📚 Madina Musayeva 🎧

01 October 2026 03:53

Бола билан тана хавфсизлиги ҳақида қандай суҳбатлашиш керак? Кўпчилик ота-оналар бу мавзуда нима дейишни билмайди. Аммо бола кичик ёшидан танаси ҳақида билиши, саволларига уялмай жавоб олиши, шахсий чегараларини англаши ва ёрдам сўраши мумкинлигини билиши муҳим. Болани ҳимоя қилиш масъулияти катталар зиммасида.

Шу мақсадда «МЕНИКИ. Болангиз билан тана хавфсизлиги ҳақида суҳбатлар» қўлланмасини мустақил тарзда тайёрладим. Унда ота-оналар учун бола ёшига мос тавсиялар, бола билан суҳбатни бошлашга ёрдам берадиган савол ва иборалар, шунингдек, биргаликда бажариладиган машқлар ва расм бўяш саҳифалари бор. Асосий суҳбат ва машғулотлар тахминан 3–8 ёшли болаларга мўлжалланган.

Қўлланмани юклаб олиб ёки босмадан чиқариб фойдаланинг. Илтимос, уни бошқа ота-оналар, тарбиячилар, ўқитувчилар ва болалар билан ишлайдиганларга ҳам улашинг. Ўз болаларимизга ўзимиз масъулмиз ва миллатда бегона бола бўлмайди.

Қўлланмани турли манбалар асосида мустақил тайёрладим. У мутахассислар ва профессионал муҳаррир томонидан кўриб чиқилган расмий нашр эмас; шунинг учун унда камчиликлар бўлиши мумкин. Ушбу қўлланмани янада фойдали, тушунарли ва амалий қилишим учун сизнинг фикр-мулоҳазаларингиз жуда муҳим. Илтимос, бир неча дақиқа вақт ажратиб, қисқа сўровномамизни тўлдиринг. Сизнинг тавсия ва таклифларингиз қўлланмани яхшилаш, тушунарсиз жойларни аниқлаштириш ва ота-оналар ҳамда болалар эҳтиёжига янада мослаштиришга ёрдам беради. ❗️Сўровномани бу ерда тўлдиришингиз мумкин.

🔗 Қўлланмани Word форматида бу ерда юклаб олиш мумкин. Ушбу файлни янгилаб боришга ҳаракат қиламан.

👉 @madnifique

📚 Madina Musayeva 🎧

29 January 2026 14:23

Barchangizni “Behalovat avlod” kitobi yuzasidan bo‘lib o‘tadigan audiochatga taklif qilamiz.

🎙 Suhbat ishtirokchilari:

— Madina Musayeva (moderator)
— Mahin’s World
— Farengeyt Press nashriyoti bosh muharriri Xurshid Yo‘ldoshev
— Nashriyot jamoasi
— @bookclubuz a’zolari va boshqa kitobxonlar

Kitobni o'qigan, mavzu yuzasidan o'z fikr-mulohazalaringiz bo'lsa, albatta ishtirok eting, xursand bo'lamiz.

👉 https://x.com/bookclubuz/status/2016544231771218366?s=20

🗓 31-yanvar, shanba
⏰ 21:00

📚 Madina Musayeva 🎧

11 October 2025 10:36

📚 Sotuv boshlandi!

Farengeyt Press’dan katta yangilik!
Endi siz Buyuk Britaniyaning mashhur Usborne nashriyoti chop etgan “Boshlang‘ich saboqlar” (For Beginners) turkumidagi uchta kitobni o‘zbek tilida birinchilardan qo‘lga kiritishingiz mumkin:

💵 Pul – Boshlang‘ich saboqlar
Pul nima? U qayerdan keladi va qanday ishlaydi? Bu kitob o‘smirlar uchun moliyaviy dunyoni sodda, qiziqarli va hayotiy misollar bilan tushuntiradi.

⚡️ Fizika – Boshlang‘ich saboqlar
Nega osmon moviy? Nega kema cho‘kmaydi? Yer nega aylanishdan to‘xtamaydi? Harakat, energiya va koinot sirlarini oson tilda tushuntiruvchi qo‘llanma.

🌱 Biologiya – Boshlang‘ich saboqlar
Hayot qanday ishlaydi? Inson tanasi, o‘simliklar va hayvonlar olami qanday uyg‘unlikda yashaydi? Javoblar — shu kitobda.

👉 Buyurtma berish uchun:

Biologiya: boshlang’ich saboqlar
Fizika: boshlang’ich saboqlar
Pul: boshlang’ich saboqlar

Ulgurji xarid uchun:

📞 +998 90 999 18 19
📩 info@farengeyt.press

Shuningdek, ushbu kanalga DM orqali ham murojaat qilishingiz mumkin.

