التكّفي
بالي شاغله التفكير اريدن طولك بصفيّ
وووين__الگاك وتجي
وووين__هد حيلي لبچي
وووين__وبحضنك اجي…
علدرب مشبوحة عيني
يابوية موتني حنيني…تانيتك ترد
______
ااجاني حسين عمي بس؟ اجه بحسره
وصل يمي ومسح راسي وشهگ عبره
شلت راسي ولزم ايدي بعينة بينت نضره
كتلة والدي مسلم؟ وگلي خلصت السفره
مااات__غريب لوحدة
ماااات__ما بين العدة
مااات__الكوفة معنادة…
فدوة لسنينك سنيني
يابوية موتني حنيني…تانيتك ترد
_______
بلكوفة طحت بوية وحدك محد بحالك
لا يمك اخو اليفزع ولا واحد اجة اگبالك
غريب الكوفة ضل اسمك والعدوان تبرالك
بچيت اهواي يابوية وعمي حسين ينعالك
غريب__طحت امن القصر
غريب__خلصت العمر
غريب__حاطوك بغدر…
بدموعي اترسهن أديني
يابوية موتني حنيني…تانيتك ترد
________
انة هم اموت اهناك من الحادي ياخذني
اروح بشام وموتن بي وكلشي يرتحل مني
خدري ما يضل بوية؟ بيدي احبال تچتفني
واتعب علهزل واذبل وصيح الشام تعبني
اموت__بلشام العذاب
اموت__خرابة وعلتراب
اموت__وتناثر مصاب…
بلخرابه بس أنيني
يابوية موتني حنيني…تانيتك ترد
________
#محرم_١٤٤٧هـ_
محسن الباوي
قناة الرجوع الى الله @h_ameer1
قصائد منبريه مكتوبه @h_ameer2
ملا ابو أمير الفاطمي @h_ameer3
روح وريحان @h_ameer4