Telegram-канал tikvahethiopia - TIKVAH-ETHIOPIA: Unsorted

TIKVAH-ETHIOPIA

06 Oct 2024 09:19

#Update

" የፕሬዚዳንት ሳህለወርቅ የሥልጣን ዘመን የተጠናቀቀ ቢሆንም፣ በሚቀጥለው ሳምንት አዲስ ፕሬዚዳንት ለመምረጥ የተያዘ ፕሮግራም የለም ፤ ምናልባት ወደፊት ሊኖር ይችላል " - የሕ/ተ/ም/ቤትና የአፈ ጉባዔው አማካሪ ኮሚቴ አባል (ስማቸው እንዲገለጽ ያልፈለጉ)

የ6 ዓመት የሥልጣን ዘመናቸውን ያጠናቀቁት ፕሬዚዳንት ሳህለወርቅ ዘውዴ፣ የሕዝብ ተወካዮችና የፌዴሬሽን ምክር ቤቶችን የ2017 የሥራ ዘመን ነገ ያስጀምራሉ።

የሁለቱ ምክር ቤቶች የሥራ ዘመን የመክፈቻ ሥነ ሥርዓት የሪፐብሊኩ ፕሬዚዳንት ሳህለወርቅ በተገኙበት ነገ ሰኞ ከቀኑ 8፡00 ሰዓት ጀምሮ እንደሚካሄድ የሕ/ተ/ም/ቤት መረጃ ያሳያል።

ፕሬዚዳንት ሳህለወርቅ የመጀመርያ የሥልጣን ዘመናቸውን ያገባደዱ ቢሆንም፣ ሰኞ የሚጠበቀው የሁለቱ ምክር ቤቶች የሥራ ዘመን የመክፈቻ ሥነ ሥርዓት ከተካሄደ በኋላ ቀጣዩ የአገሪቱ ርዕሰ ብሔር ምርጫ የሚካሄድ ስለመሆኑ ግን የሕዝብ ተወካዮች ም/ቤት መረጃ ያለው ነገር የለም።

የአገሪቱ ርዕሰ ብሔር የሥልጣን ዘመን 6 ዓመት እንደሆነ፣ ነገር ግን ርዕሰ ብሔሩ ለሁለተኛ ጊዜ ሊመረጥ እንደሚችል ሕገ መንግሥቱ ይደነግጋል።

የሥልጣን ዘመናቸውን ባጠናቀቁት ፕሬዚዳንት ሳህለወርቅ ምትክ ሌላ ርዕሰ ብሔር ይመረጥ ይሆን ? ወይም እሳቸው ለሁለተኛ ጊዜ በርዕሰ ብሔርነት የመመረጥ ዕድል ያገኙ ይሆን ? የሚለውን ለማወቅ ሪፖርተር ጋዜጣ የተለያዩ የም/ቤቱ አባላትን ያነጋገረ ቢሆንም ሁሉም ስለዚህ ጉዳይ የሰሙት ነገር እንደሌለና ከምክር ቤቱም ይህንን ጉዳይ የተመለከተ መረጃ እንዳልደረሳቸው ገልጸዋል።

ስማቸውን መግለጽ ያልፈለጉ የሕዝብ ተወካዮች ምክር ቤትና የአፈ ጉባዔው አማካሪ ኮሚቴ አባል ፤ ሰኞ በሚጀመረው የሁለቱ ምክር ቤቶች መክፈቻ ሥነ ሥርዓት ላይ አዲስ ርዕሰ ብሔር ምርጫ የሚካሄድ ቢሆን ኖሮ እሳቸው ሊያውቁት እንደሚችሉ በመጠቆም፣ የርዕሰ ብሔር ምርጫ ይካሄዳል የሚል ዕምነት እንደሌላቸው ገልጸዋል።

" የፕሬዚዳንት ሳህለወርቅ የሥልጣን ዘመን የተጠናቀቀ ቢሆንም፣ በሚቀጥለው ሳምንት አዲስ ፕሬዚዳንት ለመምረጥ የተያዘ ፕሮግራም የለም፣ ምናልባት ወደፊት ሊኖር ይችላል " ብለዋል።

አንድ የሕግ ባለሙያ ስለ ጉዳዩ በሰጡት ቃል ደግሞ ፕሬዚዳንት ሳህለወርቅ በርዕሰ ብሔርነት የተሰየሙት ጥቅምት 15 ቀን 2011 ዓ/ም መሆኑን አስታውሰው 6ኛ ዓመታቸውን የሚያገባድዱት በጥቅምት ወር 2017 ዓ.ም. በመሆኑ አዲስ ርዕሰ ብሔር የመምረጥ ሒደት እስከዚያ ድረስ ሊገፋ እንደሚችል አስረድተዋል።

ከ20 የአገሪቱ የካቢኔ አባላት ግማሹ ሴት ሆነው በተመረጡ በሳምንቱ የመጀመሪያ ሴት ፕሬዚዳንት በመሆን የተሾሙት ፕሬዚዳንት ሳህለወርቅ፣ በወቅቱ አድርገውት በነበረው ንግግር በዋናነት ሰላምና ሴቶች ላይ ያጠነጠኑ መልዕክቶችን ማስተላለፋቸው ይታወሳል።