📚 Madina Musayeva 🎧

10 August 2025 17:56

📚 @mahinsworld nashriyotimiz o‘zbek tiliga o‘girayotgan “Behalovat avlod” kitobi haqida ajoyib video-taqriz tayyorladi. Atigi 10 daqiqada ushbu xalqaro bestseller mazmuni va eng muhim g‘oyalaridan xabardor bo‘lishingiz mumkin.

Psixolog olim Jonatan Haidt yoshlar orasida tobora kuchayib borayotgan depressiya, xavotir va yolg‘izlik holatlarini chuqur tahlil qilgan.

Uning tadqiqotlariga ko‘ra, bu inqirozning asosiy sabablari:
📌 Ijtimoiy tarmoqlar
📌 Smartfonlar
📌 Bolalarning real hayotdan uzilib qolishi

❓ Nega farzandingiz endi ko‘chada o‘ynamaydi?
❓ Nega maktab yoshidagi qizlar o‘z joniga qasd qilish haqida o‘ylay boshladi?
❓ Nima uchun butun boshli avlod o‘zini yolg‘iz his qilmoqda?

📖 Tarjima ishlari yakunlanmoqda — hozir tahrir bosqichidamiz. Kitob sentabr oxirida sotuvda bo‘ladi!

🔗 Video-taqriz

#jonatan_haidt #behalovat_avlod #tarjima #farengeyt_press #anxious_generation

⬇️ Bizni ijtimoiy tarmoq sahifalarimizda kuzating va ushbu postni do‘stlaringiz bilan ulashing!

Facebook | Instagram | X

📚 Madina Musayeva 🎧

20 July 2025 08:39

Александр Дюманинг “Граф Монте-Кристо” романини ўқишга қизиқиш билдирган ўқувчиларимга ташаккур! Барчангизни дўстим ва маслакдошим, олима ва ажойиб букблогер @mahinsworld билан биргаликда дунёда энг кўп тилларга таржима қилинган романлардан бири бўлмиш “Граф Монте-Кристо”ни ўқиб, сентябр ойи охирида аудиочатда муҳокама этишга таклиф этамиз! 

Романни бир вақтда китоб клуби сифатида ўқиш инсонга мотивация беради, муҳокама этиш эса шунчаки воқеалар кетма-кетлигини айтиб бериш эмас, асарни турли мавзулар ва жиҳатлари, масалан, адабий, тарихий ва ижтимоий нуқтаи назардан таҳлил этиш имконини ҳам беради. Асар икки томдан иборат ва агарда ҳар куни атиги 20-25 бетдан ўқилса, уни 2 ойда бемалол тугатиш мумкин. 

Романнинг ҳажми катталиги сабабли уни бутунлай аудио шаклида ўқиб бериш иложим йўқ, лекин у профессионал суҳандонлар томонидан аллақачоноқ аудиокитоб шаклига айлантирилган (аудиокитобга линк). Агар вақт ва имконим пайдо бўлса 1-2 боб ҳам ўқиб бераман. Ҳаммага омад! 

👉@madnifique👈 | Madnifique">YouTube | X

📚 Madina Musayeva 🎧

17 July 2025 07:05

👉@madnifique👈 каналидаги аудиокитоблар рўйхати

📚 Madina Musayeva 🎧

07 July 2025 10:08

Do‘stlar, Usborne “Boshlang‘ch saboqlar” turkumidan oltita kitobni o‘zbek tilida nashrga tayyorlash ishlari boshlangani haqida avval xabar bergan edik. Shulardan uchta kitob (kimyo, biologiya, fizika) chop etishga tayyor holga keldi. Qolgan uchtasi jarayonda. Sentabr oyidan birin-ketin barcha kitoblar bozorga chiqadi.

Avvaldan buyurtmalar ham qabul qilinadi, bu haqda keyinroq xabar beramiz.

Bu kitoblar asosan o‘smirlar uchun deb aytilsa-da, aslida barcha qiziquvchilar uchundir. Ayniqsa, qiziquvchan farzandining savollariga javob berishda qiynaladigan ota-onalar uchun ayni muddao. Ilmiy-ommabop kitoblar o‘qishga chog‘langan kitobxonlar uchun ham yaxshi boshlang‘ich bilim beradi degan umiddamiz.
Quyida fizika, kimyo va biologiya kitobidan olingan parchalar.

#FarengeytPress #boshlangich_saboqlar #Usborne_Kimyo #Usborne_Fizika #Usborne_Biologiya #IlmSoddaTilda

Facebook | Instagram | X

📚 Madina Musayeva 🎧

12 June 2025 05:01

🎧 Стив Жобс. Стэнфорд университетидаги нутқ.

Бундан роппа-роса 20 йил аввал айнан 12-июн куни афсонавий Стив Жобс Стэнфорд университети битирувчилари қаршисида турган ҳолда юз минглаб қалблардан жой олган машҳур нутқини сўзлайди. Унда Apple компанияси асосчиси ва кашфиётлари билан дунёни ўзгартира олган Стив Жобс 3 та оддий ҳикоялар билан бўлишади. Мазкур самимий, ўта таъсирчан ҳикоялар нуқталарни боғлаш, муҳаббат ва йўқотиш, ҳамда ўлим ҳақида эди. Стив ўзининг болалиги, туғилиши билан онаси бошқа оилага бериб юборгани, қийинчиликда ўтган ёшлиги, оч қолган кунлари, муваффақиятсизликлари, саратон касали билан юзлашган пайтлари ва энг муҳими — севган ишини ҳеч қачон ташлаб қўймагани ҳақида сўзлаб беради. 

Орадан бор-йўғи 6 йил ўтиб, 2011 йилда ўлим Стив Жобсни орамиздан олиб кетди. Аммо унинг сўзлари ҳалигача қалбларда жаранглаб турибди:

“Сизнинг вақтингиз чегараланган. Шунинг учун уни бекорга сарфламанг. Ақидаларнинг қармоғига илинманг – бошқаларнинг фикри билан яшаманг. Бегона фикрлар шовқини ўзингизнинг ички овозингизни босиб кетишига йўл қўйманг. Энг муҳими, ўз қалбингиз ва ички сезгингиз кўрсатган йўлдан юришга ўзингизда куч топа олинг.” 

Стив Жобснинг нутқини яқин кунларда мактабни ва университетни битиражак ўқувчи ва талабаларга табрик сифатида аудиога айлантирдим. 

Нутқни сиз ҳам тинглаб кўринг. Дўстларингиз ва айниқса, битирувчилар билан бўлишишни унутманг!   

👉@madnifique👈

📚 Madina Musayeva 🎧

19 May 2025 04:38

“Farzandim telefonidan bosh ko'tarmaydi, haqiqiy hayotdan uzilib, qandaydir begona hayotda yashayotgandek. Doim behalovat, besabr, jizzaki, sababini bilolmay boshimiz qotgan."

Shu holat sizga ham tanishmi? Biz bilgan, ko'chalarni changitib, o'rtoqlaring bilan o'ynab ulg‘ayish, baxtiyor bolalik endi sarobmi? Nega o‘smirlar beqanoat, nimadandir mudom norozi?

Farengeyt Press nashriyoti taniqli psixolog Jonatan Haidtning “Behalovat avlod” bestsellerini o‘zbek tiliga o‘girish uchun tarjima huquqini olish jarayonida. Qator mashhur insonlar tavsiya etayotgan mazkur kitob smartfonlar, ijtimoiy tarmoqlar va yoshlardagi ruhiy salomatlik inqirozi o‘rtasidagi bog‘liqlikni o‘rganish bo‘yicha ancha batafsil tadqiqotdir. “Behalovat avlod” o‘zbekzabon ota-onalar, pedagoglar va, ayniqsa, o‘smirlar ta’limi va salomatligiga mas’ul davlat va nodavlat tashkilotlarning mavzuga e‘tibori va jiddiy muhokamasiga, yechimlarni birgalikda izlashimizga turtki berishiga ishonamiz.

#jonatan_haidt #anxious_generation #behalovat_avlod #tarjima_huquqi

⬇️ Bizni ijtimoiy tarmoq sahifalarimizda kuzating va ushbu postni do'stlaringiz bilan ulashing!

Telegram | Facebook | Instagram | X

📚 Madina Musayeva 🎧

02 May 2025 05:10

📚 Kitobning ohanrabosi shundaki, u insonni nafaqat yetuklikka yetaklaydi, balki yagona g‘oya sari intiluvchi maslakdoshlarni birlashtira oladi. Shu kunlarda qator ijtimoiy tarmoqlarda FP tarzidagi logotipni bir qator foydalanuvchilar ulashdi; uning nimaligi haqidagi taxminlarning ayrimlari mazkur logotip yangi nashriyotga tegishliligi, uning nomi qandayligi haqida bo‘ldi.

@Farengeyt_Press – chindan yangi nashriyot va unga turli sohalarda faoliyat ko‘rsatib kelayotgan, ayni chog‘da, kitob va kitobxonlikka befarq bo‘lmagan faollar va mutaxassislar asos soldi. Biz – jurnalist va tarjimon Sardor Salim, muharrir va faylasuf Xurshid Yo‘ldoshev, iqtisodchi olim Behzod Alimov, pedagog mutaxassis va tadqiqotchi Komil Jalilov hamda audiokitoblar suxandoni va kitobxonlik targ‘ibotchisi Madina Musayevalar – mushtarak g‘oyamiz va maqsadimiz ifodasi o‘laroq “Farengeyt Press” nashriyoti nomini tanlashda yozuvchi Rey Bredberining 🔥“Farengeyt bo‘yicha 451 daraja” asaridagi “Ahli kitob” (“Book People”) g‘oyasidan ilhomlandik. Ahli kitob – hayotini kitoblarni avaylash va ilmni odamlarga yetkazishga bag‘ishlagan insonlardir. Biz endilikda kitob, mutolaa va ma’rifatga qilinajak xizmatimizni mustaqil nashriyot sifatida davom ettirishga qaror qildik. Shuningdek, jamoamizda o‘z sohalari yetakchilaridan bo‘lmish art-direktor Orzu A’zam hamda marketolog Samira Latipova ham faoliyat yuritmoqda.