በወቅቱ ባስተላለፉት መልዕክት፣" በኃላፊነት ቆይታዬ ዋነኛ ትኩረቴ ሰላም በማስፈን ላይ እንድንረባረብ ማድረግ ይሆናል… ኢትዮጵያዊነትን ከሰላም ጋር አንድና ህያው ለማድረግ በጋራ እንሥራ " ብለው ነበር።

አክለውም፣ " የሴቶችን ማንኛውንም ዓይነት ጥቃት የማይቀበል ትውልድ መገንባት አለብን… ሴቶች የቤተሰብም የአገርም ምሰሶ ናቸው፡፡ ሴት አገር ነች፣ አገርን ደግሞ ሴቱም ወንዱም ሊንከባከበው ይገባል " ብለው ነበር።

" ስለሴቶች አብዝቼ የተናገርኩ ከመሰላችሁ ገና ምኑ ተነክቶ ? " ሲሉ የምክር ቤቱን አባላት በፈገግታ ሞልተውት ነበር።

በተጨማሪ " ታላቅ አገር የመገንባት ህልማችንን ዕውን ለማድረግ ከሰላም ውጪ አቋራጭም አማራጭም የለንም፡፡ ስለዚህም ሁላችንም ሰላማችንን አጥብቀን እንድንጠብቅ ከሁሉም በላይ ሰላም ሲታወክ በምትሰቃየዋ የእናት ስም አጥብቄ እጠይቃችኋለሁ " በማለት ጥሪ አቅርበው ነበር።

የሥልጣን ዘመን ጉዟቸው እጅግ ውስብስብና በርካታ ፈተናዎች ያሉበት እንደሚሆን እንደሚጠብቁ ያስታወቁት ፕሬዚዳንቷ " የተጀመረው ለውጥ ሁሉም ኢትዮጵያዊ በእኩልነት የሚኖርባትን አገር ዕውን እንደሚያደርግ እተማመናለሁ " በማለት ተስፋቸውን ገልጸው ነበር።

ይሁን እንጂ ፕሬዚዳንት ሳህለወርቅ የሥልጣን ዘመን፣ " ዋነኛ ትኩረቴ ሰላም በማስፈን ላይ እንድንረባረብ ማድረግ ይሆናል " እንዳሉት ሳይሆን እንደ ሥጋታቸው ማለትም፣ " እጅግ ውስብስብና በርካታ ፈተናዎች ያሉበት ኃላፊነት ይሆናል " ብለው እንደ ሠጉት ሆኖ አልፏል።

በርካታ ሰብዓዊ ጉዳትና የኢኮኖሚ ውድመት ካስከተለው የሰሜኑ ጦርነት አንስቶ በአማራና በኦሮሚያ ክልሎች እስካሁን ደም እያፋሰሰ የዘለቀው ግጭትና መከራ በፕሬዚዳንት ሳህለወርቅ የሥልጣን ዘመን ተከስቷል።

በዚህም ዋነኛ ገፈት ቀማሾቹ ሴቶችና ሕፃናት ዋነኛ ገፈት ቀማሾች መሆናቸው፣ በኢትዮጵያ ሰብዓዊ መብቶች ኮሚሽን የምርመራ ሪፖርት ጭምር የተረጋገጠ መሆኑ ይታወሳል።

ፕሬዚዳንት ሳህለወርቅ በአዲስ አበባ ከተማ ተወልደው ያደጉ ሲሆን፣ የመጀመሪያና የሁለተኛ ደረጃ ትምህርታቸውን በአዲስ አበባ ተከታትለው የመጀመሪያ ዲግሪያቸውን ፈረንሣይ ከሚገኘው ሞንትፔለ ዩኒቨርሲቲ በተፈጥሮ ሳይንስ አግኝተዋል።

የእንግሊዝኛ፣ የፈረንሣይኛና የአማርኛ ቋንቋዎችን አቀላጥፈው መናገር ይችላሉ፡፡

ፕሬዚዳንት ሳህለወርቅ ኢትዮጵያን በመወከል ፦
- በሴኔጋል፣
- በኬፕቨርዴ፣
- በጊኒ ቢሳኦ፣
- በጋምቢያ
- በጊኒ በአምባሳደርነት አገልግለዋል።

በጂቡቲ የኢትዮጵያ ባለሙሉ ሥልጣን አምባሳደርና የኢጋድ ቋሚ መልዕክተኛ በመሆንም አገልግለዋል፡፡

በተጨማሪ በፈረንሣይ የኢትዮጵያ አምባሳደር፣ በዩኔስኮ የኢትዮጵያ ቋሚ መልዕክተኛ፣ በቱኒዚያና በሞሮኮም የኢትዮጵያ ተጠሪ ሆነው ያገለገሉ ሲሆን፣ በመካከለኛው አፍሪካ ሪፐብሊክ የተባበሩት መንግሥታት ድርጅት የተቀናጀ የሰላም ግንባታ ቢሮ ኃላፊ በመሆን ሠርተዋል፡፡

ፕሬዚዳንት ሳህለወርቅ ዘውዴ በርዕሰ ብሔርነት ከመሾማቸው በፊት የተባበሩት መንግሥታት ድርጅት ዋና ጸሐፊ አንቶኒዮ ጉቴሬስ ልዩ ረዳትና በአፍሪካ ኅብረት የተባበሩት መንግሥታት ድርጅት ተወካይ በመሆንም አገልግለዋል፡፡

ይህ መረጃ ባለቤትነቱ የሪፖርተር ጋዜጣ ነው።

@tikvahethiopia