Nashriyotimizning bosh g‘oyasi o‘zbek kitobxoniga progressiv, yangi, dolzarb bilimlarni sifatli va tezkor sur’atlarda taqdim etish orqali ilm sarhadlarini kengaytirishga hissa qo‘shishdan iborat. Bunda biz ham tarjima, ham mahalliy muallif va mutaxassislar asarlarini kitobxonga taqdim etishni rejalashtirmoqdamiz. Bundan tashqari, nashriyotimiz faoliyati doirasida yana qator qo‘shimcha ma’rifiy loyihalarni amalga oshirish ham ko‘zda tutilmoqda.

🔜 Yaqin kunlarda qaysi kitoblarni o‘zbek kitobxoniga taqdim etishimiz haqida ma’lumot bera boshlaymiz. Kichik sirni ochishimiz mumkin: qisqa vaqt davomida qator kitoblar tarjimasiga mualliflik huquqini olish va tarjima jarayonini boshlab yuborishga ulgurdik. Mazkur kitoblar O‘zbekiston kitob bozori va o‘zbek kitobxoni javoniga yangi yo‘nalish, mavzu va bilimlarni olib kirishiga ishonchimiz komil.

Bizni ijtimoiy tarmoq sahifalarimizda kuzating va ushbu postni do'stlaringiz bilan ulashing:

Telegram | Facebook | Instagram | X

📚 Madina Musayeva 🎧

25 February 2025 16:42

​​“Одамзодга мансуб иллатлар ичида энг марази қўрқоқликдир.”

Қисқа танаффусдан сўнг “Уста ва Маргарита” мутолаасини давом эттирамиз, сўнгги бобларини шу ҳафта тугатамиз. Қуйидаги 24-25-бобларни ўқиб, янги хулосаларга келдим.

“Уста ва Маргарита”ни 5-6 йилда қайта ўқиб тураман. Ҳар сафар у мен учун янги бир мавзуда ёзилгандек туюлади. Масалан, биринчи мутолаада улкан муҳаббат ҳикояси бўлса, кейинги сафар – сиёсат ҳақида, ундан кейин – дин… Яъни, вақт ўтиб, улғайишимиз баробарида роман ҳам биз билан бирга ўзгарадигандек гўё.

Айни дамдаги мутолаам романнинг бутунлай янги қиррасини – қўрқоқликни қораловчи жиҳатини очиб берди. Тунов куни “Уста ва Маргаританинг метафизикаси” деган ажойиб подкастни тингладим, у ерда романнинг айнан шу ғояси очиб берилади: Маргаританинг жасорати ва Уста ҳамда Пилатнинг қўрқуви бир-бирига қарши қўйилади.

Романни илк бор мутолаа қилаётган бўлсангиз, якунида шу ҳақида ҳам ўйлаб кўрарсиз: “Уста ва Маргарита” сиз учун нима ҳақида бўлди?

👉@madnifique👈

📚 Madina Musayeva 🎧

29 January 2025 17:29

https://youtu.be/sxfOM3Xf6KE?si=IsqsGA5JB-wnlh1q

Yaxshi insondan yaxshi video. Ko’rish kerak. Kitob kontentlar bizga zarur. Samimiy video

📚 Madina Musayeva 🎧

28 January 2025 15:23

🎙️Usta va Margarita, jonli mutolaa, 20-bob

📚 Madina Musayeva 🎧

16 January 2025 14:50

🎧 “Муҳаббат, оёқ остидан чиққан фалокатдай, лоп этиб пайдо бўлдию икковимизни баравар маҳв қилди”...

13-бобда Уста ва Маргаританинг севги тарихи билан танишамиз. Шунингдек, Понтий Пилат ҳақидаги воқеалар аслида шунчаки параллел ҳикоя эмас, ёзувчи Уста ёзган романдан парчалар эканлиги ва бу роман Уста ҳаётини фожиали тарзда буриб юборганидан воқиф бўламиз. 

Жонли эфирда қайта учрашгунча! 

👉@madnifique👈

📚 Madina Musayeva 🎧

09 January 2025 16:54

​​Бугун “Уста ва Маргарита” нинг еттинчи ва саккизинчи бобларини ўқидик. Еттинчи бобда асар учун аҳамиятга молик макон – Садовая кўчасидаги №50 квартира ҳақида сўзланади. “Бехосият квартира” дея номланувчи ушбу квартиранинг аҳамиятга молик ери шундаки, у романда сеҳрли ва реал ҳаётни боғловчи кўприк, замонавий тилда айтганда “портал” бўлиб хизмат қилади. Дейлик, Харри Поттердаги 9¾ платформа ҳам мана шундай портал. Ундан ташқари, Булгаков квартирани совет жамияти ва даври айрим зиёлиларининг салбий томонларини фош этувчи ва жазоловчи макон сифатида ҳам кўрсатади. Уни тасвирлашда роман давомида Булгаков мистик ва готик элементлардан фойдаланади.

Квартиранинг прототипи сифатида ёзувчи ўзи 1921-1924 йилларда истиқомат қилган Москванинг Садовая кўчасидаги ўнинчи уйнинг №50 коммунал квартирасини олган ва айнан шу коммунал квартирадаги унинг қўшниси биз танишиб улгурган Аннушка бўлган. 

Айтганча, январ бошидан биргаликда китобни ўқиётган ёки тинглаётганлар учун: 8-бобни тугатиб, бир ҳафтача фурсатда 33 та боблик катта китобнинг деярли 25 фоизини битириб бўлдик 👏

Эртага жонли эфирда қайта учрашгунча! 

👉@madnifique👈

📚 Madina Musayeva 🎧

01 February 2026 15:15

Kecha X tarmogʻidagi BookClub sahifasida Farengeyt Press nashriyoti chop qilgan "Behalovat avlod" kitobi muhokamasi boʻlib oʻtdi. Muhokama nashriyot vakillari nega nashr uchun bu kitob tanlangani va kitobdan olgan taassurotlari haqida , gapirib berishdi, shuningdek, kitobda koʻtarilgan masalalar va ularning Oʻzbekiston uchun yechimlari boʻyicha fikr almashdik. Muhokamada qatnasha olmaganlar muhokama audiosini BookClub sahifasida tinglashlari mumkin. Va "Behalovat avlod" kitobini hali oʻqimagan boʻlsangiz, albatta oʻqing - har bir ota-ona oʻqishi mumkin boʻlgan kitob. Kitobni "Qamar" doʻkonidan va boshqa kitob doʻkonlaridan topish mumkin.

BookClub'ning anʼanaviy kitob muhokamalari esa davom etadi. Fevral oyi uchun tanlangan kitob jahon adabiyotining muhim asarlaridan, Nobel mukofoti sovrindori Goldingning "Pashshalar hukmdori" asari. Kitobni yaqinda "Akademnashr" oʻzbek tilida chop qildi. Kitob muhokamalariga qoʻshiling!

📚 Madina Musayeva 🎧

26 October 2025 12:29

Jamiyatni oʻzgartiradigan kitoblar | Sigma Podkast

Navbatdagi podkastimizning qahramonlari bu — @farengeyt_press nashriyoti. Ushbu nashriyot ijtimoiy tadbirkorlik loyihasi bo'lib, daromad qilishni o'zining asosiy maqsadi sifatida belgilamagan. Nashriyot qisqa muddatda bolalar va o'smirlar uchun "Boshlang'ich saboqlar" turkumi ostida 3 ta kitob nashr qilishga ulgurdi. Shuningdek, hozirda so'nggi yillarning mashhur kitoblaridan biri "The Anxious Generation" tarjimasi ustida ishlamoqda.

Tomosha qiling:

https://youtu.be/1ilODVvh8c0

📚 Madina Musayeva 🎧

23 September 2025 14:29

Usborne "Boshlang'ich saboqlar" turkumidan kitoblarimizning ilk uchtasi Istanbuldagi "Megabasim" matbaasida bosilmoqda. Bularning ilk nishona nusxalari ham qo'limizga yetib keldi. Qattiq muqovada, yuqori sifatda chop etilmoqda.

Bolalar yanada yaxshirog'iga loyiq, biz shunga harakat qilamiz!

#FarengeytPress #boshlangich_saboqlar #Usborne_Kimyo #Usborne_Fizika #Usborne_Biologiya #IlmSoddaTilda

Facebook | Instagram | X

📚 Madina Musayeva 🎧

09 August 2025 16:15

Yangi video men sevim o’qigan ilmiy-ommabop kitoblarimdan biri haqida. Z avlodga gadjetlar hamda ijtimoiy tarmoqlarning ta’siri tahlili aynan shu kitobda

https://youtu.be/2bXMvzT9P6Y?si=WSJz5MFyOlz8ZUF9

📚 Madina Musayeva 🎧

17 July 2025 07:40

Граф Монте-Кристони ўқиб, чатда муҳокама қиламизми? Баҳонада ўзим ҳам қайта ўқирдим, бунинг устига @asaxiybooks нашр этган янги версияси асл ҳолида, қайта таҳрирда тўлиқ ва цензурасиз чиққан, уни мен ҳам ўқимаганман. Кимга қизиқ, нечта одам йиғиламиз, комментларга ёзингларчи ☺️

👉@madnifique👈

📚 Madina Musayeva 🎧

09 July 2025 08:21

Цензура, цензуражон, цензурақизғалдоқ. Айниқса “эстетик талаблар” деган қисми ўта саволли. Эстетика — субъектив, шахсий фикр ва дидга боғлиқ нарса, унинг мезонлари ноаниқ. Дейлик, машҳур “Шайтанат” асари шахсан мен учун ноэстетик ва дидсиз, лекин бу уни тақиқлаш керак дегани эмас-ку.

Беҳзод Ҳошимов “Учинчи Ренессанс” деган иддаоли даврдан аввал “Why Nations Fail” (“Мамлакатлар таназзули сабаблари”) китобини олиб келишда Ўзбекистон ҳақидаги саҳифаларни йиртиб ташлашга мажбур бўлганини айтиб берарди.

Журналист Питер Померанцевнинг “This is Not Propaganda: Adventures in the War Against Reality” китобида Совет давридаги аёвсиз китоб цензураси тасвирланади. “Самиздат” нашр этган китобларни одамлар пойабзал қутисига яшириб ўқишган. Померанцевнинг онаси шундай китобни уйга олиб келганида, бувиси йиғлайди: “Сени қамашади, эмизикли боланг қолиб кетади”…

Дежавю. Бир қадам олдинга, ўн қадам ортга.

👉@madnifique👈

/channel/jalilovqaydlar/3288

📚 Madina Musayeva 🎧

20 June 2025 11:05

Farengeyt Press nashriyoti o’smirlarning moliyaviy savodxonligini oshirish yo‘lida Anorbank bilan hamkorlik kelishuvini imzoladi.

Hamkorlik doirasida “Usborne” nashriyotining mashhur “For Beginners” turkumidan “Pul: boshlang‘ich saboqlar” kitobi o‘zbek tilida nashr etiladi. Ushbu kitob bolalar va o‘smirlarga pulning mohiyatini, iqtisodiyotda qanday rol o‘ynashini, tarixini, valyutalar, ularning banklar va boshqa moliyaviy tizimlardagi o‘rnini sodda va qiziqarli tushuntirib beradi.

Bolalar va o’smirlarda moliyaviy savodxonlikni erta yoshdan shakllantirish muvaffaqiyatli moliyaviy kelajak sari pillapoyadir.

📘 Kitob sentabr oyida sotuvga chiqadi. Yoshlar uchun — bilimga moliyaviy eshik ochildi!

#FarengeytPress #Anorbank #BoshlangichSaboqlar #MoliyaviySavodxonlik

📚 Madina Musayeva 🎧

01 June 2025 19:50

🌱 1-июн – Халқаро болаларни ҳимоя қилиш куни.

Мендaн кўп сўрашади: “Шунча йиллар аввал кўчиб кетгансан, нега Ўзбекистон учун қайғуришда давом этяпсан?” Бу саволга жавобларим кўп, аммо энг асосийси шундаки, ўзбекистонлик болалар мен учун бегона эмас.

Миллатнинг бегона боласи бўлмайди. Биз, қаерда яшашимиздан қатъий назар, миллатмиз. Ҳар биримизнинг нечта фарзандимиз борлиги муҳим эмас – миллатимиз келажаги бўлган болалар барчамизнинг фарзандларимиз. Уларда бизнинг ДНК, уларда бизнинг келажагимиз яшайди. Шунинг учун болалар менга мақсад, маъно ва куч бағишлайди.

Болаларимиз энг қулай мактабларда ўқиши, замонавий китобларга тўла шинам кутубхоналарга бориши, тоза ҳаволи, осойишта парк ва ўйингоҳларда болаликни ҳис қилиб ўсиши биз, катталарнинг масъулиятидир. Бунга ҳар биримиз қўлдан келганча ҳисса қўшишимиз керак.

Биламан, балки бу сўзлар ҳаддан ташқари содда, ҳатто баландпарвоз туюлар. Бир неча йил аввал илк аудиокитобларимни ёзаётиб “бу кимгадир керакми ўзи” деб савол берганимда, баъзиларимизга пессимист бўлиб туюладиган, ҳар доим ҳам фикримиз бир жойдан чиқмайдиган, лекин доимо қадрли Отабек Бакиров менга шундай деган:

“Биз экаётган дарахтларимиз соясида ўтирмаслигимизни билсак ҳам тўхтамаслигимиз керак.”

Ҳар сафар у-бу мактаб боласи келиб аудиокитоб учун “раҳмат” деганида, ана шу сўзлар ёдимга тушади. Биз ўтиб кетамиз, лекин айнан ана шундай кичик амалларда яшаймиз.

Мен баландпарвоз, миллатчилик руҳидаги шиорларга ишонмайман. Шунга ишонманки, биттагина китоб ва йўлида учраган яхши инсон болага катта орзулар ва мақсадларни тақдим эта олади.

Тушунаман, ҳозир оптимизм учун сабаб оз. Қилган ишларимиз саҳродаги қумга қуйилган сувдек сингиб кетаяпти, деб ўйлаш осон. Лекин, эҳтимол, биз сувни қумга эмас, ниҳолга қуяётгандирмиз. Ва эҳтимол, биз суғораётган ниҳол эртага улкан дарахтга айланиб, соясида болалар ўтирар.

Мен бунга ишонгим келади. Ва сиз ҳам ишонинг. Дейлик, қайсидир кутубхона ёки болага биттагина китоб тақдим этаётганингизда – орангизда бундайларни йиллар давомида кўп кузатдим – ишонинг, сиз ҳам дарахт экмоқдасиз.

Халқаро болаларни ҳимоя қилиш куни билан!

👉@madnifique👈

📚 Madina Musayeva 🎧

05 May 2025 06:06

“Farengeyt Press” nashriyoti “Usborne” (Britaniya) nashriyotining o‘smirlar uchun 16 kitobdan iborat “Boshlang‘ich saboqlar” (For Beginners) turkumini o‘zbek tilida chop etish bo‘yicha ilk qadamni qo‘ydi. Dastlabki bosqich o‘laroq turkumdagi 6 ta kitob – “Pul”, “Iqtisodiyot”, “Kimyo”, “Fizika”, “Matematika” va “Biologiya”ni o‘zbekchaga o‘girish uchun tarjima huquqi olindi. Keyingi bosqichda mazkur turkumdagi siyosat, huquq, ekologiya, falsafa va sun’iy intellektga daxldor kitoblarni ham o‘zbekzabon bolalar uchun nashrga tayyorlash rejalashtirilmoqda.

Kitoblar 10+ yoshdagi oʻsmirlar uchun moʻljallangan boʻlsa-da, mavzuga qiziqadigan katta yoshdagi auditoriya uchun ham manfaatli boʻlishi mumkin.

#usborne
#boshlangich_saboqlar
#for_beginners
#tarjima_huquqi

Telegram | Facebook | Instagram | X

📚 Madina Musayeva 🎧

29 April 2025 14:52

Bir qator ijtimoiy tarmoq faol foydalanuvchilari ushbu logotipni post qilishdi.

Bu yangi nashriyot logotipi degan tahmin bildirilmoqda.

Tez kunlarda bilib olamiz. Yangi loyiha jamoasiga omad.


#yangilik
@allaevuzb

📚 Madina Musayeva 🎧

12 February 2025 05:00

📣🎙️Audiokitob o’qishga qiziquvchilar diqqatiga! @SharoitPlus “Kitob Plus — nogironligi bo‘lgan shaxslar uchun audiokitoblar onlayn kutubxonasini rivojlantirish” loyihasi doirasida audiokitoblar uchun matnlarni ravon va ifodali tarzda o‘qiy oladigan diktorlarni qidirmoqda: ⤵️

📚 Madina Musayeva 🎧

29 January 2025 17:29

✨Amerika adabiyotidan nashr qilingan asarlar

👋Madlen Miller – Kirka

Tarjimon: Mirzohid Muzaffar
Sahifalari soni: 480 bet
Muqova: qattiq
Narxi: 70 000 so‘m

Tarjimon: Hasan Teshaboyev
Sahifalari soni: 400 bet
Muqova: qattiq
Narxi: 55 000 so‘m

Tarjimon: Ilhom Salimov
Sahifalari soni: 384 bet
Muqova: qattiq
Narxi: 50 000 so‘m

Tarjimon: Maftuna Po‘latova
Sahifalari soni: 400 bet
Muqova: qattiq
Narxi: 50 000 so‘m

Tarjimon: Mirzohid Muzaffar
Sahifalari soni: 400 bet
Muqova: qattiq
Narxi: 60 000 so‘m

Tarjimon: Mirzohid Muzaffar
Sahifalari soni: 928 bet
Muqova: qattiq
Narxi: 170 000 so‘m

📚 Madina Musayeva 🎧

21 January 2025 16:23

🎧 “Уста ва Маргарита”нинг 16-боби “китоб ичидаги китоб” – Устанинг Исо Масиҳ ва Понтий Пилат ҳақидаги китобининг давоми бўлиб, унда қатл саҳнаси акс этади. Бобнинг аксарият қисми Иешуа ва икки жиноятчининг қатли давомида Иешуани қутқаришга ҳаракат қилаётган Левий Матвей номидан ҳикоя қилинади. Левий Матвей ва 12 апостоллар-шогирдлардан бири орасида параллел ўтказиш мумкиндир, лекин, назаримда, аслида Булгаковнинг мақсади балки бу бўлмаган. Левий Матвей образида у инсон мушкул вазиятда бўлганида уни қутқаришга ва азобларидан халос этишга ҳаракат қилувчи сўнгги дўст ва умидни тўплагандек кўринади менга. Сени барча тарк этганда оммага қўшилиб сени тепкиламайдиган нажот.   

16-бобдан аввалги ҳар бир бобда ҳам Булгаков ўзига хос моҳирлик билан ўша даврдаги долзарб муаммоларни кўтаради ва уларнинг устидан кулади. Масалан, Варьете саҳналарида Булгаков Воланднинг нигоҳи билан одамларнинг очкўзлигини ва инсонийликни унутиш феноменига назар ташлайди. Никонор Иванович атрофидаги валюта воқеаларида эса у Совет давридаги валюта билан боғлиқ сиёсат мавзусини кўтаради, туш кўриш саҳналари воситасида бу мавзу нақадар абсурд даражага етиб борганини ифодалайди. Шунингдек, Булгаков китоб ичидаги китоб, саҳна ичида саҳна услубида ўқувчи/тингловчи тасаввури билан ўйнайди: у, дейлик, баландпарвоз шиорлар қичқириш ва одамларни оммавий уялтириш баробарида ўзи порахўрлик ва разолатга ғарқ бўлган амалдорларни театр саҳнасига олиб чиқиб, юзидаги ниқобни юлиб олади. Варьете саҳналари ҳақида яна китоб давомида батафсил фикрлашамиз.    

“Янги одат шакллантириш учун бир ишни 21 кун давомида қилиш кифоя” теориясини текшириш учун биргаликда китоб ўқиётган/тинглаётганларни табриклашим мумкин: 21 кун ичида “Уста ва Маргарита” романининг ярмини ўқиб тугатдик. Айтишларича, кўпчилик янги йилда мақсад қўйса, одатда мана шу 21 кун давомида ундан воз кечар экан, биз эса давом этяпмиз!

Жонли эфирда қайта учрашгунча! 

👉@madnifique👈

📚 Madina Musayeva 🎧

13 January 2025 15:57

📚 "Январдан кўпроқ китоб ўқийман" деган ниятда "Уста ва Маргарита" романини тинглаётган бўлсангиз, табриклайман: бугун 10- ва 11-бобларни тугатсангиз, 13 кун ичида катта бир китобнинг учдан бир қисмини тинглаб улгурган бўласиз!

Ўн биринчи боб сўнгида, энг кутилмаган макон – шоир Бездомнийни олиб келишган жиннихона балконида, ой шуъласи остида биз кутган, романнинг энг муҳим қаҳрамонларидан бири кириб келади...

Жонли эфирда қайта учрашгунча! 

👉@madnifique👈

📚 Madina Musayeva 🎧

06 January 2025 17:07

“Аннушка мойни тўкиб бўлди”

“Уста ва Маргарита” нинг 3-4-бобларини тинглаб улгурганлар Михаил Булгаковнинг ушбу машҳур ибораси нимани англатишини тушуниб етишгандир. Тинглаб улгурмаганлар учун бобларни бўлишяпман. 

“Аннушка мойни тўкиб бўлди” каби иборалар қандайдир фалсафий, чуқур тушунчаларни содда ва тушунарли тарзда етказиб бериши сабабли халқ оғзига тушади ҳамда шу вақтнинг ўзида қатор маъноларни ўз ичига олади. Дейлик, “12 стул” ва “Олтин бузоқ” асарлари муаллифлари Ильф ва Петровда “Авом учун оғу неча пулдан?”, шоир Уолт Уитменда “О, капитан, менинг капитаним”, Жорж Оруэллда “Катта оға сени кузатмоқда”, Шекспирда “Тирик қолмоқ ё ўлмоқ, шудир масала!”, мифологияда “Пандора қутиси очилди” ва бошқалар. 

“Аннушка мойни тўкиб бўлди” нинг маънолари: 1) Бир қилинган ҳаракат энди тўхтатиб ёки ортга қайтариб бўлмас воқеалар занжирини бошлаб бергани; 2) Тақдирдан қочиб бўлмаслиги; 3) Бахтсиз ҳодисаларнинг муқаддимаси. 

Булгаковнинг бошқа асарларида ҳам Аннушка исми бу маънода учраб туради. Нега айнан Аннушка десангиз, айтишларича, Булгаковнинг Аннушка исмли жанжалкаш қўшниси бўлган ва ҳаттоки баъзан Булгаков ухлаётган пайтда идишларни даҳлизда зиналарга уриб ўтиб, уйғотиб ҳам юборган. Шунинг учун, қўшниларингизни безовта қилаётганингизда, аввал орасида Булгаков каби исмингизни тарихга абадий муҳрлаб кетадиган ёзувчи йўқлигига амин бўлинг )) 

Лекин, шунча бет ўқидик, Уста ва Маргарита ўзи қани, дерсиз? Жавоб, балки, Бездомнийни куч билан ақлдан озди дея жўнатишган ғайриоддий жойдадир…

Эртага жонли эфирда қайта учрашгунча! 👏

👉@madnifique👈